‘Mu Ayuwegem Nge Piin Ni Yad Ma Motoyil Ngom’

“Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’. . . . Ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.”​—1 TIMOTHY 4:16.

1, 2 Mang e ke k’aring e tin riyul’ e Kristiano ni ngar ululgad ko maruwel rorad ni ngan ayuweg e yafas ko girdi’?

REB e binaw nib palog u northern Thailand, e immoy ba wu’ i mabgol riy ni yow e Mich rok Jehovah ni kar fanayew e thin nib biech ni kar filew ngak reb e ganong ni ma par u daken e burey u rom. Bochan ni yow ba baadag ni ngar weregew e thin nib fel’ u murung’agen Gil’ilungun Got ngak e girdi’ ko re binaw nem, ma arfan ni re wu’ i mabgol nem e dawori n’uw nap’an ni kar fil fare thin ni Lahu.

² Me weliy fare pumoon ni gaar, “Mo’maw’ ni ngan weliy feni gel e falfalan’ ni ke yib ngomow ya bochan ni gamow be maruwel u fithik’ e pi girdi’ ney ni yad baadag e machib”. Me ulul ngay ni gaar, “Riyul’ ni n’en ni gamow be thamiy e chiney e aram e gamow bay u fithik’ e piin ni yad be lebuguy fare thin ni bay ko Revelation 14:6, 7, ni gaar, thin nib fel’ ni ngan weliy ‘ngak e girdi’ nu fayleng nge ganong nge thin.’ Ke buchuw e binaw ni dawori wer e thin nib fel’ ngay, ma mmutrug ni re binaw ney e reb. Ma ke chuchugur ni nge yoor e piin gamad ma fol Bible ko thin rayog romow.” Ba tamilang, ni re wu’ i mabgol ney e yow be athapeg ni gathi goo yow e rayog ni ngar thapgow ya ku arrogon e piin ni ma motoyil ngorow. Gad gubin e piin Kristiano, gathi ireray e n’en ni gad be athapeg ni ngad rin’ed?

“Mu Ayuwegem”

3. Mang e thingarda rin’ed ni som’on ma aram e rayog ni ngada ayuweged boch e girdi’?

³ I fonownag Paul ni apostal Timothy ni gaar, “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’,” ma pi thin ney e kan pi’ ni fan ko urngin e Kristiano. (1 Timothy 4:16) Riyul’, ni ra ngad ayuweged yugu boch e girdi’ ngar thapgad ngak Got, ma som’on e ngada tedan’dad ngodad. Uwrogon ni ngada rin’ed ni aray rogon? Reb, e aram e thingarda pared nib od ma gad nang fapi tayim ni gad be par riy. I pi’ Jesus fare pow ma aram rogon e rayog ko pi gachalpen ni ngar nanged ko wuin e ra yib “fare tomren e re m’ag ney”. Machane, ku ke yog Jesus ni dabiyog ni ngad nanged nrib tamilang ko wuin e ra yib fare tomur. (Matthew 24:3, 36, New World Translation) Mang e thingarda rin’ed nbochan e re thin riyul’ ney?

4. (a) Mang e susun ni ngada lemnaged ko tayim ni ka ba’ ko re m’ag ney? (b) Mang ngongol ni thingarda paloggad riy?

⁴ Gad gubin e rayog nra bagadad ma ra fith ir ni gaar, ‘Gu be fanay e tayim ni ka ba’ ko re m’ag ney ni fan ni nggu ayuweg e birog e pogofan nge piin ni ma motoyil ngog? Ara gu be lemnag ni, “Bochan ni dawori tamilang uwan’dad ko wuin e ra yib e tomur, ma de t’uf ni nggu lemnag e re n’ey”?’ Fare lem ni aray rogon e bay e riya’ riy. Ba togopuluw e re n’ey ko fonow ni ke pi’ Jesus, ni gaar: “Ereray fan ni ngkum pired ni gubin ngiyal’ ni kam fal’eged rogomed kam pired, ya en ni Fak e Girdi’ e ra yib u reb e awa ndamur fineyed nra yib riy.” (Matthew 24:44) Riyul’ ni chiney e gathi ireray e tayim ni nge war e pigpig rodad ku Jehovah ara ngada sapgad ko fayleng ni nge fel’ e par rodad riy ara ngeb e falfalan’ ngodad.​—Luke 21:34-36.

