Ga Be Rin’ Urngin e Maruwel ni Kan Pi’ Ngom ni Fan ko Machib, Fa?

1. Mang e baadag urngin e tapigpig rok Got ni ngar rin’ed, ma mang fan? (Mu guy e sasing ni bay u wuru’.)

I TAY Jesus Kristus chilen ngak pi gachalpen ni nga ‘ranod ngak girdien e pi nam u gubin yang ngar pingeged yad ngar manged pi gachalpen.’ (Matt. 28:19) Gubin e tapigpig rok Got ni yad baadag ni ngar filed rogon ni ngar ‘ngongliyed urngin e maruwel ni kan pi’ ngorad.’ (2 Tim. 4:5) Bin riyul’ riy e ireray e re maruwel nth’abi ga’ fan mab t’uf ni ngan gur ngan rin’ u fithik’ urngin e maruwel ni bay. Machane, rayog nib mo’maw’ ni ngad yoornaged e tayim rodad ni fan ko machib ni bod rogon ni gad baadag.

2. Mang boch e magawon ni gad ma mada’nag u nap’an ni gad be guy rogon ni ngad rin’ed urngin e maruwel ni kan pi’ ngodad ni fan ko machib?

² Ku bay boch ban’en ni gad ma rin’ nib ga’ fan ni ma fek e tayim rodad maku thingar da fanayed gelngidad ngay. Sana rayog nib t’uf ni ngad maruwelgad ni boor e awa u reb e rran ni fan e ngad yognaged e tin nib t’uf ko par rodad nge chon e tabinaw rodad. Ku rayog nsana gad be magawon ni bochan boch ban’en nib milfan ngodad u lan e tabinaw, ara m’ar, ara gad be mochuch, ara gad be mada’nag boch e magawon ni bochan e kad pilibthirgad. Ere uw rogon ni ngad rin’ed urngin e maruwel ni kan pi’ ngodad ni fan ko machib ni yugu aram rogon ni gad be mada’nag e pi magawon ney?

3. Mang e kad nanged fan ko fapi thin ni yog Jesus ko Matthew 13:23?

³ Dabi mulan’dad ni faanra der yag ni ngad yoornaged e tayim ni fan ko pigpig rodad ngak Jehovah ni bochan rarogodad. Manang Jesus ni gad gubin nib thilthil rogon e tin nrayog ni ngad rin’ed ni fan ko fare maruwel ni machib. (Mu beeg e Matthew 13:23.) Rib ga’ fan u wan’ Jehovah urngin ban’en ni gad be rin’ ni fan ko pigpig ni gad be tay ngak ni faanra gad be pi’ e tin th’abi fel’ rodad ngak. (Heb. 6:10-12) Machane, sana rayog ni gad be lemnag nrayog ni ngkud rin’ed boch ban’en ni boor ni fan ngak. Ere re article ney e gad ra weliy riy rogon ni ngad m’oneged u wan’dad fare maruwel ni machib, nge rogon ni ngad momnaged e par rodad, nge rogon ni ngad mon’oggad ko machib nge rogon ni gad ma fil ban’en ko girdi’. Machane, som’on e mang e be yip’ fan ni ngad rin’ed urngin e maruwel ni kan pi’ ngodad ni fan ko machib?

4. Mang e be yip’ fan ni ngad rin’ed urngin e maruwel ni kan pi’ ngodad ni fan ko machib?

⁴ Ra ngad rin’ed urngin e maruwel ni kan pi’ ngodad ni fan ko machib, ma aram e thingar da machibgad ma gad fil e tin riyul’ ko girdi’ u rogon nrayog rodad. Machane, re n’ey e gathi kemus ni be yip’ fan urngin e tayim ni gad ma fanay ko machib. Ya kub ga’ fan u wan’ Jehovah fan ni gad be rin’ e re maruwel ney. Gad ma machib u polo’ i gelngidad ni bochan e ba t’uf Jehovah nge girdi’ rodad.b (Mark 12:30, 31; Kol. 3:23) Ra ngad pigpiggad ngak Got u polo’ i gum’ircha’dad ma be yip’ fan ni ngad fanayed gelngidad u rogon kanawoen nrayog rodad ni fan ko pigpig rodad ngak. Nap’an nra ga’ fan u wan’dad fare maruwel ni machib ni kan pi’ ngodad nib tow’ath, ma aram e ra ud guyed rogon ni ngad weliyed fare thin nib fel’ ngak urngin e girdi’ nrayog rodad.

