Mu Folwok ko Pi Engel ni Yad Ba Yul’yul’

1-2. (a) Uw rogon ni gad ba thil ko pi engel? (b) Uw rogon ni taareb rogodad ko pi engel?

NAP’AN ni pow’iyem Jehovah ko tin riyul’, ma aram e ke piningem nga lan e tabinaw rok nib thilthil rarogon e girdi’ riy maku yad ma t’ufeged yad, nib muun bokum milyon e engel ngay ni yad ba yul’yul’. (Dan. 7:​9, 10) Gad ra lemnag e pi engel, mab ga’ nsana ra yib ngan’dad rogon ni yad ba thil ngodad. Bod ni pi engel e ni sunmiyrad mab n’uw nap’an nga tomuren mfin nsunmiy e girdi’. (Job 38:​4, 7) Kab gel gelngirad ngodad. Kab gel farad thothup nge rogon farad mat’aw ngodad ya gadad e dawor da flontgad.​—Luke 9:26.

² Yugu aram rogon ni ireray boch ban’en nib thil u rarogodad e pi engel, machane ku boor ban’en u rarogodad ni taareb rogon. Bod nrayog ni nge m’ug pi fel’ngin Jehovah rodad ni bod e pi engel. Ku bay e puf rogon rodad ni bod yad. Ra bagadad ma bay fithingan, maku ra bagadad ma rarogon, ma kub thilthil e n’en nib milfan ngak bagadad nge bagadad ni bod e pi engel. Kub t’uf ni ngad liyorgad ngak e En Ke Sunmiydad ni bod yad.​—1 Pet. 1:12.

3. Mang e rayog ni ngad filed rok e pi engel ni yad ba yul’yul’?

³ Bochan ni boor ban’en rodad e pi engel ni taareb rogon, ma aram fan ni ngongol rorad nib manigil e rayog ni nge pi’ e athamgil nga lanin’dad me fil boor ban’en nib ga’ fan ngodad. Gad ra weliy ko re article ney rogon nrayog ni ngad folwokgad u rogon ni ma dag e pi engel ni yad ba yul’yul’ e sobut’an’, nge rogon nib t’uf e girdi’ rorad, nge rogon e k’adan’ ni yad ma tay, nge rogon ni yad ma ayuweg e ulung ni nge par nib beech.

PI ENGEL E BA SOBUT’AN’RAD

4. (a) Uw rogon ni ma dag e pi engel e sobut’an’? (b) Mang fan nib sobut’an’ e pi engel? (Psalm 89:7)

⁴ Pi engel ni yad ba yul’yul’ e ba sobut’an’rad. Yugu aram rogon ni boor ban’en ni yad manang, mab gel gelngirad, ma yad ba gonop, machane yad ma fol ko n’en ma yog Jehovah ngorad. (Ps. 103:20) Darur ufgad ko pi n’en yad ma rin’ ara ra ufgad nga gelngirad u nap’an ni yad be rin’ e maruwel ni kan pi’ ngorad. Ku yad ba felfelan’ ngay ni ngar rin’ed e n’en nib m’agan’ Got ngay ni yugu aram rogon ndan nang fithingrad.a (Gen. 32:​24, 29; 2 Ki. 19:35) Yad ma siyeg ni ngan pining e sorok ngorad ko pi n’en ni Jehovah e ir e bay rogon ni ngan pining e sorok riy ngak. Ere mang fan nib sobut’an’ e pi engel? Bochan nib t’uf Jehovah rorad ma ri yad ma tayfan.​—Mu beeg e Psalm 89:7.

5. Uw rogon ni dag reb e engel e sobut’an’ u nap’an ni be yal’uweg apostal John? (Kum guy e sasing.)

⁵ Am lemnag ban’en ni buch ni be dag rogon feni sobut’an’ e pi engel. U bang ko duw ni 96 C.E., me pilyeg ba engel nder yog e Bible fithingan e changar rok apostal John nge guy bogi ban’en ni ngat ngay. (Rev. 1:1) Mang e rin’ John u nap’an ni guy e pi n’ey? I guy rogon ni nge siro’ ko fare engel. Machane me gur fare engel nge taleg me gaar: “Dab mu rin’ ni er rogon! Yi gag reb e tapigpig ni bod gur nge pi walagem . . . Mu ta’ fan Got ma ga meybil ngak!” (Rev. 19:10) Rib sobut’an’ e re engel ney! Dabun ni ngan pining e sorok ngak. Ka chingiyal’ nem me yog ngak John ni nge tayfan Jehovah Got me meybil ngak. Machane ku de darifannag e re engel nem John. Ba sobut’an’ me yog ni ku ir reb e tapigpig ni bod John ni yugu aram rogon ni ir e ba n’uw nap’an ni ke pigpig ngak Jehovah ma kab gel gelngin ngak John. Ku de puwan’ ngak ni yugu aram rogon nib t’uf ni nge yal’uweg, ya non ngak u fithik’ e sumunguy. Dabisiy ni ke nang ni kari ngat John ko tin ke guy.

