Mu Folwok u Rogon ni I Machib Jesus

“Dariy be’ ni kaa welthin ni bod rogon e re moon nem!”​—JOHN 7:46.

1. Uw rogon u wan’ boch e girdi’ e machib ni tay Jesus?

AYGUM lemnag feni rib fel’ rogon ni ga be motoyil ngak Jesus ni be machib! Be dag e Bible rogon ni motoyil boch e girdi’ ngak Jesus. Bod rogon ni yoloy Luke murung’agen e girdi’ ko gin ni i par Jesus riy ni gaar, “mi yad gin ko pi thin nem nib fel ni ke weliy ngorad.” Me weliy Matthew murung’agen e piin ra motoyilgad ngak Jesus u nap’an ni machib u daken e Burey ni gaaar, “me gin fapi girdi’ ni aram urngirad nga rogon e machib ni ke tay.” Ma ki yog John ni fapi salthaw ni l’ograd ni ngar koled Jesus e ra sulod ni demoy Jesus rorad mar gaargad: “Dariy be’ ni kaa welthin ni bod rogon e re moon nem!”​—Luke 4:22; Matt. 7:28; John 7:46.

2. Uw rogon ni i machib Jesus?

² De oloboch e pi salthaw nem. Ya Jesus e ir fare Tamachib nib fel’. Ba tamilang e machib ni tay mab mom ni ngan nang fan e thin ni yog ma dariy ban’en nrayog ni nga nog nib kireb ko machib ni i tay. Ba salap u rogon ni i fanay e fanathin nge deer. Ke machibnag e girdi’ ni demtrug rarogorad ko ba tolang e liw rorad fa danga’. Tin riyul’ ni i machibnag e ba ga’ fan mab mom ni ngan nang fan. Machane gathi ireray fan ni ir e tamachib nib fel’.

Ba Ga’ Fan e T’ufeg

3. Uw rogon nib thil Jesus ngak e pi tolang ko pi yurba i teliw e ngiyal’ nem?

³ Pi ta yol nge pi Farise e sana imoy boch i yad nib llowan’ mab salap. Ere uw rogon nib thil rogon ni i machib Jesus ko pi girdi’ nem? Pi tolang ko teliw e ngiyal’ nem e de t’uf e girdi’ rorad. Ur rogned ko girdi’ ni “ke bucheg Got waathrad!” (John 7:49) Machane Jesus e ba thil ya ke runguy e girdi’ “ni ke magafan’rad ndar nanged e n’en ni ngar rin’ed, ya yad bod saf nde moy rorad e en ni ma gafaliyrad.” (Matt. 9:36) Ir be’ nib munguy, ma ta’ fan e girdi’, mab gol. Machane piin tolang ko pi yurba i teliw e darur ma t’ufeged Got. (John 5:42) Jesus e ma t’ufeg e Chitamangin ma baadag ni nge rin’ e tin nib m’agan’ e Chitamangin ngay. Piin nib tolang ko pi yurba i teliw e yad ma pingeg fan e thin rok Got ya nge puluw ko tin ni yad baadag, machane Jesus e bat’uf e “thin rok Got” rok ya i machibnag, ma i tamilangnag, ma i ayuweg, ma be fol riy. (Luke 11:28) I par Jesus ni bay e t’ufeg rok ma i m’ug u rogon ni ma machib, nge rogon ni ma non ko girdi’, nge rogon ni ma pow’iy e girdi’.

4, 5. (a) Mang ni ba ga’ fan ni ngan dag e t’ufeg u nap’an ni yibe machib? (b) Mang ni ba ga’ fan e tamilangan’ nge salap ko machib?

⁴ Ere mang e ngad rin’ed? Gad baadag ni ngad folwokgad rok Jesus u nap’an ni gad be machib nge nap’an ni gad be rin’ urngin ban’en. (1 Pet. 2:21) Ere gathi kemus ni ngad nanged e thin nu Bible machane thingar daged fel’ngin Jehovah ni aram e t’ufeg. Ere demtrug ko boor fa buchuuw ban’en ni kad filed ara ba’ fa dariy e salap rodad, machane thingar da t’ufeged e piin ni gad be machibnag. Faanra nge yib angin e machib ni gad be tay ma thingar daged e t’ufeg ni bod rogon ni i rin’ Jesus.

