“Yug Um Lekeg”

“Ereray e re n’en ni ir e ke piningmed Got ngay; yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.”​—1 PETER 2:21.

1, 2. Mang fan ni n’en ni dag Jesus nib flont ni ir ba sensey e gathi kaygi tolang ni dabiyog ni ngad folwokgad rok?

JESUS KRISTUS e ir e Sensey nth’abi fel’ ni i par u fayleng. Maku, ir be’ nib flont, ma n’umngin nap’an e yafas rok nib girdi’ ma de denen. (1 Peter 2:22) Machane, be yip’ fan e re n’em ni rogon ni dag Jesus rogon ni ngan fil ban’en ngak be’ e rib mo’maw’ ngak e girdi’ nde flont ni nge folwok riy? Ri danga’.

² Rogon e n’en ni kad guyed ko fare article ni ke yan, ni t’ufeg e ir e def ko machib ni ma ta’ Jesus. Ma t’ufeg e ban’en ni gadad gubin ma rayog rodad ni ngada maruweliyed. Thin rok Got e ri ma k’aringdad ni ngad ilalgad ma ngad gelnaged e t’ufeg rodad ngak yugu boch e girdi’. (Filippi 1:9; Kolose 3:14) Jehovah e dabi ning ban’en ngak e piin ni ke sunmiy ni tin dabiyog ni ngara rin’ed. Riyul’, nbochan ni “Got e t’ufeg” ma i sunmiydad u yaan, ma aram e rayog ni nga nog ni ke ngongliydad ni fan ni ngad daged e t’ufeg. (1 John 4:8; Genesis 1:27) Ere nap’an ni gad ra bieg e thin rok Peter ni apostal ni kan ta’ ko kenggin e re article ney, ma rayog ni nge pagan’dad ngay. Rayog ni ngad leked luwan ay Kristus nib chuchugur. Riyul’, rayog ni ngad folgad ko thin ni ke yog Jesus ni gaar: “Nguum leked gag ni gubin ngiyal’.” (Luke 9:23) Gad ra weliy ko uw rogon ni ngad folwokgad rok Kristus u rogon ni i dag e t’ufeg rok, ni som’mon e fan ko thin riyul’ ni i machibnag, ngemu’ ma fan ngak e girdi’ ni ke machibnag.

Ngan Ubung e T’ufeg ko Thin Riyul’ ni Kad Filed

3. Mang fan ni boch e girdi’ e kar pirieged ni mo’maw’ ni ngar filed ban’en, machane mang fonow ni bay ko Proverbs 2:1-5?

³ Rogon ni nge t’uf rodad fare thin riyul’ ni gad be machibnag ngak yugu boch e girdi’, ma thingarda adaged ni ngad filed e pi thin riyul’ ney. U lan e fayleng e chiney, ma t’ufeg ni aram rogon e gathi ma yib nib mom ni gubin ngiyal’. Bochan piin ni fel’yangaren e dan skulnagrad nib fel’ rogon ma ke mit ngorad e ngongol nib kireb be k’aringrad ngar dabuyed ni ngar filed ban’en. Machane, baga’fan ni ngad filed ban’en rok Jehovah. Proverbs 2:1-5 (NW) e be gaar: “Fakag, faan ra fel’ e thin ni kug gog ma ga chaariy e motochiyel rog, ni fan ni ngam motoyil ko tin nib gonop, ma ra adag gum’irchaem ni nge gonopiy ban’en; maku, faan ga ra pining e tamilangan’ ma ga tolul ni fan ni ngeb gelngim ni ngam gonopiy ban’en, ma faan ga ra gay e re n’ey ni bod e silver, ma ga ra gay ni bod e machaf ni kan mithag, ma ga nangfan madgun Jehovah, ma ga pirieg e tamilangan’ rok Got.”

