Ba M’agan’um E Ayuw Rok Jehovah?

“Jehovah e ir e be ayuwegeg; ere dabgu tamdag.”​—HEBREWS 13:6, NW.

1, 2. Mang fan nib ga’ fan ni nge m’agan’dad ko ayuw nge n’en ni ma pow’iy e yafas ni yib rok Jehovah?

NGAM mu susunnag ni ga be yan u boch pa’ i kanawo’ u daken e burey. Machane, gathi goo gur, ya bay be’ ni ke ognag ni nge un ngom ni nge pow’iyem, ma ir be’ ntha’bi fel’ rogon ni ma pow’iyey. Kab boor e tin manang ma kab gel gelngin ngom, machane be yan nib chuchugur ngom u fithik’ e gum’an’. Ke naab ni yu ngiyal’ e ga ma dol’. Bochan ni baadag ndariy ban’en ni nge buch rom, me k’iyag pa’ ni nge ayuwegem ko gin ni ri bay e riya’ riy. Gur ga ra siyeg e ayuw rok? Ri danga’! Ya ga bay u thatharen e riya’.

² Gadad e Kristiano, e bay e kanawo’ ni gad be yan riy nib mo’maw’. Gur thingar darod ko kanawo’ nib mo’maw’ ni goo gadad? (Matthew 7:14) Danga’, be dag e Bible ni En th’abi fel’ rogon ni ma pow’iydad, i Jehovah Got, e ma pag e girdi’ ni ngara uned ngak. (Genesis 5:24; 6:9) Gur ma ayuweg Jehovah e pi tapigpig rok u nap’an ni yad be yan u taabang? Be yog ni gaar: “I gag Jehovah ni Got rom, e gu be kol e ba’ ni mat’aw i paam, ni En be yog ngom, ni ‘Dab mu rus. Ya gag rog e bay gu ayuwegem.’” (Isaiah 41:13, NW) Ni bod fare powo’ ko fare fanathin rodad, ni ma k’iyag Jehovah pa’ u fithik’ e gol nge baadag ni girdi’ ni yad be guy rogon ni nga ranod u taabang e nge mang fager rok. Ba mudugil ni dariy bagadad ndabun e ayuw rok!

3. Mang boch e deer e ngada lemnaged u nap’an e re fol babyor ney?

³ U lan fare article ni ke yan, ma kad weliyed aningeg e kanawo’ ni i ayuweg Jehovah e girdi’ rok riy kakrom. Gur ka ma ayuweg e girdi’ rok e ngiyal’ ney ni bod rogon e n’en ni i rin’ kakrom? Ma uw rogon ni nge mudugilan’dad nib m’ag u wan’dad e pi ayuw nem? Ngad lemnaged e pi deer nem. Gad ra rin’ ni aram rogon, ma rayog ni ngari pagan’dad ngay ni Jehovah e riyul’ ni ir e Taayuw rodad.​—Hebrews 13:6.

Ayuw u Daken e Pi Engel

4. Mang fan ni nge pagan’ e pi tapigpig rok Got e ngiyal’ ney nra ayuwegrad e pi engel?

⁴ Gur ka ma ayuweg e pi engel e pi tapigpig rok Jehovah e ngiyal’ ney? Arrogon, ka yad ma ayuweg. Riyul’, ni darur bad nrayog ni ngan guyrad ngar chuweged e pi tapigpig nib riyul’ ko riya’. Mus u nap’an e Bible, ma de yoor yay ni ke ayuwegey e pi engel ni aram rogon. Baga’ ni yad ma rin’ e n’en ni dabiyog ni guy e girdi’, ni bod e ngiyal’ ney. Yugu aram rogon, ma pi tapigpig rok Got ni kar nanged ni bay e pi engel ni ngar ayuweged yad e kari athamagilan’rad. (2 Kings 6:14-17) Ri bay fan ni ku ngad thamiyed e n’en ni aram rogon.

