N’en Nrayog ni Ngad Filed rok “Facha’ ni Gachalpen Jesus nib T’uf Rok”

1. Uw rogon u wan’um e t’ufeg rok Got?

I YOLOY apostal John ni gaar: “Got e t’ufeg.” (1 John 4:16) Gad manang ni Got e ir enggin gubin e yafos, machane pi thin ney e be puguran ngodad ni ir e ke yib e t’ufeg rok. Ri gad ba t’uf rok Jehovah! Ma t’ufeg rok e ma pi’ e pagan’ ngodad, ma ma yibnag e felfelan’ ngodad, ma ma gamaneg e tin nib t’uf rodad.

2. Mang e gal nth’abi ga’ e motochiyel nrogon ni bay ko Matthew 22:37-40? Mang fan nib mo’maw’ ngodad ni ngad folgad ko bin migid ko gal motochiyel nem?

² Dabiyog ni nga i dugliy e piin Kristiano ko ngar daged e t’ufeg fa danga’, ya re n’ey e ban’en nni tay chilen ngorad ni ngar rin’ed. (Mu beeg e Matthew 22:37-40.) Nap’an ni gad ra nang Jehovah nib fel’ rogon, ma sana ra mom ngodad ni ngad folgad ko bin som’on ko gal motochiyel ney. Re n’ey e bochan ni Jehovah e ba flont, ma ma lemnagdad, ma kub gol ngodad. Machane rayog ni nge mo’maw’ ngodad ni ngad folgad ko fa bin migid e motochiyel. Mang fan? Bochan ni pi walagdad u lan e ulung ni aram e piin yad mmigid ngodad nrib chugur thildad e dawor ra flontgad. Ere yu ngiyal’ e rayog ni nga rogned ara rrin’ed boch ban’en ngodad nder m’ug riy ni yad be lemnagdad, ara yad be dag e t’ufeg ngodad. Manang Jehovah nra mo’maw’ ngodad ni ngad folgad ko re motochiyel ney, ere aram fan ni fanay boch e girdi’ nra yoloyed e Bible ni ngar filed ngodad fan ni nge bagadad me dag e t’ufeg ngak bagadad, nge rogon ni ngad rin’ed e re n’ey. Bagayad e pi girdi’ ney e aram John.​—1 John 3:11, 12.

3. Mang e tamilangnag John murung’agen?

³ Ri tamilangnag John u lan fapi babyor ni yoloy ni piin Kristiano e thingar ra daged e t’ufeg. Bin riyul’ riy e, bin baaram e babyor ko Bible ni yoloy ni be weliy murung’agen e yafos rok Jesus e boor yay ni fanay fapi thin riy ni “t’ufeg” nge “ba t’uf” nga rogon nni fanay u lan e tin baaram e babyor ni yoloy Matthew, nge Mark, nge Luke. Nap’an ni yoloy John fare Gospel rok, nge fa dalip yang i babyor ni yoloy ma ke gaman sogonap’an raay e duw rok. Pi babyor nem u Bible ni yoloy e be fil ngodad nthingar da rin’ed urngin ban’en u fithik’ e t’ufeg. (1 John 4:10, 11) Machane ba n’uw nap’an ni fil John rogon ni nge rin’ e re n’ey.

4. Gubin ngiyal’ ni i dag John e t’ufeg ko girdi’, fa?

⁴ Nap’an ni kab pagel John ma gathi gubin ngiyal’ ni i dag e t’ufeg. Bod ni bay ba ngiyal’ ni milekag Jesus nge pi gachalpen nga Jerusalem ni yad be yan u lan yu Samaria. Ma nap’an nra tawgad nga bochi binaw nib achig ni bay u lan yu Samaria ma de gol e girdi’ riy ngorad. Ere mang e rin’ John? Ra fithew James ni walagen ngak Jesus ko baadag ni ngar piningew e nifiy nge yib u tharmiy nga but’ nge li’ e girdi’ ni be par ko re binaw nem, fa danga’! (Luke 9:52-56) Ku bay bayay nde dag John e t’ufeg ngak e pi apostal. Rognew James ni walagen ngak e chitiningrow ni nge yan i yog ngak Jesus ni nge pi’ reb e liw ngorow nib ga’ fan u nap’an nra mang Pilung u Gil’ilungun Got. Nap’an ni nang e pi apostal e n’en ke rin’ James nge John, mi yad damumuw! (Matt. 20:20, 21, 24) Machane yugu aram rogon ni i rin’ John e pi oloboch ney, miki par nib t’uf rok Jesus.​—John 21:7.

