Nguun Par Ni Yib Taareb Ko Tin Tomren E Rran Ney

“Nge par pangimed ni bod rogon ni be yog fare thin nib fel’ . . .  ngam pired ni gimed mmudugil ntaa ban’en e gimed be nameg, ma gimed be athamgiliy u taab yang ni taa ban’en e gimed be athapeg ni aram e nge mich u wan’ e girdi’ fare thin nib fel’.”​—FILIPPI 1:27.

1. Uw rogon nib thil e Pi Mich Rok Jehovah ko fayleng?

ERERAY e “tin tomren e rran.” Dariy e maruwar riy ni ri “ke mo’maw ni ngan par nrogon e tin riyul’ ni girdien Kristus.” (2 Timothy 3:1-5) “Ngiyal’ ney ko tomur” ma kari wagey e girdi’ ma Pi Mich Rok Jehovah e yad ba lingagil ni bochan ni yad ba gapas ma yad ba taareb. (Daniel 12:4) Machane ra be’ ni ir bang ko tabinaw rok Jehovah u gangin e fayleng e yibe pining ni nge athamgil nib elmirin nge ayuweg e re tabinaw ney ni nge par nib taareb.

2. Mang e yog Paul u morngaagen e taareban’, ma mang deer e gad ra weliy?

² I yog apostal Paul ngak e pi Kristiano ni nguur pared ni yad ba taareb. I gaar: “Nge par pangimed ni bod rogon ni be yog e thin nib fel’, ya demtrug ko ke yog fa de yog ni gub gguymed, machane mu gu rung’ag ni kam pared ni gimed mmudugil ntaa ban’en e gimed be nameg, ma gimed be athamgiliy u taab yang ni taa ban’en e gimed be athapeg ni aram e nge mich u wan’ e girdi’ fare thin nib fel’. Ri dab mu rusgad ngak e pi toogor romed; ma nge athamgil lanin’med ni gubin ngiyal’ erera’ e re n’en nra micheg ngorad ni bay ra wargad, ma gimed e bay mu gelgad​—yi Got e ir e bayi ayuwegmed ngam gelgad.” (Filippi 1:27, 28) Pi thin ney rok Paul e be tamilangnag ni gad e Kristiano e thingarda athamgilgad u taabang. Ere mang e ra ayuwegdad nguuda pared ni ke taareb lanin’dad ko ngiyal’ ney nib mo’maw?

Ngan Fol ko Tin nib M’agan’ Got Ngay

3. Wuin nge uw rogon e yay nsom’on ni ra manged e pi gachalpen Kristus e girdi’ ni Gentile ni dan maadadnagrad?

³ Ngan fol ko tin ke m’agan’ Got ngay u gubin ngiyal’ e aram reb e kanawo’ ni rayog ni ngad pared ni ke taareb lanin’dad. Mu lemnag e pi gachalpen Jesus Kristus ni yad e Jew. Nap’an ni machibnag apostal Peter e piin ni Gentile ko yay nsom’on ko duw ni 36 C.E. ma ke pi’ Got e kan ni thothup ngak e girdi’ ko pi nam, mar uned ko taufe. (Acts, guruy ni 10) U m’on riy ma goo piyu Jew, nge piin ni proselyte ko teliw ni Judaism, nge piyu Samaria e kar manged pi gachalpen Jesus Kristus.​—Acts 8:4-8, 26-38.

4. Tomren ni weliy Peter e n’en ni buch ku Kornelius, ma mang e ki yog, ma uw rogon ni kan skengnag e pi gachalpen Jesus ni Jew?

