Ngan Gelnag e Sobut’an’ nib Riyul’

“Piin nib sobut’an’rad e ga ma chuwegrad u fithik’ e gafgow.”​—2 SAMUEL 22:28.

1, 2. Mang e n’en nib taareb rogon rok boor e pilung nu fayleng?

FAPI pyramids nu Egypt e be micheg ni immoy boch e pumoon ni ur gagiyegniged e re nam nem. Boch i yad ni ri yima nangrad e Sennacherib nu Assyria, nge Alexander nib Gilbuguwan u Greece, nge Julius Caesar u Roma. Pi pilung nem e ba’ taa ban’en ni ba taareb rogorad riy. De sobut’an’rad.​—Matthew 20:25, 26.

² Rayog ni ngam susunnag bagayad e pi pilung ni kan weliy murung’agen ni ma gay be’ nib gafgow u tan e am rok nib t’uf ni ngan fal’eg laniyan’ nge ayuweg? Ri danga’! Ara rayog ni ngam susunnag ni ur ranod nga tabinaw ko girdi’ nib gafgow ngar pied e athamgil nga lanin’rad. Rib thil e lem rorad ni fan ngak e girdi’ nib gafgow ko lem rok Jehovah Got, ni fare Pilung nu palpalth’ib!

En Th’abi Fel’ Rogon ni Ke Dag e Sobut’an’

3. Mang e ma rin’ e Pilung ni Th’abi Tolang ngak e girdi’ rok?

³ Jehovah e rib ga’ ma rib tolang, machane “changar rok e ma yan u fayleng i yan ni fan ni nge dag gelngin ni fan ngak e girdi’ ni rib t’uf Got rorad.” (2 Kronicles 16:9, NW) Ma mang e ra rin’ u nap’an ni ra pirieg e pi tapigpig rok nib sobut’an’rad ni kari kireban’rad nbochan e skeng ni keb ngorad? U daken e kan ni thothup rok, ma gowa be par rorad “ni fan ni nge gelnag e piin nib sobut’an’rad ma nge gelnag e piin ni kari kireban’rad.” (Isaiah 57:15, NW) Ere, pi cha’nem ni kan gelnagrad e ke bung rogorad ni ngar ul’ulgad ko pigpig ngak ni yad ba felfelan’. Kari dag Got nrib sobut’an’!

4, 5. (a) Uw rogon u wan’ fare psalmist murung’agen kanawoen Got ko gagiyeg? (b) Mang e be yip’ fan ni be “sobut’nag” Got ir ni fan ni nge ayuweg e “piin nib gafgow”?

⁴ Dariy be’ u palpalth’ib ni ke sobut’nag ir ni bod e n’en ni rin’ Somol ni Th’abi Tolang ni fan ni nge ayuweg e girdi’ ni tadenen. I yoloy fare psalmist ni gaar: “Kab tolang Jehovah ko urngin e pi nam; ma flaab rok e kab tolang ko tharmiy. Mini’ e bod Jehovah ni Got rodad, ni Ir e en ni be par ko gin nrib tolang? Ma sobut’an’nag ir ni fan ni nge sap nga daken e tharmiy nge fayleng, ma ma chuweg e en ni gafgow u fithik’ e fiyath, ma ma tolangnag be’ nib gafgow u lan e low.”​—Psalms 113:4-7, NW.

⁵ Mu lemnag fare bugithin ni condescending ni kan thilyeg u roy ni ngan “sobut’an’nag.” Ra ngan fanay ni fan ko girdi’ ma ba kireb fan, ni aram e ‘ngan tolang ngak e piin nib sobut’ ara ba gafgow.’ Lem nib tolang ni aram rogon e dabi m’ag ku Got, ni anib machalbog mab thothup ere be’ nde “tolangan’.” (Mark 7:22, 23) Machane fare bugithin ni condescend ni kan thiliyeg u roy ni “ngan sobut’an’” e ku rayog ni nge yip’ fan ni nge sobut’nag be’ ir ngeb ko dodow nib sobut’ ngak nge rin’ ban’en ngak be’ nib sobut’. Arfan, ni boch e Bible e ke thilyeg e Psalm 113:6 ni ke sobut’nag Got ir. Ri be dag e re n’em nib sobut’an’ e Got rodad ni ma tiyan’ ko tin nib t’uf ko pi tapigpig rok ni girdi’ ndawora flontgad!​—2 Samuel 22:36.

