Ngan Gel Ko Magawon Ni Ma Yib U Nap’an E Machib U Mit E Tabinaw
“Machane Got rodad e pi’ e athamgil nga lanin’mad ni nggu weliyed ngomed e Thin Nib Fel’ ni yib rok, ni yugu ereram gelngin e togopluw ni yibe tay ngomad.”—1 THESS. 2:2.
1. Mang magawon e mada’nag Jeremiah, ma uw rogon ni yog ni nge yan u fithik’?
JEREMIAH e be’ ni bay e lem rok ni bod gadad. Nap’an ni yog Jehovah ngak e maruwel rok ni nge “mang ba profet ngak e pi nam,” me non nib ga’ laman ni gaar: “Somol ni Got, da gu nang rogon e welthin; ya kayigi gel fanag bitir.” Machane, bochan e ba pagan’ ngak Jehovah, ma ke rin’ fare maruwel ni kan pi’ ngak. (Jer. 1:4-10) Boor ko 40 e duw ni par Jeremiah ni yibe darifannag, ma yibe siyeg ko gubin, ma yibe moningnag, ma ki yibe li’. (Jer. 20:1, 2) Immoy yu ngiyal’ ni lemnag ni nge digey e maruwel ni kan pi’ ngak. Machane, i ulul i wereg e thin ni gathi ri yimanang fan ngak bogi girdi’ ndar adaged ni ngar motoyilgad ngay. U daken gelngin Got, e rin’ Jeremiah ban’en ndabiyog ni nge rin’ ni goo ir.—Mu beeg e Jeremiah 20:7-9.
2, 3. Uw rogon ni be mada’nag e pi tapigpig rok Got e magawon e ngiyal’ ney ni bod rogon Jeremiah?
2 Boor e girdi’ rok Got e ngiyal’ ney ni ma lem ni bod Jeremiah. Nap’an ni gad be lemnag murung’agen e machib u mit e tabinaw, ma boch i gadad e ke gaar u wan’, ‘Ireray ban’en ndabiyog ni gu ra rin’.’ Machane, nap’an nda nanged nib m’agan’ Jehovah ngay ni ngad wereged fare thin nib fel’, ma aram e kad paged e magafan’ rodad kad pasiggad ko machib. Yugu aram rogon, ma boor i gadad e ke mada’nag boch ban’en u lan e yafas rodad ni ke mo’maw’nag ngodad ni ngad machibgad. Riyul’ nib mo’maw’ ni ngan machib u mit e tabinaw i yan nge ngkun ulul ko machib nge mada’ ko tomur.—Matt. 24:13.
3 Uw rogon nfaanra kam filed e Pi Mich Rok Jehovah e Bible ma ke sun’uwn’uw nap’an ni gabe un ko muulung machane gabe magagawon ni ngam un ko machib u mit e tabinaw? Ma uw rogon nfaanra gur reb e Pi Mich ni kam un ko taufe ma kam guy nib mo’maw’ ni ngam un ko machib u mit e tabinaw, ni yugu aram rogon nrayog u gelngim? Thingar mu nang ni gubin mit e girdi’ ni yad be mada’nag e magawon ko machib u mit e tabinaw. Ere rayog rom u daken e ayuw rok Jehovah.
