Mu Tiyan’um nga Fanam ‘Salap u Rogon i Fil Ban’en’ ku Be’
“Ngam machibnag e thin rok Got ko girdi’, . . . ma ga fal owcherad ko kireb ni yad be rin’,ma ga pi’ e athamgil nga lanin’rad, mu um fil e thin rok Got ngorad u fithik’ e gum’an’.”—2 TIM. 4:2.
1. Mange tay Jesus chilen ngak pi gachalpen, ma mange rin’ ni ngan folwok riy?
YUGU aram rogon ni i golnag Jesus e m’ar rok boche girdi’ u nap’an ni i machib u fayleng, ma danog ni ir be’ ni ma ngongliy e maang’ang, ya unnog ni ir rebe tamachib. (Mark 12:19; 13:1) Ngan wereg fare thin nib fel’ ni murung’agen Gil’ilungun Got e aram e n’en nth’abi ga’ fan u wan’ Jesus, maku arrogon e piin ni yad be folwok rok e ngiyal’ ney. Baye maruwel ko piin Kristiano ni aram e ngar ululgad i pingeg e girdi’ ngar manged bochi gachalpen Jesus mar filed ko girdi’ rogon ni ngar folgad ko pi n’en nike tay Jesus chilen ni ngan rin’.—Matt. 28:19, 20.
2. Mange ba t’uf ni ngad rin’ed ni fane ngeyog nda lebuguyed e maruwel rodad ni machib?
2 Gad ma athamgil i gay rogon ni ngad filed ban’en nib fel’ rogon, ya ngeyog nda rin’ed e maruwel rodad ni ngad pingeged e girdi’ ngar manged bochi gachalpen Jesus. I tamilangnag Paul feni ga’ fan ere n’ey u nap’an ni yol ngak Timothy. I gaar: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’. Um rin’ e pi n’ey i yan, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.” (1 Tim. 4:16) N’en ni bay u wan’ Paul e gathi kemus ni nganog e tamilangan’ ko girdi’. Pi tamachib ni Kristiano ni mayib angine machib rorad e yad ma fanaye thin ko Bible ni nge taw nga gum’irchaen e girdi’ me ayuwegrad ni ngar thilyeged boch ban’en u lane yafas rodad. Ireray rebe salap. Ere uw rogon nrayog ni ngad maruweliyed nge yog ngodad e ‘salap u rogon i fil ban’en’ ku be’ u nap’an ni gad be wereg fare thin nib fel’ ngak e girdi’ ni murung’agen Gil’ilungun Got?—2 Tim. 4:2.
Ngan Maruweliy Ngan ‘Salap u Rogon i Fil Ban’en’ ku Be’
3, 4. (a) Uw rogon ni ngad maruweliyed fare ‘salap u rogon i fil ban’en’? (b) Uw rogon nike ayuwegdad fare Theocratic Ministry Skul ni ngad salapgad ko machib?
3 Rebe dictionary eke weliy fan fare thin ni “salap” ni “bmit e salap ni mayog u dakene ngan fil ban’en, min rin’, min fal’eg i yaliy ban’en.” Faanra ngad manged boche sensey ko thin rok Got nib ga’ angin mab t’uf ni ngad tedan’dad ko pi n’ey ni gubin. Rogon meyog nda nanged nib fel’ rogon e n’en ni gad be fil e ngad filed u fithik’ e meybil. (Mu beeg e Psalm 119:27, 34.) Faan gadra fal’eg i yaliy e pi tamachib nib salap u nap’an ni yad be machib mara ayuwegdad e pi kanawo’ ni yad ma fanay ma gad folwok riy. Ma faan gadra athamgil u gubin ngiyal’ ni ngad rin’ed e n’en ni kad filed ma rayog ni nge ayuwegdad ngad mon’oggad ko tin nrayog ni ngad rin’ed.—Luke 6:40; 1 Tim. 4:13-15.
