Dabi Chuwan’um Ko Sagreng Ko Yafas!

“Ngad athamgiliyed e gin ni ka ba’ ni ngad milgad riy ko fare sagreng ni gad be un ngay.”​—HEBREWS 12:1.

1, 2. Mang boch ban’en nib fel’ ni ke falfalan’ e pi tapigpig rok Jehovah ngay ko ngiyal’ ney ni tin tomren e rran?

GAD MA par ko ngiyal’ nib baga’ fan mab mo’maw e par riy. Ke pag 80 e duw faram u nap’an e 1914 ni ke mang Jesus e Pilung ko Gil’ilungun Got u tharmiy. Ma aram me tabab “Fare rran rok Somol” nge “tin tomren e rran” ko re m’ag ney. (Revelation 1:10; Daniel 12:9) Ka aram ma be gel iyan e sagreng ko yafas ni be tay e Kristiano. Pi tapigpig rok Got e ur athamgilgad nib elmirin ni ngar ranod u taabang ko karro rok Jehovah ni ma girngiy e os, ni aram e ulung rok u tharmiy, ni be yan ndabiyog ni ngan taleg ni nge dabi lebug e tin nib m’agan’ Jehovah ngay.​—Ezekiel 1:4-28; 1 Korinth 9:24.

² Ma girdi’ rok Got e yad ba falfalan’ u nap’an ni yad be un ko fare sagreng ni be sor iyan ko yafas ni manemus fa? Ri arrogon! Kar falfalan’gad ya kan kunuy e tin ni ka bay pi walagen Jesus nga taabang, ma yad ba falfalan’ ni ngar guyed ni yibe dugliy e tin ni ka bay ko pi girdi’ ni yad 144,000 ma ke chugur ni nge gaman. (Revelation 7:3, 4) Maku yad ba falfalan’ ni nge tamilang u wan’rad ni fare Pilung ni ke dugliy Jehovah e ke fek e kama be “t’ar wom’engin e woldug u fayleng.” (Revelation 14:15, 16) Ma rib fel’ e re mokun woldug nem! (Matthew 9:37) Chiney ma ke pag lal i milyon e girdi’ ni kan kunuyrad nga taabang ni yad​—“ba ulung ni baga’, ndariy be’ nrayog ni nge theegrad, nra bad u gubin e nam, nge ganong, nge gubin mit e girdi’, ngu gubin e thin.” (Revelation 7:9) Dariy be’ ni manang ko uw urngin e girdi’ ko fare ulung ni baga’, ya dariy be’ nrayog ni nge theegrad.

3. Thingarda athamgilgad ni ngad pared nib falfalan’ ni yugu demtrug ko mang?

³ Rriyul’, ma guy Satan rogon ni nge dibchey u kanawo’ rodad, ara nge n’igin ngad sagaalgad ko fare sagreng. (Revelation 12:17) Ma de mom ni nguun mil u fithik’ e pi mahl, nge uyungol, nge m’ar, nge yugu boch e magawon ni aram e pow ko tin tomren e rran. (Matthew 24:3-9; Luke 21:11; 2 Timothy 3:1-5) Machane gad ba falfalan’ ya be chugur iyan ko tomur. Gad ma athamgil ni ngad folgad ko n’en ni yog Paul ko pi Kristiano ko ngiyal’ nem ni gaar: “Gubin ngiyal’ ni nguum falfalan’gad ko taab girdi’ ni kam tiyed Somol. Ere ngku gog biyay ni nge lungug, mu falfalan’gad!”​—Filippi 4:4.

4. Uw rarogon e ulung ko pi Kristiano u Filippi?

⁴ Dariy e maruwar riy ni pi Kristiano ni ke yol Paul ngorad e ur falfalan’gad ko michan’ rorad, ya yog Paul ngorad ni gaar: “Nguum pired ni gimed ba falfalan’ ko taab girdi’ ni kam tiyed Somol.” (Filippi 3:1) Piyu Filippi e yad e ulung nib gol, ma yad ma runguy e girdi’ ma ur pigpiggad u fithik’ e passig. (Filippi 1:3-5; 4:10, 14-20) Machane gathi urngin e Kristiano u nap’an e bin som’on e chibog e aram rogorad. Susun, boch e Kristiano ni Jew ni ke yoloy Paul fare babyor ni Hebrew ngorad e ke magawon laniyan’rad.

