Tabinaw Rok Jehovah E Yad Ba Falfalan’ Ni Kar Taarebgad

“Amu sap! Uw fene fel’ ni nge par e pi walag u taabang nib taareb lanin’rad!”​—PSALM 133:1.

1. Uw rarogon e tabinaw ko ngiyal’ ney?

KE magawon e tabinaw ko ngiyal’ ney. Boor e tabinaw e ke chugur ni nge math’ fare m’ag ko mabgol. Be yoor iyan oren e mabgol ni be dar, ma bitir rorad e kari kireban’rad. Bokum milyon e tabinaw e dar falfalan’gad ma dar taarebgad. Machane bay reb e tabinaw ni bay e bin riyul’ e falfalan’ riy ma ri yad taareb. Aram e tabinaw ku Jehovah Got u gangin e palpal th’ib. Ma bay bokum biyu’ e pi engel riy ndanir guy ni yad be rin’ e tin nib mil fan ngorad nib puluw ko tin ke m’agan’ Got ngay. (Psalm 103:20, 21) Machane bay e tabinaw u fayleng ni yad ba taareb ni aram rogon?

2, 3. (a) Mini’ e yad bang ko ulung rok Got u palpal th’ib, ma Pi Mich Rok Jehovah ko ngiyal’ ney e yad bod e mang? (b) Mang boch e deer ni yira weliy?

² I yoloy apostal Paul ni gaar: “Gu ma ragbug u p’eowchen Got ni Chitamangiy, ni bin riyul’ i fithingan urngin e tabinaw nu tharmiy ngu but’ e ir e yib rok.” (Efesus 3:14, 15) Urngin e ganong u fayleng e yib rok Got ya ir e Ani Tasunumiy urngin ban’en. Yug demtrug ni dariy e tabinaw ko girdi’ u tharmiy machane wod rogon ni ke mabgol Got ya ppin rok e ulung rok u tharmiy, ma ra un Jesus ko mabgol nib spiritual u tharmiy. (Isaiah 54:5; Luke 20:34, 35; 1 Korinth 15:50; 2 Korinth 11:2) Girdi’ u fayleng nib yul’yul’ ma kan dugliyrad e yad bang ko tabinaw rok Got u palpal th’ib, ma piin ni ra un ngay e yad girdien “yugu boch e saf” ku Jesus ni yad e girdi’ ni be athapeg e par u fayleng. (John 10:16; Roma 8:14-17; The Watchtower, January 15, 1996, page 31) Machane urngin e Pi Mich Rok Jehovah ko ngiyal’ ney e yad taab tabinaw.

³ Gur bang ko tabinaw rok Got ni yad e pi tapigpig rok u gubin e nam fa? Faanra er rogon ma kari mu taw’ath ko re flaab nem nth’abi fel’. Bokum milyon e girdi’ e ma micheg ni tabinaw rok Jehovah u polo’ u fayleng​—ni ulung rok ni yima guy​—e bay e falfalan’ riy nge gapas ma ba taareb lanin’uy u fithik’ e fayleng nib sug ko wagey ma de taareb. Mang e rayog ni ngan weliy u morngaagen e ulung rok Jehovah u gangin e fayleng? Ma mang boch ban’en ni ma n’igin ni ngar taarebgad?

Uw Fene Fel’ ma Rib Manigil!

4. Mu weliy ko thin rom ko mang fan fare thin ko Psalm 133 ni be weliy u morngaagen e pi walag ni kar taarebgad?

⁴ I tay David fan e par nib taareb lanin’uy. Ya kan thagthagnag nga laniyan’ ni nge tangnag e re n’em! Amu lemnag ni be tang ma bay e talin e musik ni be chubeg ma begaar: “Amu sap! Uw fene fel’ ma rib manigil ni nge par e pi walag u taabang mab taareb lanin’rad! Aram ban’en ni wod rogon e gapgep ni rib fel’ ni kan tay nga lolugey, ni be lul’ iyan nga sorbon, ni sorban Aaron, ni lul’ nga but’ nge taw ko mad rok. Ma wod rogon e waangchol ni yib u Hermon ni be aw nga daken e pi burey nu Zion. Ya aram e gin ni ke tay Jehovah chilen ni ran flaabnag, ko yafas ni manemus.”​—Psalm 133:1-3.