4 Jehovah e ire Bin Nth’abi Ga’ e Sensey rodad. U daken e ulung rok u fayleng e ma pi’ e kanawo’ riy ngak e pi tapigpig rok u rogon ni ngar lebguyed e maruwel rorad ni machib. (Isa. 30:20, 21) Bochane re n’ey ma gubin e ulung ni yad ma tay fare Theocratic Ministry Skul u gubin e wik, ni fane nge ayuweg e piin ni yad be un ngay ni ngar salapgad i wereg fare machib ni murung’agen Gil’ilungun Got. Babyor nib ga’ ni yima fanay riye Bible. Thin rok Jehovah ni kan thagthagnag e ma yog ngodad e n’en ni ngad filed ko girdi’. Tin kub muun ngaye, kuma dag kanawoen e machib nib fel’ nra yib angin. Fare Theocratic Ministry Skul e ma puguran ngodad nrayog ni ngad manged boche sensey nib salap ni faan gadra puluwnag e machib rodad ko Thin rok Got, ma gad fanaye deer nib ga’ angin, ma dogned e thin nib mom i nang fan, ma gad dag nriyul’ nib ga’ fane girdi’ u wan’dad. Ngad guyed e pi n’ey nreb nge reb. Ngemu’ ma gad weliy rogon nrayog ni ngad nanged e n’en ni bay u gum’irchaen e en ni gad be file Bible ngak.
Mu Puluwnage Machib ni Gabe Tay ko Thin rok Got
5. Mange thingar da puluwniged e machib rodad ngay, ma mang fan?
5 Jesus, ni ire bin nth’abi ga’ e sensey u fithik’ urngin e girdi’ ni sensey, e i puluwnag e machib ni i tay ko Bible. (Matt. 21:13; John 6:45; 8:17) I weliye thin ni gathi thin rok, machane thin rok e En ni ire l’og nge yib. (John 7:16-18) Ireram ere n’en ni gad be folwok riy. Ere, demtrug ko gad be machib ara gad be fil e Bible ku be’, ma n’en ni gadra weliye thingari yib ko Thin rok Got. (2 Tim. 3:16, 17) Llowan’ rodad ede taareb rogon nga feni ga’ angin e thin u lane Bible. Fare Bible e bay gelngin. Demtrug e n’en ni gad be gay rogon ni nge nang fan faen ni gad be fil e Bible ngak, ma n’en nib ga’ angin ni gadra rin’ e nga dogned ngak ni nge beeg e n’en nibe yoge Bible u murung’agen fare n’en ni gad be weliy.—Mu beeg e Hebrews 4:12.
6. Uw rogon nra nang faen nibe fil e Bible ku be’ nike nang faanem fane n’en ni yibe fil ngak?
6 Re n’ey e gathi be yip’ fan nde t’uf ni nge fal’eg rebe sensey ni Kristiano rogon u m’on ni nge fil e Bible kube’. Danga’, ba ga’ fan ni ngan yaliy nib fel’ rogon u m’on min dugliye bin nib puluw e thin ko Bible ni ngan beeg u nap’an fare fol Bible. Ba ga’ nib fel’ ni ngan beeg e pi thin nu Bible nib puluw ko n’en nike mich u wan’dad. Makub ga’ fan ni ngam ayuweg faen ni gabe file Bible ngak ni nge nang fane n’en nibe beeg.—1 Kor. 14:8, 9.
Mu Fanay Boche Deer nib Ga’ Angin
7. Mang fan nib ga’ angin e deer ni yima fanay u nap’an ni yibe fil e Bible ku be’?
7 Ran fanay e deer nib fel’ rogon mara pug lanin’uy me ayuweg fare sensey ni nge nang laniyan’ faen ni yibe fil e Bible ngak. Mog ngak faen ni gabe fil e Bible ngak ni nge weliy fan fare thin nu Bible ni kam beegew, ko bin ni gure ngam weliy fan. Yu ngiyal’ mab t’uf ni ngkum fith reb ara boche deer ni nge ayuweg faen ni gabe fil e Bible ngak ngari tamilang u wan’ e n’en ni gimew be weliy. Faan gara fanaye deer ni ngam fil ban’en riy ngak faen nibe fil e Bible, ma gathi kemus ni gabe ayuweg facha’ ni nge nang fane n’en ni kam weliyew ya ka gabe ayuweg ni nge mich u wan’.—Matt. 17:24-26; Luke 10:36, 37.
