Jehovah E Ir E Taayuw Rodad

“Ayuw ni ma yib ngog e ma yib rok Jehovah, ni ir e Sunmiy e tharmiy nge but’.”​—PSALM 121:2, NW.

1, 2. (a) Mang fan ni rayog ni nga nog ni yu ngiyal’ e ba t’uf rodad e ayuw? (b) Ba miti mang Taayuw Jehovah?

MINI’ e arodad ni de t’uf e ayuw rok? Tin riyul’ riy e gadad gubin e yu ngiyal’ mab t’uf rodad e ayuw​—ni ngad kadedan’dad ko reb e magawon nib gel, ma ngad k’adedan’dad ko amith u lanin’dad nbochan ni ke mul u pa’dad e n’en nib t’uf rodad, ma ngad kadedan’dad ko skeng nib mo’maw’. Nap’an ni ra t’uf e ayuw ku be’, ma baga’ ni ma chel ngak reb e fager nib tarunguyey. Ga ra yog e magawon rom ngak e fager rom ni aram rogon ma ra mom ni ngam k’adan’um. Machane n’en ni rayog ni nge ayuweg e girdi’ e bay e gin ni nge mus riy. Maku, boch e girdi’ e sana dabiyog ni ngar pi’ed e ayuw u nap’an ni ke t’uf rom.

² Machane, bay reb e Taayuw ni bay gelngin nrib gel ma bay boor ban’en rok. Maku, ke micheg ngodad ni dabi pagdad. I ir e En ni ke yog fare psalmist fithingan mu fithik’ e pagan’ nib gel e ke yog ni gaar: “Ayuw ni ma yib ngog e ma yib rok Jehovah.” (Psalm 121:2, NW) Mang fan ni re psalmist ney e ke pagan’ nra ayuweg Jehovah? Ngada yaliyed Psalm 121 ma ngad fulweged e re deer nem. Gad ra rin’ ban’en ni aram rogon ma ra ayuwegdad ni ngad guyed ko mang fan ni ku rayog ni ngad sapgad ngak Jehovah u fithik’ e pagan’ ni ir e Taayuw rodad.

En Ma Pi’ e Ayuw ni Dabi War

3. Mang e pi burey ni ke sap fare psalmist ngay, ma mang fan?

³ I tabab fare psalmist ni be weliy ni bochan ni Jehovah e ir ke sunmiy urngin ban’en ma aram bay fan ni ngad pagedan’dad ngak ni gaar: “Gu ra sap ko fapi burey. Uw e nge yib e ayuw riy ngog? Ayuw ni ma yib ngog e ma yib rok Jehovah, ni ir e Sunmiy e tharmiy nge fayleng.” (Psalm 121:1, 2, NW) Fare psalmist e de sap ko burey ndemtrug. Nap’an ni yibe yoloy e pi thin ney, ma tempel rok Jehovah e immoy u Jerusalem. Re mach nem, e immoy u daken e pi burey nu Judah, ni aram e tagil’ Jehovah ni be yip’ fan ban’en. (Psalm 135:21) Rayog ni fare psalmist e ke sap ko fapi burey u Jerusalem ni ireray e gin ni kan toy e tempel rok Jehovah riy, ma be gay Jehovah ni ke l’agan’ ngay nra ayuweg. Mang fan ni kari mudugil laniyan’ fare psalmist ni ra ayuweg Jehovah? Ya bochan e ir e ke “Sunmiy e tharmiy nge fayleng.” Fare psalmist e bod ni ke yog ni gaar, ‘Mmutrug ni dariy ban’en ni nrayog ni nge taleg e en Tasunmiy ni th’abi gel gelngin ni nge ayuwegeg!’​—Isaiah 40:26.

4. Uw rogon ni dag fare psalmist ni ri manang Jehovah e tin nib t’uf ko girdi’ rok, ma mang fan ni ma fal’eg lanin’uy e re n’em?

