Kan Skulnagrad Ni Ngar Wereged E Machib Ni Polo’

“Mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.”​—ACTS 1:8.

1, 2. Mang e maruwel rok Peter kakrom, ma mini’ e ke pi’ ngak?

“JESUS ni be’ nu Nazareth . . . e ke tay chilen ngodad ni ngad machibnaged e girdi’ ma ngarda weliyed ngorad ni Ir faanem ni ke turguy Got ni nge pufthinnag e piin ni kab fos nge piin ni kar m’ad.” (Acts 10:38, 42, NW) U daken e pi thin nem, i weliy Peter ni apostal ngak Kornelius nge chon e tabinaw rok fare maruwel ni kan pi’ ngak ni ba tamachib ko thin nib fel’.

² Wuin e ke pi’ Jesus e re maruwel nem ngak? Baga’ ni, be lemnag Peter e n’en ni yog Jesus u tomren ni kan faseg ko yam’ u m’on ni dawori yan nga tharmiy. Ngiyal’ i nem, i yog Jesus ngak pi gachalpen nib yul’yul’ ni gaar: “Mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Machane, u m’on riy, me nang Peter ni ir reb e gachalpen Jesus, mab t’uf ni nge weliy ngak yugu boch e girdi’ murung’agen e michan’ rok ngak Jesus.

Kan Skulnagrad u Lan Dalip e Duw

3. Mang e ke buch u nap’an ni ke pining Jesus Peter ni nge mang gachalpen?

³ In e pul ni ke yan u tomren ni kan taufenag Jesus ko 29 C.E., i machib u Maday u Galilee ni ireray e gin’en ni i maruwel Peter nge walagen i Andrew riy ni yow e ta fita’. Reb e nep’ ni polo’ ni kar fita’gow machane dar kolew ban’en. Yugu aram rogon, mi yog Jesus ngorow ni gaar: “Nga mon’ew e nug ko gin ba toar, ma rayog ni ngam kolew e nig.” Nap’an ni kar rin’ew e n’en ni yog Jesus ngorow, “mi yow kol e nig ni pire’ ni pire’. Riyul’, ni ke tabab ni nge mogchoth e nug riy.” Nap’an ni ke guy Peter fare maangang me yib e marus ngak, machane ke yog Jesus ngak ni gaar: “Dab mu tamdag. Chiney i yan ngaram e bay um yognag e girdi’ nib fos.”​—Luke 5:4-10, NW.

4. (a) Uw rogon ni fal’eg Jesus rogon e pi gachalpen ni ngar machibgad? (b) Uw rogon ni yira taarebrogon nag e machib ni tay pi gachalpen Jesus ko tini rin’?

⁴ Chi ngiyal’ nem, me Peter nge Andrew​—nge James nge John, ni fak Zebedee—​e kar digeyed e bowoch rorad mi yad lek Jesus. Ke chuchugur ko dalip e duw, ni kar uned ngak Jesus ko milekag ni ta’ ni be machib ma be skulnagrad ni ngar manged tamachib. (Matthew 10:7; Mark 1:16, 18, 20, 38; Luke 4:43; 10:9) Nap’an ni m’ay e re skul nem, ko Nisan 14, 33 C.E., me yog Jesus ngorad ni gaar: “En nra gu mich u wan’ e ra rin’ e pi n’en ni gu be rin’ - ni erera’ rogon, ni ka ba ga’ e tin ni ra rin’.” (John 14:12) Pi gachalpen Jesus e ngaur machibgad ni polo’ ni bod rogon e n’en ni rin’ Jesus machane ka ba ga’ e tin ra ur rin’ed. Ya rogon e n’en ni ke chuchugur ni ngar nanged, e yad nge urngin e piin bay ra manged pi gachalpen e ngar machibnaged “urngin e nam,” nge yan i mada’ nga tomren e fayleng.”​—Matthew 28:19, 20.

5. Mang boch e kanawo’ ni ra fel’ rogodad riy nrogon ni i skulnag Jesus pi gachalpen?

⁵ Gad be par ko “tomur ko re m’ag ney.” (Matthew 24:3, NW) De taareb rogon ko tin som’mon e pi gachalpen, dabiyog ni ngad uned ngak Jesus ni gad be yaliy ni be machibnag e girdi’. Yugu aram rogon, ma rayog ni nge fel’ rogodad nga rogon ni ke skulnagrad ya aram e nguuda bieged u lan e Bible ko uw rogon ni i machib ma mang e thin ni i yog ngak pi gachalpen. (Luke 10:1-11) Maku, re article ney e ra weliy ban’en nib ga’ fan ni i dag Jesus ngak pi gachalpen​—ni aram e lem nib mat’aw ni fan ko maruwel ni ngan wereg e machib.