4. Mang e be yip’ fan ni “nge adag” fare gum’ircha’, ma mang changar e ra ayuwegdad ni ngad rin’ed e re n’ey?

⁴ Mu lemnag nu lan e pi verse ni 1 nge mada’ ko 4, ma kan fonownagdad biyay nge biyay ni ngad athamgilgad ni gathi kemus ni “nge yog ngodad” e re n’ey min “chaariy” ya ku “nguun gay ngam pirieg” ma “nguun fal’eg i gay.” Machane, mang e ra k’aringdad ni ngad rin’ed e pi n’en ney ni urngin? Mu lemnag fare bugithin ni “nge adag gum’irchaem ni nge gonopiy ban’en.” Reb e babyor e be yog ni re fonow ney “e gathi kemus ni ri be wenignag ni ngan tiyan’uy; ya be ning mmit e ngongol: ni rib m’agan’ ngay ni nge fol ko pi machib.” Ma mang e ra ayuwegdad ni ngad adaged ni ngad nanged e tin ni be fil Jehovah ngodad? Rogon ni gad ma changar nga ban’en. Ba t’uf ni ngad lemnaged ni “fare tamilangan’ rok Got” e bod e “silver” nge bod e “machaf ni kan mithag.”

5, 6. (a) Tomren ni ke yan boch e tayim ma mang e baga’ ni ma buch, ma uw rogon ni ngad ayuweged ni dabki buch e re n’em? (b) Mang fan ni ngad ululgad i uneg boch ko tamilangan’ ni kad pirieged u lan fare Bible?

⁵ Gathi mo’maw’ ni nge yog e changar ni aram rogon. Ni bod ni, fare “tamilangan’ rok Got” ni kam nang e sana ba muun ngay fare thin riyul’ ni ba m’agan’ Jehovah ngay ni girdi’ nib yul’yul’ e yad ra par u Paradis u fayleng ndariy n’umngin nap’an. (Psalm 37:28, 29) Nap’an ni kam nang e thin riyul’ ko yay ni som’mon, ma dariy e maruwar riy ni kam lemnag ni re n’ey e bod ba machaf nib riyul’, ni aram bang ko tamilangan’ ni ke sugnag gum’irchaem nge lem rom ko fare athap nge falfalan’. Ma uw rogon e chiney? Tomren ni ke yan e tayim, ma ke war e tayfan rom ko machaf rom? Ere, mu guy rogon ni ngam rin’ l’agruw ban’en. Som’mon, mu biechnag e tayfan rom, ni ngam lemnag ni gubin ngiyal’ ko mang fan ni ga be tayfan e thin riyul’ ni ke fil Jehovah ngom, ni kub muun ngay e pi n’en ni kam fil ni boor e duw ni ke yan.

⁶ Bin l’agruw, nguum uneg boch ko machaf rom nib tolang puluwon. Ra ngan lemnag, faanra kam pirieg e gem ni dam lemnag, ma kemus ni ngam ta’ nga pocket rom ma ga yan ni ke fel’ lanin’um? Ara ga ra ker boch ni ngam guy ko ka ba’? Thin rok Got e ke sug ko thin nriyul’ nib tolang puluwon ni bod fapi gems nge silver nge machaf ni kan mithag. Demtrug ko in e tin riyul’ e kam pirieg, ku rayog ni ngam pirieg boch. (Roma 11:33) Nap’an ni kam nang bang ko thin riyul’ nib biech, ma ngam fithem ko: ‘Mang fan ni ireray e machaf? Ke toarnag e re n’ey e tamilangan’ rog ko ngongol rok Jehovah ara tin nib m’agan’ ngay? Be pow’iyeg e re n’ey ni be ayuwegeg ni nggu lek luwan ay Jesus?’ Yira fal’eg i lemnag e pi deer ney ma ra ayuwegem ni nge gel e t’ufeg rom ko tin riyul’ ni ke fil Jehovah ngom.

Ngan Dag e T’ufeg ko Tin Riyul’ ni Gad Be Machibnag

7, 8. Mang boch e kanawo’ nrayog ni ngada daged ngak yugu boch e girdi’ ni thin riyul’ ni kad filed u Bible e ba t’uf rodad? Mu dag reb e kanawo’.

