Mu Folwok Rok fare Missionary Nth’abi Ga’

“Um folwokgad rog, ni bod rogon ni gu be folwok rok Kristus.”​—1 KOR. 11:1.

1. Mang fan ni ngarni folwok rok Jesus Kristus?

APOSTAL Paul e folwok rok fare Missionary nth’abi ga’, ni Jesus Kristus. Miki ta’ Paul ir ngak e piin ni walagen ni Kristiano ni gaar: “Um folwokgad rog, ni bod rogon ni gu be folwok rok Kristus.” (1 Kor. 11:1) Tomren ni ke dag Jesus ban’en ngak pi gachalpen ni ngar filed u rogon e sobut’an’, ni aram e sobut’nag ir nge lukuy rifrifen ayrad me gaar ngorad: “Kug dag ngomed e n’en ni nguum rin’ed ngomed, ya nge yog ni mrin’ed nri bod rogon ni ka fini gu rin’ ngomed.” (John 13:12-15) Gad e Kristiano e chiney e bay e maruwel ni ngad rin’ed ni ngad folwokgad rok Jesus Kristus u rogon e thin rodad nge ngongol rodad nge pi fel’ngin ni gad be dag.​—1 Pet. 2:21.

2. Yugu ra dawori dugliyem e Governing Body ni ngam mang missionary, ma mang ngongol e rayog ni ngam rin’?

² Fa bin m’on e article e kad filed riy nib missionary e be’ ni kan pi’ ke yan nib tamachib​—be’ nima fek i yib e thin nib fel’ ngak e girdi’. Bochan ere n’ey, me fith Paul boch e deer nib ga’ fan. (Mu beeg e Roma 10:11-15.) I fith fare apostal ni gaar: “Ma . . . ra diin mi yad rung’ag ni faanra danir machibnag e thin rok?” Ngemu’ me sul u daken e thin ko yiiy rok Isaiah ni gaar: “Rib manigil e wub ni ke tay e piin ni kar feked i yib e Thin Nib Fel’ ni yib rok Got!” (Isa. 52:7) Ku yug ra dawor ndugliyem bayay ni ngan piem ni missionary ngam maruwel u bang ni gathi nam rom, ma rayog ni ngeb e lem ngom ni ngam machib, ngam folwok rok Jesus ni gur reb e tamachib nib pasig ko fare thin nib fel’. Fa binem e duw ma, 6,957,852 e tamachib ko Gil’ilungun ni ‘ur machibgad’ u lan 236 e nam.​—2 Tim. 4:5.

“Kug Paged Gubin Ban’en Kug Uned Ngom”

3, 4. Mange pag Jesus nga tomur u tharmiy, ma mange thingar da rin’ed ma gad mang pi gachalpen?

³ Rogon me lebguy Jesus e n’en ni kan pi’ ngak ni nge rin’ u fayleng, e “pag e flaab rok ni gubin, nge yib i ngal’ nib tapigpig,” me pag nga tomur e yafas rok nge flaab rok nu tharmiy. (Fil. 2:7) Demtrug e n’en ni gadra rin’ u rogon ni gad be folwok rok Kristus, ma dabiyog i taareb rogonnag ko n’en ni ke rin’ Jesus ni yib nga fayleng. Machane rayog ni ngad pared ni gad ba mudugil ni gadad pi gachalpen ndab ud m’ad nbochan ni ngad sapgad nga tomur ko pin’en ni immoy rodad ko fayleng rok Satan.​—1 John 5:19.

⁴ Ba ngiyal’ e yog apostal Peter ngak Jesus ni gaar: “Kug paged gubin ban’en kug uned ngom.” (Matt. 19:27) Peter, Andrew, James, nge John e ba papey nra digeyed e nug rorad u nap’an nni piningrad ni ngar leked Jesus. Ra paged nga tomur e siyobay rorad ni fita’ mar ted e machib ni ir e maruwel rorad. Rogon ni bay ko Gospel rok Luke e, gaar Peter: “Am guy! Kug paged e tabinaw romad kug uned ngom.” (Luke 18:28) Boor i gadad e gathi kad ‘paged urngin ban’en rodad’ nga tomur nbochan e ngad leked Jesus. Machane, thingar da ‘paged fadad’ ma gad mang pi gachalpen Jesus ma gad mange tapigpig rok Jehovah u polo’ i gum’irchadad. (Matt. 16:24) Binem e kanawo’ e keb angin ntow’ath nrib fel’. (Mu beeg e Matthew 19:29.) Nge pasigan’uy ko machib ni yibe folwok rok Jesus e ma yibnag e felfelan’ nga gum’irchadad, nyugu aram rogon ni ke mus ni buchuuw e ayuw ni kad pied kad ayuweged be’ ke chugur ngak Got nge Fak nib t’uf rok.