6. Uw rogon nrayog ni ngad folwokgad u rogon ni ma dag e pi engel e sobut’an’?

⁶ Uw rogon nrayog ni ngad folwokgad u rogon ni ma dag e pi engel e sobut’an’? Ku arrogodad nrayog ni ngad rin’ed e maruwel ni kan pi’ ngodad ndab da ufgad ara da guyed rogon ni nga nog e sorok ngodad. (1 Kor. 4:7) Maku reb e susun e dab da lemnaged ni ka gad ba fel’ ngak yugu boch e walag ni faanra ba n’uw nap’an ni kad pigpiggad ngak Jehovah nga n’umngin nap’an ni kar pigpiggad ngak, ara bay boch e maruwel ni gad ma rin’ ndarur rin’ed. Bin riyul’ riy e ra be yoor e maruwel ni gad be rin’ ni fan ko pigpig rodad ngak Jehovah, ma aram e ri be gel feni ga’ fan ni ngaud sobut’naged gadad. (Luke 9:48) Gad baadag ni ngad rin’ed boch ban’en ni fan ngak yugu boch e girdi’ ni bod e pi engel. Dubdad ni ngad k’aringed e girdi’ ni ngar lemnaged ni kab ga’ fadad ngorad.

7. Uw rogon nrayog ni ngad daged e sobut’an’ u nap’an nra t’uf ni ngad yal’uweged ara da fonownaged be’?

⁷ Ku rayog ni ngad daged e sobut’an’ u nap’an nra t’uf ni ngad yal’uweged ara da fonownaged be’ ni bod reb i walagdad ara fakdad. Rayog nib t’uf ni ngad pied e fonow nib gel ngorad. Machane rayog ni ngad pied u reb e kanawo’ ndabi k’aring faen ni yibe fonownag ni nge mulan’ ni bod e n’en ni rin’ fare engel ni yal’uweg John u fithik’ e sumunguy. Faanra dab da lemnaged ni ka gad ba fel’ ko faen gad be fonownag, ma aram e rayog ni ngad pied e fonow ni ke yib u Bible u fithik’ e tayfan nge runguy.​—Kol. 4:6.

BA T’UF E GIRDI’ ROK E PI ENGEL

8. (a) Uw rogon ni ma dag e pi engel nib t’uf e girdi’ rorad nrogon ni be yog e Luke 15:10? (b) Uw rogon ni ma ayuwegdad e pi engel u nap’an e machib? (Kum guy e sasing.)

⁸ Pi engel e darur feked owcherad ko n’en ma buch ko girdi’ ara ra lemnaged nde ga’ fadad. Ya ba t’uf e girdi’ rorad. Nap’an nra kalngan’ reb e tadenen, ara sul reb e saf ni ke malog ngak Jehovah, ara thilyeg be’ e ngongol rok nge yib ko tin riyul’, ma yad ma felfelan’. (Mu beeg e Luke 15:10.) Ku yad ma pi’ e ayuw ko fare maruwel ni machib. (Rev. 14:6) Yugu aram rogon ndarur machibnaged e girdi’, machane rayog ni ngar pow’iyed reb e tamachib ngak be’ ni baadag ni nge fil murung’agen Jehovah. Riyul’ ndabiyog ni ngar da micheged ni pi engel e kar pow’iyed gadad ngak be’. Ya ku rayog ni nge fanay Jehovah boch ban’en ni bod gelngin nib thothup ni nge ayuweg e girdi’ ara nge pow’iy e pi tapigpig rok. (Acts 16:​6, 7) Yugu aram rogon ma ma fanay e pi engel rok ni ngar ayuweged gadad u nap’an e machib. Ere nap’an ni gad ra machibnag fare thin nib fel’, ma rayog ni nge pagan’dad ngay nra ayuwegdad e pi engel.​—Mu guy fare kahol ni kenggin e “Kan Fulweg Taban e Meybil Rorad.”b

9. Uw rogon nrayog ni ngad t’ufeged e girdi’ ni bod e pi engel?

⁹ Uw rogon nrayog ni ngad t’ufeged e girdi’ ni bod e pi engel? Nap’an ni gad ra rung’ag ni ke sul be’ ko ulung, ma rayog ni ngad felfelan’gad ni bod e pi engel. Rayog ni ngad guyed rogon ni nge nang facha’ nib t’uf rodad ma kad felfelan’gad ni ke sul be pigpig ngak Jehovah bayay. (Luke 15:​4-7; 2 Kor. 2:​6-8) Ku rayog ni ngad folwokgad ko pi engel ni aram e ngad rin’ed e tin nrayog rodad ni fan ko fare maruwel ni machib. (Ekl. 11:6) Ku rayog ni ngad gayed boch e kanawo’ ni ngad ayuweged pi walagdad riy u nap’an e machib ni bod rogon ni ma ayuwegdad e pi engel u nap’an ni gad be weliy fare thin nib fel’. Ere gur, rayog ni ngad yarmiyed ni ngad machibgad be’ u taabang ni gathi rib salap ko machib, fa? Ma gur, rayog ni ngad ayuweged e pi walag ni kar pilibthirgad ara yad ba m’ar ya nge yag nra uned ko machib, fa?

