Mu Ayuweg Ni Nge Par Nib Tamilang E Athap Rom Ni “Ngam Thap Ngak Got”!
Mu ta’ . . . ni bod e urwach fare athap ni ngan thap ngak Got.”—1 THESSALONIKA 5:8, New World Translation.
1. Uw rogon “fare athap ni ngan thap ngak Got” e ra ayuwegey ni ngan par nib mudugil lanin’uy?
FARE athap nra yib e ayuw riy ngak be’ ni ke gafgow era ayuweg ni nge par ni kari mudugil laniyan’ ni mus ni ke yib e gafgow ngak nrib gel. Ani ke un ko barko ni ke ligil ma be pes u maday ma be kol e gapes e rayog ni nge kadan’ nib n’uw nap’an nfaanra manang ni ke chuchugur ni nge taw e ayuw. Taabrogon, u lan bokum biyu’ e duw, ma fare athap ni “ngan thap ngak Jehovah” e ke ayuweg e piin ni pumoon nge piin ni ppin ni bay e michan’ rorad ko ngiyal’ ni ke yib e magawon ngorad, ma re athap ney e riyul’ ni dabi aw nib m’ay fan. (Exodus 14:13; Psalm 3:8; Roma 5:5; 9:33) I taarebnag Paul ni apostal “fare athap ni ngan thap ngak Got” ko “fare urwach” ni fan ko mahl nib spiritual ni aram e mahl ni ma un e Kristiano ngay. (1 Thessalonika 5:8; Efesus 6:17) Arrogon, bochan ni ke mudugil lanin’dad nra ayuwegdad Got ma aram e n’en nra gelnag e lem rodad, ma ra par nib thabthabel lanin’dad ni yugu demtrug ni ke yib e toogor rodad ngodad, ara togopuluw, nge n’en nra wawliy laniyan’dad.
2. Uw rogon “fare athap ni ngan thap ngak Got” e aram e def ko liyor nib riyul’?
2 “Fare fayleng ko piin dar nanged Got e gathi yalen rorad ni ngar lemnaged ni nge yog ngorad e n’en nib fel’ nga m’on,” aram fare fayleng ara girdi’ ni i par u tooben e piin Kristiano ko fa bin som’on e chibog, rogon ni yog e The International Standard Bible Encyclopedia. (Efesus 2:12; 1 Thessalonika 4:13) Machane, “fare athap ni ngan thap ngak Got” e ir bang ko liyor nib riyul’. Mang fan ni aram rogon? Bin som’on, e bochan fare athap ni nge thap ngak Jehovah e pi tapigpig rok e kan m’ag nga fithingan. I meybil Asaph ni psalmist ni gaar: “A Got, ni athap romad e nggu thapgad ngom ma ma tor nga dakenam, ngam mu ayuwegmad ni fan e ngan rirnag fithingam.” (Psalm 79:9, NW; Ezekiel 20:9) Maku, nge michan’uy ko pi taw’ath ni ke micheg Jehovah ni baga’ fan ni nge fel’ Got uwan’uy. Ke yog Paul ni gaar: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra taw’athnag e piin ni yad be gayiy Got.” (Hebrews 11:6) Maku, i weliy Paul ni ngan ayuweg e piin ni kar kalgadngan’rad ni ngar thapgad ngak Got ya aram fan ni kari yib Jesus nga fayleng. I yog ni gaar: “Ma ngari mich u wan’uy me pagan’uy ngay: ni Kristus Jesus i yib ngaray nga fayleng ni nge thapeg e pi tadenen ngak Got.” (1 Timothy 1:15) Ma Peter ni apostal e i weliy ni ngan thap ngak Got e aram gam’engin [ara, angin] e michan’ rodad.’ (1 Peter 1:9) Ba tamilang, ni ffel’ ni ngan athapeg ni ngan thap ngak Got. Machane ri mang fan fare bugithin ni ngan thap ngak Got? Ma mang e thingar ni rin’ ni nge yog e re n’ey?
Mangfan fare Bugithin ni Ngan Thap?
