“Mu Guy Rogon Ngam Mu’nag fare Maruwel ni Kan Pi’ Ngom ko Maruwel rok Somol”

“Mu guy rogon ngam mu’nag fare maruwel ni kan pi’ ngom ko maruwel rok Somol.”​—KOL. 4:17.

1, 2. Mange maruwel nthingari rin’ e Kristiano ni fan ko girdi’?

BAYE maruwel ni thingar da rin’ed ni fan ko girdi’ u toobdad iyan. N’en ni yadra dugliye chiney era dugliy ko fas fa yam’ era yib ngorad u nap’an nra taw “fare gafgow ni ba ga’.” (Rev. 7:14) Faen ke yoloy fare babyor ni Proverbs e gaar: “Ma ayuweg e yafas rok e piin ni ngan li’rad; nge piin ni yad be dol’dol’ i yan ko gin ni ngan li’rad riy ngar m’ad, manga yugu mu talegrad.” Rib gel e pi thin ney! Ra dab da ginanged e girdi’ ko n’en ni bayi buch rorad mara aw ni yam’ ni bayra ted e gadad e kireb rodad. Me ul’ul fare thin ko Proverbs ni gaar: “Faanra lungumed: ‘Am sap! Da gu nanged e re n’ey,’ gathi faen ni manang e gum’ircha’ e manang, ma ir ni be yaliy e yafas rom e manang ma ra fulweg taban ngak e girdi’ e n’en ni ke rin’?” Ba tamilang, ni pi tapigpig rok Jehovah e dabiyog ni nga rogned ‘ndarur nanged’ e riya’ ni keb ngak e girdi’.​—Prov. 24:11, 12, NW.

² Ba ga’ fane yafas u wan’ Jehovah. Be fonownag e pi tapigpig rok ni ngar athamgilgad ngar ayuweged e yafas rok e girdi’ ni boor. Pi tamachib rok Got era be’ ma thingari machibnag e Thin rok Got ni ma ayuweg e yafas. Maruwel rodad e taareb rogon ngak be’ nima matanag ni ma thoye yabul u nap’an nra guye riya’ nibe yib. Dubdad ni yam’ ni nge taye piin nib kireb e nge aw ni kireb rodad. (Ezek. 33:1-7) Ere, rib ga’ fan ni ngad athamgilgad ngaud ‘machibnaged fare thin’!​—Mu beeg e 2 Timothy 4:1, 2, 5.

3. Mange pi n’en nra weliy ere article ney nge gal ni migide article?

³ Re article ney era weliy rogon ni ngam pithig e magawon ko machib rom nra ayuweg e yafas nge rogon ni ngam ayuweg e girdi’ ni boor. Bin migide article era ayuwegem u rogon ni ngam maruweliy ngam salap i fil e tin riyul’ ngak e girdi’. Bin dalipe article era weliy ngodad murung’agen angin e machib ni taye pi tamachib ko Gil’ilungun u polo’ e fayleng. Machane u m’on ni ngad weliyed e pi n’ey mab fel’ ni ngad weliyed bayay ko mang fan ni ngiyal’ rodad neye kari mo’maw’.

Fan ni Boore Girdi’ Ndariye Athap Rorad

4, 5. Mange n’en nibe buch rok e girdi’, ma mange be rin’ e girdi’ nibchane pi n’ey?

⁴ Tin nibe buch u fayleng ebe dag ni gad be par u ‘tungun e re m’ag ney’ ma kari chugure tomur. Girdi’ e yad be pirieg e pi n’en nibe buch nge rarogon e pi n’en ni yog Jesus nge pi gachalpen ni pow ko “tin tomren e rran.” “Tabolngin e gafgow,” eba muun ngaye mahl, nge uyungol, nge durru’, nge boche gafgow, nra yib ngak e girdi’. Dabkun fol ko motochiyel, nge fel’ ngak, nge boche ngongol nib kireb eke yoor u gubin yang. Mus ko girdi’ ni yad be athamgil ni ngar folgad ko motochiyel u Bible, ma ireraye rran nri “bay mo’maw’ ni ngan par nrogon e tin riyul’ ni girdien Kristus.”​—Matt. 24:3, 6-8, 12; 2 Tim. 3:1-5.