Magafan’ ni Fan ko Girdi’

6, 7. Mang felngin Jesus ni ke ayuweg ni nge yib angin e machib ni i tay, ma uw rogon ni ngada folwokgad riy?

⁶ Mang fan ni kari yib angin e machib ni ta’ Jesus? Reb i fan e ri ma lemnag e girdi’ ma ma magafan’ ngorad. I yiiynag fare psalmist murung’agen Jesus ni ma “runguy e piin nib sobut’ nge piin nib gafgow.” (Psalm 72:13, NW) Ma mutrug ni ke lebuguy e re yiiy nem. Be yog e Bible murung’agen ba ngiyal’ ni gaar: “Ma faani guy e pi girdi’ nem ni aram urngirad, me taganan’ ngorad, ya kar pared ni ke magafan’rad ni dar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matthew 9:36) Musko girdi’ ni yad ma denen ma denengad nib gel e kar guyed rogon e magafan’ rok Jesus ngak e girdi’ ma kar adaged daken.​—Matthew 9:9-13; Luke 7:36-38; 19:1-10.

⁷ Gadad e ngiyal’ ney e ra yib angin ngodad nfaanra ngada daged e magafan’ rodad ko girdi’ ni aram rogon. U m’on ni ngam un i wereg e machib, ma mang fan ni dabmu fal’eg i lemnag nib ngoch nap’an feni ga’ fan ngak e girdi’ e thin ni ga be fek i yan ngorad? Mu lemnag e magawon ni sana keb ngorad ni kemus ni Gil’ilungun e rayog ni nge pithig. Mu lemnag ni gubin e girdi’ e ra adag e machib, ya dawor mu nang ko mini’ e ra fol ko fare thin. Sana bin migid e girdi’ ni ngam man ngam gu’ e be yibilay ni ngeb be’ ni bod gur ni ngeb nge ayuweg!

T’ufeg e Ke K’aring

8. Rogon nni folwok rok Jesus, ma mang e ke k’aring pi gachalpen Jesus ni ngar machibnaged fare thin nib fel’?

⁸ Fare thin nib fel’ ni i machibnag Jesus e bay rogon ko tin nib m’agan’ Jehovah ngay ko uw rogon ni ra lebug, min thothupnag Fithingan, mini tamilangnag e Gagiyeg rok nib Tolang​—ni ireray e issue ni be sabliy e girdi’. (Matthew 6:9, 10) T’ufeg rok Jesus ngak e Chitamangin, e ke k’aring ni nge par nib yul’yul’ nge mada’ ko tomur me machibnag murung’agen Gil’ilungun ni polo’, ni aram e n’en ni nge pithig e pi magawon nem. (John 14:31) Bochan ni pi gachalpen Jesus e ku aram rogon e n’en ni yad be lemnag, yad ma un ko machib nib elmerin. John ni apostal e ke yog ni gaar: “Ya baaray fan ni nge t’uf Got rodad: fan i ngad folgad ko tin ni ke yog ni ngad rin’ed,” mab muun ngay fare motochiyel ni ngan machibnag fare thin nib fel’ min pingeg e girdi’ ngar manged gachalpen.​—1 John 5:3; Matthew 28:19, 20.

9, 10. Mang yugu reb e t’ufeg e ma k’aringdad ni ngada machibgad ni polo’ nrayog ni ngad uneged ko t’ufeg ku Got?