Mu Par Ndab Mu Rus
4. Mange ayuweg apostal Paul nge weliy fare thin nib fel’ nde rus?
4 Dariy e maruwar riy ni kam nang ni fare maruwel ni machib ni yibe tay u ga’ngin e fayleng e yibe rin’ u daken gelngin Got ni gathi daken gelngin e girdi’ ara gonop rorad. (Zek. 4:6) Ku riyul’ ere n’ey u rogon e machib ni be tay e Kristiano ni be’ nge be’. (2 Kor. 4:7) Mu lemnag apostal Paul. I yib ngan’ ba ngiyal’ u nap’an ni ir nge be’ ni i un ngak ko missionary e i darifannagrow e pi tatogopuluw, ma aram me yoloy ni gaar: “Gimed manang rogon e gafgow ntay ngomad nge thin nib kireb ni unog ngomad u Filippi, . . . machane Got rodad e pi’ e athamgil nga lanin’mad ni nggu weliyed ngomed e Thin Nib Fel’ ni yib rok, ni yugu ereram gelngin e togopluw ni yibe tay ngomad.” (1 Thess. 2:2; Acts 16:22-24) Sana ba mo’maw’ ni ngad lemnaged ni be’ nib pasig ko machib ni bod Paul e immoy yu ngiyal’ nib mo’maw’ ngak ni nge machib. Machane, taareb rogon ngodad, i Paul e thingari pagan’ ngak Jehovah ni fan e nge yog ni weliy fare thin nib fel’ ndabi rus. (Mu beeg e Efesus 6:18-20.) Uw rogon ni ngad folwokgad ko n’en ni rin’ Paul?
5. Mang reb e kanawo’ nrayog ni ngad machibgad riy ndab da rusgad?
5 Reb e kanawo’ ni ma yog riy ni ngad machibgad ndabda rusgad e daken e meybil. Reb e pioneer e gaar: “Gu meybil ni nge yog ni nggu non u fithik’ e pagan’, ma kug meybil ni ngki yog ni nggu nang e n’en ni bay u gum’irchaen e girdi’, ma kug meybil ni ngki yog ni nggu pirieg e felfelan’ ko machib ni gube tay. Machane, re n’ey e maruwel rok Jehovah, gathi maruwel rodad, ere dabiyog ni ngad rin’ed ban’en nfaanra dariy e ayuw rok riy.” (1 Thess. 5:17) Gad gubin nib t’uf ni ngad ululgad i yibilay e ayuw ko kan ni thothup rok Got nge yog nda machibgad ndab da rusgad.—Luke 11:9-13.
6, 7. (a) Mange ni piliyeg e changar rok Ezekiel nge guy, ma mange be yip’ fan? (b) Mange rayog ni fil e pi tapigpig rok Got e ngiyal’ ney ko n’en nni piliyeg e changar rok Ezekiel nge guy?
6 Babyor rok Ezekiel e ku be dag ban’en nrayog ni ngki ayuwegdad ngad nonad ndab da rusgad. Bayay ni piliyeg Jehovah e changar rok Ezekiel e pi’ ngak bangi babyor ni kan bachiy nruw raba’ ma kan yoloy e “dolo’loy nge gel’gel’ u fithik’ e amith” ngay, me yog ngak ni nge kay, me gaar: “Fak e girdi’, mu longuy e gi babyor ney ni nggu pi’ ngom; mu sugnag e yal rom ngay.” Re n’ey nni piliyeg e changar rok nge guy e mang e be yip’ fan? Thingari nang Ezekiel fan e n’en ni nge weliy. Thingari mang bang u dow, ni bod rogon ni be rin’ ban’en nga fithik’ i laniyan’. Ere gaar fare profet: “Mu gu longuy, ma ba athib lamen ni bod lamen t’ay e ngul nib athib.” U wan’ Ezekiel—e ngan wereg e thin rok Got ko gin ni bay e girdi’ riy e ban’en nrib fel’—ni bod rogon t’ay e ngul nrib fel’ lamen. Ke nang nrib tow’ath ni nge yan ni owchen Jehovah nge lebguy e maruwel ni ke pi’ Got ngak, ni yugu aram rogon ni nge weliy ba thin nib gel ngak bogi girdi’ ndubrad ni ngar motoyilgad ngay.—Mu beeg e Ezekiel 2:8–3:4, 7-9.