⁴ Bin migid ma fare psalmist e ke weliy ni Jehovah e gubin ngiyal’ ni manang e tin nib t’uf rok e pi tapigpig rok ni gaar: “Dabi pag ni ngam yoyowol. Faen ni be matanagiyem e dabi yib e chuwchuw ngak. Am sap! Dabi yib e chuchuw ngak ma dabi mol, Fa en ni be matanagiy yu Israel.” (Psalm 121:3, 4, NW) Dabi pag Got ni piin ni ke pagan’rad ngak e yad ra “yoyowol” ara ra dol’gad ma dabkiyog ni ngar sak’iygad biyay. (Proverbs 24:16) Mang fan? Ya bochan Jehovah e bod ba tachugol saf ni ri be od ni be matanagiy e saf rok. Gathi ireray e ne’n ni ri ma pi’ e athamgil nga lanin’uy? Gubin ngiyal’ ni ri ma tiyan’ ko tin nib t’uf rodad. Rran nge nep’ ni ri ma matanagiyrad.

5. Mang fan ni ka nog ni Jehovah e bay u “baan mat’aw i pa’ey”?

⁵ Ke pagan’ ngay ni Jehovah e ma Yororiy e girdi’ rok u fithik’ e yul’yul’, e yoloy fare psalmist ni gaar: “Be matanagiyem Jehovah. Jehovah e ir fon e baan ni mat’aw i paam. Ra rran ma dabi li’em e yal’, maku arrogon fare pul ni nep’.” (Psalm 121:5, 6, NW) Girdi’ ni ma milekag u but’ u Middle East, e gin ni bay e tagalul’ riy e ra ayuweg ni nge dabi magawonnag gawelngin e yal’ nib gel. Jehovah e bod ba tagolul’ ni be ayuweg e girdi’ rok, ni be ayuwegrad ko gafgow nib gel ni bod gawelngin e yal’ nib gel. Mu ta fanam i yan riy ni ka nog ni Jehovah e bay u “ba’ ni mat’aw i pa’ey.” Mahl ni yima ta’ kakrom, ma ba’ ni mat’aw i pa’ e salthaw e gathi ri ma ayuweg fare n’en ni yima mith nga fon ara shield, ya yima kol ko ba’ ni gilay’. Ma reb e fager nib yul’yul’ e rayog ni nge ayuweg ni be sak’iy u ba’ ni mat’aw ko reb e salthaw ni be un ko cham. Jehovah bod e fager ni aram rogon, ni be sak’iy u chaaren e piin ma liyor ngak, ni ke fal’eg rogon ni nge ayuwegrad u gubin ngiyal’.

6, 7. (a) Uw rogon ni micheg fare psalmist ngodad ni dabi tal Jehovah i ayuweg e girdi’ rok? (b) Mang fan nrayog ni nge l’agan’dad ngay ni bod fare psalmist?

⁶ Gur ra tal Jehovah i pi’ e ayuw ngak e girdi’ rok? Ri dabi buch ban’en ni aram rogon. I yog fare psalmist ni gaar: “Ra matanagiyem Jehovah ko urngin e gafgow ni ma yib ngom. Ra matanagiy e yafas rom. Ra matanagiyem Jehovah u nap’an ni ngam man nga wuru’ ngu nap’an ni nga mub nga lan e chiney i yan nga ram nge dariy n’umngin nap’an.” (Psalm 121:7, 8, NW) Som’mon, ko verse 5, ma fare psalmist e ke yog ni gaar: “Jehovah e be matanagiyem.” Machane u gali verse ney, i yoloy fare psalmist ni gaar: “Jehovah e bayi matanagiyem.” Piin ma liyor nib yul’yul’ e kan micheg ngorad nra ulul e ayuw rok Jehovah nge mada’ ko gabul nge langlath. Demtrug e binaw ni nga ranod ngay, nge demtrug e gafgow ni yib ngorad, ma ayuw rok Got e ra taw ngorad.​—Proverbs 12:21.