5. Mu weliy ban’en ni buch nibe dag ko mange ra rin’ be’ u bang ni gathi nam rok u nap’an nra fil e tin nriyul’ u Bible.

⁵ Valmir, ni be’ u Brazil ni ma par nga lukngun yu Suriname, ni immoy ni be’ nima ker e gol. Immoy ni ir be’ nib tamuun rrum ma ma par nib kireb ngongolen e yafas rok. Immoy ba ngiyal’ u ba mach me tabab e Pi Mich Rok Jehovah i fil e Bible ngak. I fil e Bible ni gubin e rran, ma boor ban’en ni thilyeg u rarogon, made n’uw nap’an min taufenag. Nap’an ni guy ni maruwel rok era mo’maw’nag ni nge par nib puluw ko michan’ rok ni ka fini pirieg, me pi’ nchuway’ fare siyobay rok nima yib e salpiy riy ni boor, me sul nga Brazil ni nge ayuweg chon e tabinaw rok ngar nanged e tin nriyul’. Nap’an ni yira fil e tin nriyul’ u Bible, ma boor e girdi’ ni wasol nima adag ni ngar paged e pi nam nib fel’ rogon ngar sulod ko nam rorad ni kar lemnaged ni ngar ayuweged e girdi’ rorad nge ku boch e girdi’ ko tirok Got ban’en. Pi tamachib ko Gil’ilungun nem e yad ma dag ngongolen e machib nib riyul’.

6. Mange rayog ni ngad rin’ed ni faanra dabiyog ni nga darod ko gin nrib t’uf girdien e machib ko Gil’ilungun riy?

⁶ Boor e Pi Mich ni ka ranod ra pired ko yungi n’en nib t’uf e tamachib ko Gil’ilungun riy. Bochi yad e be machib u boch e nam nga wuru’ e nam rorad. Gadad rodad, e sana dabiyog rodad ni ngad rin’ed ni aram rogon, machane rayog nda folwokgad rok Jesus ni nguuda rin’ed urngin e tin nrayog rodad ni gubin ngiyal’.

Ma Pi’ Jehovah e Skul nib T’uf

7. Mange pi skul ni bay ni ngan skulnag e piin ni yad baadag ni ngar salapgad ko machib ko Gil’ilungun?

⁷ Ri bod rogon ni yog e skul ngak Jesus ni pi’ e chitamangin, e aram rogon nrayog ni nge fel’ rogodad ko skul ni be pi’ Jehovah e chiney. Jesus e gaar: “Pi profet e ra yoloyed ni lungurad, ‘Got e bayi machibnag urngin e girdi’.’” (John 6:45; Isa. 54:13) Chiney e, bay boch e skul nib ga’ ni kan ngongliy ni nge fal’eg rogodad ngad manged e pi tamachib ko Gil’ilungun. Ba mudugil ni gad gubin ni keb angin ngodad u reb e kanawo’ fa reb fare skul ni Theocratic Ministry School ni yima ta’ ko pi muulung rodad. Piin ni be pigpig ni polo’ e tayim rorad e ke bung rogorad ni ngar uned ko fare skul ni Pioneer Service School. Boor e girdi’ nima machib ni polo’ e tayim ni kar salapgad ma kar felfelan’gad ni kar uned ko re skul ney nike l’agruw yay. Ma piin piilal ko ulung nge ministerial servants e kar uned ko skul ni Kingdom Ministry School ni ngar salapgad i fil ban’en nge pigpig ni yad ma tay ngak pi walagrad ni Kristiano. Boor e piin ni piilal ko ulung nge ministerial servants ndariy leengirad ni kar uned ko skul ni Ministerial Training School, ni kar salapgad ni ngar ayuweged boch e girdi’ ko maruwel ni machib. Maku boor e pi walag ni pumoon nge piin ni kan pi’ e maruwel ngorad ni missionary u boch e nam ni gathi nam rorad ni kan skulnagrad ko fare Watchtower Bible School of Gilead.

