Bay Reb E Engel Ni Tamatanagiyem Fa?

KE MICH u wan’um ni bay reb e guardian angel ni be matanagiyem fa? Boor e girdi’ ni yad ma lemnag ni aram rogon. Amu lemnag reb e ppin u ngal u Canada ni yog ni bay e tow’ath rok nib l’ag e pi engel ngay. Faanra ga ra pi’ e ngochol rom nib polo’ ngak ma ga pi’ $200 ngak, ma ra yog nra l’og reb e guardian angel ngom. Som’on ma ra meditate ni nge tiyan’ ko nifiy ko kendol. Bin migid, ma ra pig e changar rok ma ra pi’ e engel rom e thin ni nge yog ngom. Nge mu’ ma ra susunnag yaan e engel rom ni ngam nang rogon yaan.

Ra lemnag boch e girdi’ ni bpuluw e re n’ey ko fre yat u murung’agen Louis ni Pilung nu France. Susun ni i chuw’iy e wul ni rib tolang puluwon ni mul u pon Michael ni Pilungen e Engel. Yugu aram rogon nra fith e girdi’ e pi deer u murung’agen fre yat, machane dabi maruwaran’ boor e girdi’ ko pi n’en ni i yog fre ppin nu Canada.

Yi Baadag ni Ngan Nang Murung’agen e Engel

Ka nap’an in e duw faram ma ri ma lemnag e girdi’ u murung’agen e pi engel. Ya yima weliy u murung’agen e engel u TV nge kachido, pi babyor, magazine, nge newsletter ni kar ayuweged e ppin nib m’ar, mar fl’eged laniyan’ e girdi’ ni ke kireban’rad ni bochan e yam’, ma yad ma pi’ e gonop ngak e girdi’, ma yad ma pow’iy e girdi’ ndabra m’ad. U Meriken ma gonap’an 20 million e girdi’ ni yad ma guy e TV u gubin e wik u murung’agen e pi engel ni yad ma ayuweg e yafos rok e girdi’. U reb e kantin ni ma pi’ nchuway e pi babyor ma ke pag 400 e babyor riy ni ma weliy murung’agen e engel.

Reb e babyor ni kan yoloy ndawori n’uw nap’an e be weliy murung’agen e pi engel ni ke ayuweg e pogofan rok boor e salthaw ni ke un ko mahl. Maku bay e babyor ni kan nog e bumper sticker ngay ni yima tay u daken e bumper ko karro ni be yog ni fa en ni be maruweliy e karro e bay e guardian engel ni be matanagiy. Bay boor e ulung, muulung, nge skul ni ma mon’ognag ni ngan fil murung’agen e pi engel maku yima fil rogon e numon ko engel ngak e girdi’.

Eileen Freeman e ir e en ni yoloy dalip e babyor u murung’agen e engel ma ir e publisher ko pi babyor ni ke mus ni ma weliy murung’agen e engel. Ke yog ni gaar: “Ke mich u wan’ug, ko urngin e engel ni bay u tharmiy ma bay reb e guardian angel u Fayleng, ni maruwel rorad e gathi ke mus ni ngar n’ufed Got nu tharmiy machane ku ma ayuweg e girdi’ nge yungi n’en nib fas u Fayleng. Kan dugliy reb e guardian angel ngak ra reb e girdi’ ko ngiyal’ ni kan diyennag, ma ra ayuweg ko ngiyal’ ni be ga’ iyan u meyal’, mu nap’an ni ngan gargeleg, me ilal iyan u fayleng, nge mada’ ko ngiyal’ ni nge pow’iy u fayleng me yan nga tharmiy.” Pi thin ney e be tamilangnag rogon e lem rok e girdi’ u murung’agen e guardian engel.

Bochan nib momaw’ e par ko ngiyal’ ney ma ba mom ni nge mich u wan’uy ni bay e guardian engel, ni maruwel rok e nge ayuweg e girdi’. Mang e be yog e Bible ni Thin rok Got u murung’agen e re n’ey? Susun ni ngad guyed rogon ni ngad fl’eged e numon ngorad? Uw rogon u wan’rad e gafarig rodad nge michan rodad? Mang e ayuw ni yad ra pi’ ngodad? Yira pi’ e fulweg ko pi deer ney ko bin migid e article.