Mang Fan nib Sobut’an’ Jesus

6. Mang e n’en ni ke rin’ Jehovah ni kari dag nib sobut’an’?

⁶ N’en ni ke rin’ Got ni kari dag ni rib sobut’an’ ma ma t’ufegey e ke l’og Fak nga fayleng ni maagirag rok mab t’uf rok nge mang girdi’ ni fan ni nge ayuweg e girdi’ ngar fosgad. (John 3:16) I machibnag e tin riyul’ ni murung’agen e Chitamangin u tharmiy me pi’ e yafas rok nib flont ni fan ni nge “chuweg e denen rok e girdi’ nu fayleng.” (John 1:29; 18:37) Jesus ni ri be m’ug e ngongol rok e Chitamangin ko yafas rok, nib muun ngay e sobut’an’, e ke m’agan’ ngay ni nge rin’ e tin ni baadag Got ni nge rin’. Ireray e sobut’an’ nge t’ufeg ni th’abi gel ni dag bagayad e piin ke sunumiy Got. Gathi urngin e girdi’ e kar ted fan e sobut’an’ ni dag Jesus, pi toogor rok e kar ted ni “ir e th’abi sobut’ u fithik’ e girdi’.” (Daniel 4:17) Yugu aram rogon, ma manang Paul ni apostal ni piin ni taareb e michan’ rorad e thingar ra folwokgad rok Jesus ma arfan ni ra bagayad me sobut’nag ir ngak bagayad.​—1 Korinth 11:1; Filippi 2:3, 4.

7, 8. (a) Uw rogon ni ke fil Jesus rogon ni nge sobut’an’? (b) Mang e ke wenignag Jesus ngak e piin ni bay rogorad ni ngar manged pi gachalpen?

⁷ I tamilangnag Paul e tin ni rin’ Jesus ni rib fel’ ni ngan fol riy, me yoloy ni gaar: ‘Rogon e lem nge pangin ni nge yog ngomed e fare lem nge fare pangin ni immoy rok Kristus Jesus ni baaray: ‘Gubin ngiyal’ ni immoy rok rarogon Got, machane de guy rogon ni nge gelnag ir nge yan i par nib taareb rogon ngak Got. Ya ir e lem rok me pag e flaab rok ni gubin, nge yib i ngal’ nib tapigpig. Min gargeleg ni bod e girdi’, me m’ug ni bod rogon e girdi’; mi i par nib sobut’an’ ma be fol rok Got nge yan i mada’ ko ngiyal’ ni yim’ riy ni yam’ ni tay u daken baley i gek’iy.’​—Filippi 2:5-8.

⁸ Boch e girdi’ e rayog ni ngeb ngan’rad ni, ‘Uw rogon ni ke nang Jesus rogon ni nge sobut’an’?’ Ireray angin ni yib ngak ya bochan ni i par rok e Chitamangin u tharmiy nib n’uw nap’an, ni ireray e tayim ni “bod be’ nib salap i maruweliy ban’en” u nap’an ni yibe sunmiy urngin ban’en. (Proverbs 8:30) Nap’an e togopuluw ni buch u Eden, ma Fak Got ni bin nganni’ e yog ni nge guy rogon ni i sobut’an’nag e Chitamangin ir ngak e girdi’ ni tadenen. Ere, nap’an ni immoy u fayleng, me dag Jesus e sobut’an’ rok e Chitamangin me wenignag ni gaar: “Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan.”​—Matthew 11:29; John 14:9.

9. (a) Mang e ngongol rok e pi bitir ni ke adag Jesus? (b) I fanay Jesus ba bitir ni mang e nge fil?

