Jesus Kristus​—Ir Fare Missionary Nth’abi Ga’

“Gu manang e cha’nem, ya gub rok me ir e ke l’ugeg.”​—JOHN 7:29, NW.

1, 2. Mange missionary, me mini’ e rayog ni nga nog ni bin nth’abi gilbuguwan e Missionary?

MANGE ra yib ngan’um ni gara rung’ag fare bugithin ni “missionary”? Boch e girdi’ e ma lemnag e missionary ko pi yurba’ i teliw ni Kristendom, ni boor i yad e ma un ko ngongolen e politics nge rarogon e par ko nam ni yad be pigpig riy. Machane, faanra gur reb e Pi Mich Rok Jehovah, ma gara lemnag e pi missionary nike pi’ fare Governing Body ni ngar machibniged fare thin nib fel’ ko pi nam u fayleng i yan. (Matt. 24:14) Pi missionary ney e kar ognaged yad ni ngar ayuweged e girdi’ ngar chugurgad ngak Jehovah Got me ri fel’ e tha’ u thilrad Got.​—Jas. 4:8.

² Fare bugithin ni “missionary” nge “pi missionary” e dariy ko kenggin e thin ko Bible ni New World Translation of the Holy Scriptures. Machane, footnote ko Efesus 4:11, ko fa ken ni ga’ ken e New World Translation of the Holy Scriptures ni fare Reference Bible e be yog ni fare thin ni Greek ni kan pilyeg ni “tamachib” e ku rayog ni nga nog ni “pi missionary.” Me Jehovah e ire bin nth’abi gilbuguwan e tamachib, machane dabiyog ni nga nog ni bin th’abi gilbuguwan e Missionary, ya dariy be’ ni l’og. I weliy Jesus Kristus murung’agen e Chitamangin nu tharmiy ni gaar: “Gu manang e cha’nem, ya gub rok me ir e ke l’ugeg.” (John 7:29, NW) I dag Jehovah gelngin e t’ufeg rok u daken Fak ni kari maagirag rok ni l’og nga fayleng. (John 3:16) Ere rayog ni nga nog ni Jesus e bin nth’abi gilbuguwan e Missionary, nge bin nth’abi fel’ e Missionary, ya reb i fan e kan l’og nga fayleng ni nge “weliy murung’agen e tin riyul’.” (John 18:37) Rib fel’ rogon ni wereg fare thin nib fel’ ni murung’agen fare Gil’ilungun, ma fel’ngin ni yib e ka gad be fanay e ngiyal’ ney. Bod rogon ni, ka gad be fol u rogon ni i machib ni yugu demtrug ko kan l’ogdad nga bang ni missionary fa danga’.

3. Mang boch e deer ni gad ra weliy?

³ Maruwel rok Jesus ni nge wereg murung’agen fare Gil’ilungun e k’aring boch e deer ni: Mange i mada’nag Jesus u nap’an ni i machib u fayleng? Mang fan nib manging’ e tin ni i fil? Ma mange rin’ me fel’ rogon e machib ni i tay?

Ba M’agan’ ni Nge Machib ko Yu Gin nib Beech Ngak

4-6. Mang boch ban’en nib thil ni mada’nag Jesus u nap’an ni kan l’og nga fayleng?

⁴ Boch e missionary e ngiyal’ ney nge boch e Kristiano e ke m’agan’rad ngay ni nga ranod ko gin nib t’uf ni ngan machibnag fare Gil’ilungun riy nsana ba t’uf ni ngar mechamgad nga rarogon e par ni gathi rib fel’ rogon ni bod e gin ni ur moyed riy. Machane ri dabiyog ni ngad susunnaged e thil u thilin rarogon Jesus u fayleng nge nga rogon u tharmiy, ko gin ni i par riy ko Chitamangin u fithik’ e pi engel ni ur pigpiggad nib machalbog ngak Jehovah. (Job 38:7) Rib thil ni ngan par u fithik’ e girdi’ ntadenen u ba fayleng ndariy e yul’yul’ riy! (Mark 7:20-23) Ki k’adan’ Jesus u fithik’ pi gachalpen ni ur maluagthingad. (Luke 20:46; 22:24) Riyul’, ni boor ban’en ni i mada’nag Jesus u fayleng machane maruweliy nib fel’ rogon.

