Uw Rogon ni Ngam Dag e Bin Riyul’ e Sobut’an’?

BIN riyul’ e sobut’an’ e rib ga’ fan u wan’ Got. I yoloy James ni gaar: “I Got e ma togopluw ngak e piin nib tolangan’rad, ma ma ayuweg e piin nib sobut’an’rad.” (James 4:6) Sana i yoloy James e pi thin nem ni bochan boch e thin ni bay ko Bin ni Hebrew e M’ag u Bible. “Jehovah e ba tolang, machane ma guy e piin nib sobut’an’rad; machane ma par nib orel rok e piin nib tolangan’rad.” “Piin nib tolangan’rad u fayleng e thingara sobut’naged an’rad, ma thingara ragbuggad nga but’ e piin nib tolang e lem rorad; ma go’ Jehovah e thingar ni tolangnag.” “Faanra ba l’ag e piin ni ma moning ngay, ma ir [ni Got] e ra moning; machane ra flaabnag e piin nib sobut’an’rad.”​—Psalm 138:6; Isaiah 2:11; Proverbs 3:34.

Ku i pi’ apostal Peter e athamgil nga laniyan’ e girdi’ ni nge sobut’an’rad. Ya i yol ni gaar: “Ma gimed gubin nthingar mon’ed madan e sobut’ laniyan’ nge bigimed me pigpig ngak bigimed; ya babyor nib thothup e be gaar, ‘I Got e ma togopluw ngak e piin nib tolangan’rad, ma ma ayuweg e piin nib sobut’an’rad.”​—1 Peter 5:5.

I Dag Kristus Rogon e Sobut’an’

Sana ga ra fith, Uw rogon nra fel’ rogog ko sobut’an’? Baga’fan e fulweg ku be’ ni baadag ni nge mang e bin riyul’ e Kristiano​—faanra par be’ nib sobut’an’ ma aram rogon ni ke folwok rok Kristus. I dag Jesus ni ir be’ nib sobut’an’ ko ngiyal’ ni i fol ko maruwel ni kan pi’ ngak ni nge chuw u tharmiy me yib nga fayleng me mang reb e girdi’ ni kab sobut’ ko pi engel. (Hebrews 2:7) Yugu aram rogon ni Fak Got ir, machane i k’adan’ u nap’an ni ke moningnag e pi toogor rok. I par nib puluw laniyan’ u nap’an e pi skeng ni yib ngak, ni yugu aram rogon nrayog ni nge pining e pi engel ngar folgad rok.​—Matthew 26:53.

Bin tomur riy ma kan tamra’nag Jesus ya kan richibiy nga daken ba ley e gek’iy, machane i par nib yul’yul’ ngak e Chitamangin. Ere i yoloy Paul e pi thin u murung’agen ni be gaar: “Rogon e lem nge pangin ni nge yog ngomed e fre lem nge fre pangin ni immoy rok Kristus Jesus ni baaray: Gubin ngiyal’ ni immoy rok rarogon Got, machane de guy rogon ni nge gelnag ir nge yan i par nib taareb rogon ngak Got. Ya ir e lem rok me pag e flaab rok ni gubin, nge yib i ngal’ nib tapigpig. Mi ni gargeleg ni bod e girdi’, me m’ug ni bod rogon e girdi’; mi i par nib sobut’an’ ma be fol rok Got nge yan i mada’ ko ngiyal’ ni yim’ riy ni yam’ ni tay u daken ba ley i gek’iy.”​—Filippi 2:5-8.

Ere uw rogon nrayog ni ngad ngongliyed e bin riyul’ e sobut’an’? Ma uw rogon nrayog ni ngad fulweged ngak e girdi’ u rogon nib sobut’an’dad ma gathi rogon nib tolangan’dad?

Rogon Nra Fulweg Be’ nib Sobut’an’

Ngad weliyed boch u murung’agen e kanawo’ ni ngan maruweliy e sobut’an’, ndemtrug u tabon e maruwel ara u nap’an nni yan ko machib u mit e tabinaw iyan. Ra ngan musnag e maruwel nib fel’ rogon ma sana ba t’uf riy e piilal, en ni baga’ lungun, ara en nra yog e thin. Ba t’uf be’ ni nge turguy boch ban’en. Uw rogon ni ga ma fulweg ngak fa en ni ma yog e thin ngom? Ga ma lemnag, “Mini’ e pi’ mat’awun ngak ni nge yog e thin ngog? Ya kab boor e duw ni kug maruwel riy ko cha’nem.” Arrogon, faanra gur be’ ni gab tolangan’, ma ga ra togopluw ko ngiyal’ nthingar mu par u tan pa’ be’. Machane, piin nib sobut’an’rad e yad ma athamgil ni “dabi suk’ ngan’rad ni ngar maruweliyed ban’en ni yad e ngar m’onod riy ni fan e nga nognirad riy ni yad e sororad, ara bochan e nge yib ufan ngorad; machane nge bagayad me sobut’nag ir, ma dabi finey bagayad ni ir e ba sorok ngak e tin ni ka bay e girdi’.”​—Filippi 2:3.