⁴ Faani nang e pi apostal nge pi walag u Jerusalem ni ke un Kornelius nge boch e girdi’ ni Gentile ko taufe, ma aram e kar adaged ni ngar motoyilgad ku Peter faani pi’ e report. Tomren ni ke weliy e n’en ni buch ku Kornelius nge yugu boch e Gentile ma ke yog fare apostal ni gaar: “Ere ke yib i m’ug nib tamilang ni ke pi’ Got ngak e piin ni gathi yad piyu Israel fare taw’ath [ni kan ni thothup] ni faani pi’ ngodad [piyu Jew] ko ngiyal’ nem ni faani mich Somol Jesus Kristus u wan’dad; ere gag mini’ ni ngug guy rogon ni nggu taleg Got?” (Acts 11:1-17) Aram e skeng ko piyu Jew ni yad pi gachalpen Jesus Kristus. Yad ra fol ko n’en ke m’agan’ Got ngay mar uned ko piin ni yad e Gentile ni ke mich u wan’rad fa? Fa dabki par e pi tapigpig rok Jehovah u fayleng nib taareb lanin’rad?

5. Mang e yog e pi apostal nge pi walag ni bochan ni ke felan’ Got ngak e piin ni Gentile, ma mang e rayog ni ngad filed ko re n’ey?

⁵ Begaar fare thin ko Bible: “Faan rrung’ag e re bugithin ney, mi yad [fapi apostal nge pi walag] tal ndakur thibthibniged Peter mi yad pining e magar nge sorok ngak Got ni be lungurad: ‘Ere ku er rogon ni ke bing Got e wo’ ngak e piin ni gathi yad piyu Israel ni ngar kolgad ngan’rad ngar pied keru’rad ko denen mi yad fas.’” (Acts 11:18) Aram rogon e lem rorad me ere ke par pi gachalpen Jesus ni kar taarebgad. U lan ba ngiyal’ nib ngoch ma kan machibnag e piin ni yad e Gentile ni aram e girdi’ ko pi nam, ma ke flaabnag Jehovah e re maruwel nem. Ere faanra kan ning e ayuw rodad ngan tababnag reb e ulung nib biech fa ngan thiliyeg ban’en nib theocratic ni bochan ni kan pow’iy ko kan ni thothup, ma aram e susun ni ngad folgad riy. Ma aram ma ra felan’ Jehovah ngodad ma ra ayuwegdad ni nguuda pared ni ke taareb lanin’dad ko ngiyal’ ney ko tomur.

Ngan Chichiiy Paay ko Tin Riyul’

6. Bochan e tin riyul’ ma mang angin ni ke yib ko piin ni ma liyor ku Jehovah nib sor fan ko taareban’uy?

⁶ Bochan ni gad bang ko tabinaw rok Jehovah me ere gad ma par nib taareb lanin’dad ya gad gubin ma “Jehovah e ke machibnagdad” ma gad ma fol ko tin riyul’. (John 6:45; Psalm 43:3) Machib rodad e bay ko Thin Rok Got me ere taab thin ni gad ma yog. Ma gad falfalan’ ni ngad feked e ggan nib thothup ni pi’ Jehovah u daken “fare tapigpig nib yul’yul’ mab gonop.” (Matthew 24:45-47) Aram rogon ma rayog ni ngad pared ni kad taarebgad u polo’ u fayleng.

7. Faanra bay ban’en ni de tamilang u wan’dad, ma mang e susun ni ngad rin’ed ma mang e dabda rin’ed?

⁷ Ma mang ni faanra ke mo’maw ni ngad nanged fan reb e thin fa reb e machib? Susun ni ngad yibilayed nge yog e gonop ngodad ma gad fl’eg i gay e thin ko Bible nge yugu boch e babyor ko Kristiano. (Proverbs 2:4, 5; James 1:5-8) Ku rayog ni ngan ning e ayuw ko reb e piilal. Faanra dawori tamilang u wan’uy ma ffel’ ni ngan pag ndabkun lemnag nib elmirin. Ya sana bay taaboch min weliy e thin u morngaagen e re n’em ko reb e babyor, ma aram fini tamilang u wan’dad. Machane ra kireb ni faanra gad ra k’aring yugu boch e girdi’ ngar uned ko lem rodad nib thil. Ya ra sum e wagey, ma gathi be maruweliy e taareban’. Ere kab fel’ ni ‘nguun fol ko tin riyul’’ min pining yugu boch e girdi’ ni ngar yodoromgad.​—3 John 4.

