“Kug Dag Ngomed Fare Kanawo’”

“Susun kam manged e pi sensey e chiney nbochan fare tayim.”​—HEBREWS 5:12, NW.

1. Mang fan fapi thin ni bay ko Hebrews 5:12 e ra magafan’nag reb e Kristiano?

GA RA bieg fare thin nu Bible ni kan thagthagnag ni fan ko kenggin e re article ney, ma ra magafan’um ngom? Faanra arrogon, ma gathi ke mus ni goo gur. Bochan gadad e pi gachalpen Kristus, ma gad manang ni thingarda manged pi sensey. (Matthew 28:19, 20) Ya gad manang ni tayim ni gad be par riy e chiney e arfan ni ngad gurgurgad ngad filed ban’en ko girdi’ ni nge fel’ rogon nrogon nrayog rodad. Ma gad manang ni maruwel rodad ni gad be fil ban’en ngak e girdi’ e rayog ni nge yan i aw ni yafas ngorad fa yam’! (1 Timothy 4:16) Ere bay fan, ni sana ngada fithed gadad ni: ‘Riyul’ ni kug mang reb e sensey nrogon nib puluw ni nga gu rin’? Uw rogon ni nggu mon’og?’

2, 3. (a) Uw rogon ni ke weliy reb e sensey murung’agen e def ko ngan fil ban’en ngak be’ nib fel’ rogon? (b) Mang e dag Jesus ngodad ni ngad rin’ed u nap’an ni gad ra fil ban’en ngak e girdi’?

² Magafan’ ni aram rogon e de t’uf ni nge war lanin’dad. Faanra kemus ni gad be lemnag ni rogon ni ngan fil ban’en ngak e girdi’ e ba t’uf ni ngad nanged boch e kanawo’ nrib fel’ mab thil, ma sana gad ra thamiy ni kaygi mo’maw’ ni ngada salapgad ko re maruwel ney. Machane, fare def ko rogon e machib nib fel’ ngak e girdi’ e gathi kanawoen ban’en ya ka bay ban’en ni kab ga’ fan ngay. Mu lemnag e n’en ni yoloy reb e sensey nib salap nga reb e babyor ni bay kenggin ni gaar: “Rogon ni ngan fil ban’en ngak e girdi’ ni ba fel’ rogon e de tor nga daken e salap ara reb e kanawoen, nge rogon ni ngan rin’ ban’en. . . . Rogon ni ngan fil ban’en e ri ma tor nga daken e t’ufeg.” Riyul’, ni be lemnag murung’agen e sensey u skul. Yugu aram rogon, ma n’en ni be lemnag e kub t’uf ni ngad folgad riy ni gadad e piin Kristiano ni gad ma fil ban’en ngak e girdi’. Uw rogon?

³ Fare sensey nrib fel’ ni gad ma fol rok e kemus ni Jesus Kristus, ni ir faanem ni ke yog ngak pi gachalpen ni gaar: “Ya kug dag ngomed e n’en ni nguum rin’ed ngomed.” (John 13:15) Be weliy murung’agen e ngongol ni dag ni ir be’ nib sobut’an’, machane pi n’en ni dag Jesus ngodad e ba mudugil nib muun ngay e maruwel rok nth’abi ga’fan ni ir ba girdi’ nu fayleng​—ni nge fil ngak e girdi’ fare thin nib fel’ ko Gil’ilungun Got. (Luke 4:43) Bochan e re n’en ney, faanra ba t’uf ni ngam mel’eg reb e thin ni fan ni ngam dag rogon e machib ni i tay Jesus, ma baga’ ni ngam mel’eg fare bugithin ni “t’ufeg,” fa? (Kolose 1:15; 1 John 4:8) T’ufeg rok Jesus ni fan ko Chitamangin nu tharmiy’, ni Jehovah, e th’abi gel. (John 14:31) Machane, Jesus, ni ir reb e sensey e ku ki dag e t’ufeg rok u l’agruw e kanawo’. I dag nib t’uf e thin nriyul’ ni ke fil ngak e girdi’ rok, mab t’uf e girdi’ rok. Ngarda tedan’dad ko gali n’en ney ni bang ko n’en ni dag ngodad.

