Rogon Nra Ayuwegem E Pi Engel

BE micheg e Thin rok Got nib riyul’ ni bay e engel. Be weliy ngodad ni bay bokum i million e pi kan ney. Ke pig e changar rok Daniel ni tapigpig rok Jehovah Got ke guy e pi n’en nib fos u lan e lang mi ki yoloy ni gaar: “Pire’ ni pire’ i biyu’ e yad [e pi engel ni] bay u rom ni ngar pigpiggad ngak, ma raay e million e kar bad ra sak’iygad nga p’eowchen.”​—Daniel 7:10.

Amu lemnag e pi thin rok Daniel, gathi ke mus ni be weliy ni bay pire’ ni pire’ e engel. Ya ku be tamilangnag ni pi engel nem e ur pigpiggad ngak Got. Yad e pi tapigpig rok. Bpuluw e pi thin rok fa en ni yoloy e psalm ni be gaar: “Gimed e pi engel ni bay gelngimed nib gel, ni gimed be fol ko tin ni ke yog ni nguun rin’, ma gimed ma rung’ag e tin ni ma yog, mpininged e sorok ngak Jehovah! Gimed gubin e pi tapigpig nu tharmiy ni ba’ gelngimed nib gel, ni gimed e pi tapigpig ni gimed be rin’ e tin nib m’agan’ ngay, mpininged e sorok ngak Jehovah!”​—Psalm 103:20, 21, New World Translation.

Be weliy e Bible ni engel e gathi nni sunumiyrad ni yad e girdi’ u fayleng ni som’on. I sunmiy Jehovah e pi engel u tharmiy u m’on ni i sunmiy e fayleng. Nap’an e rofen ni ke ‘puf e woch me tang e pi t’uf u taabang, ma pi fak Got e ur tolulgad u fithik’ e falfalan’.’​—Job 38:4-7.

Pi engel e yad e pi kan​—ni dabiyog ni ngan guyrad, ma ba gel gelngirad, ma yad ba llowan’. Kan piliyeg e thin nu Hebrew ni mal·ʼakhʹ nge thin nu Greece ni agʹge·los ni “engel” u Bible ko ngiyal’ ni ngan weliy murung’agen e kan. Kan yoloy e gali thin ney ni gonap’an 400 yay u Bible. Taab fan e gali thin ney, ni “tamol’og.”

Pi Engel ni Kan Guy

Dabi siy ni pi engel e yad e pi tamol’og. Sana ga manang e thin u murung’agen e ngiyal’ ni ke m’ug e engel ni Gabriel ngak Maria. I yog ngak ni yugu aram rogon ni ir be’ nib muchugbil, machane ra gargeleg reb e bitir ni nge pining Jesus ngak. (Luke 1:26-33) Maku ke m’ug reb e engel ngak bogi girdi’ ni yad ma gafaliy e gamanman u daken e ted. I yog ngorad ni gaar: “Kan gargeleg e cha’ ni ir e nge thapegmed ngak Got, ni er Kristus ni ir e Somol.” (Luke 2:8-11) Maku kan l’og boch e engel ni ngar pied boch e thin ngak Hagar, Abraham, Lot, Jacob, Moses, Gideon, Jesus, nge yugu boch e girdi’.​—Genesis 16:7-12; 18:1-5, 10; 19:1-3; 32:24-30; Exodus 3:1, 2; Judges 6:11-22; Luke 22:39-43; Hebrews 13:2.

Urngin e thin ni ke pi’ e pi engel ngak e girdi’ e ba m’ag nga fiti laniyan’ Got ma gathi girdi’. I m’ug e pi engel ni yad e pi tamol’og rok Got ko ngiyal’ nib m’agan’ Got ngay. Ya de piningrad e girdi’.

Susun ni Ngad Pininged e Pi Engel ni Ngar Ayuweged Gadad Fa?

Bpuluw ni ngan pining e pi engel ni ngar ayuweged gadad ko ngiyal’ ni bay e gafgow fa? Faanra arrogon, ma yiba adag ni ngan nang fithingan e engel ni ri rayog ni nge ayuwegey. Bay boch e babyor ni yima pi’ ni chuw’ay ni bay fithingan e pi engel riy, nib muun ngay e dodow, nge liw, nge maruwel rorad. Reb e babyor e be tamilangnag fithingan fa ragag e engel ni bin th’abi gilbuguwan, ara pi engel ni bin th’abi lingagil u lan Ngal e fayleng. Maku u lan e babyor ma be yog ni ngan unguy owchey, min nog fithingan e engel nib sagaal ni in yay, min fil fan nib gel mab sagaal, me “bung rogon e numon ngorad.”

