Gur Bagayad Fa Piin Ni Yad Ba T’uf Rok Got?

En nra fel’ u wan’ e tin ni kug ta’ chilen ngomed me fol riy, e ereram e cha’ ni gub t’uf rok. Chitamag e ra t’ufeg e cha’ ni gub t’uf rok.”—JOHN 14:21.

1, 2. (a) Uw rogon ni i dag Jehovah e t’ufeg rok ngak e girdi’? (b) Mang e n’en ni ke tababnag Jesus ko rorran ni Nisan 14, 33 C.E. ni nep’?

BAT’Uf rok Jehovah e girdi’ ni i sunmeg. Riyul’, ni rib t’uf e girdi’ nu fayleng rok “ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dabkur m’ad, ya ke yog e yafas ndariy n’umngin nap’an ngorad.” (John 3:16) Chiney ni ke chuchugur ni nge taw nga nap’an ni ngan madenomnag fare Puguran ko yam’ ni tay Kristus, ma tin riyul’ e Kristiano e susun ngari tamilang u wan’rad ni gad ba t’uf rok Jehovah “me l’og fak nge yib, nu daken e nge n’ag Got fan e denen rodad riy.”—1 John 4:10.

² Rorran ni Nisan 14, 33 C.E. ni balayal, me Jesus nge fa 12 e apostal rok e ra muulunggad nga reb e singgil ni bay ko thal ni lang u Jerusalem ni ngara madenomnaged fare Palukaf, ni be puguran e ngiyal’ ni kan pag piyu Israel u Egypt. (Matthew 26:17-20) Tomren ni kan madenomnag e re n’ey ni aram e madenom rok piyu Jew, me yog Jesus ngak Judas Iskariot ni nge yan me tababnag e abich ko balayal ni ma puguran ban’en nra mang Puguran ko yam’ ni tay Kristus ni fan ko Kristiano.a Ke fanay e flowa ni dariy e is riy nge wain ni row ni be yip’ fan downgin nge rachaen, ma aram e Jesus nge fa 11 e apostal rok e ra ked e re ggan ney ni comunion u taabang. Urngin e thin ni be weliy e n’en ni ke rin’ u tomren ma Matthew nge Mark nge Luke ni ka nog Synoptic Gospel writers ngorad, nge Paul ni apostal ni ir e turguy ni nga nog fare “abich ni balayal’ rok Somol” ngay.—1 Korinth 11:20; Matthew 26:26-28; Mark 14:22-25; Luke 22:19, 20.

3. Mang boch e kanawo’ ni baga’ fan nib thil ko fapi thin ni ke yoloy John ni apostal u murung’agen e tin tomuren e awa ni chag Jesus ngak pi gachalpen u lan fare singgil ko thal ni lang?

³ N’en nib fel’ ni ngan lemnag, e de weliy John ni apostal murung’agen e tayim ni yibe wereg fare flowa nge wain, sana bochan e ngiyal’ ni ke yoloy e Gospel rok (sogonapan 98 C.E.), ma kari nang e piin Kristiano rogon ni ngara rin’ed e re n’em. (1 Korinth 11:23-26) Machane, kan thagthagnag ngak John, ma kemus ni ir e ke tamilangnag e thin ni ke yog Jesus u m’on nge tomren ni Ke tababnag fare Puguran ko yam’ ni tay. Pi thin ney ni ma pug e tafinay rok e girdi’ e gathi kab lich ko lal e guruy u Gospel ni yoloy John. Ri yad be tamilangnag ko mit i mang girdi’ e yad ba t’uf rok Got. Ngada yaliyed e John guruy ni 13 nge mada’ ko 17.

Mu Fil Ban’en ko T’ufeg ni Dag Jesus

4. (a) Uw rogon ni kari tamilangnag John fare kenggin e welthin rok Jesus’ u nap’an ni yad be muulung pi gachalpen ko ngiyal’ ni ke tababnag fare Puguran? (b) Mang reb i fan ni baga’ fan ni ba t’uf Jesus rok Jehovah?