⁹ I yog Jesus ngak pi gachalpen ni gaar: “Faan gu ra t’uf romed, ma gimed ra fol ko tin ni kug ta’ chilen ngomed. En nra fel’ u wan’ e tin ni kug ta’ chilen ngomed me fol riy, e ereram e cha’ ni gub t’uf rok.” (John 14:15, 21) Ere, t’ufeg rodad ngak Jesus e thingari k’aringdad ni ngad machibnaged murung’agen e thin riyul’ ma ngad rin’ed yugu boch ban’en ni i tay Jesus chilen ngodad. Tomren ni kan faseg Jesus ko yam’ ma ba’ bayay ni fonownag Jesus Peter, ni gaar: “Mu duruiy e tin ni kab bitir e pi saf rog. . . . Mu guy rogom ngam ayuweg e pi saf rog nib achichig. . . . Mu duruiy e pi saf rog nib achichig.” Susun mang e ra k’aring Peter ni nge rin’ e re n’em? Ke dag Jesus u nap’an ni fith ngak Peter ni boor yay ni gaar: “Gub t’uf rom? . . . Gub t’uf rom? . . . Ga be runguyeg?” Arrogon, t’ufeg rok Peter ngak Jesus, nge runguy rok ngak, e k’aring ni nge machib ni polo’, ma nge gay e saf rok Jesus “nib achichig,” ma tomur riy ma ra mang en ni ma gafaliyrad.​—John 21:15-17, NW.

¹⁰ Ngiyal’ ney, ma gathi ri gad manang Jesus ni bod Peter. Yugu aram rogon, ma ri gad manang fan e n’en ni rin’ Jesus ni fan ngodad. Me mithmith gum’irchadad ko t’ufeg rok nib gel ni k’aring ni nge “yim’ ni fan ko urngin e girdi’.” (Hebrews 2:9; John 15:13) Gad be thamiy e n’en ni thamiy Paul u nap’an ni yoloy ni gaar: “Gelngin fanmad t’uf rok Kristus e ir e be gagiyegnagmad . . . I yim’ ni fan ngak i girdi’ ni urngin ni bochan e piin ni yad ba fos e nge dab ku ur ngongolgad ni yad be yan nga tabon lanin’rad, machane ngar ngongolgad ni yad be yan ngan’ faanem ni ir e ke yim’ ni fan ngorad.” (2 Korinth 5:14, 15) Gad ma dag ni ri gad ma tayfan e t’ufeg rok Jesus ni fan ngodad ma gad ma dag e t’ufeg rodad ngak ni gadad be lebuguy e maruwel rodad ni ngan machib ni polo’. (1 John 2:3-5) Dabda dariyfannaged e maruwel ni ngan wereg e machib, ni bod ni gad be lemnag ndariy puluwon e maligach rok Jesus.​—Hebrews 10:29.

Mu Par nib Mat’aw i Yiluy Owchem

11, 12. Mang fan ni keb Jesus nga fayleng, ma uw rogon ni dag ni ke ta’ ni ireray e maruwel rok nth’abi ga’ fan?

¹¹ Nap’an ni immoy Jesus u p’eowchen Pontius Pilate, e yog ni gaar: “Ni gargelnigeg ngaray nga fayleng ni bochan e nggu weliy murung’agen e tin riyul’.” (John 18:37) De pag Jesus ban’en ni nge taleg ni dabki machibnag e tin riyul’. Ireray e tin nib m’agan’ Got ngay ni nge rin’.

¹² Mmutrug ni i skengnag Satan Jesus riy. De n’uw nap’an u tomren ni kan taufenag Jesus, me ognag Satan ngak ni nge fal’eg rogon ni nge mang be’ nrib gilbuguwan u fayleng, ni aram e nge pi’ ngak “urngin e am nu fayleng nge felngin.” (Matthew 4:8, 9) Tomur riy, ma baadag piyu Jew ni nge mang reb e pilung. (John 6:15) Boch e girdi’ e sana yad be susunnag e tin nib fel’ ni nge yib ngak e girdi’ nfaanra fol Jesus ko pi n’en ni ka nog ngak, ma rayog ni nga rogned nfaanra mang Jesus nib pilung ni girdi’, susun boor ban’en nib fel’ ni rayog ni nge rin’ ni fan ko girdi’. Machane, de lemnag Jesus ban’en ni aram rogon. N’en ni ri be lemnag e nge machibnag e tin riyul’.

13, 14. (a) Mang e n’en ni ke ayuweg Jesus ni nge tiyan’ ko maruwel rok nrib ga’ fan? (b) Yugu aram rogon ni de yoor e chugum rok Jesus, ma mang e n’en ni ke lebuguy?

