Kan Taareb ni Bochan e T’ufeg Ngak Got
NAP’AN ni sum e ulung ko Kristiano u lan e bin som’mon e chibog ko re m’ag rodad ney, Common Era, ma reb i ngongolen nib gagiyel—ni dariy fan ni rib thilthil girdien e feni—ba taareb. Pi cha’ ni baaram ni yad ma liyor ko bin riyul’ e Got e ra bad u boch e nam u Asia, ngu Europe, nge Africa. Bog nib thilthil rarogorad nge yalen rorad bay e tin—prist, nge salthaw, nge sib, nge malethay, nge ta fol chuway’, nge tin professional, nge girdien e siyobay. Boch i yad e Jews, nge ku boch, e yugu girdi’ ni gathi Jew. Boor i yad e ki immoy ni ma un ko darngal, nge pumoon nge pumoon ni ma par, nge tachingaw, nge moro’ro’, ara piin ma fek ban’en u fithik’ e yargel. Yugu aram rogon, ma nap’an ni ra Kristiano gad, mar paged e ngongol rorad ni kireb mar pired ni kar taarebgad u fithik’ e michan’.
Mang e bungnag rogon e Kristiano ko bin som’mon e chibog ngar kunuyed nga taabang urngin e pi girdi’ ney ngar taarebgad? Mang fan nib gapas thilrad nge thilin e yugu girdi’ ni gubin? Mang fan ni daur uned ko wadmang nge togopuluw nge cham? Mang fan ni Kristiano ni som’mon e rib thil ko yuraba’ i teliw ni gagang’ e chiney?
Mang e Ke Chugurnag Gothon e Ulung Nga Taabang?
N’en th’abi som’mon ni taarebnag e piin yad taab mich ko bin som’mon e chibog e t’ufeg ngak Got. Pi Kristiano nem e kar nanged ni bin th’abi som’mon ni ngar rin’ed e ngar t’ufeged e bin riyul’ e Got, ni Jehovah, u polo’ i gum’ircharad, ngo polo’ i lem, nge lanin’rad. Ni bod rogon, fare apostal Peter, ni ba Jew, mi nog ngak ni nge yan ko naun rok be’ u reb e nam, ni be’ ni rogon riy e susuna dab ra chag gow. Ma n’en ni k’aring nge fol e t’ufeg rok ngak Jehovah. Peter nge ku boch e tin som’mon e Kristiano e ur falfalan’gad ko tha’ u thilrad Got u daken e tamilangan’ nib puluw u rarogon wokon, nge tin baadag, nge tin dabun. Ngiyal’ i n’em, ma urngin e piin ni ma liyor ni kar nanged ni n’en nib m’agan’ Jehovah ngay e “nge taareban’rad ma nge taareb rogon e n’en ni yad be lemnag.”—1 Korinth 1:10; Matthew 22:37; Acts 10:1-35.
Piin ni ke michan’rad e ki gel e chugur rorad nga taabang ni bochan e michan’ rorad ngak Jesus Kristus. Yad baadag ni ngaur fal’eged i lek lon ay. I ta’ chilen ngorad ni gaar: “Nge t’uf bigimed rok bigimed; ni ri bod rogon ni ku ug t’ufegmed . . . Aray e n’en ni ra nang urngin e girdi’ riy ni gimed pi gachalpeg, ni faanra bay e t’ufeg romed ngomed.” (John 13:34, 35, New World Translation) Re n’ey, ban’en ni gathi ba lem ni yugu dariy fan, ya ba t’ufeg ni ga ra pag fan e gafgow rom riy. Mang angin ni ra yib? I meybil Jesus ni fan ngak e piin ni ke mich u wan’rad ni gaar: “Gu be wenignag . . . ni yad gubin ni ngar pired ni kar taarebgad, ni ri bod rogon gur, ni Chitamag, ni ga bay u fithik’ag ma gu ba’ u fithik’am, ma nga kur pired ni yad bay u fithik’dow.”—John 17:20, 21, NW; 1 Peter 2:21.