⁴ T’ufeg e ir e kenggin e pi guruy ney nib lingagil ni bay e fonow riy ni ke pi’ Jesus ngak pi gachalpen u nap’an ni ke chuchugur ni nge chuw rorad. Riyul’, ni fare bugithin ni “t’ufeg” e kan tay ngay ni 31 yay mab thilthil kanawoen. T’ufeg rok Jesus nib gel ngak e Chitamangin ni Jehovah, nge ngak pi gachalpen e rib lingagil ko pi guruy ney. T’ufeg rok Jesus ngak Jehovah e kan dag ko urngin e thin ko Gospel ni be weliy murung’agen e yafas rok, machane kemus ni go’ John e ke yoloy ni ke yog Jesus nib tamilang ni gaar: “Ba t’uf rog e en ni Chitamangiy.” (John 14:31) Maku ke yog Jesus nib t’uf rok Jehovah me weliy ko mang fan. I yog ni gaar: “Gimed ba t’uf rog nri bod rogon ni gub t’uf rok e en ni Chitamangiy; ere mpired ni gimed ba t’uf rog. Faan gimed ra fol ko tin ni kug ning chilen ngomed, ma gimed ra par ni gimed ba t’uf rog, ni bod rogon ni kug fol ko tin ni ning e Chitamag chilen ngog gu be par ni ku gub t’uf rok.” (John 15:9, 10) Arrogon, ba t’uf fak Jehovah rok ya bochan e ri ma fol rok. N’en ni nrib fel’ ni ke fil ngak urngin e pi gachalpen Jesus Kristus!

5. Uw rogon ni dag Jesus nib t’uf pi gachalpen rok?

⁵ T’ufeg rok Jesus ngak pi gachalpen nib gel e kan weliy nib tamilang ko bin som’mon e thin ni ke yoloy John u murung’agen e yay ntomur ni ke mada’nag Jesus fapi apostal. I weliy John ni gaar: “Chirofen ney e eram e rofen ni bay nga m’on ko madenom ni Paluk’af. Ma manang Jesus ni ke taw nga nap’an ni nge chuw ko re fayleng ney nge yan ngak e en ni Chitamangiy. Gubin ngiyal’ ni yugu ma par ni yad ba t’uf rok ya yad e tirok e girdi’ u fayleng, ma yigi i par ni yad ba t’uf rok nge yan i mada’ ko tomur.” (John 13:1) Re rran nem ni balayal’, me fil ban’en ngorad ni dabra paged talin ni ngan pigpig ngak yugu boch e girdi’ u fithik’ e t’ufeg. I luknag ayrad. Aram e n’en ni susun yad gubin ni ngar adaged ni ngara rin’ed ngak Jesus nge ngak pi walagrad, machane dar rin’ed. I rin’ Jesus e re maruwel n’ey nib sobut’ ngemu’ me yog ngak pi gachalpen ni gaar: “I gag e Somol romed nge Tamachib romed, ma ka fini gu mu’ i luknag e rifrif u aymed. Ere nge bigimed mi i luknag e rifrif u ay bigimed. Ya kug dag ngomed e n’en ni nguum rin’ed ngomed, ya nge yog ni mrin’ed nri bod rogon e n’en ni ka fini gu rin’ ngomed.” (John 13:14, 15) Tin riyul’ e Kristiano e susun ni nge adag ma ra falfalan’ ni ngara pigpiggad ngak e pi walagrad.—Matthew 20:26, 27, footnote; John 13:17.

Mu Fol ko fare Motochiyel nib Biech

6, 7. (a) Mang e n’en nib ga’ fan ni ke weliy John nib m’ag ko tin ni kan rin’ ko ngiyal’ ni kan tababnag fare Puguran? (b) Mang motochiyel nib biech e ke pi’ Jesus ngak pi gachalpen, ma mang e n’en nib biech riy?

⁶ Thin ni ke weliy John murung’agen e n’en ni ke buch u lan ba singgil ko thal ni lang ko rorran ni Nisan 14 e ke mus nrib tamilang ni be weliy murung’agen Judas Iskariot ni ke chuw rorad. (John 13:21-30) Yira puluwnag e thin ko fare Gospel ma be dag ni ke mus ni tomren ni ke chuw e cha’ ney ni ir e ke yognag Jesus ma fini tababnag fare Puguran ko yam’ ni tay. Ngemu’ ma aram me non ko pi apostal rok, me fonownagrad me yog boch e thin ni nga ur rin’ed. Ngiyal’ ni ngada fal’eged rogodad ni ngada uned ko fare Puguran, ma susun ni nge fel’ u wan’dad e thin ni ke yog Jesus ko ngiyal’ i n’em, ma baga’ ni bochan e mmutrug ni gad baadag ni ngad manged boch e girdi’ ni yad ba t’uf rok Got.