¹³ Maku, de lemnag Jesus ni nge yoornag e chugum rok. Bochan e re n’ey, de yoor e chugum rok. Maku dariy e naun rok. Immoy ba ngiyal’, ni yog ni gaar: “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.” (Matthew 8:20) Nap’an ni yim’ Jesus, rogon ni yog e Bible ban’en nib tolang puluwon ko chugum rok e kemus ni fare mad rok ni f’oth fapi salthaw nu Roma. (John 19:23, 24) Ere, gur yafas rok Jesus e dariy angin? Ri danga’!

¹⁴ I rin’ Jesus ban’en ni kab boor ni dawori chuchugur ko n’en ni ma rin’ e en philanthropist ni rib fel’ rogon. I yog Paul ni gaar: “Ya gimed manang rogon ni nge runguydad e Somol rodad i Jesus Kristus ni baaray rogon: aram rogon feni flaab, me pag ir nge gafgow ni fan ngomed, ni fan e nge yognag e flaab ngomed u daken e gafgow ni ke tay.” (2 Korinth 8:9; Filippi 2:5-8) Yugu aram rogon ni de yoor e chugum rok Jesus, e gagiyegnag ni piin nib sobut’ lanin’rad e nge yog ngorad e yafas ni manemus mab flont. Ri gad be pining e magar ngak! Ma ri gad ba felfelan’ ni bochan e taw’ath ni kan pi’ ngak ya ke rin’ e tin nib m’agan’ Got ngay u fithik’ e yul’yul’!​—Psalm 40:8; Acts 2:32, 33, 36.

15. Mang e n’en ni kab ga’ fan ko chugum?

¹⁵ Maku piin ni Kristiano ni chiney e yad be athamgil ni ngar folwokgad rok Jesus ni dara paged chogowen e chugum e nge talegrad. (1 Timothy 6:9, 10) Yad manang ni chugum e ra ayuweg e yafas nge mom boch, machane yad manang ni yafas rorad ko gabul nge langlath ndariy n’umngin nap’an e de tor nga daken e chugum. Nap’an ni yim’ reb e Kristiano, ma chugum rok e dakuriy fan ngak ni bod ni mad rok Jesus e dakuriy fan ngak u nap’an ni yim’. (Eklesiastes 2:10, 11, 17-19; 7:12) Nap’an ni ra yim’ e Kristiano, ma kemus ni tha’ u thilrow Jehovah nge Jesus e riyul’ ni ri bay puluwon.​—Matthew 6:19-21; Luke 16:9.

De Tal ni Bochan e Togopuluw

16. Mang e ke rin’ Jesus u nap’an ni yib e togopuluw?

¹⁶ Togopuluw e de taleg Jesus i machibnag e tin riyul’. Yugu aram rogon ni manang ni ra yim’ u fithik’ e gafgow nbochan e machib rok u fayleng ma de mulan’. I yog Paul murung’agen Jesus ni gaar: “Bochan e felfelan’ ni kan ta’ nga p’eowchen me k’adan’ u daken baley e gek’iy ni yima gafgow riy, ma daki tafinaynag e tamra’, ma ke par nga but’ u ba’ ni mat’aw rok Got u tagil’ Got.” (Hebrews 12:2, NW) Mu lemnag ni ‘daki tafinaynag’ Jesus e tamra’. De magafan’ ko mang e ra lemnag e pi toogor rok u murung’agen. Tin ni ri be lemnag e nge rin’ e tin nib m’agan’ Got ngay.

17. Mang e gad ra fil ko k’adan’ ni dag Jesus?

¹⁷ Be weliy Paul e n’en ni nge fil e Kristiano ko kadan’ ni tay Jesus, i pi’ e athamgil nga lanin’rad ni gaar: “Mu tafinaynaged gelngin e gafgow ni tay, nge rogon ni k’adan’ nge gelngin e fanenikan ni tay e piin ntadenen ngak! Ere dabi mulan’med ngam paged gimed.” (Hebrews 12:3) Riyul’ ni bochan e togopuluw ara moning ni gubin ngiyal’ e rayog ni nge mulan’uy riy. Rayog ni nge warnag lanin’uy ni nguun togopuluw ko tin nu fayleng ni be wawliy laniyan’ e girdi’, ni sana girdi’ rodad ni be moningnagdad ya ma yog ni fel’ ni ngada “rin’ed ban’en” ni fan ngodad ni nge gilbuguwdad. Machane, ngad boded Jesus ngad sapgad ngak Jehovah ni nge ayuwegdad ni ri gad be tay e gagiyeg rok nib m’on ko yafas rodad.​—Matthew 6:33; Roma 15:13; 1 Korinth 2:4.

