Pi Meybil Ni Ga Ma Ta’ E Kan “Fl’eg Rogon Ni Bod E Incense Nib Fel’ Bon”?
“Meybil rog ngom e kug fl’eg rogon e bod e incense nib fel’ bon u p’eowchem.”—PSALM 141:2, New World Translation.
1, 2. Mang e be yip’ fan fre incense ni ngan urfiy?
I TAY Jehovah chilen ngak Moses ni profet ni nge fl’eg rogon e incense ara fre n’en nib fel’ bon ni yima urfiy ni fan ko liyor ko tempel rok piyu Israel. Bay aningeg ban’en ni yog Got ngak ni nge ta’ ngay nib fel’ bon. (Exodus 30:34-38) Ma rib fel’ bon.
2 Fre M’ag ko Motochiyel u thilin Got nge piyu Israel e ba muun ngay e incense ni ngan urfeg u gubin e rran. (Exodus 30:7, 8) Fre incense e be sor fan nga ban’en fa? Arrogon, ya kan yin’ e tang ko Psalm ni be gaar: “Meybil rog ngom e kug fl’eg rogon ni bod e incense nib fel’ bon u p’eowchem [Jehovah Got], ma kug pug paag nga lang ni bod e maligach ni wom’engin e woldug ni yima pi’ ngom ko yu balayal’.” (Psalm 141:2, NW) U lan fre babyor ni Revelation, ma be weliy apostal John u murung’agen e piin ni bay u tagil’ Got u tharmiy ma ba’ rorad e plet nib gol nib sug nga bogi ban’en nib fel’ bon ni yima urfiy. Miki yog ni gaar: “Ma fapi n’en nib fel’ bon ni yima urfiy ni ereram e meybil rok girdien Got.” (Revelation 5:8) Ere incense ni yima urfiy nib fel’ bon e be yip’ fan e pi meybil ni ma tay e pi tapigpig rok Jehovah ni rran nge nep’.—1 Thessalonika 3:10; Hebrews 5:7.
3. Mang e ra ayuwegdad ngad ‘fl’eged rogon e meybil rodad ni bod e incense u p’eowchen Got’?
3 Ra nge felan’ Got ko meybil rodad, ma thingarda meybilgad ngak u daken fithingan Jesus Kristus. (John 16:23, 24) Machane uw rogon nrayog ni nge fel’ boch e meybil ni gad ma tay? Ngad lemnaged boch e thin ko Bible ni ra aywegdad ngad fl’eged rogon e meybil rodad nge bod e incense u p’eowchen Jehovah.—Proverbs 15:8.
Ngan Pi’ e Meybil u Fithik’ e Michan’uy
4. Uw rogon nib l’ag e michan’uy ko meybil nra felan’ Got ngay?
4 Ra nge yan e pi meybil ni gad ma ta’ ngak Got ni bod e incense nib fel’ bon, ma thingarda meybilgad u fithik’ e michan’uy. (Hebrews 11:6) Faanra bay be’ nib m’ar ko tirok Got ban’en ma yad ba adag e ayuw ko piin piilal ni Kristiano ma “meybil ni yira ta’ u fithik’ e michan’ ngak Got e ra golnag fre m’ar.” (James 5:15) Pi meybil ni kan pi’ u fithik’ e michan’ e ma felan’nag e Chitamangidad nu tharmiy, maku arrogon e fol babyor ni Thin Rok Got ni kan rin’ u fithik’ e meybil. Ke dag e ani yin’ e tang ko Psalm nib puluw e lem rok ye gaar: “Gu ra pug paag nga lang ko pi motochiyel rom ni ba t’uf rog, ma gu ra par ni gu be fl’eg i lemnag e pi motochiyel rom. Mu fil ngog e tin nib fel’ ban’en, nge gonop, nge tamilangan’, ya ke mich u wan’ug e pi motochiyel rom.” (Psalm 119:48, 66) Ngada ‘puged padad’ nga lang u fithik’ e meybil ma ngad ngongliyed e michan’ rodad ya ngad folgad ko pi motochiyel rok Got.