5. Rogon ni yog ko Psalm 133:1, 2 ma mang e rayog ni ngan taarebnag ngak piyu Israel ko pi tapigpig rok Got ko ngiyal’ ney?

⁵ Pi thin nem e ma sor fan ko girdi’ rok Got kakrom ni piyu Israel ya ur pared ni kar taarebgad. Nap’an fa dalip i madenom rorad u Jerusalem ma rriyul’ ni ur pared u taabang. Yugu demtrug rogon nib thil e ganong rorad, machane yad taab tabinaw. Ke yib angin ngorad ni bochan ni kar pared u taabang, ni bod rogon e gapgep nib fel’ bon. Nap’an ni kan puog e gapgep nga daken lolugen Aaron, ma ke yan nga sorbon, me lul’ nga but’ ko mad rok. Yu Israel ni polo’ e ke yib angin ngorad ni bochan ni kar pared u taabang. Kan pithig e magawon u thilrad ma kar mon’oggad ni taareb lanin’rad. Ku arrogon e girdi’ rok Jehovah u gangin e fayleng ko ngiyal’ ney. Ma yib angin nib fel’ ko girdi’ ni ma chag nga taabang. Yibe fol ko fonow rok Got ma aram e yibe pithig e magawon u thiliy. (Matthew 5:23, 24; 18:15-17) Girdi’ rok Jehovah e ri yad ma pining e magar riy ko athamgil laniyan’ ni be yib ngorad ni bochan e taareban’ ko walag.

6, 7. Uw rogon ma rogon ni par yu Israel ni kar taarebgad e bod e waangchol ko Burey nu Hermon, ma u uw nrayog ni ngad pirieged e flaab rok Got ko ngiyal’ ney?

⁶ Uw rogon ma piyu Israel ni ur pared u taabang ni kar taarebgad e bod rogon waangchol ko Burey nu Hermon? Re burey nem e ke pag 9,000 fit tolngin u daken e day, ma ke chugur ni gubin ngiyal’ ma bay e ayis u pebgul. Re ayis nem u pebgul e Burey ni Hermon e ma n’igin nge aw e waangchol ni boor ni ma ayuweg e woldug ko ngalan’ e gawel. Ma nifeng nib garbeb u Hermon e rayog ni nge fek iyan e waangchol nib palog ko yimuch u Jerusalem, ma ra aw nga but’ ni waangchol. Ere rriyul’ e thin ko Psalm ni be yog u morngaagen ‘fare waangchol nu Hermon ni be yan nga daken e Burey ni Zion.’ Rib manigil e pi thin nem ya be pugurannagdad ko pi n’en nib fel’ ni ma k’aring e tabinaw rok Jehovah ngar pared ni kar taarebgad!

⁷ U m’on ni kan dugliy e ulung ko Kristiano, ma Zion ara Jerusalem e ir e tochuch ko bin riyul’ e liyor. Ere u rom e ke tay Got chilen ni ngan flaabnag. Fa An ni Tapgin urngin e flaab e wod ni ke par u lan fare tempel u Jerusalem, me ere ra sum e flaab ko gin’em. Machane chiney ma rayog ni ngan pirieg e flaab nge t’ufeg, nge taareban’ ko pi tapigpig rok Got u gangin e fayleng ya dakuriy taab bang ni aram e tochuch ko bin riyul’ e liyor. (John 13:34, 35) Mang boch ban’en ni ma n’igin e par nib taareb lanin’uy?

Pi N’en ni Ma Mon’ognag e Taareban’

8. Mang e gad be fil u morngaagen e taareban’ ni bay ko John 17:20, 21?

⁸ Piin ni ma liyor ku Jehovah e kar taarebgad ni bochan ni yad ma fol ko Thin Rok Got, nib muun ngay e pi n’en ni i machibnag Jesus Kristus. I pi’ Jehovah Fak nga fayleng ni nge micheg e tin riyul’ ma nge pi’ ir ni maligach ngem’, ma aram e kan bing e kanawo’ ni nge sum fare ulung ko Kristiano ni girdi’ riy e ke taareb lanin’rad. (John 3:16; 18:37) I meybil Jesus me tamilangnag ni girdi’ riy e ra par ni riyul’ ni kar taarebgad me gaar: “Gathi ke mus ni yad e gu be yibilayrad ngom, ya ku er rogon e piin ni kug mich u wan’rad ni bochan e thin rom ni kar weliyed ngorad. Chitamag! Gu be wenig ngom ni ngam ayuwegrad ngar pired ni yad gubin ni kar taarebgad. Mu ayuwegrad ngar pired u fithik’dow ni bod rogon ni ga ba’ u fithik’ag ma gu ba’ u fithik’am. Mu ayuwegrad ngar taarebgad, nge yog ni mich u wan’ e girdi’ nu fayleng ni gur e kam l’ugeg ku gub.” (John 17:20, 21) Pi gachalpen Jesus e kar taarebgad ni wod rogon Got nge Fak ni kar taarebgow. Ke yog e re n’ey ya kar folgad ko Thin Rok Got nge pi n’en ni fil Jesus ngorad. Aram rogon ni rayog ni nge par e tabinaw rok Jehovah u gangin u fayleng ni kar taarebgad ko ngiyal’ ney.