⁷ Fa bin m’on e thin ni ke yog Jesus ngak pi gachalpen ni ngara rin’ed u tomren ni kan ta’ fare Puguran ko yam’ ni tay e ban’en nib beech. I yog ni gaar: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed, ma urngin e girdi’ ni yad ra nang ni gimed pi gachalpeg.” (John 13:34, 35) Mang e tin nib beech ko re motochiyel ney? Nap’an ni ke n’uw boch e nep’, me tamilangnag boch ban’en ni gaar: “Baaray e n’en ni nggu ning chilen ngomed: nge bigimed me t’uf bigimed rok, ni bod rogon ni gimed ba t’uf rog. Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 15:12, 13) Fare Motochiyel ni kan pi’ ngak Moses e ke ning chilen ngak piyu Israel ni ‘nge par nib t’uf yugu boch e girdi’ rok ni bod ir nib t’uf ir rok.’ (Leviticus 19:18) Machane motochiyel rok Jesus e gathi kemus ni aram rogon. Piin Kristiano e susun ni nge t’uf yug boch e girdi’ rorad ni bod ni yad ba t’uf rok Kristus, ma nge magan’rad ngay ni ngara pied e yafas rorad ni fan ko pi walagrad.

8. (a) Mang e n’en nib l’ag ko t’ufeg ni yima pag fay? (b) Uw rogon ni Pi Mich rok Jehovah ko ngiyal’ ney e yad ma dag e t’ufeg ni yima pag fay?

⁸ Nap’an e Pugaran ma aram e tayim nib puluw ni ngada yaliyed gadad, ni ta’ta’ be’ nge reb e ulung ni polo’, ni fan ni ngan nang ko riyul’ ni bay rodad e re pow ney ko tin riyul’ e Kristiano​—ni aram e t’ufeg ni bod rogon ni dag Kristus. Re t’ufeg ney ni yima pag fay e rayog ni nge yip’ fan, yu ngiyal’ ni ri aram fan, nra pag reb e Kristiano fan nge magawon e yafas rok ya dubun ni nge yognag pi walagen. Machane, baga’ ni re n’ey e ba l’ag ko tin ni baaray ni mom rok be’ ni nge pag e tirok ban’en ni fan ni nge ayuweg nge pigpig ko pi walagdad nge yugu boch e girdi’. Kari dag Paul ni apostal e ngongol ni aram rogon. (2 Korinth 12:15; Filippi 2:17) Pi Mich rok Jehovah u ga’ngin yang u fayleng e yima nangrad ni yad ma pag farad, ni fan ni ngar ayuweged pi walagrad nge piin buguli yoror rorad ma yad ma fanay e yafas rorad ni ngara wereged e thin riyul’ u Bible ngak yugu boch e girdi’.b—Galatians 6:10.

Ngan Chaariy e Tha’ u Thiliy

9. Rogon ni nge par nib fel’ thildad Got nge Fak, mang e n’en ni gad ba falfalan’ ngay ni ngada rin’ed?

⁹ Dariy ban’en ni kab tolang puluwon ko tin ni baaray ni gad ba t’uf rok Jehovah nge Kristus Jesus ni Fak. Machane thingarda rin’ed ban’en ma aram e rayog ngodad ma rayog ni ngada thamiyed e re t’ufeg ney. Re nep’ nem ni tomur ni nge chag Jesus ngak pi gachalpen, i yog ngorad ni gaar: “En nra fel’ u wan’ e tin ni kug ta’ chilen ngomed me fol riy, e ereram e cha’ ni gub t’uf rok. Chitamag e ra t’ufeg e cha’ ni gub t’uf rok; maku er rogog ni ra t’uf rog mu gguy rogon nge nangeg.” (John 14:21) Bochan ni gad ma chaariy e tha’ u thildad Got nge Fak, ma aram e gad be fol ko motochiyel rok u fithik’ e t’ufeg. Ma ba muun ngay fare motochiyel nib biech ni ngan dag e t’ufeg ni yima pag fay maku aram fare motochiyel ni ke pi’ Kristus u tomren ni kan faseg ko yam’ ni ngan “wereg e machib ngak e girdi’ ma ngan weliy ban’en nib fel’ rogon,” ma ngan athamgil ni ngan pingeg e girdi’ ngar manged “pi gachalpen” u fithik’ e piin ni kara adaged fare thin nib fel’.—Acts 10:42; Matthew 28:19, 20.