Uw rogon ni ga ma fulweg ko ngiyal’ nra yog be’ ni kab bitir ara reb e ppin boch e thin ngom? Faanra gur be’ nib sobut’an’um, ma ga lemnag e n’en ni kan nog ngom. Faanra gur be’ nib tolangan’, ma ga dabuy e pi thin ni kan nog ngom ara ga ra togopluw ngay. Mang ni ga baadag, ngan nog e thin nib sorom nra kirebnag dakenam ara ngan pi’ e fonow ngom nra ubungem?​—Proverbs 27:9; 29:5.

Rayog ni ngam gel ko skeng ni gafgow? Sobut’an e ra ayuwegem ngam gel ko pi skeng nra yib ngom ma ra ayuwegem nge k’adan’um ni bod rogon Job. Faanra gur be’ nib tolangan’, ma baga’ ni ra kankanan’um ko par rom ma ga togopluw ko ngiyal’ nib mom’aw’ e par rom nge ngiyal’ nra kirebnag be’ an’um.​—Job 1:22; 2:10; 27:2-5.

Sobut’an’uy e Ma T’ufegey ma Ma N’ag Fan e Kireb

Ba mo’maw’ ko boch e girdi’ ni nga rogned, “Wenig ngom. Kug oloboch. Ba sorom.” Mang fan? Ya yad ba tolangan’! Machane baga’ nrayog ni ngan taleg e tugthin ko mabgol ni faan ran wenig.

M’agan’um ngay ni ngam n’ag fan e kireb rok be’ ko ngiyal’ ni ke k’aring e damumuw rom? Fa ga ma par nib tolangan’, ma ga par nib damumuw ngak ko in e rran nge pul, ma dabum ni ngam non ngak? Ma ga ma guy rogon ni ngam fulweg taban e kireb? Ke thang boch e girdi’ fan yugu boch e girdi’ ni fan ni ngar fulweged taban e kireb rok be’. Maku bay boch e girdi’ ni kar gathibthibnaged fithingan’ be’ ni fan ni ngar fulweged taban e kireb. Machane fa en nib sobut’an’ e ma t’ufegey ma ma n’ag fan e kireb. Mang fan? Ya t’ufeg e ma n’ag fan e kireb. M’agan’ Jehovah ngay ni nge n’ag fan e kireb rok piyu Israel ni faanra sobut’naged an’rad. Be’ ni gachalpen Jesus nib sobut’an’ e ra m’agan’ ngay ni nge n’ag fan e kireb rok be’ ni gubin ngiyal’!​—Joel 2:12-14; Matthew 18:21, 22; 1 Korinth 13:5.

Be’ nib sobut’an’ e ra pasigan’ ngay ni ‘nge bagayad mi i ta’ fan bagayad.’ (Roma 12:10) Be yog e thin ko New International Version ni gaar: “Nge bigimed mi i ta’ fan bigimed ni kab gel ngomed.” Ga ma pining e sorok ngak yugu boch e girdi’ ni ngam tay fan felngirad nge tin ni yad ba salap riy? Gubin ngiyal’ ma thingar mog e thin ni ngam kirebnag thin be’? Arrogon, rayog ni ngam pining e sorok ngak yugu boch e girdi’? Faanra ba mo’maw’ ni ngam yodorom, ma sana ga be lemnag ndariy fam ma tolangan’ e aram e magawon rom.

Be’ nib tolangan’ e ba ngochngochan’. Ma be’ nib sobut’an’ e ba gum’an’ ma ma k’adan’ ko gafgow. Ere uw rogom? Ma yib e damumuw ngom ko ngiyal’ nra rin’ be’ ban’en ni gathi rib fel’ fa? Ngongol ni aram rogon e ba math keru’ ko k’adan’. Faanra gur be’ nib sobut’an’, ma dabmu lemnag ni gab tolang. Ga manang ko mang e ke buch ko ngiyal’ ni ke lemnag pi gachalpen Jesus ni yad ba tolang​—ke sum e maluag thin ko mini’ e arorad ni ir e ngar tayed nib tolang u fithik’rad. Kar paged talin ni yad “bogi tapigpig”!​—Luke 17:10; 22:24; Mark 10:35-37, 41.

I weliy Voltaire ni reb e tayol e thin nu France fan e sobut’an’, me yog ni aram e “yaal nib manang e gin ni ma musriy . . . aram rogon ni ngan yal’uweg e tolangan’.” Arrogon, sobut’an’ e ir e lem nib sobut’. Be’ nib sobut’an’ e ma par nib sumunguy, gathi tolangan’. Ri ma tay fan yugu girdi’ ma ra gol ngorad.

Ere mang fan ni ngam athamgil ni ngam par nib sobut’an’? Ya ra felan’ Got ngak e girdi’ nib sobut’an’rad ma aram rogon nrayog ni ngad pired ni be pow’iydad Got. Bochan ni i par Daniel nib sobut’an’, me lemnag Jehovah ni “ba t’uf rok” me l’og reb e engel ngak ni nge weliy fan e yiiy! (Daniel 9:23; 10:11, 19) Sobut’an’ e ma k’aring boor e tow’ath ngodad. Maku ra yog e tin riyul’ e fager ngodad. Machane n’en ni kab baga’fan riy, ra yog e flaab rok Jehovah ngodad. Um par ni bay madgun Jehovah u wan’um, ma ba sobut’an’um, me yoor ban’en rom, ma ga par ni yibe ta’ fam, me n’uw nap’am.”​—Proverbs 22:4.

[Sasing ko page 7]

Ngan wenig u fithik’ e sobut’an’ e rayog ni nge ayuweg e par ni nge manigil