Reb e T’ufeg ni Ke N’uw Nap’an ko Fapi Thin Riyul’ Rok Got

4. Mang e ke rin’ Jesus me t’uf fapi machib ni yib rok Jehovah u wan’?

⁴ Rogon ngongolen nge lem rok reb e sensey ko pi n’en ni be fil ko girdi’ e rib ga’ angin ni ra yib nga felngin e sensey ni be tay. Ra m’ug ni faanra gathi ri baadag e thin ni be weliy murung’agen ma baga’ ni ra af ngak e en ni be fil ban’en ngak. Jesus e rib t’uf rok e thin riyul’ u murung’agen Jehovah nge Gil’ilungun. Rib t’uf rok Jesus ko pi n’ey. Me yog rok ni nge gelnag e re t’ufeg ney u nap’an ni ka yibe fil ban’en ngak. N’umngin nap’an ni immoy u m’on ni dawori mang girdi’, ma Fak Got ni kari maagirag e ri baadag ni nge fil ban’en. Bay ko Isaiah 50:4, 5 boch e thin nrib puluw ni be gaar: “Somol ni Got e ke tay nga l’ugunag e thin ni nggog, ya nge yog ni gu pi’ e athamgil nga laniyan’ e piin ni ke mulan’rad. Gubin e kakadabul ni ma gagiyegnageg nge pasigan’ug ni nggu motoyil ko n’en ni nge weliy ngog. Somol e ke tamilangnag an’ug, ma dawor gu togopuluw ngak ara gu pi’ keru’ug ngak.”

5, 6. (a) Nap’an ni yibe taufenag Jesus ma ri mang e n’en ni ke buch rok, ma mang angin ni keb ngak? (b) Mang e bathil u thilin Jesus nge Satan u rogon ni yow ma fanay e Thin rok Got?

⁵ Nap’an ni be ilal Jesus i yan nib girdi’ u fayleng, me par nib t’uf e gonop rok Got rok. (Luke 2:52) Ngemu’ u nap’an ni yibe taufenag, me buch rok ban’en nrib thil. “Me mab e tharmiy,” rogon ni yog ko Luke 3:21. Ba tamilang ni ngiyal’ nem, me yib ngan’ Jesus e yafas rok u m’on ndawori yib nga fayleng nib girdi’. Ma tomur riy me par u daken e ted u lan 40 e rran ni de abich. Baga’ ni keb e falfalan’ ngak nib gel ni be fal’eg i lemnag e thin ni ke fil Jehovah ngak ni boor yay. Machane, de n’uw nap’an u tomren, min skengnag e t’ufeg rok ko thin riyul’.

⁶ Nap’an ni ke magar ma keb e bilig ngak, me guy Satan rogon ni nge wawliy laniyan’ ko kireb. Rib thil rarogon e gali fak Got ney! Yow l’agruw ni kar fanayew e thin nu Bible ni Hebrew Scriptures​—machane ri de taab rogon e lem rorow riy. De puluw u rogon ni i fanay Satan e Thin rok Got, ma dariy e tayfan rok u rogon ni be fanay e re n’ey ni fan ni nge gelnag e tin nib m’agan’ ngay. Riyul’, ni cha’ nem ni tatogopuluw e ke mus ni be dariy fannag e thin riyul’ ni yib rok Got. Ma ban’en nib thil riy, e i fanay Jesus e Thin nu Bible nrib gagiyel nib t’uf rok, ni be fanay e Thin rok Got nib fel’ rogon u urngin yay ni ma pi’ e fulweg. Immoy Jesus u m’on ni dawor ni yoloy fapi thin ni kan thagthagnag, yugu aram rogon me dag nri be tayfan. Aram e thin riyul’ ni yib rok e Chitamangin nu tharmiy! I yog ngak Satan ni pi thin nem ni yib rok Jehovah e kab ga’fan ko ggan u wan’. (Matthew 4:1-11) Arrogon, urngin e thin riyul’ ni ke fil Jehovah ngak Jesus e rib t’uf rok. Machane, uw rogon ni i dag e re t’ufeg nem ko maruwel rok ni ir reb e sensey?

