Mu Dag nib Ga’ Fan u Wan’um e Pi Tow’ath Ndabiyog ni Ngan Guy

1. Mang e yog Jesus u murung’agen e pi tow’ath rodad ni bay u tharmiy?

GATHI gubin e tow’ath nrayog ni ngan guy. Bin riyul’ riy e, tin th’abi fel’ e tow’ath e dabiyog ni ngan guy. I weliy Jesus ko fare Welthin Rok u Daken e Burey ni pi tow’ath ni bay u tharmiy e kab gel e fel’ riy ko salpiy nge chugum. Ki yog ni gaar: “Lanin’med e gubin ngiyal’ ni bay i par ko gin ni bay e flaab romed riy.” (Matt. 6:19-21) Ra ba ga’ fan ban’en u wan’dad ma ri gad ra guy rogon ni nge yag fare n’em ngodad. Rogon ni ngad ulunguyed e ‘flaab rodad u tharmiy’ e aram e nge par nib fel’ thidad u wan’ Got ara ngad pared ni gad ba fel’ u wan’. Tiney e tow’ath e yog Jesus ndabiyog ni nge kireb ara ni iring.

2. (a) Mang e pi’ Paul e athamgil nga lanin’dad ni nge l’agan’dad ngay nrogon ni bay ko 2 Korinth 4:17, 18? (b) Mang e gad ra weliy ko re article ney?

² I pi’ apostal Paul e athamgil nga lanin’dad ni nge l’agan’dad ko “pi n’en ndanir guy nga owchey.” (Mu beeg e 2 Korinth 4:17, 18.) Pi tow’ath ney ndabiyog ni ngan guy e ba muun ngay e pi n’en ni gad ra felfelan’ ngay u lan e bin nib beech e fayleng rok Got. Gad ra weliy ko re article ney murung’agen e pi tow’ath ndabiyog ni ngan guy nrayog ni nge yib angin ngodad e chiney. Pi tow’ath ney e aram e tha’ u thildad Got, nge meybil ni gad ma tay, nge ayuw ni ma pi’ gelngin Got nib thothup ngodad, nge ayuw ni ma pi’ Jehovah, nge Jesus, nge pi engel ngodad u nap’an e machib. Ku gad ra weliy rogon ni ngad daged nib ga’ fan u wan’dad e pi tow’ath ney ndabiyog ni ngan guy.

THA’ U THILDAD JEHOVAH

3. Mang e bin th’abi fel’ e tow’ath ni bay ndabiyog ni ngan guy? Uw rogon ni ke yag e re tow’ath ney ngodad?

³ Bin th’abi fel’ e tow’ath ni bay ndabiyog ni ngan guy e aram e tha’ u thildad Jehovah Got. (Ps. 25:14) Uw rogon nrayog rok Got ni nge m’ag fager ko girdi’ ndawor ra flontgad ma ka be par nib thothup? Rayog ni nge rin’ e re n’ey ya fare biyul ni maligach ni pi’ Jesus e ke “chuweg e denen rok e girdi’ nu fayleng.” (John 1:29) U m’on ni nge yim’ Jesus, ma manang Jehovah nra par nib yul’yul’ nge mada’ ko ngiyal’ nra yim’ ya nge yag ni ayuweg e yafos ko girdi’. Ireray fan nrayog ni nge fel’ e tha’ u thilin Got nge piin ur moyed u m’on ni nge yim’ Kristus.​—Rom. 3:25.