⁷ Nap’an ni gad be fil ban’en ngak yugu boch e girdi’, ma uw rogon ni ngad daged nib t’uf rodad e tin riyul’ ni kad filed ko Thin rok Got? Ra ngad folgad ko tin ni rin’ Jesus, ma ngarda pagan’dad ko fare Bible ko ngiyal’ ni gad be machib ma gad be fil ban’en ngak e girdi’. Dawori n’uw nap’an faram, ma girdi’ rok Got u ga’ngin yang u fayleng e kan pi’ e athamgil nga lanin’rad ni ngar fanayed fare Bible ko ngiyal’ ni yad be machibnag e girdi’. Rogon ni ga be fol ko re fonow nem, ma ngam gay e kanawo’ ni nge nang e en ni ga be machibnag ni gur e baga’ fan u wan’um e thin nu Bible ni ga be pi’ boch ngorad.​—Matthew 13:52.

⁸ Ni bod ni, ngiyal’ ni piin terrorist e kefin ra chamgad ko fare mach nu New York, ma reb e Kristiano ni ppin e bieg fare Psalm 46:1, 11 ngak e girdi’ ni mada’nag ko ngiyal’ ni be un ko machib. Som’mon me fith ngak e girdi’ ko uw rogon me yog ni ngar k’adedan’rad u tomren ni ke buch e re gafgow nem. Me motoyil nib fel’ rogon ko fulweg rorad, me pining e magar, me yog ni gaar: “Rayog ni nggu bieg reb e verse ngomed ni riyul’ ni ke baudeg lanin’ug u nap’an e re tayim ney nib mo’maw’?” Ri in i yad e siyeg, ma boor e n’en nni weliy nib fel’. Nap’an ni ra non ngak e piin fel’yangaren, ma re walag nem ni ppin e baga’ ni ma yog ni gaar: “Kug fil e Bible ko girdi’ u lan 50 e duw me ere chiney, ga manang ko mang? Dawor gu mada’nag reb e magawon ni dabiyog ni nge pithig e re ke babyor ney.” Ra ngad daged e yul’yul’ nge pasig, ma gad be dag ngak e girdi’ ni gad be tayfan mab t’uf rodad e tin ni kad filed ko Thin rok Got.​—Psalm 119:97, 105.

9, 10. Mang fan ni baga’ fan ni ngad fanayed fare Bible u nap’an ni ngad pied e fulweg ko boch e deer u murung’agen e tin ke michan’dad ngay?

⁹ Nap’an ni ra fith e girdi’ boch e deer ngodad u murung’agen e tin ke riyul’ u wan’dad, ma kari mab e kanawo’ ngodad ni ngad daged ngorad ni thin rok Got e ba t’uf rodad. Ngan fol ko tin i rin’ Jesus, ma gathi kemus ni ngad pied e fulweg nrogon e tin ni gad be lemnag. (Proverbs 3:5, 6) Danga’, ya ngad fanayed fare Bible ko ngiyal’ ni gad ra pi’ e fulweg. Ga be rus ni bay be’ ni nge fithem ma dabiyog rom ni ngam pi’ e fulweg? Mu tiyan’um nga lag’ruw ban’en nrayog ni ngam rin’ riy nib fel’.

¹⁰ Ngam rin’ e tin rayog rom ni ngam fal’eg rogom. Peter ni apostal e yol ni gaar: “Machane ngam liyorgad ngak Kristus u lanin’med, mi gimed tay ni ir e Somol romed. Mu fal’eged rogomed ni gubin ngiyal’ ni ngam pied e fulweg ko n’en nra fith be’ ngomed ni ngam weliyed u murung’agen e re n’en ni ir e ke l’agan’med ngay u fithik’ e sumunguy nge ta’ fan.” (1 Peter 3:15) Kam fal’eg rogom ni ngam ayuweg e machib ni ke mich u wan’um? Ni bod ni, faanra bay be’ ni baadag ni nge nang ko mangfan ni dabmu un boch e mmadenom ndariy u Bible, ma gathi kemus ni ngam mog ni, “Ba togopuluw e re nir ko teliw rog.” Fulweg ni aram rogon e rayog ni nge yip’ fan ni kam pag ni yugu boch e girdi’ e kar turguyed ban’en ni fan ngom ma aram sana gur bang ko reb e cult. Kab fel’ ni nga nog ni, “Thin rok Got, ni fare Bible, e be yog ni dabni rin’ e re nir” ara, “Dabi felfelan’ Got ngay.” Me ere mu fal’eg i weliy ko mang fan.​—Roma 12:1.

