Mu Chichiiy Paam Ko N’en Ni Ta’ Jesus Ni Ngan Rin’
“Kug dag ngomed e n’en ni nguum rin’ed ngomed, ya nge yog ni mrin’ed nri bod rogon e n’en ni fini gu rin’ ngomed.”—JOHN 13:15.
1. Mang fan nib puluw ni pi Kristiano e nguur folwokgad rok Jesus?
U NAP’AN chepin e girdi’ ni polo’, ma kemus ntaabe’ e immoy ni de denen u nap’an e yafas rok ni polo’. Cha’ nem e Jesus. “Dariy taa be’ ni de denen” ya kemus ni goo Jesus. (1 Kings 8:46; Roma 3:23) Aram fan, ni tin riyul’ e Kristiano e yad be sap ngak Jesus ni be’ nib flont nrib fel’ ni ngan fol rok. Nap’an e Nisan 14, 33 C.E., de n’uw nap’an u m’on ni yim’ Jesus, me yog ngak pi gachalpen ni ngar folwokgad rok. I yog ni gaar: “Kug dag ngomed e n’en ni nguum rin’ed ngomed, ya nge yog ni mrin’ed nri bod rogon e n’en ni fini gu rin ngomed.” (John 13:15) Nap’an e re nep’ nem ni tomur, i weliy Jesus boch e kanawo’ ni pi Kristiano e ngar athamgilgad ni ngar boded ir riy. U lan e re article ney, ma ngada weliyed boch ko pi kanawo’ nem.
Ba t’uf e Sobut’an’
2, 3. Uw rogon ni kari dag Jesus e ngongol nib sobut’an’ nrib fel’ ni ngan fol riy?
2 Nap’an ni i fonownag Jesus pi gachalpen ni ngar folgad ko tin ni dag ni ngar rin’ed, mab tamilang ni be weliy murung’agen e sobut’an’. Boor yay, ni i fonownag pi gachalpen ni ngar sobut’naged lanin’rad, ma fare nep’ ko Nisan 14, me dag ni ir be’ nib sobut’ laniyan’ ma aram e luknag e rifrif u ay e pi apostal rok. Me yog Jesus ni gaar: “I gag e Somol romed nge Tamachib romed, ma ka fini gu mu’ i luknag e rifrif u aymed, Ere nge bigimed mi i luknag e rifrif u ay bigimed.” (John 13:14) Tomur riy, me yog ngak e pi apostal rok ni ngar folgad ko tin ni dag ni ngara rin’ed. Ma riyul’ ni i dag e sobut’an’ nrib fel’ ni ngan fol riy!
3 Be yog Paul ni apostal ngodad ni u m’on ni yib Jesus nga fayleng, e “immoy rok rarogon Got.” Yugu aram rogon, i chuweg urngin ban’en rok me mang be’ nib sobut’. Maku, “me sobut’nag ir me mang be’ ni ma fol nge mada’ ko yam’, arrogon, yam’ ni tay u daken baley e gek’iy.” (Filippi 2:6-8) Mu lemnag e re n’ey nib ngoch nap’an. Jesus, ni ir e migid ko ani th’abi tolang u palpalthib, e i fel’ u wan’ ni nge mang be’ ni kab sobut’ ko pi engel, ni yira gargelnag nib bitir nib meewar, ma bayi ilal ni be par u tan pa’ e gallabthir ni de flont, ma tomur riy e ra yim’ ni bod e girdi’ ni rib kireb. (Kolose 1:15, 16; Hebrews 2:6, 7) Rib gel rogon ni ke sobut’nag ir! Gur rayog ni ngan folwok ko “lem” ni aram rogon min maruweliy e “sobut’an’ ni aram rogon”? (Filippi 2:3-5) Arrogon, machane mo’maw’.
4. Mang boch ban’en ni ma k’aring e girdi’ ni ngar ufgad, machane mang fan ni bay e riya’ riy ni ngan ufanthin?
4 N’en nib math keru’ ko sobut’an’ e tolangan’. (Proverbs 6:16-19) Lem nib tolang e ir e ke kirebnag Satan. (1 Timothy 3:6) Mom ni nge gel u lan gum’irchaen e girdi’, ma nap’an ni ra par u rom, me mo’maw’ ni ngan chuweg. Ma uf e girdi’ nbochan e nam rorad, nge ramaen dowey, nge chugum, nge skul, nge tin ni kar nameged me yog ni ngar mu’naged, nge rarogorad, nge yaarad, nge salap rorad ko gosgos, nge yugu boch ban’en ni boor. Yugu aram rogon, dariy reb u fithik’ e pi n’em ni baga’ fan u wan’ Jehovah. (1 Korinth 4:7) Ma faanra gad be uf nbochan, ma ra kirebnag e tha’ u thildad Got. “Ba tolang Jehovah, machane rayog ni nge guy e piin nib sobut’; machane en nib tolangan’ e kemus nim nangrad nib palog.”—Psalm 138:6, NW; Proverbs 8:13.