8. Uw rogon ni ngan lemnag e tin riyul’ nib puluw?

⁸ Nap’an e bin som’on e chibog me gaar Paul: “N’en ni gadad be guy e chiney e bod ban’en ni gadad be guy nga thirek ni kab mathmath yaan; machane bay fin da guyed nga owchedad. N’en ni gu manang e chiney e ke mus ni bochi yang; machane ri bayi polo’ nge yan i par ni bod rogon feni tamilangan’ Got rog.” (1 Korinth 13:12) Tin som’on e Kristiano e de tamilang urngin ban’en u wan’rad, machane kar pared nib taareb lanin’rad. Ma chiney ma kab tamilang u wan’dad e tin nib m’agan’ Jehovah ngay nge Thin rok nib riyul’. Ere ngan pining e magar riy ni bay e tin riyul’ rodad ni ke pi’ fare ‘tapigpig nib yul’yul’.’ Ma ngad pininged e magar ku Jehovah ya ke pow’iydad u daken e ulung rok. Gathi taareb rogon urngin e pi n’en ni gad manang machane dariy bagadad e ke k’iy fa ke belal ko tirok Got ban’en. Ya Jehovah ni Tachugol Saf rodad e ke ayuwegdad ngad pared ni ke taareb lanin’dad me ayuwegdad nib fel’ rogon.​—Psalm 23:1-3.

Ngan Fanay Blowthey Nrogon

9. Uw rogon ni ngan fanay blowthey ni ngan mon’ognag e taareban’?

⁹ Ngan fanay blowthey ni ngan pi’ e athamgil nga laniyan’ e yugu girdi’ e ku aram reb e kanawo’ ni ngan mon’ognag e taareban’ ko pi walag. Fare governing body u nap’an e bin som’on e chibog e ur pied e babyor ni be weliy e n’en ni kan turguy u morngaagen e maadadnag be’, ma kan pi’ e athamgil nga laniyan’ e girdi’. Pi gachalpen ni Gentile e ur poyed nge mu’ ma “baga’ ba falfalan’ ni pi’ ngorad.” Ma kan l’og Judas nge Silas u Jerusalem ngar ranow mar piew fare babyor ma “ba n’uw nap’an nra welthingow ngak e pi cha’nem ni ku yad boch e walag ni girdien Kristus, ni yow be pi’ e athamgil nga lanin’rad ma yow be pi’ gelngirad.” Ma Paul nge Barnabas e ur piew e athamgil nga laniyan’ e pi gachalpen u Antiok. (Acts 15:1-3, 23-32) Rayog ni ngad yodoromgad u nap’an ni gad ma muulung ko pi muulung ko Kristiano ma ‘ra bagadad e ra pi’ e athamgil nga laniyan’ bagadad’ ni bochan kad uned ngay ma gad ma pi’ e fulweg nnap’an e muulung.​—Hebrews 10:24, 25.

10. Faan manga bay be’ ni be yog e thin nib kireb ku be’ ma mang e ngan rin’ ni ngan par nib taareb lanin’uy?

¹⁰ Machane dabki par ni yib taareb nfaanra un fanay blowthey ko tin nib kireb. I yoloy James ni gachalpen ni gaar: “Ereray rogon blowthey: aram feni achig ma rayog ni nge weliy morngaagen bogi n’e ni baga’ morngaagen ni be weliy nib uf ngay. Aygum tafinayniged bangi gerger ni baga’ ni baga’ yang nrayog ni ngan urfiy nga bochi daramram nrib achig!” (James 3:5) Ma fanenikay Jehovah e piin ni ma k’aring e kireb nga thiliy. (Proverbs 6:16-19) Welthin ni aram rogon e rayog ni nge n’igin nge yoor raba’nagey. Ere mang ni faanra bay be’ ni be yog e thin nib kireb ngak yugu be’? Piin piilal e ra guy rogon ni ngar ayuweged e cha’ ni be rin’ e kireb. Machane faanra de kalngan’ ma ran tharbog ko ulung ni aram e rayog ni nge par e ulung nib gapas, mab yaram ma ra taareb. Ya arrogon ni yoloy Paul ni gaar: “Dab um chaggad ngak be’ ni be yog ni ir reb i walagey ni be . . . t’ar e thin nga daken e girdi‘ . . . , mus ni ngam par nga but’ ngam un ngak e mit i girdi’ nem ko abich ma dab mu rin’.”​—1 Korinth 5:11.