⁷ Riyul’, ni en ni yoloy fare Psalm 121 e ke l’agan’ ngay ni en Tasunmiy ni th’abi gel gelngin e be matanagiy e pi tapigpig rok nib sumunguy ni bod ba tachugol saf ni tarunguyey ma ma tiyan’ ni bod e matanag ni ma tiyan’ ko maruwel rok. Ri bay fan ni nge l’agan’dad ngay ni bod fare psalmist, ya Jehovah e dabi thil. (Malaki 3:6) Gur be yip’ fan e re n’ey ni yira yororiy dowdad u gubin ngiyal’? Danga’, machane ra ngada sapgad ngak ni ir e Taayuw rodad, ma ra matanagiydad ko urngin ban’en ni ra kirebnagdad ko tirok Got. Ba’ rogodad ni ngad fithed ni gaar, ‘Uw rogon ni nge ayuwegdad Jehovah?’ Ngada yaliyed aningeg e kanawo’ ni ma ayuwegdad. U lan e re article ney, ma gad ra weliy ko uw rogon ni ke ayuweg e pi tapigpig rok u nap’an e Bible. Ma u lan fa bin migid e article, e gad ra weliy rogon ni ma ayuweg e girdi’ rok e ngiyal’ ney.

Ayuw ni Yib Rok fapi Engel

8. Mang fan ni dabni gin ngay ni pi engel e ri ma lemnag ni nge fel’ rogon e pi tapigpig rok Got u fayleng?

⁸ Jehovah e bay bokum milyon e engel rok. (Daniel 7:9, 10) Pi fak Got ney e yad be rin’ e tin nib m’agan’ ngay u fithik’ e yul’yul’. (Psalm 103:20) Ri yad manang ni girdi’ ni tapigpig rok Jehovah e ri yad ba t’uf rok ma baadag ni nge ayuwegrad. Dabni gin ngay, ni ri ma lemnag e pi engel ni nge fel’ rogon e pi tapigpig rok Got u roy u fayleng. (Luke 15:10) Ere, ba mudugil ni ba felfelan’ e pi engel ni ke fanayrad Jehovah ni ngar ayuweged e girdi’. Mang boch e kanawo’ ni i fanay Jehovah e pi engel riy ni ur ayuweged e girdi’ ni tapigpig rok kakrom?

9. Mu weliy reb bi rogon ni be dag ko uw rogon ni ke pi’ Got mat’awun nge gelngin e pi engel ni ngar yororiyed e girdi’ nib yul’yul’.

⁹ I pi’ Got mat’awun nge gelngin ngak e pi engel ni ngaura yororiyed ma ngaura ayuweged e yafas ko girdi’ nib yul’yul’. L’agruw e engel e ke ayuweg Lot nge gali bitir rok ni ppin ni ngar milgad ni dabra m’ad u nap’an ni kan gothey Sodom nge Gomorrah. (Genesis 19:1, 15-17) Reb e engel e ke li’ fa 185,000 e salthaw nu Assyria ni be magawonnag yu Jerusalem. (2 Kings 19:35) Nap’an ni kan n’ag Daniel nga tafen e layon, me l’og Jehovah e “engel rok ke yib i m’ag l’ugun fapi layon.” (Daniel 6:21, 22) Reb e engel e ke ayuweg Peter ni apostal nge chuw u kalbus. (Acts 12:6-11) Fare Bible e be weliy murung’agen boor e ayuw ni pi’ e pi engel ngak e girdi’, ni be gelnag e thin ni bay ko Psalm 34:7 (NW) ni be gaar: “Pi engel rok Jehovah e yad ba ulung nib liyeg e piin ni bay madgun Got u wan’rad, ni yad be ayuweg e yafas rorad.”