5. Mang e gad ra weliy ko re article ney?

⁵ Gad ra weliy u lan e re article ney e pi n’en ni i rin’ John nrayog ni ngad folwokgad riy, nge boch ban’en ni i yoloy u murung’agen e t’ufeg. Gad ra rin’, ma aram e gad ra fil rogon nrayog ni ngad daged e t’ufeg ngak pi walagdad. Ku gad ra fil reb e kanawo’ nib ga’ fan nrayog ni nge dag reb i lolugen e tabinaw riy e t’ufeg ngak chon e tabinaw rok.

ROGON NI NGAN DAG E T’UFEG

6. Mang e ke rin’ Jehovah ni nge dag ni gad ba t’uf rok?

⁶ Rayog ni ngad lemnaged ni faanra ngad t’ufeged e girdi’, ma kemus ni ngar fel’gad u wan’dad ara nga u dogned boch ban’en nib fel’ u murung’agrad. Machane faanra riyul’ ni yad ba t’uf rodad, mab t’uf ni ngad daged e re n’ey u daken e ngongol rodad. (Mu taarebrogonnag ko James 2:17, 26.) Bod ni gad ba t’uf rok Jehovah. (1 John 4:19) Ma yog e re n’ey ngodad u daken e thin rok u Bible. (Ps. 25:10; Rom. 8:38, 39) Machane gathi kemus ni gad manang ni gad ba t’uf rok Got ni bochan e n’en ma yog, ya ku ma dag ngodad u daken e ngongol rok. I yoloy John ni gaar: “Baaray rogon ni dag Got ni gadad ba t’uf rok: i l’og Fak ni kari maagirag rok ngaray nga fayleng ni fan e nge yog e yafos ngodad u daken.” (1 John 4:9) I pag Jehovah Fak nrib t’uf rok ni nge gafgow me yim’ ni fan ngodad. (John 3:16) Ere rib mich u wan’dad ni gad ba t’uf rok Jehovah.

7. Mang e ke rin’ Jesus ni nge micheg ni gad ba t’uf rok?

⁷ I micheg Jesus ngak pi gachalpen ni yad ba t’uf rok. (John 13:1; 15:15) Gathi kemus ni micheg ngorad nge gadad ni gad ba t’uf rok u daken e thin ni ma yog, ya kki dag u daken e ngongol rok. I gaar Jesus: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 15:13) Gad ra lemnag e n’en ke rin’ Jehovah nge Jesus ni fan ngodad, ma mang e gad ra adag ni ngad rin’ed?

8. Mang e be yog e 1 John 3:18 nsusun e ngad rin’ed?

⁸ Rayog ni ngad daged nib t’uf Jehovah nge Jesus rodad ni faan gad ra fol rorow. (John 14:15; 1 John 5:3) I tay Jesus chilen ngodad ni nge bagadad me t’ufeg bagadad. (John 13:34, 35) Gathi kemus ni ngad daged ngak pi walagdad ni yad ba t’uf rodad u daken e thin ni gad ma yog ngorad, ya ngkud daged e re n’ey u daken e ngongol rodad. (Mu beeg e 1 John 3:18.) Mang boch ban’en nrayog ni ngad rin’ed ni ngad daged ni yad ba t’uf rodad?

NGAM T’UFEG PI WALAGEM

9. Mang e rin’ John ni bochan e bay e t’ufeg rok?

⁹ Rayog ni nge par John ko chitamangin me ulul ni nga i yognag e salpiy ni aram e nga i un ngak ko fita’ ngaur piew nchuway’. Machane i fanay e yafos rok ni nge ayuweg e girdi’ ni ngar nanged murung’agen Jehovah nge Jesus. De mom e binem e par ni mel’eg John. Un gafgownag, ma nap’an ni chugur nga tungun e bin som’on e chibog u nap’an ni ke pilibthir, ma aram min kalbusnag. (Acts 3:1; 4:1-3; 5:18; Rev. 1:9) Nap’an ni immoy u kalbus ni bochan e be machibnag murung’agen Jesus, miki dag ni kub t’uf e girdi’ rok. Bod nnap’an ni bay ko fare donguch nu Patmos, me yoloy fare babyor ni Revelation nge pi’ ko pi ulung e ngiyal’ nem ya ngar nanged ko mang e n’en “nthingari m’ug ndab ki n’uw nap’an.” (Rev. 1:1) Rayog nu tomuren nni pag u kalbus ko fare donguch nu Patmos, me yoloy fare Gospel rok ni murung’agen e pi n’en ni i rin’ Jesus nge machib ni i tay. Ki yoloy dalip yang i babyor ni nge pi’ e athamgil nge gel nga laniyan’ e pi walag. Uw rogon nrayog ni ngam folwok rok John u rogon ni i pag fan ir u boch ban’en?

