Rayog Ni Ngam Athamgil Nge Mada’ Ko Tomur

“Ngad athamgiliyed e gin ni ka ba’ ni ngad milgad riy ngad tawgad ko gin ni gad be nameg.”​—HEBREWS 12:1.

1, 2. Ngan gum’an’ e be sor fan ko mang?

“THINGARI gum’an’med,” e aram e thin ni ke yoloy Paul ni apostal ngak e pi Kristiano ni Hebrew ko fa bin som’on e chibog. (Hebrews 10:36) Be tamilangnag Peter ko uw fene ga’ fan e re ngongol n’ey, ma aram e ke pi’ e athamgil ngak e pi Kristiano ni gaar: “Ngam puthuyed ko michan’ romed . . . e gum’an’.” (2 Peter 1:5, 6) Machane ri mang fan e gum’an’?

² Rogon ni weliy e Greek-English lexicon fan fare bugithin ni Greek nni thiliyeg ni “gum’an” e aram “ngan par ma gathi ngan mil nga bayang . . . ngan par nib mudugil, ngan ul’ul ko cham.” Reb e reference work e ke weliy u murung’agen e thin ni Greek ni kan thiliyeg ni “gum’an’,” ma be gaar: “Aram e gelngin ni rayog ni ngan k’adan’uy u boch ban’en, ma gathi ke mus ni nge fel’ ban’en uwan’uy, machane yibe athapeg ban’en nib gel . . . Aram e ngongol ni ma ayuweg be’ ni nge par nib sak’iy nib mudugil nib sap ko nifeng. Ereray e tin nib fel’ ni nge thiliyeg e skeng nrib mom’aw’ nge mang e tin ni bay e fel’fel’an’ riy ni bochan tomren e gafgow ma rayog ni ngan guy e tin ni yibe nameg.” Ere, gum’an’ e aram e n’en ni rayog ni nge ayuweg be’ nge par nib mudugil laniyan’ u nap’an ni yib e magawon ngak nge boch ban’en nra tomalnag laniyan’ riy ma dabi m’ay e athap rok. Mini’ e ri ba t’uf rok e re fel’ngin n’ey?

3, 4. (a) Mini’ e thingari gum’an’? (b) Mang fan ni thingarda gum’an’gad i yan nge mada’ ko tomur?

³ Urngin e pi Kristiano e yad be un ko sagreng ni be yip fan ban’en ma ba t’uf ni ngar pared nib gum’an’. Sogonapan duw ni 65 C.E., ma Paul ni apostal e ke yol ngak Timothy nge pi’ athamgil nga laniyan’. Ma ba yul’yul Timothy ni ma un ngak Paul ko milekag ma aram me gaar ngak: “Kug athamgiliy e tin nrayog rog ko sagreng, ma kug mil u n’umngin yang ni ngan mil riy, ya ug par nib mich Kristus uwan’ug.” (2 Timothy 4:7) Fare thin ni yog Paul ni gaar, “kug mil u n’umngin yang ni ngan mil riy,” ma ke taarebnag e yafas rok ni ir reb e Kristiano ko sagreng ni yima ta’, ni bay e gin ni ngan mil riy nge gin ni yibe nameg. Ngiyal’ nem, ma ke chuchugur ni nge m’aynag Paul n’umngin yang ni nge mil riy, ma be sap nga m’on ko ngiyal’ ni ngan pi’ ngak puluwon e gel ni ke tay. Ma ke weliy ni gaar, “Me ere chiney,” e be sonnageg puluwog ko gel ni kug tay, ni aram fare teeliyaw ko mat’aw ni ir e bay pi’ fare tapufthin ni mat’aw i Somol ngog e chirofen nem.” (2 Timothy 4:8) Ke mudugil uwan’ Paul ni yira pi ngak puluwon ko gel ni ke tay ya ke par nib gum’an’ nge mada’ ko tomur. Ma uw rogon gadad?

