N’en ni nge M’on u Wan’dad
1. Uw rogon ni dag Jesus ni baga’ fan e machib u wan’?
1 Machib e aram e n’en nib m’on u wan’ Jesus. I pag fan, nga i milekag u but’ ni bokum miriay e mayal u lan e binaw nu Palestine ni be machib. Da i yoornag pa’ nga puluwon ni fan e nge yog ni tiyan’ ko machib. (Matt. 8:20) Nap’an ni yib e girdi’ ngak ni nge golnag e liliy rorad, me gaar: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.”—Luke 4:43.
2. Mang nrib ga’ fan e machib u wan’ Jesus?
2 Mang nrib ga’ fan e machib u wan’ Jesus? Ya n’en nib m’on u wan’ e aram e nge tayfan fithingan Jehovah. (Matt. 6:9) Ba t’uf e Chitamangin nu tharmiy rok, ere ba adag ni nge rin’ e tin nib m’agan’ ngay me fol ko pi motochiyel Rok. (John 14:31) Maku reb, e i taganan’ ko girdi’ ma ba adag ni nge ayuwegrad.—Matt. 9:36, 37.
3. Uw rogon ni ngad daged nib m’on e machib u wan’dad?
3 Ngan Folwok Rok Jesus: Ba mo’maw ni ngad tedan’dad ko machib ni bod ni i rin’ Jesus ni bochan e gad be par u ba ngiyal’ ni ke yoor pa’, ma boor ban’en ni ma magawonnag lanin’dad. (Matt. 24:37-39; Luke 21:34) Ere, thingarda mon’eged u wan’dad e tin nib ga’ fan ban’en, ma gad tay e tayim ni ngad fal’eged rogodad ni fan ko machib, mu kud gayed rogon ni ngaud uned ko machib ni gubin ngiyal’. (Fil. 1:10) Ku thingar da gayed rogon ni nge dabi yoor pa’ u puluwdad, ma dabi par ni goo tin nu fayleng ban’en e ke m’on u wan’dad.—1 Kor. 7:31.
4. Mang nib ga’ fan ni ngad mon’eg e tin nib ga’ fan e ngiyal’ ney?
4 Faanra buchuuw e tayim ni ke magey, ma be’ nib gonop e ma mon’eg e tin’ nib ga’ fan ko som’on. Faanra ke nang ni bayi yib e yoko’ nib gel ma ra rin’ e tin nib t’uf ni nge rin’ ni fan e nge ayuweg chon e tabinaw rok nge piin buguli yoror rok ni nge dabi buch ban’en rorad. Tin nde ga’ fan ban’en e ra rin’ u yugu ba ngiyal’. Kari chugur e Armageddon. (Zef. 1:14-16; 1 Kor. 7:29) Ere rogon ni ngad ayuweged gadad nge piin nra motoyil ngodad, e aram e ngad tedan’dad ngodad nge machib ni gad be tay. (1 Tim. 4:16) Arrogon, athap rodad e be yan u rogon e machib ni gad be tay!