4. Mu weliy murung’agen boch e pumoon ni ur moyed u m’on ni nge yim’ Kristus nra manged fager rok Got.

⁴ Am lemnag boch e pumoon ni ur moyed u m’on ni nge yim’ Kristus nra manged fager rok Got. Abraham e be’ nib moon nrib gel e michan’ rok. Ba pag 1,000 e duw nga tomuren ni yim’ Abraham, me yog Jehovah ni Abraham e “fager” rok. (Isa. 41:8) Ere mus ko yam’ ma dabiyog ni nge dareg Jehovah rok e pi fager rok nib chugur thilrad. Ere ka bay Abraham u laniyan’ Jehovah. (Luke 20:37, 38) Job e ku ir bagayad e pi pumoon ney. Nap’an ni ke muulung gubin e pi engel nga taabang u tharmiy, me weliy Jehovah fel’ngin Job. I yog Jehovah ni Job e ir be’ nib “yul’yul’ ma ba fel’” ma bay madgun Got u “wan’ ma ma ayuw ni nge dabi ngongliy e kireb.” (Job 1:6-8) Ma uw rogon Daniel u wan’ Jehovah ni ir be’ ni i pigpig ngak Got nib yul’yul’ ni yugu aram rogon nsogonap’an 80 e duw ni i par u bbinaw ni girdi’ riy e darur liyorgad ngak Jehovah? Dalip yay ni micheg e engel ngak e re moon ney ni ke pilibthir nrib “t’uf” rok Got. (Dan. 9:23; 10:11, 19) Rayog ni nge pagan’dad nri baadag Jehovah ni nge faseg e pi fager rok ni yad ba t’uf rok ni kar m’ad.​—Job 14:15.

5. Mang e ba t’uf ni ngam rin’ ni faanra ngam mang fager rok Jehovah nib chugur e tha’ u thilmew?

⁵ Uw urngin e girdi’ ndawor ra flontgad e ngiyal’ ney nib chugur e tha’ u thilrad Jehovah? Bokum milyon. Boor e pumoon, nge ppin, nge bitir u ga’ngin yang e fayleng ni yad be dag ko ngongol rorad nriyul’ ni yad boch e fager rok Got. Ma fek Jehovah e “girdi’ nib mat’aw ngar manged tafager rok.” (Prov. 3:32, BT) Rayog ni ngar manged fager rok Jehovah ni bochan e michan’ rorad ko fare biyul ni maligach ni pi’ Jesus. Bochan e re biyul nem, ma rayog ni ngad manged fager rok Jehovah ma gad ognag e yafos rorad ngak ngad uned ko taufe. Gad ra rin’ e pi n’ey nib ga’ fan, ma aram e rayog ni ngad uned ngak bokum milyon e Kristiano ni kar ognaged e yafos rodad kar uned ko taufe, ma kar manged “tafager” rok e En th’abi manigil ni bay u palpalth’ib ma rib chugur e tha’ u thilrad!

6. Uw rogon ni ngad daged nib ga’ fan u wan’dad e tha’ u thildad Got?

⁶ Uw rogon ni ngad daged nib ga’ fan u wan’dad e tha’ u thildad Got? Thingar da pared ni gad ba yul’yul’ ngak Got ndemtrug ko uw n’umngin nap’an ni kad pigpiggad ngak Jehovah u lan e re m’ag ney. Gad ra rin’ e re n’ey, ma gad ra bod Abraham nge Job ni ur parew ni yow ba yul’yul’ ngak Got nib pag raay e duw. Ku thingari ga’ fan u wan’dad e tha’ u thildad Got ni bod rogon Daniel ko bin ngad guyed rogon ni ngad ayuweged e yafos rodad. (Dan. 6:7, 10, 16, 22) Rayog ni nge ayuwegdad Jehovah ni ngad athamgilgad u fithik’ urngin mit e skeng ni gad ra mada’nag me par e tha’ u thildad nib fel’.

MEYBIL NI GAD MA TAY

7. (a) Uw rogon u wan’ Jehovah e meybil rodad nrogon nib puluw ko Proverbs 15:8? (b) Uw rogon ni ma fulweg Jehovah taban e meybil rodad?