Boch e Magawon u Nap’an Paul

5. (a) Uw rarogon e pi Kristiano ni Hebrew u nap’an ni sum e bin som’on e ulung ko Kristiano? (b) Mu weliy ko uw rarogon boch e Kristiano ni Hebrew u nap’an e 60 C.E.

⁵ Fa bin som’on e ulung ko Kristiano e yad e girdi’ ni Jew nge piin proselyte ara girdi’ nu bang ni kar uned ko teliw ni Jew ma sum e re ulung nem u Jerusalem ko duw ni 33 C.E. Uw rogon e re ulung nem? Ngan bieg e tin som’on e guruy ko babyor ni Acts ma aram e rayog ni ngan nang ni yad ba passig, ma yad ba falfalan’, ni mus u fithik’ e togopuluw. (Acts 2:44-47; 4:32-34; 5:41; 6:7) Machane nap’an ni ke yan e yu ngiyal’ ma ke thil boch ban’en, ma boor piyu Jew ni yad e Kristiano e ur sagaalgad ko fare sagreng ko yafas. Reb e babyor e be weliy u morngaagen e re n’ey u nap’an e duw ni 60 C.E. ke gaar: “Rarogorad e kar malmalgad ma ke aw parowrad, ma ke mulan’rad ya de lebug e tin ni ur fineyed, mar paged talin e athap rorad, ma kar talgad i athamgiliy ban’en ma de mich u wan’rad ko tin ni yad be rin’ u gubin e rran. Yad e Kristiano machane dar ted fan e flaab rorad ni kan dugliyrad ko kan ni thothup.” Uw rogon nrayog ko pi Kristiano ni kan dugliyrad ni ngar wargad ni aram rogon? Ngan lemnag yu yang ko babyor ni yoloy Paul ngak piyu Hebrew (ni kan yoloy ko duw ni 61 C.E.) ma ra ayuwegdad ngad nanged e fulweg ko re deer nem. Gad ra fil e re n’em ma ra ayuwegdad ko ngiyal’ ney nge siy da wargad ko tirok Got ban’en.

“Ngan Tiyan’uy nib Elmirin”

6. Mang boch ban’en nib thil ko liyor u tan fare Motochiyel rok Moses nge liyor ni bay ko michan’uy ngak Jesus Kristus?

⁶ Pi Kristiano ni Hebrew e yad piyu Judah ni aram e pi girdi’ ni ur rogned ni yad be fol ko fare Motochiyel ni pi’ Jehovah u daken Moses. Re Motochiyel nem e kab gel gelngin ni be gagiyegnag e pi Kristiano ni Jew, sana bochan in e chibog ma aram kanawoen min thap ngak Jehovah, maku rib lingagil rogon e liyor ni yad be tay ya bay e pi prist, nge pi maligach ni un pi’ u gubin ngiyal’, ma bay e tempel nib gilbuguwan u Jerusalem. Machane Kristiano e ba thil. Ya ba t’uf e changar ko tirok Got ban’en, ni bod rogon Moses ni “i par ni ke yip’ owchen ko tin ni ka ba’ nga m’on ni bayi pi’ Got ni puluwoy [ni ka bay nga m’on]” me par ni “gowa ke guy fare Got ndab ni guy nga owchey.” (Hebrews 11:26, 27) Boor e Kristiano ni Jew e dariy e binem e changar ko tirok Got ban’en rorad. De mudugil e yan rorad ma gathi yad be yan ni bay ban’en ni yad be nameg ni ngar tawgad ngay.