11. Mang fan nib baga’ fan e sobut’an’ ni faanra kad dogned ban’en ni ke wageynag thildad be’ u lan e ulung?

¹¹ Ngan gagiyegnag blowthey e ra ayuweg e par nib taareb. (James 3:10-18) Machane faan manga ka dogned ban’en ni ke k’aring e kireb nga thildad reb e Kristiano. Gathi ra fel’ ni ngam man ngak ma ga fl’eg e gapas nga thilmew walagem, ma gad siro’ ngak nfaanra ri ba t’uf? (Matthew 5:23, 24) Rriyul’ ni ba t’uf e sobutan’ ni ngan rin’ e re n’ey, ma begaar Peter: “Gimed gubin nthingar mon’ed madan e sobut’ laniyan’ nge bigimed me pigpig ngak bigimed; ya ma togopuluw Got ngak e piin nib tolangan’rad ma ma ayuweg e piin nib sobut’an’rad.” (1 Peter 5:5) Sobut’an’uy e ra k’aringdad ngad ‘leked e gapas’ u thildad e pi walagdad, ma gad yog ni kad kalgad ma ngad siro’gad. Re n’ey e ma ayuweg ni nge par e tabinaw rok Jehovah ni kar taarebgad.​—1 Peter 3:10, 11.

12. Uw rogon nrayog ni ngad fanayed blowthedad ni ngad mon’eged e taareban’ ko girdi’ rok Jehovah?

¹² Rayog ni ngad mon’ognaged e taareban’ u lan e ulung rok Jehovah ni faanra gad ra fanay blowthedad nrogon. Aram e n’en ni rin’ Paul ma aram me yog ko piyu Thessalonika ni gaar: “Gimed manang ni ngongol romad ngomed e bod rogon e n’en ni ma rin’ be’ nib matam ngak pi fak. Ug pied e athamgil nga lanin’med ma ug fl’eged lanin’med, mu ug tiyed gamad ngomed ni nguum pared ko binem e pangin ni ir e rib m’agan’ Got ngay, ni ir e ke piningmed ni ngam uned ngak ko par nge flaab ko gin nsuwon.” (1 Thessalonika 2:11, 12) I tay Paul e kanawo’ ko re n’ey me ere ke yog ko piin Kristiano ni “ngar nonad ngak e piin ni ke kireban’rad mi yad pi’ e athamgil nga lanin’rad.” (1 Thessalonika 5:14) Mu lemnag angin ni ra yib ni faanra gad ra fanay blowthedad ni ngan nog e thin nib manigil ngak e girdi’ min pi’ e athamgil nga lanin’rad, ma ngan ubingrad. Arrogon, “bugithin nnog ko ngiyal’ nib puluw e rib manigil!” (Proverbs 15:23) Maku welthin nib manigil e ma mon’ognag ma ma ayuweg nge par e tabinaw rok Jehovah nib taareb.

Mu N’ag Fan ko Girdi’!

