Kingdom News No. 35

Mog Ku Rayog Rok Urngin E Girdi’ Ni Ra Ur T’ufeged Yad Ba Ngiyal’ Fa?

T’ufeg Ko En Buguli Yoror E Ke War

BOKUM milyon e girdi’ e ke math e liyab ngorad ndakur nanged e gin ni ngar sapgad ngay. Reb e ppin ni ma folchuway’ faram e yog ni gaar: ‘Reb e balayal’ meb be’ ni ppin ni kem’ figirngin ni ma par u ba thal e naun rog i tugtuguy e mab rog me yog ngog ni be tawreng. Ug non ngak ni ba fel’ rogon machane gu be tamilangnag ngak ni boor e maruwel rog. Me siro’ ngog ni fan e ke magawonnageg ma aram me yan.’

Bay e kireban’ riy ya ka aram e re nep’ ni yan fare ppin ni ke yim’ figirngin me yan i li’ ir. Ma tomur riy me yog fare ppin ni ma folchuway’ ni ke fil ban’en ni “rib baga’ fan.”

Ra dab mu t’ufeg e an gimew ba chugur ma yu ngiyal’ ma rib gel’ e kireban’ riy. Nap’an e togopuluw ni yibe tay u Bosnia nge Herzegovina, ni immoy ni bayang u Yugoslavia, ma ke pag reb e milyon e girdi’ ni kan tulufrad kar n’aged taferad ma ragag e biyu’ e kan li’rad. Mini’ e ke rin’? Reb e rugod ni kan tuluf ko binaw rok e weliy u fithik’ e kireban’ rok ni gaar: “Piin gamad bbuguli yoror. Ma gamad manangrad.”

U Rwanda ma bokum miray e biyu’ e girdi e kan li’rad kar m’ad, ma baga’ ni yad e piin buguli yoror. “Ma par e Hutu nge Tutsi u taabang ma yad ma mabgol ma dariy fan u wan’rad ni ngar nanged ko mini’ e en Hutu nge mini’ e en Tutsi,” aram rogon ko report ni bay ko fare The New York Times. “Ma aram feni machreg ni ma tabab fare ma li’ girdi’.”

Ku bod rogon u Israel ni ma par piyu Jew nge yu Arab u taabang ma bay e fanenikay u thilrad. Kub taareb rogon ko n’en be rin’ boch e Katolik nge Protestant u Ireland, ma be yoor iyan e pi n’em u yugu boch e nam. Dawori yodorom ba ngiyal’ ni kab kakrom iyib ni aray rogon ni daki gaman e t’ufeg.

Mang Fan ni Ke War e T’ufeg ko Piin Buguli Yoror?

An ke sunmiydad e ke pi’ e fulweg. Thin rok u Bible e be yog ni ereray e “tin tomren e rran,” ma kan yiiynag u Bible ni girdi’ e “bay dabkur runguyed e girdi’.” Ngiyal’ ney ni “mo’maw e par,” e ku yima yog “tungun urngin ban’en” ngay, ki yiiynag Jesus Kristus ni “ra yoor e girdi’ ni ra war e runguy rorad.”—2 Timothy 3:1-5; Matthew 24:3, 12.

Ere, re runguy ney ni dakuriy e chiney e aram reb e mich riy ni gad be par ko tin tomren e rran ko re fayleng ney. Maku bay e falfalan’ riy, ya ku be yip’ fan nre fayleng ney ni girdi’ riy nder lemnag Got e bay par reb nib biech mab mat’aw nga luwan ni ra mang t’ufeg e ra i gagiyegnag.—Matthew 24:3-14; 2 Peter 2:5; 3:7, 13.

Ma gadad, rayog ni nge mich u wan’dad ni ra thil e pi n’ey—ma rayog ni nge fil e girdi’ rogon ni ngar runguyrad yad mar pared u taabang u fithik’ e gapas fa?

T’UFEG KO AN BUGULI YOROR—RA RIYUL’

U NAP’AN e bin som’on e chibog e ke fith reb e lawyer Jesus, “Mini’ e an ba chuchugur ngog?” De maruwar u wan’ nra yog Jesus ni, ‘An gimew ni piyu Jew.’ Machane fare welthin ni morngaagen fa cha nu Samaria e ke dag Jesus riy ni girdi’ nu yugu reb e nam e ku gadad ba buguli yoror.—Luke 10:29-37; John 4:7-9.

Ke tamilangnag Jesus ni rogon feni t’uf Got rodad nge piin buguli yoror e susun ir e nge gagiyegnag e yafas rodad. (Matthew 22:34-40) Immoy ba ulung i girdi’ u bang nriyul’ ni yad ma runguy e girdi’ nib chuchugur ngorad fa? I yodorom e tin kakrom e Kristiano! Ur lingagilgad ni bochan e t’ufeg rorad ni fan ngak boch e girdi’.—John 13:34, 35.

Ma uw rogon e chiney? Ka be rin’ boch e girdi’ e re t’ufeg nem ni bod e birok Kristus e t’ufeg fa? Fare Encyclopedia Canadiana e ke yog ni: “Fare maruwel ko Pi Mich Rok Jehovah e ke sulweg nga rogon ni un rin’ aram ko tabolngin ni rarogon e Kristiano ni i rin’ Jesus nge pi gachalpen faram ni . . . yad gubin ma walag.”