18. Mang e gad ra fil rok Jesus ko thin ni yog ngak Peter?

¹⁸ Ke dag Jesus ni ri dabun ni bay ban’en ni nge warnag laniyan’ u nap’an ni tabab ni nge yog ngak pi gachalpen murung’agen e yam’ ni nge tay. I pi’ Peter e athamgil nga laniyan’ Jesus ni nge “gol” ngak me yog ngak ni ri “dabi buch rok e n’en ni aram rogon.” De motoyil Jesus ko urngin ban’en ni rayog ni nge warnag e n’en ni ke dugliy u laniyan’ ni nge rin’ e tin nib m’agan’ Jehovah ngay. I sap ngak Peter me gaar: “Satan mu chuw rog! Ya kam dibchey u kanawo’ rog, ya lem ni ga be tay e lem rok e girdi’, ma gathi lem rok Got.” (Matthew 16:21-23) Manga yigi uda dugliyed lanin’dad ni dabda fanayed e lem rok e girdi’. Ya susun, lem rok Got e ra pow’iydad ni gubin ngiyal’.

Ra Yibnag e Pi Felngin nib Riyul’

19. Yugu aram rogon ni ma fal’eg e maangang, mang e n’en ni rib ga’ fan ko pigpig ni i tay Jesus?

¹⁹ I fal’eg Jesus boor e maangang ni nge dag ni ir fare Messiah. Maku ke faseg e yam’. Pi maruwel nem e ke felfelan’nag e girdi’, machane de yib Jesus nga fayleng ni kemus ni nge pigpig ko girdi’. Ke yib ni fan ni nge weliy e tin riyul’. Manang ni urngin e ayuw ni ke pi’ ngak e girdi’ ni fan nga dowrad e ra par nib ngoch nap’an. Musko girdi’ ni kan fasegrad ko yam’ ma ra yim’ biyay. Rayog ni nge ayuweg boch e girdi’ ni nge yog ngorad e yafas ni manemus ni kemus nfaanra machibnag e tin riyul’ ngorad.​—Luke 18:28-30.

20, 21. Uw rogon ni nge par e Kristiano nib riyul’ nib thabthabel ko pi maruwel nib fel’?

²⁰ Ngiyal’ ney, e ke guy boch e girdi’ rogon ni ngar folwokgad rok Jesus ko tin nib fel’ ni i rin’ ma aram e kar toyed e pi hospital ara yugu boch e pigpig ni fan ngak e girdi’ nib gafgow. Yu ngiyal’, yad ma rin’ e n’en ni aram rogon nib t’uf ni ngar pi’ed boor e salpiy ngay, ma ba puluw ni ngan pining e magar ngorad ko yul’yul’ rorad riy; machane felngin ni yad ma pi’ riy e ba ngoch nap’an. Kemus ni Gil’ilungun e ra yibnag e ayuw ni dariy n’umngin nap’an. Ere, Pi Mich Rok Jehovah e yad ma tiyan’rad ko maruwel ni ngan machibnag e tin riyul’ u murung’agen e re Gil’ilungun nem ni bod rogon e n’en ni rin’ Jesus.

²¹ Riyul’, ni tin riyul’ e Kristiano e yad ma rin’ e tin nib fel’. I yoloy Paul ni gaar: “Ere urngin ngiyal’ nra puf rogodad ma ngad ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.” (Galatia 6:10) Ngiyal’ ni ke gafgow e girdi’ ara bay be’ nib t’uf rok e ayuw, ri gad ma dag e “ngongol nib fel’” ngak e piin buguli yoror rodad ara ngak pi walagdad ni Kristiano. Yugu aram rogon, ma gad ma tiyan’dad ko tin nrib ga’ fan u wan’dad​—ni aram e maruwel ni ngan machibnag e tin riyul’.