9. Mang e ma rin’ e kan ni thothup ni nge par e girdi’ rok Jehovah ni kar taarebgad?

⁹ Ku ban’en ni ma n’igin nge par e girdi’ ku Jehovah ni kar taarebgad e bochan ni bay e kan ni thothup rok Got rorad, ni aram gelngin Got. Ma ayuwegdad nge tamilangan’dad ko tin riyul’ ko Thin Rok Jehovah ma aram e rayog ni ngad pigpiggad ngak u taabang. (John 16:12, 13) Fare kan ni thothup e ma ayuwegdad ngad siyeged e pi n’en ni ma yu raba’nag e girdi’ ni bochan e taliyeg, nge awan’ nge damumuw, nge tolangan’. Kan ni thothup rok Got e ma fek iyib ngodad e taareban’ ni waamngin e t’ufeg, nge falfalan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.​—Galatia 5:19-23.

10. (a) Uw rogon ni taareb rogon e t’ufeg u lan e tabinaw ni kar taarebgad nge t’ufeg ni bay ko piin ni kar ognaged yad ku Jehovah? (b) Mang e yog reb e girdi’ ko Governing Body u morngaagen e pi muulung ko pi walag nib spiritual?

¹⁰ Girdi’ ko tabinaw ni kar taarebgad e ra bagayad ma ma t’ufeg bagayad ma yad falfalan’ ni ngar pared u taabang. Aram rogon girdien e tabinaw ku Jehovah ni yad ma t’ufeg Jehovah nge Fak nge piin ni taareb e michan’ rorad. (Mark 12:30; John 21:15-17; 1 John 4:21) Wod rogon chonggin e tabinaw ni yad ba falfalan’ ni ngar abichgad u taabang, ma piin ni ma liyor ku Got e yad ba falfalan’ ni ngar uned ko pi muulung ko Kristiano, nge pi assembly, nge pi convention ni fan ni nge yib angin ngorad ko par u taabang nge ggan nib spiritual. (Matthew 24:45-47; Hebrews 10:24, 25) Reb e girdi’ ko Governing Body ko Pi Mich Rok Jehovah e ke gaar: “Ban’en th’abi fel’ ma ma pi’ e athamgil nga lanin’ug e aram e ngan un ko muulung u taabang ko pi walag. Ri gu ba adag ni gu ra yib ko Kingdom Hall ni gag e som’on, ma nggu chuw ni gag e tomur, ni faanra rayog. Gu ma thamiy e falfalan’ u fithik’ag u nap’an ni gu ma sabethin ko girdi’ rok Got. Nap’an ni gu bay u fithik’rad ma lem rog e wod rogon ni gu bay u tabinaw rog ni gamad chon e tabinaw rog.” Aram rogon u wan’um fa?​—Psalm 27:4.

11. Mang maruwel e ke falfalan’ e Pi Mich Rok Jehovah ni ngar uned ngay, ma mang angin ni yib ni ngan mon’eg e pigpig ku Got ko yafas rodad?

¹¹ Ba tabinaw ni kar taarebgad e yad ba falfalan’ ni ngar rin’ed boch ban’en u taabang. Ku arrogon e tabinaw rok Jehovah ni yad ba falfalan’ ni ngar uned ko maruwel u taabang ko machib ko Gil’ilungun Got mar ayuweged e girdi’ ngar manged pi gachalpen. (Matthew 24:14; 28:19, 20) Faanra gad ra un ngay u gubin ngiyal’ ma gad ra chugur iyan ngak e Pi Mich Rok Jehovah. Ra par e tabinaw rok Got ni kar taarebgad ni faanra yad ra mon’eg e pigpig ku Got ko yafas rorad mar ayuweged urngin ban’en ni ma rin’ e girdi’ rok.

