Wenegan e Tolangan’​—Uw Fene Ga’?

KAA buch ngom ni ke guy be’ rogon ni nge sobut’nagem. Sana be’ ni baga’ lungun u tabon e maruwel, ara be’ nib tolang, ara girdi’ rom ni ke lemnag ni gab sobut’ ngak me ngongliy e ngongol nib kireb ni bochan ni be sap ngom nga but’? Uw rogon e cha’nem u wan’um? Ga baadag daken? Dabi siy ni kam dabuy! Mang fan? Ya bochan e tolangan’ e ma sunmeg e yoror me kirebnag e numon u thilin e girdi’.

Pride ara tolangan’ e ma n’igin ni ngan sobut’nag yugu boch e girdi’, ni fan ni nge tolangnag ir. Be’ ni bay e lem ni aram rogon e der ma yog e thin nib fel’ u murung’agen yugu boch e girdi’. Gubin ngiyal’ ma ra yog boch e thin nde puluw ngay ni bod e​—“arrogon, sana riyul’ ni bay felngin, machane bay reb e magawon rok ara bay ban’en ni kireb e rok.”

U lan e babyor ni Thoughts of Gold in Words of Silver, yibe weliy ni tolangan’ e aram “ban’en nib kireb ni ma yibnag wenegan nib kireb. Ra ba kireb daken be’, ma ri buchuw felngin ni ngan tay fan.” Ere dabni gin ngay ni dariy be’ ni baadag ni nge chag ngak e girdi’ nib tolangan’rad. Ba riyul’, wenegan e tolangan’ e baga’ ni dariy e tin riyul’ e fager riy. Me weliy fre babyor, “Girdien e fayleng e yad baadag e girdi’ nib sobut’an’rad​—gathi girdi’ nib tolangan’rad ni yad be lemnag ni ke sobut’an’rad, machane girdi’ ni rib sobut’an’rad. Bpuluw e thin ko Bible ni be gaar: “Tolangan’ ko reb e pumoon e ra tamra’nag, machane en ni be sobut’nagan’ e ra gel ngay ma yira tay fan.”​—Proverbs 29:23, The Jerusalem Bible.

Machane gathi kab baga’fan ni ngan lemnag wenegan nra yib ko par nib fel’ u thiliy nge Got ko m’ag fager ara ngan tay fan? Uw rogon e girdi’ nib tolangan’ mab ufanthin u wan’ Got? Uw rogon u wan’ Got e tolangan’uy nge sobut’an’uy?

Ban’en ni Ngan Fil ko Sobut’an’uy

Be yog e en ni yoloy e thin ko Proverb ni gaar: “Be’ nib tolangan’ e ra gafgow, ma be’ nib ufanthin e ra sobut’. Kab fel’ ni nge un ngak e piin nib sobut’an’rad ko piin ni yad be tolangnaged yad.” (Proverbs 16:18, 19) Ba tamilang ni ba gonop e pi thin nem ya bpuluw ku Naaman ni ga’ ko salthaw nu Syria, ni ke par nib fas u nap’an Elisha ni profet u Israel.

Naaman e bay e daraw rok. I gay e falay nra golnag e m’ar rok me chur nge mada’ nga Samaria ya ke lemnag nra mada’nag Elisha. Machane, i l’og Elisha reb e tapigpig rok ni nge yog e thin ngak Naaman ni nge maluk u lan e lul’ ni Jordon ni medlip yay. Ke damumuw Naaman ya de yib Elisha ni nge non ngak ma ke dabuy e thin ni kan nog ngak. Mang fan nde yib Elisha ni nge non ngak me l’og e tapigpig rok? Ma dabi siy ni taareb rogon e lul’ u Syria ko fre lul’ ni Jordan! Tolangan’ e aram e magawon rok. Mang wenegan e yib ngak? Chimerigin ni ke fol ko fonow nib gonop ni kan nog ngak. “Me yan Naaman ko lul’ ni Jordan me lith ni medlip yay ni bod rogon ni yog Elisha ngak me chuw e daraw rok nge par downgin ni gowa downgin bochi tir.”​—2 Kings 5:14.

Yu ngiyal’ ma ri ra fel’ rogon be’ nfaanra par nib sobut’an’.