Ngan Fil e Pi N’en ni i Rin’ Jesus

22. Mang fan ni nge machibnag e Kristiano e piin buguli yoror rorad?

²² I yoloy Paul ni gaar: “Faan mang e dagu machibnag ngak e girdi’ e Thin Nib Fel’ ni yib rok Got ma ri gu ra gafgow!” (1 Korinth 9:16) Der ma dariyfannag fare thin nib fel’ ya machib e ra yognag e yafas ngak nge piin ni ma motoyil ngak. (1 Timothy 4:16) Gad ma changar ko maruwel ni ngan wereg e machib ni aram rogon. Gad baadag ni ngad ayuweged e piin buguli yoror rodad. Ma gad baadag ni ngad daged e t’ufeg rodad ngak Jehovah. Gad baadag ni ngada daged e t’ufeg rodad ngak Jesus nge felfelan’ rodad nbochan e t’ufeg nib gel ni fan ngodad. Ma arfan ni, gad ma machibnag fare thin nib fel’ ma gad ra par ni “gathi bochan e n’en ni be ar’arnag e girdi’, ya bochan e tin nib m’agan’ Got ngay.”​—1 Peter 4:1, 2.

23, 24. (a) Mang e gad ra fil ko fare maangang ni fan ko nig? (b) Mini’ e chiney e ma wereg e machib ni polo’?

²³ Ni bod Jesus, dabda talgad ko maruwel rodad nrib ga’ fan u nap’an nra moningnagdad boch e girdi’ ara ra dariyfannaged e machib rodad u fithik’ e damumuw. Gad ra fil ban’en ko fare maangang ni fal’eg Jesus ko ngiyal’ ni pining Peter ni nge lek. Gad manang fan ni faanra ngad folgad rok Jesus ma, bod ni, gad be yon’ e nug rodad nga maran ni ri buchuw e nig riy, ma fita’ rodad e rayog ni ngeb angin. Boor e Kristiano ni tafita ni girdi’ e kar koled boch u tomren ni kar maruweliyed u lan boor e duw ko binaw ni rib buchuw e girdi’ ni baadag e machib riy. Boch e girdi’ e ka ranod ko gin ni ba fel’ e maruwel ko yognag e girdi’ u rom ma kar pirieged boch. Yugu demtrug e n’en ni gad ma rin’, ma dabda talgad i machibnag e tin riyul’. Gad manang ni dawori yog Jesus ni ke m’ay fare maruwel ni ngan wereg e machib u urngin yang u fayleng.​—Matthew 24:14.

²⁴ Boor ko nel’ milyon e Pi Mich Rok Jehovah ni yad be maruwel nib elmerin ko binaw ni ke pag 230. Fare Wulyang Ntagil’ E Damit ni February 1, 2005, e ra fek e report ko maruwel rorad u ga’ngin yang u fayleng u nap’an e duw ni 2004. Re report nem e ra dag boor e taw’ath ni ke pi’ Jehovah ni fan ko maruwel ni ngan wereg e machib. U lan e tayim ni ka ba’ ko re m’ag ney, manga yigi uda ululgad ni ngad ted nga gum’irchadad e thin rok Paul ni be pug lanin’uy ni gaar: “Mu machibnag fare thin, ma ngam gurnagem.” (2 Timothy 4:2) Manga yugu uda ululgad ni ngad wereged e machib ni polo’ nge mada’ ko ngiyal’ ni nge yog Jehovah ni kan mu’ ko fare maruwel.

Ra tabab e re duw ney, ma fare Service Year Report ko Pi Mich Rok Jehovah u ga’ngin e fayleng e dabni ta’ ko Fare Wulyang Ntagil’ E Damit ni January 1. Yira ta’ ko fare issue ni February 1.

Rayog ni Ngam Pi’ e Fulweg?

• Uw rogon nrayog ni nge fel’ rogodad u rogon ni i skulnag Jesus pi gachalpen?

• Mang e lem nge ngongol ni dag Jesus ngak e girdi’ ni i machibnag?

• Mang e ma k’aringdad ni ngad wereged e machib ni polo’?

• Mang boch e kanawo’ nrayog ni ngad tiyan’dad i rin’ e tin nib m’agan’ Got ngay, ni bod e n’en ni rin Jesus?

[Picture on page 25]

Ra yib angin e maruwel rodad ni ngan wereg e machib nfaanra ngada daged e magafan’ ko girdi’ ni bod e n’en ni i rin’ Jesus

[Picture on page 26, 27]

Fan nrib ga’fan ni yib Jesus nga fayleng e nge machibnag e thin riyul’

[Pictures on page 27]

Pi Mich Rok Jehovah e ma tiyan’ ni ngara wereged e machib ni polo’