5. Susun mang e ngad rin’ed nfaanra dariy e gonop rodad?
5 Ma faanra dariy e gonop rodad mab t’uf ni ngad k’adedan’dad u ra reb e pi gafgow. Sana ke maruwaran’dad ni be lebug ko ngiyal’ ney reb e thin ko profet u lan e Bible. Dabda paged e re n’em nge kirebnagdad ko tirok Got ban’en, ya ngad yibilayed nge yog e gonop ngodad. (Galatia 5:7, 8; James 1:5-8) Ma dabda lemnaged ni ra pi’ Got e fulweg ngodad u rogon nib malup’lup’. Ba t’uf ni ngad daged ni gad ba yul’yul’ ko meybil ni gad ma tay ma gad rin’ urngin ban’en nib t’uf ku Got ni ngada rin’ed. Ba t’uf ni ngad gelnaged e michan’ rodad u daken e fol babyor ko Thin Rok Got nge pi babyor ni ke fl’eg “fare tapigpig nib yul’yul’ mab gonop.” (Matthew 24:45-47; Joshua 1:7, 8) Ku ba t’uf ni nge tamilangan’dad iyan ma ngad uned ko pi muulung ko girdi’ rok Got u gubin ngiyal’.—Hebrews 10:24, 25.
6. (a) Gad gubin e susun ni nge tamilang e mang u wan’dad u murung’agen e ngiyal’ ney nge thin ko profet u lan e Bible ni be lebug? (b) Susun mang e ngad rin’ed ma gathi ke mus ni ngad yibilayed fithingan Jehovah ni ngan tay nib thothup?
6 Ngiyal’ ney ma be lek boch e Kristiano e tirorad ban’en ma aram e be dag ni dakura tedan’rad ko ngiyal’ ni gad bay riy ni “tomren e fayleng.” (Daniel 12:4) Girdi’ ni taareb e michan’ rorad e rayog ni ngar yibilayed yad nge gel e michan’ rorad ko thin ko Bible ni be micheg ni ke yib Kristus ko 1914 u nap’an ni ke dugliy Jehovah ni nge mang Pilung u tharmiy ma chiney e be gagiyeg u fithik’ e pi toogor rok. (Psalm 110:1, 2; Matthew 24:3) Gad gubin e susun ni ke tamilang u wan’dad ni pi thin ko profet ni bod e n’en ni kan yiiynag u murung’agen fre magothgoth ni bay nta’ ko pi yuraba’ i teliw ni googsur—ni “Babylon nib Gilbuguwan”—nge ngiyal’ nra togopluw Gog nu Magog ngak e girdi’ rok Jehovah, nge rogon nra ayuwegrad Got u nap’an fre mahl ni Armageddon ma rayog ni nge buch e pi n’ey nib tomgin mu lan ba ngiyal’ nib ngoch. (Revelation 16:14, 16; 18:1-5; Ezekiel 38:18-23) Ere ngad yibilayed ku Got nge aywegdad ngad pared nib od ko tirok Got ban’en. Ngad meybilgad ni fan ni ngan tay fan fithingan Jehovah, ma nge yib Gil’ilungun, ma nge lebug e n’en nib m’agan’ ngay u roy u fayleng ni bod rogon u tharmiy. Arrogon, nge michan’dad ma ngad daged e yul’yul’ ko meybil ni gad ma ta’. (Matthew 6:9, 10) Arrogon, urngin e girdi’ nib t’uf Jehovah rorad e ngar m’oneged Gil’ilungun Got mar machibnaged fre thin nib fel’ nge mus rogorad riy u m’on nra taw ko tomur.—Matthew 6:33; 24:14.
Ngan N’uf Jehovah min Pining e Magar Ngak
7. Mang e ga ba adag ko meybil rok David ni bay ko 1 Kronicles 29:10-13?
7 Reb e kanawo’ ni baga’ fan ni ‘ngad fl’eged rogon e meybil rodad nge bod e incense’ e ngad n’ufed Got ma gad pining e magar ngak. Aram rogon e meybil ni tay David ni Pilung u nap’an ni pi yu Israel e ayuw ni fan ni ngan toy e tempel rok Jehovah. I meybil David ni gaar: “O Jehovah ni gur fre Got nu Israel, ngam par ni gab flaab, ndariy n’umngin nap’an. Ba gilbuguwam O Jehovah, ma gab gel ma gab gamog, ma gab manigil ma gab tolang; ya gubin ban’en u tharmiy ngu but’ e fanam. Bay rogom ni ngam gagiyeg, O Jehovah, me gur fa An lolugen urngin ban’en. Urngin e fel’ rogon nge rir e mil fan ngom, ma ga be suwey urngin ban’en; ma bay gelngin paam nib gel, ma paam e bay gelngin ni nge gelnag urngin e girdi’. O Got rodad, chiney e gamad be pining e magar ngom ma gamad be n’uf fithingam nib gamog.”—1 Kronicles 29:10-13.