⁵ Machane, orene girdi’ e darur nanged fane tin be buch u fayleng. Bochane re n’ey, ma boori yad e ribe lemnag ko uw rogon ni ngar ayuweged e yafas rorad nge tabinaw rorad. Boche girdi’ nike yim’ e girdi’ nib t’uf rorad ara ke yibe gafgow ngorad nib gel eke balyangan’rad. Bochan ndarur nanged ko mang fan nibe buch ban’en ni aram rogon nge uwe rayog ni ngan piriege ayuw riy, ma pi cha’ney e dariye athap rorad.​—Efe. 2:12.

6. Mang fan ni fare “Babylon nib Gilbuguwan” e deyog ni nge ayuweg girdien?

⁶ “Babylon nib Gilbuguwan,” ni aram e pi yurba’ i teliw ni googsur, e buchuuw e ayuw nike pi’ ngak e girdi’. Ya n’en nike buch, e bochane “kar unumed e wain ko darngal rok,” ma boore girdi’ nike balyangan’ ko tirok Got. Maku, bochane ngongol rok ni bode ppin nima pi’ ir nchuway’, ma teliw ni googsur eke k’aring make gagiyegnag “fapi pilung nu fayleng,” nibe fanaye machib nde riyul’ nge pig ni fan ni ngar folgad rok e pi tayugang’ rorad. Ere riyul’ ni teliw ni googsur e keyib gelngin, machane, kari pag e tin riyul’ ko teliw.​—Rev. 17:1, 2, 5; 18:23.

7. Mange ra buch rok yooren e girdi’, machane uw rogon ma rayog ni ngan ayuweg bochi yad?

⁷ Yog Jesus ni yooren e girdi’ e yad be yan ko kanawo’ ni yan ko magothgoth. (Matt. 7:13, 14) Boche girdi’ e yad bay kore kanawo’ nem nib ga’ ya kar dugliyed ndabra fanayed e machib nu Bible, machane boor i yade kan bannag ara kar pared u fithik’ e lumor, ndar nanged e tin baadag Jehovah ni ngar rin’ed. Sana bochi yade yadra thilyeg e yafas rorad ni faan yira weliy ngorad e Thin nu Bible. Machane piin ni kabe par u Babylon nib Gilbuguwan ni yad be par ndarur folgad ko motochiyel u Bible e dabra thaygad ko “fare gafgow ni ba ga’.”​—Rev. 7:14.

Um Machib ni ‘Dab Mu Tal’

8, 9. Mange rin’ e Kristiano ko bin som’on e chibog u nap’an ni yibe togopluw ngorad, ma mang fan?

⁸ Yog Jesus ni pi gachalpen e ngar machibniged fare thin nib fel’ ko Gil’ilungun ma ngar pingeged e girdi’ ngar manged gachalpen. (Matt. 28:19, 20) Ere, tin riyul’ e Kristiano, e gubin ngiyal’ ni yad ma lemnag ni ngan un ko machib e bay rogon ko ngan yul’yul’ ku Got ma ban’en nib ga’ fan nthingar ra rin’ed ni fan ko michan’ rorad. Ere, ulul pi gachalpen kore maruwel ney kakrom niki mada’ ko ngiyal’ ni yibe togopuluw ngorad. I pagan’rad nga gelngin Jehovah, ma ur yibilayed ni nge ayuwegrad ‘ngaur weliyed e thin [rok] ndab rusgad.’ Ma n’en nike rin’ Jehovah, eke suguyrad ko kan ni thothup mar machibniged fare thin rok Got ndar rusgad.​—Acts 4:18, 29, 31.