10. Mang e tha’ u thiliy nib ga’ fan ni kan bing ni fan ko piin ni kan dugliyrad nge “yugu boch e saf”?

¹⁰ Me ta’boch ko re nep’ nem, ni ke fulweg Jesus reb e deer ni ke fith Judas (Thaddaeus) ngak ni ir reb e apostal nib yul’yul’, me yog ni gaar: “En ni gub t’uf rok e ra fol ko thin rog ma ra t’uf rok e Chitamag, ma gad ra yib ngak ngada pared rok.” (John 14:22, 23) Mus ko ngiyal’ ni ka immoy u fayleng, ma Kristiano ni kan dugliyrad, e kan piningrad ni ngar uned ngak Kristus ko gagiyeg u tharmiy, maku ra fel’ thilrad Jehovah nge Fak. (John 15:15; 16:27; 17:22; Hebrews 3:1; 1 John 3:2, 24) Machane fare “yugu boch e saf” nib chag ngorad, ni athap rorad e yad ra par u fayleng ndariy n’umngin nap’an, e ku ba fel’ thilrad e “ta chugul saf” rorad i Jesus Kristus, nge Jehovah ni Got rorad, nfaan yad ra par nib yul’yul’.—John 10:16; Psalm 15:1-5; 25:14.

“Gathi Gimed Bang ko Fayleng”

11. Mang thin ni ma k’aring e kireban’ ni ke yog Jesus ngak pi gachalpen?

¹¹ Nap’an e yay ntomur e mada’rorad pi gachalpen nib yul’yul’ u m’on ni nge yim’, me yog reb e thin ngorad ni ra k’aringrad ngar lemnaged ban’en ni gaar: Faanra ba t’uf be’ rok Got, ma ra fanenikay e girdi’ nu fayleng faanem. I yog ni gaar: “Faanra fanenikaymed e girdi’ nu fayleng, ma thingar mu nanged ni gag e som’mon ni ar fanenikayed gag. Ya faan manga mmil famed ngak e girdi’ nu fayleng, me ere gimed ra t’uf rok e girdi’ nu fayleng, ya kam manged girdi’rad. Machane kug mel’egmed u fithik’ e girdi’ nu fayleng, ni gathi ki gimed boch i yad; ereray fan ni ke fanenikaymed e girdi’ nu fayleng. Mu ted fanmed i yan ko n’en ni ku gog ngomed; Dariy reb e sib ni ka baga’ ngak e masta rok. Faanra kar gafgowniged gag, ma bay kur gafgowniged gimed; ma faanra kar folgad ko thin rog, ma bay kur folgad ko thin romed.”—John 15:18-20.

12. (a) Mang fan ni ke yog Jesus ngak pi gachalpen u m’on nra fanenikayrad e girdi’ nu fayleng? (b) Mang e tin nib fel’ ni nge lemnag urngin e girdi’ e chiney ni be chuchugur i yan ko fare Puguran?

¹² I yog Jesus ngorad ni aram rogon ya nge dabi mulan’ fa 11 i apostal nge urngin e girdi’ ni bayi fini mang Kristiano ni riyul’ u tomren ma dabra talgad ni bochan e fanenikan ni ma ta’ e fayleng ngorad. Miki ulul ngay ni gaar: “Ku gog ngomed e re bugithin ney ni bochan e nge dabmu thaygad ko michan’ romed. Bay rogned ndab kum uned ko muulung u tafen e muulung rorad. Ma bayi taw nga ba ngiyal’ ni en nra thang e fan romed e bayi finey nra rin’ ni aram rogon ma aram e be pigpig ngak Got. Bay rrin’ed e pi n’ey ngomed ya dawor ra nanged e en ni Chitamangiy ara gag.” (John 16:1-3) Reb e dictionary ko Bible e be weliy ni fare thin u roy ni “thaygad” ni be yip’ fan e “nge k’aring e girdi’ ni nge dabki pagan’ ngak be’ min pag e en ni susun ni nge pagan’uy ngak min fol rok; ma nge k’aring ni nge war laniyan’.” Nap’an ni be chuchugur iyan ni ngan madenomnag fare Puguran, ma urngin e girdi’ e thingara fal’eged i lemnag e tin ni ke rin’ e piin nib yul’yul’, kakrom nge chiney nguun folwok rorad u rogon ni ra pired ni yad ba mudugil ko ngiyal’ ni yib e skeng ngorad. Dabmu pag e togopuluw nge gafgow nge k’aringem ni ngam pag Jehovah nge Jesus, machane ngam duguliy ni ngam pagan’um ma ngam fol rorow.