10. Mang e rayog ni ngad filed ko n’en ni buch rok Sara?

¹⁰ Machane uw rogon ni faanra buchuuw ban’en nrayog ni ngad rin’ed ni bochan rarogodad? Faanra arrogon, ma ka rayog ni ngad pirieged boch e kanawo’ ni ngad maruwelgad e pi engel riy u taabang u nap’an e machib. Am lemnag e n’en ni buch rok reb e walag nib pin u India ni ka nog Sarac ngak. Tomuren ni pioneer u lan sogonap’an 20 e duw, ma aram me m’ar nge par u bet ndabkiyog ni nge un ko yan. Ri kireban’ nib gel. Machane bochan e ayuw ni i pi’ e pi walag ngak u fithik’ e t’ufeg nge beeg Bible ni ma tay ni gubin e rran, ma aram me munmun miki felfelan’ bayay. Riyul’ nthingari gay boch e kanawo’ nrayog ni nge un riy ko machib. Bochan ndabkiyog ni nge suwon nga i yoloy e babyor, ma aram e yigoo telefon e ma machib riy. Ere callnag e piin ni i mada’egrad u nap’an e machib kafram, maku rogned ngak murung’agen yugu boch e girdi’ nsana yad ra adag ni ngkur filed e Bible. Mang angin ni yib riy? U lan in e pul ma 70 e girdi’ ni tabab Sara i fil e Bible ngorad! Dabiyog ni nge ulul i fil e Bible ko pi girdi’ nem ni aram urngirad. Ere pi’ boch i yad ngak boch e walag u lan e ulung ni ngar filed e Bible u taabang. Boor e pi girdi’ nem ni yad ma un ko muulung e chiney. Ba mudugil nri ma felfelan’ e pi engel ni yad ma maruwel e pi walag u taabang ni bod Sara ni yad be rin’ urngin e tin nrayog rorad ni fan ko fare maruwel ni machib!

MA K’ADAN’ E PI ENGEL

11. Uw rogon ni ke k’adan’ e pi engel ni yad ba yul’yul’?

¹¹ Rib manigil e kanawo’ ni ma dag e pi engel ni yad ba yul’yul’ nrayog ni ngan folwok riy u rogon e k’adan’ ni yad ma tay. Ke yan bokum biyu’ e duw ni yad be k’adedan’rad ko ngongol nde mat’aw nge tin nib kireb ni be buch. Ra guyed Satan nge yugu boch e engel ni ur pigpiggad ngak Jehovah u taabang nra chelgad ngar togopuluwgad ngak. (Gen. 3:1; 6:​1, 2; Jude 6) Ku be weliy e Bible murung’agen reb e engel nib yul’yul’ ni chel reb e engel nib kireb nib gel gelngin nge togopuluw ngak. (Dan. 10:13) Maku reb e ka nap’an nni sunmiy e girdi’ ke yib i mada’ ko chiney nri in i yad e be guy e pi engel ni yad be yib ko bin riyul’ e liyor. Yugu aram rogon ma ka be ulul e pi engel ney ni yad ba yul’yul’ ko pigpig ngak Jehovah u fithik’ e felfelan’ nge pasig. Yad manang nra taw ko ngiyal’ nib puluw ma ra chuweg Got urngin e ngongol nde mat’aw.

12. Mang e rayog ni nge ayuwegdad ni ngad k’adedan’dad?

¹² Uw rogon nrayog ni ngad folwokgad ko k’adan’ ni ma tay e pi engel? Sana rayog ni boor ban’en nde mat’aw ni gad ma guy ni be buch ara yibe togopuluw ngodad ni bod e pi engel. Machane ku taareb rogodad ngorad ya ba mich u wan’dad nra taw ko ngiyal’ nib puluw ma ra chuweg Got urngin e kireb. Ere taareb rogodad ko pi engel ‘nder chalbadad i ngongliy e ngongol nib fel’.’ (Gal. 6:9) Ma ke micheg Got nra ayuwegdad ni ngad k’adedan’dad. (1 Kor. 10:13) Rayog ni ngad meybilgad ngak Jehovah ni nge pi’ gelngin nib thothup ni ir e ma ayuwegdad ni ngad gum’an’gad ma gad felfelan’. (Gal. 5:22; Kol. 1:11) Uw rogon ni faan yira togopuluw ngom? Aram e ngari pagan’um ngak Jehovah ma dab mu rus. Gubin ngiyal’ nra ayuwegem me pi’ gelngim.​—Heb. 13:6.