7. Uw rogon ma rogon ni gad ma mil e bay rogon ko pi n’en ni kad uned ngay faram?

⁷ Aram rogon ko ngiyal’ ney fa? De taareb rogon urngin ban’en e ngiyal’ nem ko ngiyal’ ney. Machane, pi Kristiano e ma par u lan ba m’ag nib uf. Boor ban’en ko fayleng ni bay e falfalan’ riy, machane ku ma tomalnag laniyan’ e girdi’. Maku boor i gadad e gad ma par u lan e pi binaw ni lem ko girdi’ e ba thin thinan’ ma yad ba siin mi yad ma rin’ e tin ni ra fel’ rogorad riy ko som’on. Faanra gad ra pagedan’dad ni ngad uned ko pi n’en nem ma ‘tamilangan’ rodad’ e rayog ni nge ta athath. (Efesus 1:18) Uw rogon ni gad ra mil nib fel’ rogon ko fare sagreng ko yafas nfaanra dabkiyog ni ngad guyed nib tamilang e gin ni gad be sor ngay?

8. Ku mang boch ban’en ni kab fel’ e Kristiano ko liyor u tan fare Motochiyel?

⁸ Ni nge pug e tafinay ko pi Kristiano ni Jew me puguran Paul ngorad ni kab fel’ e m’ag ko Kristiano ko fare Motochiyel rok Moses. Rriyul’ ni nap’an ni immoy piyu Israel ni yad e girdi’ rok Jehovah u tan fare Motochiyel, ma i non Jehovah ngorad u daken e pi profet. Machane yog Paul ni ngiyal’ ney ma ma non “ngodad u l’ugun e en ni Fak ni ir faanem ni pa’ e maruwel Got ngay nge sunumeg e fayleng nge urngin ban’en ni ba’ riy, me ir faanem ni Got e ke dugliy ni nge mil suwon urngin ban’en ngak ko tomur.” (Hebrews 1:2) Maku, kab baga’ Jesus ngak urngin e pi pilung ko ganong rok David, ni yad e piin ni “be un ngak.” Ma kab tolang ko pi engel.​—Hebrews 1:5, 6, 9.

9. Mang fan nib t’uf rodad ni ngad folgad ko n’en ni kan nog ko piyu Jew u nap’an Paul ni “ngad tedan’dad nib elmirin” ko tin ni ma yog Jehovah?

⁹ Ere yog Paul ko pi walagen ni Jew ni gaar: “Aram fan ni thingarda tedan’dad nib elmirin ko fapi thin nib riyul’ ni kad rung’aged, nge siy da man’gad riy nga orel.” (Hebrews 2:1) Yugu aram rogon ni ba flaab ni ngan fil u morngaagen Kristus machane kab t’uf boch ban’en. Ba t’uf rorad ni ngar tedan’rad ko Thin Rok Got ni ngan togopuluw ko pi n’en ko m’ag ko yu Jew ni yad bay riy. Ku arrogodad ni ba t’uf ni ngad “tedan’dad nib elmirin” ko pi n’en ni yog Jehovah ya boor ban’en ko re fayleng ney ni be waliydad. Ere thingarda fl’eged e par rodad ni gad be fil e babyor u gubin ngiyal’ ma gad poy e Bible u gubin ngiyal’. Rogon ni yog Paul ko babyor ni ke yoloy ngak piyu Hebrew e ba t’uf ni ngan un ko pi muulung u gubin ngiyal’ ma gad weliy ko girdi’ e michan’ rodad. (Hebrews 10:23-25) Ngan rin’ e pi n’en nem ma ra ayuwegdad ni ngad pared nib od ko tirok Got ban’en ma dabi ta athath e changar rodad ko athap rodad. Faanra gad ra suguy lanin’dad ko pi n’en ni ma lemnag Jehovah, ma aram e dabda dol’gad ma dabda yoyowolgad ko pi n’en ni ra rin’ e re fayleng ney ngodad.​—Psalm 1:1-3; Proverbs 3:1-6.