10. Uw rogon ni ke fanay Jehovah reb e engel ni nge pi’ e athamgil nga laniyan’ Daniel ni fare profet?

¹⁰ Yu ngiyal’, ma ma fanay Jehovah e pi engel rok ni nge pi’ e athamgil ma nge gelnag e girdi’ rok nib yul’yul’. Reb ni be dag e n’en ni aram rogon e bay ko Daniel guruy ni 10. Ngiyal’ nem, e sana ke chuchugur ko 100 e duw rok Daniel. Kari mulan’ fare profet, mab tamilang ni fan ni i yodor e bochan ni kan gothey Jerusalem mab sasagaal ni ngan toy biyay fare tempel. Maku ke rus u tomren ni kan piliyeg e changar rok ni ma k’aring e marus. (Daniel 10:2, 3, 8) Ke l’og Got reb e engel u fithik’ e t’ufeg ni nge pi’ e athamgil nga laniyan’. Boor yay, ni i puguran fare engel ngak Daniel ni “rib ga’fan” u owchen Got. Mang e n’en ni buch ni bochan? Me yog fare profet ni ke pilibthir ngak fare engel ni gaar: “Kam gelnageg.”​—Daniel 10:11, 19.

11. Mang reb ni be dag ko uw rogon ni kan fanay e pi engel ni ngar pow’iyed fare maruwel ni ngan wereg fare thin nib fel’?

¹¹ Maku ke fanay Jehovah e pi engel ni ur pow’iyed fare maruwel ni ngan machibnag fare thin nib fel’. Reb e engel e ke yog ngak Filip ni nge machibnag murung’agen Kristus ngak reb e eunuch ni be’ nu Ethiopia, ma tomur riy min taufenag. (Acts 8:26, 27, 36, 38) De n’uw nap’an nga tomren, ma ke m’agan’ Got ngay ni fare thin nib fel’ e un machibnag ngak e piin ni gathi yad yu Israel ma dan maadad ngorad. Kan piliyeg e changar rok Kornelius, ma ke guy reb e engel ni keb ngak, ni cha’ ney e gathi be’ nu Israel ma ba’ madgun Got u wan’, me yog ngak ni nge l’og e girdi’ ngak Peter ni apostal. Nap’an ni pi tamol’og rok Kornelius e kar guyed Peter, ka rogned ni gaar: “Ke yog reb e engel ngak Kornelius . . . ni nge non ngom ngam man nga tabinaw rok ni nge rung’ag e thin ni nga mog ngak.” Me fol Peter, ma aram cha’ nem ni gathi be’ nu Israel ni dan maadad ngak e ke mang bang ko ulung ko Kristiano. (Acts 10:22, 44-48) Mu susunnag ko mang e ga ra thamiy u nap’an ni kam nang ni reb e engel e ke ayuwegem ni ngam mada’nag be’ ni riyul’ ni baadag e machib!

Ayuw u Daken e Kan ni Thothup

12, 13. (a) Mang fan ni pi apostal rok Jesus e ri bay fan ni nge l’agan’rad ngay nrayog ni nge ayuwegrad fare kan ni thothup? (b) Uw rogon ni fare kan ni thothup e ke pi’ mat’awuy nge gelngiy ngak e Kristiano ko fa bin som’mon e chibog?

¹² De n’uw nap’an u m’on ni dawori yim’ Jesus, me micheg ngak e pi apostal rok ni dabni pagrad ndariy e ayuw ni ngan pi’ ngorad. Ani Chitamangiy e ra pi’ ngorad reb e “taayuw, ni fare kan ni thothup.” (John 14:26) Fapi apostal e ri bay fan ni nge pagan’rad ni fare kan ni thothup e ra ayuwegrad. Ra ngan lemnag, ma fare Babyor nib Thothup e ke sug ko n’en ni be dag u rogon ni i fanay Jehovah fare kan ni thothup, ni fare gelngin ni th’abi gel ni ba’, ni nge ayuweg e girdi’ rok.