Sobut’an’ u Fithik’ e Pi Walagdad
5. Mang fan nib ga’ fan ni piin ni piilal e ngar sobut’naged lanin’rad?
5 Musko pi n’en ni kad rin’ed ni fan ko pigpig ku Jehovah e susun ni dabi k’aringdad ni ngad ufgad; maku arrogon e maruwel ni kan pi’ ngodad u lan e ulung e susun dabda ufgad ngay. (1 Chronicles 29:14; 1 Timothy 6:17, 18) Tin riyul’ riy, e faanra kan pi’ ngodad e maruwel nib gel, ma ba t’uf ni ngarda daged ni rib sobut’ lanin’dad. I fonownag Peter ni apostal e piin ni piilal, ni dabra “suweyed e piin ni yad e tirok Got, machane [ngar manged] e girdi’ ni ngar daged ngak e ulung e ngongol nib fel’.” (1 Peter 5:3, NW) Piin ni piilal e kan dugliyrad ni ngar manged tapigpig ma ura daged e ngongol nib fel’, ma gathi fapi somol nge masta.—Luke 22:24-26; 2 Korinth 1:24.
6. Mang bang ko yafas ko piin Kristiano e ba t’uf ni ngar sobut’naged lanin’rad riy?
6 Piin ni piilal e gathi kemus ni goo yad e ba t’uf ni ngar sobut’naged lanin’rad. I yol Peter ngak e piin nib fel’ yangaren ni sana yad be uf nbochan ni kab pey ni yad ma lem ma kab gel gelngirad nra ngan taarebnag ko piin ni kar pilibthirgad ni gaar: “Ma gimed gubin nthingar mon’ed madan e sobut’ laniyan’ nge bigimed me pigpig ngak bigimed, ya bochan ni Got e ma togopuluw ngak e piin nib tolangan’rad, machane ma gol ngak e piin nib sobut’an’rad.” (1 Peter 5:5) Arrogon, ngan sobut’nag laniyan’uy ni bod Kristus e baga’ fan ko urngin e girdi’. Ba t’uf e lem nib sobut’ ni ngan wereg fare thin nib fel’, ni baga’ ni nap’an ni kan mada’nag e girdi’ ni ma dariy fannag e machib ara ma dariyfannagey. Ba t’uf e lem nib sobut’ ma rayog ni ngan fol ko fonow ara ngada momnaged e yafas rodad ma rayog ni ngada yoornaged e tayim rodad ni fan ko maruwel ni ngan wereg e machib. Maku, ba t’uf e lem nib sobut’ ma der rus nge michan’ ko ngiyal’ ni kan weliy e thin nib kireb ni murung’agdad, ara ka nog ni kad th’abed e motochiyel, ara kan gafgownagdad ni kan dag e ngongol ni dariy e runguy riy.—1 Peter 5:6.
7, 8. Mang boch e kanawo’ nrayog ni ngad maruweliyed riy me gel e sobut’an’ rodad?
7 Uw rogon ma rayog rok be’ ni nge pag e lem nib tolang me dag e “sobut’an’ ni be lemnag ni boch e girdi’ e kab tolang” ngak? (Filippi 2:3) Ba t’uf ni ngada boded Jehovah rogon ni be changar ngodad. I weliy Jesus u rogon ni nge changar be’ ngak u nap’an ni yog ni gaar: “Ere ku er rogomed; faanra mmu’gad i rin’ e tin ni ka nog ngomed ni ngam rin’ed ma nge lungumed, Gamad bogi tapigpig; ni ke mus ni maruwel romad e kug ngongliyed.” (Luke 17:10) Mu lemnag, kab boor ni dawori chuchugur e tin ni i rin’ Jesus ko tin kad rin’ed. Yugu aram rogon, me Jesus e ir be’ nib sobut’an’.
