Mang E Baadag Jehovah Ni Ngad Rin’ed E Chiney?

“Me non ba lam u fithik’ fa gi manileng ni [gaar]: ‘Ereray Fakag, nrib t’uf rog, ni kari felan’ug ngak; ere mu telmed ngak.’ ”​—MATTHEW 17:5.

1. Wuin e ke lebug fare Motochiyel?

KE pi’ Jehovah fare Motochiyel ngak fare nam nu Israel, ni bay boor e kenggin riy. Ma ke yoloy Paul ni apostal u murung’agen ni gaar: “Pi motochiyel ney ni urngin e fan nga wuru’ i dowey, ni ke mus ni bay fan nge yan i mada’ ko ngiyal’ ni kan dugliy ni ngan yal’uweg boch ban’en.” (Hebrews 9:10) Faani taw nga nap’an ni ke pow’iy fare Motochiyel piyu Israel ni nge fel’ Jesus uwan’rad ni ir fare Messiah, ara Kristus, ma aram ke riyul’ e pi thin nem ma ke yib angin. Arfan, ni ke yog Paul ni gaar: “Yi Kristus e yib i taleg e Motochiyel.”​—Romans 10:4; Galatians 3:19-25; 4:4, 5.

2. Mini’ e piin ni ur moyed u tan fare Motochiyel, ma wuin ni kan pithigrad riy?

² Ere biney e be dag ni gathi gad bay u tan fare Motochiyel e chiney? Riyul’, ni ri boor e girdi’ ni da ur pared u tan fare Motochiyel, nrogon ni i weliy fare psalmist ni gaar: “I weliy [Jehovah] boch e thin ngak Jakob, u murung’agen e motochiyel rok nge rogon ni ke dugliy ban’en ni fan ko piyu Israel. Ma de rin’ e n’en ni aram rogon ngak yugu boch e nam; ma rogon ni ma dugliy Got ban’en, e dar nanged e pi n’en ney.” (Psalm 147:19, 20, New World Translation) Nap’an ni ke ngongliy Got fa bin nib biech e m’ag ni fare maligach ni pi’ Jesus’ e ir e def riy, ma aram e mus ko fare nam nu Israel e dakura pared u tan fare Motochiyel ma daki t’uf ni ngar folgad riy. (Galatians 3:13; Ephesians 2:15; Colossians 2:13, 14, 16) Ere, faanra aram rogon, ni kan chuweg fare Motochiyel, ma mang e baadag Jehovah ni nge rin’ e piin ni yad baadag ni ngar pigpiggad ngak e ngiyal’ n’ey?

Mang e Be Ning Jehovah

3, 4. (a) Mang e be ning Jehovah ngodad e chiney ni baga’ fan ni ngad rin’ed? (b) Mang fan ni thingarda leked luwan ay Jesus?

³ Nap’an fa bin tomur e duw ni un Jesus ko machib, ma pi apostal rok ni, Peter nge James, nge John e kar uned ngak ngar ranod nga daken e burey nib tolang, ma sana ur moyed u p’ebgul fare burey ni Hermon. U rom ma kar guyed Jesus riy u nap’an ni ke thil yaan ma ke galgal ramaen ma kar rung’aged laman Got ni gaar: “Ereray Fakag nrib tu’f rog, ni kari felan’ug ngak; mu telmed ngak.” (Matthew 17:1-5) Ere aram e n’en ni baadag Jehovah ni ngad rin’ed​—ngad motoyilgad ku Fak ma ngad folgad ko tin be rin’ nge rogon ni ma fil ban’en ngak be’. (Matthew 16:24) Arfan, ni ke yoloy Peter ni apostal ni gaar: “Yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan’ ay nib fel’ rogon.”​—1 Peter 2:21, NW.