⁵ Ra ngad manged tamachib nib fel’ mab t’uf ni nge tamilangan’dad ko thin rok Got ma ngada salapgad i machibnag ngak e girdi’. Ke ayuweg Jesus pi gachalpen ni nge tamilangan’rad mar salapgad i machibnag e girdi’. Ngiyal’ ney ma ulung rok Jehovah e ma ayuwegdad ni nge tamilangan’dad ma gad salap i machibnag e thin rok. (Mu beeg e Isaiah 54:13; Luke 12:42.) Ere ngad nameged ni gathi kemus ni ngad machibnaged e thin ni kad filed machane ngad t’ufeged e girdi’. Faan gad ra fanay e tamilangan’, salap, nge t’ufeg rodad ko re maruwel ney ma ra yib angin nib fel’. Ere mang boch e kanawo’ ni rayog ni ngad t’ufeged e girdi’ u nap’an ni gad be machib? Uw rogon ni i t’ufeg Jesus nge pi gachalpen e girdi’? Ngad guyed.

Thingari T’uf Jehovah Rodad

6. Uw rogon ni gad ra weliy murung’agen be’ nib t’uf rodad?

⁶ Baga’ fan ni gad ra weliy ko girdi’ e pi n’en nib t’uf rodad, ma rayog ni ngar guyed ni gad ba felfelan’ mab m’agan’dad ngay. Ma re n’ey e ma m’ug u nap’an ni gad ma weliy murung’agen be’ nib t’uf rodad. Ba ga’ ni gad ma yog ko girdi’ e pi n’en ni gad manang u murung’agen facha’, ma dab dogned ban’en nib kireb u murung’agen. Gad ra yog e pi n’en nib fel’ u muurng’agen be’ ya nge adag e girdi’ daken.

7. T’ufeg rok Jesus ngak Got e k’aring ni nge rin’ e mang?

⁷ Thingar da nanged murung’agen Jehovah me t’uf rodad u m’on ni nga dogned ngak e girdi’ ni ngar t’ufeged Got. Ma aram e bin riyul’ e liyor ni gad be tay e be yan u rogon e t’ufeg rodad ngak Got. (Matt. 22:36-38) Ke dag Jesus e kanawo’ nib fel’ ngodad. Ke t’ufeg Jehovah u polo’ i gum’irchaen nge lem rok nge yafas rok nge gelngin. Ri manang Jesus rarogon e Chitamangin ya i par rok u tharmiy ni bokum bilyon e duw. Ere mang angin ni ke yib riy ngak? Ke yog ni gaar, “Thingar ra nanged nib t’uf rog e en ni Chitamangiy.” (John 14:31) Rogon e t’ufeg rok Jesus ngak e Chitamangin e ke m’ug u gubin ban’en ni yog nge gubin ban’en ni i rin’. Ma t’ufeg rok e k’aring ni nge rin’ gubin ban’en nra felan’nag Got. (John 8:29) Ma t’ufeg rok e k’aring ni nge yog nib kireb e pi tolang ko pi yurba i teliw ni bochan e yad be dake liyor ngak Got. Maku t’ufeg rok e k’aring ni nge machibnag murung’agen Jehovah me ayuweg e girdi’ ni ngar nanged mar t’ufeged Got.

8. T’ufeg rok pi gachalpen Jesus ngak Got e k’aringrad ni ngar rin’ed e mang?

⁸ Tin som’on e pi gachalpen Jesus e ur t’ufeged Jehovah ni bod rogon Jesus. Ma t’ufeg rorad ngak Got e k’aringrad ni ngar athamgilgad mar pasiggad ni ngar machibnaged fare thin nib fel’. Kar machibgad u ga’ngin yang u Jerusalem ni yugu aram rogon ni i togopuluw e pi tolang ko pi yurba’ i teliw ngorad. Dabiyog ni ngar talgad ni dabkur rogned murung’agen e n’en ni kar guyed nge n’en ni kar rung’aged. (Acts 4:20; 5:28) Yad manang ni bay Jehovah rorad ma ra ayuwegrad, ma aram ma ke tow’athnagrad Got! Riyul’ ya de gaman 30 e duw u tomren ni yim’ Jesus me yoloy Paul ni fare thin nib fel’ e “kan machibnag ngak urngin e girdi’ u fayleng.”​—Kol. 1:23.