8. Uw feni ga’ fan u wan’ boch e walag e pi skul nima pi’ Jehovah?

⁸ Boor e Pi Mich Rok Jehovah ni kar pithiged u puluwrad ya nge yog nra uned ko pi skul ney. I Yugu e tal ko maruwel rok nbochan e ning e matal rok ngak e boss rok ni nge un ko Ministerial Training School u Canada, ma de pi’ e boss rok e matal ngak. Me gaar Yugu, “Dag kalngan’ug riy. Riyul’ riy, e faan manga ra pied e matal ngog ndariy puluwog ni nge fel’ u wan’ug, ma sana yad ra lemnag ni nggu par ni gub yul’yul’ ko re company nem ndab kug chuw. Machane chiney e gu be par ndemtrug e maruwel nra yib rok Jehovah ngog ma ba puf rogog ni nggu rin’.” Ra nge fel’ rogoy ko skul nibe pi’ Got, ma boor e girdi’ nike fel’ u wan’rad ni ngar paged e n’en ni ur lemnaged nrib ga’ fan.​—Luke 5:28.

9. Mog reb e ban’en nibe dag feni manging’ e n’en nima fil e Bible nge maruwel nib gel.

⁹ Pi n’en nima fil e Bible nge chag ko maruwel nib gel e rib manging’. (2 Tim. 3:16, 17) Mu lemnag e n’en ni buch rok Saulo u Guatemala. Ni gargeleg nib sikirkireb lolugen, me yog reb e sensey rok ngak e chitiningin ndabi towasariy ni nge fil rogon e pow babyor, ya ra k’aring e chalban ngak. Ere pag Saulo e skul ma denang rogon e pow babyor. Machane, me fil reb e Mich e pow babyor ngak Saulo, ni fanay fa ke babyor ni Apply Yourself to Reading and Writing (Mfil Rogon e Pow Babyor nge Yol). Me munmun me mon’og Saulo nge taw ko gin nrayog ni nge pi’ e welthin ko Theocratic Ministry School. Me taaboch riy me mada’nag chitiningin Saulo fare pin nsensey rok Saulo u nap’an e machib u mit e tabinaw iyan. Nap’an ni rung’ag fare sensey rok Saulo ni ke nang e yol, me yog ni ngan fek Saulo nge un ko wub ko bin migid e wik. Me bin migid e wik, me fith fare sensey Saulo ni gaar, “Mange ngam fil ngog?” Me beeg Saulo reb e thin u lan fare babyor ni What Does the Bible Really Teach? (Mang e Ri Be Fil e Bible?) Me gaar fare sensey, “Der mich u wan’ug ni gabe skulnageg e chiney.” Ma daki k’adan’ fare pin meyor me yan i gumuchmuch ngak Saulo.

Machib ni Ma Bit’ nga Gum’irchaey

10. Mang talin e maruwel nth’abi fel’ ni gad be fanay ngad filed e tin nriyul’ u Bible ko girdi’?

¹⁰ I yiluy Jesus e n’en ni i fil ngak e girdi’ nga daken e pin’en ni fil e chitamangin ngak nge fonow ko Thin Rok Got ni bay ni kan yoloy. (Luke 4:16-21; John 8:28) Gad ma folwok rok Jesus ni gad be fol ko fonow rok ma gad chichiiy pa’dad ko thin nu Bible. Gad gubin ni nga i taareban’dad ko tin ni gad be weliy, ma re n’ey e ra ayuweg e taab girdi’ ni kad ted. (1 Kor. 1:10) Ri gad ba felfelan’ ni fare “tapigpig nib yul’yul’ ma ba gonop” ebe pi’ boch e babyor nib puluw ko Bible ni nge ayuwegdad nga i taareb e n’en ni gad be fil ko girdi’ ngad mu’naged e maruwel rodad ni machib! (Matt. 24:45; 28:19, 20) Baken e pi babyor ney e fare Bible Teach, ni kan piliyeg e chiney nga 179 mit e thin.