⁹ Nap’an ni gel e togopluw, ma gur i maruwaran’ pi gachalpen Jesus ni ngar machibniged fare thin nib fel’? Ri danga’. Bochan ni pi tayugang’ ko teliw rok piyu Jew era damumuwgad ko machib ni i tay fapi apostal, ma aram mar koled yad, ma rogned e thin nib gel ngorad, mar toyed yad. Machane, fapi apostal era “ul’ulgad ngay nguur filed ngak e girdi’ ma yad be machibnag ngak e girdi’ fare Thin Nib Fel’ ni murung’agen Jesus, ni ir fare Messiah, ni ur machibniged u lan fare tempel ngu lan e tabinaw rok e girdi’ i yan.” Kar nanged nthingar ra ‘folgad rok Got ko bin ni ngar folgad rok e girdi’.’​—Acts 5:28, 29, 40-42.

10. Mang magawon e ma mada’nag e Kristiano e chiney, ma mange ra yib ni angin e ngongol rorad nib fel’?

¹⁰ Yooren e tapigpig rok Got e ngiyal’ neye danir toyrad ma danir kalbusnagrad nibchane machib ni yad ma tay. Machane, urngin e Kristiano e ma yib ba mite skeng ngorad. Ni bod ni, nangan’ rom ni kan skulnag ko thin nu Bible era yog ngom ni ngam rin’ ban’en ni gathi ri yima rin’ ara ban’en nra mm’ug riy ni gab thil. Girdi’ ni gimed nga maruwel, nge girdi’ ni gimed nga skul, ara buguli yoror rom e sana yadra lemnag ni gab thil ya gama fol ko kenggin e motochiyel u Bible u nap’an ni gama dugliy ban’en. Yugu aram rogon, ma dab mu page thin rorad nge talegem. Fayleng e bay u fithik’ e lumor, machane Kristiano e thingari ‘[gal] ramaerad u fithik’ey ni bod e t’uf ni be gal’ lan e lang.’ (Fil. 2:15) Boche girdi’ nsana ra guye maruwel rom nib fel’ era felfelan’ me pining e sorok ngak Jehovah.​—Mu beeg e Matthew 5:16.

11. (a) Mange ma rin’ boche girdi’ ko machib ni yibe wereg? (b) Ba miti mang togopluwe i mada’nag Paul, ma mange rin’?

¹¹ Ba t’uf rodad ndabin rus ngeyog ni nguun machibnag e thin ko Gil’ilungun. Boche girdi’, niki mada’ ko girdi’ rom, ma rayog ni ngar moningnaged gur ara rin’ed boch ban’en ni ngar guyed rogon ni ngar taleged gur. (Matt. 10:36) Boor yay ntoy Paul nibchane i werege machib u fithik’ e yul’yul’. Mu guy ko mange rin’ ko re togopluw nem, ni gaar: “Gimed manang rogon e gafgow ntay ngomad nge thin nib kireb ni unog ngomad. Machane Got rodad e pi’ e athamgil nga lanin’mad ni nggu weliyed ngomed e Thin Nib Fel’ ni yib rok, ni yugu ereram gelngin e togopluw ni yibe tay ngomad.” (1 Thess. 2:2) Mmutrug nib mo’maw’ rok Paul ni nge ulul i machibnag e thin nib fel’ u tomren nni kol, min lufe mad rok, min toy, min kalbusnag. (Acts 16:19-24) Mange ke ayuweg made rus ni nge ululi werege machib? Ri baadag ni nge lebguy fare maruwel nike pi’ Got ngak.​—1 Kor. 9:16.

12, 13. Mang magawon e mayib ngak boche girdi’, ma uw rogon ni kar pithiged?

¹² Makub mo’maw’ ni ngaud pasiggad i werege machib ko pi binaw nib mo’maw’ ni ngan pirieg e girdi’ u tabinaw rorad ara buchuuw e girdi’ ni baadag e machib. Mange rayog ni ngad rin’ed nfaanra aram rogon? Sana ba t’uf ni ngad maruweliyed ndab da rusgad ngad machibniged e girdi’ u fithik’ e sabethin. Sana kub t’uf ni ngad thilyeged e tayim rodad ko machib ara da machibgad ko gin ni gadra mada’nag e girdi’ riy ni boor.​—Mu taarebnag ko John 4:7-15; Acts 16:13; 17:17.