10. Uw rogon ni ngam micheg nib t’uf e girdi’ rom?

¹⁰ Rayog ni ngam micheg nib t’uf e girdi’ rom u daken e n’en ga ra mel’eg ni ngam rin’ ko yafos rom. Fayleng rok Satan e baadag ni ngam fanay e tayim rom nge gelngim ni ngam rin’ boch ban’en ni kemus ni yigoo gur e fan ngom, ara ngam guy rogon ni nge yoor e salpiy rom, ara nge gilbuguwam. Machane pi Kristiano u ga’ngin yang e fayleng e yad ma fanay e tayim rorad ni ngar machibnaged fare thin nib fel’, ma yad be ayuweg e girdi’ ni ngar chugurgad ngak Jehovah. Boch i yad e be yag ni nge machib miki fil e Bible ko girdi’ u polo’ e tayim rok.

11. Uw rogon ni ma micheg e pi Kristiano ni yad ba yul’yul’ nib t’uf Jehovah nge pi walag rorad?

¹¹ Boor e Kristiano ni yad ba yul’yul’ nthingar ra maruwelgad u polo’ e tayim rorad ni nge yag e salpiy ngorad ni ngar yognaged e tin nib t’uf rorad nge chon e tabinaw rorad. Machane ka yad be ulul i ayuweg e ulung rok Got u fithik’ e yul’yul’ u rogon kanawoen nrayog rorad. Bod ni bay boch i yad ni ke yag ni nge pi’ e ayuw ni fan ngak e piin kar gafgowgad u tan e yoko’, ara durru’, ara boch ban’en ni ma yib ni yima gafgow riy. Maku boch i yad e be un i toy boch e naun ni fan ko liyor rodad, ma gad gubin nrayog ni ngad pied e salpiy ni ayuw ni fan ko fare maruwel ni machib u ga’ngin yang e fayleng. Pi cha’ney e yad ma rin’ e pi n’ey ni bochan e ba t’uf Got nge girdi’ rorad. Gubin e wik ni ku gad ma micheg nib t’uf pi walagdad rodad ni aram e gad ma un ko muulung, nge pi n’en yibe rin’ riy. Yugu aram rogon nsana ke aw parowdad, machane ku gad ma un ko pi muulung ney. Ma yugu aram rogon ni gad be rus, machane ku gad ma pi’ e fulweg u nap’an e muulung. Ku gad ma pi’ e athamgil nga laniyan’ e pi walag u m’on ngu tomuren e muulung ni yugu aram rogon nra bagadad ma ka bay e tirok e magawon. (Heb. 10:24, 25) Ri gad be pining e magar ko pi maruwel ney ni ma rin’ pi walagdad ni yad ba t’uf rodad!

12. Ku mang reb e kanawo’ ni ki micheg John nib t’uf pi walagen rok?

¹² Ki micheg John nib t’uf pi walagen rok ni aram e gathi kemus ni i yog fel’ngin e pi n’en ur rin’ed, ya ku i fonownagrad. Bod nu lan fa yu yang i babyor ni yoloy e pining e magar riy ngak e pi walag ko michan’ rorad nge maruwel nib manigil ni yad be rin’. Machane ki pi’ boch e fonow nib ga’ fan ngorad u murung’agen e denen. (1 John 1:8–2:1, 13, 14) Ere ku arrogodad nib t’uf ni ngaud pininged e magar ko pi walag ko pi n’en nib manigil ni yad be rin’. Machane faanra be m’ug ni ke tabab be’ ni nga i lemnag boch ban’en nib kireb, ara be rin’ ban’en nrayog ni nge kirebnag e tha’ u thilrow Jehovah, ma rayog ni ngad daged e t’ufeg ngak ni aram e nga dogned ngak e n’en nib t’uf ni nge nang u fithik’ e sumunguy. De mom ni ngad fonownaged reb e fager rodad, machane be yog e Bible ni tin riyul’ e fager e yad ma fonownaged yad.​—Prov. 27:17.