5. Uw rogon ni dag e Bible ni pi engel e yad ma un ko machib e ngiyal’ ney?

⁵ Fapi engel rok Jehovah e ri yad baadag ni nguur tiyan’rad ko maruwel ni gadad maun ngay. Mang maruwel eram? Gad ra pirieg e fulweg riy ko Revelation 14:6 ni gaar: “Mug guy yugu reb e engel ni be changeg nib tolang u fithik’ e nifeng, ni ba rok e thin ndabi math biid, ni Thin Nib Fel’ ni nge weliy ngak e girdi’ nu fayleng, ni urngin e pi nam, nge ganong nge thin nge gubin mit e girdi’.” Re “thin nib fel’ ney” ni dabi math biid e ba tamilang nib l’ag ko fare thin nib fel’ ko Gil’ilungun ni rogon ni yog Jesus, e “bay ni machibnag u gubin yang u fayleng ni nge mang mich ngak e pi nam” u m’on ni nge yib e tomur ko re m’ag ney. (Matthew 24:14) Riyul’, ni pi engel e der ma machib u puluwon e girdi’. Ke pi’ Jesus e re maruwel ney nib ga’ fan ngak e girdi’. (Matthew 28:19, 20) Gathi gad ba felfelan’ ni kad nanged ni gad ra rin’ e re maruwel ney ma bay e pi engel ni be ayuwegdad, ni yad e pi kan nib gonop mab gel gelngirad?

6, 7. (a) Mang e be dag ni be ayuweg e pi engel ko maruwel rodad ni ngan wereg e machib? (b) Uw rogon ni nge mudugil lanin’dad nra ayuwegdad e pi engel rok Jehovah?

⁶ Boor boch e mich riy ni be dag ni be ayuwegdad e pi engel ko maruwel rodad. Ni bod ni, gad ma rung’ag ni nap’an ni yibe machib ma ma mada’nag e Pi Mich Rok Jehovah be’ ni kefin ni meybil ku Got ni nge ayuweg ma rayog ni nge pirieg e tin riyul’. Ri ma buch ni aram rogon ma aram fan nib mo’maw’ ni nga nog ni ke mus ni ma buch ni dan ayuweg. Ma bochan e ayuw ni ma pi’ e pi engel, ma ke yoor i yoor e girdi’ ni kar filed ni ngar rin’ed e n’en ni yog fare “engel ni be changeg nib tolang u fithik’ e nifeng” ni gaar: “Nge yib madgun Got ngomed, mi gimed ta’ fan nga feni sorok!”​—Revelation 14:7.

⁷ Ga ma athapeg ni nge ayuwegem e pi engel rok Jehovah nib gel gelngirad fa? Ere ngam mu rin’ e tin th’abi fel’ rom ni ngam wereg e machib. (1 Korinth 15:58) Gad ra felfelan’ ni nguuda fanayed boor e tayim rodad ko re maruwel ney nib thil ma rib fel’ ni yib rok Jehovah, mab mudugil ni ra ayuwegdad e pi engel rok riy.

Ayuw ni Yib Rok Pilungen e Pi Engel

8. Mang e liw rok Jesus nib tolang u tharmiy, ma mang fan ni be ayuwegdad e re n’em ni nge gel e pagan’ rodad?

⁸ Maku ma pi’ Jehovah ba mit e ayuw u daken e engel. Revelation 10:1 e be weliy murung’agen reb e “engel nib gel” ma “owchen e bod lan mit e yal’.” Re engel ney ni kan guy u reb e changar e ba tamilang ni be yip’ fan Jesus Kristus ni kan n’uf u tharmiy. (Revelation 1:13, 16) Gur riyul’ ni Jesus e ba engel? U reb e kanawo’, arrogon, ya ir pilungen e engel. (1 Thessalonika 4:16) Jesus e ir e bin th’abi gel gelngin u fithik’ urngin e kan ni pi fak Jehovah. I tay Jehovah ni ir e ga’ ko urngin e pi engel ko pi salthaw Rok. Re pilungen e engel ney e riyul’ ni ir e ma pi’ e ayuw nib gel gelngin. Uw rogon?