T’ufeg ni Fan ko Fapi Thin Riyul’ ni I Machibnag

7. Mang fan ni de fal’eg Jesus tirok e machib?

⁷ T’ufeg rok Jesus ni fan ko thin riyul’ ni be fil ngak e girdi’ e be m’ug ni gubin ngiyal’. Ra ngan lemnag, ma sana rib mom ni nge sunmiy ban’en ni kemus ni lem rok. Ya baga’ e tamilangan’ nge gonop rok. (Kolose 2:3) Yugu aram rogon, ma i puguran biyay nge biyay ngak e piin ni ma motoyil ngak ni urngin ban’en ni ke fil ngorad e de yib rok, ya ke yib rok e Chitamangin nu tharmiy. (John 7:16; 8:28; 12:49; 14:10) Rib pag feni t’uf e thin riyul’ ni yib rok Got rok ni dabiyog ni nge thiliyeg ko tin ni be lemnag.

8. Ngiyal’ ni ke tabab ko machib, ma uw rogon ni dag Jesus ni ngan tor ko Thin rok Got?

⁸ Nap’an ni tabab Jesus i machibnag e girdi’ ni yoor, ma chi ngiyal’ nem e i dag e n’en ni ngan rin’. Mu lemnag e n’en ni ke rin’ ni som’mon me machibnag ngak e girdi’ rok Got ni ir fare Messiah ni kan micheg. Ke mus ni ke m’ug u p’eowchen e girdi’, me yog ni ir Kristus, me fal’eg e maangang ni yira ngat ngay ni fan ni nge dag ni riyul’ e n’en ni ke yog? Dangay. I yan nga reb e tafen e muulung, ni aram e gin ni bay e girdi’ rok Got riy ni yad ma bieg e Thin rok ni gubin ngiyal’. Mu rom e ke bieg e yiiy ni bay ko Isaiah 61:1, 2 me weliy ni pi thin riyul’ ney ni kan yiiynag e be weliy murung’agen. (Luke 4:16-22) Ma fapi maangang ni ke fal’eg e ke ayuweg ni nge tamilang ni bay Jehovah ni be ayuweg. Yugu aram rogon, ma be par ni be taga’ nga daken e Thin rok Got u nap’an ni be fil ban’en ngak e girdi’.

9. Nap’an ni be rin’ ban’en ngak fapi Farise, ma uw rogon ni dag Jesus e t’ufeg rok nib yul’yul’ ko Thin rok Got?

⁹ Nap’an ni keb e pi toogor rok Jesus ni ngar skengnaged, ma de athamgil ni nge dag ngorad ni kab ga’ e llowan’ rok ngorad, ni yugu aram rogon nib mom ni nge gel ngorad ko maluagthin. Tin ni i rin’, e pag ni Thin rok Got e nge micheg ngorad nde riyul’ e n’en ni ka rogned. Ni bod ni, mu lemnag ba ngiyal’ ni fapi Farise e ka rogned ni pi gachalpen Jesus e kar th’abed fare motochiyel ko Sabbath ya kar t’ared wom’engin boch fapi woldug ngar ked u nap’an ni yad be yan u but’. Me fulweg Jesus ni gaar: “Dawor mbieged murung’agen e n’en ni rin’ David ko fa ngiyal’ nem ni faani yib e bilig riy ngak nge piin ni yad be un ngak?” (Matthew 12:1-5) Riyul’, pi cha’ nem ni be lemnag ni yad ba mat’aw e baga’ ni ka ra bieged e thin ni kan thagthagnag ni bay ko 1 Samuel 21:1-6. Ere faanra aram rogon, ma de yog rorad ni ngar nanged fan e tin baga’ fan ko fapi thin ni ba’ riy. Machane, Jesus e gathi kemus ni ke bieg e pi thin nem ya boor e ke rin’. Me fal’eg i lemnag me tay e tin nib ga’ fan riy nga gum’irchaen. Baadag kenggin e motochiyel ni i fil Jehovah u daken e pi thin rok nem. Ere ke fanay e pi thin nem, nge boch ban’en ni bay ko fare Motochiyel ni kan pi’ ngak Moses, ni fan ni nge dag ni fare Motochiyel e ba thabthabel. Maku arrogon e t’ufeg rok Jesus ko Thin rok Got nib yul’yul’ me k’aring ni nge yororiy e thin rok Got nge dabiyog ko pi tayugang ko teliw ni ngar chefeged ko tin ni nge fel’ ngorad ni de puluw fa ra mithaged nga fithik’ e pi yalen ko girdi’ ni ma balyangan’ e girdi’ ngay.