7 Re n’ey nni piliyeg e changar rok Ezekiel nge guy e bay ban’en nib ga’ fan riy nrayog ni nge fil e pi tapigpig rok Got e ngiyal’ ney. Ku arrogodad ni bay ba thin nib gel ni ngad weliyed ngak e girdi’ ni gathi gubin ngiyal’ ma yad be guy feni ga’ fan e athamgil ni gad be tay. Ra ngad ululgad ngaud sapgad ko machib ni be tay e Kristiano nib tow’ath ni ke pi’ Got, ma thingar da ululgad i fil e thin rok Got. Dabi gaman nfaanra dab da filed e thin rok Got ni gubin e rran nib fel’ rogon. Rayog ni ngam mon’ognag rogon e fol Bible ni gabe tay mag gay rogon nguum rin’ ni gubin e rran, fa? Rayog ni ngam gay rogon nguum fal’eg i lemnag e pi n’en ni gabe beeg ni gubin ngiyal’, fa?—Ps. 1:2, 3.
Ngan Tabab i Weliy Boch Ban’en ko Bible
8. Mang boch ban’en ni ke ayuweg boch e tamachib ko Gil’ilungun ni ngar tababgad i weliy boch e thin ko Bible u mit e tabinaw?
8 Boor e tamachib ni n’en nib mo’maw’ ngorad ko machib u mit e tabinaw e n’en ni nga rogned ngak faen ni bay u tabinaw. Riyul’, nib mo’maw’ ni ngan tababnag e welthin u yu yang ni gad ma yan ngay ko machib. Boch e tamachib e ba mom ngorad ni ngar tababgad ko numon ngak e cha’ ni kar mada’naged u tabinaw ni buchuuw e thin ni kar mel’eged ni nga rogned mar pied reb e tract, nrogon ni bay u lan e kahol. Kenggin fare tract ara pi n’en ni be m’ug yaan riy nrib fel’ raen e rayog ni k’aring ni nge motoyil facha’, maku ir e ra ayuwegdad nge yog nda weliyed buchuuw fan ni ka darod ko fare naun ma gad fith reb e deer. Reb nib thil ko biney e ngan dag ngak facha’ ni kan mada’nag ko fare tabinaw dalip ara aningeg e tracts mi nog ngak ni nge mel’eg reb ni baadag. Riyul’ ni n’en ni gad be nameg e gathi kemus ni ngad wereged e tract ara ngad fanayed u gubin e tabinaw ni gad ra yan ngay, ya n’en ni gad be nameg e ngad tababgad i weliy boch ban’en ko Bible nra fekey i yan ko fol Bible.
9. Mang nib ga’ fan ni ngan fal’eg rogoy nib fel’ rogon?
9 Demtrug rogon ni ga ma tababnag e machib, ma faan gara fal’eg rogom nib fel’ rogon ma rayog ni ayuwegem nge fel’ rogom mag pasig ko machib u mit e tabinaw. Reb e pioneer e gaar: “Ba gel e felfelan’ rog nfaanra kug fal’eg rogog nib fel’ rogon. Ma k’aringeg nggu adag ni nggu non ko girdi’ ni gube fanay e n’en ni kug fal’eg rogon ni nggu weliy.” Ku reb e pioneer e gaar, “Ra kug nang e n’en ni bay u lan reb e babyor ni nggu pi’, ma aram e gu ma felfelan’ ni nggu pi’.” Yugu aram rogon ni bay angin ni nga nog u m’on riy nib achig lamay e n’en ni nga nog, ma boor e girdi’ ni yad ma pirieg ni bay angin nfaanra rogned e n’en ni ngar weliyed u m’on riy nib ga’ lamrad. Yad ra rin’ ni aram rogon ma ma ayuwegrad ni ngar pied e tin nth’abi fel’ rorad ngak Jehovah.—Kol. 3:23; 2 Tim. 2:15.
