Nge Ga’ Fan u Wan’um e Pi Flaab ni Ke Pi’ Got Ngom

1, 2. (a) Mang dalip ban’en ni ke pi’ Jehovah ngodad nrayog ni nge ayuweg e tha’ u thildad ngak nge liyor ni gad be tay? (b) Mang e gad ra weliy ko re article ney?

JEHOVAH e ir e En th’abi flaab ni bay u ga’ngin e palpalth’ib. (1 Kron. 29:11, 12) Bochan ni ir e Chitamangidad nrib gol, ma aram fan ni ke pi’ boch e pi flaab rok ney ngak e piin ni yad manang feni ga’ fan e tirok Got ban’en. Ere, ri gad be pining e magar ngak ni ke pi’ boch e pi flaab rok nem ngodad nib muun ngay (1) Gil’ilungun, (2) machib ni gad be tay nra ayuweg e yafos ko girdi’, nge (3) tin riyul’ ni bay u lan e Thin rok! Machane, faanra dab da kol ayuwgad, ma rayog ni nge m’ay fan u wan’dad e pi n’ey ni ke yag ngodad me munmun ma gad darifannag. Ere, faanra ngad chichiiyed pa’dad ko pi n’ey, ma thingar da maruwelgad ngay nib fel’ rogon ma gad guy rogon ni nga i ga’ fan u wan’dad. I gaar Jesus: “Lanin’med e gubin ngiyal’ ni bay ko gin ni bay e flaab romed riy.”​—Luke 12:34.

² Ere, chiney e ngad weliyed rogon nrayog ni nge ga’ fan Gil’ilungun Got u wan’dad, nge machib ni gad ma tay, nge tin riyul’ ni kad filed, nge rogon ni nga i par e pi n’ey nib ga’ fan u wan’dad. Nap’an ni gad be weliy murung’agen e pi flaab ney ni ke pi’ Got ngodad, mag fal’eg i lemnag rogon nrayog ni ngari ga’ fan u wan’um.

GIL’ILUNGUN GOT E BOD ROGON BA CHURUWO’ NU L’UGUN E YAR NRIB TOLANG PULUWON

3. Mang e m’agan’ fare moon ni bay murung’agen ko fare fanathin rok Jesus ngay ni nge rin’ ya nge yag ni chuw’iy fare churuwo’ nu l’ungun e yar nrib tolang puluwon? (Mu guy e sasing ni bay u tabolngin e re article ney.)

³ Mu beeg e Matthew 13:45, 46. I weliy Jesus ba fanathin u murung’agen be’ ni ma chuway’ ni be gay e churuwo’ nu l’ugun e yar. Dariy e maruwar riy ni ke yoor e duw ni ke chuw’iy e re moon nem bokum miriay e churuwo’ nu l’ugun e yar ma ku be pi’ boch ni chuway’. Ma aram me yib i pirieg reb e pi churuwo’ nem nrib fel’ ma aram mi ri felfelan’. Machane, faanra nge yag e re churuwo’ nem ngak, ma aram e thingari pi’ ni chuway’ urngin ban’en ni bay rok. Ere gur, rayog ni ngam susunnag gelngin feni ga’ fan e re churuwo’ nem u wan’ e re moon nem?

4. Mang e gad ra rin’ ni faanra rib ga’ fan Gil’ilungun Got u wan’dad ni bod feni ga’ fan fare churuwo’ nu l’ugun e yar u wan’ fare moon ni ma chuway’?

⁴ Mang e gad be fil ko re n’ey? Tin riyul’ ni murung’agen Gil’ilungun Got e taareb rogon ko fare churuwo’ nu l’ugun e yar. Faanra rib ga’ fan u wan’dad ni bod feni ga’ fan fare churuwo’ u wan’ fare moon ni ma chuway’, ma aram e ra m’agan’dad ngay ni ngad paged fan urngin ban’en ni fan e ngad manged bagayad e piin ni yad ra un ko par u tan e re Gagiyeg ney, ma gad guy rogon ndabi mul e re athap ney u pa’dad. (Mu beeg e Mark 10:28-30.) Am lemnag l’agruw ni’ ni kar rin’ew e re n’ey.