13. Nap’an e meybil rok Jesus ngak e Chitamangin ma mang e i ning Jesus ni fan ngak pi gachalpen?

¹³ Nap’an e meybil ni ta’ Jesus u m’on ni nge chuw ko fare singgil ni bay ko thal ni lang u Jerusalem, me yog Jesus ngak e Chitamangin ni gaar: “Ku gog ngorad e thin rom ni mpi’ ngog ma ke fanenikayrad e girdi’ nu fayleng, ya gathi yad bang ko fayleng, ni bod gag ni gathi gag bang ko fayleng. Ma gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok Faanem nib Kireb. Gathi yad bang ko fayleng ni bod gag ni gathi ni gathi gag bang ko fayleng fayleng.” (John 17:14-16, New World Translation) Rayog ni nge mudugil lanindad ni ra matanagiy Jehovah e piin ni ba t’uf rok, ma ra pi’ gelngirad ya yad be par nib dar ko fayleng.—Isaiah 40:29-31.

Ngan Par ni Yib T’uf rok e Chitamangiy nge Fak

14, 15. (a) I taarebnag Jesus ir ko mang, ni de taareb rogon ko ‘kenggin e grapes ni ke wod’? (b) Mini’ “fapi papangin” “fare kenggin e grapes nib riyul’”?

¹⁴ Nap’an ni be sabethin Jesus nge fapi gachalpen nib yul’yul’ ko re nep’ nem ni Nisan 14, i taarebnag Jesus ir ko “kenggin e bin riyul’ e grapes,” nib thil ko ‘grapes ni ke wod’ ni eram piyu Israel ni de yul’yul’. I yog ni gaar: “I gag e bin riyul’ i kenggin e grapes, ma Chitamag e ir e be ayuweg e woldug ni grapes.” (John 15:1) U m’on ko pi chibog nem, me yoloy Jeremiah ni profet e thin rok Jehovah ngak e girdi’ rok ni dar yulyul’gad ngak ni gaar: “Gu yungem ni bod rogon ba ke grapes nrib fel’ nni mel’eg . . . Machane a mu sap ko n’en ni kam rin’. Kam bod ba ke grapes nu bang ni ke wod ni gathi ku fiig?” (Jeremiah 2:21, NW) Me yoloy Hosea ni profet ni gaar: “Nam nu Israel e ke mang kenggin e grapes ni ke wod. Ma pi’ woomngin ni fan ngak. . . . Ya gum’ercharad e be dake moding.”—Hosea 10:1, 2.

¹⁵ De yog rok fare nam nu Israel ni nge yib woomngin ni fan ko liyor nib riyul’, ya ke pag e liyor nib riyul’ ma ke yognag e woomngin ni fan ngak. Dalip e rran u m’on ko fare mada’ rok Jesus nge pi gachalpen nib yul’yul’, me yog Jesus ngak e pi tayugang nu Jew ni yad be dake moding ni gaar: “Ere nggog ngomed ni gagiyeg rok Got e bay ni chuweg romed ngan pi’ ngak girdien reb e nam ni yad e bay yib woomngirad nib fel’.” (Matthew 21:43) Re nam nem nib biech e eram “fare Israel rok Got,” ni fare 144,000 i Kristiano ni kan dugliyrad, ni kan susunnagrad ko “papangin” “fare kenggin e grapes nib riyul’,” ni Kristus Jesus.—Galatia 6:16; John 15:5; Revelation 14:1, 3.

16. Mang e i ta’ Jesus chilen ngak fa 11 e apostal rok nib yul’yul’ ni ngara rin’ed, ma mang e n’en ni rayog ni ngan nog u murung’agen e piin kan dugliyrad nib yul’yul’ ni ka yad ba’ ko ngiyal’ ney ko tomur?