⁷ Ku reb e tow’ath ndabiyog ni ngan guy e aram e meybil ni gad ma tay. Pi fager nib chugur e tha’ u thilrad e yad baadag ni yad ma weliy e lem rorad nge pi n’en bay u lanin’rad ngorad. Aray rogon e tha’ u thildad Jehovah, fa? Arrogon! Ma non Jehovah ngodad u daken e Thin rok, maku aram e gin ma weliy e lem rok riy ngodad nge pi n’en bay u laniyan’. Gadad e gad ma non ngak u daken e meybil, ma rayog ni ngad weliyed ngak e pi n’en gad be lemnag nge pi n’en bay u fithik’ i lanin’dad. Baadag Jehovah ni nge motoyil ko meybil rodad. (Mu beeg e Proverbs 15:8.) Bochan ni Jehovah e ir e Fager rodad ni gad ba t’uf rok, ma aram fan ni gathi kemus ni ma motoyil ko meybil rodad ya ku ma fulweg taban. Bay yu ngiyal’ ni ma fulweg taban e meybil rodad nib papey, ma yu ngiyal’ e thingar da yibilayed ban’en ni boor yay. Machane rayog ni nge pagan’dad nra fulweg taban e meybil rodad ko ngiyal’ nge rogon nib puluw riy. Bin riyul’ riy e, rayog ni nge fulweg Got taban e meybil rodad u reb e kanawo’ nib thil nga rogon ni kad lemnaged. Bod nrayog ndabi chuweg reb e skeng ni gad be mada’nag, machane ra pi’ e gonop ngodad miki pi’ gelngidad ni ngad “k’adedan’dad” riy.​—1 Kor. 10:13.

8. Uw rogon ni ngad daged nib ga’ fan u wan’dad e meybil ni gad ma tay ni aram reb e tow’ath ni bay rodad?

⁸ Uw rogon ni ngad daged nib ga’ fan u wan’dad e meybil ni gad ma tay ni aram reb e tow’ath ni bay rodad? Reb e kanawo’ e aram e ngad folgad ko fare fonow rok Jehovah ni be yog ni ngaud “meybilgad ni gubin ngiyal’.” (1 Thess. 5:17) Der ma towasariydad Jehovah ni ngad meybilgad ngak. Ya ma tayfan e puf rogon ni ke pi’ ngodad ma be pi’ e athamgil nga lanin’dad ni ngaud “meybilgad ni gubin ngiyal’.” (Rom. 12:12) Ere rayog ni ngad daged nib ga’ fan e re tow’ath ney u wan’dad ni aram e ngaud meybilgad ni boor yay u reb e rran. Bin riyul’ riy e, susun e ku dab da paged talin ni ngad pininged e magar nge sorok ngak Jehovah u lan e meybil rodad.​—Ps. 145:2, 3.

9. Uw rogon e meybil u wan’ reb e walag ni pumoon? Uw rogon e meybil u wan’um?

⁹ Ra be n’uw nap’an ni gad be pigpig ngak Jehovah ma gad be guy rogon ni be fulweg taban e meybil rodad, ma aram e rra ga’ fan e meybil ni gad ma tay u wan’dad. Am lemnag e n’en ni yog Chris nreb e walag ni pumoon ni ke gaman 47 e duw ni ke pigpig u polo’ e tayim rok. I gaar: “Rug baadag ni gu ma od nri kakadbul nggu meybil ngak Jehovah. Rib manigil ni ngan non ngak Jehovah u nap’an ni be for e yal’ nga lang ma gubin ban’en nib fel’ yaan! Re n’ey e ma k’aringeg ni nggu pining e magar ngak nga urngin e tow’ath ni ke pi’ nib muun ngay e meybil ni gad ma tay. Ma ra nep’ u tomuren ni kug mu’ ko meybil, ma rayog ni nggu mol ndariy ban’en ni be magawonnag e nangan’ rog.”

GELNGIN GOT NIB THOTHUP

10. Mang fan nsusun e nge ga’ fan gelngin Got nib thothup u wan’dad?

¹⁰ Gelngin Got nib thothup e ku aram reb e tow’ath ndabiyog ni ngan guy nsusun e nge ga’ fan u wan’dad. I pi’ Jesus e athamgil nga lanin’dad ni ngaud yibilayed gelngin Got nib thothup. (Luke 11:9, 13) Ma fanay Jehovah gelngin nib thothup ni nge pi’ gelngidad, ma ‘re gelngin nem e ba th’abi gel.’ (2 Kor. 4:7; Acts 1:8) Faanra bay gelngin Got nib thothup ni be ayuwegdad, ma demtrug e magawon nrayog ni ngad athamgilgad u fithik’.