¹³ Maku boche magawon ni mayib ngak boche girdi’ e pilibthir nge m’ar, ma arfan nike buchuuw e tayim nrayog ni ngar fanayed ko machib. Faanra aram rogone magawon rom, ma dabi mulan’um. Ri manang Jehovah e magawon rom mab felfelan’ ko n’en nrayog ni ngam rin’. (Mu beeg e 2 Korinth 8:12.) Demtrug e magawon ni gabe mada’nag​—ni bode togopluw, girdi’ ndariy fan u wan’ e machib, ara kam m’ar—​ma kemus ni ngam rin’ e tin rayog rom ngam werege thin nib fel’ ngak boche girdi’.​—Prov. 3:27; mu taarebnag ko Mark 12:41-44.

‘Mu Tiyan’um ko Machib Rom’

14. Mange n’en nike rin’ Paul ni Apostal nib fel’ ni nge fole Kristiano riy, ma mang fonow eke pi’?

¹⁴ Rib ga’ fan u wan’ Paul ni apostal e machib rok, make pi’ e athamgil nga laniyan’ boche walag ni ngkur folgad rok. (Acts 20:20, 21; 1 Korinth 11:1) Rebe Kristiano ko fabin som’on e chibog nri pi’ Paul e athamgil nga laniyan’ e Arkippus. Lan fare babyor ni pi’ Paul ngak piyu Kolose, e yoloy ni gaar: “Me lungumed ngak Arkippus, ‘Mu guy rogon ngam mu’nag fare maruwel ni kan pi’ ngom ko maruwel rok Somol.’” (Kol. 4:17) Dad nanged ko mini’ Arkippus nge rarogon, machane ba tamilang nike adage machib. Faanra gur rebe Kristiano, makum adag e machib. Gur, ka gabe ululi tiyan’um ko machib?

15. Mange ba muun ko ngan ognagey, ma mange pi deer nra sum?

¹⁵ U m’on nda uned ko taufe, ma gad ognag e yafas rodad ngak Jehovah u dakene meybil. Be yip’ ere n’ey fan ni kad dugliyed ni ngad rin’ed e tin nib m’agan’ ngay. Ere thingar da fithed gadad e chiney nge lungudad, ‘Riyul’ ni ngan rin’ e tin nib m’agan’ Got ngay e aram e n’en th’abi ga’ fan ko yafas rog, fa? Sana baye maruwel ni boor ni baadag Jehovah ni ngad lebguyed​—ni bode maruwel ni ngad pied e tin nib t’uf ko tabinaw rodad. (1 Tim. 5:8) Machane uw rogon ni gad ma fanaye tayim nge gelngidad ni kaba’? Mange bin th’abi ga’ fan ko yafas rodad?​—Mu beeg e 2 Korinth 5:14, 15.

16, 17. Mange n’en nrayog ni nge lemnag e Kristiano ni fel’ yangaren ara piin ni gathi ri boore maruwel rorad?

¹⁶ Gur rebe Kristiano ni kam ognag e yafas rom ku Got ma kam mu’nag ara ke chugur ni ngam mu’ ko skul nib t’uf rom? Sana, dawori yib ngom e maruwel nib gel ni fan ko tabinaw rom. Ere mange gabe lemnag ni ngam rin’? Mange pi n’en nrayog ni nge ayuwegem meyog ni ngam lebguy e tin ni kam micheg ngak Jehovah ni ngam rin’ e tin nib m’agan’ ngay? Boor e girdi’ ni kar yarmiyed boch ban’en ko yafas rorad ni ngar uned ko pioneer, ma kebe felfelan’ riy ngorad nib gel.​—Ps. 110:3; Ekl. 12:1.

¹⁷ Sana kam ilal. Ma baye maruwel rom ni polo’ e tayim rom ni yibe pi’ puluwom ma dariy be’ ni gabe ayuweg kemus ni goo gur. Dariye maruwar riy ni gabaadag ni ngam un ko maruwel u lane ulung nrogon nrayog ko tayim rom. Gur rayog ni ngam gelnag boche felfelan’ rom? Keyib ngan’um ni ngam yoornag boche tayim rom ko machib? (Ps. 34:8; Prov. 10:22) Boche binaw, e kab gele maruwel nib t’uf riy ya nge taw fare thin riyul’ ngak e girdi’ nge ayuweg e yafas rorad. Rayog rom ni ngam thilyeg boche yafas rom, nsana nge yog ni muun ko machib ko pi binaw nrib t’uf e tamachib ko Gil’ilungun riy?​—Mu beeg e 1 Timothy 6:6-8.