13. Mang fan ni susun ni ngad n’aged fan ku be’?

¹³ Ba t’uf ni ngan n’ag fan ku be’ ni ke wenig ma rayog ni nge par e Kristiano nib taareb. Ma uw urngin yay ni susun ni ngan n’ag fan? I weliy Jesus ku Peter ni gaar: “Gathi medlip yay, ya medlip yay e medlip i ragag.” (Matthew 18:22) Faanra dabda n’aged fan ku be’ ma gad be ngongol nib togopuluw ngodad. Mang fan? Ya faanra gad ra par ni gad be fanenikay be’ fa dabkuda paged talin e n’en ni kan rin’ ngodad, ma aram e dabi gapas lanin’dad. Ma faanra gad ra lingagil ni bochan nib kireb e ngongol rodad ma dabda n’aged fan ku be’, ma aram e gad be fek iyib e kireb nga dakendad. (Proverbs 11:17) Dabun Got ni dabda n’aged fan ku be’ ma rayog ni nge fekdad iyan ko denen. (Levitikus 19:18) Mu tay fanam iyan riy ni kan th’ab lolugen John ni Tataufe ni bochan e makath ko Herodias, ya “ke aw John nga laniyan’”.​—Mark 6:19-28.

14. (a) Mang e gad be fil u Matthew 6:14, 15 u morngaagen e n’ag fan? (b) Thingarda sonnaged be’ nge wenig ngodad mfin da n’aged fan fa?

¹⁴ Fare Meybil rok Somol e bay e thin riy ni begaar: “Ma ga n’ag fan u wan’um e denen romad, ya kug n’iged fan u wan’mad e kireb ni ke ngongliy urngin e piin ni kar ngongliyed e kireb ngomad.” (Luke 11:4) Faanra dabda n’aged fan ku be’ ma sana bay reb e rran nga m’on ma dabki n’ag Jehovah Got fan e denen rodad, ye gaar Jesus: “Faanra mu n’aged fan u wan’med e kireb ni ke rin’ boch e girdi’ ngomed, maku er rogon e Chitamangimed nu tharmiy nra n’ag fan u wan’ e kireb ni kam rin’ed; machane faanra dab mu n’aged fan u wan’med e kireb ni ke rin’ boch e girdi’ ngomed, maku er rogon e Chitamangimed nu tharmiy ndabiyog ni nge n’ag fan u wan’ e kireb ni kam rin’ed.” (Matthew 6:14, 15) Ere faanra rriyul’ ni gad ba adag ni ngad mon’ognaged e taareban’ ko tabinaw rok Jehovah ma aram e gad ra n’ag fan ko girdi’, ma gad pag talin ban’en ni kan rin’ ngodad ndan rin’ ni pumoy ma dariy e tafinay nib kireb riy. I gaar Paul: “Nge bigimed mi i ayuweg bigimed ko meewar rok u fithik’ e runguy, mu um n’aged fan u wan’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’aged fan u wan’med e n’en ni ke rin’ bigimed ngak bigimed ni bod rogon ni ke n’ag Jehovah fan u wan’ e tin ni kam rin’ed nib togopuluw ngak.” (Kolose 3:13) Faanra gad ra n’ag fan ku be’ ma aram e gad be ayuweg nge par e ulung rok Jehovah ni yad taareb.

Taareban’uy nge Pi N’en ni Ra Be’ me Turguy Rok

15. Mang e ma ayuweg e girdi’ ku Jehovah ngar pared ni yad ba taareb u nap’an ni yad ra turguy ban’en ni ra be’ ma ir rok?

¹⁵ I ngongliydad Got ni rayog ni ngad mel’eged e kanawo’ ni gad ra yan ngay ma ngad turguyed e n’en ni gad ra rin’. (Deuteronomy 30:19, 20; Galatia 6:5) Machane rayog ni ngad pared nib taareban’dad ya gad ma fol ko motochiyel ko Bible. Gad ma lemnag e pi n’em u nap’an ni gad ra turguy ban’en ni fan ngodad. (Acts 5:29; 1 John 5:3) Faan manga kan deeriy u morngaagen e par u mathilin e pi nam. Rayog ni ngad turguyed e n’en ni gad ra rin’ ni faanra gad ra lemnag ni “gathi gad bang ko fayleng” ma ‘kad pirdiiyed e sayden rodad ngad ngongliyed talin e maruwel riy ni ma gi’ e but’.’ (John 17:16; Isaiah 2:2-4) Maku nap’an ni thingarda turguyed ko uw rogon thildad e Am, ma gad ra lemnag e n’en ni yog e Bible u morngaagen e ngan “pi’ ngak Got e tirok Got ban’en” ma ku ngad folgad ko “piin ni baga’ lungurad” ni fan ko pi n’en ndariy rogon ko tirok Got ban’en. (Luke 20:25; Roma 13:1-7; Titus 3:1, 2) Arrogon, faanra gad ra lemnag e pi motochiyel ko Bible u nap’an ni gad ra turguy ban’en ni fan ngodad ma ra ayuweg nge par e Kristiano nib taareb.