11. Mang reb e kanawo’ nrayog ni nge ayuwegdad gelngin Got nib thothup riy?

¹¹ Gelngin Got nib thothup e rayog ni nge ayuwegdad ni ngad rin’ed e maruwel ni kan pi’ ngodad ni fan ko pigpig rodad ngak Got. Gelngin Got nib thothup e rayog ni nge mon’ognag e salap rodad. Ma ayuwegdad ni ngad rin’ed e n’en nib milfan ngodad ni gadad boch e Kristiano. Gad manang ni kemus nu daken gelngin Got nib thothup e rayog ni nge yib angin e maruwel ni gad be rin’ riy ni fan ko pigpig rodad ngak Got.

12. Mang e rayog ni ngad yibilayed gelngin Got nib thothup ni nge ayuwegdad ni ngad rin’ed nrogon nib puluw ko Psalm 139:23, 24?

¹² Ku reb e kanawo’ nrayog ni ngad daged nib ga’ fan gelngin Got nib thothup u wan’dad e aram e ngad yibilayed ni nge ayuwegdad ni ngad nanged ko bay e lem ara ar’ar nib kireb u gum’ircha’dad fa dariy. (Mu beeg e Psalm 139:23, 24.) Faan gad ra yibilay e re n’ey, ma rayog ni nge ayuwegdad Jehovah u daken gelngin nib thothup ni ngad guyed boch e lem ara ar’ar nib kireb ni bay rodad. Ma faanra kad guyed ni bay e pi n’ey u gum’ircha’dad, ma susun e ngad yibilayed gelngin Got nib thothup ni nge pi’ gelngidad ni ngad chuweged e mit ney e lem ara ar’ar nib kireb. Gad ra rin’ e re n’ey, ma aram e gad be dag ni kad dugliyed u wan’dad ni ngad siyeged gubin ban’en nrayog ni nge k’aring Jehovah ni nge dabki ayuwegdad u daken gelngin nib thothup.​—Efe. 4:30.

13. Uw rogon nrayog ni ngari ga’ fan gelngin Got nib thothup u wan’dad?

¹³ Ku rayog ni ngari ga’ fan gelngin Got nib thothup u wan’dad ni faan gad ra lemnag e n’en be rin’ e ngiyal’ ney. U m’on ni sul Jesus nga tharmiy me yog ngak pi gachalpen ni gaar: “Bay yib gelngimed ko ngiyal’ ni bay yib fare Kan ni Thothup [“gelngin Got nib thothup,” NW] riy nga dakenmed, ma aram mi gimed weliy murung’ageg . . . nge yan i mada’ ko yungi n’en ni yan i mus e fayleng ngay.” (Acts 1:8) Ireray e n’en ni be buch e ngiyal’ ney. Bochan e ayuw ni be pi’ gelngin Got nib thothup, ma sogonap’an meruk nge baley e milyon urngin e girdi’ u ga’ngin yang e fayleng ni kar manged tapigpig rok Jehovah. Maku reb e, gadad e girdi’ rok Got e ba taareban’dad ma bay e gapas u thildad ni bochan e be ayuwegdad gelngin Got nib thothup ni ngad maruweliyed boch e fel’ngin nib manigil ni bod rogon e t’ufeg, nge felfelan’, nge gapas, nge gum’an’, nge gol, nge fel’ ngak e girdi’, nge michan’, nge sumunguy, nge t’ar laniyan’. Pi’ fel’ngin ney e aram bang u “wom’engin gelngin Got nib thothup.” (Gal. 5:22, 23, NW) Ere gelngin Got nib thothup e aram reb e tow’ath nrib manigil!