5. Mang e m’agan’ Zakeus ngay ni nge rin’ ni fan nga Gil’ilungun Got?

⁵ Zakeus ni ir pilungen e tamukun tax e pire’ ban’en rok ni bochan e ma bannag e girdi’ nga i fek e salpiy rorad. (Luke 19:1-9) Yugu aram rogon, ma nap’an ni rung’ag laman Jesus ni be machibnag murung’agen Gil’ilungun Got, ma aram me nang feni ga’ fan e pi thin nem ni be rung’ag me rin’ ban’en ni ka chingiyal’ nem. I yog ni gaar: “Somol, mu tiyilim! Bay gu pi’ baley ko tin ni ba’ rog ban’en ngak e piin gafgow; ma faanra kug bannag be’ kug fek e tirok, ma bay gu fulweg ngak ni aningeg yay e ke mun ngay.” I m’agan’ ngay ni nge pi’ urngin e salpiy ni ke yag ngak u fithik’ e sasalap me tal ndab ki chogownag e chugum.

6. Mang boch ban’en ni ke thilyeg Rose u rogon e par rok ya nge yag ni un ko par u tan Gil’ilungun Got, ma mang fan ni rin’ e re n’ey?

⁶ Boch e duw ni ke yan, ma aram me rung’ag be’ ni ka nog Rose ngak fare thin nib fel’ ni murung’agen Gil’ilungun Got. Machane, ngiyal’ nem e re ppin ney e ku yow ma par yugu reb e ppin, maku ir e ba ga’ u reb e ulung ni yad ma guy rogon ni ngar ayuweged mat’awun e pumoon ni yad ma par e pumoon nge ppin ni yad ma par e ppin. Machane, nap’an ni ulul Rose ko fol Bible ma aram me nang feni ga’ fan e tin riyul’ ni ke fil u murung’agen Gil’ilungun Got. Machane, ku manang nib t’uf ni nge thilyeg boor ban’en u rogon e par rok. (1 Kor. 6:9, 10) Bochan ni ke taw e tin riyul’ nga gum’irchaen, ma aram e n’en ni k’aring ni nge yog ir ni nge chuw ko re ulung nem miki chuw ko fare pin ni yow ma par. Nap’an e duw ni 2009 ma aram me un Rose ko taufe, ma bin migid e duw nga tomuren ma aram me un ko regular pioneer. Ere, ba tamilang ni kab t’uf Jehovah rok nge Gil’ilungun ko pi n’en ni yima ar’arnag.​—Mark 12:29, 30.

7. Uw rogon nrayog ni ngaud pared nrib ga’ fan Gil’ilungun Got u wan’dad?

⁷ Riyul’ ni boor i gadad e ke thilyeg boor ban’en ko ngongol rok ya nge yag ni mang bagayad e piin ni yad ra un ko par u tan Gil’ilungun Got. (Rom. 12:2) Yugu aram rogon, ma dawori mus e maruwel rodad. Ya thingar da guyed rogon ni ngad nanged boch ban’en nrayog ni nge k’aringdad ni nge dabki ga’ fan Gil’ilungun Got u wan’dad, nib muun ngay chogowen e chugum ara ngaun ar’arnag e ngongol ndarngal. (Prov. 4:23; Matt. 5:27-29) Machane, ku bay ban’en ni ke pi’ Jehovah ngodad nra ayuwegdad ni nga i par Gil’ilungun nrib ga’ fan u wan’dad.