11. Uw rogon rebe walag nib ppin nu Ethiopia ni gel ko togopuluw nib ngak ni fanay fare babyor ni Bible Teach?

¹¹ Raun fil e Bible ni yibe fanay fare babyor ni Bible Teach maku rayog ni nge piningeg gum’irchaen e piin ni yad be togopuluw. Immoy reb e walag nib pin ni Lula fithingan, u Ethiopia nima machib u polo’ e tayim rok, ni i fil e Bible ngak be’ me yib reb e girdi’ rok facha’ ni yibe fil e Bible ngak nga naun nrib pay me yog ngorow ndabkur filew e Bible. Me non Lula ngak nrib gapas ni fanay fare fanathin ni murung’agen fa yungi salpiy nde riyul’ ni yibe fal’eg ni bay murung’agen ko guruy ni 15 ko fare babyor ni Bible Teach. Me gapas fare pin me pagrow ngar ul’ulgow ko fol Bible. N’en ni rin’ e yay ni migid ni ngar filew e Bible, me yib fare pin me yog ni ngan fil boche Bible ngak ni yog nra pi’ puluwon! De n’uw nap’an me tabab i fil e Bible ndalip yay u reb e wik me mon’og ko tirok Got nib fel’ rogon.

12. Mog reb e kanawo’ nibe dag rogon nrayog ni file fel’ yangaren e thin nriyul’ nu Bible nib fel’ rogon ngak be’.

¹² Piin fel’ yangaren e rayog nra fanayed fare babyor ni Bible Teach ngar ayuweged boche girdi’. Keanu nu Hawaii ni 11 e duw rok, e nap’an nibe beeg e re babyor ney u skul, me fith rebi chon e class rok ni gaar, “Mang fan ndamur madnomnaged boch e rran ni yima madnomnag?” Me beeg Keanu e fulweg riy ko fare appendix ni “Thingar da Madnomnaged e Pi Rran ni Yima Madnomnag, Fa?” Me pithig ko gin bay fapi kenggin e thin riy ko re babyor nem me fith ngak ko bin ngan e pi kenggin e thin nem e baadag. Ma aram min tababnag reb e fol Bible. Fa binem e duw ma, Pi Mich Rok Jehovah e oren e girdi’ ni ur filed e Bible ngorad e 6,561,426 ni boor riy e ur fanayed ere babyor nem ni Bible Teach. Me gur, gabe fanay e re babyor nem ni ngam fil e Bible ku be’, fa?

13. Mang reb e kanawo’ ni yira fil e Bible riy marab gelngin ngak e girdi’ nib gel?

¹³ Ra un fil e Bible ni yibe fanay fare Bible Teach ma ra yib gelngin ngak e piin ni yad baadag ni ngar rin’ed e tin nib m’agan’ Got ngay. Ba wu’ i mabgol ni yow ba special pioneer u Norway era tababnagew i fil e Bible ngak ba tabinaw ni yad piyu Zambia. Re wu’ i mabgol nu Zambia nem e bay dalip e ppin ni fakrow ma kar dabuyew ni ngkur fakayew reb e bitir. Ere nap’an ni diyen fare pin bayay, mar lemnagew ni ngan li’ fare tir u meyal. In e rran nga m’on ni ngar nonad reb e togta, mar filed fare guruy ni kenggin e “Rogon ni Ma Sap Got ko Yafas.” Yaan fare tir ni ka bay u meyal nibe m’ug kore guruy nem e ri magawonnag laniyan’ fagal yabgol mar lemnagew ndab kun kirebnag fare diyen. Ma ur mon’oggow iyan ko tirok Got ban’en mar tunguyew fithingan fare moon ni yad ma fil e Bible ko fachi pagal ni fakrow ni kafin ni gargeleg.

14. Mu weliy rogon ni par nib puluw nga rogon e n’en ni gad be fil ngak e girdi’ e ra yib angin nib fel’.

¹⁴ Reb e n’en nib ga’ fan u rogon nima skulnag Jesus e girdi’ e ma par nib puluw rarogon ko pin’en nima fil ngak e girdi’. Boor e girdi’ ni kar adaged ngongolen e Pi Mich Rok Jehovah nib fel’ ya yad be folwok rok Jesus. Rebe tafol chuway’ u New Zealand e ni kirebnag e karrow rok ngan yan ngalan ngan iring e kabang rok. Me yog ngak e police, me gaar e police ngak: “Kemus ni n’en nra rin’ me sul e chugum rom e faanra pirieg reb e Pi Mich Rok Jehovah.” Reb e Pi Mich Rok Jehovah nibe wereg e shimbung iyan e pirieg fare kabang. Me yog, me yib faanem nga tafen fare walag nib ppin. Mari felan’ faanem ya bangi babyor nrib ga’ fan ngak e ka bay u lan fare kabang. Me gaar fare walag nib ppin ngak, “Rib puluw ni nggu fulweg e chugum rom, ni fan e gag reb e Pi Mich Rok Jehovah.” Miri manigil u wan’ fare tafol chuway’, ya yib ngan’ e n’en ni yog fare police ngak ni kadbul. Rib tamilang, ni tin nriyul’ e Kristiano e yad ma pulweg rarogon e par rorad ko Bible ma yad be folwok rok Jesus.​—Heb. 13:18.