“Thingari Bigimed me Ayuweg Bigimed”

10. (a) Mang e rayog ni nge buch ku be’ ni der tiyan’ nib elmirin ko Thin Rok Jehovah? (b) Uw rogon nrayog ni nge “bigimed me ayuweg bigimed”?

¹⁰ Faanra dabda tedan’dad ko tirok Got ban’en, ma rayog ni nge m’ug riy ni tin ni micheg Got e de riyul’. Aram e n’en ni buch u nap’an e bin som’on e chibog ko pi ulung ni yad e pi Kristiano ni kan dugliyrad ko kan ni thothup ma kab fas boch e pi apostal. I ginang Paul piyu Hebrew ni gaar: “Pi walageg ni girdien Kristus: mu ayuwgad nge par ndariy be’ u fithik’med nib kireb e lem rok ma der michan’, ya ri pi’ keru’ ngak Got ni be par nib fos. Machane rogon ni ngam pired ndariy bigimed ni ngeb e denen i bannag nge gel laniyan’ e thingari bigimed me ayuweg bigimed ni gubin e rran, ni n’umngin nap’an ni fare rran ni ‘Daba’’ ni be yog e babyor nib thothup morngaagen e be yip’ fadad.” (Hebrews 3:12, 13) Fare thin ni yog Paul ni “mu ayuwgad” e be tamilangnag ni ba t’uf ni ngan par nib od. Ya bay e riya’! Mang e re riya’ nem? Rayog ni nge aw ni dariy e michan’ ni aram e —“denen”​—u gumercha’dad, ma aram ma gad ra palog nga orel rok Got ma gathi gad ra chuchugur ngak. (James 4:8) Ma puguran Paul ngodad ni “thingari bagadad me ayuweg bagadad.” Ba t’uf rodad e t’ufeg ni bay ko par u fithik’ e pi walag. “Be’ ni be par ni goo ir e be lemnag e tin ni ba adag ban’en; ma ra ngongol nib togopluw ko gonop.” (Proverbs 18:1) Ar fan nib t’uf ko pi Kristiano ko ngiyal’ ney ni ngar chaggad u taabang ma yad ma athamgil ni ngar uned ko urngin e muulung nge assembly, nge convention.

“Rayog ni Ngam Manged Boch e Tamachib”

11, 12. Mang fan ni susun dabi gaman u wan’dad ni ngad pared ni ke mus ni gad manang e tin som’on e machib ni kad filed?

¹¹ U lan e babyor rok me pi’ Paul boch e fonow ni gaar: “Ke n’uw nap’an ni kam rung’aged e thin rok Got nrayog ni ngam manged boch e tamachib, machane dabi siy ni ngki machibnag be’ ngomed e tin som’on e thin ni yima fil ko thin ni yib rok Got. Susun e ngam ked e ggan nib el, machane dabi siy ni milik e ngam unumed. . . . Ma ggan nib el e piilal e ngar ked, ya kar filed rogon ni ngar nanged e tin nib fel’ ko tin nib kireb.” (Hebrews 5:12-14) Be m’ug riy ni boch e Kristiano ni Jew e da ur mon’oggad ko tamilangan’. Kar sowathgad ni ngar uned ko fare tamilang u morngaagen fare Motochiyel nge ngan maadadnag e pumoon. (Acts 15:27-29; Galatia 2:11-14; 6:12, 13) Sana boch e girdi’ e ka be tay fan e yalen ko Sabbath nge Rran ko Biyul’.​—Kolose 2:16, 17; Hebrews 9:1-14.

¹² Ere gaar Paul: “Ngad paged nga tomur urngin e tin som’on e tin ni kad weliyed ni murung’agen Kristus ngad tiyan’dad ko tin ni ka ba’ ni ngan fil ngad mu’niged.” (Hebrews 6:1) Be’ ni ma mil ko marathon ara sagreng e ri ma tiyan’ ko mit i ggan ni nge kay ma aram rayog ni nge un ko sagreng nib mo’maw mab n’uw nap’an. Ku arrogon e Kristiano ni ma tiyan’ ko ggan ko tirok Got ban’en​—gathi ke mus ni ma par ko ‘tin som’on e machib’​—e rayog ni nge par ko fare kanawo’ ni be yan ngay me mus. (Mu taarebnag ko 2 Timothy 4:7.) Fan e re n’ey e thingarni adag ni ngan nang fan “feni ga’ radan nge feni n’uw nge feni tolang nge feni toar” e thin riyul’, ma aram min ilal iyan ko tirok Got ban’en.​—Efesus 3:18.