10. Uw rogon ni i lebuguy Jesus e pi yiiy u murung’agen feni fel’ rogon ni ma fil ban’en ngak be’?

¹⁰ T’ufeg rok Jesus ko tin be fil e dabi pag ni nge fil ngak e girdi’ e pi n’en ndabi fal’eg i lemnag ko som’mon, ara kanawo’ ni ma k’aring e chachalban ara ke mus ni ma rin’ ban’en ni bod e masin. Boch e yiiy ni kan thagthagnag e ke yog ni ra non fare Messiah ni ‘bay ban’en u daken dap’i l’ugun ni baadag e girdi’,’ ma ma fanay e “thin nib fel’ u wan’ e girdi.” (Psalm 45:2; NW, Genesis 49:21, NW) I lebuguy Jesus e pi yiiy nem me athamgil ni nge weliy e thin nra pug e tafinay rok e girdi’ mab fas, ma ma fanay e “thin nib fel” u nap’an ni be fil e thin riyul’ nrib adag ngak e girdi’. (Luke 4:22) Dariy e maruwar riy ni pasig rok e ke m’ug u owchen, me tamilang lan owchen ya rib fel’ e thin ni be machibnag u wan’. Ri ma k’aring e felfelan’ ni ngan motoyil ngak, ma rib fel’ ni ngad folgad riy u nap’an ni gad ra yog ngak yugu boch e girdi’ e n’en ni kad filed!

11. Mang fan ni salap ni immoy rok Jesus ni ir reb e sensey e de k’aring ni nge tolang laniyan’?

¹¹ Ke tolangan’ Jesus ya boor e thin riyul’ rok Got ni manang ma ma non nrib fel’ lingan fa? Aram e n’en ni baga’ ni ma buch rok fapi sensey. Machane, dab mu pagtalin, ni Jesus e ir be’ nib gonop u kanawoen Got. Ma gonop ni aram rogon e der ma pag nge gel e lem ni tolang, ya bochan “piin nib moding e ba gonop.” (Proverbs 11:2, NW) Ka bay taa ban’en ni i taleg Jesus ni nge dabi mang girdi’ nib ufanthin ara tolangan’.

Ba T’uf Rok Jesus e Girdi’ ni Ke fil Ban’en Ngorad

12. Uw rogon ni dag Jesus ni dabun ni nge rus pi gachalpen nbochan?

¹² T’ufeg rok Jesus ngak e girdi’ nib gel e m’ug u nap’an ni be fil ban’en ngorad. Rogon ni ma fil ban’en ngak e girdi’ e der ma k’aring e marus ngorad, de taareb rogon ko girdi’ nib ufanthin. (Eklesiastes 8:9) Tomren ni ke guy Peter e pi maangang ni ke fal’eg Jesus, me ngat ngay nrib gel, me ragbug nga but’ u puluwon bugun Jesus. Machane dabun Jesus ni nge rus e pi gachalpen ngak. Me non u fithik’ e gol ni gaar, “Dab mu tamdaggad” miki yog ngak Peter murung’agen e maruwel ni rib fel’ ni ngan pingeg e girdi’ ngar manged pi gachalpen nra un Peter ngay. (Luke 5:8-10) Baadag Jesus ni t’ufeg rok pi gachalpen ko tin riyul’ u murung’agen Got ni baga’ fan e ra k’aringrad, ma gathi bochan ni kar rusgad ko sensey rorad.