¹⁶ I yog Jesus ngak fa 11 e apostal ni ur moyed u lan e re singgil nem ko thal ni lang ni gaar: “Urngin i pa’ngig nder k’uf e ma th’ab, ma ma tamilangnag owchen urngin i pa’ngig ni be yib wom’ngin, ni fan e nge tamilang owchen nge yib wom’ngin ni pire’. Mpired ni gimed ba peth ngog, mu gu par ni gub peth ngomed. Faanra dab mpired ni gimed ba peth ngog ma dabiyog ni nge yib wom’ngimed, ni bod rogon pa’ngin e grapes ndabiyog ni nge yib wom’engin ni faanra dabi par nib peth nga kenggin.” (John 15:2, 4) Tin ni ke buch ko girdien Jehovah e be dag ni tin ni ka ba’ ko piin Kristiano ni kan dugliyrad nib yul’yul’ e kar pared nib peth ko en ni Lolugrad, ni Kristus Jesus. (Efesus 5:23) Kar paged ni ngan biechnagrad min fabuguyrad. (Malaki 3:2, 3) Ka nap’an 1919, ma kara pied fare wom’engin Gil’ilungun nib yoor, ni som’mon e ngak yugu boch e Kristiano ni kan dugliyrad, ma nap’an e 1935, ma fare “ulung ni baga’” e ke chag ngorad.—Revelation 7:9; Isaiah 60:4, 8-11.

17, 18. (a) Mang thin rok Jesus e ke ayuweg e piin ni kan dugliyrad nge fare yugu boch e saf ni ngar pared ni yad ba t’uf rok Jehovah? (b) Uw rogon ni gad ra un ko Puguran ma ra ayuwegdad?

¹⁷ Urngin e piin Kristiano ni kan dugliyrad nge piin nib chag ngorad e ba m’ag fare thin rok Jesus rorad ni gaar: “Ara rogon min ta’ fan e en ni Chitamangiy ni faan ra yib wom’engimed ni pire’; ara’ kanawoen mi gimed mang pi gachalpeg. Gimed ba t’uf rog nri bod rogon ni gub t’uf rok e en Chitamangiy; ere mpired ni gimed ba t’uf rog. Faan gimed ra fol ko tin ni kug ning chilen ngomed, ma gimed ra par ni gimed ba t’uf rog, ni bod rogon ni kug fol ko tin ni ning e Chitamag chilen ngog gu be par ni ku gub t’uf rok.”—John 15:8-10.

¹⁸ Gad gubin ma gad baadag ni nge par ni gad ba t’uf rok Got, ma ereray e n’en ni be k’aringdad ngad manged Kristiano ni keb wom’engidad. Tin ni gad ma rin’ e gad ma athamgil ni ngada machibnaged fare ”thin nib fel’ ko gil’ilungun” u urngin yay nra mab e kanawo’. (Matthew 24:14) Maku ri gad be athamgil ni ngada daged “fapi wom’engin fare kan ni thothup” ko yafas rodad. (Galatia 5:22, 23) Yira un ko fare Puguran ko yam’ ni tay Kristus ma ra gelnagdad ni ngada rin’ed e re n’ey, ya yira puguran ngodad rogon feni gel e t’ufeg rok Got nge Kristus ngodad.—2 Korinth 5:14, 15.

19. Mang e ka ba’ ni ra ayuwegey ni yira weliy ko bin migid e article?

¹⁹ Tomren ni ke tababnag Jesus fare Puguran, me micheg ngak pi gachalpen ni yad ba yul’yul’ ni bayi l’og e Chitamangin reb e “taayuw, ni fare kan ni thothup.” (John 14:26) Uw rogon ni fare kan ni thothup e be ayuweg e piin ni kan dugliyrad nge fare yugu boch e saf ni ngar pared ni yad ba t’uf rok Jehovah e yira fal’eg i yaliy ko bin migid e article.

[Footnotes]

Boch e Deer ni Ngan Sul nga Daken

• Mang e ke fil Jesus ngak pi gachalpen rogon ni ngan pigpig u fithik’ e t’ufeg?

• Nap’an e Puguran ma mang e ba puluw ni nge yaliy be’ ir riy?

• Mangfan ni susun dabi war lanin’dad ko thin ni ke yog Jesus u murung’agen e fanenikan nge gafgow ni ra yib ngodad girdi’ nu fayleng?

• Mini’ “fare kenggin e grapes nib riyul’”? Mini’ “fapi papangin,” ma mang e yibe sonnag ni ngara rin’ed?

[Picture on page 21]

Ke pi’ Jesus ngak e pi apostal rok ban’en ni dabni pagtalin ni ngan pigpig u fithik’ e t’ufeg

[Pictures on page 22, 23]

Pi gachalpen Kristus e kara folgad ko motochiyel ni ngara daged e t’ufeg ni yima pag fay