18. Mange ke thilyeg ba wu’ e mabgol u rarogrow, ma mang angin ni keb?

¹⁸ Mu lemnag e n’en nike rin’ Kevin nge Elena, ni yow l’agruw ni’ u Meriken.a Ni bode n’en nima rin’ e girdi’ ko binaw rorow ni kafin ni mabgol, mar lemnagew nib t’uf ni ngar chuw’iyew rebe naun. Yow maun ko maruwel ni polo’ e tayim rorow ere rayog ni ngar ayuwegew nge pare yafas rorow nib fel’ rogon. Machane, bochane maruwel rorow nge boche maruwel u tabinaw make lich e tayim rorow ko machib. Kar nangew nib ga’ e tayim rorow ni yow be fanay ni fan ko chugum rorow. Machane, nap’an ni kar guyew ba wu’ e mabgol ni pioneer nde yoore chugum rorow mayow ba felfelan’, me dugliy Kevin nge Elena ni ngar thilyegew i lemnag rogone yafas rorow. Tomren ni kar yibilayew ngak Jehovah ni nge ayuwegrow, mar piew e naun rorow nchuway’ ma ranow ra pirew nga rebe apartment. Ke lichnag Elena e awa nima fanay ni fan ko maruwel rok me mang ba pioneer. N’en nike rin’ leengin Kevin eke k’aring nge chuw ko maruwel rok ni polo’ e tayim me tabab ni nge un ko pioneer. Tomur riy, ma ranow nga rebe nam u South America ya ba t’uf boore tamachib ko Gil’ilungun Got u rom. Yog Kevin ni gaar, “Gamow ma felfelan’ ko mabgol romow kakrom, machane nap’an kug maruweliyew ni nggu mon’oggow ko tirok Got ban’en, ma kari gel e felfelan’ romow.”​—Mu beeg e Matthew 6:19-22.

19, 20. Mang fan nrib ga’ fan ni ngan wereg fare thin nib fel’ e ngiyal’ ney?

¹⁹ Ngan wereg fare thin nib fel’ e araye maruwel ni th’abi ga’ fan ni yibe rin’ u fayleng e ngiyal’ ney. (Rev. 14:6, 7) Ke ayuweg ni ngan thothupnag fithingan Jehovah nib gel. (Matt. 6:9) Thin nu Bible eke ayuweg nge fel’ boche yafas rok bokum biyu’ e girdi’ ni yad ma fol riy u gubin e duw, mara ayuwegrad ngar thapgad ngak Got. Machane, ke fith Paul ni apostal ko “ra diin . . . mi yad rung’ag ni faanra danir machibnag e thin rok?” (Rom. 10:14, 15) Uw rogon? Mang fan ni dab mu dugliy ngam rin’ e tin rayog rom ngeyog ni mu lebguye machib ni gabe tay?

²⁰ Maku rebe kanawo’ nrayog ni ngam ayuweg e girdi’ ngar nanged feni ga’ fan e ngiyal’ ney nike mo’maw’ e par ma angin e n’en ni yadra dugliy ebe yan u rogone mon’og rom i fil ban’en ngak e girdi’. Rogon ni ngam rin’ ere n’ey e yira weliy ko bin migid e article.

[Footnote]

Uw Rogon ni Gara Fulweg?

• Mang maruwel e thingari rin’ e Kristiano ni fan ngak e girdi’?

• Uw rogon ni ngad pithiged e magawon ko maruwel ni ngan wereg e machib?

• Uw rogon ma rayog ni ngad lebguyed e maruwel ni ngan wereg e machib ni kan pi’ ngodad?

[Picture on page 7]

Ba t’uf e lem nib mudugil u nap’an ni yibe mada’nag e togopuluw

[Picture on page 9]

Mange rayog ni ngam rin’ u nap’an ni gabe machib ko pi binaw nib ga’ ndariye girdi’ riy?