5. Mang e ke rin’ e Pi Mich rok Jehovah kakrom u nap’an ni dawori yib Kristus nib fel’ ni ngada folgad riy?

⁵ Yugu reb e kanawo’ ni rayog ni ngada daged ni gad be tayan’dad e aram e ngad yul’yul’gad ngad kadedan’dad ni rogon e Kristiano. Fapi tapigpig rok Got kakrom e ke par nib mudugil lanin’rad, ni yugu demtrug ko kar lemnaged ni ngara thapgad ngak Got nib papey fa danga’. Tomren ni ke weliy Paul u murung’agen e pi mich ni chon Abel, Enoch, Noah, Abraham nge Sarah u nap’an ndawori yib Kristus, me yog ni gaar: “De yog ngorad ko biney e tamilang e pi n’en ni yog Got ni bayi pi’ ngorad, machane ra changargad u urel mi yad guy e tin ni ke yog Got ni bayi pi’ ngorad mi yad falfalan’ ngay, mu ur daged ko ngongol rorad ni yad e girdi’ nu bayang ma yad e milekag ni yad be par uroy u fayleng.” Dar uned ko fare lem ko girdi’ ni baadag ni nge fel’ e par rorad ko re fayleng ney, maku dar uned ko ngongol ndarngal ni aram e n’en ni bay u toobrad ko ngiyal’ nem, machane kara sonniged u fithik’ e falfalan’ e tayim ni “nge riyul’ e tin ni kan micheg.”​—Hebrews 11:13; 12:1, NW.

6. Uwrogon u wan’ e piin Kristiano ko fa bin som’on e chibog ni ngan thap ngak Got ma mang e yad be rin’ ko par rorad?

⁶ Piin Kristiano ko fa bin som’on e chibog e ku kar guyed ni yad e “milekag” ni kar bad ngaray nga fayleng. (1 Peter 2:11) Tomren ni kar magaygad nib fas ko ngiyal’ ni kan thang Jerusalem ko 70 C.E., ma fa tin riyul’ e Kristiano e dar talgad i machibnag e thin nib fel’ ngak e girdi’ ara kar sulod biyay ko par ntaabrogon ko girdi’ nu fayleng. Kar nanged ni piin nra par nib yul’yul’ e ra thap ngak Got. Riyul’ ni duw ni 98 C.E., me yoloy John ni apostal, ni gaar: “Re fayleng ney nge urngin ban’en ni ba’ riy ni be yim’ e girdi’ nbochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.”​—1 John 2:17, 28.

7. Uwrogon ni be dag e Pi Mich rok Jehovah e gum’an’ rorad ko ngiyal’ ney?

⁷ Ngiyal’ ney ma Pi Mich rok Jehovah e ku kara ululgad ko maruwel rorad, nyugu aram rogon ni ke yib ngorad e togopuluw nib gel. Ke aw nib m’ay fan e gum’an’ ni kar ted, fa? Ri danga’, ya ke micheg Jesus ngodad ni gaar: “Machane en nra athamgil nge mada’ ko tomur e re yog e yafas ngak,” ma demtrug ko ereram e tomur ko re m’ag ney ni ke kakrom ara aram e tomur ko yafas rodad e chiney. Nap’an e fas ko yam’, ma dabi pag Jehovah talin e pi tapigpig rok nib yul’yul’ ni kar m’ad ma ra taw’athnagrad.​—Matthew 24:13; Hebrews 6:10.