⁴ Baadag Paul ni nge pi’ athamgil nga laniyan’ e piin ni be un ko sagreng, ma aram e ke yoloy ni gaar: “Ngad athamgiliyed e gin ka ba’ ni ngad milgad riy ngad tawgad ko gin gad be nameg.” (Hebrews 12:1) Gad e piin ni Kristiano, e kada uned ko re sagreng ko gum’an’ ney u nap’an ni kad ognaged gadad ku Jehovah ni Got rodad u daken Jesus Kristus. Ran tabab ko pigpig ku Got nib fel’ rogon e aram e n’en baga’ fan, machane tin ni ri baga’fan e aram e ngad milgad ngad tawgad ko gin ni gad be nameg. Ke yog Jesus ni gaar: “En nra athamgil nge mada’ ko tomur e ra yog e yafas ngak.” (Matthew 24:13) Fare puluwon e gel ni kan tay e yira pi’ ngak e piin ni kar milgad ma kar tawgad ko gin ni yad be nameg e aram e yafas ni manemus! Arfan, ni ngad ted nga laniyan’dad e n’en ni gad be nameg, ma thingar da gum’an’gad nge mada’ ko tomur. Mang e rayog ni nge ayuwegdad ni ngad tawgad ko gin ni gad be nameg?

Ggan nib Fel’​—e Baga’ Fan

5, 6. (a) Ngan gum’an’ ko sagreng ko yafas, ma mang e thingarda tiyan’dad ngay? (b) Mit i mang e ggan ni spiritual ni ba t’uf ni nge yog ngodad, ma mang fan?

⁵ Greece, e aram fare binaw nib chuchugur ko fare mach nu Korinth e yima ta’ riy e n’en ni kan nog Isthmian Games ngay ni aram e gosgos ni rib gilbuguwan kakrom. Ma dariy e maruwar riy ni manang Paul ni pi walag ni ma par u Korinth e yad manang e n’en ni kan nog fare athletic contest ngay nge yugu boch e gosgos ni yima tay u rom. Ba puluw ko tin ni yad ma nang, ma ke weliy Paul ngorad fare sagreng ko yafas ni aram e sagreng ni yad be un ngay ko ngiyal’ nem, me gaar: “Da mu nanged ni yira tay reb e sagreng ko mil ma urngin e girdi’ nra milgad, e ri taab bagayad e rayog puluwon ngak? Ere mmilgad ni aram rogon nge yog puluwon ngomed.” I dag Paul fene ga’ fan ni ngan par ni yibe mil ko re sagreng ney ni yan nge mada’ ko tomur. Machane mang e n’en nrayog ni nge ayuwegmed? Me ul’ul Paul ko welthin rok ni gaar ni, “Urngin e girdi’ni be un ko reb e gosgos e ba t’uf ni nge t’ar laniyan’ ko urngin ban’nen,” Arrogon, piin ni ma un ko gosgos kakrom e thingar ni skulnagrad nib gel ma ri yima mel’eg e n’en ni ngar ked nge boch ban’en ni ngar unumed, ma yad be par nib k’adan’ ko urngin e maruwel rorad ni ngar gelgad ko gosgos ni ngar uned ngay.​—1 Corinthians 9:24, 25.

⁶ Uw rogon fare sagreng ni be un e piin ni Kristiano ngay? “Thingari mu tiyan’med ko miti mang e ggan nib spiritual e ngam ked nfaanra gimed baadag ni ngam gum’an’gad ko sagreng ko yafas,” ya aram e n’en ni ke yog reb e piilal u lan e ulung ko Pi Mich rok Jehovah. Ngam lemnag ko mang e ggan ni spiritual ni ma pi’ Jehovah ngodad ni ir “fare Got ni ma ayuwegdad ni ngad pared nib gum’an’.” (Romans 15:5, New World Translation) Gad ma fek e ggan rodad ni spiritual ko thin rok, ni ir fare Bible. Gathi ke mutrug ngal’an ni kan dugliy ni ngad bieged e Bible u gubin ngiyal’? U daken “fare tapigpig nib yul’yul’ mab gonop,” e ku ma pi’ Jehovah ngodad riy boch e babyor nib m’ag ko tayim rodad e chiney ni The Watchtower nge Awake! nge yugu boch e babyor ni thin ni kan fek u Bible. (Matthew 24:45) Ran bieg e pi babyor ney u fithik’ e pasig ma ra ayuwegdad ni ngad pared ni ba gel ko tirok Got ban’en. Arrogon, thingarda dugliyed e tayim​—‘ngad ted e tayim’—​ma ngad filed e Bible ni goo gadad.​—Ephesians 5:16.