MA AYUWEG E PI ENGEL E ULUNG NI NGE PAR NIB BEECH

13. Mang maruwel ni yugu ba thil e kan pi’ ko pi engel ni ngar rin’ed u nap’an e tin tomuren e rran? (Matthew 13:​47-49)

¹³ Ke pi’ Jehovah reb e maruwel ni yugu ba thil ni nge rin’ e pi engel u nap’an e tin tomuren e rran. (Mu beeg e Matthew 13:​47-49.) Bokum milyon e girdi’ u ga’ngin yang e fayleng ni yad baadag ni ngar motoyilgad ko fare thin nib fel’. Bay boch e pi girdi’ ney ni yad ma rin’ boch ban’en ya nge yag nra manged boch e tin riyul’ e Kristiano, ma boch e danga’. Kan tay e pi engel ni “ngar kunuyed urngin e girdi’ ni kireb ni bay u fithik’ e girdi’ nib fel’.” Re n’ey e be yip’ fan ni kan tayrad ni ngar ayuweged e ulung ni nge par nib beech. Machane re n’ey e der yip’ fan ni gubin e girdi’ ni kar chuwgad ko ulung ndabkiyog ni ngar sulod ngay, maku der yip’ fan ndabi sum e magawon u lan e ulung. Yugu aram rogon ma rayog ni nge pagan’dad ngay nib gel e maruwel ni be tay e pi engel ni ngar ayuweged e ulung rodad ni nge par nib beech.

14-15. Uw rogon nrayog ni ngad folwokgad ko pi engel ma gad dag ni gad baadag ni nga i par e ulung nib beech? (Kum guy e sasing.)

¹⁴ Uw rogon nrayog ni ngad folwokgad ko pi engel ni yad ma guy rogon ni nge par e ulung nib beech? Ba t’uf ni ngad athamgilgad u rogon nrayog rodad ni ngad ayuweged e tha’ u thildad Jehovah ni nga i par nib gel. Rogon ni gad ma rin’ e re n’ey e aram e gad ma mel’eg boch e fager nib t’uf Jehovah rorad ma darud rin’ed ban’en nra kirebnag e tha’ u thildad. Gad ra rin’ e re n’ey, ma aram e gad be ayuweg e ulung ni nga i par nib beech. (Ps. 101:3) Ku rayog ni ngad ayuweged pi walagdad ni ngar pared ni yad ba yul’yul’ ngak Jehovah. Bod ni, mang e susun ni ngad rin’ed ni faanra kad nanged ni bay reb e walag ni ke rin’ reb e denen nib ubchiya’? Gad ra pi’ e athamgil nga laniyan’ ni nge yan i non ko piin piilal ni bochan e ba t’uf rodad. Faanra dabi rin’ e re n’ey, ma aram e gad ra yog fare magawon ko piin piilal. Gad baadag ni ngan ayuweg reb e walag ni ke meewar ko tirok Got ban’en nib papey!​—Jas. 5:​14, 15.

¹⁵ Machane bay boch e walag ni yad ma rin’ boch e denen nib ubchiya’ nthingar ni tharbograd ko ulung. Nap’an nra buch e re n’ey, ma aram e gad ma tal ‘ndab kud chaggad’ ngorad.d (1 Kor. 5:​9-13) Re yaram ney e ma ayuweg e ulung ni nge par nib beech. Maku reb e faan gad ra mel’eg ndab kud chaggad ko pi cha’ney, ma bin riyul’ riy e gad be gol ngorad. Ya rogon ni gad be par ni gad ba mudugil e rayog ni nge ayuwegrad ni nge sulan’rad. Ma faan yad ra rin’ e re n’ey, ma gad ra un ngak Jehovah nge pi engel ko felfelan’.​—Luke 15:7.

16. Mang boch e kanawo’ ni ga ra athamgil ni ngam folwok ko pi engel riy?

¹⁶ Ri gad ba tow’ath ni ke pagdad Jehovah ni ngad filed murung’agen e pi engel ma gad maruwel u taabang! Ere ngad folwokgad ko pi fel’ngirad ni aram e: sobut’an’, nge rogon nib t’uf e girdi’ rorad, nge rogon e k’adan’ ni yad ma tay, nge rogon ni yad ma ayuweg e ulung ni nge par nib beech. Faan gad ra folwok ko pi engel ni yad ba yul’yul’, ma aram e ku rayog ni ngad manged boch e tapigpig rok Jehovah ndariy n’umngin nap’an.