8. Uwrogon ni ngada daged ni ke falfalan’dad ya piin Kristiano kakrom e kar gum’an’naged yad?

⁸ Maku, gad be falfalan’ ni fapi Kristiano kakrom e gathi ke mus ni yad ma lemnag ko uwrogon ni ngar thapgad ngak Got. Ba mudugil ni gadad ni kada filed murung’agen Gil’ilungun Got e bochan ni yad e kara ayuweged gadad ma gad be falfalan’ ya kar ululgad i rin’ e maruwel ni ke yog Jesus ngorad, ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, . . . mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Ngiyal’ ni ka be par nib mab e kanawo’ ngodad, ma rayog ni ngada daged nib fel’ e re n’ey uwan’dad nfaan gad ra wereg e machib ngak e girdi ndawori rung’ag e thin nib fel’. Machane, ngan machibnag e thin nib fel’ ngak e girdi’ e aram e bin som’on e maruwel ni ngan pingeg e girdi’ nge mang gachalpen Jesus.

‘Mu Ayuweg Rogon ni Ga Be Weliy e Thin rok Got’

9. Uwrogon ni fare lem ni ra yib angin e maruwel ni yibe ta’ e ra ayuwegdad ni ngada tababnaged e fol Bible ngak e girdi’?

⁹ Maruwel rodad e gathi kemus ni machib u mit e tabinaw iyan ya ba muun ngay ni ngan weliy ban’en nge tamilang e thin rok Got uwan’ be’. I tay Jesus chilen ngodad ni ngada rin’ed urngin ban’en ni ke yog ni ngan rin’. Riyul’, ni bay boch e binaw ni ke buchuw e girdi’ ni baadag ni ngar filed murung’agen Jehovah. Machane ra ngan lemnag ni dakuriy be’ nib fel’ ko territory rodad ma ra warnag lanin’dad ma dabkuuda maruweliyed nib elmirin ni ngada tababgad i fil e Bible ngak e girdi’. Yvette, ni reb e pioneer u territory ni boch e girdi’ e ma yog ni aram e territory ni dariy waamngin, e ke guy ni boch e girdi’ ni ma yib nga ram ni der lemnag ni aray rogon e magawon ko re binaw nem, e kara tababnaged e fol Bible ngak yugu boch e girdi’. Tomren ni ke thiliyeg Yvette e lem rok me lemnag ni ku rayog ni nge yib angin ngak, ma ku ke pirieg boch e girdi’ ni baadag ni ngara filed e Bible.

10. Susun be mang e maruwel rodad ni gadad e pi sensey ko fol Bible?

¹⁰ Sana boch e Kristiano e kar siyeged ni ngar ognaged ngak e girdi’ ni ngara filed e Bible ngak e piin ni baadag e machib ya darur lemnaged ni rayog rorad e re maruwel ney. Riyul’, nib thil thil e salap rodad. Machane de t’uf ni ngad manged e pi sensey ko thin rok Got nrib salap ma fin aram e rayog ni nge yib angin ngodad. Fapi thin ni bay ulan fare Bible e ba gel gelngin, ma ke yog Jesus ni girdi’ ni yad bod e saf e ra nang laman e ta chugul saf rorad nib riyul’ u nap’an ni ngara rung’aged. Ere, maruwel rodad e ke mus ni ngada weliyed e thin rok e Tachugol saf nib Fel’, ni Jesus, nib tamilang rogon ni rayog rodad.​—John 10:4, 14.

11. Uwrogon ni ngam salap i ayuweg e piin ni ga be fil e Bible ngorad?

¹¹ Uwrogon ni ngam weliy e thin rok Jesus nib fel’ rogon? Som’on, ngam fil nge tamilang boch e n’en ni be weliy fare Bible u murung’agen e kenggin e machib ni yira weliy. Ba t’uf ni ngam nang fan e kenggin e machib ma rayog ni ngam weliy ngak yugu boch e girdi’. Maku, ngam guy rogon ni nap’an e fol Bible ma rayog ni ngan dag e tayfan nge t’ufeg ni bod e fager. Piin ni ma fil e Bible, ni ba muun ngay e piin ni bitir, e papay ni ngar filed ban’en nfaanra dariy ban’en ni be magawonnag lanin’rad nge fare sensey rorad e ma tayfarad ma ma dag e ngongol nib gol ngorad.​—Proverbs 16:21.