10. Mange rayog ni ngan rin’ nge yog nib angin e muulung ni fan ko machib?
10 Muulung ko machib e ku ma yibnag angin maku ma yibnag e felfelan’ ngodad ko machib u mit e tabinaw. Faanra thin nu Bible ni fan nga reb e rran e bay rogon ko machib, ma rayog ni ngan beeg min weliy buchuuw ban’en u murung’agen. Machane, fare walag ni pumoon ni be yarmiy e muulung ko machib e susun ni ngki tay e tayim ni ngan weliy ara ngan dag yaan rogon kanawoen bmit e machib nib m’ag ko gin ni ngan yan ngay ara ngan lemnag boch e thin nrayog ni ngan fanay ko machib e rorran nem. Re n’ey e ra ayuweg e piin ni yad bay ngar machibgad nib fel’ rogon. Ra fal’eg e piin piilal ara piin ni yad ra yarmiy e pi muulung ney rogorad nib fel’ rogon u m’on riy ma rayog ni ngar rin’ed ere n’ey mu kur mu’naged fare muulung nib tayim.—Rom. 12:8.
N’en Nra Yog Ngodad ko Motoyil
11, 12. Uw rogon nra ayuwegdad e motoyil u fithik’ e runguy nge yog ni taw fare thin nib fel’ ngak e girdi’? Mu weliy.
11 Gathi kemus ni ngan fal’eg rogoy nib fel’ rogon, machane ngkun adag ni yibe lemnag boch e girdi’ e ra ayuwegdad ngad tababgad i weliy boch e thin ko Bible me nang e girdi’ ni gad be machibnag fan e n’en ni gad be yog. Reb e kanawo’ nrayog ni ngad daged e re n’ey riy e rogon ni gad ma motoyil. Be’ ni ma lekag e ulung e gaar: “Ngan gum’an’nagey min dag ni yi baadag ni ngan motoyil e bay gelngin ni nge k’aring e girdi’ ngar motoyilgad ma ban’en nib fel’ ni be dag ni yibe lemnag e girdi’.” Yira motoyil u fithik’ e runguy ma rayog ni ayuwegrad nge pufpuf rogorad u nap’an e fol Bible, ni bod ni be dag e re experience ni baaray.
12 U lan bangi babyor nni yoloy ko fare shimbung ni Le Progrès nu Saint-Étienne u France ni yoloy be’ nib ppin nge weliy riy murung’agen l’agruw ni’ nrab ra tugtuguyew e mab rok u tomren ni kem’ bochi ppin ni fak ndalip e pul yangaren. I yoloy ni gaar: “Yug guyrow mug poyrow ni yow l’agruw e Pi Mich Rok Jehovah. Kug fal’eg rogog ni ngog ngorow ni ngar chuwgow, machane mug guy bake babyor ni yow be fek yow be pi’ ni murung’agen fan ni ma pag Got e gafgow. Ere gu dugliy ni nggu piningrow nga naun rog ni kug lemnag ni nggu togopuluw ko n’en ni nga rognew. . . . I par fagal Mich u tafnag nge pag reb e awa. Kar motoyilgow ngog u fithik’ e runguy, ma nap’an ni yow be n’en ni nga ranow, ma kari fel’ e lem rog ma aram me m’agan’ug ngay ni ngkur sulow bayay.” (Rom. 12:15) Nap’an e taw nga nap’an, ma aram me m’agan’ e re pin ney ni nge fil e Bible. Rayog ni ngad filed ban’en ko n’en nde pagtalin e re pin nem ko yay nsom’on ni yan fagali Mich nga tafen ni aram e gathi n’en nrogew, ya rogon nra motoyilgow ngak fare pin.