7. (a) Mang fan ni dawori fel’ uwan’dad nfaanra ke mus ni gad manang u murung’agen e def ko machib ni machib ni ma tay e piin Kristiano? (b) Uw rogon ni ngad “mon’oggad ma ngad ilalgad ko tirok Got ban’en”?

⁷ Rayog ni ngad pared ko kanawo’ ni be mil e piin Kristiano riy, e thingarda paged fare “machib ni tin kakrom” ma ngad athamgilgad ni “ngad ilalgad ko tirok Got ban’en.” (Hebrews 6:1, NW) Arfan ni thingarda adaged ni ngad nanged fan “feni ga’ radan nge feni n’uw nge feni tolang nge feni toar” e tin riyul’ ma ngad ked “fare ggan nib el [ni] piilal e ngar ked.” (Ephesians 3:18; Hebrews 5:12-14) Ngam mu lemnag fa aningeg ken e babyor ni be weliy u murung’agen Jesus u nap’an ni immoy u fayleng​—ni aram e babyor ni ke yoloy Matthew, nge Mark, nge Luke, nge John. Ran fil e pi thin ney u lan e yu ken ney, ma gathi ke mus ni ngad nanged ko mang e n’en ni ke rin’ Jesus nge miti mang girdi’ ir machane ku rayog ni ngan nang ko uw rogon ni be lemnag ban’en ni aram e n’en ni be k’aring ni nge rin’ ban’en. Ngemu’ ma rayog “laniyan Kristus ngodad.”​—1 Corinthians 2:16.

8. Uw rogon ni nge ayuwegdad e pi muulung ni ma tay e piin Kristiano ni ngar gum’an’gad ko sagreng ko yafas?

⁸ Ke pi’ Paul e fonow ngak e pi walag ni gaar: “Ere nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndabda paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni chirofen ni bay yib e Somol riy e be chugur.” (Hebrews 10:24, 25) Riyul’ ni ma pi’ e athamgil nga laniyan’ e girdi’ e pi muulung rodad! Maku uw fene fel’ ni ngan chag ngak e pi walagdad ni pumoon nge ppin ni gad manang ni yad baadag ni gad ba t’uf rorad ma yad baadag ni ngar ayuweged gadad ni ngad gum’an’gad nge mada’ ko tomur! Riyul’ ndabiyog ni ngad dariyfannag re yaram ney ni ke pi’ Jehovah ngodad ni bochan e gad ba t’uf rok. Ngan fil e Bible u fithik’ e pasig nge ngan un ko muulung u gubin ngiyal’, ma rayog ni ngad “lemgad nrogon e piilal.”​—1 Corinthians 14:20.

Piin ni Be Guyem e Ra Ayuwegem

9, 10. (a) Uw rogon ni piin ni yad be yaliy e sagreng e rayog ni ngar pied athamgil nga laniyan’ e girdi ni yad be un ko re sagreng ko gum’an’ nem? (b) Mang fan ‘fare manileng ko pi mich ni boor ni bay u toobdad’ rogon ni yog ko Hebrews 12:1?

⁹ Yugu aram rogon ni ke fal’eg rogon fa en be un ko sagreng nib fel’ rogon, machane, rayog ni nge buch boch ban’en ni nge magawonnag ma ke maruwaran’. Ke fith Paul, “Um mon’ogad iyan. Me ere mini’ e talegmed ndab ku um folgad ko tin riyul’?” (Galatians 5:7) Ba tamilang, ni boch e piin Kristiano u Galatia e kar chaggad ngak yugu boch e girdi’ nib kireb, ma wenegan ni yib riy, e dakur tiyan’rad ko sagreng ko yafas ni yad be un ngay ko ngiyal’ nem. Machane, faanra ayuweg yugu boch e girdi’ nge pi’ athamgil nga laniyan’ be’ ni be un ko sagreng ma ra mom boch ni nge gum’an’. Ri aram rogon e piin ni ma yaliy reb e gosgos, ya rayog ni ngar ayuweged e piin ni be un ko sagreng nge par nib mudugil laniyan’rad ara rayog ni ngar warnaged laniyan’rad. Faanra ba pasig e girdi’ ni be guy e gosgos ma rayog ni ngan pug e tafinay rok e piin ni be un ko re gosgos nem ka nap’an e tabolngin nge mada’ ko tomur. Faanra be tolul e girdi’ ni be guy fare gosgos, ma ba muun ngay e musik ni baga’ lingan nge yad be wayway, e ra yib gelngirad ni aram e n’en nib t’uf rorad u nap’an ni yad be chuchugur iyan ko gin ni yad be nameg. Arrogon, faanra piin ni be guy e sagreng e yad e girdi’ ni ba runguy e rayog ni ngar suruyed ngar ayuweged e piin ni be un ko sagreng.