12. Uwrogon ni ngam nang ni riyul’ ni en ga be fil e Bible ngak e ke nang fan e tin ni kam fil ngak?

¹² Bochan ni gur reb e sensey, ma gathi kemus ni ngam weliy boch ban’en ngak ni fan ni ngki yog e pi thin nem ngom biyay. Ngam ayuweg ni nge nangfan e n’en ni be fil. Rogon e tin ni ke fil, nge tin ke pirieg ko yafas rok, nge tin ke nang u Bible e ra k’aring faanem nge tamilangan’ ko n’en ni ga be yog. Arfan, ni rayog ni ngam fithem ni ngam gaar, ‘Ke tamilang fapi thin nu Bible ni bay ulan e babyor ni kug weliyew u wan’?’ Rayog ni ngam pi’ ngak boch e deer ni fulweg riy e gathi kemus ni arrogon fa danga’ ya bat’uf ni nge weliy ban’en. (Luke 9:18-20) Ma ban’en nib thil, e aram boch e girdi’ ni ma fil e Bible e be maruwaran’rad ni ngar fithed e deer ngak e sensey. Ma yow ra ulul ko fol Bible nyugu aram rogon ni gathi rib tamilang e tin ni kan fil ngak uwan’. Ngam pi’ e athamgil nga laniyan’ ni nge fith boch e deer ngom ma ngam mog ngak ni nge fithem nfaanra bay boch ban’en ni dawori nangfan.​—Mark 4:10; 9:32, 33.

13. Uwrogon ni ngam ayuweg e en ni ga be fil e Bible ngak ni nge mang sensey?

¹³ N’en ni baga’ fan ni yibe nameg u nap’an ni yibe fil e Bible ngak be’ e aram ngan ayuweg ni nge mang reb e sensey reb e rran. (Galatia 6:6) Ere, nap’an ni ngam sulow nga daken e pi n’en ni kam filew, ma ga fith ngak ko rayog ni nge weliy boch e thin ngom nib mom, ni gowa be weliy e pi thin nem ngak fa en ni ir e ra mang bin som’on ni nge rung’ag e re n’ey. Bay ba ngiyal’, u nap’an ni ke mon’og ko tirok Got ma bay rogon ni nge un ko machib u mit e tabinaw iyan, ma rayog ni ngam pining nge un ngom. Ma baga’ ni ra falan’ ni ngam maruwelgow u taabang, ma nap’an ni ke mecham ko re maruwel ney ma ra pirieg ni ku bay rogon ni nge yan ko machib ni goo ir.

Ngam Ayuweg e En ni Ga Be Fil e Bible Ngak ni Nge Mang Fager rok Jehovah

14. Bochan ni gur reb e sensey ma mang e som’on ni ga be nameg, ma mang e n’en kura un ngay ni nge ayuwegem nge fel’ rogon ma rayog ni nge yog ngom e re n’ey?

¹⁴ N’en nrib ga’ fan ni be nameg e aram e ra ayuweg e en ni yibe fil e Bible ngak ni nge mang fager rok Jehovah. Ma ra riyul’ e re ne’y ni ga be nameg nfaanra gathi kemus ni ngam weliy e thin ngak machane ku ngam dag e ngongol nib fel’ ngak. Ngan fil ban’en ngak be’ u daken e ngongol nib fel’ e bay gelngin ni ra taw nga gum’ircha’en. Riyul’ ni ri ma yib angin ni ngan dag e ngongol nib fel’ ko bin baaray ni ke mus ni nga nog e thin, ma baga’ ni tin ni baaray ni ngan fil ngak u murung’agen e pi ngongol nib fel’ nge ngan k’aring nge par nib pasig. Faanra ke guy nib fel’ e ngongol rom ya bochan ni ba fel’ thilmew Jehovah, ma ku ra k’aring ni nge maruweliy ni nge fel’ thilrow.