⁵ De tabab Jesus ni nge nang e thin ko girdi’ u daken e maang’ang; ya i fil u nap’an ni kab bitir. Rib thil nga rogon nima yog e thin rok e pi engel nu tharmiy! U fayleng e i fanay Jesus gonap’an taareb e ‘thin ko girdi’.’ Rib gel e thil riy ko ‘thin ko pi engel.’ (1 Kor. 13:1) Ma faanra ngan welthin nib fel’ rogon, ma dariy be’ nima non ni bod Jesus.​—Luke 4:22.

⁶ Ngan lemnag rogon ni thil boch ban’en rok fak Got u nap’an ni yib nga fayleng. Aram rogon nde af e denen rok Adam ngak Jesus, Me mang reb e girdi’, ni bod fa piin nra manged “pi walagen,” ara pi gachalpen ni kan dugliyrad. (Mu beeg e Hebrews 2:17, 18.) Fare nep’ i n’en ntomur ko yafas rok u fayleng, ma de yog Jesus ngak e Chitamangin ni nge l’og e “engel ngar bad nib pag ragag nge l’agruw ulung.” Machane am lemnag fapi engel ni ba’ mat’awun ni nge yog e n’en ni ngar rin’ed ya ir Mikael ni Pilungen e Engel! (Matt. 26:53; Jude 9) Arrogon, i rin’ Jesus e maang’ang; machane, pi n’en ni i rin’ u fayleng e ba lich oren ni yira taarebnag ko tin nra rin’ ni faan manga par u tharmiy.

7. Uw rogon e ngongol rok piyu Jew nib l’ag rogon ko fare Motochiyel?

⁷ Nap’an dawori mang girdi’ ma ir “fare Thin,” ya rayog ni nga nog ni ir Mitethin rok Got ni ir faanem ni i pow’iy piyu Israel u daken e ted. (John 1:1; Ex. 23:20-23). Yugu aram rogon, ni yad e ‘ni pi’ e motochiyel rok Got ngorad, ni engel rok Got e yib i pi’ machane [dar] folgad riy.’ (Acts 7:53; Heb. 2:2, 3) Ya bin nriyul’ riy e, fapi tayugang’ ko teliw nu Jew ko bin nsom’on e chibog e dar nanged fan fare Motochiyel. Ni bod rogon, fare motochiyel ko Sabbath. (Mu beeg e Mark 3:4-6.) Fapi tamachib ko motochiyel nge pi Farise e ‘darur folgad ko tin ri ba ga’ fan ni be yog e Motochiyel, ni bod e mat’aw nge runguy nge yul’yul’.’ (Matt. 23:23) Yugu aram rogon, ma de tal Jesus i weliy e tin nriyul’.

8. Mang fan ni ma yib Jesus i ayuwegdad?

⁸ Jesus e baadag ni nge pi’ e ayuw. T’ufeg rok ngak e girdi’ e ma k’aring ni nge ayuwegrad nib m’agan’ ngay. Maku der malmal ko machib. Machane bochan e yul’yul’ rok ku Jehovah u nap’an ni immoy u fayleng, me “thapeg e girdi’ ngak Got ngar pired rok ndariy n’umngin nap’an, ni urngin e piin ni yad be fol rok.” Maku ma “ayuweg e piin [ni bod gadad] ni ke yib ngorad e n’en ni ma waliy e girdi’ nge denen, yi ir ma ki yib ngak e n’en ni ma waliy e girdi’ nge denen, ma ki un ko gafgow.”​—Heb. 2:18; 5:8, 9.

Kan Skulnag Nreb e Sensey

9, 10. Mange miti skul ni kan fil ngak Jesus u m’on ni ngan l’og nga fayleng?