8. Uw rogon ni gadra nang e n’en ni bay u gum’irchaen be’ ni gad be fil e Bible ngak?
8 Babyor ni gad ma fanay ko fol Bible ngak e girdi’ e babyor ni baye deer nge fulweg riy. Dariye maruwar riy ni, yooren e girdi’ ni gama fil e Bible ngorad e ba papey ni ngar fulweged e pi deer ni bayu lan fapi babyor ni faan yadra fanaye thin ni bay u lane paragraph riy. Machane, re sensey ni baadag ni nge taw nga gum’irchaen faen nibe fil e Bible ngak e dabi fel’ u wan’ ni kemus ni nge pi’ faanem e fulweg nib fel’. Sana bod ni, ke nang e n’en nibe yoge Bible u murung’agen e ngongol ndarngal. (1 Kor. 6:18) Machane, deer u rogon e n’en nibe lemnag, e rayog ni nge dage n’en nibe lemnag u murung’agen e n’en nibe fil. Ere fare sensey e sana ra fith ni gaar: “Mang fan nibe yoge Bible nib kireb ni ngam pirew be’ ni gathi mabgol rom? Mange gabe lemnag u murung’agen ere motochiyel ney nike pi’ Got? Gabe lemnag ma bay angin nra yib ni faan gadra par nib puluw nga rogone motochiyel rok Got?” Fulweg ko pi deer neye rayog ni nge ayuwegdad ngad nanged e n’en nibe lemnage en ni gad be fol Bible.—Mu beeg e Matthew 16:13-17.
Mog nib Mom
9. Mange dab da paged talin u nap’an ni gad be weliy murung’agen rebe thin nu Bible?
9 Yoorene thin nriyul’ ni bay u lane Thin rok Got eba mom ni ngan nang fan. Rayog ni piin ni gad be fil e Bible ngorad eke maathuk lanin’rad nibchane machib nde puluw ko pi yurba’ i teliw ni googsur. Maruwel rodad ni gad boche sensey e ngad momnaged ngak e girdi’ rogon ni ngar nanged fane thin nu Bible. Pi sensey nib ga’ angin e skul ni yad ma tay e yad ma weliye thin nib mom, mab tamilang, mab puluw. Faan gadra fol ko re n’ey, ma aram e dab da k’aringed ni nge mo’maw’ i nang fane thin nu Bible. Dab ni weliy e tin nde ga’ fan e ngiyal’ nem. De t’uf ni ngad weliyed fan urngin ban’en ni kad beeged u rebe thin nu Bible. Kemus ni ngan tiyan’uy ko n’en nib ga’ fan ni nge tamilangnag e n’en ni ire yibe weliy murung’agen. Facha’ nibe fol Bible era munmun mara nang fan boche thin nriyul’ u lane Bible u nap’an nibe mon’og ko tin nibe fil.—Heb. 5:13, 14.
10. Mange ra dugliy urngin e tin ni ngan fil bayay e fol Bible?
10 Uw urngin e n’en ni ngan weliy u bayay e fol Bible? Ba t’uf e gonop ni faanra ngan nang e fulweg kore deer ney. Ba thilthil rarogon faen nibe fol Bible nge fare sensey, machane thingar dab da paged talin ni n’en ni gad be rin’ e gad be ayuweg ni nge gel e michan’ rok faen ni gad be fil e Bible ngak. Ere gadra pi’ e tayim ngak ni nge beeg, me nang fan, me fel’ u wan’ fapi thin nriyul’ ni gad be weliy ngak ko Thin rok Got. Dab da filed ngak nge yoor ko tin nrayog ni nge mit ngak. Nguud fol Bible gad i yan. Nap’an ni gara guy nike nang fane n’en ni gimew be weliy, ma aram e rayog ni ngam marow ko bin migid.—Kol. 2:6, 7.
11. Mang fonow u rogon i fil ban’en ko girdi’ nrayog ni ngad filed rok apostal Paul?
11 Nap’an nibe weliy apostal Paul murung’agen fare thin nib fel’ ngak e piin ni kab beech ma i fanay e thin nib mom ni ngan nang fan. Yugu aram rogon nib tolang e skul rok, ma da i fanay e thin ni gagang’ bug. (Mu beeg e 1 Korinth 2:1, 2.) Rogon feni mom ni i weliy e thin nriyul’ u lane Bible e ire k’aring ni nge motoyil e piin nib sumunguy ko machib ni i tay. De t’uf ni nge un be’ ko skul nib tolang ni nge nang fan.—Matt. 11:25; Acts 4:13; 1 Kor. 1:26, 27.