13, 14. Mang boch e kanawo’ ni dag Jesus e runguy rok ni fan ko girdi’?

¹³ T’ufeg rok Jesus ngak e girdi’ ni ke fil ban’en ngorad e ke m’ug ko runguy ni dag ngorad. “Ma faani guy e pi girdi’ nem ni aram urngirad, me taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf ndemoy rorad e en ni ma gafaliyrad.” (Matthew 9:36) Me runguyrad nbochan kar gafgowgad ma baadag ni nge ayuwegrad.

¹⁴ Mu lemnag e taganan’ ni dag Jesus u yugu reb e tayim. Nap’an ni fare pin nib molul e ke chuchugur ngak u fithik’ e girdi’ ni yoor me math ko mad rok, mu fithik’ e maangang me gol fare pin. Me thamiy Jesus fare gelngin ni ke chuw rok, machane de guy ko mini’ e ke gol. Me guy rogon ni nge pirieg fare pin. Mang fan? Gathi bochan ni nge puwan’ ngak ya ke th’ab fare Motochiyel ara boch e motochiyel rok fapi scribe nge Farise, ni sana aram tapgin ni be rus fare pin. De yodor, ya ke yog ngak ni gaar: “Fakag, michan’ rom ngak Got e ke golnigem. Mman ni ke pagan’um, ya kam gol ko m’ar rom nib gel.” (Mark 5:25-34) Mu lemnag e runguy ni dag u daken e pi thin nem. Gathi ke mus ni ke yog ni, “Ga ra gol.” De yodor, ya ke yog ni gaar: “Ga ra gol ko m’ar rom nib gel.” Be fanay Mark u roy fare thin ni rayog ni nge yip’ fan e “yibe li’,” ni aram ngan li’ nib gel ni be yip’ fan ni ngan gafgownagey. Ma aram, manang Jesus ni fare m’ar ni keb ngak e ke gafgownag, sana ke amithnag dow nge lem rok. Me runguy fare pin.

15, 16. Mang e n’en ni buch u nap’an ni be un Jesus ko machib ni be dag ni be changar ko tin nib fel’ rok e girdi’?

¹⁵ Maku ke dag Jesus e t’ufeg rok ngak e girdi’ ya be sap ko tin ba fel’ ni bay rorad. Mu lemnag ko mang e ke buch u nap’an ni ke mada’nag Nathanael, ma tomuren e ke mang reb e apostal. “Ma faani guy Jesus Nathanael ni be yib i yib ngak, me weliy murung’agen Nathanael ni gaar, ‘Cha’ney e riyul’ ni ir be’ u Israel, ni be’ nrib yul’yul’.’” U fithik’ e maangang me guy Jesus gum’irchaen Nathanael, ma aram e kari nang murung’agen. Riyul’, ni Nathanael e dawori chuchugur ni nge flont. Bay thibngin, ni bod gadad. Tin riyul’ riy, e nap’an ni ke rung’ag murung’agen Jesus, me yog e thin nib gel ni gaar, “Rayog ni nge yib ban’en nib fel’ u Nazareth?” (John 1:45-51) Machane, u fithik’ urngin ban’en nrayog ni nga nog murung’agen Nathanael, me mel’eg Jesus riy e tin nib fel’ ni nge tiyan’ ngay, ni aram e ngongol ko cha’ nem nib yul’yul’.