⁴ Mang fan ni thingarda leked luwan ay Jesus nib fel’ rogon? Ya bochan ni faan gad ra folwok rok Jesus, ma gad be folwok rok Jehovah ni Got rodad. Ri manang Jesus e en Chitamangiy, ya i par rok u tharmiy ni bokum bilyon e duw u m’on ni ke yib nga fayleng. (Proverbs 8:22-31; John 8:23; 17:5; Colossians 1:15-17) Faani immoy u fayleng, ma be par ni ir e owchen e Chitamangin nib yul’yul’. Ke weliy ni gaar: “Ke mus ni gu be yog e tin ni ke yog e en ni Chitamangiy ngog ni nggog.” Riyul’, ni ke folwok Jesus rok Jehovah ko urngin ban’en arfan ni ke yog ni gaar: “Cha’ ni ke guyeg e ku ke guy e en ni Chitamangiy.”​—John 8:28; 14:9, NW.

5. Mang e motochiyel ni be par e piin Kristiano u tanggin, ma wuin e ke tabab ni be par e girdi’ u tan fare motochiyel?

⁵ Ran motoyil ku Jesus nge ngan folwok rok ma mang fan e re n’ey? Fan e re n’ey e aram e nguun par u tan e motochiyel? I yoloy Paul ni gaar: “Gag e dagur par u tan e motochiyel.” Be weliy Paul u roy u murung’agen “fa bin kakrom e m’ag,” fare m’ag ko Motochiyel ni kan ngongliy ni fan ko piyu Israel. Ke yog Paul ni be “par u tan e motochiyel rok Kristus.” (1 Corinthians 9:20, 21; 2 Corinthians 3:14) Ma nap’an ni kan chuweg fare m’ag ko Motochiyel ni kakrom, me yib e “bin nib biech e m’ag” ni bay e “motochiyel rok Kristus” u fithik’ ma urngin e pi tapigpig rok Jehovah e chiney e thingara folgad riy.​—Luke 22:20; Galatians 6:2; Hebrews 8:7-13.

6. Uw rogon ni ngan weliy “fare motochiyel rok Kristus” ma uw rogon ni ngad folgad riy?

⁶ De n’igin Jehovah ni ngan yoloy “fare motochiyel rok Kristus” nga babyor ni bay e motochiyel riy nib thil thil, ni kan yarmiy reb nge reb, ni taabrogon ko mang e kan rin’ ko fa bin kakrom e m’ag ko Motochiyel. Re motochiyel ni biech ney ni fan ko pi gachalpen Kristus e de un ngay e thin ni kaygi yoor ni be weliy ko mang e pi n’en nrayog ni ngan rin’ nge mang e dabiyog. Machane, Thin rok, e ke ayuweg Jehovah nge par ni aningeg e guruy riy ni be weliy u murung’agen e yafas rok Fak nge machib ni i tay. Maku, ke thagthagnag Got ngak boch e girdi’ ni gachalpen Jesus ni ngar yoloyed boch e thin ni nge ayuweg e girdi’ u murung’agen e ngongol rorad, boch e maruwel u lan e ulung, nge rogon e ngongol u lan e tabinaw, nge yugu boch ban’en. (1 Corinthians 6:18; 14:26-35; Ephesians 5:21-33; Hebrews 10:24, 25) Faan gad ra puluwnag e yafas rodad ko tin ni ke rin’ nge machib ni i tay Jesus Kristus ma kad folgad ko fonow ni ke pi’ e pi ta yol Bible ko fa bin som’on e chibog, ma ra aram rogon gad be fol ko “fare motochiyel rok Kristus.” Aram e n’en ni baadag Jehovah ni nge rin’ e pi tapigpig rok e chiney.

Baga’ Fan e T’ufeg

7. Uw rogon ni ke dag Jesus gelngin e motochiyel rok u nap’an ni ir nge pi apostal rok e kar madenomnaged fare Paluk’af ni bin tomur?

⁷ Riyul’ ni baga’ fan e t’ufeg u tan fare Motochiyel, machane aram fan, ara kenggin fare motochiyel rok Kristus. Ke tamilangnag Jesus e re n’ey u nap’an ni yad be muulung e pi apostal rok ni ngar madenomnaged fare paluk’af ko 33 C.E. Rogon ni weliy John ni apostal ko mang e ke buch ko re nep’ nem, e gaar pi thin rok Jesus nem ni yib u gum’ircha’en e ba muun ngay kenggin e t’ufeg ni ke weliy ni 28 yay’. Ke tamilangnag Jesus ngak e pi apostal fare kenggin, ara gelngin, e motochiyel rok. Arfan, e thin som’on ni ke weliy John u nap’an ni be weliy ko mang e ke buch ko re nep’ nem ni be gaar: “Chirofen ney e aram e rofen ni bay nga m’on ko paluk’af. Ma manang Jesus ni ke taw nga nap’an ni nge chuw ko re fayleng ney nge yan ngak e en Chitamangiy. Gubin ngiyal’ ni yugu ma par nib t’uf rok e piin ni yad e tirok e girdi’ u fayleng, ma yigi i par ni yad ba t’uf rok nge yan i mada’ ko tomur.”​—John 13:1.

8. (a) Mang fan e binem ni be ul’ul iyan ni ma maluagthin e pi apostal? (b) Uw rogon ni ke fil ngak pi apostal rogon ni ngar pared nib sobut laniyan’rad?

⁸ Ba t’uf e pi apostal rok Jesus rok, ma ke athamgil ni nge ayuwegrad ni ngar paged e lem ni kaygi pag rogon ni nge yog ngorad e gelngin nge liw ndariy angin. Boch e pul u m’on ni kar bad nga Jerusalem, ma ‘ur tugthingad u kanawo’ ko arorad ni ir e th’abi tolang u fithik’rad.’ Ma nap’an ni ke chuchugur ni ngar bad ko fare mach ni fan ni ngar madenomnaged fare Paluk’af, mar tababgad ko maluagthin biyay ni fan ko liw. (Mark 9:33-37; 10:35-45) Ma tin ni ke buch ndawori n’uw nap’an u tomren ni kar ranod ko thal ni lang nga lan fare singgil ni ngar madenomnaged e Paluk’af ni bin tomur e be dag ni fare magawon rorad e ka be ul’ul i yan ma dawori m’ay. Ngiyal’ nem ma dariy bagayad ni ke lemnag ni nge fol ko yalen rorad, ni aram e ngan luknag ay yugu boch e girdi’. Ke luknag Jesus ayrad, ni fan ni nge fil ngorad rogon e sobut’an’.​—John 13:2-15; 1 Timothy 5:9, 10.

9. Mang e ke rin’ Jesus u nap’an ni ke yib e magawon u tomren fare Paluk’af ni bin tomur?

⁹ Yugu aram rogon ni kan skulnagrad, ma tomren ni kan madenomnag fare Paluk’af me tababnag Jesus fare madenom ko Puguran ko yam’ ni tay, ma ngam lemnag ko mang e ke buch biyay. Rogon e thin ni ke yoloy Luke e be gaar: “Me maluag thin pi gachalpen Jesus ko mini’ e arorad ni ir e ngar tiyed nib tolang u fithik’rad.” Ke k’adan’ Jesus ma de puwan’ ngorad, machane ke fonownagrad u fithik’ e gol ma ke weliy ngorad nib t’uf ni ngar pared nib thil ko pi pilung nu fayleng ni ri yad baadag ni nge tolang e liw rorad. (Luke 22:24-27) Ma fini pi’ ngorad e n’en ni yima yog fare malang ko tabthung ko motochiyel rok Kristus ngay, me gaar: “Nggu pi’ reb e motochiyel nib biech ngomed, nge bigimed me t’uf bigimed rok; rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed.”​—John 13:34.

10. Mang e motochiyel ni ke pi’ Jesus ngak pi gachalpen, ma mang e n’en nib muun ngay

¹⁰ Boch nga tomur ko re nep’ nem me weliy Jesus ngorad ga’ngin e t’ufeg ni bod rogon e t’ufeg rok Kristus ni susun nga un dag i yan. Ma ki gaar: “Baaray e n’en ni nggu ning chilen ngomed, nge bigimed me t’uf bigimed rok, ni bod rogon ni gimed ba t’uf rog. Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 15:12, 13) Ere ke yog Jesus ni pi gachalpen e susun dabi maruwaran’rad ni ngar pied e yafas rorad ngar m’ad ni fan ko pi walag nfaanra ba t’uf ni ngan yodor’? Aram e n’en ni be lemnag John, ya ke guy e re nem, ma munmun me yoloy ni gaar: “Baaray tapgin ma kad nanged fan e t’ufeg, [Jesus Kristus] e ke pi’ e pogofan rok ni fan ngodad; ere ku er rogodad nsusun e ngad pied e pogofan rodad ni fan ngak pi walagdad.”​—1 John 3:16.

11. (a) Uw rogon ni ngad folgad ko motochiyel rok Kristus? (b) Mang e ke rin’ Jesus ni be skulnagey?

¹¹ Ere, arfan ni gathi ke mus ni ngad filed boch e thin ngak be’ u murung’agen Jesus ma aram e kad folgad ko motochiyel rok. Danga’, ya thingarda daged ni par rodad nge ngongol rodad e taabrogon ko n’en ke rin’ Jesus. Riyul’, ni ke fanay Jesus e thin nib fel’, thin nrib puluw u nap’an ni be pi’ boch e welthin. Machane, ku ke fanay boch e fanathin. Yugu aram rogon ni som’on e i par Jesus u tharmiy ni ir reb e kan nib gel gelngin, me adag ni nge yib nga fayleng nge pigpig ko chitamangin me dag ngodad rogon e par nib fel’. Ir be’ nib sobut’an’, ba gol, ma ma lemnag yugu boch e girdi’, nge ma ayuweg e girdi’ ni ke tomal laniyan’rad nge piin ni kan gafgownagrad. (Matthew 11:28-30; 20:28; Philippians 2:5-8; 1 John 3:8) Ma ke pi’ Jesus e athamgil nga laniyan’ e pi gachalpen ni ngar t’ufeged yad, ni bod ni yad bat’uf rok.

12. Mang fan nrayog ni ngad dogned ni fare motochiyel rok Kristus e gathi be warnag fare motochiyel ni thingarda t’ufeged Jehovah?

¹² Uw fene ga’fan ni nge t’uf Jehovah rok e girdi’​—ni aram fa bin th’abi ga’ ko fare Motochiyel—​ni motochiyel rok Kristus? (Matthew 22:37, 38; Galatians 6:2) Ir e bin l’agruw, fa? Danga’! Ngan t’ufeg Jehovah nge ngan t’ufeg e pi walag e ba peth nga taabang ma dabiyog ni ngan dareg. Dabi t’uf Jehovah rok be’ nfaanra de t’uf walagen rok, ya ke yog John ni apostal ni gaar: “Faanra gaar be: ‘Ba t’uf Got rog,’ machane be fanenikay walagen ni girdien Kristus, ma be lifith l’ugun. Ya dabiyog ni nge t’uf Got rok, ni be’ nder guy ni faanra de t’uf rok walagen ni girdien Kristus ni be’ ni be guy.”​—1 John 4:20; mu taarebnag ko 1 John 3:17, 18.

13. Mang angin ni ke yib ngak pi gachalpen Jesus ya kar folgad ko fa bin ni biech e motochiyel ni ke yog ngorad?

¹³ Nap’an ni pi’ fare motochiyel nib biech ngak pi gachalpen ni ngar t’ufeged yad ni bod ni yad ba t’uf rok, ke weliy ngorad ko mang angin ni ra yib ngorad. “Faanra um pired nib t’uf bigimed rok bigimed,” me yog, “ni ma aram e urngin e girdi’ ni yad ra nang ni gimed pi gachalpeg.” (John 13:35) Rogon ni yog Tertullian, ni ir be’ ni immoy ko ngiyal’ ni ke pag raay e duw u tomren ni ke yim’ Jesus ni aram rogon angin ni ke yib ngak e pi Kristiano kakrom ni bochan e kar t’ufeged yad. Ke fanay Tertullian e thin ni ke yog e girdi’ ni gathi Kristiano u murung’agen pi gachalpen Kristus: ‘Am sap nga rogon fene t’uf bagayad rok bagayad ma ri dariy fan uwan’rad ni ngar m’ad ni fan ko pi walagrad.’ Sana ngad fithed gadad, ‘Gu ma dag e t’ufeg ney ngak e pi walageg ni be micheg ni gag reb i gachalpen Jesus?’

Uw Rogon ni Ngad Daged e Mich ko T’ufeg Rodad

14, 15. Yu ngiyal’ ma mom’aw’ ni ngan fol ko motochiyel rok Kristus ni bochan e mang, machane mang e rayog ni nge ayuwegdad ni ngad rin’ed e re n’en ney?

¹⁴ Baga’ fan ni pi tapigpig rok Jehovah e ra dag e t’ufeg ni taabrogon ko t’ufeg ni ke dag Jesus Kristus. Machane kam pirieg nib mom’aw’ ni ngam dag e t’ufeg ngak e pi walag ni be dag e ngongol nib siin? Riyul’, ni rogon e n’en ni kad filed, ni mus ko fapi apostal e kar maluagthingad ma kar guyed rogon ni ngar rin’ed e pi’ n’en ni ke mus ni fan ngorad. (Matthew 20:20-24) Ku arrogon e piin Kristiano u Galatia ni kar tugthingad. Tomren ni ke weliy Paul ni ngan t’ufeg be’ ni buguli yoror e kan fol ko fare Motochiyel, me ginangrad: “Machane faanra gimed be kirebnag laniyan’med ma gimed be gafgownagmed, me ere ngam ayuwgad, ya bay mu lied gimed ngam m’ad.” Ma tomren ni ke weliy ko uw rogon nib math keru’ e pi ngongol ni ba muun ngay e tin baadag e dowef ni tadenen nge fare wom’ngin e kan ni thothup, ma aram e ki ul’ul Paul ngay ni gaar: “Ma thingar dabda ufanthingad, ara i k’aring bagadad e damumuw ngak bagadad, ara i awan’ bagadad ngak bagadad.” Ma ke fonownagrad ni gaar: “Nge bigimed me ayuweg bigimed nge un i fek gilban faanem, ereray rogon ni gimed ra rin’ ma aram e kam folgad ko fare motochiyel ni pi’ Kristus.”​—Galatians 5:14–6:2.

¹⁵ Bochan ke ning Jehovah ngodad ni ngad folgad ko motochiyel ni pi’ Kristus, me ere kaygi yoor e pi’ n’en ni baadag ni ngad rin’ed, fa? Sana ba mom’aw’ ni ngad pared nib gol ko girdi’ ni ke puwan’ ngodad ara ke rin’ ban’en ni ke amithnagdad, machane, ku mil fan ngodad ni ngad “folwokgad rok Got, ni bochan ni gadad pi fak ma ngad ul’ulgad ngay ni ngad t’ufeged gadad.” (Ephesians 5:1, 2) Thingar kuda ul’ulgad ngay ni ngad sapgad ko n’en ni ke dag Got ngodad, ya “ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad.” (Romans 5:8) Ere faan gad ma ayuweg yugu boch e girdi’ ni gadad rodad, nib muun ngay e piin ni kar dariyfannaged gadad, ma ra yib e felfelan’ riy ngodad ya gad manang ni gad be folwok rok Got maku gad be fol ko fare motochiyel ni pi’ Kristus.

16. Uw rogon ni ngad daged ni ba t’uf Got nge Kristus rodad?

¹⁶ Dabda paged talin ni gad ma micheg e t’ufeg rodad ngak yugu boch e girdi’ ko pi n’en ni gad be rin’, ma gathi ke mus ni tin gad ma yog. Ma mus ku Jesus e ke guy bang ko tin nib m’agan’ Got ni ba mom’aw’ ni ngan rin’ nbochan ni bay boor ban’en nib l’ag ngay, me gaar: “Chitamag, faanra mm’agan’um ngay ma ga fek e re kap ney ngam chuweg rog,” aram e thin rok Jesus u nap’an ni be meybil. Machane papey ni ke puthuy yugu boch e thin ngay ni gaar: “Machane gathi tin nib m’agan’ug ngay e ngam rin’, ya tin nib m’agan’um ngay.” (Luke 22:42) Yugu demtrug ni boor e gafgow ni ke yib ngak Jesus, ku ke rin’ e tin nib m’agan’ Got ngay. (Hebrews 5:7, 8) Faan gad ra fol ko tin nib m’agan’ Got ngay, ma gad be dag nib t’uf Got rodad ku gad be dag ni mich uwan’dad ni tirok e kanawo’ e ir e bin th’abi fel’. Ere be yog e Bible ni gaar: “Ya baaray fan ni nge t’uf Got rodad,” me ul’ul ngay ni gaar: “fan e ngad folgad ko tin ni ke yog ni ngad rin’ed.” (1 John 5:3) Ma ke yog Jesus ngak e pi apostal ni gaar: “Faanra gub t’uf romed, ma gimed ra fol ko tin ni kug ta’ chilen ngomed.”​—John 14:15.

17. Mang e motochiyel nib thil ni ke pi’ Jesus ngak pi gachalpen, ma mang e n’en ni be dag ni gad bay u tan fare motochiyel e chiney?

¹⁷ Ke tay Kristus chilen ngak pi gachalpen ni ngar t’ufeged yad, machane mang e motochiyel ni ri baga’ fan ni ke pi’ ngorad? Ke yog ngorad ni ngar uned ko machib ya aram e maruwel ni ke skulnagrad ngay faram. Ke yog Peter ni gaar: “Me ning chilen ngomad ni nggu machibnaged fare thin nib fel’ ni yib rok Got ngak e girdi’ nib fel’ rogon.” (Acts 10:42) Ke tay Jesus chilen ngorad ni gaar: “Ere mmarod ngak girdien e pi nam nga gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge Fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20; Acts 1:8) I dag Jesus ni pi thin ni ke yog e ku fan ko pi gachalpen ni bay e ngiyal’ ney ni kan nog “tin tomren e rran ngay,” ya ke yog ni gaar: “Ma re thin rok Got ney nib fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Daniel 12:4; Matthew 24:14) Ere gad manang ni m’agan’ Got ngay ni ngad uned ko machib. Machane, bochan ke ning Got ngodad ni ngad rin’ed e re n’en ney ma boch e girdi’ e yad be lemnag ni ke pag urngin e n’en ni baadag Got ni ngad rin’ed. Machane riyul’ ni aram rogon, fa?

Mang fan ni Gowa Mo’maw ni Ngan Rin’?

18. Mang e thingarda lemnaged u nap’an ni gad be un ko gafgow ni bochan ni gad be rin’ e tin ni ke ning Jehovah ngodad ni ngad rin’ed?

¹⁸ Rogon ni kad guyed, e ma ning Jehovah ngak e girdi’ ni ngar rin’ed boch ban’en ni kab kakrom i yib. Ma bochan ni ba thilthil e n’en ni kan tay chilen ngorad ni ngar rin’ed, maku aram rogon e skeng ni ke yib ngorad ni ba thilthil. Ke yib e skeng ngak fa en Fak Got ni kaygi mo’maw, ma tomur riy e kan li’ kem’ ni gowa be’ nib kireb ni bochan ke rin’ e tin ni ke ning Got ngak. Machane faanra kad gafgowgad nbochan ni gad be rin’ e tin ni ke ning Jehovah ni ngad rin’ed, ma thingar dabda paged talin ni gathi ir e ke pi’ e pi skeng ney ngodad. (John 15:18-20; James 1:13-15) Bochan ke togopuluw Satan ma arfan ni ke yib e denen, gafgow, nge yam’, ngak e girdi’ ma ir faanem ni ma n’igin nge sum e magawon ni baga’ ni ngari mom’maw’ ngak e pi tapigpig rok Jehovah ni ngar rin’ed e tin ni baadag ni ngara rin’ed.​—Job 1:6-19; 2:1-8.

