“Nguum Leked Luwan Ay”
1. Uw rogon ni nge yib angin e machib ni gad ma tay?
1 De un Jesus ko skul ko rabbi, machane ir e bin th’abi ga’ e Tamachib. Gad be pining e magar riy ya kan yoloy nga but’ murung’agen e machib ni i tay Jesus nra yib angin ngodad. Thingarda “leked luwan ay” nge yog ni yib angin e machib ni gad ma tay.—1 Pet. 2:21.
2. Mang e ra ayuwegdad ngad t’ufeged e girdi’ ni bod Kristus?
2 Ngan Dag e T’ufeg Ngak e Girdi’: I lemnag Jesus e girdi’ u fithik’ e t’ufeg. (Mark 6:30-34) Boor e girdi’ ko yungi n’en ni gad ma machib riy ni yad be “gel’gel’ ko amith” mab t’uf rorad e thin nriyul’. (Rom. 8:22) Faanra ud lemnaged salperad nge rogon ni yad ba t’uf rok Jehovah ma aram e ra k’aringdad ni nguud machibgad. (2 Pet. 3:9) Maku ra motoyil e girdi’ ngodad ni faanra yad be guy nriyul’ ni yad ba t’uf rodad.
3. Mingiyal’ e i machibnag Jesus e girdi’?
3 Ngan Machib u Gubin Ngiyal’ Nrayog: Gubin ngiyal’ ni ke mab e kanawo’ ngak Jesus ma ke wereg fare thin nib fel’ ngak e girdi’. (Matt. 4:23; 9:9; John 4:7-10) Ku aram rogogodad ni gad ba adag ni ngad fal’eged rogodad nge yog nda weliyed e thin nriyul’ u nap’an ni gad be rin’ e tin ni gad ma rin’ u reb e rran nge reb. Boch e girdi’ e yad ma fek e Bible rorad nge boch e babyor ni gubin ngiyal’ ni fan e nge yog nra machibnaged e girdi’ u tabon e maruwel, ara skul, ara nap’an ni yad be milekag iyan, ara nap’an ni ka ranod ko chuway’, ara yugu ban’en.
4. Uw rogon ni ngad ted ni Gil’ilungun Got e aram kenggin e machib rodad?
4 Ngan Tamilangnag Gil’ilungun Got: Fare thin nib fel’ u murung’agen Gil’ilungun Got e aram kenggin e machib ni i tay Jesus. (Luke 4:43) Yugu aram rogon ni gathi ri murung’agen Gil’ilungun Got e gad ra weliy, machane susun ni ngaud ted u lanin’dad rogon nrayog ni ngad ayuweged e piin ni gad be machibnagrad ngar guyed ni aram e n’en nib t’uf ko girdi’. Mus nga nap’an ni gad be weliy murung’agen rarogon e fayleng nge pi n’en ni be dag ni gad be par ko tin tomren e rran, ma aram e gad be “fek i yib e thin nib fel’ ni yib rok Got.”—Rom. 10:15.
5. Uw fene ga’ fan ni ngad fanayed e thin ko Bible nge yog ni yib angin e machib ni gad ma tay?
5 Mu Taga’ Nga Daken e Thin Rok Got: I taga’ Jesus nga daken e Thin rok Got ko machib ni i tay. Dariy ban’en ni machibnag ni ire yib rok. (John 7:16, 18) I fil e Thin Rok Got me fol riy u nap’an ni ke yib moonyan’ ngak. (Matt. 4:1-4) Thingarda bieged e thin nu Bible u gubin e rran ma gad fol riy ma aram e ra yib angin e machib ni gad be tay. (Rom. 2:21) Nap’an ni gad be fulweg e deer ko girdi’ ma susun ni ngad weliyed boch e thin ko Bible nib puluw ko n’en ni gad be weliy maku faanra rayog ma gad gay rogon ni ngad beeged u Bible. Ya gad baadag ni nge guy faen ni gad be machibnag ni n’en ni gad be machibnag e gathi gadad e ke yib rodad ya Got e ke yib rok.
6. Mang e i rin’ Jesus me yog ni taw e thin rok nga gum’erchaen e girdi’?
6 Ngam Machib Nge Taw nga Gum’erchaen e Girdi’: “Dariy be’ ni kaa welthin ni bod rogon e re moon nem.” (John 7:46) Aram e n’en ni yog fapi matanag u murung’agen Jesus u nap’an ni fith e pi tolang ko prist nge pi Farise ko mang fan ndar feked Jesus iyib. Ya gathi ke mus ni ma weliy e thin nriyul’ ya rogon ni ma non Jesus e ma taw nga gum’erchaen e girdi’. (Luke 24:32) I weliy e fanathin nib m’ag ko par ko girdi’ me tamilangnag e thin rok. (Matt. 13:34) De weliy Jesus e thin ni kayigi yoor. (John 16:12) I weliy murung’agen Jehovah ma gathi ir. Bod Jesus, rayog ni ngad manged e pi tamachib nib fel’ nfaanra da ‘ayuweged rogon ni gad be weliy murung’agen e thin rok Got ngak e girdi’.’—1 Tim. 4:16.
7. Mang fan ni i athamgil Jesus ko machib?
7 Yugu Demtrug ni Dariy Fan u wan’ e Girdi’ fa Yad be Togopuluw, Machane Ngam Athamgil: Yugu aram rogon ni i fl’eg Jesus boor e maangang machane boor e girdi’ ndar motoyilgad ngak. (Luke 10:13) Mus ngak girdien e tabinaw rok Jesus nrogned ni “ke sabalbalyang.” (Mark 3:21) Machane i athamgil Jesus. I par nib fel’ e lem rok ya kari mich u wan’ ni thin nriyul’ e ra ayuweg e girdi’ nge dabkur pared ni yad e sib. (John 8:32) U daken e ayuw rok Jehovah ma ke mudugilan’dad ndabda paged e machib ni gad be tay.—2 Kor. 4:1.
8, 9. Uw rogon nrayog ni ngad folwokgad rok Jesus ngad paged fadad ni fan ko fare thin nib fel’?
8 Ngam Pagfam Nge Yog nim Un ko Machib nib Fel’ Rogon: I pag Jesus boor ban’en ni fan ko machib. (Matt. 8:20) Der ma magar Jesus ko machib, ma yu ngiyal’ e ma machib ngari gonowrug. (Mark 6:35, 36) Ya manang Jesus nde yoor e tayim ni ba’ ni nge rin’ e maruwel rok riy. Bochan ni “daki yoor e tayim ni ke magey,” mab t’uf ni ngad paged fadad ngad pied e tayim rodad nge gelngidad nge tin ni bay rodad ban’en ni bod ni rin’ Jesus.—1 Kor. 7:29-31.
9 I yib angin e machib ni tay e pi Kristiano u nap’an e bin som’on e chibog ni bochan e ur folgad rok Jesus. (Acts 4:13) Maku arrogodad nrayog ni ngad uned ko machib nge mus rogon ni faan gad ra folwok rok fare Tamachib nth’abi ga’.—2 Tim. 4:5.