¹⁶ N’en ni taareb rogon ngay, e nap’an fa cha’ ni ga’ rok e pi salthaw​—ni sana gathi girdi’ nu Israel, ya be’ nu Roma—​e ke chuchugur ngak Jesus me wenig ni nge golnag e sib rok nib m’ar, ma manang Jesus ni fapi salthaw e bay thibngirad. Ani ga’ ko salthaw ko ngiyal’ nem e baga’ ni som’mon ko yafas rorad ma ke sug ngongolen e cham, nge puog e racha’, nge liyor ni googsur. Yugu aram rogon, ma kari tiyan’ Jesus ko tin nib fel’​—ni aram e michan’ ko re pumoon nem nib gel. (Matthew 8:5-13) Boch nga ram, u nap’an ni be non Jesus ngak fa cha’ nib kireb ni kan tining nga balay e gek’iy ni immoy u chaaren, ma de puwan’ Jesus ngak fare moon nbochan e oloboch ni ke rin’ kafram machane i pi’ athamgil nga laniyan’ me yog e athap rok boch nga m’on. (Luke 23:43) Ri manang Jesus ni faanra ngan tay u awn’uy e kireb rok yugu boch e girdi’, ma kemus ni n’en ra rin’ e ra meewarnagrad. Dariy e maruwar riy ni maruwel ni tay ni be gay e tin nib fel’ ni ma rin’ boch e girdi’ e ra pi’ e athamgil nga laniyan boch e girdi’ ni boor ni ngar rin’ed boch ban’en ni ke fel’ boch.

Ke Ma’gan’ Ngay ni Nge Pigpig Ngak e Girdi’

17, 18. Nap’an ni fek fare maruwel ni ngeb nga fayleng, ma uw rogon ni dag Jesus nib m’agan’ ngay ni nge pigpig ngak yugu boch e girdi’?

¹⁷ Yugu reb ni ri be micheg feni gel e t’ufeg rok Jesus ngak e girdi’ e kari m’agan’ ngay ni nge pigpig ngorad. U m’on ni dawori mang e girdi’, ma Fak Got e i par nib fel’ e girdi’ u wan’. (Proverbs 8:30, 31) Jesus ni ir fare “Thin” rok Jehovah ara tayog e thin rok, e sana boor yay ni i rin’ ban’en ngak e girdi’. (John 1:1) Machane, bayang i fan e nge yog ni nge fil ban’en ngak e girdi’ ni ir e be non ngorad, ma aram “me pag e flaab rok ni gubin, nge yib i ngal’ nib tapigpig,” me pag e liw rok nib tolang u tharmiy. (Filippi 2:7; 2 Korinth 8:9) Nap’an ni immoy Jesus u fayleng, ma de lemnag ni ngan pigpig ngak. N’en nib thil riy, e yog ni gaar: “Ni bod e en Fak e Girdi’ nde yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matthew 20:28) Kari lebuguy Jesus e pi thin nem

¹⁸ I pi’ Jesus e tin nib t’uf rok e piin ni ke fil ban’en ngorad u fithik’ e sobut’an, ma de maruwaran’ ni nge pi’ ir ni fan ngorad. Me un ko milekag u lan fare Binaw ni Kan Micheg ni ke mus ni yibe yan u but’ ni bokum miriay e mile palgin ni be athamgil ni nge machibnag e girdi’ ni boor nrogon nrayog rok. Ma de taareb rogon ko piin Farise nge scribe nib tolang lanin’rad, me par nib sobutan’ ma mom ni ngan chuchugur ngak. Urngin mit i girdi’ ni bod e​—piin nib tolang e liw rorad, nge fapi salthaw, nge fapi lawyer, nge piin ppin, nge piin bitir, nge piin nib gafgow, nge girdi’ nib m’ar, ni mus ko girdi’ ni kan dabuyrad—​ma de maruwaran’rad ni nguur chuchugurgad ngak, ma dar rusgad. Yugu aram rogon ni Jesus e ir be’ nib flont, ma ma magar ma ma yib e bilig ngak. Machane, mus nga nap’an ni ke magar ara ba t’uf ni nge toffan boch ara tayim ndariy lingan ban’en ni fan ni nge meybil, i m’oneg e tin nib t’uf rok yugu boch e girdi’ ko tirok.​—Mark 1:35-39.