13. Uw rogon nrayog ni ngad puluwniged e machib rodad ko piin ni gad be mada’nag?
13 Ra ud motoyilgad u fithik’ e runguy, ma aram e gad be pag e girdi’ nga rogned ngodad fan nib t’uf fare Gil’ilungun rorad. Re n’ey e ra bing e kanawo’ ngodad ni ngad weliyed fare thin nib fel’ ngorad. Dabisiy ni kam guy ni pi tamachib nib ga’ angin e ba ga’ nib fel’ rogon ni yad ma motoyil. (Prov. 20:5) Yad ma dag nib ga’ fan u wan’rad e piin ni yad ma mada’nag u nap’an e machib. Gathi kemus ni yad ma yoloy fithingrad nge gin ni yad ma par riy nga but’ ya ku arrogon e n’en ni yad baadag nge tin nib t’uf rorad. Nap’an nra weliy be’ ban’en ni be lemnag, ma yad ma yan ngar fal’eged i gay mar sulod ngak ngar weliyed e n’en ni kar pirieged. Bod apostal Paul, yad ma puluwnag e machib rorad ko piin ni yad ma mada’nag. (Mu beeg e 1 Korinth 9:19-23.) Re t’ufeg nem nib fel’ e ra k’aring e girdi’ ngar adaged fare thin nib fel’ ma be dag nib fel’ rogon e ‘runguy nge fene sumunguy e Got rodad.’—Luke 1:78.
Mpar nib Fel’ e Lem Rom
14. Uw rogon nrayog ni ngad daged e pi fel’ngin Jehovah u nap’an ni gad be yan ko machib?
14 Ke dag Jehovah nib ga’ fadad u wan’ ni be’ nge be’. Yugu aram rogon ni ir Got ni Gubin Ma Rayog Rok, ma der towasariy be’ ni nge pigpig ngak machane ma fel’ u wan e girdi’ ni bochan e t’ufeg, ma be tow’athnag e piin nib fel’ u wan’rad e tin ni ke pi’. (Rom. 2:4) Gad e pi tamachib rok e susun ni ngad fal’eged rogodad ni ngad weliyed fare thin nib fel’ u reb e kanawo’ nib m’ag ngak e Got rodad nib ta runguyey. (2 Cor. 5:20, 21; 6:3-6) Bochan ere n’em, mab t’uf ni ngad pired nib fel’ e ngongol rodad ngak e girdi’ ko gin ni gad ma machib riy. Mange ra ayuwegdad ngad rin’ed ere n’ey nib mo’maw’?
15. (a) Mange fonownag Jesus pi gachalpen riy ni ngar rin’ed nfaanra dabi motoyil e girdi’ ko fare thin nib fel’? (b) Mange rayog ni nge ayuwegdad ngad tedan’dad i gay e piin ni baadag e machib?
15 I fonownag Jesus pi gachalpen ndabi kireb lanin’rad nfaanra dabi motoyil boch e girdi’ ko fare thin nib fel’ machane ngar tedan’rad ngar gayed e piin ni yad baadag ni ngar nanged fare thin nib fel’. (Mu beeg e Matthew 10:11-15.) Yira nameg boch ban’en nib achig, ma rayog ni ayuwegey ni ngan rin’ ere n’ey. Reb e walag ni pumoon e taareb rogonnag ir ngak be’ ni ma gay e gol. Thin rok e gaar: “Gu be sap nga m’on ko ngiyal’ ni gu ra pirieg e gol e daba’.” Ku reb e walag ni pumoon e ku bay ban’en ni ke nameg ni aram e nge “mada’nag taabe’ nib fel’ daken u reb e wik me sul ngak in e rran nge gay rogon ni nge adag e machib.” Boch e publisher e yad ma gay rogon ni ngar weliyed sogonap’an taareb e thin nu Bible ngak gubin e girdi’ ni yad ra mada’nag nfaanra rayog. Mang ban’en nrayog ni ngam nameg ni fan ngom?
16. Mang fan ni ngad ululgad ko machib?
16 Mon’og ni yira tay ko machib u mit e tabinaw e dar yan u rogon ni ke adag e girdi’ e machib ko gin ni yibe machib riy. Riyul’ ni fare maruwel ni machib e ba ga’ fan ko ayuw ni yira pi’ ngak e piin nib fel’ gum’ircharad, machane ku bay rogon nga boch ban’en nib ga’ fan. Fare machib ni be tay e Kristiano e ke bing e kanawo’ ngodad ni ngad daged e t’ufeg rodad ngak Jehovah. (1 John 5:3) Ke bungnag rogodad ni ngad pilo’gad nge dabi aw e racha’ nga pa’dad. (Acts 20:26, 27) Be ginang e piin nib kireb ni “ke taw nga nap’an ni nge pufthinnag [Got] e girdi’.” (Rev. 14:6, 7) Yibe pining e sorok nga fithingan Jehovah u ga’ngin yang e fayleng, u daken e machib ni yibe tay ko fare thin nib fel’. (Ps. 113:3) Ere, demtrug ko ra motoyil e girdi’ fa danga’, ma thingar da machibnaged murung’agen fare Gil’ilungun. Arrogon, athamgil ni gad be tay ni ngad machibnaged fare thin nib fel’ e ban’en nrib fel’ u p’eowchen Jehovah.—Rom. 10:13-15.