¹³ Boor yay, ni kan fanay fare kan ni thothup ni nge pi’ mat’awuy nge gelngiy ngak e girdi’ ni nge rin’ e tin nib m’agan’ Jehovah ngay. Kan ni thothup e ke pi’ mat’awuy nge gelngiy ngak e pi Tapuf Oloboch ngar ayuweged yu Israel. (Judges 3:9, 10; 6:34) Re kan ni thothup nem e ki pi’ mat’awuy nge gelngiy ngak e Kristiano ko fa bin som’mon e chibog ngaur ululgad i wereg e machib ni dara rusgad nyugu aram rogon ni keb ngorad gubin mit i togopuluw nge gafgow. (Acts 1:8; 4:31) Bochan ke yog rorad ni ngar wereged e machib ma ireray e n’en ni ri be micheg e maruwel ko kan ni thothup. Mang reb e n’en nrayog ni nge tamilangnag ko uw rogon ma girdi’ “ndariy e skul” rok e rayog rorad ni ngar wereged e thin ko Gil’ilungun ko n’en ni kan nog u fayleng ni polo’ ngay ko ngiyal’ nem?​—Acts 4:13; Kolose 1:23.

14. Uw rogon ni ke fanay Jehovah e kan ni thothup rok ni nge tamilang ban’en u wan’ e girdi’ rok?

¹⁴ Maku ma fanay Jehovah e kan ni thothup rok ni nge gelnag e tamilangan’ ko girdi’ rok. U daken e ayuw ko kan ni thothup rok Got, me yog rok Josef ni nge weliy fan e lik’ay rok Farao ni be yiiynag ban’en. (Genesis 41:16, 38, 39) U daken e kan ni thothup rok, me gagiyegnag Jehovah ni ngan dag e tin nib m’agan’ ngay ngak e piin nib sobut’an’rad machane min mithag rok e piin nib tolangan’. (Matthew 11:25) Ma arfan, ni murung’agen e pi n’en ni ma pi’ Jehovah ngak e “piin nib t’uf Got rorad,” i yog Paul ni apostal ni gaar: “I dag Got e pi n’em ngodad u daken e kan ni thothup rok.” (1 Korinth 2:7-10) Kemus nu daken e ayuw ko kan ni thothup ma rayog rok be’ ni nge nang fan e tin nib m’agan’ Got ngay.

Ayuw ni Yima Fek ko Thin Rok Got

15, 16. Mang e ka nog ngak Joshua ni nge rin’ ma rayog ni nge rin’ ban’en u fithik’ e gonop?

¹⁵ Thin rok Jehovah ni kan thagthagnag e “baga’ fan ko ngan fil ban’en,” ma ra ayuweg e pi tapigpig rok Got ni nge “bung rogorad nrayog ni ngar rin’ed urngin mit e ngongol nib fel’.” (2 Timothy 3:16,17) Boor ban’en u lan e Bible ni be dag ko uw rogon ni kan ayuweg e girdi’ rok Got kakrom u daken bang ko Thin rok ni kan yoloy nga but’.

¹⁶ Thin nu Bible e ke ayuweg ni nge pow’iy e piin ma liyor ku Got. Nap’an ni kan pi’ ngak Joshua e maruwel ni nge pow’iy yu Israel, ma ka nog ngak ni gaar: “Thingar dab mu pagtalin fare babyor ko motochiyel [ni Moses e ke yoloy], thingar um fil ni rran nge nep’, ma ngam guy rogon nguum rin’ urngin ban’en ni ba’ riy ni kan yoloy ma pi n’en ni ga ra lemnag ni ngam dugliy e ra fel’, ma yira rin’ ma ra yan i fel’.” Mu guy ni de micheg Got ngak Joshua ni nge yog e gonop ngak u daken e maangang. Faanra bieg Joshua fare “babyor ko motochiyel,” ma rayog ni nge ngongol u fithik’ e gonop.​—Joshua 1:8; Psalm 1:1-3.