⁹ Bochan riyul’ nib sobut’an’ Jesus, ma de rus e pi bitir ngak. N’en ni buch e kar adaged daken. Me dag ni kari adag daken e pi bitir me pi’ e tayim rok ngorad. (Mark 10:13-16) Mang e n’en ni ke pirieg Jesus ko fapi bitir ni baadag? Mmudugil, ni bay e pi fel’ngin rorad nib fel’ ni boch pi gachalpen ni kar ilalgad e darur daged ni gubin ngiyal’. Ri yima nang ni fapi bitir e ma sap ngak e piin ni kar ilalgad ni kab tolang ngorad. Rayog ni ngam guy e re n’ey nbochan ni boor e deer ni yad ma fith. Arrogon, piin bitir e mom ni ngan fil ban’en ngorad ma darur ma tolangan’gad, ni ra ngan taareb rogonnag ngak boor e girdi’ ni kar ilalgad. Ba’ biyay, ni ke fek Jesus reb e bitir me yog ngak pi gachalpen ni gaar: “Faanra dab mpiggad ngam boded e bitir, ma ri dabiyog ni ngam uned ko gagiyeg nu tharmiy.” Me ul’ul ngay ni gaar: “En nra yan i par ni ir e th’abi tolang ko gagiyeg nu tharmiy e en nra sobut’nag ir nge bod e chi tir ney.” (Matthew 18:3, 4) Me weliy Jesus ni gaar: “Ya en nra tolangnag ir e yira sobut’nag, ma en nra sobut’nag ir e yira tolangnag.”​—Luke 14:11; 18:14; Matthew 23:12.

10. Mang boch e deer ni gad ra weliy?

¹⁰ Re thin riyul’ nem e ke yibnag e deer nib ga’ fan. Rogon ni nge yog ngodad e yafas ni manemus ma bang riy e nguuda gelnaged e sobut’an’ rodad nib riyul’, machane mang fan ni yu ngiyal’ e mo’maw’ rok fapi Kristiano ni ngar sobut’an’niged yad? Mang fan ni mo’maw’ ni ngad paged e lem rodad nib tolang, ma ngada sobut’niged gadad u nap’an ni ra yib e skeng ngodad? Ma mang e ra ayuwegdad ma rayog ni ngada gelniged e sobut’an’ rodad nib riyul’?​—James 4:6, 10.

Mang Fan nib Mo’maw’ ni Ngan Sobut’an’

11. Mang fan ni dab ni gin ngay ni mo’maw’ ngodad ni ngad sobut’niged lanin’dad?

¹¹ Faanra kam pirieg ni mo’maw’ ngom ni ngam sobut’an’, ma gathi goo gur. U nap’an e duw ni 1920, ma re ke babyor ney e weliy murung’agen fare fonow u Bible nib t’uf ni ngan sobut’an’, me yog ni gaar: “Bochan ni kad guyed feni ga’ fan e sobut’an’ u wan’ Somol ma thingari k’aring urngin e tin riyul’ i gachalpen ni ngar maruweliyed e re fel’ngin ney ni gubin e rran.” Miki yog nib tamilang ni gaar: “Yugu demtrug rogon ni bay urngin e pi fonow ney u Bible ma girdi’ ndawora flontgad e gowa be m’ug ni piin ni kar manged girdi’ rok Got ni kar dugliyed ni ngar folgad ko re kanawo’ rok Somol ney e kar pirieged boor e magawon, ma boor e athamgil ni ngan ta’ ni fan ni ngan sobut’an’ ni ra ngan taareb rogonnag nga boch e fel’ngin.” Be tamilangnag e re n’em ko mang fan ni tin riyul’ e Kristiano e thingar ra athamgilgad ngar sobut’niged yad​—ya gadad, ni gadad e girdi’ ni tadenen e gad baadag ni ngan pining e sorok ngodad ndariy rogodad. Aram rogon ya gadad e pi fak fa wu’ i mabgol ni tadenen, i Adam nge Efa, ni kar mangew girdi’ nib fel’ ngak.​—Roma 5:12.

12, 13. (a) Uw rogon ma fayleng e ke mo’maw’nag ko Kristiano ni nge sobut’an’? (b) Mini’ e ri be mo’maw’nag ni ngada sobut’an’gad?