¹⁰ Fare sagreng ko yafas ni be un e pi Kristiano ngay, e mini’ e piin ni be guyrad? Tomren ni ke weliy Paul u murung’agen e Pi Mich rok Jehovah nib yul’yul’ ko ngiyal’ ni dawori yib Kristus, ni kan yoloy u Hebrews guruy ni 11, ma ke yoloy ni gaar: “Ere, bochan bay boor pi mich u toobdad ni bod e manileng, . . . ngad milgad ko fare sagreng ko yafas ni kan ta’ u p’eowchedad u fithik’ e gum’an’.” (Hebrews 12:1) Nap’an ni be fanay Paul fare thin ni manileng ko fanathin rok, ma de fanay fare thin nu Greek ni be dag ko uw ga’ngin fare manileng nge uw rogon yaan. Danga’, ke fanay fare bugithin ni rogon ni yog W. E. Vine ni lexicographer “e be sor fan nga lan e lang ni ke mus ni boor e manileng riy.” Ba tamilang, ni be lemnag Paul u murung’agen e ulung ni baga’ ko pi mich​—ni riyul’ ni yad pire’ ni taabrogon ko manileng.

11, 12. (a) Uw rogon ni pi mich rok Got kakrom ni ur moyed u nap’an ni dawori yib Kristus nga fayleng e bod ni yad be pi’ athamgil nga lanin’dad ni ngad milgad ko sagreng ko yafas u fithik’ e gum’an’? (b) Uw rogon ni rayog ni ngari fel’ rogodad ko fare ‘manileng ni boor ko pi mich rok Got?

¹¹ Riyul’ ni rayog ni nge guydad e pi mich rok Got ni ur moyed u m’on ni yib Kristus? Danga’. Yad urngin e kar m’ad, ma yad be sonnag e fas ko yam’. Machane, kar milgad nib fel’ rogon ko sagreng ko yafas u nap’an ni ka yad ba fas ma ke yib angin ngorad, ma tin ni kar rin’ed e ka bay u lan fare Bible. Faan gad ra bieg e thin nu Bible, ma bod ni ka yad be par nib fas u laniyan’dad ma rayog ni ngar pied athamgil nga laniyan’dad, ni ngad uned ko sagreng ma ngad milgad ni yan nge mada’ ko tomur.​—Romans 15:4.a

¹² Mu lemnag e re n’ey, faanra bay boch ban’en u fayleng ni ke kirebnag laniyan’dad ma aram e n’en ni be wawliydad ni ngad tiyan’dad ngay, gathi fel’ ma ra ayuwegdad ni ngad lemnaged e n’en ni ke rin’ Moses kakrom ya de fanay urngin ban’en nu Egypt? Faani yib ngodad e skeng nib gel, ma rayog ni nge ayuwegdad ni dabi mulan’dad nfaanra ngad lemnaged e skeng ni ke yib ngak Abraham u nap’an ni ke ning Jehovah ngak ni nge pi’ fak ni maligach. Ere rayog ni nge pi’ athamgil nga lanin’dad fare ‘manileng ni boor’ ni aram e pi mich rok Got ni ma tor nga daken fene tamilang uwan’rad e tin ni kar rin’ed.