17. Uw rogon ni ke ayuweg Daniel nge Josiah ni Pilung bang ko thin nu Bible ni immoy rorad ko ngiyal’ nem?

¹⁷ Maku Thin rok Got ni kan yoloy e ke ayuweg ni ngan nang e tin nib m’agan’ ngay. Ni bod Daniel, ke nang ko uw n’umngin nap’an ni ra par yu Jerusalem ni kan n’ag nbochan e thin ni yoloy Jeremiah. (Jeremiah 25:11; Daniel 9:2) Maku, mu lemnag mang e ke buch u nap’an e gagiyeg rok Josiah ni Pilung nu Judah. Ngiyal’ i n’em, ma ke palog fare nam rok Jehovah, mab gagiyel ni pi pilung e de yog rorad ni ngar fal’eged reb e babyor ko fare motochiyel ma ra folgad riy. (Deuteronomy 17:18-20) Machane nap’an ni yibe fal’eg fare tempel, ma kan pirieg “fare babyor ko motochiyel,” ni sana Moses e ke yoloy. Sana ireray e tin som’mon ni kan yoloy, ni kan mu’nag ni sogonapan 800 e duw u m’on riy. Tomren ni kan bieg e thin ni bay riy, me naab Josiah nga feni kari palog fare nam ko tin nib m’agan’ Jehovah ngay, me dugliy fare pilung ni nge rin’ e tin ni kan yoloy nga lan fare babyor. (2 Kings 22:8; 23:1-7) Gathi ba tamilang ni girdi’ rok Got kakrom e ke ayuwegrad bang ko fare Babyor nib Thothup ni ba’ rorad ko ngiyal’ nem?

Ayuw u Daken e Piin Walag u Lan e Ulung

18. Mang fan nrayog ni nga dogned ni Jehovah e ke pi’ e ayuw u nap’an ni reb e tapigpig rok nib riyul’ e be ayuweg reb?

¹⁸ Ayuw ni ma pi’ Jehovah e baga’ ni ma yib u daken e pi walag u lan e ulung. Riyul’, ni Got e ir tabolngin e ayuw u nap’an ni ra reb e Kristiano nib riyul’ e ra ayuweg reb. Mang fan nrayog ni nga dogned ni aram rogon? Bochan ba’ l’agruw i fan. Som’mon, kan ni thothup rok Got e ba muun ngay. Re kan ni thothup nem e ra yognag wom’engin, nib muun ngay e t’ufeg nge fel’ ngak e girdi’, nge ngak e piin ni be gay gelngin ni nge ayuwegrad. (Galatia 5:22, 23) Aram fan, ni nap’an ni bagayad e pi tapigpig rok Got e kan k’aring ni nge ayuweg bagayad, ma ireray e mich riy ni kan ni thothup rok Jehovah e be maruwel. Bin l’agruw, e kan sunmiydad u yaan Got. (Genesis 1:26) Fan e re n’ey e bay gelngidad ni ngad daged e pi felngin Got ngodad, nib muun ngay e ngongol nib gol nge runguy. Ere nap’an ni ra bagayad e tapigpig rok Jehovah ra ayuweg bagayad, ma Tabolngin ni riyul’ e faanem ni yibe dag felngin.

19. Rogon ni yog e Bible, uw rogon ni ke ayuwegey Jehovah u daken reb e walag u lan e ulung?

¹⁹ Nap’an e Bible, uw rogon ni pi’ Jehovah e ayuw u daken e walag u lan e ulung? Baga’ ni ma k’aring Jehovah bagayad e pi tapigpig rok ni nge fonownag bagayad, ni bod Jeremiah u nap’an ni ke fonownag Baruch me ayuweg e yafas rok. (Jeremiah 45:1-5) Yu ngiyal’, ma tin riyul’ e tapipig e kan k’aringrad ni ngar pi’ed e chugum ni ayuw ngak e pi walagrad u lan e ulung, ni bod ni pi Kristiano u Macedonia nge Achaia e kar daged nri yad baadag ni ngar ayuweged e pi walagrad u Jerusalem nib gafgow. Paul ni apostal e ke yog ni re ngongol nem ni pi’ ban’en ngak be’ e ke gagiyelnag e ngongol ni “yima pining e magar ngak Got.”​—2 Korinth 9:11.