9. Uw rogon ni ngad gelnaged e t’ufeg rodad ngak Got?

⁹ Faanra riyul’ ni nge yib angin e machib ni gad be tay ma thingar da t’ufeged Got ni gubin ngiyal’. Uw rogon ni gad ra rin’? Gad ma non ngak Got u nap’an e meybil. Maku gad ma dag nib t’uf Got rodad u nap’an ni gad be fil e thin rok, ma gad be beeg e babyor ni bay e thin nu Bible riy ma gad ma un ko gubin e muulung ni ma tay e piin ni Kristiano. Ra yoor ban’en ni gad ra nang u murung’agen Got ma aram e ra gel e t’ufeg rodad ngak. Faan gad ra dag nib t’uf Got rodad ko thin ni gad ma yog nge ngongol rodad, ma ra guy boch e girdi’ ma aram e yad ra adag ni ngar filed murung’agen Jehovah.​—Mu beeg e Psalm 104:33, 34.

Thingari T’uf e Machib Rodad

10. Mang e ra m’ug rok be’ ni ir e tamachib nib fel’?

¹⁰ Ba tamachib nib fel’ e thingari mich u wan’ ni tin ni be machibnag e ba riyul’ ma ra yib angin ma ba ga’ fan. Faanra ba t’uf e machib rok be’ me m’ug nib m’agan’ ngay, ma ra adag e girdi’ ni ngar motoyilgad ngak. Machane faanra de t’uf e machib u wan’ me ere uw rogon ni nge tay e girdi’ nib ga’ fan e thin ni be machibnag? Dab mu pag talin ni rib ga’ fan ni ngam dag ni gur e tamachib nib fel’. Be gaar Jesus: “Machane gubin e girdi’ ni yibe skulnagrad e faanra mu’nag bagayad e skul ni yibe tay ngak, ma aram e ke bod rogon e cha’ ni ir e be skulnag.”​—Luke 6:40.

11. Mang fan nib t’uf rok Jesus e tin ni i machibnag?

¹¹ Ba t’uf rok Jesus e tin ni i machibnag. Manang ni bay ban’en nib ga’ fan ni nge fil ko girdi’ ni aram e tin riyul’ ni murung’agen e Chitamangin u tharmiy, ni “thin rok Got” ni “ma pi’ e yafos ndariy n’umngin nap’an.” (John 3:34; 6:68) Tin riyul’ ni i machibnag Jesus e bod raen e magal ni be mat ya nge m’ug e tin nib kireb me tamilangnag e tin nib fel’. Tin riyul’ e ra pi’ e athap me fal’eg laniyan’ e piin nib sobut’an’rad ni ke bannagrad e pi tolang ko pi yurba’ i teliw nge moonyan’. (Acts 10:38) Ra m’ug rogon ni i t’ufeg Jesus e tin riyul’ u nap’an ni i machib nge urngin ban’en ni i rin’.

12. Uw rogon e tin nib fel’ u wan’ Paul?

¹² Pi gachalpen Jesus e rib t’uf e tin riyul’ ni murung’agen Jehovah nge Jesus rorad. De yog rok e girdi’ ni ngar taleged yad ni dabkur machibnaged e thin rok Got ngak e girdi’. Yog Paul ngak e pi Kristiano u Roma ni gaar: “Gub adag ni ngku gu machibnag e Thin Nib Fel’ ni yib rok Got ngomed e piin ni gimed ma par u Roma. Dagur tamra’ ko re Thin ney Nib Fel’ ni murung’agen Jesus, ya ir gelngin Got ni nge thapeg e girdi’ ngak, ni urngin e piin ni ke mich u wan’rad e re thin ney.” (Rom. 1:15, 16) I tay Paul nrib ga’ fan ni ngan machibnag e tin riyul’. Be gaar: “I gag e th’abi sobut’ u fithik’ urngin e girdi’ rok Got; machane ke pi’ Got ngog e re gaf i maruwel ney ndariy rogog ni ngan pi’ ngog, ni nggu fek fare Thin Nib Fel’ ni yib rok Got i yan ngak e piin ni gathi yad piyu Israel, ni murung’agen e flaab rok Kristus ndariy ko fol.” (Efe. 3:8) Rayog ni ngad guyed nib m’agan’ Paul ngay ni nge machibnag e girdi’ u murung’agen Jehovah nge tin nib m’agan’ ngay.