Ba T’uf e Yaram nib Theocratic

12. Mang boch rarogon e tabinaw nib falfalan’ ni ke taareban’rad, ma uw rogon e yaram ko pi ulung ko Kristiano u nap’an e bin som’on e chibog ni ke mon’eg e taareban’uy?

¹² Bay e falfalan’ nge taareban’ ko chon e tabinaw ni ani lolugen e ba gel ma ma t’ufegey ma ba yaram. (Efesus 5:22, 33; 6:1) Jehovah e ir ba Got nib gapas mab yaram, ma urngin girdien e tabinaw rok e yad ma pining “An Th’abi Ga’” ngak. (Daniel 7:18, 22, 25, 27; 1 Korinth 14:33) Maku yad manang ni ke dugliy Fak ni Jesus Kristus ni nge gagiyegnag urngin ban’en u tharmiy ngu fayleng. (Matthew 28:18; Hebrews 1:1, 2) Kristus e ir Lolugen e ulung ko Kristiano, me ere aram ba ulung nib yaram mab taareb. (Efesus 5:23) Kan dugliy e pi apostal nge boch e “pumoon nib ilal” ko tirok Got ban’en ni yad ba ulung ni governing body ni ngan pow’iy e pi n’en ni rin’ e pi ulung u nap’an e bin som’on e chibog. Ma ra reb e ulung ma bay e piin ni kan dugliy ni yad e piin piilal nge ministerial servant. (Acts 15:6; Filippi 1:1) Ra par e ulung ni kar taarebgad nfaanra ur folgad ko piin ni be pow’iyrad.​—Hebrews 13:17.

13. Uw rogon ni ma pining Jehovah e girdi’ ngak, ma mang wenegan riy?

¹³ Me ere aram fan ni kar taarebgad e piin ni ma liyor ku Jehovah ya ba gel rogon ni yibe gagiyegnagrad fa? Ri danga! Gathi dariy e t’ufeg rok Got nge ulung rok. Ma girngiy Jehovah e girdi’ ngak ya ma dag e t’ufeg ngorad, ma ra reb e duw ma bokum biyu’ e girdi’ e kar lemnaged ni ngar uned ko ulung rok Jehovah ni yad ba falfalan’ ngay ma kar uned ko taufe ni be yip’ fan ni kar ognaged yad. Yad bod Joshua ni ke yog ngak piyu Israel ni gaar: “Mu dugliyed e daba’ e re kan ni nguum pigpiggad ngak . . . Machane gag nge girdi’ ko birog e tabinaw e nguug pigpiggad ngak Jehovah.”​—Joshua 24:15.

14. Mang fan ni rayog ni ngan nog ni ulung rok Jehovah e ba theocratic?

¹⁴ Bochan ni gad bang ko tabinaw rok Jehovah me ere gad ba falfalan’ ma ke pagan’dad ngay. Aram rogon ya ulung rok e ba theocratic. Gil’ilungun Got e aram ba theocracy (sum e re thin nem ko thin ni Greek ni the·os΄, got, nge kra΄tos, ni gagiyeg). Aram e gagiyeg rok Got ni ir e ke dugliy me tay. Fare “nam nib thothup” ni dugliy Jehovah e ma par u tanggin e gagiyeg rok me ere ku ir e ba theocratic. (1 Peter 2:9) Rayog ni nge pagan’dad ngay ya Jehovah e ir fare Theocrat nib Ga’, ma ir e Tapuf Oloboch, ma ir e ma Pi’ e Motochiyel, ma ir e Pilung rodad. (Isaiah 33:22) Machane faan manga sum e magawon ni rayog ni nge kirebnag e falfalan’ rodad, me n’igin dabki pagedan’dad ngay, ma dabkuuda taarebgad?

Fare Governing Body e Ma Rin’ Ban’en

15, 16. Mang e magawon ni sum u nap’an e bin som’on e chibog, ma mang fan?