MACHIB NI GAD BE TAY NRA AYUWEG E YAFOS KO GIRDI’

8. (a) Mang fan ni yog apostal Paul ni machib ni gad ma tay e bod rogon ban’en nrib tolang puluwon ni kan tay nga lan e “rume’ ni but’”? (b) Uw rogon ni ke dag Paul nrib ga’ fan u wan’ e machib ni i tay?

⁸ Dab mu pagtalin ni ke pi’ Jesus fare maruwel ngodad ni ngad machibnaged ma gad fil ko girdi’ fare thin nib fel’ ni murung’agen Gil’ilungun Got. (Matt. 28:19, 20) Manang apostal Paul feni ga’ fan fare maruwel ni machib. I yog nre maruwel ney ni kan tay chilen ngodad ni ngad rin’ed e bod rogon ban’en nrib tolang puluwon ni kan tay nga lan e “rume’ ni but’.” (2 Kor. 4:7; 1 Tim. 1:12) Yugu aram rogon ndawor da flontgad ma gad bod e rume’ ni but’ nib mom ni nge kireb, machane thin ni gad ma machibnag e rayog ni nge yognag e yafos ndariy n’umngin nap’an ngodad nge piin ni yad ra motoyil ngodad. Bochan ni manang Paul e re n’ey, ma aram fan ni yog ni gaar: “Urngin e pi n’ey ni gu be rin’ e yigoo fan ko Thin Nib Fel’ ni yib rok Got, ma fan e ngki fel’ rogog ko birog e f’oth ni ba’ riy [“fan e nge yag ni ngkug weliy ngak yugu boch e girdi’,” NW].” (1 Kor. 9:23) Arrogon, bochan nrib ga’ fan fare maruwel ni machib u wan’ Paul, ma aram e n’en ni k’aring ni nge maruwel nib gel ni nge ayuweg boch e girdi’ ni ngar manged pi gachalpen Jesus. (Mu beeg e Roma 1:14, 15; 2 Timothy 4:2.) Ku aram e n’en ni ayuweg ni nge athamgil u fithik’ e gafgow ni un tay ngak. (1 Thess. 2:2) Ere, uw rogon nrayog ni ngad daged nib ga’ fan fare maruwel ni machib u wan’dad ni bod rogon apostal Paul?

9. Mang boch e kanawo’ nrayog ni ngad daged riy nib ga’ fan fare maruwel ni machib u wan’dad?

⁹ Reb e kanawo’ ni i dag Paul nib ga’ fan fare maruwel ni machib u wan’ e aram e guy rogon ni nge machibnag e girdi’ u nap’an nra mab e kanawo’ ngak. Ku arrogodad e ngiyal’ ney ni gad ma machib u fithik’ e sabethin, ngu fithik’ e girdi’ ni yoor, ngu mit e tabinaw i yan ni bod rogon ni i rin’ e pi apostal nge tin som’on e Kristiano. (Acts 5:42; 20:20) Gad ma guy rogon ni ngad yoornaged e tayim rodad ni fan ko machib ni aram e gad ma un ko pioneer ni ayuw ara regular pioneer u rogon nrayog u rogodad. Ku rayog ni ngad filed yugu reb e thin, ara darod da pared nga yugu reb e binaw ni bay ko nam rodad, fa reb e darod nga yugu reb e nam nib t’uf e ayuw ko machib riy.​—Acts 16:9, 10.