¹² Maku reb i fan ni mo’maw’ ni ngad sobut’niged lanin’dad e bochan ni ba liyegdad e fayleng ni girdi’ riy e ma k’aring boch e girdi’ ni ngar tolanggad ngak boch e girdi’. Boch u fithik’ e pi n’en ni be nameg e girdi’ nu fayleng e aram e “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay.” (1 John 2:16) Pi gachalpen Jesus e thingar ra pired nib fel’ rogon ni yad ma lemnag ban’en ma ngar tiyan’rad i rin’ e tin nib m’agan’ Got ngay ko bin ni ngar paged ni tin be ar’arnag e fayleng e nge gel ngorad.​—Matthew 6:22-24, 31-33; 1 John 2:17.

¹³ Bin dalip i fan ni mo’maw’ ni ngan maruweliy ma ku mo’maw’ ni ngan dag e sobut’an’ e bochan ni Satan ni fare Moonyan’, ni ir e yib rok e lem nib tolang e ir e be gagiyegnag e re fayleng ney. (2 Korinth 4:4; 1 Timothy 3:6) Ma mon’eg Satan e pi ngongol rok nib kireb. N’en ni rin’, e i guy rogon ni nge “ognag urngin e nam nu fayleng nge fel’ngin” ngak Jesus ni fan e nge liyor ngak. Jesus nrib sobut’an’ e de fanay e n’en ni ognag fare Moonyan’ ngak. (Matthew 4:8, 10) Maku, ma wawliy Satan e pi Kristiano ni ngar adaged ni ngan pining e sorok ngorad. Fapi Kristiano nib sobut’an’rad e yad ma athamgil ni ngaur folgad ko tin ni i rin’ Jesus, ni ke pining e sorok ngak Got.​—Mark 10:17, 18.

Ngan Maruweliy Min Dag e Sobut’an’ nib Riyul’

14. Be mang e “gathi bin riyul’ e sobut’an’?

¹⁴ U lan e babyor rok ni fan ngak piyu Kolose, e Paul ni apostal e ginangrad ni dab ra daged e sobut’an’ ni de riyul’ ni fan ni ngar fel’gad u wan’ e girdi’. I weliy Paul murung’agen e re n’ey ni “gathi bin riyul’ e sobut’an’.” Piin ni yad be dake sobut’an’ e dawora ilalgad ko tirok Got. Ya ke m’ug ni yad be “ufanthin ndariy rogon.” (Kolose 2:18, 23) I weliy Jesus murung’agen e sobut’an’ ni de riyul’ ni aram rogon. Me puwan’ ngak e piin Farise nbochan e meybil rorad ni yibe ufanthin riy nge rogon ni kar talgad ko abich ma dar fal’eged yaarad nge guyrad e girdi’. N’en nib thil riy, e rogon ni nge fel’ u wan’ Got e meybil rodad, ma thingar ni rin’ u fithik’ e sobut’an’.​—Matthew 6:5, 6, 16.

15. (a) Mang e rayog ni ngada rin’ed ma rayog ni nguuda sobut’an’gad? (b) Mini’ e ke dag boch e sobut’an’ nib fel’?

¹⁵ Piin Kristiano e rayog ni ngaur sobut’an’gad ni faan yad ra tiyan’rad ngak e gali cha’ ni ka ra sobut’an’gow, i Jehovah Got nge Jesus Kristus. Ngan rin’ e re n’ey e ba muun ngay ni ngan fil e Bible nge boch e babyor nra ayuwegey i nang fan e Bible ni “fare tapigpig nib yul’yul’ mab gonop” e ke pi’. (Matthew 24:45) Rib ga’ fan e re fol Bible ney ni fan ko piin Kristiano ni ma ayuweg e ulung, ni fan ni “gum’ircharad e nge dabi tolang ngak e pi walagrad.” (Deuteronomy 17:19, 20, NW; 1 Peter 5:1-3) Mu fal’eg i lemnag boch e girdi’ ni kan taw’athnagrad nbochan ni kar sobut’an’gad, ni bod Ruth, Hannah, Elizabeth, nge ku boch e girdi’ ni boor. (Ruth 1:16, 17; 1 Samuel 1:11, 20; Luke 1:41-43) Maku, mu lemnag e ngongol nib fel’ ni ke dag e girdi’ nib gilbuguwan ni kar sobut’an’gad ko pigpig rok Jehovah, ni bod David, Josiah, nge John ni Tataufe, nge Paul ni apostal. (2 Kronicles 34:1, 2, 19, 26-28; Psalms 131:1; John 1:26, 27; 3:26-30; Acts 21:20-26; 1 Korinth 15:9) Ma uw rogon e girdi’ e ngiyal’ ney ni yad ma sobut’an’ ni bay u lan e ulung ko Kristiano? Ra ngan fal’eg i lemnag e pi n’ey, ma ra ayuweg e tin riyul’ e Kristiano ni nga ‘ron’ed madan e sobut’ laniyan’ nge bagayad me pigpig ngak bagayad.’​—1 Peter 5:5.