8. (a) Mang boch e thin ni be pining e sorok ku Got ni bay ko Psalms 148 nge mada’ ko 150 ni ke taw nga gum’erchaem? (b) Faanra gad ma un i rin’ e pi thin ni bay ko Psalm 27:4, ma mang e gad ra rin’?
8 Rib fel’ e pi thin nem ni be pining e magar nge sorok ku Got! Sana gathi ri aram rogon e meybil ni gad ma tay machane rayog ni nge taareb rogon ngay nfaanra yib u gum’erchadad. Fre babyor ko Psalms e boor e thin riy ni meybil ni ma pining e magar nge sorok ku Got. Bay boch e thin ni rib manigil ko Psalms 148 nge mada’ ko 150. Ma boor e thin ko Psalm e be pining e magar ku Got. I yon’ David e tang ni gaar: “Reb e ban’en ni kug ning rok Jehovah, aram e nge yog ngog ko mang e gu ra gayiy ma aram e rayog ni nggu par u lan e naun rok Jehovah n’umngin nap’an e yafas rog, mu gu par ni gu be guy felngin Jehovah ni rib fel’ ma gu be guy e tempel rok.” (Psalm 27:4, NW) Ngad ngongolgad nib puluw ko pi meybil ni aram rogon ma ngad pasiggad i un ko pi n’en ni ma rin’ e girdi’ rok Jehovah u taabang. (Psalm 26:12) Faanra gad ra rin’ e re n’ey ma gad fl’eg i lemnag e Thin Rok Got u gubin e rran ma aram e bay boor fan ni ngad meybilgad ku Jehovah ma gad pining e magar ngak.
Ngam Gayiy e Ayuw rok Jehovah u Fithik’ e Sobut’an’
9. Uw rogon e meybil ni tay Asa ni Pilung, ma mang wenegan ni yib riy?
9 Faanra gad be pigpig ku Jehovah ni gad e Pi Mich Rok, ma rayog ni nge mich u wan’dad ni be rung’ag e meybil ni gad ma tay ngak ni gad be ning e ayuw rok. (Isaiah 43:10-12) Mu lemnag Asa ni Pilung nu Judah. Fa 10 e duw ni tin som’on ko gagiyeg rok ni 41 e duw n’umngin nap’an (977-937 B.C.E.) e immoy nib gapas. Ma aram me yib ba ulung i salthaw ni reb e milyon u gubin ni yad bay u tan pa’ Zerah ni be’ nu Ethiopia. Yugu aram rogon ni ri yad boor ma chon Asa e yad buch uw, machane ka ranod ngar mada’gad e pi salthaw nem. Machane u m’on ko fre mahl me meybil Asa nib elmirin. I yog ni bay gelngin Jehovah ni nge ayuwegrad. Me wening ni nge ayuwegrad ni gaar: “Gamad ma taga’ nga dakenam, ma gamad ra cham ngak e pi girdi’ ney ni yad pire’ u daken fithingam. O Jehovah, i gur e Got romad. Dab mu pag e girdi’ ngar gelgad ngom.” Ma wenegan ni yib riy e ke ayuweg Jehovah yu Judah ngar gelgad ni fan ko ngochol rok. (2 Kronicles 14:1-15, NW.) Demtrug ko ra chuwegdad Got ko reb e gafgow fa ra ayuwegdad ma ngad kadan’dad riy, ma dariy e maruwar riy ni ma rung’ag e meybil rodad ni gad ra ning e ayuw rok.
10. Ngiyal’ ni dad nanged ko uw rogon ni ngad pithiged reb e magawon, ma uw rogon nra ayuwegdad e meybil ni tay Jehoshafat ni Pilung?
