LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w03 3/1 pp. 4-5
  • Pi Buguli Yoror nib Fel’ e Ban’en nib Ga’ Felngin

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • Pi Buguli Yoror nib Fel’ e Ban’en nib Ga’ Felngin
  • Fare Wulyang Ntagil’ E Damit Ni Be Weliy Morngaagen Gil’ilungun Jehovah—2003
  • Pi Subheading
  • Boch Ban'en ni Ku Taareb Rogon Ngay
  • Uw e Ngan Tabab Riy?
  • Fare Ngongol ni Tha’bi Ga’ nib Fel’ ko Buguli Yoror
  • “Thingari T’uf Rom e En ni Ir e Mmigid Ngom ni Gowe Gur”
    Fare Wulyang ko Damit Ni Be Weliy Morngaagen Gil’ilungun Jehovah—2014
  • Fan Ni Nge T’uf Rodad E En Nib Migid Ngodad
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2007
  • Mog Ku Rayog Rok Urngin E Girdi’ Ni Ra Ur T’ufeged Yad Ba Ngiyal’ Fa?
    Mog Ku Rayog Rok Urngin E Girdi’ Ni Ra Ur T’ufeged Yad Ba Ngiyal’ Fa?
Fare Wulyang Ntagil’ E Damit Ni Be Weliy Morngaagen Gil’ilungun Jehovah—2003
w03 3/1 pp. 4-5

Pi Buguli Yoror nib Fel’ e Ban’en nib Ga’ Felngin

“Ba Fel’ boch ba buguli yoror nib chugur ko ngak be’ ni walagey nib palog nga orel.”​—Proverbs 27:10, New World Translation.

REB E LLOWAN’ ko bin som’mon e chibog ko C.E. e fith Jesus ni gaar: “Mini’ e cha’ ni rriyul’ ni buguli yoror rog?” Ma fulweg ni ta’ Jesus ngak, e de yog ngak ko mini’ e eni buguli yoror rok, machane yog e n’en ni ma rin’ be’ me mang ba buguli yoror nib riyul’. Sana gamnang e re fanathin rok Jesus nem. Boor e girdi’ ni manang ni bod fare fanathin ni be’ u Samaria e ba buguli yoror nib fel’ ni ba’ ni kan yoloy nga lan e Gospel ko Luke. Baaray rogon ni weliy Jesus fare chep:

“Be’ nib moon e l’og u Jerusalem i yan nga Jeriko, me yib i og bogi moro’ro’ ngak ngar lufed e mad rok, mi yad pirdiiy, ngemu’ mi yad pag ni ke chugur ni nge yim’. Ma bay ba prist ni be yan nga p’ening u daken e re pa’ i kanawo’ nem; ma faani guy fare moon me liyeg rok u baraba’ e kanawo’ nge yan. Maku aram rogon be’ ni ir reb e Levite ni ki yib ko gin’em, me yan ko gin ni bay fare moon riy nge yan i guy me liyeg rok u baraba’ e kanawo’ nge yan. Machane be’ u Samaria ni be sor i yan ko gin’em e yib i pirieg, ma faani guy fare moon me taganan’ ngak. Me yan ko gin ni bay riy, nge puog e gapgep nge wain ko yungi n’en ni ke maad’ad u downgin me m’ag e mad ngay; ngemu’ me fek fare moon nge tay nga daken fare gamanman rok me fek i yan nga ba naun ntafen e milekag mi ni ayuweg. Me yan ni reb e rran riy me fek l’agruw e salpiy ni silber, nge pi’ ngak e en ni ir e mmil suwon fare naun ntafen e milekag ngak. Me gaar ngak, mu ayuweg e cha’ ney ya bay gu sul mu gu fulweg ngom e salpiy ni kam n’ag nga puluwon.” Me gaar Jesus, “Ere mini’ e arorad e dalip i girdi’ nem e ga be finey ni ir e ke mang e cha’ nib migid ngak faanem ni yib e moro’ro’ i pirdiiy?”​—Luke 10:29-36.

Me nang fa en nib llowan’ fan fare n’en. Ma de staltal me yog ni rib puluw e en ir e ba buguli yoror nib fel’ ko fare moon ni ke maadad ni gaar: “Faanem ni runguy nge ayuweg.” Me fulweg Jesus ngak ni gaar: “Ere mman ma ga rin’ ni aram rogon.” (Luke 10:37) Uw feni gel angin e re fanathin nem u rogon ni ngan mang ba buguli yoror ni rriyul’! Re fanathin ku Jesus nem e ra k’aringdad ni ngada fithed gadad ko: ‘Ba miti mang buguli yoror e gub ma rin’? Gu ma athamgil ni bochan ni nga gu mang reb e buguli yoror nib fel’?’

Uw e Ngan Tabab Riy?