¹⁵ Yu ngiyal’ ma thingarni pithig reb e magawon u lan e tabinaw ni fan ni nge par ni kar taarebgad. Ere susun ni bay e magawon nib spiritual ni thingarni pithig ni fan ni nge par e tabinaw rok Got ni yad ba taareb u nap’an e bin som’on e chibog. Mang e yira rin’? Ke rin’ fare governing body ban’en, mar turguyed boch ban’en nib l’ag ko tirok Got ban’en. Bay e thin ko Bible ni be weliy u morngaagen e re n’em.

¹⁶ Nap’an e duw ni 49 C. E. me mada’ girdien e governing body u Jerusalem ni fan ni ngar pithiged reb e magawon nib ga’ ni ngan ayuweg “fare tabinaw rok Got” ngar pared nib taareb lanin’rad. (Efesus 2:19) Sogonapan 13 e duw u m’on riy ma ke machibnag apostal Peter Kornelius ma aram ma fa tin som’on e girdi’ ni yad e Gentile e kar uned ko taufe. (Acts, guruy ni 10) Nap’an e yay ni som’on ni ke yan Paul ko milekag ko missionary, ma boor e girdi’ ni yad e Gentile e ra uned ko Kristiano. (Acts 13:1–14:28) Me sum reb e ulung ko Kristiano ni Gentile u Antiok, Syria. Boch e Kristiano ni Jew e ur lemnaged ni piin ni yad e Gentile e susun ni ngan maadad ngorad mar folgad ko Motochiyel rok Moses, machane de puluw u wan’ yugu boch e girdi’ e re n’em. Ere ke rin’ fare governing body ban’en ni fan ni nge par e pi Kristiano ni kar taarebgad.

17. Mang yaram nib theocratic ni be weliy morngaagen ko Acts guruy ni 15?

¹⁷ Acts 15:6-22 e begaar: “Fapi apostal nge piin ni piilal ko galesiya e ra muulunggad ngar puruy’naged morngaagen e re bugithin ney.” Miki un yugu boch e girdi’ ngay nge boch e girdi’ nu Antiok. Som’on me weliy Peter ni ‘ke turguy Got ni nge machibnag ngak e girdi’ ko pi nam e thin nib fel’ ni yib rok Got, ni fan e ngar rung’aged me mich u wan’rad.’ Nge mu’ ma “urngin e girdi’ ko re ulung” nem e daki non be’ nnap’an ni yad be motoyil ngak Barnabas nge Paul ni aram e yow be weliy “urngin e pi n’en nni ngat ngay nge pi maang’ang ni ngongliy Got u pa’row u fithik’ e girdi’ ko pi nam,” ara girdi’ ni yad e Gentile. Ni migid me weliy James ko uw rogon nrayog ni ngan pithig fare magawon. Nge mu’ me turguy fare governing body e n’en ni ngan rin’ ma begaar: “Ma aram me chag e pi apostal nge piin ni piilal ko galesiya, nge girdien e galesiya ni polo’ mi yad turguy ngar mel’eged boch e girdi’ rorad ngar l’oged yad nga ranod nga Antiok ni yad Paul nge Barnabas.” Piin ni kan “mel’egrad”​—ni Judas nge Silas​—e ur feked e babyor ngak e piin ni taareb e michan’ rorad ni be pi’ e athamgil nga lanin’rad.

18. Mang e ke turguy fare governing body u morngaagen fare Motochiyel rok Mosses, ma mang angin ni yib ko pi Kristiano ni Jew nge Gentile?

¹⁸ Fare babyor ni be yog e n’en ni ke turguy fare governing body e begaar: “Pi apostal nge piin ni piilal, ni er walagmed, e be lungurad e nge felan’ Got ngak urngin e pi walag ni girdi’ ko pi nam ma yad be par u lan yu Antiok ngu Syria, ngu Cilicia!” Yugu aram rogon ni ka bay yugu girdi’ ni kar uned ko re muulung nem machane fare governing body e aram e “pi apostal nge piin ni piilal.” Kan ni thothup rok Got e ke pow’iyrad, ya begaar fare babyor: “Fare kan ni thothup nge gamad e ke taareban’mad ndab kun tay ban’en nib tomal nga dakenmed nge chag ko tin ni baaray e motochiyel ni ba’, ya ke mus ni aram e dab mu ked e ggan ni kan pi’ ni maligach ko liyos ni ma meybil boch e girdi’ ngay; ma dab mu ked e racha’; ma dab mu longuyed e gamanman nni uchuluy k’angan nge yim’; mi gimed ayuwegmed ndab mu pired be’ ni gathi mabgol romed.” (Acts 15:23-29) Ere de t’uf ko pi Kristiano ni ngar maadadgad ngorad mar folgad ko Motochiyel rok Moses. Re n’ey ni kan turguy e ke ayuweg e pi Kristiano ni Jew nge Gentile ni ngar taarebgad ko ngongol rorad nge thin rorad. Ke falfalan’ e pi ulung, ma ki ul’ul’ iyan ni be taareban’uy, ni wod rogon ko tabinaw rok Got ko ngiyal’ ney u polo’ u fayleng ni yad be lek fare Governing Body ko Pi Mich Rok Jehovah.​—Acts 15:30-35.