10 Faanra dad nanged ko mang e ngad rin’ed ko reb e magawon ni ke yib ngodad, ma rayog ni nge pagan’dad ni ra rung’ag Jehovah e meybil ni gad ma tay ni gad be ning e ayuw rok. Kan dag e re n’em ko ngiyal’ nap’an Jehoshafat ni Pilung nu Judah ni ke tabab ko gagiyeg ko duw ni 936 B.C.E. ma 25 e duw n’umngin nap’an e gagiyeg rok. Nap’an ni yib piyu Moab, nge Ammon, nge Seir, ni ngar m’aged e mahl ngak Jehoshafat me wening ku Got ni gaar: “O Got romad, dabmu gechignagrad? Ya dariy gelngimad ni nggu gelgad ko re ulung i girdi’ ney ni yad boor ni be yib ngodad; ma dagu nanged ko mang e nggu rin’ed, ma gamad be sap ngom ni ngam ayuwegmad.” I fulweg Jehovah taban e re meybil nem me cham ni fan ko yu Judah me n’igin e pi toogor rorad ni ngar balyanggad ma aram mi yad lied yad. Ma wenegan ni yib riy e kan k’aring e marus ko pi nam u charrad, me aw e gapas ko yu Judah. (2 Kronicles 20:1-30, NW) Ngiyal’ ni dariy e gonop rodad u reb e magawon, ma rayog ni ngad meybilgad ni bod Jehoshafat ni gaar: ‘Dagu nanged ko mang e nggu rin’ed, ma gamad be sap ngom ngam ayuwegmad, Jehovah.’ Fre kan ni thothup e ra n’igin ni nge yibnag ngan’dad boch e thin ko Bible ni ra ayuwegdad ngad pithiged fre magawon fa ra ayuwegdad u rogon ni kab tolang ngodad, nge rogon ni mmo’maw ni ngad nanged fan.—Roma 8:26, 27.
11. Mang e rayog ni ngad filed ko n’en ni rin’ Nehemiah ni fan ko fre yoror nu Jerusalem?
11 Sana thingar uda yibilayed e ayuw rok Got. I par Nehemiah ni ke kireban’, ma be yor, ma daki kay ban’en, ma ke meybil in e rran u murung’agen fare yoror nu Jerusalem ni ke kireb, nge salpen e girdi’ nu Judah ni yad ba gafgow. (Nehemiah 1:1-11) Meybil ni i tay’ e ke yan nga lang ngak Got ni bod e incense nib fel’ bon. Reb e rran me guy Artaxerxes ni Pilung nu Persia owchen Nehemiah ni ke kireban’ me fith ni gaar: “Mang e gab adag ni nggu ayuwegem riy?” Ma aram me yoloy Nehemiah ni gaar: “Mu gu meybil ngak fre Got nu tharmiy.” Kan fulweg taban e re meybil nem nib ngoch, ya kan pag Nehemiah ni nge yan nga Jerusalem nge toy fre yoror ni ke kireb.—Nehemiah 2:1-8.
Mpag Jesus nge Dag Ngom Rogon e Meybil
12. Mog ko thin rom, e pi n’en ni baga’ fan ko meybil ni fil Jesus ngak pi gachalpen?
12 Urngin e meybil ni bay ko Bible ma bin nth’abi fel’ aram fa bin ni yog Jesus Kristus ni nge fil rogon e meybil ni bod e incense nib fel’ bon. Be yog ko Gospel ko Luke ni gaar: “Ba’ biyay . . . ni gaar reb i gachalpen ngak [Jesus], ‘Somol, mu fil rogon e meybil ngomad, ni bod rogon ni ke fil John ngak pi gachalpen.’ Me gaar Jesus ngorad: ‘Baaray rogon ni ngam meybilgad nge lungumed: “Chitamangimad, ngan tay fan fithingam nib thothup, ma nge yib gil’ilungum. Mpi’ ngomad u reb e rran ngu reb e rran e ggan ni nge yog ngomad. Ma ga n’ag fan u wun’um e denen romad, ya kug n’iged fan u wun’mad e kireb ni ke ngongliy urngin e piin ni kar ngongliyed e kireb ngomad. Ma dab mfekmad ko sikeng nib mo’maw.”’” (Luke 11:1-4, NW; Matthew 6:9-13) Ngad fl’eged i lemnag e re meybil ney, ni gathi ni ngan sul nga daken ya be pow’iydad ma be fil rogon e meybil ngodad.
13. Ngam weliy ko mang fan e pi thin ney, “Chitamangmad, ngan tay fan fithingam nib thothup”?
13 “Chitamangimad, ngan tay fan fithingam nib thothup.” Rib taw’ath e piin ni kar ognaged yad ngak Jehovah ya rayog ni ngar pininged e Chitamangirad ngak. Bod rogon e bitir ni yad ma yib ngak e chitamangirad ni fan ko urngin ban’en, ma susun ni ngad meybilgad ku Got u gubin ngiyal’ ni gad be tay fan. (Psalm 103:13, 14) Susun ngad yibilayed fithingan Jehovah ni ngan tay fan ya gad ba adag ni ngan chuweg urngin e kireb ni kan t’ar nga daken. Arrogon, gad ba adag ni ngan fal nga bang e ngochol rok Jehovah min n’uf yab thothup.—Psalm 5:11; 63:3, 4; 148:12, 13; Ezekiel 38:23.