3. Uw rogon ni kan thapeg e pi tapigpig rok Jehovah kakrom ngak?
3 U lan fare Hebrew Scriptures, ma fare bugithin ni “ngan thap” e baga’ ni be sor fan ko kan ayuweg be’ ni nge chuw u pa’ e en be gafgownag ara kan ayuweg ko yam’. Ni bodrogon David, ni ke pining Jehovah ni ir e “ma Ayuweg e pogofan rok,” me gaar: “Got rog e ir e manaf rog. . . . Ir e ma ayuweg e pogofan rog; ma ayuwegeg ko ngiyal’ ni ke yib e cham ngog. Kug non ngak Somol, ma ke ayuwegneg rok e pi toogor rog.” (2 Samuel 22:2-4) Manang David nra motoyil Jehovah ko pi tapigpig Rok nib yul’yul’ ko ngiyal’ ni yad ra ning e ayuw.—Psalm 31:22, 23; 145:19.
4. Mang athap ko yafas nga m’on ni i tafinaynag e pi tapigpig rok Jehovah u nap’an ni dawori yib Kristus?
4 Pi tapigpig rok Jehovah ko ngiyal’ ni dawori yib Kristus e ku ur tafinaynaged e athap ko yafas rorad nga m’on. (Job 14:13-15; Isaiah 25:8; Daniel 12:13) Riyul’, ni boor ban’en ni micheg ni ra ayuwegey ni bay ko fare Hebrew Scriptures ma aram e pi thin ni kan yiiynag ma ba sorfan ko ayuw ni bay yib mab gel—ni aram e n’en nra pow’iyey ko yafas ni dariy n’umngin nap’an. (Isaiah 49:6, 8; Acts 13:47; 2 Korinth 6:2) Nap’an ni immoy Jesus’, ma boor e girdi’ ni piyu Jew e kar athapeged ni nge yog ngorad e yafas ni manemus, machane de michan’rad ni Jesus e ir fare kiy nib t’uf rorad ni fan ni nge yog ngorad e n’en ni yad be athapeg. I non Jesus ngak e pi tayugang ko teliw ko ngiyal’ nem, ni gaar: “Gimed ma bieg e babyor nib thothup; ya gimed be finey nu fithik’ e re thin nem e gimed ra pirieg e yafas ndariy n’umngin nap’an riy. Ma pi thin nem ni gimed be bieg e be weliy murung’ageg.”—John 5:39.
5. Mang fan fare bugithin ni ngan thap ngak Got ko tomur?
5 I tamilangnag Got fan nib thilthil ko fare bugithin ni ngan thap ngak u daken Jesus. Ma ba muun ngay ni dabki gagiyegnag e denen laniyan’ be’, ma dabki mang sib ko teliw ni googsur, ma dabki mang sib ko fare fayleng ni Satan e ir e be gagiyegnag, ma dabki par ni ma rus ko girdi’, ma dabki rus ko yam’. (John 17:16; Roma 8:2; Kolose 1:13; Revelation 18:2, 4) Tomur riy, e aram fan ni pi tapigpig ku Got nib yul’yul’ e ngar thapgad ngak ma gathi kemus ni ngan ayuwegrad ni dabkun magawonnagrad nge dabki yib e gafgow ngorad ya ku ra yog ngorad e yafas ni dariy n’umngin nap’an. (John 6:40; 17:3) I machibnagey Jesus ni fan e nge thap ngak Got “fachi ulung,” ni aram e ran fasegrad ko yam’ ni nge yog ngorad e yafas u tharmiy ma ngar uned ngak Kristus ko gagiyeg u Gil’ilungun. (Luke 12:32) Ma yugu boch e girdi’, e fan ni ngar thapgad ngak Got e aram e yira sulweg ngorad fare yafas nib flont ma ra fel’ thilrad Got ni bod salpen Adam nge Efa u lan fare milay’ nu Eden u m’on ni kar denengow. (Acts 3:21; Efesus 1:10) Yafas ndariy n’umngin nap’an u paradis e aram e tin nib m’agan’ Got ngay ni fan ko girdi’ ni ka nap’an ko tabolngin. (Genesis 1:28; Mark 10:30) Machane, uwrogon ni ngan sulweg ngak e girdi’ e yafas ni aray rogon?
Ayuw ni Fan ni Ngan Thap Ngak Got—Fare Biyul
6, 7. Mang e ke rin’ Jesus’ ni fan ni ngada thapgad ngak Got?