5-6. Mu susunnag rogon nrayog ni nge m’oneg be’ fare maruwel ni machib ni yugu aram rogon nib achig e tayim rok.

⁵ Mu susunnag reb e pagel ni baadag ni ma chubeg e gita. Yugu ra yib e tayim rok ma ireray e n’en ni baadag ni ma rin’. Munmun ma aram me un ko maruwel ni nga i chubeg e gita u reb e tafen e abich ko Sabado nge Madnom. Machane, der gaman puluwon ko re maruwel ney ni nge thang e malfith rok nge boch ban’en. Ere yan i un ko maruwel u reb e kantin, ma ma maruwel ko Montag nge mada’ ko Biyernes. Yugu aram rogon ni ma fanay yooren e tayim rok ni fan ko maruwel u kantin, machane musik e aram e n’en nth’abi adag. Ri baadag ni nge mon’ognag e salap rok mi i rin’ e re n’ey u polo’ e tayim rok. Yugu aram rogon, ma nap’an e yug ra yib buchuuw e tayim rok, ma aram e n’en ni ma rin’.

⁶ Ku arrogom nsana ba achig e tayim nrayog ni ngam machib riy. Machane, aram e re maruwel nth’abi ga’ fan u wan’um. Ga ma guy rogon ni ngam mon’ognag e salap rom u rogon ni ngam ayuweg e girdi’ ni nge taw fare thin nib fel’ nga gum’ircha’rad. Machane, bochan ni boor ban’en nib t’uf ni ngam rin’, ma sana rayog ni ngam lemnag ko uw rogon nrayog ni ngam m’oneg fare maruwel ni machib.

ROGON NI NGE M’ON E MACHIB U WAN’UM

7-8. Uw rogon ni ngad lemnaged e machib ni bod rogon Jesus?

⁷ Ke dag Jesus e bin th’abi fel’ e kanawo’ nrayog ni ngan folwok riy u rogon ni i lemnag e machib. N’en th’abi ga’ fan u wan’ e aram e nge weliy murung’agen Gil’ilungun Got. (John 4:34, 35) Ma yan u but’ u lan bokum miriay e mayel ni be machibnag urngin e girdi’ nrayog ni nge machibnagrad. Gubin ngiyal’ ni ma guy rogon ni nge machibnag e girdi’ u taferad ara nge machib ko gin ni ma muulung e girdi’ ni yoor ngay. Machib e aram e n’en nib m’on u wan’ Jesus.

⁸ Rayog ni ngad folwokgad rok Kristus ni aram e ngad guyed rogon ni ngad weliyed fare thin nib fel’ ko ngiyal’ nge gin’en nrayog ni ngad rin’ed riy. Ba m’agan’dad ngay ni ngad paged fan boch ban’en ni gad baadag ni fan e ngad rin’ed e re maruwel ney. (Mark 6:31-34; 1 Pet. 2:21) Bay boch e walag u lan e ulung nrayog ni ngar uned ko special pioneer, ara regular ara auxiliary pioneer. Ku bay boch e walag ni kar filed yugu reb e thin ara ka ranod nga bang nib t’uf boch e tamachib riy. Yugu aram rogon ma yooren e maruwel ni yibe rin’ ni fan ko machib e be rin’ e tin ka bay e walag u lan e ulung ndabiyog ni ngar uned i rin’ e maruwel ni be rin’ e pi cha’ney, machane yad be rin’ e tin nrayog rorad. Demtrug rogon ma der ma yog Jehovah ni ngad rin’ed ban’en ndabiyog rodad. Baadag ni gad gubin ni ngad felfelan’gad ko pigpig ni gad be tay ngak u nap’an ni gad be wereg “fare thin nib fel’ ni yib rok fare Got nib felfelan’.”​—1 Tim. 1:11, NW; Deut. 30:11.

