Nge Ga’ Fan e Machib u Wan’um
1. Uw rogon e machib ni gad ma tay u wan’ boor e girdi’?
1 Boor e girdi’ ko re fayleng rok Satan ney ni yad ma lemnag ni fare thin nib fel’ ni gad ma machibnag e “thin ko balyang.” (1 Kor. 1:18-21) Ere faanra dab da kol ayuwgad ma rayog ni nge mulan’dad ma gad malmal ko machib. (Prov. 24:10; Isa. 5:20) Ere mang boch i fan ni nge ga’ fan u wan’dad e tow’ath rodad ni gad e Pi Mich Rok Jehovah?—Isa. 43:10.
2. Mang fan ni rayog ni nga nog ni machib ni gad be tay e ba maruwel nib thothup?
2 Ba Maruwel nib Thothup: I yog apostal Paul ni fare maruwel ni machib e bang ko “pigpig” ni gad ma tay ni be yip’ fan e n’en ni gad ma rin’ ni fan ngak Got. (Rom. 15:15, 16) Mang fan ni machib ni gad ma tay e ba maruwel nib thothup? Gad ra un ko re maruwel ney ma aram e gad “be maruwel rok” faen nib “thothup” ni aram Jehovah, ma gad be un i tayfan fithingan nib thothup. (1 Kor. 3:9; 1 Pet. 1:15) Machib ni gad ma tay e ba “maligach” u wan’ Jehovah, ere rib ga’ fan ko pigpig ni gad ma tay.—Heb. 13:15.
3. Mang fan ni fare maruwel ni ngan machibnag fare thin nib fel’ e ba tow’ath nrib fel’?
3 Fare maruwel ni ngan machibnag fare thin nib fel’ e ba tow’ath ni kemus nri in e girdi’ e kan pi’ ngorad. Rra felfelan’ e pi engel ni ngar rin’ed e re maruwel ney maku dariy e maruwar riy ni yad ra rin’ nrib fel’ rogon. (1 Pet. 1:12) Machane, ke mel’egdad Jehovah ni ngad rin’ed e re maruwel ney ni yugu aram rogon ndawor da flontgad ma gad bod e “rume’ ni but’.”—2 Kor. 4:7.
4. Uw rogon ni nge m’ug nrib ga’ fan e machib u wan’dad?
4 Ba M’on u Wan’dad: Bochan nrib ga’ fan e re tow’ath ney u wan’dad ma gad ma tay ni aram ban’en nib m’on u wan’dad. (Fil. 1:10) Ere gad ma tay e tayim ni ngad uned ko re maruwel ney u gubin e wik. Girdien e musik ni yad ma musik ni nga i yaliy e girdi’ e gubin yay ni ngar musikgad ma yad ma fal’eg rogorad u m’on riy maku yad ma guy rogon ni ngar salapgad ko musik ni yad ma tay. Ku er rogodad ni ngad fal’eged rogodad u m’on ni nga darod ko machib ya nge yog nda ‘machibnaged e thin rok Got nrogon’ maku gad ma athamgil ni ngad mon’oggad u rogon ni gad ma “fil” e thin rok Got ko girdi’.—2 Tim. 2:15; 4:2.
5. Mini’ e ba ga’ fan e machib ni gad ma tay u wan’?
5 Dab mu pag boch e girdi’ ni ngar muleged lanin’um. Dab mu pagtalin ni ka boor e girdi’ ko binaw ni gad ma machib riy ni yad baadag ni ngar motoyilgad ngodad. Machane, gathi girdi’ e ngaud fal’eged lanin’rad. Ya laniyan’ Jehovah e ba ga’ fan ma ba ga’ fan e athamgil ni gad ma tay u wan’.—Isa. 52:7.