10. Uw rogon ni kan tow’athnag Irene ko n’en ni ke rin’ ya nge yag ni machibnag fare thin nib fel’?

¹⁰ Am lemnag e n’en ni rin’ Irene nreb e walag nib pin nib muchugbil ni ma par u Meriken. Re walag ney e ri baadag ni nge machibnag e girdi’ nu Russia ni yad ma par u Meriken. Ere, nap’an ni tabab i machibnag e pi girdi’ nem ko duw ni 1993, ma kemus ni 20 e tamachib ni yad ma un nga reb e ulung ni bay u New York City ni fan ngak e piin ni yad ma non ni thin nu Russia. Sogonap’an 20 e duw ni ke maruwel Irene nib gel ni be ayuweg e girdi’ ni yad ma non ko re thin nem. I yog ni gaar: “Ke mada’ ko chiney ma dawori yag ni nggu non ni thin nu Russia ni ngari yan i bod rogon be’ ko re nam nem.” Yugu aram rogon, ma ke tow’athnag Jehovah ko maruwel ni ke tay u fithik’ e pasig, maku arrogon yugu boch e walag ni yad bod e re walag ney. Chiney e ke gaman nel’ e ulung u New York City ni fan ngak e piin ni yad ma non ni thin nu Russia. Ma ragag nge lal ko piin ni i fil Irene e Bible ngorad e kar uned ko taufe. Bay boch i yad ni ma pigpig u Bethel, ma boch e yad be pigpig ni yad boch e pioneer, ma boch e kar manged piilal u lan e ulung. I yog Irene ni gaar, “Faan gomanga gu nameg yugu boch ban’en ni ug lemnag ni nggu rin’ kafram, ma da gur lemnag ni bay reb e pi n’em nra yibnag e felfelan’ ngog ni bod rogon e biney e maruwel ni kug rin’.” Arrogon, re walag ney e rib ga’ fan u wan’ e machib ni ma tay!

11. Mang angin ni ke yib ni bochan e gad be ulul ko machib ni yugu aram rogon ni yibe togopuluw ngodad?

¹¹ Faanra rib ga’ fan u wan’dad e machib ni gad ma tay, ma aram e gad ra folwok rok apostal Paul ngad ululgad ko machib ni yugu aram rogon ni yibe togopuluw ngodad. (Acts 14:19-22) U thilin e duw ni 1930 nge 1944, mab gel e togopuluw ni un tay ko pi walagdad ni yad ma par u Meriken. Yugu aram rogon mar pared ni yad ba mudugil mar ululgad ko machib ni bod rogon Paul. Machane, boor yay ni u ranod nga tagil’ e puf oloboch ni yad be guy rogon ni ngan pi’ mat’awrad ni ngar machibgad. Ere, nap’an e duw ni 1943 u nap’an ni be weliy Brother Nathan H. Knorr murung’agen reb e case ni ke gelnag pi walagdad ko Bin Th’abi Tolang e Tagil’ e Puf Oloboch u Meriken, ma aram me yog ni gaar: “Kad gelgad ni bochan e athamgil ni kam ted. Faan gomanga tal e pi walag ko machib, ma dab ni fekdad nga tagil’ e puf oloboch; machane bochan e machib ni gimed be tay, ni gimed e pi tamachib, nge pi walag u ga’ngin yang e fayleng ndamur talgad, ma aram fan ni yibe gafgownagdad. Bochan ni ke par e girdi’ rok Somol ni yad ba mudugil, ma aram e n’en ni ke ayuwegdad ni ngad gelgad.” Ku arrogon pi walagdad u yugu boch e nam ni ku ireray e n’en ni ke ayuwegrad ni ngar gelgad u boch e case ni kan fekrad riy nga tagil’ e puf oloboch. Ere, riyul’ ni faanra rib ga’ fan fare maruwel ni machib u wan’dad, ma aram e rayog ni nge ayuwegdad ni ngad gelgad ko togopuluw ni yibe tay ngodad.

12. Mang e kam dugliy ni ngam rin’ ni fan ko machib ni ga be tay?

¹² Faanra ud ted fare maruwel ni machib ni bod rogon ba machaf nib tolang puluwon ni ke pi’ Jehovah ngodad, ma aram e dabi gaman u wan’dad ni kemus ni ngaud machibgad ni bochan e ngaud “theeged e awa” rodad. Ya gad ra athamgil u rogon nrayog rodad ni ngad ‘mu’naged e maruwel ni kan pi’ ngodad ni ngad rin’ed, ni aram e ngad weliyed ngan nang e Thin Nib Fel’ ni yib rok Got.’ (Acts 20:24; 2 Tim. 4:5) Machane, mang e n’en ni ngad machibnaged ko girdi’? A kum lemnag yugu reb e ban’en ni ke pi’ Got ngodad nrib manigil.