13. Mang fan ni thingari t’uf rodad fare thin nib fel’?

¹³ Fare thin nib fel’ ni aram e Thin rok Got e ma ayuwegdad ni ngad nanged e en ni Sunmiydad ma gad t’ufeg ya nge fel’ thildad. Re thin nib fel’ nem e ma ayuwegdad u boch e deer ni daworda nanged fan ma ba’ gelngin ni ra thilyeg e yafas rodad me pi’ e athap ngodad me gelnagdad ko magawon ni ma yib ngodad. Maku, ma ayuwegdad ni ngad nanged ni bay fan e yafas rodad ma rayog ni nge par ni dariy n’umngin nap’an. Ma tamilangan’ ko tin riyul’ e rib ga’ fan ya ba tow’ath ni gad ra felfelan’ ngay. Ma ra gel boch e felfelan’ rodad u nap’an ni ngad weliyed ngak e girdi’.​—Acts 20:35.

14. Uw rogon ni ngad gelnaged e t’ufeg rodad ko pi n’en ni gad be machibnag?

¹⁴ Mang e rayog ni ngam rin’ ni ngam t’ufeg fare thin nib fel’? Nap’an ni ga be beeg e Thin rok Got ma ga tal ngam fal’eg i lemnag e pi n’en ni kam beeg. Susun, am lemnagem ni ga be un ngak Jesus ko machib fa ga be un ngak apostal Paul ko milekag. Am lemnag ni ga bay u lan fare m’ag nib beech ma ke fel’ rogon e yafas rom. Mu lemnag e pi tow’ath ni ke yog ngom ni bochan ni kam fol ko fare thin nib fel’. Rayog ni nge nang e girdi’ nrib ga’ fan fare thin nib fel’ u wan’um ni faanra ga be tay fan. Ba ga’ angin ni ra yib riy ni faanra da fal’eged i lemnag e pi n’en ni kad filed ma da tedan’dad ko n’en ni gad be machibnag.​—Mu beeg e 1 Timothy 4:15, 16.

Thingari T’uf e Girdi’ Rodad

15. Mang fan ni thingari t’ufeg e sensey e piin ni be skulnag?

¹⁵ Reb e sensey nib fel’ e ma guy rogon ni nge pagan’ e piin ni be skulnag, ya nge yog ni ngar felfelan’gad ma ra uned i weliy e pi n’en ni yad be fil. Reb e sensey nib manigil e ma llowan’nag e piin ni be skulnag ni bochan e yad ba t’uf rok. Ma guy rogon ni nge skulnagrad ko pi n’en nib t’uf ni ngar filed mab mom ni ngar nanged fan. Ma manang rarogon e piin ni be skulnag. Ra felfelan’ e piin ni yibe skulnagrad ma yad ra adag ni ngar filed ban’en u nap’an ni yad ra guy ni be t’ufegrad e sensey rorad.

16. Mang boch e kanawo’ ni ke dag Jesus e t’ufeg riy ngak e girdi’?

¹⁶ Ke dag Jesus e t’ufeg. Ma bin th’abi ga’ e t’ufeg ni dag e ke pi’ e yafas rok nib flont ni bochan e nge yog e yafas ngak e piin ni yad ra fol rok. (John 15:13) Nap’an e machib ni tay Jesus ma i ayuweg e girdi’ ko tin nib t’uf rorad nge tin nib m’agan’ Got ngay. Da i sonnag e girdi’, ya i milekag u but’ ni boor e mayel ya nge machibnag fare thin nib fel’ ngak e girdi’. (Matt. 4:23-25; Luke 8:1) Ba gum’an’ ma ma runguyey. Ma t’ufeg pi gachalpen, ere ma yal’uwegrad u nap’an ni kar olobochgad. (Mark 9:33-37) I pi’ e athamgil nga lanin’rad me dag nib pagan’ ngorad nrayog ni ngar manged e pi tamachib nib fel’ ko fare thin nib fel’. Dariy be’ ni ke mang tamachib ni bod rogon Jesus. T’ufeg ni ke dag ngak pi gachalpen e k’aringrad ni ngar t’ufeged mar folgad ko motochiyel ni ke pi’ ngorad.​—Mu beeg e John 14:15.