“Thingari Gum’an’med”

13. Uw rogon ni dag e pi Kristiano ni Hebrew e michan’ rorad faram?

¹³ Fa ngiyal’ u tomren e Pentekost ko 33 C.E., ma pi Kristiano ni Jew e ur pared ni yad mudugil u fithik’ e togopuluw. (Acts 8:1) Sana aram e n’en ni be lemnag Paul faani yoloy ni gaar: “Ki gimed manang rogomed ko tin ni baaram e rran ni ke yan nga tomur. Lan e pi rran nem u tomren ni ke gal ramaen e tamilang rok Got nga dakenmed, e boor ban’en ni mu gafgowgad riy, machane gafgow ni i yib ngomed e de gel ngomed.” (Hebrews 10:32) Athamgil ni ur ted e ke dag rogon fene t’uf Got rorad ma aram me puf rogon u thilrad Got. (1 John 4:17) I yog Paul ngorad ni dabra paged e re puf rogoy nem ni bochan ni ke war e michan’ rorad. Yog ngorad ni gaar: “Ya thingari gum’an’med, ni fan e nge yog ni mu ngongliyed e tin nib m’agan’ Got ngay me yog ngomed e tin ni ke yog nra pi’ ngomed. Ya ‘dabki n’uw nap’an,’ ma ‘en ni nge yib e bay yib, ni dabi sowath.’”​—Hebrews 10:35-37.

14. Mang boch ban’en nra ayuwegdad ngad guman’gad ni yugu aram rogon ni kad pigpiggad ku Jehovah u lan boor e duw?

¹⁴ Ma uw rogon gadad ko ngiyal’ ney? Nap’an ni kad nanged e thin riyul’ nsom’on ma gad ba passig. Ka aram rogodad e chiney fa? Fa ‘kad paged e t’ufeg ni immoy rodad ko som’on’? (Revelation 2:4) Kad sowathgad ni sana ke mulan’dad ara ke chalbadad ya dawori taw ko Armageddon fa? Ere mu tal ma ga lemnag e re n’ey. Thin riyul’ e kab fel’ e chiney ni bod faram. Ma Jesus e ka ir e Pilung rodad u tharmiy. Ma ka be l’agan’dad ko yafas ni manemus u paradis u fayleng, ma ka bay rodad rogon nib fel’ thildad Jehovah. Ma dabda paged talin e re n’ey: “En ni ra yib e bay taw ma dabi sowath.”

15. Bod Jesus, ma uw rogon ni ke gum’an’ boch e Kristiano u fithik’ e gafgow nib elmirin?

¹⁵ Ere rib puluw e pi thin ni yog Paul ni bay ko Hebrews 12:1, 2 ni be gaar: “Ere ngad paged urngin ban’en ni be magawon ngodad, nge denen [par ni dariy e michan’] ni ke m’agdad ni ke chichiiy pa’ rodad, ngad athamgiliyed e gin ni ka ba’ ni ngad milgad riy ngad tawgad ko gin ni gad be nameg. Ma gad par ni kad l’eged owchedad ngak Jesus, yi ir e be tor e michan’ rodad ngak ko tabolngin nge yan i mada’ ko tungun. Ya de pag ir ni bochan fare ley i ren! Machane bochan e falfalan’ ni be sonnag ma daki tafinaynag e tamra’ nra tay ko yam’ ni nge tay u daken fa ley i ren, me ere chiney e ke par nga but’ u ba’ ni mat’aw rok Got u tagil’ Got.” Boor ban’en ni ke k’adan’ e pi tapigpig rok Got riy ko ngiyal’ ney ni tin tomren e rran. Bod Jesus ni ke par nib yul’yul’ nge mada’ ko ngiyal’ ni yim’ u fithik’ e amith nib gel, ma boch e pi walagdad ni pumoon nge ppin e kar pared nib yul’yul’ u fithik’ e gafgow nib elmirin​—boch i yad e kan nin’rad nga kalbus ma boch e kan li’rad nib gel, ma boch e ppin e kan rapenagrad, ma boch iyad e kan li’rad kar m’ad. (1 Peter 2:21) Gathi bay e t’ufeg u gumercha’dad ko pi cha’ ney u nap’an ni gad ma lemnag rogon ni ur pared nib yul’yul’?