⁹ Ngiyal’ ney, e fare Governing Body e ma yarmiy ni ngan skulnag e pi Kristiano u m’on ni ngan pi’rad nga bang ni missionary. Me Jesus Kristus, kun skulnag, fa? Arrogon, machane de un ko skul ko teliw nu Jew u m’on ni ngan dugliy ni nge mang Messiah; maku de skulnag boch e tayugang’ ko teliw nib gilbuguwan. (John 7:15; mu taarebnag ko Acts 22:3.) Ere, mang fan nrayog ni nge machib Jesus nrib fel’ rogon?

¹⁰ Yugu aram rogon ni bay boch ban’en ni ke fil Jesus ko chitiningin ni Maria, nge en ni pof ni Josef, ni Chitamangin, ma ke yog ngak e bin th’abi ga’ fan e skul ko machib ni yib ko en ni Th’abi Tolang, ni Jehovah. I weliy Jesus murung’agen e re n’ey, ni gaar: “Dawor gu weliy ban’en ni gag e gu lemnag, machane en ni Chitamangiy ni ir e ke l’ugeg ku gub e ir e ke yog ngog e tin nthingar gu weliy.” (John 12:49) Gara guy ni kan pi’ e fonow ngak faen Fak nib tamilang u rogon ni nge fil ban’en ngak e girdi’. U m’on ni nge yib nga fayleng, ma dariy e maruwar riy nib n’uw nap’an ni i motoyil ko fonow ko Chitamangin. Uw feni fel’ fare skul nike yog ngak?

11. Uw rogon ma ngongol rok Jesus ngak e girdi’ e ba taareb rogon ko ngongol rok e Chitamangin?

¹¹ Ka nap’an nni sunmiy, ma rib fel’ thilrow e Chitamangin. U m’on ni nge mang girdi’, ma i guy Jesus e ngongol rok Jehovah ngak e girdi’. T’ufeg rok Got ngak e girdi’ e m’ug rok Fak ni ke ni mada’ ko gin rayog ni nge gaar: “Gub felfelan’ ko fayleng ma ba fel’ u wan’ug e girdi’ ni ba’ riy.”​—Prov. 8:22, 31.

12, 13. (a) Uw rogon ni ke fil Jesus ban’en ko ngongol rok e Chitamangin ngak piyu Israel? (b) Uw rogon ni ke fanay Jesus e pin’en ni kan fil ngak?

¹² Fare skul ni kan tay ngak Fak e kub muun ngay ni nge yaliy rogon nima rin’ e Chitamangin ban’en ni faanra yib e magawon. Bod rogon e, n’en ni rin’ Jehovah ngak piyu Israel ni yad ba gelan’. Nehemiah 9:28 e be gaar: “Faani sul e gapas ngorad mi yad tabab ko denen bayay, ma ka ga pag [Jehovah] e pi toogor rorad bayay ngar gelgad ngorad ko mahl. Ma faan ra kolgad ngan’rad ngar pied keru’rad ko denen mi yad wenig ngom ni ngam ayuwegrad, ma ga rung’ag lamrad nga tharmiy mu um chuwegrad bayay nge bayay u pa’ e toogor rorad ni bochan e ri ba ga’ e runguy rom ngorad.” Rogon ni i dag Jehovah e runguy ko girdi’ e ku aram e n’en ni i rin’ Jesus ko gin ni i machib riy.​—John 5:19.