9, 10. (a) Uw rogon ma Jesus e ke mang “taayuw” rodad u nap’an ni gad ra denen? (b) Mang ayuw e rayog ni ngad pirieged ko n’en ni rin’ Jesus?

⁹ I yoloy John ni apostal ni gaar: “Machane faanra chey nge denen be’, ma ba’ e taayuw rodad ngak e Chitamngiy, i Jesus Kristus, ni be’ nib mat’aw.” (1 John 2:1, NW) Mang fan ni i yog John ni Jesus e “taayuw” rodad ni baga’ ni faan gad ra “denen”? Ya, gad ma denen ni gubin e rran, ma denen e ma fekey i yan ko yam’. (Eklesiastes 7:20; Roma 6:23) Machane, i pi’ Jesus e yafas rok ni maligach ni fan ko denen rodad. Ma bay u chaaren e Chitamangidad ni tarunguyey ni be wenig ni fan ngodad. Ra bagadad mab t’uf rok e ayuw ni aram rogon. Uw rogon ni nge yog ngodad e re n’em? Ba t’uf ni ngad kalgadngan’dad ko denen rodad ma ngad wenignaged ni ngan n’ag fan e denen rodad u daken e maligach rok Jesus. Maku ba t’uf ni nguuda paged i sul u daken e denen rodad.

¹⁰ Gathi kemus ni ke yim’ Jesus ni fan ngodad, ya ku ke dag ban’en nrib fel’ ni ngad folgad riy. (1 Peter 2:21) Tin ni rin’ e ma pow’iydad, ma ma ayuwegdad ni ngad lemnaged e tin gad ra rin’ ma aram rayog ni ngad paloggad ko denen nib ubchiya’ ma rayog ni ngad felfelan’naged Jehovah Got. Gathi gad ba felfelan’ ni nge yog ngodad e ayuw ni aram rogon? I micheg Jesus ngak pi gachalpen ni bay ni pi’ ngorad yugu reb e taayuw.

Ayuw ni Ma Pi’ fare Kan ni Thothup

11, 12. Mang e kan ni thothup rok Jehovah, ma uw feni gel gelngin, ma mang fan nib t’uf rodad e ngiyal’ ney?

¹¹ I micheg Jesus ni gaar: “Bay gu wenig ngak e en ni Chitamangiy, nge pi’ yugu reb e taayuw ngomed, me par romed ndariy n’umngin nap’an, ni fare gelngin e tin riyul’, ni dabni pi’ ngak e girdi’ nu fayleng.” (John 14:16, 17) Re “gelngin e tin riyul’” ney ara kan ni thothup, e gathi girdi’ ya ba gelngiy​—ni aram e gelngin Jehovah. Rib gel e re gelngin ney ndariy e gin nge mus riy. Ireray gelngin ni i fanay Jehovah u nap’an ni sunmiy e palpalthib, ngu nap’an ni be fal’eg e maangang, ngu nap’an ni i dag e tin nib m’agan’ ngay u daken e changar ni ke pig. Gur bochan nder ma fanay Jehovah e kan ni thothup rok ni aram rogon e chiney, ma be dag ni daki t’uf rodad?

¹² Gathi aram rogon! Ngiyal’ ney ni “rib mo’maw’” e par riy e rib t’uf rodad e kan ni thothup rok Jehovah. (2 Timothy 3:1) Ma gelnagdad ma rayog ni nguuda kadedan’dad ko skeng. Ma ayuwegdad ni nge yog ngodad e pi felngin nib fel’ ma rayog ni ngad chuchugurgad ngak Jehovah nge ngak e pi walagdad ni pumoon nge ppin u lan e ulung. (Galatia 5:22, 23) Ere, uw rogon ni nge fel’ rogodad ko re ayuw ney ni yib rok Jehovah?

13, 14. (a) Uw rogon ni nge mudugil lanin’dad ni ba m’agan Jehovah ngay ni nge pi’ e kan ni thothup rok ngak e girdi’ rok? (b) U daken e mang ngongol rodad e be dag ni gathi riyul’ nib m’ag u wan’dad fare taw’ath ko fare kan ni thothup?