AYUW NI BE YIB NGODAD U THARMIY U NAP’AN E MACHIB

14. Mang ayuw e yibe pi’ ngodad u nap’an e machib ndabiyog ni ngad guyed?

¹⁴ Ku reb e tow’ath ndabiyog ni ngan guy nib ga’ fan e aram rogon e “maruwel” ni gad be tay Jehovah, nge Jesus, nge pi engel u taabang. (2 Kor. 6:1) Gad ma maruwel e pi cha’ney u taabang u nap’an e machib. I weliy Paul murung’agrad e piin yad be rin’ fare maruwel ni machib ni gaar: ‘Gadad be maruwel Got u taabang.’ (1 Kor. 3:9) Gad ra un ko machib, ma aram e ku gad be maruwel Jesus u taabang. Dab mu pagtalin nu tomuren ni yog Jesus ngak pi gachalpen ni ngar pingeged “girdien e pi nam u gubin yang” ngar ‘manged pi gachalpen,’ miki yog ni gaar: “Gu ba’ romed.” (Matt. 28:19, 20) Ma uw rogon e pi engel? Ri gad ba felfelan’ ni be pow’iydad e pi engel u nap’an ni gad be weliy fare “thin ndabi math biid, ni Thin Nib Fel’ . . . ngak e girdi’ nu fayleng”!​—Rev. 14:6.

15. Mu weliy ban’en ni ke buch ni bay murung’agen u Bible ni be dag ni Jehovah e ir e be rin’ e gin th’abi ga’ fan ko re maruwel ney ni machib.

¹⁵ Mang e be yag ni ngad rin’ed ni bochan e ayuw ni yibe pi’ ngodad u tharmiy? Nap’an ni gad ra machibnag fare thin nib fel’ ma bay boch e girdi’ ni yad ra adag ni ngar motoyilgad ngay mar folgad riy, ni bod rogon e awoch ni ke wer nga daken e but’ nib yong’ol ke tugul. (Matt. 13:18, 23) Mini’ e be k’aring e pi awochngin e tin riyul’ ney ni nge tugul me yib wom’engin? I tamilangnag Jesus ndariy be’ nrayog ni nge mang reb i gachalpen ni faanra gathi ‘en ni Chitamangiy e pow’iy nge yib ngak.’ (John 6:44) Be weliy e Bible murung’agen ban’en ni buch ni aray rogon. Am lemnag e n’en ni buch u nap’an ni be machibnag Paul bogi ppin u wuru’ fare mach nu Filippi. Mu tay fanam i yan ko n’en be yog e Bible u murung’agen bagayad e pi ppin nem ni ka nog Lydia ngak ni gaar: “Me tamilangnag Somol laniyan’ ni nge uthum tel ko n’en ni be weliy Paul.” (Acts 16:13-15) Bokum milyon e girdi’ ni ke pow’iyrad Jehovah ngak ni bod rogon Lydia.

16. Mini’ e susun ni ngad pininged e sorok ngak ni faanra ke yib angin e machib ni gad be tay?

¹⁶ Mini’ e susun ni ngad pininged e sorok ngak ni faanra ke yib angin e machib ni gad be tay? I pi’ Paul e fulweg ko re deer ney u nap’an ni yoloy e pi thin ni baaray u murung’agen fare ulung nu Korinth ni gaar: “I gag e gu yung e awoch me tugul, mi Apollos e i puog e ran ngay, machane Got e be pi’ gelngin be ga’. Cha’ ni yung nge cha’ ni puog e ran ngay e gathi ri ba ga’ farow. Yi Got e ir e ba ga’ fan, yi ir e be pi’ gelngin e woldug be ga’.” (1 Kor. 3:6, 7) Ere susun ni Jehovah e ir e ngad pininged e sorok ngak ni gubin ngiyal’ u nap’an nra yib angin e machib ni gad be tay ni bod rogon ni rin’ Paul.