6 Ngan thap ngak Got e ke ri mus nu daken e biyul ni ke pi’ Kristus. Mang fan? Fare Bible e be weliy ni ngiyal’ ni ke denen Adam ma aram ke “pi’ ir nchuay” nge pifak, ni gadad ba muun ngay nga pa’ e denen—ma arfan ni bat’uf rok e girdi’ e biyul ya aram rogon ma riyul’ ni rayog ni nge yog ngorad. (Roma 5:14, 15; 7:14) U tan fare Motochiyel rok Moses e yima pi’ e gamanman ni maligach riy ya aram e tagalul’ ko pi n’en nra pi’ Got ni biyul ni fan ko girdi’. (Hebrews 10:1-10; 1 John 2:2) Maligach rok Jesus e ir e ke lebuguy e pi n’en nem ni goo be yip’ fan ban’en. U m’on ni kan gargelnag Jesus me yog fare engel rok Jehovah ni gaar: “Ya bayi ayuweg girdien nge chuwegrad ko denen ni yad be ngongliy nge thapegrad ngak Got.”—Matthew 1:21; Hebrews 2:10.
7 Maria ni ir fare pin ndawori nang e pumoon e gargelnag Jesus nib maangang, ma bochan ni Jesus e ir Fak Got, ma de af ngak e yam’ ni yib rok Adam. Re n’ey nge pi n’en ni ke rin’ e be dag ni ir be’ nrib yul’yul’ ni ke pi’ puluwon e yafas rok mab gaman ni nge chuwiy e girdi’ biyay ni dabkuura pared ni yad e sib ko denen nge yam’. (John 8:36; 1 Korinth 15:22) De taarebrogon ngak yugu boch e girdi’, ya dan dugliy ni nge yim’ Jesus ni bochan e denen rok. I m’agan’ ngay ni nge yib nga fayleng ni nge “pi’ e pogofan rok ni nge biyuliy boor e girdi’ ngay.” (Matthew 20:28) Bochan ni ke yodor, e kan faseg ko yam’ ma ke par nga tagil’ e pilung nga yug reb e liw e re Jesus e bay rogon ni nge thapeg e girdi’ ngak Got ni urngin e piin yad ra rin’ e tin baadag Got ni ngara rin’ed.—Revelation 12:10.
Mang e Thingarni Rin’ Min Thap Ngak Got?
8, 9. (a) Mang fulweg e ke pi’ Jesus ngak e pilung ni kab pagal mab fel’ rogon u murung’agen rogon ni ngan thap ngak Got? (b) Uwrogon ni ke fanay Jesus e re tayim ney ni nge fil ban’en ngak pi gachalpen?
8 Biyay, ma reb e pilung nu Israel ni kab pagal ma boor ban’en rok e i fith ngak Jesus ni gaar: “Mang e thingar gu rin’ me yog e yafas ndariy n’umngin nap’an ngog?” (Mark 10:17) Re deer rok nem e sana ba m’ag ko tin ni ir e baga’ ni piyu Jew e ma lemnag ko ngiyal’ nem—ni bod e n’en ni baaray ni Got e be tay chilen ni ngan rin’ boch e maruwel nib fel’ ya ran yodor ma rayog ni nge thap be’ ngak Got. Machane sana ra sum e lem nib siin u fithik’ey ko mit i pigpig nem. Re maruwel nem e dabiyog ni nge pi’ e bin riyul’ e athap ni ngan thap ngak Got, ya bochan e dariy be’ nib flont nrayog ni nge rin’ e motochiyel rok Got ni urngin .
9 Nap’an ni ke fulweg Jesus e deer ko cha’ nem, ma ke mus ni ke puguran Jesus ngak ni thingari fol ko motochiyel rok Got. Ma chingiyal’ nem me yog fare pilung ni kab pagal ni ma fol ko pi motochiyel nem ni ka nap’an ni kab bitir i yib. Me runguy Jesus e cha’ nem nbochan e re fulweg rok nem. Me yog Jesus ngak ni gaar: “Ka ba’ taa ban’en ndawori yog rom. Mman ngam pi’ ni chuway urngin ban’en ni bay rom ma ga fek e salpiy riy ngam pi’ ngak e piin ni yad ba gafgow, ma aram e ke yog e flaab ngom u tharmiy; ma ga yib ngam un ngog.” Machane, ke yan fare pumoon ni kab pagal ni kari kireban’, “ya ri pire’ ban’en rok.” Ma tomur riy me weliy Jesus ngak pi gachalpen ni tiyan’ ko chugum nu fayleng e ra magawonnag e athap ni ngan thap ngak Got. Me ulul ngay ni gaar, dariy be’ ni ra thap ngak Got nbochan gelngin e maruwel rok. Machane ke micheg Jesus ngorad ni gaar: “Girdi’ e dabiyog rorad, machane Got e dagathi aram rogon ya urngin ban’en ma rayog rok.” (Mark 10:18-27, NW; Luke 18:18-23) Uw rogon me yog ni ngan thap ngak Got?
