Kara “Rusgow Ko Got Ni Riyul’”

NAP’AN ni immoy piyu Israel u Egypt ni yad e sib, ma bay e gali ppin nem ni Hebrew ni yow e yarif. Shiphrah nge Puah fithingrow, ma kani magawonnagrow. Bochan ni ke guy Farao rogon ni nge taleg e pi girdi’ nu bang ni ma par u binaw rok ni dabkuura yoorgad, ma aram me tay chilen ngak e gali ppin nem ni gaar: “Gimew ra ayuweg e ppin ni Hebrew ko ngiyal’ ni ngar gargelgad, . . . , ma faanra pumoon e bitir ni kan gargelnag ma ngam liew.”​—Exodus 1:15, 16.

Shiphrah nge Puah e “bay madgun Got uwan’row,” ere dar rusgow ma “dar folgow ko pi n’en ni ke yog fare pilung nu Egypt ngorow.” Danga’, kar ayuwegew e pi bitir ni pumoon ni ngar pared nib fas, ni yugu demtrug rogon ni bay e riya’ riy nib gel. Ke rin’ Jehovah e “tin nib fel’ ngak e gali ppin nem,” me taw’athnagrow ya kar ayuwegew boch e bitir ni dabra m’ad.​—Exodus 1:17-21.

Pi thin nem e be dag ni ba felfelan’ Jehovah ko piin ni be pigpig ngak. Riyul’ ni ke dag Shiphrah nge Puah ni dar rusgow, machane rayog ni nge lemnag Got ndariy ban’en ni baga’ fan ni kar rin’ew ya susun aram rogon e girdi’ ni ma ayuweg yugu boch e girdi’. Ma dariy e ppin ni ffel’ laniyan’ ni nge li’ e pi bitir! Machane, dariy e maruwar riy ni ke lemnag Jehovah e ngiyal’ nem ni bay boch e girdi’ e kar rin’ed e tin ni rib kireb ni bochan kara rusgad ko girdi’. Manang ni gali ppin nem ni yarif e kara rin’ew e re nem ya bay madgun Got uwan’row ma gathi kemus ni bochan ni yow ba gol.

Uw fene gel e felfelan’ rodad ni ngad pigpiggad ku Got ni be guydad ni nge nang ko mang e n’en ni gad be rin’ u fithik’ e yul’yul’! Sana, riyul’ ndariy bagadad ni kan skengnag e michan’ rok ntaabrogon ko skeng ni yib ngak Shiphrah nge Puah. Machane, faan gad ra par nib mudugil ko pi n’en nib mat’aw​—ndemtrug ko sana u skul, ara u tabon e maruwel, ara yugu boch e magawon ni yib ngodad—​ma der ma dariyfannag Jehovah e tin ni kad rin’ed ni be micheg ni gad ba yul’yul’ ngak. Dangay, ya “ma taw’athnag e piin ni yad be gayiy Got.” (Hebrews 11:6) Arrogon, ya Got e “gathi bayi pag talin e maruwel ni kam ngongliyed, ara rogon nib t’uf romed ni kam daged ni bochan e ayuw ni kam pied ma ki gimed be pi’ ngak e piin ni gimed ni girdien Kristus.”​—Hebrews 6:10.