8 Maku, rayog ni ngad ninged ngak Jehovah ni nge ayuwegdad ma rayog ni nge puluw e changar rodad ngodad. Rayog ni ngada yibilayed ni bod fare psalmist ni gaar: “Mu fil e tin nib mat’aw ngog, llowan’ nge tamilangan’, ya ke mich e pi motochiyel rom u wan’ug.” (Psalm 119:66) Ra ayuwegdad Jehovah ma rayog ni nge yog ngodad e llowan’, ma gad ra changar ngodad nib puluw, ma ra taw’athnagdad nbochan e ngongol rodad nib sobut’an’. (Proverbs 18:12) I yog Jesus ni gaar: “Ma en nra tolangnag ir e yira sobut’nag nge sobut’an’, ma en nra sobut’nag ir e yira tolangnag.”—Matthew 23:12.
Lem nib Puluw ko Tin nib Mat’aw nge Tin ni Ba Kireb
9. Uw rogon ni i changar Jesus ko tin nib mat’aw nge tin nib kireb?
9 Yugu demtrug rogon ni i par Jesus u fithik’ e girdi’ ni dar flontgad u lan 33 e duw, i par ni “de denen.” (Hebrews 4:15) Riyul’, ni nap’an ni yiiynag fare psalmist murung’agen fare Messiah, me yog ni gaar: “Ma ngongol nib mat’aw e ir e ba t’uf rom ma fanenikam e ngongol nib kireb.” (Psalm 45:7, NW; Hebrews 1:9) Maku re n’ey e nge ri athamgil e piin Kristiano ni ngar folwokgad rok Jesus. Gathi kemus ni yad manang e tin nib mat’aw nge tin ba kireb; ya ngar fanenikayed e tin ba kireb ma ngongol nib mat’aw e ir e nge t’uf rorad. (Amos 5:15) Re n’eney e ra ayuwegrad ni ngar togopuluwgad ko lem nib kireb ni tabab ni ka nap’an ni kabran e girdi’.—Genesis 8:21; Roma 7:21-25.
10. Faanra dabda talgad i rin’ e “tin nib kireb,” mang lem nge ngongol e gad be dag?
10 I yog Jesus ngak Nicodemus ni ba farise ni gaar: “Ya en ni ma rin’ e tin nib kireb e fanenikan fare tamilang, ya dabun ngongolen nib kireb ni nge m’ug. Machane en ni ma rin’ e tin nib riyul’ e ke yib ngak fare tamilang, ni bochan e nge yog ni dag fare tamilang ni ir e be ngongol ni be fol rok Got.” (John 3:20, 21) Mu lemnag: I poy John Jesus ni ir “e bin riyul’ e tamilang, ni fare tamilang ni yib nga fayleng nge gal ramaen nga daken urngin e girdi’.” (John 1:9, 10) Machane, i yog Jesus ni faan gad ra rin’ e “tin nib kireb”—ni aram e tin nde mat’aw, ma tin dabun Got—e be dag ni gad be fanenikay e tamilang. Rayog ni ngam susunnag ni nguun fanenikay Jesus nge tin ni ma rin’? Machane, eram e n’en ni rin’ e girdi’ nfaan dabra kalgadngan’rad ko denen rorad. Sana darur ma lemnaged ni aram e yad be fanenikay Jesus nge tin ma rin’, machane ba tamilang ni aram e lem rok Jesus u murung’agrad.
Uw Rogon ni Ngan Maruweliy nge Yog Rogon ni Ma Sap Jesus ko Tin nib Mat’aw nge Tin Ba Kireb
11. Mang e baga’ fan ni faan gad ra maruweliy nge yog ngodad e lem rok Jesus ko tin nib mat’aw nge tin nib kireb?
11 Ba t’uf ni ngari tamilang u wan’dad e tin nib mat’aw nge tin ba kireb u wan’ Jehovah. Gadra nang e re n’em ni kemus ni faan gad ra fil e Thin Rok Got, ni fare Bible. Gad ra ulul ko fol Bible ni aram rogon, ma ngada boded fare psalmist ni i meybil ni gaar: “Got, mfil ngog e tirom e kanawo’; mu dag ngog nggu nang.” (Psalm 25:4) Machane, dabmu pagtalin ni Satan e ba sasalap. (2 Korinth 11:14) Rayog ni nge fal’eg e tin nib kireb ni nge m’ug nib mat’aw u p’eochen e Kristiano ni der ma kol ayuw. Arfan ni, ba t’uf ni ngarda fal’eged i lemnag e tin ni kad filed ma ngarda folgad ko fonow rok “fare tapigpig nib yul’yul’ mab gonop.” (Matthew 24:45-47) Fol Bible, meybil, nge uda fal’eged i lemnag e tin ni kad filed e ra ayuwegdad ni ngad ilalgad ko tirok Got ma ngad manged bang ko piin ni “kar filed rogon ni ngar nanged e tin nib fel’ ko tin nib kireb.” (Hebrews 5:14) Ma aram gad ra adag ni ngad fanenikayed e tin ba kireb ma ngad t’ufeged e tin nib mat’aw.