¹³ Som’mon, ba t’uf ni ngad yibilayed nge yib ngodad e kan ni thothup. I yog Jesus ni gaar: “Yugu ereyer fanmed kireb, ma gimed manang rogon ni ngam pi’ed e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ fare Kan ni Thothup ngak e piin ni yad ra ning ngak!” (Luke 11:13) Arrogon, Jehovah e ir fare Chitamangiy ni th’abi fel’ ni ba’. Faan gad ra ning fare kan ni thothup ngak u fithik’ e michan’ ngu fithik’ e yul’yul’ ma mutrug ni ra pi’ ni ba taw’ath. Ere, deer ni sum riy e, Gad ra ning fare kan ni thothup ngak fa? Ri bay fan ni ngad ninged ko meybil rodad ni gubin e rran.

¹⁴ Bin l’agruw, gad ma fek e re taw’ath nem ni gad be maruweliy ban’en nib puluw ngay. Ngan dag rogon: Susun reb e Kristiano e be athamgil ni nge dabi yaliy yaan ban’en ni puwlag. Me yibilay ni nge yog ngak e kan ni thothup ni nge ayuweg ma rayog ni nge togopuluw ko re ngongol nib kireb ney. Ke ning e ayuw ko piin piilal ni Kristiano, ma kar fonownaged ni nge dabi sowath i rin’ ban’en, ma dabki chuchugur ko pi n’en ni ma dag yaan ban’en ni puwlag. (Matthew 5:29) Faanra dabi fol ko fonow ni kar pi’ed ngak me ulul i yaliy e pi n’em ko ngiyal’ ni kan wawliy? Gur be maruweliy nib puluw ko n’en ni be yibilay ni nge ayuweg e kan ni thothup? Ara be tay ir nga thatharen e riya’ ni ra kireban’nag fare kan ni thothup ma ra mul u pa’ e re taw’ath ney? (Efesus 4:30) Riyul’, gadad gubin e ba t’uf ni ngad rin’ed urngin ban’en ni rayog rodad ni ngad ululgad nguuda feked e re ayuw ney nrib fel’ ni yib rok Jehovah.

Ayuw ni Ma Yib ko Thin Rok Got

15. Uw rogon ni ngada daged ni gathi gad be dariyfannag fare Bible?

¹⁵ U lan boor e chibog ma Bible e ki mang kenggin e ayuw ko pi tapigpig rok Jehovah nib yul’yul’. Ba t’uf ni ngad ted nga lanin’dad ni ireray e tabolngin e ayuw nib gel gelngin ko bin ni ngad lemnaged ni fare Bible e eram e babyor ni yugu dariyfan. Rogon ni nge m’ag u wan’uy e re ayuw nem e ba muun ngay e maruwel. Ba t’uf ni ngad ted e bieg Bible ni nge mang bang ko pi n’en ni gad ma rin’ ni gubin ngiyal’.

16, 17. (a) Uw rogon ni Psalm 1:2, 3 e be dag e taw’ath ni yib ko ngan bieg e motochiyel rok Got? (b) Uw rogon ni be dag e Psalm 1:3 ni thingarda maruwelgad nib elmerin?

¹⁶ Psalm 1:2, 3 e be weliy murung’agen e girdi’ ni ma felan’nag Got ni gaar: “Ma ra bieg e motochiyel rok Somol ma ma yib e felfelan’ riy ngak, ma ku aram rogon ni ra bieg ni rran nge nep’ ni bochan e nga nang fan. I ir e bod ba ke gek’iy ni kan yung u tooben bogi lul’ ni boor; gubin ngiyal’ ni ma k’uf ko ngiyal’ nra taw ngay ni nge k’uf, ma der mororoy yuwan. Urngin e tin ni ma ngongliy e ma yan i aw nib fel’.” Kam guy e tin nib ga’ fan ko pi thin nem? Mom ni ngan bieg e pi thin nem ma nga nog ni goo be weliy murung’agen e sasing ni be dag ni bay e gapas riy​—ni ba ke gek’iy ni ke togul u tooben ba lul’. Uw feni fel’ ni ngan mol nib ngoch nap’an ko mathigyal’ ko gin’em! Machane re psalm ney e gathi be piningdad ni ngad lemnaged murung’agen e toffan. Re n’ey e be weliy murung’agen e maruwel nib gel. Uw rogon?