10. Mang boch ban’en ni thingari yog ngodad ni fan ni ngan thap ngak Got?
10 Ngan thap ngak Got e aram ba taw’ath ni yib rok, machane dabi yib e re n’ey ngak be’ ni dariy ban’en ni nge rin’. (Roma 6:23) Bay boch ban’en ni thingari rin’ be’ ni nge yib ngak e re taw’ath ney. I yog Jesus ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni be maruweliy e michan’ rorad ngak e aram e dabkur m’ad, ya ke yog e yafas ndariy n’umngin nap’an ngorad.” Me ulul John ni apostal ngay ni gaar: “En nra maruweliy e michan’ rok ngak fa en ni Fak e bay yog ngak e yafas ni manemus; ma en ni dabi fol rok e en ni Fak e dabiyog e yafas ngak.” (John 3:16, 36) Ba tamilang, ni baadag Got ni girdi’ ni be athapeg ni nge thap ngak ni dariy n’umngin nap’an e ngari mich Jesus u wan’ ma nge i fol rok. Ra be’ ma thingari fel’ fare biyul uwan’ ma nge dugliy ni nge lek luwan ay Jesus.
11. Uwrogon ni nge fel’ be’ ndawori flont uwan’ Jehovah?
11 Bochan ni daworda flontgad, ma arfan ni gathi gubin ngiyal’ ni gad baadag ni ngada folgad rok Got ma ri dabiyog ni ngad folgad rok ni polo’. Arfan ni ke pi’ Jehovah e biyul ni nge upunguy e denen rodad. Machane yugu aram rogon, ma thingarda ululgad i maruweliy ma rayog ni ngada puluwnaged e yafas rodad ko birok Got e kanawo’. Taabrogon ko thin ni ke yog Jesus ngak fare pilung ni kab pagal mab fel’ rogon, ere thingarda folgad ko motochiyel rok Got. Faanra aram rogon e n’en ni gad ra rin’ ma gathi kemus ni gad ra fel’ uwan’ Got ya ku ra yib e falfalan’ ngodad, ya “tin ni ke yog ni ngad rin’ed e gathi rib mo’maw’”; ma ra “biechnag lanin’uy.” (1 John 5:3; Proverbs 3:1, 8) Machane, ku de mom ni ngan par ni yibe athapeg ni ngan thap ngak Got.
“Mu Maruweliy nib Elmirin ni Ngam Ayuweg e Michan’ Rom”
12. Uwrogon fare athap ni ngan thap ngak Got e ra gelnag reb e Kristiano ni nge togopuluw ko n’en ni be wawliy laniyan’ ni nge un ko ngongol ni darngal?
12 Baadag Jude ni nge yol ngak e pi Kristiano kakrom u murung’agen “fare athap ni ngar thapgad ngak Got ni [bay rorad] ni yad urngin.” Machane, ki immoy e magawon rorad ko gafarig ma aram e n’en ni ke k’aring Jude ni nge fonownagrad ni “ngar maruweliyed nib elmirin ni nge ayuweg e michan’ rorad.” Arrogon, ra ngan thap ngak Got ma de gaman ni kemus ni bay e michan’ rok be’, ya ku ra par nib yul’yul’ ko michan’ rok, ya nga i fol ko pi motochiyel ko kristiano nfaanra ke par nib fel’ rogon urngin ban’en. Liyor rodad ngak Got e thingari par nib gel ma rayog ni nge ayuwegdad ni ngad togopuluwgad ko n’en ni ra wawliy lanin’dad ko ngongol ni darngal. Arrogon, bochan ni ke gel e magawon ko ngongol ni darngal, ma girdi’ e der ma tayfan e piin nib tolang e liw rorad, ma daki taareban’rad, nge piin ni be par ni de mudugil lanin’rad e aram e pi n’en ni ke kirebnag e ulung ko fa bin som’on e chibog. Baadag Jude ni nge ayuwegrad ni ngar togopuluwgad ko pi n’en ney, ma aram ke fonownag e pi Kristiano ni ngar tiyan’rad ko tin ni yad be nameg: Yi gaar, “Machane gimed e pi tafager rog, e nguum gelnaged gimed ko michan’ romed nib tha’bi thothup. Um meybilgad ngak Got u fithik’ gelngin fare Kan ni Thothup, um pired ni gimed ba t’uf rok Got, ma gimed be sonnag e Somol rodad i Jesus Kristus ni nge pi’ e yafas ndariy n’umngin nap’an ngomed nbochan e be runguymed.” (Jude 3, 4, 8, 19-21) Fare athap ni ngan thap ngak Got e ra gelnagrad ko cham ni fan ni nge par nib biech e gafarig rorad.