20, 21. Uw rogon ma pi walag ni yib u Roma e kar gelnaged Paul ni apostal?

²⁰ Ri ma k’aring e runguy e thin ni be weliy u rogon ni ke athamgil e pi tapigpig rok Got ni ngar gelnaged mara pi’ed e athamgil laniyan’ ngorad. Mu lemnag e n’en ni buch nib muun Paul ni apostal ngay. Nap’an ni be yan Paul nga Roma nib kalbus, me yan ko kanawo’ nu Roma ni ka nog e Appian Way ngay. Ma tomur ko re milekag nem e ba kireb, ya girdien e milekag e susun ni nga ranod ko gin ni boor e ran riy, mab sobut’.a Pi walag ko ulung nu Roma e kar nanged ni be yib Paul. Mang e ngara rin’ed? Gur yad ra sonnag u tabinaw rorad u lan fare mach nge mada’ ko ngiyal ni keb Paul ma fin ra bad ngar mada’naged?

²¹ Luke ni tayoloy Bible, e ke un ngak Paul ko re milekag nem, e ke yog ngodad e n’en ni buch ni gaar: “Pi walag u rom [Roma], nap’an ni kar rung’aged murung’agmad, mi yad yib ngar tawgad nga Market u Appius nge Dalip e Tafen e Milekag.” Rayog ni ngam susunnag e n’en ni buch? Bochan kar nanged ni be yib Paul, ma pi walag e kar milekaggad ni kar tababgad u Roma ni ngar mada’naged Paul. Boch i yad e kar sonnaged u Market u Appius, ni ir e gin’en ni ri yimanang ni ma toffan girdien e milekag riy ni sogonapan 46 miles palongin u Roma. Ma boch e walag e kar sonnaged u Dalip Tafen e Milekag, ni gin’en ni ma toffan girdien e milekag ni sogonapan 36 miles palongin ko mach. Mang e ke rin’ Paul? Be yog Luke ni gaar: “Ma faani guyrad Paul, me pining e magar ngak Got me athamgil laniyan’.” (Acts 28:15) Mu susunnag​—kemus ni ke guy Paul e pi walag ni kar athamgilgad ngar milekaggad ngar tawgad nga ram ma ke gelnag Paul miki fal’eg laniyan’! Ma mini’ e ke pining Paul e magar ngak nbochan e re ayuw nem? I pining e magar ngak Jehovah Got ni ir e ma pi’ e ayuw.

22. Mang e thin nu Bible rodad ni fan ko duw ni 2005, ma mang e yira weliy ko bin migid e article?

²² Ba tamilang, ni tin ni rin’ Got ni kan yoloy nga Bible e be dag ni Jehovah e Got ni Taayuw. Ir Got ni Taayuw ndariy be’ ni bod ir. Ba puluw ni Pi Mich Rok Jehovah e ngara fanayed e thin ko Psalm 121:2 (NW) ni nge mang thin nu Bible ni fan ko duw ni 2005 ni gaar: “Ayuw ni ma yib e ma yib rok Jehovah.” Machane uw rogon ni ma ayuwegdad Jehovah e ngiyal’ ney? Yira weliy e re n’ey ko bin migid e article.

[Footnote]

Ka Ga Manang?

Mang boch e kanawo’ ni ma ayuwegey Jehovah riy—

• u daken e pi engel?

• u daken e kan ni thothup rok?

• u daken e Thin rok ni kan thagthagnag?

• u daken e pi walag?

[Blurb on page 9]

Thin nu Bible ni fan ko duw ni 2005 e: “Ayuw ni ma yib ngog e ma yib rok Jehovah.”​—Psalm 121:2, NW.

[Picture on page 10]

I pining Paul e magar ngak Got nbochan e ayuw ni ke pi’ e pi walag u Roma ngak