¹⁷ Mu ta fanam i yan riy ni fare gek’iy ni yibe weliy u roy e gathi kemus ni ma pi e tagalul me tugul u tooben ba lul’ ni dan yung. Ireray ba ke gek’iy ni ma yib wom’engin, ma “kan yung” ko gin ni kan mel’eg​—ni “ba chuchugur ko bogi lul’ ni boor.” Uw rogon ni nge tugul boch e gek’iy u tooben bogi lul’ ni boor? U fithik’ e pi gek’iy ni ma yib wom’engin, ma en ni ir e fen e re milay’ ney e rayog ni nge fuog boch e lra’ ni fan ni nge taw e ran nga lik’ngin e yu ke gek’iy rok nem nib ga’ fan. Ah, chiney ke tamilang e tin baga’ fan riy! Faanra ke yib wom’engidad ko tirok Got ni bod rogon e re gek’iy nem, ma bochan e bay be’ ni ke maruweliy nib elmerin ni nge ayuwegdad. Gad ba chag nga reb e ulung ni be fek e ran nib machalbog ni aram e thin nriyul’ i yib ngodad, machane thingarda maruweliyed e maruwel rodad. Ba t’uf ni ngada ted gadad ko gin ni rayog ni ngad feked e re ran ney nib ga’ fan riy, ma aram nguud fal’eged i lemnag ban’en ma ngad fal’eged i gay ban’en ma rayog ni nge taw e thin riyul’ ko Thin rok Got nga lanin’dad nge gum’irchadad. Ireray e kanawo’ ni ku rayog ni ngada yoornaged e wom’engin nib fel’.

18. Mang e ba t’uf ma rayog ni ngan pirieg e fulweg ni bay ko Bible ni fan nga boch e deer rodad?

¹⁸ Dabiyog ni nge rin’ fare Bible ban’en nib fel’ ngodad nfaanra ke mus ni kan ta’ nga tafen e babyor ma dabni bieg. Ma gathi ba bonod eram​—ni bod e tin ni baaray ni rayog ni ngad mologed owchedad ma ngad paged ni Bible e ir e nge pithig ir ndemtrug e page, ma ngad athapeged ni nge m’ug ko fare page e fulweg ko deer rodad. Nap’an ni ke t’uf ni ngada dugliyed ban’en, mab t’uf ni ngad fuoged ngad pirieged “fare tamilangan’ rok Got” ni bod ni gad be gay e chugum ni kan k’eyag nga fithik’ e but’. (Proverbs 2:1-5) Rogon ni ngad pirieged e fonow u Bible nib puluw ko tin nib t’uf rodad e baga’ nib t’uf ni ngan fal’eg i gay ban’en nib elmerin mab sasaf’og. Boor e babyor rodad ni kan fek u Bible ni ra ayuwegdad riy. Gad ra fanay e pi n’ey ni ngada fuoged e low u fithik’ e pasig ma rayog ni ngad pirieged e gonop ko Thin rok Got ni bod e malang nib tolang puluwon, riyul’ ni gad be fanay e ayuw ni ke pi’ Jehovah ngodad.

Ayuw u Daken e Pi Walag

19. (a) Mang fan ni fapi article ko Fare Wulyang Ntagil’ E Damit nge Awake! e rayog ni ngan ta’ ni ayuw ni kan pi u daken e pi walag? (b) Uw rogon ni ke ayuwegem reb e article ni bay u reb e babyor rodad?