15. (a) Mang fan ni baga’ fan ni nge yog ngak e en ni yibe fil e Bible ngak e lem nib puluw ko pigpig ku Jehovah? (b) Uwrogon ni ngam ayuweg e en ni ga be fil e Bible ngak ni nge mon’og iyan ko tirok Got?

¹⁵ Sana ga baadag ni fa en ni ga be fil e Bible ngak e ra pigpig ku Jehovah ni gathi kemus nbochan ni dabun ni ngan thang owchen u nap’an Armageddon ya ku bat’uf Got rok. Ram ayuweg ni nge yog ngak e lem ni aray rogon nib machalbog, ma bod ni gabe toy e naun ni pi n’en ni kan fanay e dabi yik ma ra par nib mudugil ko ngiyal’ ni ngeb e skeng ko michan’ rok. (1 Korinth 3:10-15) Fare lem ni de fel’, baaray ni bod ni ga baadag ni nge folwok rom ara yugu boch e girdi’, e dabiyog ni ngan pi’ gelngin ni nge togopuluw ko tin ni ma kirebnag e par ko Kristiano ara ngan pi’ e athamgil nga laniyan’ ni nge rin’ e tin nib mat’aw. Dabmu pagtalin, ndabi par ni gur e sensey rok ndariy n’umngin nap’an. Faanra ka bay e tayim rom’, ma ngam pi’ e athamgil nga laniyan’ ni nge par nib chuchugur ku Jehovah ni nga i bieg e thin rok Got u gubin e rran ma ra fal’eg i lemnag murung’agen. Ma aram e kanawo’ ni rayog ni nge ulul i fil “fapi thin nriyul’” u lan fare Bible nge boch e babyor ni thin riy e kan fek u Bible ko ngiyal’ ni ke yan e tayim nib n’uw nap’an ni kam mu’gow ko fol Bible.​—2 Timothy 1:13.

16. Uwrogon ni ngam fil ngak e en ni ga be fil e Bible ngak ni nge fek e meybil ni yib u gum’ircha’en?

¹⁶ Maku rayog ni ngam ayuweg e en ni ga be fil e Bible ngak ni nge par nib chuchugur ku Jehovah nfaanra mu fil ngak rogon ni nge meybil ku Got ni yib u gum’ercha’en. Uwrogon ni ngam rin’ e re n’ey? Sana ga ra dag ngak fare meybil rok Jesus ni ireray fare meybil ni ke fil ngak pi gachalpen maku bay boor e meybil ni yib u gum’ercha’ey ni kan yoloy nga Bible, ni bod e pi n’en ni bay ko fare psalms. (Psalms 17, 86, 143; Matthew 6:9, 10) Maku reb, e aram nap’an ni en ni ga be fil e Bible ngak e ke rung’ag rom ni ga ma meybil u m’on ko fol Bible romew nge tomur riy, ma ra nang ko uwrogon Jehovah uwan’um. Arfan, ni meybil rom e susun ni nge dag ni gab yul’yul’ ma ri ga ma yog urngin ban’en nib t’uf rom, ma ga be par nib thabthabel ko tirok Got ban’en nge lem rom.