14. Mang fan fre thin ni, “Nge yib Gil’ilungum”?
14 “Nge yib gil’ilungum.” Gil’ilungun Jehovah e aram fre am ni bay u tan pa’ Fak nge piin ni yad Jesus ni yad e “piin nthothup.” (Daniel 7:13, 14, 18, 27; Revelation 20:6) Dabi n’uw nap’an ma ra “yib” ya ra gel ngak urngin e pi tatogopluw rok Got u fayleng, mara chuwegrad. (Daniel 2:44) Ma aram e ra lebug e tin nib m’agan’ Jehovah ngay u fayleng, ni bod rogon ni kan rin’ u tharmiy. (Matthew 6:10) Rib gel e falfalan’ ko ngiyal’ nem ya urngin ban’en nib fas e ra pigpig ku fa Ani Ga’ u palpal th’ib!
15. Mang e gad be dag ni ngad yibilayed ku Jehovah ni nge “pi’ ngodad u reb e rran ngu reb e rran e ggan ni nge yog ngodad”?
15 “Mpi’ ngomad u reb e rran ngu reb e rran e ggan ni nge yog ngomad.” Gad ra ning ku Jehovah ni nge pi’ u “reb e rran ngu reb e rran e ggan ni nge yog” ngodad ma be dag ni gathi gad be ning ni ngan pi’ boch ban’en ngodad ni boor ya ke mus ni tin nib t’uf rodad u reb e rran nge reb. Gad ma pagan’ ku Got ni nge pi’ e tin nib t’uf rodad ngodad machane ku gad ma maruwel ni nge yog e ggan ngodad nge yugu boch ban’en nib t’uf rodad. (2 Thessalonika 3:7-10) Ma susun ni ngad pininged e magar ngak e An ni ma pi’ urngin ban’en ngodad ni bochan e ma pi’ u daken e t’ufeg nge gonop, nge gelngin.—Acts 14:15-17.
16. Mang e ngad rin’ed me n’ag Got fan e kireb rodad?
16 “Ma ga n’ag fan u wun’um e denen romad, ya kug n’iged fan u wun’mad e kireb ni ke ngongliy urngin e piin ni kar ngongliyed e kireb ngomad.” Gathi gad bflont ya gad e ta denen, me ere dabiyog ni ngad ngongolgad nib flont nib puluw ko motochiyel rok Jehovah. Ere ba t’uf ni ngad ninged ni nge n’ag fan e kireb rodad u daken e maligach ni biyul’ ni pi’ Jesus. Machane faanra gad ba adag ni nge puluwnag fa “An ma Rung’ag e Meybil” fare maligach ni fan ko denen rodad, ma thingarda kalgadngan’dad, ma nge fel’ u wan’dad ni faan yira pi’ e fonow ngodad. (Psalm 65:2; Roma 5:8; 6:23; Hebrews 12:4-11) Maku, ra n’ag Got fan e denen rodad nkari mus nfaanra kad “n’iged fan u wun’dad e kireb ni ke ngongliy urngin e piin ni kar ngongliyed e kireb ngomad.”—Matthew 6:12, 14, 15.
17. Mang fan e pi thin ney ni, “Dab mfekmad ko sikeng nib mo’maw”?
17 “Dab mfekmad ko sikeng nib mo’maw.” Yu ngiyal’ ma be yog e Bible ni ke rin’ Jehovah ban’en ni yugu aram rogon ni ke mus ni ke pag ni nge buch. (Ruth 1:20, 21) Der ma wawliydad Got ni ngad denengad. (James 1:13) Ya pi n’en ni ma wawliydad ngad rin’ed e kireb e sum rok Moonyan’, nge denen ni bay u fithik’dad, nge re fayleng ney. Satan e ir e An ma Wawliydad, ma ma guy rogon ni ngad denengad nib togopluw ngak Got. (Matthew 4:3; 1 Thessalonika 3:5) Nap’an ni gad ma yibilay ni gaar: “Dab mfekmad ko sikeng nib mo’maw,” ma gad be ning ku Got ni dabi pagdad ni ngad mulgad u nap’an ni ke yib e lumel ngodad ni ngad th’abed e motochiyel rok. Rayog ni nge pow’iydad ni dabda mulgad ma dabi gel Satan ngodad, ni ir “faanem nib kireb.”—Matthew 6:13; 1 Korinth 10:13.