11. Mang talin e maruwel e ra ayuwegdad ni ngad fal’eged rogodad ni ngad pied e fulweg ko fapi deer u murung’agen e tin riyul’ ko Thin rok Got?

¹¹ Faanra ga be lemnag ni dawor mu fal’eg rogom, ma mang fan ni dabmu fanayed boch e tayim ni ngam fil fare babyor ni Reasoning From the Scriptures nfaanra ba’ ko thin rom?a Mu mel’eg boch e kenggin ni yima fith, ma ngam lemnag boch e thin nu Bible ni ngam fanay. Mu fek e babyor rom ni Reasoning nge Bible rom. Dabmu tororuw ni ngam fanay e gali ke babyor ney, ma nga mog ngak e cha’ nem ni ke fithem ni bay e talin e maruwel rom ni fan ni ngan fal’eg i gay ma ga baadag ni ngam fanay ni nge ayuwegem ngam gay e fulweg u lan e Bible ni fan ko boch e deer.

12. Mang e nga dogned nfaanra dada nanged e fulweg ko reb e deer nni fek u Bible?

¹² Mu athamgil ni dabi magafan’um ndariy fan. Dariy e girdi’ ndawori flont nrayog rok ni nge pi’ e fulweg ko urngin e deer. Ere ngiyal’ ni yibe fithem u reb e deer ni dabiyog rom ni ngam pi’ e fulweg riy, ma gubin ngiyal’ e rayog ni nga mog ni: “Kam magar ni kam fith reb e deer ni aram rogon nib fel’. Ma riyul’, ni dagu nang e fulweg riy, machane ri gu manang ni fare Bible e bay e fulweg riy. Gu baadag ni nggu gay boch ban’en u lan e Bible, ere bay gu yaliy e re deer ney ma nggu sul nggog e fulweg riy ngom.” Fulweg nib tamilang ni aram rogon, e rayog ni nge bing e kanawo’ ni ngam weliyew biyay boch nga m’on.​—Proverbs 11:2.

T’ufeg ni Fan ko Girdi’ ni Gad Be Machibnag

13. Mang fan nib t’uf ni nge par nib fel’ rogon ni nguud changargad ngak e piin ni gad be machibnag?

¹³ I dag Jesus e t’ufeg ngak e girdi’ ni ke machibnag. Uw rogon ma rayog ni ngad folwokgad rok? Dabda daged e ngongol ni ngan dariyfannag e girdi’ ni bay u toobedad. Ngad susunaged ni, “fare rran ni ba ga’ fan, ni Rran rok Got ni Gubin ma Rayog Rok” e be chuchugur i yib, ma boor u fithik’ bokum million e girdi’ ni yira thangrad. (Revelation 16:14; Jeremiah 25:33) Machane, dada nanged ko mini’ e ra magay nib fas nge mini’ e ra yim’. Yira pufthinnagrad boch nga m’on u daken fa cha’ ni ke dugliy Jehovah, ni Jesus Kristus. Nge yan i mada’ ko ngiyal’ ni ke tabab e pufthin, ma ngad lemnaged ni urngin e girdi’ e bay e athap rorad ni nge mang tapigpig rok Jehovah.​—Matthew 19:24-26; 25:31-33; Acts 17:31.

14. (a) Uw rogon ni ngad yaliyed gadad ko gad be lemnag rarogon e girdi’ fa? (b) Mang boch e kanawo’ nib fel’ nrayog ni ngad daged ni gad be lemnag rarogon yugu boch e girdi’ ma gad baadag ni ngad ayuweged yad?