Wenegan e Ufanthin

Wenegan nra aw nga daken e girdi’ nib tolangan’rad e kab baga’ ko fel’ rogon nra mul u pa’rad. Ya bay mit e tolangan’ ni bpuluw ko fre bugithin ni “hubris,” ni ma sor fan ko “tolangan’ nib pag rogon ara tafinay nib mudugil nib pag rogon ni ma k’aring wenegan nib kireb.” (Webster’s Ninth New Collegiate Dictionary) Likngin e re thin ney e yib u Greece, ma be weliy William Barclay ni be’ nib sukul ni “hubris e aram e tolangan’ nge ngongol nib kireb nib m’ag u taabang . . . , ir e fanenikan nib ufanthin ni ma n’igin ni nge t’ar [e girdi’] kowan yugu boch e girdi’.”

Bay u Bible e thin u murung’agen mmit e re tolangan’ ney. Aram e thin u murung’agen Hanun, ni pilung nu Ammon. Be weliy e thin ko Insight on the Scriptures ni gaar: “Bochan ni ke dag Nahash e ngongol nib gol ngak, ma aram me l’og David boch e girdi’ ni ngar fl’eged laniyan’ Hanun ko ngiyal’ ni kem’ e chitamangin. Machane bochan ni ke lemnag Hanun ni be makath David ni nge yaliy e mach, ma aram me puy Hanun baley raben e pi tapigpig rok David me thab baley e mad rorad nge mada’ ko gisinrad me tolufrad.”a Be weliy Barclay u murung’agen e re n’ey ni gaar: “Re ngongol nem e ba hubris. Aram e ngongol ni t’ar kuwon, moning, nge ngongol ni ma tamra’nag be’ u fithik’ e yoor ni kan tay u taabang.”​—2 Samuel 10:1-5.

Arrogon, be’ nib tolangan’ e rayog ni nge ngongliy e ngongol nib hubris, ara nge yog e thin ni ma dariy fannag e girdi’, ara nge tamra’nagrad. Be’ ni hubris e baadag ni nge kirebnagan’ e girdi’ ma ra falfalan’ ko ngiyal’ ni be kireban’ e girdi’. Machane nap’an ni ngan kirebnagan’ be’ ma bay l’agruw ban’en nra buch. Wenegan nra yib riy e ra mul e fager maku baga’ nra mang e toogor rok.

Uw rogon nrayog ni nge ngongliy e tin riyul’ e Kristiano e tolangan’ nra kirebnagan’ e girdi’, ya i yog e Masta ni susun ni nge ‘t’uf rom e en ni ir e mmigid ngom ni gowa gur’? (Matthew 7:12; 22:39) Tolangan’ e ba togopuluw nga gubin ban’en rok Got nge Kristus. Ma arfan ni yog Barclay ni gaar: “Hubris e aram e tolangan’ ni ma n’igin ni nge togopuluw e girdi’ ngak Got.” Tolangan’ e ma n’igin ni nge yog e girdi’ ni: “Dariy Jehovah.” (Psalm 14:1) Maku bpuluw ko pi thin ko Psalm 10:4 ni be gaar: “En nib kireb ni ba tolangan’ e dabi gay; ya tafinay rok e: ‘Dariy Got.’” Tolangan’ ni aram rogon e gathi kemus ni ra tay be’ nib orel ko pi fager nge girdi’ rok machane ku ra par nib orel rok Got. Baga’ wenegan ni bay riy!

Dab Mu Pag ni Nge Kirebnagem e Tolangan’

Tolangan’ e ba m’ag nga boor ban’en​—tolangan’ ko nam, raen dow e girdi’, boor thal e girdi’, sukul, salpiy, liw, nge gelngiy. Demtrug e kanawo’ machane rayog ni nge af e tolangan’ ngom me kirebnagem.