Ngam Maruweliy ni Ngam Ayuweg e Bitir Rom

17. Uwrogon ni nge ayuweg e gallabthir e pi bitir rorad ni ngar pared ko kanawo’ ni ngara thapgad ngak Got riy?

¹⁷ Mmtrug ni piin ni gad baadag ni ngad ayuweged e ba muun ngay e girdien e tabinaw rodad. Boor e gallabthir ni Kristiano ni pi fakrad e yad ba yul’yul’ ma “be par nib mudugil e michan’ rorad.” Machane boch, e sana de taw e thin riyul’ nga gum’ercha’rad. (1 Peter 5:9; Efesus 3:17; Kolose 2:7) Piin ni ka yad ba pagal e boor i yad e kara digeyed e par ni rogon e Kristiano ko ngiyal’ ni yad be ilal. Faanra gur e gallabthir, ma mang e rayog ni ngam rin’ ndabi buch ni aram rogon? Som’on, ngam maruweliy ni nge par ni bay e gapas u fithik’ girdien e tabinaw rom. Fare tabinaw nib fel’ e rayog ni nge ayuweg e girdi’ riy ni nge yog ngorad e lem nib fel’ u murung’agen e piin ni susun ni ngara pared u tan pa’rad, nge ngan tay fan e kenggin e motochiyel nib mat’aw, nge fel’ thiliy nge yugu boch e girdi’. (Hebrews 12:9) Faanra aram rogon, ni be par nib fel’ thilin e girdi’ ulan e tabinaw ma re n’ey e ra ayuweg e bitir ni nge fel’ thilrow Jehovah iyan. (Psalm 22:10) Tabinaw nib gel e yad ra maruwel u taabang ni ngar ayuweged yad​—yugu aram rogon ni thingara fanayed e tayim rorad ni sana rayog ni ngara fanayed e re n’ey ni fan ni nge yoor boch e chugum rorad. Aram e kanawo’ nrayog ni ngam dag ngak e pi bitir rom rogon ni ngan turguy ban’en nib puluw. Pi gallabthir, fare n’en nrib t’uf rok e pi bitir romed nrayog ni ngam pi’ed ngorad e gathi chugum, ya gimed​—tayim romed, gelngimed, nge t’ufeg. Gimed ma pi’ e pi n’en ney ngak e pi bitir romed, fa?

18. Miti mang e pi deer ni pi gallabthir e thingara ayuweg e pi bitir rorad ni nge tamilang uwan’rad?

¹⁸ Pi gallabthir ni Kristiano e thingar dabra lemnaged ni de t’uf ni ngan ayuweg e pi bitir rorad ni ngar manged e Kristiano. Daniel, ni reb e piilal ma lal e bitir rok, e be gaar: “Pi gallabthir e thingara ted e tayim ni ngar ayuweged e pi bitir rorad ni nge dabki par ni be maruwaran’rad u boch ban’en ni kar rung’aged u skul nge yu yang. Thingara ayuweged e pi bitir rorad u fithik’ e gum’an’ ni ngar pirieged e fulweg ko boch e deer ni bod ni: ‘Riyul’ ni gad be par e chiney ko ngiyal’ ko tomur? Riyul’ ni kemus ni taareb e teliw nib riyul’? Mang fan ni en ni gowa be’ nib fel’ u skul e ba kireb ni ngan chag ngak? Gubin ngiyal’ ma ba kireb e par ko pumoon nge ppin u m’on ni ngan mabgol?” Pi gallabthir, e rayog ni ngam taga’gad ngadken Jehovah ni nge ayuwegmed ni ngeb angin e maruwel ni kam ted, ya ku baadag ni nge fel’ e yafas rok e pi bitir romed.

19. Mangfan nib manigil ni pi gallabthir e susun yad e nga ra filed e Bible ngak e pi bitir rorad?

¹⁹ Boch e gallabthir e yad be lemnag ndariy rogorad ni ngar filed e Bible ngak e pi bitir rorad. Machane, thingar dabmu lemnag ni aram rogon, ya dariy yugu be’ ni rayog rok ni nge fil ban’en ngak e pi fakmed ni kab fel’ ngomed. (Efesus 6:4) Ram filed ban’en ngak e pi bitir romed ma ra ayuwegmed ni ngam nanged ko som’on e pi n’en ni bay u gum’ercha’rad nge lem rorad. Fapi thin ni yad ma yog e riyul’ ni yib u gum’ercha’rad fa danga’? Ke michan’med ko n’en ni kar filed, fa? Ba riyul’ Jehovah uwan’rad? Rayog ni ngam pirieged e pi fulweg ko pi deer ney nge boch e deer nib ga’ fan nfaan manga gimed e ra fil ban’en ngak e pi bitir romed.​—2 Timothy 1:5.