¹⁹ Pi tapigpig rok Jehovah ni girdi’ e yad tabolngin e ayuw ngorad ni gubin ngiyal’. Gur ke thil Jehovah? Ri danga’. Dariy e maruwar riy ni ra bagadad ma rayog ni nge lemnag e tayim ni ke pi’ e pi walagdad e ayuw ngodad ni ireray e n’en nib t’uf rodad ko chi ngiyal’ nem. Ni bod ni, rayog ni nge yib ngan’um boch e article ko Fare Wulyang Ntagil’ e Damit ara Awake! ni ke fal’eg lanin’um u nap’an nib t’uf rom ara ke ayuwegem ni ngam pithig e magawon ara kan magawonnag e michan’ rom? Ke fek Jehovah e re ayuw nem i yib ngom u daken “fare tapigpig nib yul’yul’ mab gonop” ni kan tayrad ni ngar pi’ed e “ggan u ngal’an nib puluw.”​—Matthew 24:45-47.

20. Uw rogon ma piin ni piilal ni Kistiano e ke m’ug ni yad e “pi pumoon nib taw’ath”?

²⁰ Machane baga’, ni ayuw ni ma pi’ e pi walag e rib puluw ngodad. Ba piilal ni Kristiano e ma pi’ e welthin ni ma bit nga gum’irchadad, ara ma yib nge guydad ni be ayuwegdad ni ngad kadedan’dad ko reb e par nib mo’maw’, ara pi’ ngodad e fonow u fithik’ e gol ni be ayuwegdad ni ngad guyed ma gad gel ko meewar rodad. Reb e Kristiano ni ke pining e magar ko ayuw ni pi’ reb e piilal ngak e ke yoloy ni gaar: “Nap’an ni yibe machib, me fanay e re tayim nem ni nge pi’ e athamgil nga lanin’ug ni nggog e tin gu be lemnag. Fare nep’ u m’on riy, e kug meybil ku Jehovah, ni gu be ning ni ngeb be’ ni nggu nonow. Re rran ni migid nem, ma re walag ni pumoon ney e ke non ngog ni rib sumunguy. Ke ayuwegeg ni nggu guy ko uw rogon ni ke ayuwegeg Jehovah u lan boor e duw. Gu be pining e magar ngak Jehovah ni ke l’og e re piilal ney ngog.” U urngin e pi kanawo’ nem, me dag e pi piilal ni Kristiano ni yad e “pi pumoon nib taw’ath,” ni ke pi’ Jehovah u daken Jesus Kristus ni nge ayuwegdad ngad kadedan’dad ko kanawo’ ni yan ko yafas.​—Efesus 4:8, NW.

21, 22. (a) Mang e ra buch u nap’an ni ra fol e girdi’ u lan e ulung ko fonow ni bay ko Filippi 2:4? (b) Mang fan ni ra ngan gol ko tin nib achichig e ku baga’ fan?

²¹ Gathi kemus ni piin piilal, ya urngin e Kristiano nib yul’yul’ e baadag ni ngar folgad ko motochiyel rok Got ni nguun “lemnag be’ gathi kemus ni fan ko [tirok], ya ku nge lemnag e tin nib fel’ ni fan ko yugu boch e girdi’.” (Filippi 2:4) Nap’an ni ra fol e girdi’ ulan e ulung ko Kristiano ko re fonow nem, ma ra m’ug e gol riy. Ni bod rogon e n’en ni buch rok reb e tabinaw ni yib ngorad e gafgow ni boor mab tomgin. Fare matam e ke fek e bitir rok ni ppin nga ranow nga kantin. Nap’an ni yow be sul nga tabinaw rorow, ma ke chafin e karro kar maadadgow. Bitir rok ni ppin e ke yim’; ma fare matam e ke maadad nib gel. Nap’an ni kan pag u hospital, ma som’mon ma kari marwoth ma dabiyog ni nge ayuweg ir. Ma leengin e kari balyangan’ me ke mo’maw’ rok ni nge ayuweg fare pumoon ni goo ir. Ere ba wu’ i mabgol u lan e ulung e kar fekew e re wu’ i mabgol nem ni ke kireban’row nga tabinaw rorow ni ngar ayuwegew yow u lan boor e wik.