13. Uw rogon ni Pi Mich rok Jehovah ko ngiyal’ ney e yad be pi’ athamgil nga laniyan’dad ko fare sagreng ko yafas?

¹³ Maku bay boor e Pi Mich rok Jehovah u toobdad ko ngiyal’ ney. Mang e pi n’en ni ke rin’ e piin Kristiano ni kan dugliyrad ni pumoon nge ppin ni yad bang ko fare “ulung ni baga’” ni be micheg ni ba gel e michan’ rorad! (Revelation 7:9) Yu ngiyal’ ma rayog ni ngad bieged u lan e re ke babyor ney nge yugu boch e babyor ni ke ngongliy e Watch Tower ni be weliy ko mang e ke buch ngorad.b Faanra ngad fal’eged i lemnag e michan’ rorad, ma ra ubungdad ni ngad gum’an’gad yan nge mada’ ko tomur. Ku uw fene fel’ ni ngan lemnag ni bay e pi tafager rodad nge girdi’ rodad ni ma ayuwegdad ni ku yad be yul’yul’ ni be pigpig ku Jehovah! Arrogon, bay boor e piin nrayog ni ngar pied athamgil nga laniyan’dad ni ngad milgag ko sagreng ko yafas.

Ngam Gonopiy Uw Fene Gurgur ni Ngam Mil

14, 15. (a) Mang fan ni baga’fan ni ngad dugliyed u fithik’ e gonop fene gurgur ni ngad milgad riy? (b) Mang fan ni thingari par nib thabthabel laniyan’dad nrogon ni ngad mel’eged e tin ni ngad nameged?

¹⁴ Faanra ba n’uw e gin ni ngan mil riy, ni bod marathon, ma be’ ni be un ko re sagreng nem e thingari gonopiy uw fene gurgur ni nge mil. Rogon ni yog fare magazine ni New York Runner, e begaar: “Faanra ngam mil ni kaygi papey ko tabolngin ma dabmu m’on ko re sagreng nem,” me ul’ul ngay ni gaar: “Ngan yodor ma baga’ ni un par nib gafgow u nap’an ni be mil ko pi mile ni ka ba’ ara un tal.” Fa cha’ ni be un ko sagreng e be gaar: “Fa en ni ke pi’ e welthin ko reb e muulung ni fan ko piin ni ra un ko sagreng e ba tamilang ni ke ginangrad, ni gaar: ‘Dabmu guy rogom ni ngam mil ni taabrogon ko piin ni yad be mil nib papey: Ngam mil nrogon ni ri dabmu magar. Ya faanra danga’ ma ga ra magar ma sana ga ra tal.’ Bochan ni kug fol ko re fonow nem ma aram kug mil e n’umngin yang ni ngan mil riy.”

¹⁵ Fare sagreng ko yafas ni be un e pi Kristiano ngay, e thingara athamgilgad ni ngar tiyan’rad nrogon ni rayog rorad. (Luke 13:24) Machane, James ni gachalpen Jesus e ke yoloy, ni gaar: “Fare gonop ni yib u tharmiy . . . e ba thabthabel ko urngin ban’en.” (James 3:17, NW) Riyul’ ni tin nib fel’ ni ke rin’ yugu boch e girdi’ e rayog ni nge pi’ athamgil nga laniyan’dad ni ngad yoornaged e maruwel rodad. Machane, nguun par nib thabthabel ko urngin ban’en e ra ayuwegdad ni rayog ni ngad nameged ban’en nib puluw ko salap nge par rodad. Fare Thin nu Bible e be puguran ngodad, ni gaar. ”Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge felfelan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’. Ya ra be’ ma bay gilban ni be fek.”​—Galatians 6:4, 5.

16. Uw rogon nib mom ni ngad dugliyed ko uw fene gurgur ni ngad milgad nfaanra be par nib sobut’ laniyan’dad?

¹⁶ Fare thin ni bay ko Micah 6:8, e be fith reb e deer nra pug e tafinay rodad, ni gaar: “Mang e n’en ni be ning Jehovah ngomed ni ngam rin’ed ya . . . ngam pared nib sobut’an’med nrogon ni gimed be yan Got u taabang?” Nguun par nib sobut’an’ e ba muun ngay ni ngan nang e tin ni gad ba war riy. Ke buchuw e n’en ni rayog ni ngad rin’ed ni fan ko Got ni bochan kad wargad dowdad ara kad pillibthirgad? Dabi mulan’med. Be felfelan’ Jehovah ko maruwel ni kam ted ‘nrogon e tin nrayog ni ngam pied, ma gathi tin ni dariy romed.’​—2 Corinthians 8:12; mu taarebnag ko Luke 21:1-4.