17. Uw rogon ni ngad daged nib ga’ fan u wan’dad e “maruwel” ni gad be tay Got, nge Kristus, nge pi engel u taabang?

¹⁷ Uw rogon ni ngad daged nib ga’ fan u wan’dad e “maruwel” ni gad be tay Got, nge Kristus, nge pi engel u taabang? Aram e ngad rin’ed urngin ban’en nrayog rodad ya nge yag nda weliyed fare thin nib fel’ ko girdi’. Boor e kanawo’ nrayog ni ngad rin’ed e re n’ey riy ni bod ni ngad machibgad u “fithik’ e girdi’ ni yoor” ngu mit e ‘tabinaw i yan.’ (Acts 20:20) Ku boor e pi walag ni yad baadag ni yad ma machib u fithik’ e sabethin. Nap’an ni yad ra mada’nag be’ ndar nanged, ma yad ma yog ban’en ngak u fithik’ e sumunguy mar guyed rogon ni nge yag nra weliyed facha’ boch ban’en u taabang. Ma faanra be m’ug ni baadag facha’ ni nge motoyil, ma aram mar weliyed fare thin nib fel’ ngak u fithik’ e gonop.

18-19. (a) Uw rogon ni gad ma rannag awochngin e tin riyul’? (b) Mu weliy ban’en ni ke buch ni be dag rogon ni ayuweg Jehovah be’ ni ma fil e Bible.

¹⁸ Bochan ni ‘gadad be maruwel Got u taabang,’ ma gathi kemus ni ngad yunged awochngin e tin riyul’ ya thingar ku ud rannaged. Nap’an nra dag be’ ni baadag e machib, ma gad baadag ni ngad athamgilgad u rogon nrayog rodad ni ngad sulod ngak ara dogned ngak be’ ni nge yan i guy ni gad be nameg ni ngan tabab i fil e Bible ngak. Gad ma felfelan’ u nap’an ni gad ra guy Jehovah ni be ayuweg be’ ni be fil e Bible ni nge thilyeg rogon ni ma lem nge pi n’en bay u gum’irchaen.

¹⁹ Am lemnag e n’en ni buch rok Raphalalani nreb e pumoon ni ma par u South Africa ni ir be’ nib ta pig. Baadag e pi n’en ni ke fil ko fol Bible ni be tay. Machane i mada’nag reb e magawon nib ga’ u nap’an ni beeg e n’en be yog e Thin rok Got u murung’agen e n’en ma rin’ boch e girdi’ ni aram e yad ma non ko pi ga’ rorad ni kar m’ad. (Deut. 18:10-12) Munmun me pag Got ni nge yal’uweg e lem rok. Tomuren ma aram me tal ko pig ni yugu aram rogon ni kemus e n’en ma yag e salpiy riy ngak. Chiney ni ke gaman 60 e duw rok Raphalalani e ke yog ni gaar: “Rug be pining e magar ko Pi Mich Rok Jehovah ya boor e kanawo’ nra ayuweged gag riy. Bod nra ayuweged gag ni nggu pirieg reb e maruwel ni nggu un ngay. Machane bin th’abi ga’ fan riy e, gu be pining e magar ngak Jehovah ni ke ayuwegeg ni nggu thilyeg boch ban’en u lan e yafos rog, ya nge yag nug un ko machib ni gag reb e Pi Mich Rok Jehovah ni kan taufenageg.”

20. Mang e ga baadag ni ngam rin’?

²⁰ Kad weliyed u lan e re article ney murung’agen aningeg e tow’ath ndabiyog ni ngan guy. Bin th’abi fel’ ko pi tow’ath ney e aram e rayog ni ngad manged Fager rok Jehovah nrib chugur e tha’ u thildad. Ra chugur e tha’ u thildad Jehovah, ma aram e rayog ni nge yib angin e tin ka bay e tow’ath ngodad ni bod nrayog ni ngad meybilgad ngak, me ayuwegdad gelngin nib thothup, me yib e ayuw ngodad u tharmiy u nap’an e machib. Ere gad baadag ni ngari ga’ fan u wan’dad e pi tow’ath ney ndabiyog ni ngan guy. Ma gubin ngiyal’ ni gad baadag ni ngad pininged e magar ngak Jehovah ni ir e bin th’abi fel’ e Fager rodad.