Be m’ug riy ni ba sobut’an’ boor e girdi’ ko ngiyal’ ni ngar maruwelgad e piin ni kab tolang ngorad ara pi fager rorad u taabang. Machane mang e ma buch ko ngiyal’ ni nge tolang e liw rorad? Chi ngiyal’ nem ma yad ra wod e pi pilung ni yad be kirebnag e yafos rok e girdi’ ni kab sobut’ ngorad! Rayog ni nge yodor ko ngiyal’ ni nge munmad be’ ko uniform ara bay e badge rok ni ma pi’ mat’awun. Mus ko girdi’ ko am e rayog ni nge tolangan’rad ngak e girdi’ ni yoor, ya yad ma lemnag ni susun ni nge pigpig e pi girdi’ nem ngorad, gathi ngar ayuweged e pi girdi’ nem. Tolangan’ e rayog ni nge n’iginem ngam par nib gel e thin rom, ndabmu lemnag yugu boch e girdi’; machane sobut’an’ e rayog ni nge n’iginem ngam gol ngak e girdi’.

Bay rogon ni nge par Jesus nib tolangan’ ma ba gel e thin rok ngak pi gachalpen. Ya ir be’ nib flont, ni Fak Got, ni i ayuweg e girdi’ nde flont ma yad ba ufanthin. Machane, mang pong ni i pi’ ngak e girdi’ ni kar motoyilgad ngak? “Mired ngog, ni gimed gubin e piin ni ke aw parowmed i fek i n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.”​—Matthew 11:28-30.

Gubin ngiyal’ ma gad ma athamgil ni ngad folwokgad rok Jesus? Fa gad ma yog e thin nib gel, ma gad par nib gelan’ ni bod e pilung nib tolangan’ nder runguy e girdi’? Bod Jesus, nga ud athamgilgad ni ngad pied e toffan ngak e girdi’, ma dabda tomalnaged yad. Ngad togopuluwgad ko tolangan’ ni ma kirebnagey.

Ere mang, ba kireb gubin mit e pride fa?

Tay Fan nge Tolangan’

Pride e ku ma sor fan ko “justifiable self-respect ara ngam tay fam ko ngongol nib fel’ rom.” (Webster’s Ninth New Collegiate Dictionary) Fan fre bugithin ni self-respect e ngam tay fam. Baga’ ni dariy fan u wan’um ko uw rogom u wan’ yugu boch e girdi’. Ga ma lemnag yaam nge thim. Ba riyul’ e proverb nu Spain, “Mog ngog ko mini’ e ga be lek ma gog ngom ko gur mini’.” Faan ga baadag ni ngam chag ngak e girdi’ nib mit rogon, mab malmal, mab wagey e kanawo’ rorad, mab kireb e thin rorad, ma aram ma ga wod rogorad. Lem rorad e ra af ngom, ma ga bod yad ni ngam par ndabmu tay fam.

Ma aram ma bay e pride ni ma pow’iy e girdi’ ngar pired nib ufanthin. Ke par e pi scribe nge Farise nib tolangan’rad ko yalen rorad nge yaan e mad rorad ni be tay ni yad ba tolang. I ginang Jesus u murung’agrad ni gaar: “Yad be rin’ urngin ban’en ni bochan e nge guyrad e girdi’. Amu guyed feni ga’ tafen e thin nu babyor nib thothup ni kan yoloy nochi yangi babyor ka nin’ nga lan kar m’aged nga peri’rad nge nga daken pa’rad, mi gimed guy feni n’uw taban wuru’ e mad rorad. Yad baadag e yungi n’en nth’abi fel’ ni yima par riy ko pi madnom ni yima tay nge chiya ni kan tay u lan tafen e muulung i yan nib mudugil e girdi’ ntagil. Yad baadag ni ngan siro’ ngorad min ta’ farad ko yungi n’en ni bay e market riy me pining e girdi’ e Tamachib ngorad.”​—Matthew 23:5-7.

Ere n’en nib t’uf riy e aram e lem nib thebthebal. Maku dabmu pag talin ni gathi kemus ni be guy Jehovah yaadad u wuru’, machane ku ma guy gum’erchadad. (1 Samuel 16:7; Jeremiah 17:10) Be’ ni be lemnag ni ba mat’aw ir e dariy mat’awun Got rok. Machane ka bay reb e deer, Uw rogon nrayog ni nggu par nib sobut’an’ug mu gu siyeg wenegan e tolangan’?

[Boch e Thin nra Tamilangnag Murung’agen]

[Sasing ko page 4]

Ke fel’ rogon Naaman ya ke sobut’an’