Ngam Sap ko Puluwon e Gel ni Kam Ta’

17, 18. Be par Jesus ni ma sap ko mang ma aram e n’en ni ke ayuweg ni nge par nib gum’an’ u nap’an ni kan gafgownag min tining nga baley e gek’iy?

¹⁷ Nap’an ni be weliy Paul ngak e piin Kristiano ni thingara gum’an’gad ko sagreng ko yafas, ku ke weliy yugu ban’en ni bang ko fare Isthmian Games nib t’uf ni ngar tiyan’rad ngay. Ke yoloy Paul ngak e piin ni yad be un ko re gosgos nem, ni gaar: “Ere, arfan ni yad be [mil] ni fan ni nge yog ngorad e teeliyaw ni gathi bayi par ndabi kireb, machane gadad e gadad be rin’ ni fan nga reb e teeliyaw nra par ndariy num’ngin nap’an. Aram fan ni gu be mil iyan nib k’iy kanawoeg ko gin ni nga ni mus riy; aram fan ni gu bod be’ ni girdi’en e tug nder adbey e tug rok.” (1 Corinthians 9:25, 26) Kakrom, ma piin ni kar gelgad ko gosgos e yima pi’ ngorad reb e teeliyaw, ara nunuw, ni kan ngongliy ko yuwan e pine ara yugu boch e woldug, ara wild celery ni ke milik​—ere riyul’ ni aram e “teeliyaw ni gathi bayi par ndabi kireb.” Ere, mang, e be sonnag e piin Kristiano ni kar gum’an’gad nge mada’ ko tomur?

¹⁸ Nap’an ni be weliy Paul ni apostal u murung’agen Jesus Kristus, ni ir e ke Dag ngodad ni ir be’ nib gum’an’ me yoloy, ni gaar: “Machane bochan e felfelan’ ni be sonnag ma aram de pag ir ni bochan kan tining nga balay e ren, ma daki tafinaynag e tamra’ nra tay ko yam’, ere chiney e ke par nga but’ u ba’ ni mat’aw rok Got u tagil’ Got.” (Hebrews 12:2) Ere ke par Jesus nib gum’an’ nge mada’ ko yam’ ya ke sap nga m’on ko puluwon ko gel ni nge tay nge yog ngak u tomren ni ke yim’, ma ba muun ngay e felfelan’ ni ra yib riy ngak ni bochan ke thothupnag e ngochol rok Jehovah, ma ke biyuliy e girdi’, ma ra mang e Pilung nge Prist nib tolang ma ra ayuweg e girdi’ ni nge yog ngorad e yafas ni manemus u paradis u fayleng.​—Matthew 6:9, 10; 20:28; Hebrews 7:23-26.

19. Mang e n’en ni thingarda tiyan’dad ngay ko ngiyal’ ni gad be yan u kanawoen e tin riyul’ e Kristiano?

¹⁹ Ngam mu lemnag e felfelan’ ni ra yib ngodad nfaanra ngad ul’ulgad ni ngad darod ko fare kanawo’ ni ma yan e piin Kristiano riy. Ma ke pi’ Jehovah ngodad fare maruwel ni ri ma yib e felfelan’ riy ngodad ni aram e ngad machibnaged fare thin nib fel’ u murung’agen Gil’ilungun Got ngak e girdi’ ma gad be wereg e tamilangan’ nu Bible ni ra ayuweg yugu boch e girdi’ ni ngar thapgad ngak Got. (Matthew 28:19, 20) Uw fene gel e felfelan’ ni yib riy ni yira pirieg be’ ni riyul’ ni baadag ni nge nang murung’agen Got ni riyul’ Ma ngan ayuweg ni rayog ni nge un ko sagreng ko yafas! Ma demtrug ko baadag e girdi’ e machib fa danga’, ma gad be felfelan’ ni ngad uned ko re maruwel n’ey ni be thothupnag fithingan Jehovah. Faanra gad be athamgil ni ngad uned ko machib ma yugu demtrug ni boor e girdi’ ni ma dariyfannag e machib ni gad ma wereg ara ma togopuluw ngodad, machane gad be felfelan’ ya gad manang ni kad felfelan’aged gum’ircha’en Jehovah. (Proverbs 27:11) Ma fare pulwon ko gel ni yira ta’ e aram e n’en ni ke micheg ngodad ni fare yafas ndariy n’umngin nap’an. Riyul’ ni bay e felfelan’ ni ma yib riy ngodad! Thingar da lemnaged e pi flaab nem ma ngad tiyan’dad ko sagreng ko yafas.