Mu Pigpiggad u Taabang u Rogon nib Theocratic

19. Mang fan ni be par e tabinaw rok Jehovah ni kar taarebgad?

¹⁹ Ra par e tabinaw ni yad taareb nfaanra urngin e girdi’ riy e yad ma rin’ ban’en u taabang ma ra ayuwegrad. Aram rogon e tabinaw rok Jehovah. Bochan ni yad ba theocratic ma piin piilal nge yugu girdi’ ko ulung u nap’an e bin som’on e chibog e kar pigpiggad ku Got ni yad be tay tanggin fare governing body mar folgad ko pi n’en ni ur turguyed. Fare governing body e ke ayuweg e piin piilal ni ngar ‘machibnaged fare thin rok Got’ ko girdi’ ma girdi’ u lan e pi ulung e ke ‘taareban’rad ko tin ni yad be weliy.’ (2 Timothy 4:1, 2; 1 Korinth 1:10) Ere taareb e thin riyul’ ko Bible e kan weliy ko machib nge nap’an e pi muulung ko Kristiano, ndemtrug u Jerusalem, fa Antiok, fa Roma, fa Korinth, fa yu yang. Ma aram rogon ko ngiyal’ ney ni bay e yaram nib theocratic.

20. Ra ngad pared ni ke taareb lanin’dad ma mang e thingarda rin’ed?

²⁰ Faan gad ra par ni taareb, ma gad gubin ni gad bang ko tabinaw rok Jehovah e susun ni ngad athamgilgad ni ngad daged e t’ufeg nib theocratic. (1 John 4:16) Ba t’uf ni ngad rin’ed e tin m’agan’ Got ngay ma gad tay fan ‘fare tapigpig nib yul’yul’’ nge fare Governing Body. Machane gad ma fol ya gad ba adag ni ngad rin’ed u fithik’ e falfalan’ ni wod rogon ni kad ognaged gad ku Got ndan towarsariydad. (1 John 5:3) Rib puluw ni en ni ke yoloy e psalm e ke puthuy e falfalan’ ko fol! I tang ni gaar: “Gimed e girdi’ e mu pininged e sorok ngak Jah! Nge felan’ e en ni bay madgun Jehovah u wan’, ma nge falfalan’ ni ke fol ko pi motochiyel rok.”​—Psalm 112:1.

21. Uw rogon nrayog ni ngad micheged ni gad ba theocratic?

²¹ Jesus ni ir Lolugen e ulung e ir be’ ni rib theocratic ma gubin ngiyal’ ma ma rin’ e tin nib m’agan’ e Chitamangin ngay. (John 5:30) Ere ngad folwokgad rok ma ngad pared nib theocratic ma gad rin’ e tin nib m’agan’ Jehovah ngay u taabang ko ulung Rok. Ma aram ma gad ra falfalan’ ma gad pining e magar ma gad ra un ko re tang ney ko psalm ni gaar: “Mu sap! Uw fene fel’ ni nge par e pi walag u taabang ni kar taarebgad!”

Mang e Fulweg Rom?

◻ Uw rogon e taareban’ ko Kristiano ni bay rodad ni ba m’ag ko Psalm 133?

◻ Mang boch ban’en ni ma mon’ognag e taareban’uy?

◻ Mang fan nib t’uf e yaram nib theocratic ni nge par e girdi’ rok Got ni kar taarebgad?

◻ Mang e rin’ e governing body u nap’an e bin som’on e chibog ni ngar ayuweged ngar pared ni taareb lanin’rad?

◻ Ngan pigpig u taabang rogon nib theocratic e mang fan ngom?

[Sasing ko page 11]

Ke rin’ fare governing body ban’en ni fan ni ngar pared ni ke taareb lanin’rad