13. Uwrogon ni ngada daged ni dad adbeyed e tin nib magan’ Got ngay ni fan ko runguy ni ke pi’ ngodad?
13 Baadag Got, ni Jehovah, ni piin ni ra thapegrad ngak e yad ra dag e ngongol nib fel’. (1 Korinth 6:9, 10) Machane, ra ngan par u tan e motochiyel rok Got ma de t’uf ni ngan dugliy ban’en ni fan ko yafas rok yugu boch e girdi’. Gathi gadad e gad ra dugliy ko uwrarogon e yafas ko girdi’ nga m’on ndariy n’umngin nap’an. Machane, Got e ra rin’, ya ke yog Paul ngak piyu Greek u Athens ni gaar: “Ya ke turguy reb e rran ni ir e nge pufthinnag riy e fayleng ni polo’ nrogon nib mat’aw, ni nge rin’ u daken be’ nib moon ni ir e ke dugliy”—ni Jesus Kristus. (Acts 17:31; John 5:22) Faanra gad be par e chiney u rogon nib mich Kristus uwan’dad ma dariy rogon ni ngad rusgad ko ngiyal’ ni nge yib e rran ko pufthin. (Hebrews 10:38, 39) N’en ni baga’ fan e bin baaray ni thingar dabda paged ni kemus “ni ke yog ngodad e tow’ath ni pi’ Got [ke fel’ thildad Got biyay u daken e biyul] ma ngad paged nge maadab” ni fan ni ngad paged ni ngan wawliydad ma gad aw ko lem nge ngongol nib kireb. (2 Korinth 6:1) Maku, faanra ngada ayuweged boch e girdi’ ni ngar thapgad ngak Got, ma aram e kada daged ni dad adbeyed e runguy ni i pi’ Got. Ere uwrogon ni ngad ayuweged yad?
Ngan Wereg fare Athap ni Ngan Thap Ngak Got
14, 15. Ke pi’ Jesus ngak mini’ e maruwel ni ngan wereg fare thin nib fel’ u murung’agan e athap ni ngan thap ngak Got?
14 I fanay Paul e thin rok Joel me yoloy ni gaar: “En nra pining fithingan Somol ni nge ayuweg e ra fas ni ke thap ngak Got.” Me ulul ngay ni gaar: “Machane, ra diin mi yad non ngak ni faanra dawori michan’rad ngak? Ma ra diin me michan’rad ni faanra dawor rrung’aged e thin rok? Ma ra diin min machibnag e thin rok nfaanra dab nol’og e piin ni ngar machibnaged e thin rok nga ranod ngar machibgad?” Boch e verse ko tomur, me weliy Paul ni michan’ e dabi yib ngak be’ ni dan ayuweg; machane, “tin ni yibe rung’ag e ra yognag e michan’ ni aram e “thin u murung’agen Kristus.”—Roma 10:13, 14, 17; Joel 2:32.
15 Mini’ e ra fek iyib “fare thin u murung’agen Kristus” ngak fapi nam? I pi’ Jesus e re maruwel nem ngak pi gachalpen—ni aram e piin ni kan skulnagrad u murung’agen e re “thin” nem. (Matthew 24:14; 28:19, 20; John 17:20) Faan gad ra un ko machib nge fare maruwel ni ngan fil e thin rok Got ngak be’, ma aram e ga be maruweliy e n’en ni ke yoloy Paul ni apostal u murung’agen, ni chiney e ke fanay e thin rok Isaiah ni be gaar: “Rib manigil e wub ni ke tay e piin ni kar feked i yib e Thin Nib Fel’ ni yib rok Got!” Yugu aram rogon ni boor e girdi’ ni dabun e machib ma ka be par nib “fel’ yaan” e rifrifen aydad ni fan ku Jehovah.—Roma 10:15, NW; Isaiah 52:7.
16, 17. Mang l’agruw ban’en nra yib angin ko fare maruwel ni ngan machibnag e thin rok Got ngak e girdi’ ni gad ma ta’?
