PI DEER NI BAY E FULWEG RIY U BIBLE

Rayog ni nge ayuwegdad e pi engel, fa?

Kakrom u m’on ni sunmiy Jehovah Got e girdi’ me sunmiy bokum milyon e engel. (Job 38:4, 7) Pi engel ney e yad boch e tapigpig rok Got nib gel gelngirad, ma bay yu ngiyal’ ni ma l’ograd ni ngar bad nga fayleng ni ngar pow’iyed mi yad ayuweg e pi tapigpig rok. (Psalm 91:10, 11) Ngiyal’ ney e ma ayuweg e pi engel e girdi’ ni nge yib angin fare thin nib fel’ ngorad ni be machibnag pi gachalpen Jesus.​—Mu beeg e Revelation 14:6, 7.

Ere gur, susun ni ngaud meybilgad ko pi engel ni ngar ayuweged gadad? Danga’, ya meybil e aram bang ko liyor rodad, ma kemus ni yigoo Got e rayog ni ngad meybilgad ngak. (Revelation 19:10) Bochan ni pi engel e yad boch e tapigpig rok Got, ma aram fan ni yad ma rin’ e tin ma yog ma gathi pi n’en ni ma yog e girdi’. Ere, aram fan ni kemus ni yigoo Got e ngaud meybilgad ngak u daken Jesus.​—Mu beeg e Psalm 103:20, 21; Matthew 26:53.

Bay boch e engel nib kireb, fa?

Nni sunmiy e pi engel ni bay e puf rogon rorad ni bod rogon e girdi’, ma rayog ni ngar mel’eged ni ngar rin’ed e tin nib fel’ ara tin nib kireb. Machane, boor e engel ni kar togopuluwgad ngak Got. (2 Peter 2:4) En th’abi som’on ni togopuluw u fithik’ e pi engel ney e aram Satan, ngemu’ miki chel boch e engel ngar folgad rok mar manged e pi kan nib kireb. Dawori n’uw nap’an ni kan chuweg Satan nge pi moonyan’ rok u tharmiy ka nin’rad nga fayleng.​—Mu beeg e Revelation 12:7-9.

Bochan ni kari yoor e kireb ma ke gel e cham ni ka nap’an e duw ni 1914, ma be m’ug riy ni dabki n’uw nap’an ma ra chuweg Got gelngin Satan nge pi moonyan’ rok. Ngemu’ me sulweg e re fayleng ney nga rogon nsusun ni nge par.​—Mu beeg e Revelation 12:12; 21:3, 4.