16, 17. (a) Mang boch e magawon ni ke skengnag e michan’ ko pi Kristiano? (b) Mang e gad ra lemnag ni ra ayuwegdad nguuda milgad ko fare sagreng ko yafas?

¹⁶ Machane boor e girdi’ ni puluw e pi thin rok Paul ney ngorad ni be gaar: “Athamgil ni gimed be tay nib togopuluw ko denen e dawori taw ko gin ni ngan li’med riy ngam m’ad.” (Hebrews 12:4) Machane u lan e re m’ag ney ma de mom ni ngan par ko kanawoen e thin riyul’. Boch e girdi’ e ke mulan’rad ko “fanenikan ni tay e piin ntadenen” u tabon e maruwel ara skul, ni yad be k’adan’rad ara ngar togopuluwgad ko towasar ni ngar denengad. (Hebrews 12:3) Bochan e ba gel rogon ni yibe waliy e girdi’ ma ke war boch e girdi’ ndakura pared ni yad be fol ko pi motochiyel rok Got. (Hebrews 13:4, 5) Piin apostate e ur n’igined nge yoyowol boch e girdi’ ndabkura pared nib thabthabel ya ur motoyilgad ko thin rorad ni bod e yub. (Hebrews 13:9) Ma boch e girdi’ e dakur pared nib falfalan’ ni bochan e magawon u thilrad yugu boch e girdi’. Ma boch e Kristiano e kar wargad ni bochan e kayigi pag rogon ni yad be un ko fafel nge boch ban’en nib l’ag ko toffan. Ma boor e girdi’ e ke tomal lanin’rad ni bochan e pi magawon ni bay ko par ko re m’ag ney.

¹⁷ Rriyul’ ni dariy reb e pi magawon ney e taw ko gin ni ‘ngan li’dad riy ngad m’ad.’ Ma boch e magawon e sum ni bochan ni kad olobochgad ko ban’en ni kad turguyed ni ngad rin’ed. Machane urngin e pi magawon nem e ma skengnag e michan’ rodad. Aram fan ni susun ni ngad yiluyed owchedad ngak Jesus nge kanawo’ ni ke tay ni ke gum’an’. Ngad boded Jesus, ma dabda paged talin rogon fene fel’ e athap ni bay nga m’on rodad. Dabda paged i pagan’dad ni Jehovah e “ra tow’athnag e piin ni yad be gayiy Got.” (Hebrews 11:6) Ma aram ma rayog ni nge yib gelngin ngodad ni nguuda milgad ko fare sagreng ko yafas.

Rayog ni Ngad Gum’an’gad

18, 19. Mang boch ban’en ni buch ni be dag ni i fol e pi Kristiano ni Hebrew ko n’en ni yog Paul ni kan thagthagnag nga laniyan’?