17. Uw rogon ni ke dag pi gachalpen Jesus e t’ufeg ngak boch e girdi’?

¹⁷ Ke dag pi gachalpen Jesus e t’ufeg ngak e piin ni ur machibnaged ni bod rogon ni i rin’ Jesus. Un gafgownagrad mar paged fan e yafas rorad ya ngar machibnaged fare thin nib fel’. Ur runguyed e piin ni ur filed e thin rok Got! Rib ga’ fan fare thin rok Paul ni gaar: “Machane nggu pired romed ni gamad mmunguy ni bod feni munguy ba matin ngak pi fak ni be ayuwegrad. Bochan e gimed ba t’uf romad ma gamad fal’eg rogomad ni gathi ke mus ni Thin Nib Fel’ ni yib rok Got e nggu bad gu pied ngomed, machane ngkug pied gamad nga pa’med nggu ayuweged gimed. Ya ri gimed ba t’uf romad!”​—1 Thess. 2:7, 8.

18, 19. (a) Mang fan nib m’agan’dad ngay ni ngad paged fadad ni ngad uned ko machib? (b) Mu weliy ko uw rogon ni ke yog be’ rogon e t’ufeg ni bay rodad.

¹⁸ Ku taareb rogon ko ngiyal’ ney ni Pi Mich Rok Jehovah e yad be machib u ga’ngin yang u fayleng ya ngar gayed e piin ni baadag ni ngar filed e Bible mar pigpiggad ngak Got. Fa 17 e duw ni ke yan, ma ra reb e pi duw nem ma ke pag reb e bilyon e awa ni kan machib riy ma ka gad be ulul ko re maruwel nem. Ba m’agan’dad ni ngad uned ko machib ni yugu aram rogon ni boor ban’en ni gad ma fanay ngay, ni bod rogon e tayim, gelngidad, chugum nge salpiy rodad. Ngad boded Jesus ni manang ni Chitamangin u tharmiy e baadag ni nge tamilangan’ e girdi’ ko uw rogon me yog e yafas ni manemus ngorad. (John 17:3; 1 Tim. 2:3, 4) T’ufeg e ma k’aringdad ni ngad ayuweged e piin nib fel’ gum’ircharad ni ngar nanged mar t’ufeged Jehovah.

¹⁹ Ke nang e girdi’ rogon e t’ufeg ni bay rodad. Bay reb e walag ni ppin ni ma fanay boor e tayim rok ko machib u Meriken ni ma yoloy e babyor ni nge fal’eg laniyan’ e girdi’ ni ke yim’ be’ nib t’uf rorad. Ke yol reb e pumoon ngak ni gaar: “N’en ni kug gin ngay ko som’on e mang fan ni kam fanay e tayim rom ni ngam yoloy e babyor ni ngam fal’eg laniyan’ be’ ni dawor mu guy biid. Rayog ni nggog ni bochan e t’ufeg rom ngak e girdi’ ma ka ga be t’ufeg fare Got ni ma pow’iy e girdi’ ko yafas.”

20. Uw feni ga’ fan ni ngan machib u fithik’ e t’ufeg?

²⁰ Yima yog ni faanra chagil e t’ufeg ko salap ma ra yib angin nib fel’. Ere nap’an ni gad be machib, gad be guy rogon ni ngad ayuweged e girdi’ ni nge tamilangan’rad u murung’agen Jehovah ma ra daged e t’ufeg ngak. Faanra nge yib angin e machib ni gad be tay ma thingar da folgad ko fa dalip i n’en ni kad weliyed ni aram e thingari t’uf Jehovah rodad nge thin rok, nge girdi’ ni gad be machibnag. Ere faanra bay e t’ufeg rodad ma gad dag ko girdi’ u nap’an ni gad be machib, ma aram e gathi kemus ni gad ba felfelan’ ko n’en ni kad pied. Machane gad ba felfelan’ ni kad nanged ni gad be folwok rok Jesus ma gad be felfelan’nag Jehovah.

Uw Rogon ni Ga Ra Fulweg?

• Nap’an ni gad be machibnag fare thin nib fel’, mang fan ni . . .

thingar da t’ufeged Got?

thingar da adaged e thin rok Got ni gad be machibnag?

thingar da t’ufeged e piin ni gad be machibnag?

[Picture on page 19]

Mang e ba thil ko machib ni tay Jesus nge machib ni i tay e pi tamachib ko motochiyel nge pi Farise?

[Picture on page 22]

Ra ngan machib nib fel’ rogon mab t’uf e tamilangan’ nge salap ma bin ba ga’ fan e ngan dag e t’ufeg