¹⁴ Ma arfan ni bod rogon Jesus, ma ngad daged e runguy rodad ngak e girdi’. Rayog ni ngad fithed gadad ko: ‘Gu be runguy e girdi’ ni ke bannagrad e pi teliw, nge political, nge fol chuway ni aram e pi n’en ni bay ko re fayleng ney? Faan dabra motoyilgad ko fare thin ni gad be fek i yan ngorad, ma gu ma guy rogon ni nggu nang ko mang fan ni yad be lemnag ni aram rogon? Keb ngan’ug ni gag, ara yugu boch e girdi’ ni yad be pigpig ku Jehovah u fithik’ e yul’yul’, e aram rogon e lem rorad kafram? Kug taarebnag nga rogon ni gu ma machibnag e girdi’? Ara kug ta’ nga lanin’ug ni pi girdi’ ney e dakuriy e athap rorad?’ (Revelation 12:9) Nap’an ni ra thamiy e girdi’ ni ri gad be lemnag rarogorad, ma baga’ nra adaged e thin ni gad be wereg. (1 Peter 3:8) Runguy e ku rayog ni nge k’aringdad ni ngad daged ngak e girdi’ ni ngad mada’gad u nap’an ni gad be un ko machib ni ri gad baadag ni ngad ayuweged yad. Rayog ni ngad weliyed ngorad e pi deer rorad nge magafan’ rorad. Nap’an ni gad ra sul ngorad, ma gad ra dag ngorad ni gad ma lemnag e thin ni ka rogned kafram u nap’an ni kad guyed yad. Ma faanra bay ban’en ni rib t’uf rorad ko re ngiyal’ nem, ma ngad dogned ni ngad pied boch e ayuw ngorad.

15. Mang fan ni ngad yaliyed e tin nib fel’ ni bay ko girdi’, ma uw rogon ni ngad rin’ed ban’en ni aram rogon?

¹⁵ Ngad boded Jesus, ngada changargad ko tin nib fel’ rok e girdi’. Ma sana reb e llabthir nib muchugbil ni ri be athamgil ni nge chuguliy pi fak. Sana reb e pumoon e be athamgil ni nge ayuweg e tabinaw rok. Be’ ni ke pillibthir e be dag ni rib t’uf e tirok Got rok. Gad ma guy e pi felngin ney ko girdi’ ni gad ma mada’nag ma gad ma yog ngorad boch e tin nib fel’ u murung’agrad? Yira rin’ ni aram rogon, ma gad be ga’nag e tin nib fel’ u wan’rad nge gadad ma rayog ni nge bing e kanawo’ ni ngada machibnaged yad u murung’agen fare Gil’ilungun.​—Acts 26:2, 3.

Sobut’an e Baga’ Fan u Rogon ni Ngan Dag e T’ufeg

16. Mang fan ni baga’ fan ni ngad pared ni gad ba sumunguy ma gad ma tayfan e piin ni gad be machibnag?

¹⁶ T’ufeg rodad ngak e girdi’ ni gad be machibnag e ra k’aringdad ni ngad folgad ko thin nu Bible nib fel’ ni be ginangey ni gaar: “Tamilangan’ e ba uf, machane t’ufeg e ma gelnagey.” (1 Korinth 8:1, NW) Ri boor ban’en ni manang Jesus, machane de tolang laniyan’. Ere nap’an ni ga be wereg e machib ni tin ke mich u wan’um, ma dabmu non nrogon ni ra k’aring e maluagthin ara ngam non ni ga be dag ni ga be uf ko tamilangan’ rom. N’en ni gad be nameg e nge taw nga gum’irchaen e girdi’ ngara adaged e tin riyul’ ni rib t’uf rodad. (Kolose 4:6) Dabmu pagtalin, nap’an ni ke fonownag Peter e piin Kristiano ni ngar fal’eg rogorad ni ngar pied e fulweg ko n’en nra fith be’ ngorad, me uneg ngay fare puguran ni ngad rin’ed e re n’ey “u fithik’ e sumunguy nge ta’fan.” (1 Peter 3:15, NW) Faanra gadad ba sumunguy ma gad ma tayfarad, ma baga’ nrayog ni ngad k’aringed e girdi’ ni ngar chugurgad ngak fare Got ni gad be pigpig ngak.

17, 18. (a) Mang e gad ra rin’ ni yira yog ni dariy rogodad ni ngad manged tamachib? (b) Mang fan ni thin ni kakrom nu Bible e daki ga’fan ko piin ni yad be fol Bible?