¹³ I maruwel Jesus ko tin nike fil ni i dag ngak pi gachalpen nima runguyrad. Fare nep’ u m’on ni nge yim’, ma urngin fapi apostal nri yad ba t’uf rok e “ra digeyed ngar milgad.” (Matt. 26:56; John 13:1) Mus ngak apostal Peter ma dalip yay ni yog nde nang Kristus! Yugu aram rogon, me tay ni kab mab e kanawo’ ngorad ni ngar sulod ngak. Me yog ku Peter ni gaar: “Kug yibiliyem ngak Got, i gur Simon, ni rogon nib michan’um ngak Got e dabi mul. Ma faan ga ra sul ngog, ma thingar mpi’ e gel nga laniyan’ pi walagem.” (Luke 22:32) Fare Israel rok Got e rib fel’ rogon ni kan tay nga daken e “pi apostal nge pi profet,” ma fare malang ni ir e def ko fare yoror ko Fa bin ni Beech e Jerusalem e bay fithingan fa 12 i apostal riy ni yad ba yul’yul’ ngak fare Fak e Saf, ni Jesus Kristus. Ke mada’ ko chiney, ma Kristiano ni kan dugliyrad e kar chaggad ko piin ni kar ognaged yad ni yad, “yugu boch e saf” yad be mon’og ni yad ba ulung i tamachib ko Gil’ilungun u tan pa’ Got nib gel nge gagiyeg rok Fak nrib t’uf rok.​—Efe. 2:20; John 10:16; Rev. 21:14.

Rogon ni Ma Skulnag Jesus e Girdi’

14, 15. Mang kanawo’ nib thil e machib rok Jesus riy ko pi tamachib ko motochiyel nge pi Farise?

¹⁴ Uw rogon ni i fil Jesus ngak pi gachalpen e pi n’en ni kan fil ngak? Nap’an ni gadra taarebnag rogon ni i fil Jesus ban’en ngak e girdi’ nge rogon ni i fil e pi tayugang’ ko teliw nu Jew ban’en, ma rib tamilang ni kab fel’ rogon nima fil Jesus ban’en ko girdi’. Pi tamachib ko motochiyel nge pi Farise e kar ‘n’iged e thin rok Got kar folgad ko tin ni yad e ra sunumiyed.’ Ba thil, ya tin ni ma yog Jesus e gathi ir e ke sum rok, ya thin rok Got. (Matt. 15:6; John 14:10) Aram e n’en nib fel’ ni ngaud rin’ed.

¹⁵ Ku reb e kari gelnag e thil rok Jesus nge pi tayugang’ ko yurba’ i teliw. I weliy murung’agen e pi tamachib ko motochiyel nge pi Farise ni gaar: “Mfolgad mi gimed rin’ gubin ban’en ni ka rogned ngomed ni ngam rin’ed; machane dab mfolgad ko tin ni yad be rin’, ya darir rin’ed e tin ni yad be machibnag.” (Matt. 23:3) Jesus e ma fol ko tin ni ke fil. Ngad guyed ban’en ni ke micheg nib riyul’ ere n’ey.

16. Mang fan nrayog ni nga mog ni i par Jesus nib puluw ko thin rok ni bay ko Matthew 6:19-21?

¹⁶ I tay Jesus ir ngak pi gachalpen ni ngar “ulunguyed e flaab rorad nga tharmiy.” (Mu beeg e Matthew 6:19-21.) I rin’ Jesus ni aram rogon, fa? Arrogon, ya riyul’ ni weliy murung’agen ni gaar: “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.” (Luke 9:58) I par Jesus nde yoor ban’en rok. Ma par ni boor pa’ u puluwon ni be machibnag e thin nib fel’ ni murung’agen fare Gil’ilungun, ma be dag rogon ni nge dabi magafan’uy nbochan e flaab nu fayleng. Ma weliy feni fel’ ni ngan ulunguy e flaab nga tharmiy, ko gin “dabi kirebnag e ngal nge t’ay, ma dabi yib e moro’ro’ nga naun nge iring.” Gimed be fol ko pi n’en ni ke tay Jesus chilen ni ngan ulunguy e flaab nga tharmiy, fa?

Pi Fel’ngin ni Adag e Girdi’ Daken Jesus Riy

17. Mang boch fel’ngin Jesus ma ke mang be’ nib cheg ko machib?

¹⁷ Mang boch fel’ngin Jesus ni k’aring nge mang be’ nib cheg ko machib? Reb e rogon e ngongol rok nima ayuweg e girdi’. Ma u fithik’ e pi fel’ngin Jehovah nem nib fel’ ni be m’ug rok Jesus e sobut’an’, nge t’ufeg, nge runguy. Rayog nim guy rogon ni chugurnag e pi n’ey e girdi’ ngak Jesus.