9. (a) Uw rogon ni m’oneg Paul fare maruwel ni machib ni yugu aram rogon ni be maruwel ni nge yag e salpiy ngak? (b) Mang e be yog e Acts 28:16, 30, 31 u rogon ni i lemnag Paul e machib ni i tay?

⁹ Ke dag apostal Paul e kanawo’ nrayog ni ngan folwok riy u rogon ni i m’oneg e machib u wan’. Nap’an ni immoy u Korinth ko yay ni l’agruw e milekag ni tay ni be machib, ma aram me lich e salpiy rok. Ere thingari maruwel ba ngiyal’ ni be ngongliy e tent. Machane mangongol tent e gathi aram e re maruwel nth’abi ga’ fan u wan’ Paul. I rin’ e re maruwel ney ni fan e nge yognag e tin nib t’uf rok ni fan ko machib ya nge yag ni wereg fare thin nib fel’ ngak piyu Korinth “ndariy puluwon” ni yad be pi’ ngak. (1 Kor. 9:18) Yugu aram rogon nthingari maruwel Paul ni nge yognag e salpiy, machane i ulul nga i m’oneg fare maruwel ni machib, maku be machib u gubin e Sabbath. Nap’an ni thil boch ban’en u rogon e par rok, ma aram me yag ni nge yoornag e tayim rok ni fan ko machib. I “par ni yigoo thin rok Got e be machibnag ko girdi’, ma be weliy ngak piyu Israel ni Jesus e ir fare Messiah.” (Acts 18:3-5; 2 Kor. 11:9) Boch nga tomuren u nap’an nni kalbusnag u tafen u Roma u lan l’agruw e duw, ma aram mi i machibnag e piin ni ur bad ngaur guyed maku be yoloy boch e babyor ngi i pi’. (Mu beeg e Acts 28:16, 30, 31.) I dugliy Paul u wan’ ndabi pag ban’en ni nge magawonnag e machib ni be tay. I yoloy ni gaar: “Got e . . . ke pi’ e re maruwel ney ngodad, aram fan nder mulan’dad.” (2 Kor. 4:1) Mus ni faanra thingar da fanayed boor e tayim ni fan ko maruwel ni gad ma un ngay ni nge yag e salpiy riy, maku rayog ni ngad ted fare maruwel ni machib ni aram e n’en th’abi ga’ fan u wan’dad ni bod rogon Paul.

10-11. Uw rogon ni ngad rin’ed urngin e maruwel ni kan pi’ ngodad ni fan ko machib ni faanra gad ba m’ar?

¹⁰ Faanra dabiyog ni ngad uned ko machib u mit e tabinaw ni bod rogon ni gad baadag ni bochan e kad pilibthirgad ara gad ba m’ar, ma ka bay yugu boch e kanawo’ nrayog ni ngad machibgad riy. Pi tamachib ko bin som’on e chibog e demtrug e gin ni yad bay riy ma yad ma machib. Demtrug e ngiyal’ ni ke mab e kanawo’ ngorad ma yad ma weliy e tin riyul’ ko girdi’ u mit e tabinaw i yan, ara fithik’ e girdi’ ni yoor, ara fithik’ e sabethin ara gin ni bay e “girdi’” riy. (Acts 17:17; 20:20) Faanra dabiyog ni nga darod u but’ nib n’uw yang, ma rayog ni nga darod da pared nga bang ni ma yib e girdi’ ni yoor ngay ma gad machibnag e piin ni yad be yib nga u ranod u toobdad. Ku rayog ni ngad machibgad u fithik’ e sabethin, ara da yoloyed e babyor, ara da machibgad u telefon. Boor e walag ndabiyog ni ngar uned ko machib u mit e tabinaw ni gubin ngiyal’ ni bochan e m’ar ara yugu boch e magawon e yad ma felfelan’ ni yad ma un ko mit ney e machib.