Faanra kad nanged nib t’uf ni ngad mon’oggad ko re n’eney, ma thingarda tababgad u rogon ni gad ma lem. N’en ni ngad lemniged e thingari puluw nga rogon ni ngad manged ba buguli yoror nib fel’. Re n’eney e ku rayog ni nge ayuwegey nge yog e buguli yoror ngodad nib fel’. Ba chuchugur i l’agruw e biyu’ e duw ni ke yan, me fal’eg Jesus i weliy e re kenggin e motochiyel nem ni rib ga’ fan ko tha’ u thilin e girdi’ ko fare machib rok nib gilbuguwan u daken fare burey. I gaar: “Ere mu rin’ed ngak e girdi’ e tin ni gimed baadag ni ngar rin’ed ngomed.” (Matthew 7:12) Ra un ta’ fan, ma yibe tolangnagrad, ma yibe gol ngorad ma ku ra k’aringrad nga ku ra rin’ed ngom ni ku aram rogon.

Riyul’, ni boor i gadad e ma magawon ni nge non ngak e buguli yoror rok. Ba dake kab mom ni nga udi pilo’gad ni dabda mada’gad ma gad par rodad. Machane, fare Bible e be yog ni “ba gel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Arfan, ni ba buguli yoror nib fel’ e ri ma guy rogon ni nge yog ni nang me fel’ thilrad e piin ni yad be par u tooben i yan. Yug gathi rib t’uf ni nge guy rogon ngar pachgad, ma ri ma guy rogon ni nge munmun me thil bbugithin nib fel’ u thilrad sana ra tabab ko fanathin u paey ara owchey min siminmin ara ni chichingeg pa’ey ngak ara ni gachum.

Nochi ayuw ni ba achigchig ni ma rin’ e piin ni buguli yoror ngorad e ir e rib ga’ fan ya yima ta’ nib fel’ rogon e tha’ u thilin e piin ni buguli yoror. Ere rib fel’ ni nguun gaweg rogon nochi athap ko t’ufeg ni rayog ni ngam rin’ ko eni buguli yoror, ya aray e n’en nib ga’ ni ra mon’ognag e lem ko ayuw nge ta’ fan. Maku reb, e faan yira rin’ ni aram rogon, ma gad ra lek e fanow nu Bible ni gaar: “Dab mu tel e tinib fel’ ko piin ni yad e nge yan ngorad, ni faanra gur e bay gelngin paam ni ngam rin’.”​—Proverbs 3:27; James 2:14-17, NW.

Fare Ngongol ni Tha’bi Ga’ nib Fel’ ko Buguli Yoror

Reb e buguli yoror nib fel’ e ban’en ni rib ga’ fan ko ngiyal’ ni ke aw e magawon nib gel e gafgow nge mogothgoth riy ngodad. Nap’an yu ngiyal’ ni bay e gafgow, nge magawon nge kireban’ e aram ban’en ni ma m’ug ni riyul’ ko buguli yoror nib fel’. Ke yoor yay ni ka nog murung’agen e ngongol nde siin ni ma rin’ e piin ni buguli yoror ko yu ngiyal’ ni aram rogon. N’en nib ga’ ni yugu ma buch nib gel e gafgow nge kireban’ riy e ba dake ma k’aring e piin ni buguli yoror ni yad rorad e ngar bad ngar uned ko ayuw ni kar ognaged yad ni fan ngak boch i yad.

Yira un ko maruwel ni ayuw u tomuren ni ke aw reb e gafgow nib gel ma ba gel e magothgoth riy e rib mudugil nib ngongol ni rib gilbuguwan ni ma rin’ e piin ni buguli yoror. Maku arrogon, ni ga ra ayuweg e yafas rok ba buguli yoror ni faan ga ra yog ngak u m’on ni nge yib e gafgow ngak, magawon nge kireban’ ma rib mudugil ni yira lemnag ni reb e ngongol ni ri kub ga’ fan ko piin buguli yoror. Ma ba gafgow, ya ke m’ug ko chep ni piin ni yad ma yog ko piin ni buguli yoror ni bay yibe gafgow nib gel e magothgoth riy e baga’ ni gathi ri yad baadag, ni bochan ni ngiyal’ ni yad be yog fare gafgow nge magothgoth ni bayib e dawori gagiyel. Piin baaram ni yad ma ginangey ko tin bayib e baga’ nder ma mich u wan’uy e n’en ni yad ma yog. Ba gel e gafgow nge meeriyog ni ma tay be’ ni be guy rogon ni nge ayuweg e piin ni dar nanged ni gin yad bay riy e ra yib e riya’ ngorad riy.

Ngiyal’ ney, e ba’ ban’en ni ri kab ga’ fan ko tin baaray e riya’ nge magothgoth ni ka ma buch ni bayib ngak e girdi’. Ni aram e fare n’en ni ke m’ay i yog ni ra rin’ fare Got ni Tha’bi gel ni ra chuweg u fayleng e cham, nge kireb, nge pi magawon nib chag ngay. (Revelation 16:16; 21:3, 4) Re n’eney ni rib ga’ fan e gathi ban’en nib yoyowol ni ra buch ya rib mudugil! Pi Mich Rok Jehovah e ri yad baadag ni ngar pied boch e tamilangan’ nib t’uf ni bochan ni nge yog ni nge par oren e girdi’ ni rayog ni magay nib fas ko re n’eney ni bayi buch ni nge rur e fayleng riy. Arfan ni kar pired ni yad ba gel ko maruwel ko machib ni yad be tay ni goo yi manang u ga’ngin yang e fayleng. (Matthew 24:14) Yad be athamgil ni ngar manged pi buguli yoror nib fel’.

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag