“Ba T’uf Romed, Ni Yugu Aram Rogon Ndamur Guyed”

“Ba t’uf romed, ni yugu aram rogon ndamur guyed, ma mmich u wan’med, ni yugu aram rogon ndamur guyed e chiney, ma aram fan ni ba ga’ e falfalan’ ni gimed be tay, nib falfalan’ ndabiyog ni ngan weliy ko thin.”​—1 PETER 1:8.

1. Yugu aram rogon ni dariy be’ u fayleng e ngiyal’ ney ni ke guy Jesus, machane uw rogon ni ma dag boch e girdi’ ko pi yurba’ i teliw ni yad be liyor ngak?

DARIY BE’ nib fos u fayleng e ngiyal’ ney ni ke guy Jesus Kristus. Machane bokum million e girdi’ ni yad ma yog ni ba t’uf rorad. U gubin e duw ko January 9, u Manile, u Philippines, yima girngiy reb e liyos ku Jesus Kristus ni kan m’ag ko kruth ni bod ga’ngin e girdi’ u lukngun e kanawo’ ma yima yog ni aram e madenom ni bin th’abi ga’ ni ma fl’eg e girdi’ ko teliw ko re nam nem. Kari gel e falfalan’ rok e girdi’ ni ra bagayad ma be thuruy bagayad; ma u fithik’ e wagey e yad ma og nga dakenrad ni fan ni ngar mathgad ko fare liyos. Ma un boor e girdi’ ko re madenom ney ni bochan ni yad baadag ni ngar guyed e re thelap ney. Machane, dariy e maruwar riy ni boch i yad e yad ba yul’yul’ ni yad baadag ni ngar chuchugurgad ngak Jesus. Girdi’ nib yul’yul’ ku Jesus e yad ma tay e crucifix u belil’ugunrad ara yad ma the’ e kuruth nga liginrad ara yad ma un ko misa ko galesiya rorad u gubin e wik. Machane, rayog ni ngan nog ni liyor ni yibe tay ngak e re liyos ney e aram e bin riyul’ e liyor fa?

2, 3. (a) Mini’ u fithik’ pi gachalpen Jesus ni kar guyed mar rung’aged e thin rok? (b) Ku chon mini’ e immoy u nap’an e bin som’on e chibog ni ba t’uf Jesus rorad mab mich Jesus u wan’rad, ni yugu aram rogon ni darur guyed?

² Nap’an e bin som’on e chibog, immoy bokum i biyu’ e girdi’ u Roma ni yad e girdi’ nu Judea, Samaria, Perea, nge Galilee ni kar guyed mar rung’aged e thin rok Jesus Kristus. Kar motoyilgad ko ngiyal’ ni i weliy Jesus e thin nriyul’ u morngaagen Gil’ilungun Got. Ma ur guyed e pi maangang ni i ngongliy. Boch i yad e kar manged pi gachalpen Jesus, ya ke mich u wan’rad ni i ir “fare Kristus, ni Fak Got ir, ni Got nib fos.” (Matthew 16:16) Machane, pi girdi’ ni i yoloy apostal Peter e bin som’on e babyor ngorad e dar moyed u fithik’ e pi girdi’ nem.

³ Pi girdi’ nem ni i yoloy Peter e babyor ngorad e ur pired u Roma ko pi n’ug nu Pontus, ngu Galatia, Cappadocia, Asia, nge Bithynia​—ni urngin e pi nug ney e bay u Turkey e ngiyal’ ney. I yoloy Peter ngorad ni gaar: “Ba t’uf romed, ni yugu aram rogon ndamur guyed; ma mmich u wan’med, ni yugu aram rogon ndamur guyed e chiney; ma aram fan ni ba ga’ e falfalan’ ni gimed be tay, nib falfalan’ ndabiyog ni ngan weliy ko thin.” (1 Peter 1:1, 8) Uw rogon ni kar chuchugurgad ngak Kristus ni ba t’uf rorad mar maruweliyed e michan’ rorad ngak?

4, 5. Yugu aram rogon nde guy e girdi’ Jesus, machane uw rogon ni kar chuchugurgad ngak Kristus me t’uf rorad mab mich u wan’rad?

⁴ Ba gagiyel ni boch i yad e ur moyed u Jerusalem ko ngiyal’ ni i machibnag apostal Peter e girdi’ ni kar uned ko fare madenom ko Pentecost ko 33 C.E. Tomren e madenom me par boor pi gachalpen Jesus u Jerusalem ni fan ni nge yog e thin rok e pi apostal ngorad. (Acts 2:9, 41, 42; mu taarebnag ko 1 Peter 1:1.) Maku i pasig Paul ni nge machibnag fare thin nib fel’ ngak e girdi’ ni ur pired ko pi nug ni i pi’ Peter e bin som’on e babyor rok ngay ni bay fithingan riy.​—Acts 18:23; 19:10; Galatia 1:1, 2.

⁵ Mang fan ni ke chuchugur e pi girdi’ nem ngak Jesus ni yugu aram rogon ndarur guyed? Maku mang fan ni bokum i million e girdi’ u fayleng iyan e ngiyal’ ney ni ba t’uf Jesus rorad?

Pi N’en ni Kar Rung’aged

6. (a) Faanra ummoy u Jerusalem ko ngiyal’ ni i machibnag Peter morngaagen Jesus ko 33 C.E., ma mang e rayog ni ngam fil u morngaagen? (b) Mang e ke rin’ 3,000 e girdi’ ni bochan ni kar rung’aged e machib ni i tay Peter?

⁶ Faan gomanga ummoy u Jerusalem ko ngiyal’ nem ni i machibnag Peter e girdi’ ko 33 C.E., ma mang e ga ra fil u morngaagen Jesus? Dariy e maruwar riy ni urngin e maang’ang ni i ngongliy Jesus e ke micheg ni Got e l’og. Ma yugu aram rogon ni ke li’ e girdi’ nib tadenen Jesus ngem’, ma de par u lan e low ko yam’ machane kan faseg ko yam’ me yan nga tharmiy me par u ba’ ni mataw rok Got. Maku, Jesus e ir fare Kristus, ni fare Messiah ni i yiiynag e pi profet morngaagen. Maku, daken Jesus Kristus e kan puog e kan ni thothup riy nga daken pi gachalpen ni fan ni ngar machibnaged e girdi’ ko pi nam u morngaagen e pi n’en nib fel’ ni be rin’ Got u daken Fak. Ke taw e pi n’en ni i machibnag Peter nga gum’ercha’en e girdi’ ni kar rung’aged e welthin ni i tay, ni gonap’an 3,000 e girdi’ ni kan taufenagrad ngar manged pi gachalpen Kristus. (Acts 2:14-42) Faanra ummoy ni gab fos ko ngiyal’ nem, ma ga ra dugliy ni ngam un ngay fa?

7. (a) Faanra kam par u Antioch ko ngiyal’ ni i machib apostal Paul, mang e ga ra fil u morngaagen Jesus? (b) Mang fan ni ke mich Kristus u wan’ boch e girdi’ ma kar uned i wereg fare thin nib fel’ ngak yugu boch e girdi’?

⁷ Faanra kam par u fithik’ e girdi’ ni kar rung’aged e pi n’en ni i machibnag apostal Paul u Antioch u Roma ko nug nu Galatia, ma mang e ga ra fil u morngaagen Jesus? Ga ra rung’ag ni be weliy Paul ni i yiiynag e pi profet ni ra turguy e pi pilung nu Jerusalem ni ngan li’ Jesus ngem’. Maku ga ra rung’ag e thin ni be micheg ni kan faseg Jesus ko yam’. Dabi siy nra pug e tafinay rom nga rogon ni i weliy Paul ni ke micheg Jehovah ni Jesus e ir Fak Got ya i faseg Jesus ko yam’. Gathi ra pug gum’ercha’em ni nge tamilang u wan’um ni rayog ni ngan n’ag fan e denen rom nge yog e yafos ni manemus ngom ni faanra mich Kristus u wan’um? (Acts 13:16-41, 46, 47; Roma 1:4) Ke tamilang u wan’ e girdi’ u Antioch ni baga’fan e pi n’en ni kar rung’aged, me ere kar manged pi gachaplen Jesus, ma kar uned i wereg fare thin nib fel’ ngak yugu boch e girdi’, ni yugu aram rogon nra yib e togopuluw nge gafgow ngorad ni faanra yad ra rin’.​—Acts 13:42, 43, 48-52; 14:1-7, 21-23.

8. Faanra kam un ko muulung ko ulung nu Efesus ko ngiyal’ ni ke yib e babyor rok Paul ngorad, mang e rayog ni ngam fil riy?

⁸ Faan mang e kam chag ngak e ulung rok Kristus u Efesus, ngu Roma ko nug nu Asia, ko ngiyal’ ni ke yib e babyor ni yoloy Paul ngak pi gachalpen? Mang e rayog ni ngam fil u morngaagen fiti laniyan’ Got ko maruwel rok Jesus? Ke weliy Paul ko re babyor nem nu daken Kristus me Got e ra fulweg gubin ban’en u tharmiy ngu fayleng nga rogon fiti laniyan’, ma tow’ath rok Got e rayog ngak gubin e girdi’ nu gubin e nam, ma girdi’ ni ke lemnag Got ni yad ba yam’ ni bochan e denen rorad e yad ra fos biyay u daken e michan’ rorad ngak Kristus, ma aram rogon nrayog ni nge mang e girdi’ nu fayleng pi fak Got.​—Efesus 1:1, 5-10; 2:4, 5, 11-13.

9. (a) Mang e ra ayuwegem ni ngam nang ko kari tamilang u wan’um e pi n’en ni yoloy Paul ngak piyu Efesus fa? (b) Mang angin ni yib ngak fapi girdi’ ko pi nug nu Roma ni ke weliy Peter u morngaagrad ni bochan ni kar rung’aged e thin u morngaagen Jesus?

⁹ Faanra kam tay fan e pi n’en ney ma ra gelnag e t’ufeg rom ku Fak Got fa? Re t’ufeg nem e ra gagiyegnag e par rom u gubin e rran ni bod rogon ni pi’ apostal Paul e athamgil nga lanin’uy ko guruy ni 4 nge guruy ni 6 ko Efesus fa? Re tay fan nem e ra mithmithegem ni ngam yaliy ko mang e n’en nth’abi ga’ fan ko par rom u wan’um? Bochan ni ba t’uf Got rom ma kam tay fan Fak, ma ga ra thiliyeg e pi n’en nib t’uf rom ni ngam rin’ e tin nib m’agan’ Got ngay ni aram e n’en ni ga ra nameg ko par rom fa? (Efesus 5:15-17) I yoloy Peter u morngaagen e girdi’ u Roma, ko pi nug nu Asia, ngu Galatia, nge yugu boch e nug nu Roma me weliy rogon e pi n’en ni kar filed ni ke thiliyeg e par rorad ya ke gaar: “Ba t’uf [Jesus] romed, ni yugu aram rogon ndamur guyed, ma mmich u wan’med . . . ma aram fan ni ba ga’ e falfalan’ ni gimed be tay, nib falfalan’ ndabiyog ni ngan weliy ko thin.”​—1 Peter 1:8.

10. (a) Mang e ke gelnag e t’ufeg rok e pi Kristiano kakrom ngak Jesus? (b) Uw rogon nra fel’ rogodad riy?

¹⁰ Dariy e maruwar riy ni bay yugu ban’en ni ke k’aring e pi Kristiano ni i yoloy Peter e babyor ngorad ni ngar t’ufeged Fak Got. Mang e re n’em? Nap’an ni yoloy Peter e bin som’on e babyor, ma immoy l’agruw e Gospel riy​—ni Matthew nge Luke​—ni ke garer iyan. Rayog rok e pi Kristiano ko fa bin som’on e chibog ni ngar bieged e gali Gospel ney. Ku rayog rodad. Pi Gospel nem e gathi ban’en ni kan tunguy; ya bpuluw gubin ban’en riy ko chepin e girdi’ ma rayog ni ngan pagan’uy ngay. U lan e pi thin nem, e gad ra pirieg e thin riy nra gelnag e t’ufeg rodad ku Fak Got.

Ngongol ni Ke Dag

11, 12. Mang ban’en ko ngongol ni dag Jesus ngak e yugu girdi’ ni be k’aringem ni ngam t’ufeg?

¹¹ Gad be fil rogon e ngongol rok Jesus ngak e yugu girdi’ ko pi thin nem ni kan yoloy u morngaagen e par rok. Mus ko ngiyal’ ney, ma ngongol ni ke dag e be mithmitheg gum’ercha’en e girdi’, ni yugu aram rogon ni ke pag 1,900 e duw u tomren ni ke yim’. Denen e be tomalnag gubin e girdi’ ni yad ba fos. Bay bokum i million e girdi’ ni kan rin’ e kireb ngorad, bay e magawon rorad ko m’ar, ara ke chuwan’rad ni fan nga boch e magawon. I yog Jesus ngak e pi girdi’ nem ni ke gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’, mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.”​—Matthew 11:28-30.

¹² I dag Jesus ni ma lemnag e girdi’ nib gafgow, nge piin kem’ ko bilig, nge piin ni ke kireban’rad. Faanra ba t’uf ma ma fl’eg e maang’ang me duruwiy boor ni boor e girdi’. (Luke 9:12-17) Ke pithig an’rad ko yalen ni kar pired ni yad e sib riy. Maku ke gelnag e michan’ rorad nra taleg Got e gafgow ko politic nge salpiy ni bay rorad ni bochan e gagiyeg ni be tay e girdi’. Der ma diliiy Jesus laniyan’ e girdi’ ni kar pired nib tomal lanin’rad. Ba gol Jesus ma ma t’ufegey me ubung e girdi’ ni yad ba sobut’an. Me pi’ e toffan ngak e piin ni yad bod e floras ni ke mororoy nge girdi’ ni yad bod e daramram ko nifiy nra math. Ka nap’an e ngiyal’ nem ke mada’ ko chiney ma fithingan Jesus e be pi’ e athap nga laniyan’ e girdi’, ni mus ko gum’ercha’ ni danir guy.​—Matthew 12:15-21; 15:3-10.

13. Mang fan e ngongol ni ma dag Jesus ko girdi’ ni tadenen ni ma k’aring e girdi’ ni ngar chuchgurgad ngak?

¹³ De fel’ e ngongol nde mat’aw u wan’ Jesus, machane i dag ni ma gum’an’nag ir u puluwon e girdi’ ni kar olobochgad machane kar kalgadngan’rad mar chelgad ngak ko ayuw. (Luke 7:36-50) Ke par nga but’ me un ngak e girdi’ ni dabuy dakenrad ko abich ni faanra ke lemnag nrayog ni nge ayuwegrad ko tirok Got ban’en. (Matthew 9:9-13) Kan mithmitheg bokum i million e girdi’ ni bod salpen e pi girdi’ nem ni ngar chuchugurgad ngak nge mich Jesus u wan’rad ni bochan e ngongol ni ke dag ni yugu aram rogon ndarur guyed.

14. Mang e be pug e tafinay rom nga rogon ni i ayuweg Jesus e girdi’ ni yad ba m’ar, nge mugutgut, ara ke kireban’rad ko yam’?

¹⁴ Rogon ni i ngongol Jesus ngak e girdi’ nib m’ar mab mugutgut e be micheg e runguy rok ma bay rogon ni nge pi’ e ayuw ngorad. Ere nap’an e ngiyal’ ni ke yib reb e pumoon nib daraw ngak ni be ning e ayuw rok, ma de par Jesus nib orel rok ni bochan yaan. De yog ngak fare moon nib daraw ni yugu aram rogon ni ke taganan’ ngak, ni kaygi ubchiya e m’ar rok ma dariy ban’en nrayog ni nge rin’ ni nge ayuweg. Yog fare moon ni gaar: “Faanra mm’agan’um ngay ni ngam chuweg e daraw rog ma ga chuweg, ya rayog rom.” Me k’iyag Jesus pa’ nge math ngak fare moon nib daraw me fulweg ni gaar: “Mm’aganug ngay, ere nge chuw e daraw rom.” (Matthew 8:2, 3) Ma ba’ ba ngiyal’ ni ke yib reb e ppin nib m’ar ngak ni baadag ni nge math nga taban e mad rok Jesus ya manang nrayog ni nge golnag. I gol Jesus ngak me fulweg u rogon ni nge pi’ e athamgil nga laniyan’. (Luke 8:43-48) Ma nap’an e ngiyal’ ni ke guy e girdi’ ni kar bad ni ngar ranod ko gum’eyag, ma aram me taganan’ ngak fare ppin ni ke yim’ fak ni maagirag rok. Yugu aram rogon ndabun Jesus ni nge fl’eg e maang’ang ni fan ni nge yog e ggan ngak, machane ke fl’eg e maang’ang ni fan ni nge faseg e re pagal nem nge fulweg ngak e chitiningin.​—Luke 4:2-4; 7:11-16.

15. Faan ga ra bieg e thin u morngaagen Jesus ma ga fl’eg i lemnag, ma mang angin nra yib ngom?

¹⁵ Faan gad ra bieg e pi thin ney ma ngad fl’eged i lemnag u morngaagen e ngongol ni dag Jesus, ma aram ma ra ga’ e t’ufeg rodad ngak fa en ni ke pi’ e yafos rok nib girdi’ ni fan nrayog ni ngad pired ni gad ba fos ndariy n’umngin nap’an. Yugu aram rogon ni dada guyed, ma gad baadag ni ngad chuchugurgad ngak, ma gad baadag ni ngad leked luwan’ ay.​—1 Peter 2:21.

I Yul’Yul’ Mi I Pagan’ Ngak Got

16. Mang e ke tiyan’ Jesus ngay, ma mang ke yog ni ngad rin’ed?

¹⁶ Bin ni baga’fan u wan’ Jesus e ke tiyan’ ngak e Chitamangin me ayuwegdad ni ngad tedan’dad ngak Jehovah Got. I tamilangnag e bin ni baga’ fan e Motochiyel ni gaar: “Thingari t’uf rom, Somol ni ir e Got rom u polo’ i gum’ercha’em, ngu polo’ i lanin’um, ngu polo’ i lem rom.” (Matthew 22:36, 37) I gaar ngak pi gachalpen: “Mmich Got u wan’med.” (Mark 11:22) Faani yib reb e magawon nra skengnag e michan rorad, mi gaar ngorad: “Nguum meybilgad ngak Got.”

17, 18. (a) Uw rogon ni dag Jesus ni ke pagan’ ngak e en ni Chitamangin? (b) Mang ni baga’fan ngodad e pi n’en ni ke rin’ Jesus?

¹⁷ I dag Jesus rogon ngodad. Meybil e bin ni baga’fan ko par rok. (Matthew 14:23; Luke 9:28; 18:1) Faani taw ko ngiyal’ ni nge mel’eg e pi apostal, de pagan’ ngak ni ir e nge turguy, ni yugu aram rogon ni i par gubin e engel u tharmiy ni yad ma fol rok kafram. I sobut’an’ Jesus mi i meybil ngak e Chitamangin u reb e nep’ ni polo’. (Luke 6:12, 13) Faani taw ko ngiyal’ ni ngan kol min li’ ngem’, mi chel Jesus ngak e Chitamangin, mi i meybil ngak. De lemnag ni manang rarogon Satan ma rayog ni nge gel ko pi n’en nra fl’eg faanem nib kireb. Ba tamilang u wan’ Jesus ni baga’fan riy ndabi pag e maruwel rok. Ri ra kirebnag fithingan’ e Chitamangin ni faanra digey e maruwel rok! Ma ra mul ban’en u pa’ e girdi’, ya yafos ni manemus e be tor ko maligach nra pi’ Jesus!

¹⁸ I meybil Jesus ni boor yay​—i meybil ko ngiyal’ ni immoy e pi apostal u lan e singgil ko thal ni lang ko naun u Jerusalem mi rin’ ni kab gel boch ko ngiyal’ ni immoy u lan e milay’ u Gethsemane. (Matthew 26:36-44; John 17:1-26; Hebrews 5:7) Faani par nib gafgow u daken ba ley i gek’iy, de puwan’ ngak e girdi’ ni kar moningnaged. Ya i meybil ni fan ko pi girdi’ nem ni kar ngongolgad u rogon nde puluw mi gaar: “Chitamag, mu n’ag fan u wan’um e n’en ni yad be rin’.” (Luke 23:34) Ke par ni i tiyan’ ngak e Chitamangin “me pag fan urngin ban’en ngak Got.” Fa tin tomren e thin ni i yog ko ngiyal’ ni immoy u daken ba ley i gek’iy e aram e meybil ngak e Chitamangin. (1 Peter 2:23; Luke 23:46) Kari gel e falfalan’ rodad ni i pagan’ Jesus ngak Jehovah, mi par nib yul’yul’ ni nge mu’nag e maruwel ni ke pi’ e Chitamangin ngak! Yugu aram rogon ni dada guyed Jesus Kristus, ma ri ba t’uf rodad e pi n’en ni i rin’!

Ngad Daged e T’ufeg Rodad ni Fan Ngak

19. Ra ngad daged e t’ufeg rodad ngak Jesus, ma mang boch ban’en ni gad ra siyeg ya de puluw?

¹⁹ Uw rogon ni gad ra micheg ni t’ufeg ni bay rodad e gathi ke mus ni thin? Chitamangin Jesus ni ba t’uf rok e ke motochiyelnag ni dabni ngongliy e liyos min liyor ngay, ere dabi siy ndabda ted fan Jesus ni faan gad ra tay e liyos nga bayal’ e chen ngad theed nga l’ungundad ara ngad feked u kanawo’. (Exodus 20:4, 5; John 4:24) Ma dabda ted fan Jesus ni faan gad ra un nga reb e muulung ko pi yurba’ i teliw, ni mus ni gad ra rin’ in e yay u gubin e wik, machane dabda folgad ko machib ni i tay ko tin ni ka bay e rran. I gaar Jesus: “En nra fel’ u wan’ e tin ni kug ta’ chilen ngak me fol riy, e ereram e cha’ ni gub t’uf rok. Chitamag e ra t’ufeg e cha’ ni gub t’uf rok.”​—John 14:21, 23; 15:10.

20. Uw rogon ni gad ra dag ni riyul’ ni ba t’uf Jesus rodad?

²⁰ Mang motochiyel ni i tay chilen ngodad? Bin ni th’abi ga’fan e ngad liyorgad ngak fa bin riyul’ e Got, ni Jehovah ma go ir e ngad liyorgad ngak. (Matthew 4:10; John 17:3) Maku i fil Jesus ni thingar da maruweliyed e michan’ rodad ngak e en ni Fak Got ma thingar da daged ni dubdad e ngongol nib kireb ma ngad ngongolgad u rogon ni bpuluw ko fare tamilang. (John 3:16-21) I fonownagdad ni ngad m’oneged e Gagiyeg Rok Got nge tin nib mat’aw, ma ngad ted ni ir e mm’on ko tin ni gad baadag. (Matthew 6:31-33) I tay chilen ni ra bagadad ma nge t’uf bagadad rok. (John 13:34; 1 Peter 1:22) Ma i tay chilen ngodad ni ngad machibnaged morngaagen fiti laniyan’ Got, ni bod rogon ni ke rin. (Matthew 24:14; 28:19, 20; Revelation 3:14) Yugu aram rogon ni darur guyed Jesus, ma ke pag lal i million e Pi Mich Rok Jehovah e ngiyal ney ni yad be fol ko pi n’en nem ni i tay chilen ya bin riyul’ e t’ufeg rorad e be k’aringrad ni ngar rin’ed. Yugu aram rogon ni darur guyed Jesus ma de kirebnag e n’en nib mudugil u wan’rad ni ngar folgad rok. Ya yad ma lemnag e n’en ni yog Somol rorad ngak apostal Thomas ni gaar: “Ka fin gu mich u wan’um ni bochan e kam guyeg? Rib felan’ e piin ndar guyed gag mu gu mich u wan’rad.”​—John 20:29.

21. Uw rogon nra fel’ rogodad ko fare Puguran ko yam’ ni tay Kristus, ni yira madenomnag ko March 23?

²¹ Yibe athapeg ni ga ra un ngak e girdi’ u ga’ngin yang u fayleng ni yad ra muulung u Kingdom Hall ko Pi Mich Rok Jehovah u tomren ni ke aw e yal’ ko April 11, 1998, ni fan ni nge puguran nga lanin’rad rogon ni dag Got e bin th’abi fel’ e t’ufeg rok ngak e girdi’ ma yad ra madenomnag e yam’ ni tay Fak nib yul’yul’, ni Jesus Kristus. Pi n’en ni yira weliy ko rofen nem e susun ni nge ayuwegem ngam adag ni ngam fol ko pi n’en ni yog Got ni ngad rin’ed.​—1 John 5:3.

Mang e Fulweg Rom?

◻ Uw rogon e pi girdi’ ni yib e bin som’on e babyor ni yoloy Peter ngorad ni ke ayuwegrad kar nanged Jesus ma ke t’uf rorad?

◻ Mang boch e thin ni ke rung’ag e pi Kristiano kakrom ni ke pug e tafinay rom?

◻ Uw rogon e ngongol ni ke dag Jesus ni ke gelnag e t’ufeg rom ngak?

◻ Mang ni baga’ fan ngodad rogon ni i pagan’ Jesus ngak e en ni Chitamangin?

◻ Uw rogon ni gad ra dag e t’ufeg rodad ngak Jesus Kristus?

[Sasing ko page 28, 29]

Gad baadag ni ngad chuchugurgad ngak Jesus ni bochan e ngongol rok