19. Mang fan ni tin nib fel’ ni ngad rin’ed e tin ni ke ning Got ngodad ni ngad rin’ed u daken Fak?

¹⁹ Be pow’iy Jehovah pi tapigpig rok u daken Fak e ngiyal’ ney ko tomur ni ngar wereged ngak e girdi’ nu fayleng ni kari mus ni re Gil’ilungun Got nem e ra pithig urngin e magawon ko girdi’. Re am rok Got ney, e ir e ra chuweg urngin e magawon u fayleng ni bod​—mahl, nge bugel, nge gafgow, nge pillibthir, nge m’ar, nge yam’. Ku fare Gil’ilungun Got e ra ayuweg ni ngan paradisnag e fayleng, ma ngiyal’ nem e yira faseg e girdi’ ni kar m’ad. (Matthew 6:9, 10; Luke 23:43; Acts 24:15; Revelation 21:3, 4) Uw fene ga’ angin ko maruwel ni ngan wereg e pi’ n’en ney ngak e girdi’! Ere ba tamilang, ndariy e magawon ko n’en ni ke ning Jehovah ngodad ni ngad rin’ed. Ma yib e togopuluw ngodad, machane Satan ni Moonyan’ nge fayleng rok e yad e tapgin urngin e pi n’en ney.

20. Uw rogon nrayog ni ngad gelgad ko urngin e magawon ni yib ni bochan e Moonyan’?

²⁰ Uw rogon ni ngad gelgad ko urngin e magawon ni be pi’ Satan ngodad? Ngan tay ngan’uy fapi thin ni gaar: “Fakag ngam par ni gab gonop, ma ga felfelan’ag gum’ercha’eg, ma aram rogon ma rayog ni nggu fulweg lungun fa en ni be moningnageg.” (Proverbs 27:11) Rayog ni nge pi’ Jehovah e fulweg ngak Satan ni be moningnag ya ke chuw Jesus u tharmiy ni yugu aram rogon nib fel’ e par rok u rom ma keb nga fayleng ni nge fol ko tin nib m’agan’ e Chitamangin ngay. (Isaiah 53:12; Hebrews 10:7) Nap’an ni immoy Jesus u fayleng nib girdi’, ma ke par nib gum’an’ ko urngin e gafgow ni ke aw ngak, me yim’ nni tining nga balay e gek’iy. Faan gad ra fol rok Jesus ya ir e ke Dag ngodad boch ban’en, ma rayog ni ngad gum’an’gad ko pi gafgow ni ra yib ngodad ma ku rayog ni ngad rin’ed e tin ni ke ning Jehovah ngodad.​—Hebrews 12:1-3.

21. Uw rogon uwan’um fare t’ufeg ni ke dag Jehovah nge Fak ngodad?

²¹ Uw fene gel e t’ufeg ni ke dag Got ngodad nge Fak! Piin nib mat’aw e bay e athap rorad ni ngar pared u Paradis ndariy n’umngin nap’an nbochan ni ke pi’ Jesus e maligach. Ere dabda paged boch ban’en nrayog ni nge warnag e athap rodad. Danga’, machane ra bagadad ma nge tay nga gum’ircha’en e n’en ni ke rin’ Jesus, ni taabrogon ko n’en ni ke rin’ Paul, ye gaar: “Fak Got . . . ni ir e gub t’uf rok ma ke pi’ e pogofan rok ni fan ngog.” (Galatians 2:20) Ma gad be athapeg nrayog ni ngad pininged e magar ku Jehovah u gum’ircha’dad ya ir e Got rodad nib runguy, ma der ma ning ban’en ngodad ni ke pag urngin.

Uw Rogon ni Ngam Pi e Fulweg?

◻ Mang e be ning Jehovah ngodad ni ngad rin’ed e chiney?

◻ Nap’an fa bin tomur e balayal ni be chag Kristus ngak e pi apostal, mang i rin’ ni be dag ni baga’ fan e t’ufeg?

◻ Uw rogon ni ngad daged ni ba t’uf Got rodad?

◻ Mang fan ni ra yib angin ni ngan rin’ e tin ni be ning Jehovah ni ngad rin’ed?

[Picture on page 23]

Mang e n’en ni be skulnag Jesus ko pi apostal rok ko ngiyal’ ni be luknag ayrad?

[Picture on page 25]

Yugu demtrug ni ma yib e togopuluw, machane ngan wereg fare thin nib fel’ e aram e maruwel ni bay e felfelan’ riy