12. Mang fonow u Bible e ra ayuwegdad ni nge dabda rin’ed e tin nib kireb?
12 Faanra gad ra fanenikay e tin ba kireb, ma dabda paged ni nge par nge gel e ar’ar nib kireb u lan gum’irchadad. Boor e duw u tomren ni yim’ Jesus, e yoloy John ni apostal ni gaar: “Dabi t’uf romed e tin ni ba’ u roy u fayleng ara n’en nib mil fan nga fayleng. Faanra t’uf romed e tin ni bay u fayleng, ma aram e de t’uf e en ni Chitamngiy romed. Gubin ban’en nib mil fan ngaray nga fayleng - ni aram e tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay - dariy reb e pi n’ey ni yib rok e en ni Chitamangiy; ya urngin me yib rok e fayleng.”—1 John 2:15, 16.
13, 14. (a) Mang fan ni nge t’uf e tin nu fayleng rok e Kristiano ma bay e riya’ riy? (b) Uw rogon ni ngada siyeged ni nge dabi t’uf e tin nu fayleng rodad?
13 Rayog ni nge lemnag boch e girdi’ ni gathi urngin ban’en u roy u fayleng e ba kireb. Yugu aram rogon ni riyul’ ni aram rogon, fare fayleng nge tin ni bay riy ni be k’aringey nib mom ni ra magawonnag e pigpig rodad ku Jehovah. Ma dariy ban’en ni ma ognag e fayleng ni fan ni ngada chuchugurgad ngak Got riy. Arfan ni, faanra kari T’uf e tin nu fayleng rodad, ni mus ko pi n’en ni de kireb, ma aram gad bay u thatharen e riya’. (1 Timothy 6:9, 10) Maku, boor ban’en u fayleng e ba kireb ma rayog ni nge kirebnagdad. Faanra ngada yaliyed e kachido ara pi n’en ni yima dag ko television ni be dag e ngongol ni maangach, nge chogowen e chugum, ara ngongol ni darngal, ni aram e pi n’en ni rayog ni nge fel’ u wan’uy—ma tomur riy e ra wawliyey ko kireb. Faanra ngada chaggad ngak e girdi’ ni ri yad ma lemnag ni ngar mon’ognaged rarogon e yafas rorad ara yad be maruweliy ni ngar mon’oggad ko fol chuway, ma ra munmun ireray e pi n’en ni ku ra mang tin th’abi ga’fan u wan’dad.—Matthew 6:24; 1 Korinth 15:33.
14 Machane, faanra ke felan’dad ko Thin rok Jehovah, ma aram “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay” e ra mang ban’en ndariy fan u wan’dad. Maku, faanra ngada chaggad ngak e piin ni ke m’oneg e gagiyeg rok Got ko yafas rorad ma rayog ni ngada boded yad, ma tin nib t’uf rorad e ra t’uf rodad ma ngada siyeged e tin ni yad ma siyeg.—Psalm 15:4; Proverbs 13:20.
15. Uw rogon ma ngan t’ufeg e tin nib mat’aw min fanenikay e tin de mat’aw e ra gelnagdad ni bod e n’en ni buch rok Jesus?
15 Nguun fanenikay e tin de mat’aw ma nguun t’ufeg e tin nib mat’aw e ke ayuweg Jesus ni nge yiluy owchen ko fare “felfelan’ ni be sonnag.” (Hebrews 12:2) Ku arrogodad. Gad manang ni re “fayleng ney nge urngin ban’en ni bay riy ni be yim’ e girdi’ ni bochan e bayi m’ay.” Felfelan’ ni bay ko re fayleng ney e ba ngoch nap’an. Machane, “en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:17) Bochan ke rin’ Jesus e tin nib m’agan’ Got ngay, ma aram ke ayuweg e girdi’ ni nge yog ngorad e yafas ni manemus. (1 John 5:13) Manga yugu uda folwokgad rok me fel’ rogodad ko yul’yul’ ni tay.
