Bay Rodad e Pi N’en nib Ga’ Fan ni Ngad Pied Boch ko Girdi’
1 Thin Rok Got e ba sug e thin nib fel’ riy ni bod e machaf nrib ga’ fan u wan’dad. (Ps. 12:6; 119:11, 14) Bay ba ngiyal’ ni yog Jesus boch e fanathin ni nge tamilangnag boch ban’en u murung’agen Gil’ilungun Got. Me fith pi gachalpen ni gaar: “Kam nanged fan e pi n’ey fa dawor?” Ma faan rogned ni kar nanged fan ma aram me gaar ngorad: “Fan e re n’ey e gubin e tamachib ko Motochiyel ni kar filed murung’agen e gagiyeg ni yib u tharmiy kar manged pi gachalpeg e yad bod be’ ni bay e naun rok ni yan i fek e tin nib beech nge tin nib kakrom ban’en u lan e singgil rok nma chaariy ban’en riy.”—Matt. 13:1-52.
2 Thin riyul’ ko Bible nda filed ko som’on e rayog ni ngan lemnag ni ke bod e machaf ni ke kakrom. Gad ma mon’og i yan ko fol Bible ma gad ma fil e tin nib toar ban’en ko Thin Rok Got, ma gad ma pirieg yugu boch e thin nriyul’ ni aram e tin nib beech ban’en ni gad ma chaariy ni bod e machaf. (1 Kor. 2:7) Ma “fare tapigpig nib yul’yul’ mab gonop” e ma ayuwegdad ni ngad nanged fan boch ban’en nib beech mab ga’ fan.—Matt. 24:45.
3 Demtrug ko ke kakrom fa kab beech e pi thin rok Got ney, ma rib ga’ fan u wan’dad ni bod e machaf. Re n’ey e ma k’aringdad ni ngad guyed rogon ni ngad salapgad i fil e Thin Rok Got ngak e girdi’.
4 Ngan Fil Ban’en ko Kanawo’ ni Dag Jesus: I athamgil Jesus ni nge weliy e thin rok Got ngak e girdi’ ni bochan e rib ga’ fan u wan’. Ki mada’ ko ngiyal’ ni ke magar ma de tal i pi’ e tin nib ga’ fan ni bay rok.—John 4:6-14.
5 T’ufeg rok Jesus ngak e piin ni kar gafgowgad ko tirok Got ban’en e ir e k’aring ni nge weliy ngorad e thin nriyul’ ni yib rok Got ni ma pi’ e yafos. (Ps. 72:13) Bochan ni runguy e piin ni keb e bilig ngorad ko tirok Got ban’en “ma aram me tabab i machibnag boor ban’en ngorad.”—Mark 6:34.
6 Mfolwok ku Jesus: Faanra rib ga’ fan u wan’dad e Thin rok Got ni kad nanged, ma gad ra bod Jesus ngad adaged ni ngad filed ngak e girdi’ e pi n’en nib ga’ fan ni bay ko Bible. (Prov. 2:1-5) Yugu aram rogon ni bay yu ngiyal’ ni gad ma magar machane ka gad ma weliy e thin nriyul’ ko Bible u fithik’ e pasig. (Mark 6:34) Faanra gad ma tayfan e pi n’ey nib ga’ fan ni bay rodad ma aram e ra k’aringdad ni ngad uned ko machib nge mus rogodad riy.