Mang e be yip’ fan e re n’em? Be yip’ fan ni Pi Mich Rok Jehovah e dariy ban’en nib thil u thilin—raen e girdi’ nge nam rorad nge yaan be’—nra k’aring e fanenikay ngorad ngar lied e piin ba chuchugur ngorad. Ara yugu demtrug be’ mar lied ngem’ ya kar pirdiiyed e sayden rorad ke mang talin e maruwel u milay’ ma sarey rorad e ngan th’ab pa’ngin e woldug ngay. (Isaiah 2:4) Ya fapi Mich e yad ba lingagil ya riyul’ ni yad be rin’ boch ban’en ni ngar ayuweged e piin yad bbuguli yoror.—Galatia 6:10.

Ka nog u Sacramento Union nu California ni: “Faan gomanga re fayleng ney e bod e michan’ ko Pi Mich Rok Jehovah ma ba gaman ni ra tal i puog e racha’ nge fanenikay, ma ra mang t’ufeg e ra i gagiyeg ni bod ba pilung.” Miki yoloy be’ e thin ko fare magazine ni Ring nu Hungary ni gaar: “Nggu museg ma nggog ni faan go manga go’ Pi Mich Rok Jehovah e yad ma par u fayleng, ma ra tal e pi mahl me ni par ni maruwel ko polis e kari mus ni go’ traffic nge passport.”

Machane ba t’uf ni nge thil rarogon e re fayleng ney ni ga’ngin ni rayog ni nge par e girdi’ ni yad be t’ufeged yad. Uw rogon me yodrom? (Wenig ngom mu guy fa bin tomur e page.)

NAP’AN NRA T’UFEG URNGIN E GIRDI’ YAD

FARE MEYBIL ni ke fil Jesus Kristus e be dag riy ni dabki n’uw nap’an ma ra thil urngin ban’en. Nap’an ni i machib Jesus u daken e burey me fil ngodad ni ngan yibilay ni: “Ngeb Gil’ilungum. Ma ngan fol rom u roy u but’ ni bod rogon u tharmiy.”—Matthew 6:10, King James Version.

Mang Gil’ilungun Got? Ir reb e am nib riyul’ ni be gagiyeg u tharmiy. Ar fan ni ka nog “fare Gil’ilungun nu tharmiy” ngay. Jesus ni “Fak e Pilung ko Gapas,” e ir e ke dugliy e Chitamangin ni nga i gagiyeg.—Matthew 10:7; Isaiah 9:6, 7; Psalm 72:1-8.

Nap’an nra yib Gil’ilungun Got ma mang e ra buch ko re fayleng ney ni ke sug ko fanenikay? “Fare Gil’ilungun,” e ra “thirif u but’ me kirebnag” urngin e pi am nib sasalap ko re fayleng ney. (Daniel 2:44) Ku be fl’eg i weliy e Bible ni: “Re fayleng ney e bayi m’ay . . . , machane en nra rin’ e tin nib m’agan’ Got ngay e ra par nib fos ndariy n’umngin nap’an.”—1 John 2:17.

Be weliy e Bible morngaagen fare fayleng rok Got ni gaar: “Piin mmat’aw e ra par u fayleng nge tafnay ni manemus.” (Psalm 37:9-11, 29, New World Translation; Proverbs 2:21, 22) Ri ra fel’ e ngiyal’ nem! “Dab ku unim, ma dab ki i kireban’uy, ma dab ku un yor, ma dab ku un amith.” (Revelation 21:4) Mus ko piin kar m’ad ma yad ra fas biyay, ma ga’ngin e fayleng nra ngal’ nib paradis.—Isaiah 11:6-9; 35:1, 2; Luke 23:43; Acts 24:15.

Ra ngan par u lan e fayleng rok Got nib biech, ma thingarda t’ufeged gadad ni bod ni ke fil Got ngodad ni ngad rin’ed. (1 Thessalonika 4:9) Reb e Bible student ko Ngek e gaar: “Yug gu be athapeg e re ngiyal’ i n’en ni faan ke micheg e Bible ni urngin e girdi’ e yad ra nang rogon ni ngar t’ufeged yad.” Ma ra yog ni riyul’ u wan’dad ye Got e ma rin’ e tin ke micheg! Ke gaar, “Ka yug gu mu’ i yog, ma ri gu ra rin’.”—Isaiah 46:11.

Machane faanra ngan falfalan’ ko fare flaab u tan Gil’ilungun Got, ma ngari yog e tamilangan’ ko Bible ngom, ni bod ni be rin’ bokum milyon e girdi’ ni bfel’ gum’ercha’rad u ga’ngin e fayleng. (John 17:3) Fa chi ke babyor ni 32 e page riy ni Mang e Ba T’uf ni Ngad Rin’ed ku Got? e ra ayuwegem. Ra yog ba ken ngom ni faan ga ra yoloy fare coupon ngam pi’ ko fapi nam ni gur e ngam guy e bin ba chuchugur ngom.

[Picture Credit Line on page 2]

Sniper nge gum’eyag u Bosnia: Reuters/Corbis-Bettmann