Ngam Ngongol nib Puluw ko Meybil Rom
18. Uw rogon nrayog ni ngad ngongolgad nib puluw ko meybil rodad ni gad be yibilay e falfalan’ ko mabgol rodad nge par u tabinaw?
18 Boor ban’en ni yog Jesus ni ngan yibilay, ma rayog ni ngad meybilgad u murung’agen boor ban’en ndemtrug ko mang. Susun, rayog ni ngad yibilayed ni gad ba adag ni ngad pared nib falfalan’ ko mabgol rodad. Rayog ni ngad yibilayed ni nge yog ni ngad t’ared lanin’dad ni fan ni ngad pared nib machalbog u m’on ni ngad uned ko mabgol. Machane thingarda ngongolgad nib puluw ko meybil rodad ma dabda poyed e babyor ara guyed boch ban’en ni murung’agen e ngongol nde yalen. Ma nge mudugilan’dad ni ngad mabgolgad ‘nrogon e mabgol ni ma tay e piin ni girdien Somol.’ (1 Korinth 7:39; Deuteronomy 7:3, 4) Ma nap’an ni kad uned ko mabgol ma ba t’uf ni ngad athamgilgad nib puluw ko meybil rodad ni nge yog e falfalan’ ngodad ma ngad folgad ko fonow ni pi’ Got. Ma faanra bay e bitir rodad ma de gaman ni ngad yibilayed ni yad ra mang pi tapigpig rok Jehovah nib yul’yul’. Ya thingarda rin’ed urngin ban’en nrayog rodad ni nge taw e thin riyul’ rok Got nga lanin’rad u daken e fol babyor nge pi muulung ko Kristiano ni ngan un ngay u gubin ngiyal’.—Deuteronomy 6:5-9; 31:12; Proverbs 22:6.
19. Mang e susun ni ngad rin’ed ni faanra gad be yibilay e machib ni gad be tay?
19 Gad be yibilay ni nge yib angin e machib ni gad be tay fa? Me ere ngad ngongolgad nib puluw ko meybil ni aram rogon ma ngad uned i wereg e machib ko Gil’ilungun Got. Faanra gad ra yibilay ni ngad ayuweged yugu boch e girdi’ ngar uned ko kanawo’ ko yafas ni manemus, ma ba t’uf ni ngad yoloyed ko babyor e piin ni ba adag e machib ma nge m’agan’dad ngay ni ngad filed e Bible ngak e girdi’. Ma faanra gad ba adag ni ngad uned ko pioneer? Me ere ngad rin’ed e n’en nib puluw ko meybil rodad ma nge yoor e tayim ni gad be tay ko machib ma ngad uned ko piin ni pioneer ko machib. Faanra gad ra rin’ ni aram rogon ma gad be dag ni gad be ngongol nib puluw ko meybil rodad.
20. Mang e ran weliy ko bin migid e thin?
20 Faanra gad be pigpig ku Jehovah nib yul’yul’, ma rayog ni nge mich u wan’dad ni ra fulweg taban e meybil rodad ni ba puluw ko tin nib m’agan’ ngay. (1 John 5:14, 15) Dabi siy ni boor ban’en nib manigil ni kad filed ko pi meybil ni bay ko Bible. Bin migid e thin e ra weliy yugu boch e thin ko Bible ni ra ayuwegdad ngad ‘fl’eged rogon e meybil rodad nge bod e incense nge yan ngak Jehovah.’
Uw Rogon ni Ga Ra Fulweg?
◻ Mang fan nsusun ni ngad meybilgad u fithik’ e michan’uy?
◻ Uw fene ga’ fan e thin ni ngan pining e magar nge sorok ku Got ko meybil ni gad ma tay?
◻ Mang fan nrayog ni nge pagan’dad ni ngad ninged e ayuw rok Jehovah u fithik’ e meybil?
◻ Mang boch e thin nib baga’ fan ko fre meybil ni fil Jesus?
◻ Uw rogon nrayog ni ngad ngongolgad nib puluw ko meybil rodad?
[Sasing ko page 10]
Bod rogon Jehoshafat ni Pilung, ma yu ngiyal’ e ba t’uf ni ngad meybilgad ni lungudad: ‘Dagu nanged e n’en ni nggu rin’ed, ma gamad be sap ngom ni ngam mog ngomad, Jehovah’
[Sasing ko page 11]
Ga ma meybil nib puluw ko meybil ni fil Jesus ngak pi gachalpen?