Ba thil e Bible ya ke mus ni be tamilangnag fithingan l’agruw e engel nib yul’yul’ ngak Got, ni Michael nge Gabriel fithingrow. (Daniel 12:1; Luke 1:26) Sana kan tamilangnag fithingan e gali engel ney ni fan ni nge dag ni ra reb e engel ma ir ba kan ni bay fithingan, ma gathi ba gelngiy.

Maku boch e engel e dubrad ni nga rogned fithingrad ngak e girdi’. Nap’an ni yog Jakob ngak reb e engel ni nge yog fithingan, ma de yog fithingan ngak. (Genesis 32:29) Ma nap’an ni fith Joshua ngak reb e engel ko ir mini’, ma ke mus ni yog fre engel ngak ni ir “e be gagiyegnag e ba’ rok Jehovah e salthaw.” (Joshua 5:14) Maku nap’an ni fith e gallabthir rok Samson fithingan reb e engel, ke fulweg ni gaar: “Mang fan ni gab adag ni ngam nang fithingag? Fithingag e ba ngochol nib fel’.” (Judges 13:17, 18, NW) De pi’ e Bible fithingan e pi engel, ya aram rogon ndab ni meybil ara nliyor ngorad. Ku gad ra guy ni be yog e thin ko Bible ndabda pininged yad.

Ngan Pining Got

Be tamilangnag e thin ko Bible gubin ban’en nib t’uf ni ngad nanged u murung’agen e giyow ko kan. I yoloy apostal Paul ni gaar: “Urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir baga’fan ya . . . en ni be pigpig ngak Got e nge par ni ke bung rogon nrayog ni nge rin’ urngin mit e ngongol nib fel’.” (2 Timothy 3:16, 17) Faanra baadag Got ni ngad nanged fithingan e pi engel, ma ra tamilangnag ko Thin Rok u Bible. Maku faanra baadag Got ni ngad nanged rogon ni ngad fl’eged e numon ngak e pi engel ma ngad nonad ngorad u daken e meybil, ma ra yog ngodad ko thin nu Bible.

I yog Jesus Kristus ni gaar: “Faan ga ra meybil, ma ga yan nga singgil rom ngam ning e mab, ma ga meybil ko Chitamam ni be’ ndanir guy . . . Ngam meybilgad ni nge lungumed: ‘Chitamangimad ni ga bay u tharmiy, ngan tay fan fithingam nib thothup.’” (Matthew 6:6, 9) Be tamilangnag e Thin nu Bible e pi n’en ni baaray: Susun ni dabda pininged e pi engel ara ngad meybilgad ngorad, machane susun ni ngad meybilgad ngak fa En ni Sunmiy e pi engel, ni Got. Fithingan e gathi ba ngochol nib mith, ma de t’uf ko reb e sothuw ni nge tamilangnag. Yugu aram rogon ni kan guy rogon ni ngan mithag fithingan Got, machane ke pag 7,000 yay ni bay u Bible. Ya amu lemnag ni bpuluw ko tang ni yon’ e an ni yoloy e psalm ngak e Chitamangin u tharmiy: “Gur ni Jehovah fithingam, e go’ gur e En Th’abi Tolang u gubin yang u fayleng.”​—Psalm 83:18.

Dabi par Jehovah ni kaygi yoor pa’ u puluwon ni nge motoyil ngodad nfaanra gad ra meybil ngak nrogon. Be tamilangnag e thin ko Bible ni gaar: “Owchen Jehovah e be sap nga fayleng iyan ni nge dag gelngin ngak e piin nib yul’yul’ gum’ercharad ngak.”​—2 Kronicles 16:9.

Pi Engel Nge Gafarig

Baga’ ni ma yog e pi babyor ni ma pufthinnag e pi engel e girdi’, machane gathi aram rogon. Bpuluw ya dariy mat’awun e pi engel ni ngar pufthinnaged e girdi’. Jehovah e ir e “Tapufthin rok e girdi’,” ni yugu aram rogon ni “pi’ mat’awun e en ni Fak [ni Jesus Kristus] ni nge pufthinnag e girdi’.” (Hebrews 12:23; John 5:22) Ba oloboch ni ngan lemnag ni der ma tafinaynag e pi engel u murung’agen rogon e par rodad. I yog Jesus ni gaar: “Ku erera’ rogon e pi engel rok Got ni yad ra falfalan’, ni bochan taareb e tadenen ni pi’ keru’ ko kireb ni be ngongliy.”​—Luke 15:10.

Machane der par e pi engel ni ke mus ni yad be guy e pi n’en ni gad be rin’. Ka nap’an e kakrom, kar maruwelgad ni ngar thanged e fan rok e girdi’, mar maruweliyed e pufthin rok Got. Be weliy e thin ko Psalm 78:49 ni gaar: “Ke puog e damumuw rok, nge pufthin, nge gafgow nga dakenrad, me l’og e pi engel ni nge yog e gafgow ngorad.” Ku aram rogon reb e thin u Bible ni ke thang reb e engel e fan rok 185,000 e salthaw nu Assyria u taareb e nep’.​—2 Kings 19:35.