¹⁸ Uw rogon u wan’ e pi Kristiano ni Jew e babyor rok Paul? Nel’ e duw u tomren ni kan yoloy fare babyor ngak piyu Hebrew ma bay e mahl u Judea. Nap’an e 66 C.E., me yib e pi salthaw nu Roma nga Jerusalem mar kirebnaged ma aram me lebug e pi thin ni yiiynag Jesus ni gaar: “Faanra mu guyed yu Jerusalem ni ke longobiy yu raba’ i salthaw, ma aram e kam nanged ndab ki n’uw nap’an min kirebnag.” (Luke 21:20) Machane ki yog Jesus e pi thin ney ni baara’ ni nge pi’ e athamgil nga laniyan’ e pi Kristiano ko ngiyal’ nem: “Ma aram e piin ni yad bay u lan yu Judea e thingara milgad nga daken e pi burey; ma piin ni yad bay u lan e binaw e thingar ra chuwgad riy, ma piin ni yad bay u wuru’ e binaw e thingar dab ranod nga lan binaw.” (Luke 21:21) Ere fare mahl ni tay yu Roma ngorad e bay e skeng riy: Ra chuw e pi Kristiano ni Jew u Jerusalem mar digeyed e tochuch ko liyor rorad nge tagil’ e tempel rorad nib gilbuguwan fa?

¹⁹ Ma rib tomgin ni chuw e pi salthaw nu Roma ma dariy be’ ni manang ko mang fan. Sana ke lemnag piyu Jew ni aram e mich riy ni be ayuweg Got e mach nib thothup rorad. Ma uw rogon e pi Kristiano? Rogon ni bay ko chep e ur milgad riy. Ma aram u nap’an e 70 C.E., me sul piyu Roma mar thanged Jerusalem ma boor ni boor e girdi’ ni kar m’ad. Fare “rran rok Jehovah” ni yiiynag Joel morngaagen e ke taw nga Jerusalem. Machane pi Kristiano nib yul’yul’ e dakur moyed u rom. Kar ‘pared nib fos.’​—Joel 2:30-32; Acts 2:16-21.

20. Ngan nang u wan’uy ni fa bin ni baga e “rran rok Jehovah” ni ke chugur e susun nge mithmithegdad ni uw rogon?

²⁰ Ngiyal’ ney ma gad manang ni ka bay reb e “rran rok Jehovah” ni baga’ ni ra yib nga daken e re m’ag ney ni polo’. (Joel 3:12-14) Dada nanged ko wuin ni ra taw ko re roran nem. Machane be micheg e Thin Rok Got ngodad ni mmutrug ni ra yib! Be gaar Jehovah ri dabi sowath. (Habakkuk 2:3; 2 Peter 3:9, 10) Ere nguuda “tedan’dad nib elmirin ko pi n’en ni kad rung’aged.” Nge siy i war e michan’ rodad, ni aram “denen ni ke m’agdad ni ke chichiiy pa’ rodad.” Nge mudugilan’dad riy ni ngad gum’an’gad n’umngin nap’an nib t’uf. Dab mu pag talin ni be mon’og iyan e karro rok Jehovah ni ma girngiy e os ni aram e ulung rok u tharmiy. Ra lebuguy e tin ni ke m’agan’ ngay. Ere nguuda milgad ma dabi chuwan’dad ko fare sagreng ko yafas!

Ka Ga Manang?

◻ Mang thin ni yog Paul ngak piyu Filippi ni ngad folgad riy ma ra ayuwegdad ni ngad athamgilgad ko fare sagreng ko yafas ni manemus?

◻ Mang e ra ayuwegdad ngad togopuluwgad ko pi n’en ni bay ko re fayleng ney ni ma waliydad?

◻ Uw rogon nrayog ni nge bagadad me ayuweg bagadad nguuda gum’an’gad ko fare sagreng?

◻ Mang boch ban’en ni rayog ni nge n’igin nge sagaal e Kristiano?

◻ Uw rogon nrayog ni nge ayuwegdad e kanawo’ ni tay Jesus ni ngad gum’an’gad?

[Sasing ko page 8, 9]

Thingari dabi pag e Kristiano e pi n’en ko re fayleng ney ni nge n’igin ndabki tiyan’ ko mil ko sagreng ko yafas

[Sasing ko page 10]

Dariy ban’en nrayog ni nge taleg e karro rok Jehovah ni ma girngiy e os ni nge lebuguy e tin ke m’agan’ ngay