²² Riyul’, ni gathi urngin yay ni ngan gol e ba muun e gafgow nge ngan pag fay ngay ni aram rogon. Boch e ayuw ni ma yib ngodad e ba achichig. Machane yugu demtrug feni achig e ngongol nib gol ni kan dag ngodad, ma gad ma pining e magar, fa? Rayog ni ngam lemnag boch e tayim ni reb e walag ni pumoon ara ppin e ke yog e thin u fithik’ e gol ara ke rin’ ban’en nib fel’ ni fan ngom ma ireray e n’en ni kari ayuwegem? Baga’ ni ma ayuwegdad Jehovah ni aram rogon.​—Proverbs 17:17; 18:24.

23. Uw rogon u wan’ Jehovah u nap’an ni gad be athamgil ni ngada ayuweged gadad?

²³ Ga baadag ni nge fanayem Jehovah ni nge ayuweg boch e girdi’? Re taw’ath nem e ba mab ngom. Riyul’, ni baga’ fan u wan’ Jehovah e re maruwel’ rom ney. Thin rok Got e be yog ni gaar: “En ni be dag e runguy ngak e en nib gafgow e bod ni ke pi’ ban’en ngak Jehovah nge fanay, ma ngongol ni rin’ ngak be’ e Ir e yira pi’ puluwon ngak.” (Proverbs 19:17, NW) Ba gel e felfelan’ ni ma yib nra ngad ayuweged e pi walagdad ni pumoon nge ppin. (Acts 20:35) Re felfelan’ ney ko pi’ ban’en ngak be’ fa felfel’an’ ko ngan fek ban’en ni ke pi’ be’ e dabiyog ngak e piin ni ma par u bang ni goo ir ni lem rok. (Proverbs 18:1) Ere, nguuda uned ko muulung ko Kristiano u fithik’ e yul’yul’ ma ra bagadad ma rayog ni nge pi’ e athamgil nga laniyan’ bagadad.​—Hebrews 10:24, 25.

24. Mang fan ni thingar dabda lemnaged ni bay ban’en ni dan pi’ ngodad ya bochan dada guyed e maangang ni ke fal’eg Jehovah kakrom ni yira ngat ngay?

²⁴ Gur gathi bay e felfelan’ riy ni ngan lemnag boch e kanawo’ ni ma ayuwegdad Jehovah? Yugu aram rogon ni gathi gad ma par ko ngiyal’ ni ma fal’eg Jehovah e maangang ni yima guy ni fan ni nge lebuguy e tin nib m’agan’ ngay, dabda lemnaged ni bay ban’en ni de pi’ ngodad. N’en ni rib ga’ fan e ma pi’ Jehovah urngin e ayuw nib t’uf rodad ma rayog ni ngada pared nib yul’yul’. Ma faanra ngada kadedan’dad u taabang u fithik’ e michan’, ma bayda guyed e tin ra rin’ Jehovah nrib gagiyel ma ri yima pining e sorok ngay u nap’an chepin e girdi’ ni polo’! Nge fel’ u wan’dad ma ngarda fanayed e ayuw rok Jehovah ma aram e rayog ni nga dogned e thin ko thin nu Bible ni fan ko duw ni 2005 ni gaar: “Ayuw ni ma yib ngog e ma yib rok Jehovah.”​—Psalm 121:2, NW.

Mang e Ga Be Lemnag?

Uw rogon ni ma pi’ Jehovah e ayuw nib t’uf rodad e ngiyal’ ney​—

• u daken e pi engel?

• u daken e kan ni thothup?

• u daken e Thin rok ni kan thagthagnag?

• u daken e pi walag u lan e ulung?

[Picture on page 12]

Ffel’ ni ngan nang ni pi engel e yad be ayuweg e maruwel ni ngan wereg e machib

[Picture on page 15]

Rayog ni nge fanay Jehovah bagayad i walagdad u lan e ulung ni nge fek i yib ngodad e n’en nib t’uf rodad ni nge fal’eg lanin’dad