16. Uw rogon nra ayuwegdad e machib ko Kristiano nge sobut’an’dad?

¹⁶ Gad ra un ko machib ni gubin ngiyal’ e ku ra ayuwegdad ni ngad sobut’an’gad. Sobut’an’ e ra ayuwegdad nge manging’ e machib rodad u nap’an ni gad ra machibnag be’ ni dad nanged ni kad pirieged u nap’an ni gad be machib u mit e tabinaw i yan nge ku yu yang. Rib riyul’ e re n’ey u nap’an ni piin kaad machibnaged e rogned e thin ni yad be dariyfannag e machib rodad ko yay ni som’on. Yima fith murung’agen e machib rodad, ma sobut’an’ e ra ayuweg e Kristiano ni nge pi’ e fulweg u fithik’ e “sumunguy nge tay fan.” (1 Peter 3:15) Pi tapigpig rok Got nib sobut’an’rad e kar ranod ra pired nga boch e binaw ma kar ayuweged boch e girdi’ nib thil e yalen rorad nge rarogon e yafas rorad. Pi tamachib ney e sana yad be athamgil ni ngar filed e thin nu bang u fithik’ e sobut’an’ ni fan ni ngar ayuweg e piin ni yad baadag ni ngar wereged e thin nib fel’. Rib fel’ e re n’em!​—Matthew 28:19, 20.

17. Mang maruwel ko Kristiano nib t’uf e sobut’an’ riy?

¹⁷ Boor e Kristiano e kar lebguyed e maruwel rorad u fithik’ e sobut’an’, kar ted nib m’on e tin nib t’uf rok boch e girdi’ ko tirorad. Bod ba matam ni Kristiano ni ba t’uf e sobut’an’ rok nge yog ni nge pag e tin ni baadag ni nge rin’ nge yog ni nge fil e Bible ngak e pi bitir rok nib fel’ rogon. Sobut’an’ e ku ra ayuweg e pi bitir ni ngar ted fan ma ngar folgad ko gallabthir rorad, ndawora flontgad. (Efesus 6:1-4) Piin ni leengiy ni bay figirngirad ni de michan’rad e baga’ ni ma yib ngorad e magawon nib t’uf ni nge sobut’an’rad riy ya yad be guy rogon ni ngar ayuweged e ani mabgol rorad ngar adaged e tin riyul’ u daken ‘pangirad nib machalbog nge rogon ni yad be ta’ farad.’ (1 Peter 3:1, 2) Maku sobut’an’ nge t’ufeg ni pagfay e baga’ fan u nap’an ni gad be pi’ u fithik’ e t’ufeg e tin nib t’uf rok e piin nib m’ar ma kar pilibthirgad.​—1 Timothy 5:4.

Sobut’an’ e Ma Pithig e Magawon

18. Uw rogon ni nge ayuwegdad e sobut’an’ ngad pithiged boch e magawon?

¹⁸ Urngin e girdi’ ni tapigpig rok Got e dawora flontgad. (James 3:2) Yu ngiyal’, ma ma sum e magawon nge dabi taareban’ l’agruw e Kristiano. Rayog ni bay fan ni nge gun’gun’nag bagayow bagayow. Baga’ ni ra m’ay e magawon ni aram rogon nfaanra ngan fol ko re fonow ney ni be gaar: “Thingar um n’iged fan u wan’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopuluw ngak.” (Kolose 3:13) Riyul’, ni de mom ni ngan fol ko re fonow ney, machane sobutan’ e ra ayuwegey ni ngan fol riy.