19. Uw rogon ni dag Jesus rogon ni nge sobut’an’, ma nge gum’an’, ma nge gol ngak pi gachalpen?

¹⁹ Maku ba m’agan’ Jesus ngay ni nge pigpig ngak pi gachalpen. Ma fil ban’en ngorad u fithik’ e gol nge gum’an’. Ngiyal’ nib mo’maw’ ni ngara nanged fan boch e kenggin e machib nib ga’ fan, ma de tal, ma de yib e damumuw ngak, ma de puwan’ ngorad. Me par ni be gay e kanawo’ ni ngar nanged fan. Ni bod ni, ngam lemnag n’umngin nap’an ni i maluagthin biyay e pi gachalpen ko mini’ e th’abi tolang u fithik’rad. Biyay nge biyay, ke mada’ ko ngiyal’ ni taw ko fare nep’ u mo’n ni daworni li’ Jesus ngem’, ma ke pirieg boch e kanawo’ nib biech ni nge fil ban’en ngorad nge rogon ni nge rin’ ban’en ngorad u fithik’ e sobut’an. Ma rogon ni ngan dag e ngongol ni sobut’an’, ni taareb rogon ko urngin ban’en, mab puluw ni nge yog Jesus ni gaar: “Kug dag ngomed e n’en ni nguum rin’ed ngomed.”​—John 13:5-15; Matthew 20:25; Mark 9:34-37.

20. Mang kanawo’ ko ngan fil ban’en ngak e girdi’ e be dag nib thil Jesus ko fapi Farise, ma mang fan ni ba’ angin?

²⁰ Mu lemnag ni gathi ke mus ni ke yog Jesus ngak pi gachalpen ko mang e n’en ni ngan fol riy; ya ke “dag e n’en ni ngan rin’.” Ke fil ngorad u daken e tin ni ke rin’. De non ngorad u kanawo’ ni ngar thamiyed ni ir be’ nrib tolang, ni be lemnag ni de t’uf ni nge fol ko n’en ni be yog ngorad ni ngar rin’ed. Aram e n’en ni ma rin’ fapi Farise. “Yad ma yog machane dara folgad,” aram rogon ni yog Jesus murung’agrad. (Matthew 23:3) I dag Jesus u fithik’ e sobut’an’ ngak e piin ni be machibnag ko ri mang e be yip’ fan ko thin ni ke fil ngorad ma aram ke fol riy. Ere nap’an ni ke fonownag e pi gachalpen ni ngar momnaged e yafas rorad ma dabi pag ni nge magawonnagrad chogowen e chugum, ma de t’uf ni ngar sananaged ko mang fan e n’en ke yog. Rayog ni ngar guyed feni riyul’ e thin rok: “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.” (Matthew 8:20) I pigpig Jesus ngak pi gachalpen ma aram e ke dag ngorad e n’en ni thingar ur rin’ed.

21. Mang e yira weliy ko bin migid e article?

²¹ Ba tamilang, ni Jesus e ir e Sensey nth’abi fel’ ni i par u fayleng! T’ufeg rok ko tin ke fil ngak e girdi’ nge t’ufeg rok ngak e girdi’ ni be machibnag e ke gagiyel ngak e girdi’ nib yul’yul’ ni kar guyed ma kar rung’aged. Maku chiney e ba gagiyel e re n’eney ngak e piin ni ma fil e tin ni dag ni ngan rin’. Ere uw rogon, ma rayog rodad ni ngad folgad ko tin ni dag Jesus nrib fel’? Bin migid e article e ra weliy murung’agen e re deer nem.

Uw Rogon ni Ngam Pi’ e Fulweg?

• Mang e def ko ngan fil ban’en ngak e girdi’ nib fel’ rogon, me mini’ e ke dag?

• Mang boch e kanawo’ ni i dag Jesus nib t’uf rok e thin riyul’ ni ke fil ngak e girdi’?

• Uw rogon ni dag Jesus nib t’uf e girdi’ ni ke fil ban’en ngorad rok?

• Mang boch ban’en ni be dag nib sobutan’ Jesus mab m’agan’ ngay ni nge pigpig ngak e piin ni ke fil ban’en ngorad?

[Picture on page 8]

Uw rogon ni dag Jesus nib t’uf e pi kenggin e motochiyel ni bay ko Thin rok Got rok?