¹⁷ De t’uf ni ngad k’aringed e girdi’ ni nga rogned e thin u murung’agdad nbochan e tamilangan’ rodad ara skul ni kad uned ngay. Faanra bay boch e girdi’ u lan e gin ga be machib riy ni dabun ni nge motoyil ngak be’ nde yog rok ni nge un ko skul nib tolang, dabmu pag ni lem rorad ni aram rogon e ra warnag lanin’um. De tiyan’ Jesus ko thin ni ma yog e girdi’ ni de yog ni nge un ko skul ni yima tayfan ko ngiyal’ nem ni ka nog rabbinic ngay; ma de pag ni nge gel ngak e lem ko girdi’ ni ba laniyan’ ma de guy rogon ni nge rin’ ban’en ni fan ni nge sap e girdi’ ngak nbochan e boor ban’en ni ke fil.​—John 7:15.

¹⁸ Sobutan’ nge t’ufeg e rib ga’ fan ko Kristiano ni piin tamachib ko skul ndemtrug feni tolang. Sensey rodad ni rib Fel’, i Jehovah, e be ayuwegdad ni nge yog ni ngada uned i wereg e machib. (2 Korinth 3:5, 6) Ma demtrug ko mang e ra yog fapi tayugang ko Kristiano ni googsur, ma de t’uf ni ngad filed e thin ni kakrom ni kan fanay u Bible ni fan ni ngad manged pi sensey ko Thin rok Got. Jehovah e i thagthagnag fare Bible ni ngan yoloy nib tamilang ni ke chuchugur ni nge urngin e girdi’ e manang fan e thin riyul’ riy nib ga’fan. Pi thin riyul’ ney e dabi thil nyugu aram rogon ni kan thiliyeg nga bokum miriay e thin. Ere yugu aram rogon ni yu ngiyal’ ma thin kakrom e ku rayog ni ngan fanay, machane gathi ban’en nri ka baga’ fan. Maku, ra ke tolangan’ be’ nbochan rayog ni nge non ni boor mit e thin ma ra m’aynag felngin nib fel’ nib t’uf ko tin riyul’ e Kristiano​—ni aram e ba mom ni ngan fil ban’en.​—1 Timothy 6:4.

19. Uw rogon ma maruwel rodad ko machib ni gadad e Kristiano e reb e pigpig?

¹⁹ Dariy e maruwar riy ni maruwel rodad ko machib ni gadad e Kristiano e ba t’uf e lem nib sobut’ riy. Gubin ngiyal’ ni gad ma mada’nag e togopuluw, nge girdi’ ni ma dariy fannagdad, maku piin ma gafgownagdad. (John 15:20) Yugu aram rogon, mara ngad wereged e machib u fithik’ e yul’yul’, ma aram gad be lebuguy mit e pigpig ku Got nib ga’ fan. Faanra ngada ululgad ni ngad pigpiggad ngak yugu boch e girdi’ ko re maruwel n’ey u fithik’ e sobut’an’, ma aram gad be folwok ko t’ufeg ni dag Jesus Kristus ngak e girdi’. Mu lemnag e tin baaray: Mu lemnag, faanra ngad machibnaged reb e biyu’ e girdi’ ni dariy fan u wan’rad ara girdi’ ma togopuluw ni fan ni ngad tawgad ku be’ ni bod e saf, gathi ri bay fan e maruwel ni gad be tay? Riyul’ ni aram rogon! Ere rogon ni ngad ululgad ko re maruwel n’ey, ni dabi mulan’dad, e ngad pigpiggad ko girdi’ ni yad bod e saf u fithik’ e yul’yul’ ni gad ra yan ngad guyed yad. Dariy e maruwar riy ni Jehovah nge Jesus e yow ra gagiyegnag ni ngan pirieg e girdi’ ni baga’farad ni aram rogon min ayuwegrad u m’on ni ngeb e tomur.​—Haggai 2:7.