19. Mang e thingar dab da paged talin u nap’an ni ngada nonad ngak be’ ni ke k’aring e damumuw ngodad?

¹⁹ Yu ngiyal’ ma ra lemnag reb e Kristiano ni fan e magawon e yugu ba gel ni dabiyog ni ngan pag. Ere, sobut’an’ e ra ayuweg ni nge yan ngak e cha’ nem ni be nameg rogon ni nge fel’ thilrow bayay. (Matthew 18:15) Reb i fan ni magawon ni ma sum u thilin l’agruw e Kristiano e ma par nib n’uw nap’an e sana bochan ni bagayow ara yow l’agruw e rib tolngan’row ndariy bagayow ni baadag ni nge yog ni ir e ke oloboch. Ara rayog ni ke athamgil bagayow ni nge non ngak bagayow ni sana ke rin’ e re n’em ni be dag ni ir e sorok, ni reb e kanawo’ ni de fel’. Machane, be’ ni riyul’ nib sobut’an’ e rib fel’ rogon ni ma pithig e magawon.

20, 21. Mang e bin th’abi ga’ e ayuw u rogon ni ngan sobut’an’?

²⁰ Ban’en nib ga’ fan ni ngan rin’ nge gel e sobut’an’ e ngan yibilay e ayuw rok Got nge kan ni thothup. Machane dab mu pagtalin ni, “Got e . . . ma ayuweg e piin nib sobut’an’rad.” (James 4:6) Ere faanra bay e magawon ni ke sum u thilmew reb e walag, ma ngam meybil ngak Jehovah ni nge ayuwegem ngam sobut’an’nagem ma ngam mog e kireb ni kam rin’ ni ke k’aring fare magawon ni demtrug ko ban’en ni baga’ ara bachichig. Faanra n’en ni ke rin’ be’ e ke amithnag lanin’um machane ke “wenig ngom” u fithik’ e yul’yul’, ma ngam n’ag fan e kireb rok u wan’um u fithik’ e sobut’an’. Faanra mo’maw’ ngom ni ngam rin’ ni aram rogon, mu ning e ayuw rok Jehovah u fithik’ e meybil nge yog ni ngam chuweg e lem rom nib tolang.

²¹ Gad ra nang fan angin ni boor nib fel’ ni fek e sobut’an’ i yib ma susun ni nge k’aringdad ni ngad gelnaged ma ngauda ayuweged e re fel’ngin ney nib ga’ fan. Gad ra rin’ ni aram rogon, ma rib fel’ ni ngad folgad ko n’en ni ke rin’ Jehovah Got nge Jesus Kristus! Dab mu pag talin e n’en ni ke micheg Got ni gaar: “Um par ni bay madgun Somol u wan’um, ma ba sobut’an’um, me yoor ban’en rom, ma ga par ni yibe ta’ fam, me n’uw nap’am.”​—Proverbs 22:4.

Boch Ban’en ni Ngan Fal’eg i Lemnag

• Mini’ nge mini’ e rib fel’ rogon ni kar dagew e sobut’an’?

• Mang fan ni rib mo’maw’ ni ngan gelnag e sobut’an’?

• Mang e ra ayuwegdad ni ngad sobut’an’gad?

• Mang fan nrib ga’ fan ni nguun sobut’an’?

[Picture on page 20]

Jesus e riyul’ nib sobut’ an’

[Picture on page 21]

Fayleng e be k’aring e girdi’ ni ngar athamgilgad ni ngar tolanggad ngak boch e girdi’

[Credit Line]

WHO photo by L. Almasi/K. Hemzǒ

[Picture on page 22]

Sobut’an’ e ra ayuwegdad ni ngad chuchugurgad ngak e piin ni dada nanged u nap’an ni gad ma machib

[Pictures on page 23]

Boor e kanawo’ ni ma dag e piin Kristiano e sobut’an’ riy

[Pictures on page 24]

Baga’ nrayog ni ngan pithig e magawon ni ke sum u thildad nfaanra ngan rin’ u fithik’ e t’ufeg