¹¹ Rayog ni ngam rin’ urngin e maruwel ni kan pi’ ngom ni fan ko machib ni yugu aram rogon ni gab m’ar. Am lemnag bayay apostal Paul. I yog ni gaar: “Re gelngin nem ni ir e ba th’abi gel e yib rok Got.” (2 Kor. 4:7) I t’uf e re gelngin ney rok Paul u nap’an ni yib e m’ar ngak u bayay e milekag ni tay ni be machib. I weliy ngak piyu Galatia ni gaar: “Gimed manang ko mang fan ni gu machibnag ngomed ko som’on e Thin Nib Fel’ ni yib rok Got, bochan e gu m’ar nggu par romed.” (Gal. 4:13) Ku arrogom ni faanra gab m’ar ma rayog ni ngam weliy fare thin nib fel’ ngak boch e girdi’ ni bod rogon e togta rom, ara kangof, ara boch e girdi’ ni ma maruwel u aspital. Boor ko pi girdi’ ney e yira yan nga taferad ko machib ma dar moyed ya yad be maruwel.

ROGON NI NGAM MOMNAG E PAR ROM

12. Mang e be yip’ fan ni nge par nib “fel’ lan owchem”?

¹² I gaar Jesus: “Lan owchey e bod rogon ba magal ni fan nga dowdad: faanra ba fel’ lan owchem, ma dowam ni polo’ e ba sug ko tamilang.” (Matt. 6:22) Mang e be yip’ fan e re thin ney ni yog? Be yip’ fan nib t’uf ni ngad momnaged e par rodad ara ngad pared ni taab n’en e gad be nameg, ma dab da paged ban’en ni nge chafeg lanin’dad nga orel. I dag Jesus e kanawo’ nrayog ni ngan folwok riy ni bochan e i m’oneg fare maruwel ni machib u wan’, miki fil ngak pi gachalpen ni ngar m’oneged u wan’rad e pigpig rorad ngak Jehovah nge Gil’ilungun. Ra m’ug ni gad be folwok rok Jesus ni faan gad ra tay fare maruwel ni machib ni ir e th’abi ga’ fan u wan’dad ma gad ‘m’oneg u wun’dad e gagiyeg rok Got nge tin nib m’agan’ ngay ni ngad rin’ed.’​—Matt. 6:33.

13. Mang e rayog ni nge ayuwegdad ni ngad tedan’dad ko machib?

¹³ Reb e kanawo’ ni ngad tedan’dad ko machib ni gad ma tay e aram e ngad momnaged e par rodad ya nge yag ni ngad yoornaged e tayim ni gad be ayuweg e girdi’ ni ngar nanged Jehovah me t’uf rorad.c Gur, rayog ni ngad lichnaged e awa ni gad ma maruwel riy ya nge yag nda yoornaged e tayim ni gad be un riy ko machib u lan e wik, fa? Rayog ni ngad lichnaged e pi n’en ni gad ma rin’ ni ngad felfelan’gad ngay me n’ag e chalban rodad ni ma fek boor e tayim rodad, fa?

14. Mang e thilyeg ba wu’ e mabgol u rogon e par rorow ya nge yag nra yoornagew e tayim rorow ni fan ko machib?

¹⁴ Ireray e n’en ni rin’ reb e piilal ni ka nog Elias ngak nge ppin rok. I yog ni gaar: “Ngiyal’ nem e dabiyog ni nggu unew ko pioneer, machane bay boch ban’en nrayog ni nggu rin’ew. Ere gu tababgow i rin’ boch ban’en nib achig ya nge yag nug yoornagew e tayim romow ni fan ko machib. Bod nug lichnagew e n’en ni gamow be n’ag e salpiy ngay, nge pi n’en ni gamow ma rin’ ni nggu felfelan’gow ngay me n’ag e chalban romow, ma ra bagamow me yog ko en nib ga’ u tabon e maruwel rok ni nge thilyeg e ngiyal’ ni gamow ma maruwel riy ya nge yag ni yoor e tayim romow ni fan ko machib nge yugu boch ban’en. Angin ni yib riy e yag ni nggu unew ko machib ko blayal’, me yoor e girdi’ ni gamow be fil e Bible ngak, miki yag ni nggu unew ko machib u lan e wik ni l’agruw yay u reb e pul. Rib gel e felfelan’ nug tew!”