Be Chuchugur Iyan e Tomur

20. Uw rogon ni ke gel e mom’aw’ ko sagreng ko yafas e chiney ya ke chuchugur e tomur ko re fayleng ney?

²⁰ Re sagreng ko yafas ney ni gad be un ngay, e thingar da chamgad fa bin som’on e toogor rodad, ni Satan ni fare Moonyan’. Bochan gad be chuchugur iyan ko tomur, ma be ul’ul iyan ni be magawonnagdad ya baadag ni ngad dolgad ara ngad wargad ko tirok Got ban’en. (Revelation 12:12, 17) Ma riyul’ de mom ni nge par nib yul’yul’ e pi tamachib ko Gil’ilungun Got e chiney ni bochan e pi magawon ni bod e mahl’, ma ke buchuw e ggan, nge liliy, nge urngin e gafgow ni aram e pow ko “tin tomren e rran.” (Daniel 12:4; Matthew 24:3-14; Luke 21:11; 2 Timothy 3:1-5) Ku, faanra ke yan boor e duw ni kad uned ko fare sagreng ko yafas, ma yu ngiyal’ e kad piri’ged ni fare tomur ko re fayleng ney e kab palog ko tin ni kad lemnagged faram. Machane, Thin rok Got e be micheg nra yib e tomur. Ma ke yog Jehovah ndabi sagaal e re nem. Fare tomur e ke chuchugur.​—Habakkuk 2:3; 2 Peter 3:9, 10.

21. (a) Mang e ra pi’ gelngidad ko ngiyal’ ni gad be ul’ul iyan ko sagreng ko yafas? (b) Mang e n’en nthingarda dugliyed ya ke chuchugur e tomur?

²¹ Ere, thingarda ked e ggan nib spiritual ni ma pi’ Jehovah ngodad u fithik’ e t’ufeg ni nge ayuwegdad ko tirok Got ban’en, ma aram rogon ma rayog ni nge yib angin ngodad ko sagreng ko yafas. Maku, thingarda chaggad ko pi walagdad u lan e ulung u gubin ngiyal’ ya yad be un ko sagreng ko yafas ni bod gadad ma rayog ni ngar pied athamgil nga laniyan’dad. Yugu demtrug ni ke yib e togopuluw ngodad fa bay boch ban’en ni ke buch ngodad nib tomgin ni ke kireban’dad ngay ma kari mom’aw’ e sagreng ko yafas ni bochan, ma rayog ni ngad gum’an’gad nge yan i mada’ ko tomur ya Jehovah e ma pi’ ngodad “fare gelngin ni yib rok ma gathi gadad i yib rodad.” (2 Corinthians 4:7) Riyul’ nrayog ni ngan pi’ athamgil nga laniyan’dad ni ngad nanged ni baadag Jehovah ni ngad ul’ulgad ko re sagreng n’ey nge mada’ ko tomur nrogon ni ra yib angin ngodad! Ba t’uf ni nge mudugil laniyan’dad, ma aram rogon, “ngad athamgiliyed e gin ka ba’ ni ngad milgad riy ngad tawgad ko gin ni gad be nameg,” ma kari mudugil laniyan’dad ni “faanra dabda paged gadad ma ba’ nap’an ni bayi taw ngay ma gadad t’ar wom’ngin.”​—Hebrews 12:1; Galatians 6:9.

[Footnotes]

Ka Ga Manang?

◻ Mang fan ni thingarda gum’an’gad i yan nge mada’ ko tomur?

◻ Mang e n’en ni be pi’ Jehovah ngodad ni thingar dabda paged talin?

◻ Mang fan ni baga’ fan ni ngad dugliyed u fithik’ e gonop ko uw fene gurgur ni ngad milgad?

◻ Mang e felfelan’ ni kan tay nga m’on rodad nfaan gad ra ul’ul ko fare sagreng ko yafas?

[Picture on page 28]

Pi muulung ko piin Kristiano e rayog ni nge pi’ athamgil nga lanin’uy