Ku aram rogon nga m’on, ya ra thang e pi engel e fan rok e girdi’ ni dubrad ni ngar folgad ko pi motochiyel nib mat’aw rok Got ma yad be magawonnag e par rok yugu boch e girdi’. Ra mug Jesus nge “pi engel rok nib yargel, nge nifiy ni be daramram, ni nge gechignag e piin nde t’uf rorad ni ngar nanged murung’agen Got nge piin ndarir folgad ko thin nib fel’ ni yib rok Got.”​—2 Thessalonika 1:7, 8.

Ere be dag e thin ko Bible ni ma rin’ e pi engel nib yul’yul’ e tin nib m’agan’ Got ngay mar ted tanggin e pi motochiyel rok nib mat’aw. Ba tamilang ni faanra baadag Got ni nge ayuwegdad e pi engel, ma ba t’uf ni ngad nanged e tin nib m’agan’ Got ngay ma ngad athamgilgad ni ngad rin’ed.

Guardian Angel

Ma ayuweg e pi engel e girdi’ fa? Fith apostal Paul ni be gaar: “Pi engel e yad e mang? Yad e pi kan ni yad ma pigpig ngak Got ni ma l’ograd ngar ayuweged e piin ni ngar thapgad ngak Got? (Hebrews 1:14) Ba gagiyel ni fulweg e deer ni fith Paul ni aram rogon.

Bochan ni dabun fa dalip e Hebrew ni Shadrach, Meshach, nge Abednego, ni ngar siro’gad ngar ted fan fre liyos ni gol ni ngongliy Nebuchadnezzar ni Pilung nu Babylon, ma aram kan nin’rad nga lan fre tafen e nifiy. Machane pi tapigpig nem ni yad ba yul’yul’ ku Got e dar gafgowgad ko fre nifiy. Faani sap fre pilung nga lan fre tafen e nifiy, me guy “aningeg i pumoon ni yad be yanyan u mit e re nifiy nem,” me yog ni “bin aningeg i yad e bod yaan ba kan.” (Daniel 3:25) In e duw nga tomren, me par Daniel u lan tafen e layon ya bochan ni i par nib yul’yul’ ngak Got. Ku aram rogon ni ke par nde gafgow me gaar: “Got e ke l’og e engel rok ke yib i m’ag l’ugun fapi layon.”​—Daniel 6:22.

Tomren ni ke sum e ulung ko pi Kristiano u nap’an e bin som’on e chibog C.E., ma ke m’ug e engel biyay, kar paged e pi apostal u kalbus. (Acts 5:17-24; 12:6-12) Ma nap’an ni yib e yoko’ u maday nrayog ni nge yim’ Paul riy, me m’ug reb e engel me yog ngak ni dabi yim’ ya thingari taw nga Roma.​—Acts 27:13-24.

Pi tapigpig rok Jehovah Got e ngiyal’ ney e kari mich u wan’rad ni ba riyul’ e pi engel ma rayog ni ngar ayuweged yad, ni bod rogon ni kar ayuweged Elisha nge reb e tapigpig rok. (2 Kings 6:15-17) Ba riyul’ ni “engel rok Jehovah e ma matanagiy e piin ni bay madgun Got u wan’rad me chuwegrad ko riya’.”​—Psalm 34:7; 91:11.

Thin ni Be Wereg e Pi Engel

Yugu aram rogon ni ma lemnag e pi engel u murung’agen e par rok e piin ni yad be pigpig ku Jehovah Got, machane kub mil fan ngorad ni nge taw e thin riyul’ u murung’agen Got nge fiti laniyan’ ngak e girdi’. I yoloy apostal Paul ni gaar: “Mu gguy yugu reb e engel ni be changeg nib tolang u fithik’ e nifeng, ni ba’ rok e thin ndabi math biid, nthin nib fel’ ni nge weliy ngak e girdi’ nu fayleng, ni urngin e pi nam nge ganong nge thin nge gubin mit e girdi’. Me gaar ni baga’ laman: ‘Nge yib madgun Got ngomed, mi gimed ta’ fan nga feni sorok!’”​—Revelation 14:6, 7.

Ga baadag ni ngam nang fan fre “thin ndabi math biid nthin nib fel’? Faanra ga baadag, mu fith ngak e Pi Mich Rok Jehovah. Ya ra falfalan’rad ni ngar weliyed fan ngom.

[Sasing ko page 7]

Reb e engel ni be changeg nib tolang u fithik’ e nifeng ni ba’ rok e thin ndabi math biid ni thin nib fel’. Ga baadag ni ngam nang fan?