16. Uw rogon nrayog ni ngad ayuweged nge par e ulung ni yad ba taareb u nap’an ni gad ra turguy ban’en ni dariy ko Bible nib kireb fa fel’? Mu tamilangnag.

¹⁶ Rayog ni ngad ayuweged e ulung ko Kristiano ni nge taareb u nap’an ni gad ra turguy ban’en ni ra be’ ma ir rok, ma dariy ko Bible e bin nib kireb fa bin nib mat’aw e n’en ni ngan rin’. Uw rogon? Ngad lemnaged ko ra uw rogon u wan’ e yugu girdi’ e n’en ni kad turguyed. Susun: U lan e ulung nu Korinth ma ke sum e deer u morngaagen e ufin ni kan pi’ ni maligach ko liyos. Ma girdi’ ko Kristiano e dabra uned ko liyor ko liyos. Machane dariy e denen riy ni ngan kay e ufin ni kan puog e racha’ riy nga but’ ma kan fanay ko liyor ko liyos, nge mu’ min pi’ nchuway’ u market. (Acts 15:28, 29; 1 Korinth 10:25) Machane boch e Kristiano e ur lemnaged nib kireb ni ngan kay e re mit e ufin ney. Ere ke yog Paul ngak yugu boch e Kristiano ni ngar siyeged i kirebnagan’rad. I yoloy ni gaar: “Faanra ggan e ra pingeg walageg nge denen, ma gathi ku ra gu longuy e ufin biyay, ni fan e nge dab gu pingeg walageg nge mul nga fithik’ e denen.” (1 Korinth 8:13) Ere mus ni dariy e motochiyel ko Bible nib l’ag ngay ma bay e t’ufeg riy ni ngan lemnag yugu boch e girdi’ u nap’an ni yira turguy ban’en ni ra be’ ma ir rok machane ra yib wenegan ko taareban’ ko tabinaw rok Got!

17. Mang e ngan rin’ u nap’an ni thingarda turguyed ban’en?

¹⁷ Faanra dawori mudugil u wan’dad ko mang e gad ra rin’ nga ban’en ma ngan gonopiy ni ngan turguy ban’en ni dabi kirebnag e tafinay rodad, ma yugu boch e girdi’ e susun ni ngar ted fan e n’en ni kad turguyed. (Roma 14:10-12) Ma dabi siy ni nap’an ni thingarda turguyed ban’en, ma susun ni ngad ninged e ayuw rok Jehovah u fithik’ e meybil nge pow’iydad. Rayog ni ngad meybilgad ni wod rogon e en ni yoloy e psalm ni gaar: “Mu tay telim ngog. . .Yi gur e war rog nge manab rog; ma ngam pow’iyeg ko kanawo’ rom ni fan ko ngochol rom.”​—Psalm 31:2, 3.

Nge Par e Kristiano ni Yad ba Taareb u Gubin Ngiyal’