I puog Jehovah e kan ni thothup rok, ara gelngin nib gel, nga daken e pi tapigpig rok ni riyul’. Re kan ni thothup ney e mon’ognag e taab girdi’ rorad. I bing e wo’ ngorad ngar nanged fan e pi n’en ni be fil e Bible min fanay ko urngin e ulung. Piin ni yad ma liyor ngak Jehovah e taab thin e yad be machibnag—ni ngan tay fan fithingan Jehovah u daken fare Messianic Kingdom, ba am nu tharmiy ni nge gagiyegnag urngin e girdi’. Tin som’mon e Kristiano e kar nanged fan e n’en ngar rin’ed ni “dabra manged bang ko re fayleng ney.” Demtrug e ngiyal’ ni ra yib e wagey u lan binaw ara mahl, ma Kristiano e ra par u ma thilin dabra uned nga baraba’. Yad be athamgil ni ngeb e gapas nga thilrad urngin e girdi’.—John 14:26; 18:36; Matthew 6:9, 10; Acts 2:1-4; Roma 12:17-21.
Liyor u Taabang ko Ngiyal’ Ney
Ku rayog ni nga kun taareb ni aram rogon e chiney fa? Rayog ni ka pi n’eney e nge taarebnag gothon taab michan’ me ta’rad ni rayog ni gapas thilin urngin mit e girdi’ u urngin yang u fayleng fa? Arrogon, rayog rorad! Pi Mich Rok Jehovah e yad ba taareb ni yad walag u gaangin yang e fayleng ke yan u barba’ nga baraba’ ni ke pag e 230 e nam, nge donguch nge binaw. Ni ke taarebnagrad e pi n’en ni baaram ni ki i taarebnag e Kristiano ko bin som’mon e chibog.
N’en th’abi baga’ ni be pi’ e ayuw ko taareb ni ke pirieg e Pi Mich Rok Jehovah e yul’yul’ rorad ku Jehovah Got. Fan ere n’eney e ri yad be athamgil ni ngaur yul’yul’gad ngak u tan urngin mit ban’en. Pi Mich Rok Jehovah e ku yad ma maruweliy e michan’ rorad ngak Jesus Kristus nge pi n’en ni i fil. Pi Kristiano ney e yad ma dag ni yad ma pag farad ni bochan e t’ufeg rorad ngak e piin yad taab mich ma yad ma machibnag e thin nib fel’ ko Gil’ilungun Got ni taareb rogon nga gubin e nam ni yad be machib riy. Yad ba falfalan’ ni ngaur weliyed murung’agen e re Gil’ilungun ney ngak e girdi’ ko urngin e mich, nga raen, nge girdi’ ko pi nam, nge pi ulung ko girdi’. Maku arrogon e Pi Mich Rok Jehovah ni yad ma par u mathilin ko ngongol ko fayleng, ni ir e ke ayuwegrad ni ngar togopuluwgad ko towasar ko am, nge yalen, nge rarogon e girdi’, nge siyobay ni ir e ri be k’aring e girdi’ dakir taareb lungurad.
Pi Mich Rok Jehovah e ba mich u wan’rad e n’en ni micheg e Bible ni ka pi n’en ni be taarebnagrad ko liyor e chiney dabki n’uw nap’an me taarebnag urngin e girdi’ ni ma fol. Ma aram e, dab kuun i gafgownag e girdi’ nib gel, ma dabki i yoor lunguy, nge yoor raba’ ni bochan e teliw. Fayleng ni polo’ e bayi taareb e liyor rorad ko fare Got nib riyul’, ni Jehovah.—Revelation 21:4, 5.
[Pictures on page 4, 5]
Tin som’mon e Kristiano e dariy fan ni ra bad ko yungi n’en nib thilthil e yalen riy, ya yad ba taareb