Guruy ni 6

Be Mang Fare Gil’ilungun Got?

Ba uw Gil’ilungun Got? (1)

Mini’ e Pilung riy? (2)

Ra un boch e girdi’ ngak e an Pilung riy ko gagiyeg fa? Faanra arrogon, ma yad in? (3)

Mang e be dag ni gad be par ko tin tomren e rran? (4)

Mang e ra rin’ Gil’ilungun Got nga m’on ni fan ko girdi’? (5-7)

1. Nap’an ni immoy Jesus u fayleng, me fil ngak pi gachalpen ni ngar yibilayed fare Gil’ilungun Got. Re gil’ilungun nem e ba am ni bay e an baga’ riy ni ir e pilung. Gil’ilungun Got e reb e am ni yugu ba reb rogon. Ma bay u tharmiy ma ra gagiyegnag e re fayleng ney. Ir e ra ta’ fan fithingan Got nib thothup. Me ir e ra lebguy e tin ba m’agan’ Got ngay ni ngan rin’ u roy u fayleng ni bod rogon ni yibe rin’ u tharmiy.—Matthew 6:9, 10.

2. Ke micheg Got ni Jesus e ra mang Pilung ko Gil’ilungun. (Luke 1:30-33) Ya nap’an ni immoy Jesus u fayleng ma ke dag e mich riy ni ra mang ba pilung nib gol, mab mat’aw, mab flont. Nap’an ni sul nga tharmiy ma dakaan pilungnag ko Gil’ilungun Got e ngiyal’ nem. (Hebrews 10:12, 13) Ere 1914, e fini pi’ Jehovah mat’awun Jesus ni nge gagiyeg nrogon ni micheg ngak. Ma aram nap’an me tabab ko gagiyeg u tharmiy ni ir fare Pilung ni ke dugliy Jehovah.—Daniel 7:13, 14.

3. Ki mel’eg Jehovah boch e pumoon nge ppin nu fayleng ni yad ba yul’yul’ ni nga ranod nga tharmiy. Yad ra un ngak Jesus ko gagiyeg ni yad e pilung nge tapuf oloboch nge prist ko girdi’. (Luke 22:28-30; Revelation 5:9, 10) Pi girdi’ ney ni kar uned nga Gil’ilungun Jesus ko Gagiyeg e ke yog “fachi ulung” ngorad. Yad 144,000 u gubin.—Luke 12:32; Revelation 14:1-3.

4. Ka chi ngiyal’ nem ni ke Pilung Jesus, me yin’ Satan nge pi engel rok nib kireb nga wuru’ e tharmiy min pagrad ngaray nga fayleng. Ar fan ni kari gel e kireb u roy u fayleng ka nap’an e 1914. (Revelation 12:9, 12) Ma pi “pow” ney ni ke m’ug ni aram e mahl, nge uyungol, nge m’ar nib machreg ni ma af, ma be elmirin e togopuluw ko motochiyel—e gubin e pi n’ey ni be dag ni be gagiyeg Jesus ma re m’ag ney e bay ko tin tomren e rran.—Matthew 24:3, 7, 8, 12; Luke 21:10, 11; 2 Timothy 3:1-5.

5. Dabki n’uw nap’an ma ra pufthinnag Jesus e girdi’ ni bod e en tachugol saf ni ma kieg e saf ko kaming. Fapi “saf” e aram e tin kar daged e mich riy ni yad ba yul’yul’ ngak. Ma rayog ngorad e yafas ni manemus u fayleng. Ma fapi “kaming” e yad e piin dubrad Gil’ilungun Got. (Matthew 25:31-34, 46) Ma dabki n’uw nap’an ma ra thang Jesus e pi girdi’ ney ni yad bod e kaming. (2 Thessalonika 1:6-9) Faanra ga ba adag ni ngam mang reb e “saf” ku Jesus ma thingar mu motoyil nga morngaagen Gil’ilungun Got ma ga rin’ e n’en kam fil.—Matthew 24:14.

6. Fayleng e chiney e kan wereg ke yoor e nam. Ra reb ma bay e am rok. Ma pi nam ney e ra bagayad ma be cham ngak bagayad. Machane Gil’ilungun Got e ra yan nga lon urngin e pi am ko girdi’. Ma ke mus ni goo ir e re am nra gagiyegnag e fayleng ni polo’. (Daniel 2:44) Ma aram e ra m’ay e mahl, nge cham, nge bugel. Ma urngin e girdi’ e ra par u taabang u fithik’ e gapas ni ke taareb lanin’rad.—Mikah 4:3, 4.

7. Nap’an e Gagiyeg rok Jesus ko fare Biyu’ e Duw, ma piin ba yul’yul’ e yad ra flont, ma fayleng ni polo’ e ra paradis. Ma tomren fare biyu’ e duw ma goo ke rin’ Jesus urngin ban’en ni yog Got ngak ni nge rin’. Ma aram e ra sulweg fare Gil’ilungun ngak e Chitamangin. (1 Korinth 15:24) Mang fan ni dab mu weliy boch ko pi fager rom nge piin ni ba t’uf rom morngaagen e pi n’en nra rin’ Gil’ilungun Got?

[Sasing ko page 13]

U tan e gagiyeg rok Jesus e dakuriy e fanenikay nge laniyan’