Ngan Kadan’uy u Nap’an ni Yibe Gafgownagey
16. Mang fan nib ga’ fan ni fapi Kristiano e nguu ra t’ufeged yad?
16 I dag Jesus yugu reb e kanawo’ ni pi gachalpen e ngara folwokgad riy, ni gaar: “Baaray e n’en ni nggu ning chilen ngomed: nge bigimed me t’uf bigimed rok, ni bod rogon ni gimed ba t’uf rog.” (John 15:12, 13, 17) Bay boor fan ni fapi Kristiano e nge t’uf e pi walagrad rorad. Ngiyal’ n’ey, e ri be lemnag Jesus e fanenikan ni ra ta’ e fayleng ngorad. I yog ni gaar: “Faanra fanenikaymed e girdi’ nu fayleng, ma thingar mu nanged ni gag e som’mon ni ar fanenikayed gag. . . . Dariy reb e sib ni ba ga’ ngak e masta rok. Faanra kar gafgowniged gag, ma bay kur gafgowniged gimed.” (John 15:18, 20) Arrogon, mus u nap’an ni yibe gafgownag e Kristiano, ma yad bod Jesus. Ba t’uf ni ngari taareban’rad ma ra ayuwegrad ngar kadedan’rad ko re fanenikan nem.
17. Mang fan ni ma fanenikay e girdi’ nu fayleng e tin riyul’ e Kristiano?
17 Mang fan ni ma fanenikay e girdi’ nu fayleng e Kristiano? Ya bochan “gathi yad bang ko fayleng” ni bod Jesus. (John 17:14, 16) Yad ma par u mathilin ko pi n’en nib peth ko maruwel ko salthaw nge n’en ni political, ma yad ma fol ko kenggin e motochiyel u Bible, ma yad ma tayfan e yafas nib thothup ma yad ma fol ko motochiyel ni mo’maw’ ni nge fol e girdi’ riy. (Acts 15:28, 29; 1 Korinth 6:9-11) Tin ni ri yad be nameg e tirok Got, ma gathi chugum. Yad ma par u fayleng, machane rogon ni yoloy Paul, e ‘dar ma fanayed ni polo’.’ (1 Korinth 7:31, NW) Riyul’, ni boch e girdi’ e ka rogned ni Pi Mich Rok Jehovah e ffel’ e tin yad ma rin’. Machane Pi mich Rok Jehovah e dar ma pag e tin riyul’ ni fan ni ngar fel’ gad u wan’ boch e girdi’. Bochan e re n’em, oren e girdi’ nu fayleng e dar nanged fan e tin yad ma rin’, ma boor e girdi’ ni ma fanenikayrad.
18, 19. Ngan fol ko n’en ni rin’ Jesus, ma mang e ra rin’ e Kristiano u nap’an ni ra yib e togopuluw ma yibe gafgownagrad?
18 Fapi apostal rok Jesus e kar guyed feni gel e fanenikan ko fayleng u nap’an nni kol Jesus min li’ ngem’, ma kar guyed e n’en ni rin’ Jesus. U lan fare milay’ nu Gethsemane, me yib e pi toogor rok ni ngar koled. I guy Peter rogon ni nge yororiy ni be fanay e sayden, machane i yog Jesus ngak Peter ni gaar: “Mu sulweg e sayden rom nga tafen ya urngin e piin ni yad ra girngiy e sayden e yira li’rad ko sayden ngar m’ad.” (Matthew 26:52; Luke 22:50, 51) Kakrom, i fanay piyu Israel e sayden ngar chamgad e pi toogor rorad. Machane, chiney, ke thil boch ban’en. Gil’ilungun Got e “gathi bang ko re fayleng ney” ma dariy e mathil u reb e nam ni ngar yororiyed. (John 18:36) De n’uw nap’an ma Peter e ra mang bang ko nam nib spiritual, ni girdi’ riy e ngar pared u tharmiy. (Galatia 6:16; Filippi 3:20, 21) Ere, ka nap’an e ngiyal’ i n’em i yan nga m’on, ma pi gachalpen Jesus e yad ma fol rok ko tin ni rin’ u nap’an ni yib e girdi’ ni kar fanenikayed ma kar gafgowniged—ni aram der rus machane i rin’ ban’en u fithik’ e gapas. Yad ma pag fan urngin ban’en ngak Jehovah u fithik’ e pagan’ ma ke lagan’rad ngay ni nge pi’ gelngin ngorad ma rayog ni ngar k’adedan’rad.—Luke 22:42.