ROGON NI NGAD MON’OGGAD KO MACHIB NGE ROGON NI GAD MA FIL BAN’EN KO GIRDI’

15-16. Uw rogon ni ngad mon’ognaged e salap rodad ko machib nrogon nib puluw ko 1 Timothy 4:13, 15? (Kum guy fare kahol ni kenggin e “Tin ni Nggu Nameg Ya Nggu Rin’ Urngin e Maruwel ni Fan ko Machib.”)

¹⁵ Ku reb e kanawo’ nrayog ni ngad rin’ed urngin e maruwel ni kan pi’ ngodad ni fan ko machib e aram e ngad mon’oggad ko machib. Piin ni yad ma un nga boch e maruwel ni yad ba salap riy e thingar ni skulnagrad ni gubin ngiyal’ ya nge yag ni ngar mon’oggad ko maruwel rorad mi yad salap riy. Ku arrogodad e piin ni gad be machibnag murung’agen Gil’ilungun Got. Ba t’uf ni ngad ululgad i fil rogon ni ngad salapgad ko machib.​—Prov. 1:5; mu beeg e 1 Timothy 4:13, 15.

¹⁶ Ere uw rogon ni ngad mon’oggad i yan ko fare maruwel ni machib? Ba t’uf ni ngar da tedan’dad ko pi fonow ni yima pi’ u nap’an fare muulung ni yima tay u lan e wik ni ka nog e N’en ni Gad Ma Rin’ nge Machib ni Gad Ma Tay ngay. Boor ban’en nib manigil ni yima fil ngodad ko re muulung ney nra ayuwegdad ni ngad mon’oggad ko machib ni gad ma tay. Bod nnap’an nra pi’ e en ni be yarmiy e muulung e fonow ngak e piin ni bay e welthin rorad, ma rayog ni ngad tedan’dad nga boch e fonow ni kan pi’ ngorad nra ayuwegdad ni ngad mon’oggad ko machib. Ma nap’an ni gad ra machibnag be’ u tomuren, ma rayog ni ngad folgad ko pi fonow nem. Ku rayog ni ngad ninged e ayuw ngak e en ni ma yarmiy e machib ara da uned ngak ko machib, fa reb e da machibgad reb e walag u taabang nib salap ko machib, ara reb e pioneer, ara en ni ma lekag e ulung. Nap’an ni gad ra salap i fanay reb nge reb e pi talin e maruwel rodad ni bay ko fare Tafen Talin e Maruwel ni Yima Fanay ni Ngan Fil Ban’en ko Girdi’ riy, ma aram e rayog ni ngad adaged e machib ni gad ma tay nge rogon ni gad ma fil ban’en ko girdi’.

17. Mang angin nra yib ngom ni faan ga ra rin’ urngin e maruwel ni kan pi’ ngom ni fan ko machib?

¹⁷ Ri gad ba tow’ath ni ke pagdad Jehovah ni ngad ‘maruwelgad rok u taabang’! (1 Kor. 3:9) Faan ga ra mel’eg e “tin ni ir e th’abi ga’ fan” mag tiyan’um ko machib, ma aram e rayog ni ngam ‘liyor ngak Somol u fithik’ e felfelan’.’ (Fil. 1:10, NW; Ps. 100:2) Bochan ni gur reb e tamachib rok Got, ma rayog ni nge pagan’um nra pi’ gelngim ni ngam rin’ urngin e maruwel ni kan pi’ ngom ni fan ko machib ni yugu demtrug e miti magawon ni ga be mada’nag ara bay boch ban’en ndabiyog rom. (2 Kor. 4:1, 7; 6:4) Demtrug ko ba achig ara ba ga’ e tayim nrayog ni ngam machib riy ni bochan rarogom, ma faan ga ra machib u polo’ i gelngim ma rayog ni ngam pirieg e “felfelan’.” (Gal. 6:4) Faan ga ra rin’ urngin e maruwel ni kan pi’ ngom ni fan ko machib, ma aram e ga be dag nib t’uf Jehovah nge girdi’ rom. “Faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.”​—1 Tim. 4:16.