Mu Ayuwege Piin Nibe Fil e Bible nge Fel’ u Wan’rad e N’en ni Yad Be Fil
12, 13. Mange ra k’aring be’ ni yibe fil e Bible ngak nge fol ko n’en nibe fil? Mu weliy rogon.
12 Ra nge yib angin e machib, ma n’en ni gad be fil e nge taw nga gum’irchaen faen ni gad be fil e Bible ngak. Ba t’uf ni nge nang rogon nib m’ag fapi thin ngak, nge rogon nra yib angin ngak, nge rogon nra mon’og e yafas rok ni faanra fol ko pi fonow nu Bible.—Isa. 48:17, 18.
13 Bod ni susune gad be weliy murung’agen e Hebrews 10:24, 25, nibe pi’ e athamgil ngak e pi Kristiano ni nguur muulunggad u taabang ni fane nge bagayad me pi’ e athamgil nga laniyan’ bagayad ma yad be chag u taabang. Faanra dawori tabab faen ni gad be fil e Bible ngak ni nge un ko muulung, ma rayog ni nga dogned ngak rarogon nge n’en ni yima weliy ko muulung. Rayog ni nga dogned ni muulung e bang ko liyor rodad nra yib angin ngodad. Ma gad pining facha’ nibe fil e Bible ni nge un ko muulung. Lem rok ni nge adag ni nge fol ko motochiyel u Bible, e bochan ni baadag ni nge fol ku Jehovah, gathi bochane baadag ni nge felfelan’nage en ni yow be fil e Bible.—Gal. 6:4, 5.
14, 15. (a) Mange rayog ni nge fil e en ni yibe fil e Bible ngak u murung’agen Jehovah? (b) Uw rogon nra yib angin rarogon Got ngak e en ni yibe fil e Bible ngak?
14 Angin ni mayib ngak e piin nibe fil e Bible me fol ko pi kenggin e motochiyel riy e yadra nang me t’uf Jehovah u wan’rad. (Isa. 42:8) Gathi kemus ni ire Chitamangidad ni ma t’ufegdad nge En Ta Sunumiy nge En nib Mil Fan ere palpalth’ib ney ngak ya kuma dag e pi fel’ngin nge n’en nrayog ni nge rin’ ni fan ngak e piin nib t’uf rorad ma yad ma pigpig ngak. (Mu beeg e Exodus 34:6, 7.) Nap’an nibe n’en ni nge fek Moses piyu Israel ngar chuwgad u tan pa’ piyu Egypt, me weliy Jehovah rarogon u daken e thin ni gaar: “I gag e en ni gag.” (Ex. 3:13-15) Be dage re n’ey nra mang Jehovah e n’en nib t’uf ni nge mang ni fane nge lebguy e tin nib m’agan’ ngay ni fan ko girdi’ rok. Angin e nang piyu Israel Jehovah ni ire En ni Ma Thapegdad, ma Ir rebe Salthaw, nge En ni Ma Pi’ e Tin nib T’uf, nge En ni Ma Lebguy e n’en nike micheg nge ku boche kanawo’.—Ex. 15:2, 3; 16:2-5; Josh. 23:14.
15 Sana faen ni gad be fil e Bible ngak e dawori buch rok ni nge pow’iy Jehovah e yafas rok ni bod rogon Moses. Machane, nap’an nra ilal e michan’ rorad ko tirok Got ban’en nge nap’an ni yad ra tabab ni ngar folgad ko n’en ni yad be fil, ma dariye maruwar riy ni yadra guy nib t’uf ni ngar pagedan’rad ku Jehovah nra pi’ gelngin, nge gonop, nge kanawo’ rok ngorad. Nap’an ni yad ra rin’ ni aram rogon, ma yadra nang ni Jehovah e ir rebe Tafonow nib gonop ma rayogi pagan’uy ngak, maku ire Taayuw rodad, nge En ni Ma Pi’ e tin nib t’uf rodad.—Ps. 55:22; 63:7; Prov. 3:5, 6.