Mfolwok ko Ngongol rok Jesus Ngak e Girdi’

15, 16. Uw rogon ni gadra k’aring e girdi’ nge adag e thin ni gad be machibnag?

¹⁵ Ngongolen Jesus ngak e girdi’ e arame n’en ni adag e girdi’ e thin rok nbochan. Ni bod rogon, ni t’ufeg nge sobut’an’ rok e ire chugurnag e piin sobut’an’ ngak. I dag e runguy ngak e piin nra bad ngak me baudegrad ko thin nib fel’, ma boor e girdi’ ni golnag e m’ar rorad. (Mu beeg e Mark 2:1-5.) Dabiyog ni ngada ngongliyed e maang’ang machane rayog ni ngad daged e t’ufeg, sobut’an’, nge runguy​—pi fel’ngin nra ayuweg e girdi’ ngar bad ko tin nriyul’.

¹⁶ Runguy, e rin’ reb e ban’en u nap’an nreb e special pioneer ni Tariua fithingan ni yan nga tafen be’ nib pumoon nike pilibthir ni Beere fithingan, nima par u rebe donguch nu Kiribati nib palog ni bay u South Pacific. Yugu aram rogon nibe dag fare moon ndabun ni nge motoyil, ma ke guy Tariua ni bay bang u dow nike marwoth me kireban’ ngak. Me fith ngak ni gaar: “Kam rung’ag e pin’en nike micheg Got ni fan ngak e piin m’ar nge pilibthir?” Ngemu’, me beeg bang ko yiiy rok Isaiah. (Mu beeg e Isaiah 35:5, 6.) Me gin ere moon nem ngay, me gaar, “Kug beeg e Bible ni bokum e duw ma ma yib e missionary ko ba’ rog e teliw ra guyed gag nike yoor e duw, ma dawor gguy e binir u Bible.” Ma aram min tababnag e fol Bible ngak Beere, mi i mon’og nib fel’ rogon. Rib gel e marwoth rok, machane chiney e ke taufe ma ir e ke par nibe ayuweg reb e ulung nib palog rok boch e nam, ma ke yog rok ni nge yan u daken ere donguch nem ni polo’ ni be machibnag e thin nib fel’.

Mpar ni Gabe Folwok rok Kristus

17, 18. (a) Uw rogon ni ngam mang reb e tamachib nib manging’? (b) Mange bay ni fan ngak e piin nib ga’ fan e machib u wan’rad?

¹⁷ Bochan ni yugu be m’ug boch ban’en ni yibe felfelan’ ngay u nap’an e machib, ma rayog ni ngad manged boch e tamachib nib fel’ ni faan gadra maruweliy ma gad dag fapi fel’ngin ni dag Jesus. Ere rib puluw ni ngad folwokgad rok Kristus ni gad e tamachib nib pasig!

¹⁸ Nap’an ni mang boche girdi’ pi gachalpen Jesus ko bin nsom’on e chibog, me fith Peter ni gaar: “Ere mang e bayi yog ngomad?” Me fulweg Jesus ni gaar: “Urngin e girdi’ ni kar digeyed e tabinaw rorad, ara pi walagrad ni pumoon, ara pi walagrad ni ppin, ara matam, ara matin, ara bitir, ara yungi binaw ni taferad ni bochag, e raay yay e pi n’ey ni bayi mun ngorad, ma yira pi’ e yafos ndariy n’umngin nap’an ngorad.” (Matt. 19:27-29) Re n’em e ba mudugil nra buch rodad ni faanra ud pared ni gad be folwok rok fare missionary nth’abi ga’, ni Jesus Kristus.

Uw Rogon ni Ga Ra Fulweg?

• Uw rogon ni be skulnagdad Jehovah ni ngad manged tamachib?

• Mang fan nib ga’ angin fare babyor ni Bible Teach ko machib rodad?

• Uw rogon ni gad ra folwok rok Jesus u rogon e ngongol rodad ngak e girdi’?

[Picture on page 21]

Nap’an ni pining Jesus Peter, Andrew, James, nge John ni ngar leked, ma ranod ni papey