17. Dabki n’uw nap’an ma mang e bayi guy e girdi’?
17 Yugu aram rogon ni boor e girdi’ e ngiyal’ ney ni yad ma darifannag e machib ni gad ma tay, ma dabki n’uw nap’an ma bay ra guyed ni ke thil rogon. (Matt. 24:37-39) I micheg Jehovah ngak Ezekiel nnap’an nra riyul’ e pufthin ni ke wereg murung’agen, ma girdi’ nu Israel ni yad be togopluw e “bay ra nanged ni bay ba profet u fithik’rad.” (Ezek. 2:5) Ku aram rogon, u nap’an nra pufthinnag Got ere m’ag ni kireb ney, ma ra guy e girdi’ ni fare thin ni be machibnag e Pi Mich Rok Jehovah ko gin tagil’ e yoor ngu mit e tabinaw e yib rok fare Got nib riyul’, ni aram Jehovah, ma Pi Mich e ur pigpiggad ni owchen. Ri gad ba tow’ath ni ngad wereged murung’agen fithingan nge thin rok e ngiyal’ ney nrib ga’ fan! Manga yugu da ululgad i gel ko pi magawon ko machib u mit e tabinaw.
Uw Rogon ni Ga Ra Fulweg?
• Uw rogon ni ngad machibgad ndab da rusgad?
• Mange rayog ni ayuwegdad ngad tababgad i weliy murung’agen e Bible u nap’an e machib u mit e tabinaw?
• Uw rogon ni ngad daged ngak e girdi’ ni gad be lemnagrad?
• Mange ra ayuwegdad nge par nib fel’ lanin’dad ngak e piin ni gad ma mada’nag ko gin ni gad ma machib riy?
[Box/Picture on page 15]
Reb e Kanawo’ ni Ngad Tababgad i Weliy Murung’agen e Bible Riy
Ra Ngam Tabab:
◼ Tomren ni kam mada’nag facha’ ni ngam machibnag, ma rayog ni ngam pi’ bang e tract ngak mag gaar, “Fan ni ku gub ni ngguyem e daba’ e bochan e nggu weliy ban’en nra pi’ e athamgil nga lanin’uy u murung’agen ere n’en ni baaray nib ga’ fan.”
◼ Fa rayog ni ngam pi’ bang e tract ngak mag gaar, “Kayu ggub ni ngguyem e daba’ ni bochan e gu baadag ni nggu nang e n’en ni gabe lemnag u murung’agen ere n’ey.”
Faanra ke fek fare tract:
◼ Dab mu tal nib n’uw nap’an ndab mu non, mu fith ngak e n’en ni be lemnag u murung’agen kenggin fare tract.
◼ Mmotyil nib fel’ rogon, mag gay rogon ni ngam nang fan e n’en ni be lemnag facha’. Mu pining e magar ngak ko n’en ni ke yog mu um lemnag u nap’an ni gimew be non.
Ngan ulul ko numon:
◼ Mu beegew mi gimew weliy taareb ara l’agruw e thin nu Bible, mag pluwnag e n’en ni ngam weliy ko n’en ni baadag facha’ nge n’en nib t’uf rok.
◼ Faanra ke m’ug ni baadag, mag pi’ baken e babyor ngak mag dag rogon ni ngam tababnag e fol Bible ngak nfaanra rayog. Mag yarmiy ni ngkum sul bayay ngak.