Mu Dag Nriyul’ nib T’uf e Girdi’ Rom
16. Mang ni gathi salap rodad e ire rib ga’ fan u rogon ni ngad manged boche sensey nra yib angin?
16 Dabi mulan’um ni faanra gabe lemnag ni gathi ri gab salap ko machib. Jehovah nge Jesus e yow be yaliye maruwel ko skul ni yibe tay u ga’ngin yange fayleng e ngiyal’ ney. (Acts 1:7, 8; Rev. 14:6) Rayog ni ngar ayuwegew gadad nge yib angin e thin ni gad be yog ngak e piin nib fel’ gum’ircharad. (John 6:44) T’ufeg nib riyul’ rok faen nibe fil e Bible ngak be’ e rayog ni nge yan nga lon e n’en ni gathi rib salap riy. I dag apostal Paul nike nang feni ga’ fan ni ngan dage t’ufeg ko piin ni yibe fil ban’en ngorad.—Mu beeg e 1 Thessalonika 2:7, 8.
17. Uw rogon ni ngad daged nriyul’ nib ga’ fan u wan’dad e en ni gad be fil e Bible ngak?
17 Taareb rogon, ma rayog ni ngad daged nib ga’ fan e piin ni gad be fil e Bible ngorad ni faan gadra taye tayim ni ngad nanged facha’. Nap’an ni gadra ulul i fil e Bible ngak, mara munmun ma gadra nang rarogon nge pi magawon rok. Sana gadra guy nike tabab ni nge fol u boch ban’en ni kad filed ngak u Bible. Ma bay boch ban’en u lane yafas rok nib t’uf ni nge thilyeg. Faan gadra ayuweg facha’ ni nge guy rogon ni nge fol ko pi n’en nike fil u lane Bible, ma aram e rayog ni ngkud ayuweged ni nge mang rebi gachalpen Kristus nib riyul’.
18. Mang fan nib ga’ fan ni ngad meybilgad e piin ni gad be fol Bible u taabang maku gad meybil ni fan ngorad?
18 Bin nth’abi ga’ fane rayog ni ngad meybilgad faen ni gad be fil e Bible u taabang, maku rayog ni ngad uneged facha’ nga lane meybil rodad. Thingari nang ni gad be gay rogon ni ngad ayuweged ni nge nang murung’agen e en ni Sunumiy nib fel’ rogon, me chugur ngak, miki fel’ rogon ko fonow rok. (Mu beeg e Psalm 25:4, 5.) Nap’an ni gadra yibilay e ayuw rok Jehovah ni nge pi’ ngak e en ni gad be fil e Bible ngak ni nge fol ko n’en ni gad be fil ngak, ma rayog ni guy feni ga’ fan ni nge ‘maruwel ko thin rok.’ (Jas. 1:22) Maku nap’an nra rung’ag faen ni gad be fil e Bible ngak rogon ni gad be meybil u fithik’ e yul’yul’, maku rayog ni nge nang rogon ni ngki i meybil. Rib gel e felfelan’ riy ni ngad guyed e piin ni gad be fil e Bible ngorad ni yad be maruweliy e tha’ u thilrad Jehovah!
19. Mange yira weliy ko bin migid e article?
19 Rib gel e athamgil nra yib nga lanin’dad ni ngad nanged ni nel’ nge baley e milyon e Pi Mich u ga’ngin yange fayleng e yad be maruweliy ni ngan ‘salap u rogon i fil ban’en’ ni fane ngar ayuweged e piin nib fel’ gum’ircharad ni ngar folgad ko pi n’en ni motochiyelnag Jesus ni ngan rin’. Mang angin e machib ni gad be tay? Yira weliy e fulweg kore deer ney ko bin migid e article.
Ka Ga Manang?
• Mang fan nib t’uf ni nge maruweliy e pi Kristiano e ‘salap u rogon i fil ban’en’ ku be’?
• Mang boche kanawo’ nrayog ni ngad fanayed nra yibnag angin e n’en ni gad be fil ku be’?
• Mang ban’en nrayog ni nge ayuwegdad ni faanra gathi ri gad ba salap ko machib?
[Picture on page 11]
Gabe un ko fare Theocratic Ministry Skul, fa?
[Picture on page 12]
Mang fan nib ga’ fan ni ngam pag faen ni gabe fil e Bible ngak nge mang ire beeg e Bible?
[Picture on page 14]
Mu meybilgow u taabang ni fan ngak e en ni gabe fil e Bible ngak