20. Mang boch e kanawo’ ni gad ra fil ban’en ngak be’ riy u daken e ngongol rodad?

²⁰ Ngan fil ban’en ngak e girdi’ e aram reb e kanawo’ ni ngad daged ni ri gad baadag ni ngad pigpiggad ngak yugu boch e girdi’. Ni bod ni, gad baadag ni ngad filed ngak e girdi’ ni ngan pigpig ku Jehovah, ni ir “fare Got nib felfelan’,” e ir e th’abi fel’, ma aram e kanawoen e yafas ni ngari k’aring e felfelan’ nrayog ni ngan fol riy. (1 Timothy 1:11, NW) Nap’an ni ngar sapgad ko ngongol rodad nge rogon ni gad ma rin’ ban’en ngak e buguli yoror rodad, nge piin gadad nga skul, nge piin gad ma maruwel u taabang, ma rayog ni ngara guyed ni gad ba felfelan’ ma ke lebugan’dad? Maku, gad be fil ngak e girdi’ ni ma un ko fol Bible ni ulung ko Kristiano e reb e manab ni bay e t’ufeg riy u lan ba fayleng ni girdi’ riy e dar ma lemnag rarogon yugu boch e girdi’ ma yad ma cham. Mom ni nge guy e piin ni gad be fil ban’en ngorad nib t’uf urngin e girdi’ u lan e ulung rodad ma gad be maruwel nib elmirin ni nge aw e gapas u thilin urngin e girdi’?​—1 Peter 4:8.

21, 22. (a) Ngad yaliyed gadad u murung’agen e machib ni gad ma tay e ra pow’iydad ni ngada rin’ed e mang? (b) Mang e gadad ra weliy ko tin migid e article?

²¹ Yu ngiyal’, ma lem rodad ni ri gad baadag ni ngad wereged e machib e ra k’aringdad ni ngada yaliyed gadad. Yira rin’ ni aram rogon u fithik’ e yul’yul’, ma boor e girdi’ e yad ra pirieg ni bay rogorad ni ngar yoornaged e pigpig ni yad ma tay ma aram ngar uned ko machib ni polo’ e tayim rorad ara nga ranod nga bang nib t’uf e ayuw nib gel riy. Boch e girdi’ e kar turguyed ni ngar filed e thin nu bang ni fan ni ngar pigpiggad ko girdi’ ni kar bad ni ngar pared ko binaw rorad. Faanra kan bing e kanawo’ ngom ma ngam un ngay, ma ngam lemnag nib fel’ rogon u fithik’ e meybil. Yafas ni yibe fanay ko pigpig e ra yibnag e felfelan’ nib gel, ma ra fel’ rogoy, me gapas u laniyan’uy.​—Eklesiastes 5:12.

²² U urngin e kanawo’, ma ngad ululgad ni ngad folwokgad rok Jesus Kristus ma aram ngad gelnaged e t’ufeg rodad ko tin riyul’ nge girdi’ ni gad be fil ban’en ngorad. Ngan gelnag min dag e t’ufeg ko gali n’en ney e ra ayuwegdad ni ngad ted e def nib fel’ ni fan ni ngad manged pi sensey ni bod Kristus. Machane, uw rogon ma rayog ni ngad ubinged nga daken e re def nem? Bin migid e article e ra weliy boch e kanawo’ ni i fanay Jesus ni ngan fil ban’en ngak be’.

[Footnote]

Uw Rogon ni Ngam Pi’ e Fulweg?

• Mang e n’en ni be micheg ni tin ni rin’ Jesus ni ir reb e sensey e gathi rib mo’maw’ ni ngad folgad riy?

• Uw rogon ni ngad daged ni fapi thin riyul’ ni kad filed u Bible e ba t’uf rodad?

• Mang fan ni baga’ fan ni ngad pared nib sobut’ lanin’dad ko ngiyal’ ni be yoor i yan e tamilangan’ rodad?

• Mang boch e kanawo’ nrayog ni ngad daged e t’ufeg rodad ko girdi’ ni gad be guy rogon ni ngad filed ban’en ngorad?

[Picture on page 14]

Gad ma dag e t’ufeg rodad ngak e girdi’ ni gad ma wereg e thin nib fel’ ngorad