16 Ran lebuguy e re maruwel ney ma ra ayuwegey ni nge riyul’ l’agruw ban’en nib m’ag ngay. Som’on, ma fare thin nib fel’ ni yibe wereg e rayog ni ngan n’uf fithingan Got ma piin ni yad baadag ni ngar thapgad ngak Got e yad ra nang ko uw e nga ranod ngay. Ke nang Paul fan e re maruwel ney. I yog ni gaar: “Kug tiyem ni ngam mang tamilang ngak e piin ni gathi yad piyu Israel, me gur e ngam mang e kanawo’ ni ngan thap riy ngak Got ni fan ngak urngin e girdi’ nu fayleng.” Ere, gad gubin ni gadad e pi gachalpen Kristus, e thingarda uned i wereg fare thin ni nge thap e girdi’ riy ngak Got.—Acts 13:47; Isaiah 49:6.
17 Bin l’agruw, fare maruwel ni ngan wereg e thin nib fel’ ngak e girdi’ e be ayuweg ni ngan tay e def ko pufthin nib mat’aw nra rin’ Got. I yog Jesus boch e thin u murung’agen e re pufthin nem, ni be gaar: “Ngiyal’ nra yib e en ni Fak e girdi’ riy ni ke pilung, ni ke un urngin e pi engel ngak, e bay par nga tagil’ nib pilung, ma urngin girdien e pi nam nu fayleng ni bay ni kunuyrad nga p’eowchen. Me ere weregrad ngar l’agruw ulunggad, ni bod rogon e en ni ma gafaliy e gamanman ni ma fek e saf nge chuwegrad u fithik’ e kaming.” Yugu aram rogon ni fare pufthin nge fare maruwel ni ngan kieg e girdi’ e yi ra rin’ “ko ngiyal’ nra yib e en ni Fak e Girdi’ riy ni ke pilung,” ma fare maruwel ni ngan machibnag e thin rok Got ngak e girdi’ e ra ayuweg ni nge poy e girdi’ pi walagen Kristus ma aram rogon ma rayog ni ngar maruwelgad ni ngar ayuweged yad ni fan ngorad ni nge yog ni ngar thapgad ngak Got ni manemus.—Matthew 25:31-46.
Ngan Ayuweg e Athap “Nge Par ni Ke Mudugil”
18. Uwrogon ni ngad ayuweged ni nge par nib tamilang e “athap rodad ni ngad thapgad ngak Got”?
18 Faan gad ra un ko machib ma ku ra ayuwegdad e re n’ey ni nge par nib tamilang e athap rodad. I yoloy Paul ni gaar: “N’en ni kug m’ad ni bochan e mang e yigi bigimed me par ni be athamgil nge yan i taw ko tomur, nge yog ni yib i m’ug nib riyul’ e pi n’en ni ir e be l’agan’med ngay.” (Hebrews 6:11) Ere yibe athapeg ni gad gubin ni ra be’ ma nge ta’ nga lolugen “e urwach ni aram e athap ni ngan thap ngak Got,” ma ra aram rogon ma dabda paged talin ni “de turguydad ni ngad gafgowgad ko damumuw rok, ya ngad thapgad ngak u daken e Somol rodad i Jesus Kristus.” (1 Thessalonika 5:8, 9) Maku ngada tayed nga gum’ercha’dad e fonow ni ke pi’ Peter, ni gaar: “Mu fal’eged rogon lanin’med ni ngam ngongolgad. Mi gimed tiyan’med ngarim l’agedan’med ko taw’ath ni yira pi’ ngomed ko ngiyal’ nra yib i m’ug Jesus Kristus.” (1 Peter 1:13) Urngin e piin nra rin’ e re n’ey e rayog ni ngar guyed e “athap rorad ni ngar thapgad ngak Got” ma ra lebug ni polo’!
19. Mang e gad ra weliy ko bin migid e article?
19 Ere chiney, susun uwrogon uwan’dad e tayim ni ka ba’ ko re m’ag ney? Uwrogon ni ngad fanayed e re tayim nem ni ngada thapgad ngak Got nge yugu boch e girdi’? Gad ra weliy e pi deer ney ko bin migid e article.
Rayog ni Ngam Weliy?
• Mangfan ni thingarda ayuwgad ni nga i par nib tamilang e athap rodad ni “ngada thapgad ngak Got”?
• Ngan thap ngak Got e ba muun ngay e mang?
• Mang e thingarda rin’ed me yog ngodad fare taw’ath ni ngan thap ngak Got?
• Mang angin ni ke yib ko maruwel rodad ni ngan wereg e thin rok Got ngak e girdi’ nib m’ag ko tin nib m’agan’ Got ngay?
[Pictures on page 22]
Fan ni ngan thap ngak Got e gathi kemus ni gol tin ni baaray ni ke magay nib fas u tomren e magothgoth