Mang e Gil’ilungun Got?

1. Mang e Gil’ilungun Got?

Gil’ilungun Got e reb e am ni bay u tharmiy. Ra yan nga lon gubin e am ma ra lebguy e n’en nib m’agan’ Got ngay u tharmiy ngu fayleng. Bay e thin nib fel’ ni murung’agen Gil’ilungun Got. Dabki n’uw nap’an me pi’ Gil’ilungun Got e tin nib t’uf ko girdi’. Re am ney e ir e ra taarebnag laniyan’ urngin e girdi’ nu fayleng.​—Mu beeg e Daniel 2:44; Matthew 6:9, 10; 24:14.

Gubin e am ni bay e pilung riy. Ere, Jehovah e ke mel’eg Jesus Kristus ni Fak ni nge mang Pilung u Gil’ilungun.​—Mu beeg e Revelation 11:15.

Ngan yaliy fare video ni kenggin e Mang Gil’ilungun Got?

2. Mang fan ni Jesus e ir e ba fel’ ni nge mang Pilung?

Fak Got e ra fel’ ni nge mang Pilung ni bochan e ir be’ nib gol, ma rayog ni nge par nib mudugil ni fan ko tin nib mat’aw. (John 1:14) Kub gel gelngin nrayog ni nge ayuweg e girdi’ ni bochan e ra par u tharmiy me gagiyegnag e fayleng. Tomuren nni faseg ko yam’ me yan nga tharmiy nge yan i par nga ba’ ni mat’aw rok Got. (Hebrews 10:12, 13) Tomur riy, me pi’ Got mat’awun ni nge gagiyeg.​—Mu beeg e Daniel 7:13, 14.

3. Mini’ e piin ni yad ra un ngak Jesus ko gagiyeg?

Reb e ulung ni ka nog ni yad e “girdi’ rok fare Got ni ir e Th’abi Tolang [“piin ni yad ba thothup,” NW]” e yad ra un ngak Jesus ko gagiyeg u tharmiy. (Daniel 7:27) Pi apostal rok Jesus ni yad ba yul’yul’ e aram e piin ni yad ba thothup nni mel’egrad ko som’on. Ngiyal’ ney e ku be mel’eg Jehovah boch e pumoon nge ppin ni yad ba yul’yul’ ni ngar manged boch e piin ni yad ba thothup. Nap’an ni yad ra yim’ min fasegrad nga reb e dowef nib thil nga downgin e girdi’ ni bod rogon Jesus.​—Mu beeg e John 14:1-3; 1 Korinth 15:42-44.

Uw urngin e girdi’ nra yan nga tharmiy? Ke yog Jesus fa “chi ulung” ngorad. (Luke 12:32) Re ulung ney e yad 144,000 u gubin, ma yad ra un ngak Jesus ngar gagiyegniged e fayleng.​—Mu beeg e Revelation 14:1.

4. Mang e buch u nap’an ni tabab Jesus ko gagiyeg?

I tabab Gil’ilungun Got ko gagiyeg ko duw ni 1914.a Nap’an ni Pilung Jesus, ma n’en ni rin’ nsom’on e aram e tharbog Satan nge pi engel rok nga fayleng. Kari damumuw Satan, me tabab ni nge k’aring e kireb u ga’ngin yang e fayleng. (Revelation 12:7-10, 12) Ka aram nap’an i yib ni be gel e magawon ko girdi’. Mahl, nge uyungol, nge liliy nib machreg ni be af, nge durru’ e aram bang ko fare “pow” ni be dag ndab ki n’uw nap’an me gagiyegnag Gil’ilungun Got e fayleng.​—Mu beeg e Luke 21:7, 10, 11, 31.

5. Mang e ra rin’ Gil’ilungun Got?

Be taarebnag Gil’ilungun Got laniyan’ e girdi’ u gubin e pi nam u daken fare maruwel ni machib ni yibe tay u ga’ngin yang e fayleng. Bokum milyon e girdi’ nib sobut’an’rad e kar manged e piin ni yad ra par u tan e gagiyeg rok Jesus. Ra ayuweg Gil’ilungun Got e pi girdi’ ney u nap’an ni yira thang e re m’ag nib kireb ney. Ere, gubin e piin ni yad baadag ni nge fel’ rogorad u tan Gil’ilungun Got e thingar ra filed rogon ni ngar manged girdien Jesus.​—Mu beeg e Revelation 7:9, 14, 16, 17.

Nap’an fare 1,000 i duw ma ra lebguy Gil’ilungun Got e n’en ni lemnag ni fan ko girdi’ ni aram ko som’on. Re fayleng ney e ra mang paradis. Ma tomur riy e ra fulweg Jesus e re Gil’ilungun nem ngak e Chitamangin. (1 Korinth 15:24-26) Bay be’ ni ga baadag ni ngam weliy murung’agen Gil’ilungun Got ngak, fa?​—Mu beeg e Psalm 37:10, 11, 29.