FARE SINGGIL NI GAD MA CHAARIY E TIN RIYUL’ NI KAD FILED NGAY

13, 14. Mang fare ‘singgil ni yima chaariy ban’en riy’ ni weliy Jesus murung’agen u Matthew 13:52? Uw rogon ni gad ma suguy e re singgil nem?

¹³ Bin dalip e flaab ni ke yib rok Jehovah e aram e tin riyul’ ni ke fil ngodad. Jehovah e ir e Got ko tin riyul’. (2 Sam. 7:28) Bochan ni ir e Chitamangidad nib gol ngodad, ma aram fan ni baadag ni nge fil e pi thin nib riyul’ ney ngak e piin ni bay madgun u wan’rad. Ka nap’an e ngiyal’ nda rung’aged e tin riyul’ keb i mada’ ko chiney, ma ke yag ni ngad yoornaged e pi n’en ni gad be fil u daken e Thin rok ni aram e Bible, nge pi babyor rodad ni yima ngongliy nib puluw e thin riy ko Bible, nge pi convention, nge assembly ni gad ma un ngay, nge pi muulung ni gad ma tay u gubin e wik. Ra yoor e tin riyul’ ni gad be fil, ma aram e gad be suguy fare ‘singgil ni gad ma chaariy ban’en riy’ ni faani weliy Jesus murung’agen ni bay e tin kakrom nge tin nib beech e machib riy nib riyul’. (Mu beeg e Matthew 13:52.) Faan gad ra gay e pi machib nriyul’ ney ni bod rogon ni gad be gay e machaf nib tolang puluwon, ma aram e ra ayuwegdad Jehovah ni ngad pirieged boch e machib ni kab beech mab riyul’ nrayog ni ngad chaariyed nga lan fare ‘singgil ni gad ma chaariy ban’en riy.’ (Mu beeg e Proverbs 2:4-7.) Uw rogon ni ngad rin’ed e re n’ey?

¹⁴ Thingar ud ted e fol Bible ni goo gadad nib fel’ rogon ma gad fal’eg i gay murung’agen boch ban’en ni kad filed u lan e Thin rok Got nge pi babyor rodad. Re n’ey e ra ayuwegdad ni ngad filed boch ban’en ni kab “beech” ni aram e be yip’ fan ni ngad filed boch ban’en ndad nanged kafram. (Josh. 1:8, 9; Ps. 1:2, 3) Nap’an nni ngongliy e ken nth’abi som’on e re ke babyor ney ko July 1879, mi nog e pi thin ni baaray riy ni be gaar: “Tin riyul’ e bod rogon bochi floras u map’an. Chi floras nem e rib mo’maw’ ni ngan guy ni bochan e ke ing e pan. Faanra ga baadag ni nge yag e chi floras nem ngom, ma thingar mu gay nib fel’ rogon . . . . Ma nap’an ni ga ra pirieg, ma thingar mu lumel nga but’ ngam t’ar. Ere, dab mu lemnag nib gaman ni kemus ni ngam nang taab n’en u murung’agen e tin riyul’, ya bod rogon fare floras nnap’an ni ga ra pirieg taareb, mab mudugil ni ga ra adag ni ngkum gay yugu boch ni boor. . . . Ere, ba t’uf ni ngam guy rogon ni nge yoor ban’en ni ngam nang.” Arrogon, thingar da guyed rogon ni ngad suguyed fare singgil ni gad ma chaariy e tin riyul’ ngay ni kad filed.