18. Mang fan nrayog ni nga nog ni Jesus e ba sobut’an’?

¹⁸ Nap’an ni ke m’agan’ ngay ni nge yib nga fayleng ni bay e n’en ni nge rin’, me “pag e flaab rok ni gubin, nge yib i ngal’ nib tapigpig. Mi ni gargeleg ni bod e girdi’, me m’ug ni bod rogon e girdi’.” (Fil. 2:7) Aram ngongolen e sobut’an’. Maku, dar ma dag Jesus ko girdi’ nib tolang ngorad. Dariy rok e binem e lem, de gaar ‘Ku gub u tharmiy, ere thingar ni motoyil ngog.’ Ba thil ko piin ni yad ma yog ni yad e messiah, ya de ufanthin Jesus nbochan e ir e bin nriyul’ e Messiah. Yu ngiyal’ e ma yog ko girdi’ ndab nog e tin ni ke rin’. (Matt. 12:15-21) Baadag Jesus ni girdi’ e nge turguy ni ngar leked nbochan e tin ni kar guyed. Ba tow’ath pi gachalpen ya Masta rorad e dar lemnag ni ngar boded e pi engel nib flont ni yad bay rok u tharmiy!

19, 20. Uw rogon ma t’ufeg nge runguy rok Jesus e k’aring ni nge ayuweg e girdi’?

¹⁹ Jesus Kristus e ku ma dag e t’ufeg​—ya aram e bin nth’abi ga’ fan ko fapi fel’ngin e Chitamangin u tharmiy. (1 John 4:8) Ma skulnag Jesus e girdi’ u fithik’ e t’ufeg. Bod rogon, ni gara lemnag laniyan’ ngak fare moon ni kab pagel ni be’ nib tolang. (Mu beeg e Mark 10:17-22.) Me changar Jesus ngak “ni ke runguy” ma baadag ni nge ayuweg, machane re moon nem e boor ban’en rok ndabun ni nge pag nge mang reb i gachalpen Kristus.

²⁰ Ku reb i fel’ngin Jesus e ma runguy e girdi’. Bod gubin e girdi’ nde flont, piin ni ur motoyilgad ko machib rok e piin ni ke tomal lanin’rad ko magawon. Manang Jesus ere n’ey, ma aram fan ni i skulnagrad u fithik’ e runguy nge kireban’. Ngan susunnag: Reb e rran nrib yoor pa’ u puluwon Jesus nge pi gachalpen ndariy ba ngiyal’ nrayog ni ngar toffangad riy ni mus ko abich. Machane, mange rin’ Jesus u nap’an ni guy fapi girdi’ ni boor ni kar muulunggad? “Me ri taganan’ ngorad, ya yad bod e saf nde moy e en ni ma gafaliyrad rorad. Ma aram me tabab i machibnag boor ban’en ngorad.” (Mark 6:34) I guy Jesus e gafgow ko girdi’ ko gin ni i machib riy me fanay gelngin nga i machibnagrad ma be fal’eg e maang’ang ni nge yib angin ngorad. Boch i yad e ra adaged e pi fel’ngin, me k’aringrad e thin rok, ngar manged pi gachalpen.

21. Mange gadra weliy ko bin migid e article?

²¹ Ka boor ban’en nrayog ni ngad filed u murung’agen e machib ni i tay Jesus u fayleng, bin migid e article e ra weliy. Ku mang boch e kanawo’ nrayog ni ngad folwokgad rok Jesus Kristus riy, ni bin nth’abi gilbuguwan e Missionary?

Uw Rogon ni Ga Ra Fulweg?

• Mange ke fil Jesus u m’on ni nge yib nga fayleng?

• Uw rogon ma rogon nima skulnag Jesus e girdi’ e kab fel’ nga rogon nima rin’ e pi tamachib ko motochiyel nge pi Farise?

• Mang bochi fel’ngin Jesus ni adag e girdi’?

[Picture on page 19]

Uw rogon ni i machibnag Jesus e girdi’ ni yoor?