19 Boch e duw nga tomren, me yoloy Peter ni gaar: “Yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay. . . . Ma faan nog e thin nib kireb ngak ma de ta’ puluwon ni thin nib kireb; ma faan nni gafgownag ma de gaar e bayi fulweg taban ngak e piin ni yad be gafgownag, machane me pag fan urngin ban’en ngak Got, ni ir fare Tapufthin nib mat’aw.” (1 Peter 2:21-23) Ri bod rogon ni ginangey Jesus, ke mada’nag e pi Kristiano e skeng nge togopuluw nib gel u lan e pi duw i yan. Fapi Kristiano ko fa bin som’mon e chibog nge chiney e kar folgad ko tin ni rin’ Jesus ma kar kadedan’rad u fithik’ e yul’yul’, ma kar daged ni yad ba yul’yul’ u fithik’ e gapas. (Revelation 2:9, 10) Manga yigi yog ni uda rin’ed ni aram rogon ko ngiyal’ nib t’uf.—2 Timothy 3:12.
“Mmon’ Somol i Jesus Kristus Nga Dakenam Nge Mang Mad Rom”
20-22. Uwrogon ni fapi Kristiano nga ron’ed “Somol ni Jesus Kristus” riy nga dakenrad?
20 I yol Paul ko ulung nu Roma ni gaar: “Mmon’ Somol i Jesus Kristus, nga dakenam ma dabmu lemnag e ar’ar nib kireb.” (Roma 13:14, NW) Fapi Kristiano e yad ma yon’ Jesus nga dakenrad, ni bod ni ke mang mad rorad. Yad ma athamgil ni nguur folwokgad ko pi felngin nge tin ma rin’—e masta rorad ngorad—nyugu aram rogon ni dawora flontgad.—1 Thessalonika 1:6.
21 Rayog ni nga don’ed “Somol i Jesus Kristus” nga dakendad nfaanra kad nanged e yafas ko Masta rodad ma ngad athamgilgad ni ngad boded. Gad ma folwok u rogon ni ma sobut’nag ir, ma ma t’ufeg e tin nib mat’aw, ma ma fanenikay e tin de mat’aw, ma ma t’ufeg e pi walagen, ma ma par ni gathi bang ko fayleng, ma ma dag e gum’an’ nge kadan’ u nap’an ni ra yib e gafgow ngak. Dabda ‘lemnaged e ar’ar nib kireb’—ni aram, dabda ted nib m’on ko yafas rodad e pi n’en nu fayleng ara ngad folgad ko ar’ar nib kireb. Tin gad ra rin’, nap’an ni gad ra dugliy ban’en ara ngada pithiged e magawon, ngada fithed: ‘Mang e ra rin’ Jesus ko re magawon ney? Mang e baadag ni nggu rin’?’
22 Bin tomur, e nguuda folwokgad rok Jesus nib gel e maruwel rok ni ma “machibnag fare thin nib fel’” ni gubin ngiyal’. (Matthew 4:23; 1 Korinth 15:58) Maku aram rogon ni, fapi Kristiano e ngaur folgad ko tin ni ke dag Jesus, ma bin migid e article e ra weliy ko u rogon.
Rayog ni Ngam Weliy Fan?
• Mang fan nib ga’ fan ni nge par e Kristiano nib sobut’an’?
• Uw rogon ni ngad maruweliyed nge yog ngodad e lem nib puluw ko tin nib mat’aw nge tin ba kireb?
• Uw rogon ni nge folwok e Kristiano rok Jesus ko tin ni rin’ u nap’an ni ra yib e togopuluw nge gafgow?
• Uw rogon ma rayog ni nge yon’ be’ “Somol ni Jesus Kristus” nga daken?
[Picture on page 17]
Kari dag Jesus e ngongol ni sobut’an nrib fel’ ni ngan fol riy
[Picture on page 18]
Urngin yang ko yafas ko pi Kristiano, e muun ngay e maruwel ni ngan wereg e machib, e ba t’uf e sobutan’ riy
[Picture on page 19]
Rayog rok Satan ni nge fal’eg e entertainment nib kireb ni nge m’ug nib fel’ u wan’ reb e Kristiano
[Picture on page 20]
T’ufeg rodad ngak e pi walagdad e ra gelnagdad ni ngad sabaliyed e togopuluw