15. Mang boch e machib nib riyul’ ni kad filed nrayog ni nga dogned ni aram boch e machib ni ke “kakrom”? Mang boch e pi machib ney nrib ga’ fan u wan’um?

¹⁵ Nap’an nda tababgad ni ngaud chaggad ko girdi’ rok Got, ma aram e ngiyal’ nda filed boch e machib nib riyul’ ma rib manigil. Pi machib nem e rayog ni nga dogned ni aram boch ban’en ni ke “kakrom” ni kad filed ni bochan e aram boch ban’en nsom’on nda filed me ga’ fan u wan’dad. Mang boch e pi machib nem? Boch e pi machib nem e aram e kad filed ni Jehovah e Ir e Ke Sunmiy urngin ban’en ma ir e Ke Pi’ e Yafos ngodad, ma bay e n’en nib m’agan’ ngay ni fan ko girdi’. Kud filed ni bochan e gad ba t’uf rok Got, ma aram me pi’ Fak ni nge biyuliydad ya nge yag nda chuwgad u tan gelngin e denen nge yam’. Maku reb e, kad filed ni Gil’ilungun Got e aram e n’en nra chuweg urngin e gafgow ni be yib ko girdi’, ma bay e athap rodad nrayog ni ngad uned ko par u roy u fayleng u fithik’ e gapas nge felfelan’ u tan Gil’ilungun Got.​—John 3:16; Rev. 4:11; 21:3, 4.

16. Mang e ba t’uf ni ngad rin’ed u nap’an ni yira thilyeg rogon ni yibe weliy boch e machib nib riyul’ ni kad filed u lan e Bible?

¹⁶ Bay yu ngiyal’ ni yima thilyeg rogon ni yibe weliy boch e yiiy ara thin nu Bible ni kad filed. Ere, nap’an ni yira tamilangnag e pi machib ney, mab t’uf ni ngad ted e tayim ni ngad fal’eged i fil murung’agen e pi n’em ma gad fal’eg i lemnag. (Acts 17:11; 1 Tim. 4:15) Gathi kemus nib t’uf ni ngad nanged e tin baaray ban’en nib gagiyel nib thil u rogon ni un weliy e pi machib ney kafram nge rogon ni ka fini tamilang e chiney, ya kub t’uf ni ngad nanged murung’agen nochi ban’en riy ni gathi rib gagiyel ni kan thilyeg rogon ni yibe weliy. Faan gad ra rin’ ni aray rogon, ma aram e bod ni gad be fek fapi machib nib riyul’ ma kab beech ni ka fin nda filed gad be suguy nga lan fare singgil ni gad ma chaariy ban’en riy. Mang nib ga’ fan ni ngad athamgilgad ngad rin’ed e re n’ey?

17, 18. Uw rogon nrayog ni nge ayuwegdad gelngin Got nib thothup?