20. Mang e susun ni nge rin’ e pi gallabthir ma rayog e fol Bible u tabinaw u fithik’ e falfalan’ ma ra yib angin ngorad?

²⁰ Uwrogon ni ngam ayuweg ni nge par nib mudugil e yaram ko fol Bible u tabinaw romed u tomren ni kan tababnag? Joseph, ni reb e piilal ni bay e bitir rok ni pumoon nge ppin, e be gaar: “Taabrogon urngin e fol Bible ni yima ta’, ma fol Bible u tabinaw e susun bay e falfalan’ riy, ban’en ni ma sap urngin e girdi’ ngay. Ma tapgin ni ra riyul’ e re n’ey u tabinaw romad e dan yarmiy ni ngari mudugil e tayim riy. Rayog ni nge taw ko taareb e awa e fol Bible romad, ma yu ngiyal’ e kemus ragag e minit ni gamad ra fil e Bible. N’en ni ma ayuweg ni ngari adag e pi bitir e fol Bible u lan reb e wik e aram nggu daged yaan e pi chep ni bay ko fare Babyor Rog ni Chep nu Bible.a Aram angin ni ke taw nga gum’ercha’ey me par nib tamilang uwan’uy boch ban’en ma re n’ey e ka baga’ fan nga boor e paragraphs ni kug filed.”

21. Wuin e rayog ko gallabthir ni ngar filed ban’en ngak e pi bitir rorad?

²¹ Riyul’, ni rayog ni ngam skulnag e pi bitir rom ni de mudugil ngal’an. (Deuteronomy 6:5-7) Fare Mich u Thailand ni kan weliy ko tabolngin e be gaar: “Rib tamilang ni ke yib ngan’ug ko uwrogon ni ke fekeg e chitamag u rat romad nggu warow ko machib, ko pi binaw nib palog u territory romad. Ba tamilang, ni pi n’en ni ke dag e gallabthir romad nib fel’ nge pi n’en ni kar filew ngomad u gubin ngiyal’ e aram e n’en ni ke ayuwegmad ni nggu dugliyed ni nggu uned ko pioneer. Ma tin ni kan fil riy e kari mit kemda’ ko chiney. Ka gu be maruweliy e chiney ko pi binaw nib palog!”

22. Mang angin ni ke yib ngom nfaanra ‘ngam mu ayuwegem ma ga ayuweg rogon ni ga be weliy murung’agen e thin rok Got ngak e girdi’’?

²² Dabki n’uw nap’an, ko ngiyal’ nib puluw, ma ra yib Jesus ni nge rin’ e pufthin rok Got ni fan ni nge thang e re m’ag ney. Ma ra yib e tayim ni re rran n’ey ni bay yib e ra mang chepin e palpalthib, machane pi tapigpig rok Jehovah nib yul’yul’ e yad ra ulul ko pigpig ngak ni yad be lemnag ni ngar thapgad ngak Got ndariy n’umngin nap’an. Ga be tafinaynag ni ngam un ngorad, ma ra un e pi bitir rom ngay nge piin ni ga be fil e Bible ngorad, fa? Ere dabmu pagtalin e thin ni be gaar: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’. Um rin’ e pi n’ey i yan, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.”​—1 Timothy 4:16.

[Footnote]

Rayog ni Ngam Weliy Fan?

• Susun nge u rogon e ngongol rodad, ya daworda nanged nib tamilang e tayim ni ra yib e pufthin rok Got?

• Mang boch e kanawo’ nrayog ni ‘ngada ayuweged rogon ni gad be weliy murung’agen e thin rok Got ngak e girdi’’?

• Uwrogon ni ngam ayuweg e en ni ga be fil e Bible ngak ni nge mang fager rok Jehovah?

• Mang fan ni baga’ fan ni gallabthir e susun ni ngar ted e tayim ni ngar skulnag e pi bitir rorad?

[Picture on page 27]

Mom ni ngan fil ban’en nfaanra bay e tayfan nge ngongol ni bod e fager u nap’an e fol Bible