18. Uw rogon ni tamilangnag Paul e taareban’ ko fare ulung ni Kristiano?

¹⁸ U 1 Korinth guruy ni 12 ma ke fanay Paul morngaagen e dowef ko girdi’ ni nge tamilangnag rogon ni ma par e ulung ni Kristiano nib taareb lanin’rad. Ke ga’ nag fan ra reb e girdi’ riy nge rogon ni ra bagayad ma ma taga’ nga daken bagayad. Fith Paul ni gaar: “Faan mang e dowey ni polo’ e taab yang u dowey e ni ngongliy ngay ma dabi ngal’ ni dowef fa? Ara’ rogon ni boor yang ni ba’ riy, machane taab dowef. Ere dabiyog ni nge gaar baraba’ i owchey ngak ba rifrif u paay, ‘I gur e dariy fam ngog!’ Ara rayog ni nge gaar lolugey ngak e rifrif u ey, “Dariy famew ngog!’” (1 Korinth 12:19-21) Ku arrogon gadad ni tabinaw rok Jehovah e gathi taa ban’en e gad ma rin’. Machane gad ba taareb, ma ra bagadad ma ba’ fan ngak bagadad.

19. Uw rogon nra yib angin ngodad ko pi n’en nib spiritual ni ma pi’ Got, ma mang e yog reb e walag u morngaagen e re n’ey?

¹⁹ Wod rogon nib t’uf ko dowef e ggan nge ayuw mab t’uf ni ngan pow’iy, maku arrogon ni ba t’uf rodad e pi n’en nib spiritual ni ma pi’ Got ngodad u daken e Thin Rok, nge kan ni thothup rok, nge ulung rok. Ni nge yib angin ngodad ko pi n’ey ma thingarda pared ni gad bang ko tabinaw rok Jehovah u fayleng. Tomren in e duw ni ke pigpig ku Got, me yoloy reb e walag ni gaar: “Ri gu be pining e magar riy ni kug par ko ngiyal’ u tabolngin e ulung u m’on ko duw ni 1914 ni ngiyal’ ndawori gel e tamilang ko urngin e tin riyul‘ . . . mu ug par nge mada’ ko ngiyal’ ney ni be gal ramaen e tin riyul’ ni bod e yal’ ni misiw. Ban’en ni rib baga’ fan u wan’ug e aram e ngan par nib chugur ko ulung rok Jehovah u fayleng. Kug fil kafram ni dariy e gonop riy ni ngan taga’ nga daken e llowan’ ko girdi’. Ma bochan ni ke mudugilan’ug ko re n’em ma aram e kug turguy ni nggu par nib yul’yul’ ko ulung. Ya ra danga’ ma uw rogon nrayog ni nge par be’ ni ke felan’ Jehovah ngak min flaabnag?”

20. Mang e susun ni nge mudugilan’dad riy ni ngad rin’ed nge par e girdi’ rok Jehovah ni yib taareb?

²⁰ I pining Jehovah e girdi’ rok u fithik’ e lumor ko re fayleng ney ni dariy yaramen riy. (1 Peter 2:9) Ke fekdad iyib nga tabinaw rok ma kad taarebgad. Ra aram rogon u lan e m’ag nib biech ni kari chugur iyib. Ere ngiyal’ ney ni tin tomren e rran ma nguuda ‘don’ed e t’ufeg nga dakendad ni bod e mad’ ma ngad rin’ed urngin ban’en nrayog rodad ngad mon’ognaged e taareban’.​—Kolose 3:14.

Mang e Fulweg Rom?

◻ Mang fan ni rayog ni ngad pared nib taareb lanin’dad nfaanra gad ra rin’ e tin nib m’agan’ Got ngay ma gad par ko tin riyul’?

◻ Uw rogon nib l’ag e taareban’uy ko blowthey nni fanay nrogon?

◻ Mang e ba l’ag ngay ni ngan n’ag fan?

◻ Uw rogon ni rayog ni ngad pared nib taareb lanin’dad u nap’an ni gad ra turguy ban’en ni ra be’ ma ir rok?

o◻ Mang fan ni ngii par e Kristiano ni kar taarebgad?

[Sasing ko page 14]

Ma ayuweg Jehovah ni nge par e ulung rok ni yib taareb, ni wod rogon e en tachugol saf ni ma ayuweg e yu ran’ i saf rok ngar pared u taabang

[Sasing ko page 16]

Faanra gad ra wenig u fithik’ e sobut’an’ u nap’an ni kad k’aringed e kireban’ ku be’, ma aram e gad be ayuweg e par ko taareban’