¹⁷ I yog Jesus nrayog ni nge ayuwegdad gelngin Got nib thothup ni nge yib ngan’dad boch ban’en ni kad filed kafram. (John 14:25, 26) Ere, uw rogon nrayog ni nge ayuwegdad e re n’ey u nap’an ni gad be machibnag fare thin nib fel’? Am lemnag e n’en ni buch rok reb e walag ni ka nog Peter ngak. Nap’an e duw ni 1970 u nap’an ni ke gaman 19 e duw rok ma aram me tabab ko pigpig u Bethel u Britain. Ere, nap’an ni be yan ko machib u mit e tabinaw i yan, ma aram me mada’nag be’ nib pumoon nib n’uw sorben. Ma aram me fith Peter ngak fare moon ko baadag ni nge tamilang e Bible u wan’ fa danga’. I gin fare moon ko n’en ni yog Peter ngak, ya ir reb e tayugang’ ko teliw rok e pi Jew, ma aram me yog ngak nre gi n’em ni ke yan ngay e tafen e pi tayugang’ ko teliw rok e pi Jew. Ere, guy rogon ni nge skengnag Peter ni aram e fith ni gaar, “Ere, mang thin e ni yoloy fare babyor rok Daniel riy?” Me gaar Peter ngak, “Bang riy e ni yoloy ko thin ni Aramaic.” I yog Peter ni gaar: “Ke gin e re moon nem ngay ni gu manang e fulweg ko re deer nem, machane ku arrogog ni ka rug gin! Ya dag nang ko uw rogon ni ke yag ni nggu nang e fulweg ko re deer nem. Ere, nap’an nug sul nga tabinaw rog e rofen nem ma aram mug wan gu yaliy e pi Wulyang ko Damit nge Awake! ni ka ug beeg u boch e pul u m’on riy, ma aram mug pirieg reb e article riy ni be yog ni fare babyor rok Daniel e ni yoloy ko thin ni Aramaic.” (Dan. 2:4, ftn.) Arrogon, rayog ni nge ayuwegdad gelngin Got nib thothup ni nge yib ngan’dad boch ban’en ni kad beeged u lan e Bible ara pi babyor rodad, ma kad chaariyed nga lan fare singgil ni gad ma chaariy ban’en riy.​—Luke 12:11, 12; 21:13-15.

¹⁸ Faanra rib ga’ fan u wan’dad e gonop ni yib rok Jehovah, ma aram e gad ra adag ni ngad suguyed e pi machib nib riyul’ ni ke kakrom nge tin ni kab beech ni kad filed nga lan fare singgil ni gad ma chaariy ban’en riy. Ma faanra ud rin’ed e re n’ey, ma aram e rayog ni nge mom ngodad ni ngad filed e tin riyul’ ngak yugu boch e girdi’.

MU AYUWEG E PI FLAAB NEY NI KE YAG NGOM

19. Mang fan nthingar da ayuweged e pi flaab ni ke pi’ Got ngodad?

¹⁹ Gubin ngiyal’ ni be guy Satan nge re fayleng ney rogon ni nge k’aringdad ni nge dab ki ga’ fan u wan’dad fapi flaab ni ke yag ngodad ni kad filed murung’agen ko re article ney. Ere, faanra dab da kol ayuwgad ma rayog ni ngad awgad ko re wup ney. Ba mom nrayog ni ngad adaged ni ngad uned nga reb e maruwel nib tolang puluwon, ara ud athapeged ni nge yag boor e chugum nib tolang puluwon ngodad, ara ud ufgad ko pi n’en ni bay rodad. I puguran apostal John ngodad nre fayleng ney nge tin ni bay riy ni yima ar’arnag e bayi m’ay. (1 John 2:15-17) Ere, thingar da guyed rogon ni ngaud pared nib ga’ fan u wan’dad e pi flaab ni ke pi’ Got ngodad.

20. Mang e kam dugliy u wan’um ni ngam rin’ ya nge yag nim ayuweg e pi flaab ni ke pi’ Got ngom ni nga i par ndariy ban’en nra buch riy?

²⁰ Thingari m’agan’um ngay ni ngam pag e pi n’en nrayog ni nge k’aringem ni nge dab ki ga’ fan Gil’ilungun Got u wan’um. Mag ulul ko machib ni ga be tay u fithik’ e pasig, mag guy rogon ni ngaum par nib ga’ fan e re maruwel ney u wan’um ni ir e ra ayuweg e yafos ko girdi’. Maku reb e, ngam ulul i gay e tin riyul’ ni bay u lan e Bible. Faan ga ra rin’ e pi n’ey, ma aram e ga be chaariy e ‘flaab rom nga tharmiy, ko gin ndabi lich riy, ma dariy ba moro’ro’ nrayog ni nge ded pa’ ngay, ma dabi kirebnag e ngal. Ya lanin’um e gubin ngiyal’ ni bay ko gin ni bay e flaab rom riy.’​—Luke 12:33, 34.