13. Mang e susun ndab da rin’ed?

¹³ Yu ngiyal’ e ku rayog ni nge m’ug nib t’uf pi walagdad rodad ni faan gad ra siyeg ndab da rin’ed boch ban’en ngorad. Bod ndab da gurgad ngad damumuwgad nga ban’en ni ka rogned. Am lemnag e n’en ni buch u nap’an ni ke chugur nga tungun e yafos rok Jesus u fayleng. I yog ngak pi gachalpen ni faanra nge yag e yafos ngorad, ma thingar ra ked e ufin rok mar unumed rachaen. (John 6:53-57) Boor i gachalpen e ra dabuyed e re thin nem ni yog Jesus, ere boor i yad e ra digeyed nda kur leked. Machane tin riyul’ e fager rok Jesus ni bod John e dar digeyed. Dar nanged fan e re thin nem ni yog Jesus, maku rayog ni kar gingad ngay. Machane dar lemnaged nib kireb e n’en ke yog, maku dar gurgad ngar damumuwgad ngak. Yab pagan’rad ngak Jesus ni bochan e yad manang ni be weliy e tin riyul’. (John 6:60, 66-69) Rib ga’ fan ni nge dab da gurgad ngad damumuwgad ko n’en ke yog reb e fager rodad! Ya ngad paged ni nge weliy fan e n’en ke yog.​—Prov. 14:29; 18:13.

14. Mang fan nsusun e dab ud fanenikayed pi walagdad?

¹⁴ Ki fonownagdad John ndab ud fanenikayed pi walagdad. Faanra dab da folgad ko re fonow ney, ma aram e kad binged e kanawo’ ngak Satan ni nge waliydad ko kireb. (1 John 2:11; 3:15) Re n’ey e buch rok boch e girdi’ u tungun e bin som’on e chibog C.E. I guy Satan rogon ni nge rin’ urngin ban’en nrayog rok ni nge k’aring e girdi’ rok Got ni nge bagayad me fanenikay bagayad, mu kur yu raba’gad. Nap’an ni yoloy John fa yungi babyor rok nge pi’ ko pi ulung e ngiyal’ nem, ma bay boch e girdi’ ni yad be guy rogon ni ngar rin’ed e n’en be rin’ Satan ni kar manged bang ko ulung. Bod ni Diotrefes e i guy rogon ni nge yu raba’nag e girdi’ u lan e ulung. (3 John 9, 10) I darifannag e piin ur lekaged e ulung ni yad owchen fare ulung ni ma pow’iyey e ngiyal’ nem. Ki guy rogon ni nge chuweg e piin yad ba gol ko girdi’ u lan e ulung ndabun dakenrad. Rib kireb e re n’ey ni rin’! Ngiyal’ ney e ku be guy Satan rogon ni nge yu raba’nag e girdi’ rok Got, ya nge dab kur ayuweged yad. Ere thingar dab da paged e fanenikan ni nge yu raba’nagdad.

NGAM T’UFEG CHON E TABINAW ROM

15. Mang e thingar dabi pagtalin be’ ni lolugen e tabinaw?

¹⁵ Reb e kanawo’ nib ga’ fan ni nge micheg be’ ni lolugen e tabinaw riy ni ma t’ufeg chon e tabinaw rok e aram e nga i pi’ e tin nib t’uf ko par rorad. (1 Tim. 5:8) Machane ku dabi pagtalin nri kub ga’ fan ni nge ayuweg chon e tabinaw rok ni nge par nib fel’ e tha’ u thilrad Jehovah. (Matt. 5:3) Am tay fanam i yan ko n’en nib manigil ni rin’ Jesus nrayog ni nge folwok e piin lolugen e tabinaw riy. Fare babyor rok John e be tamilangnag ni mus nga nap’an ni be n’en ni nge yim’ Jesus u daken fare ley i gek’iy, ma ka be lemnag chon e tabinaw rok. Immoy John nib sak’iy u tooben Maria ni chitiningin Jesus ko gin baaram nni ngan thang e fan rok Jesus riy. Yugu aram rogon nrib gel e amith ni be tay, me yog ngak John ni nge ayuweg Maria. (John 19:26, 27) Bay pi walagen Jesus nrayog ni ngar pied e tin nib t’uf rok Maria, machane ngiyal’ nem e sana dariy bagayad ni ke mang reb i gachalpen. Ere baadag Jesus ni nge ayuweg be’ Maria, miki pi’ e athamgil nga laniyan’ ni nge ulul ko pigpig ni be tay ngak Jehovah.

16. Mang boch ban’en nib milfan ngak John ni nge rin’?

¹⁶ Boor ban’en nib milfan ngak John ni nge rin’. Bochan ni ir reb e apostal, ma aram fan nthingari pasig ko fare maruwel ni machib. Ku rayog nib mabgol, ere ba t’uf ni nge pi’ e tin nib t’uf ko tabinaw rok, maku be ayuwegrad ni nge fel’ e tha’ u thilrad Got. (1 Kor. 9:5) Ere mang e rayog ni nge fil e piin lolugen e tabinaw ko re n’ey?

17. Mang nib ga’ fan ni nge ayuweg reb i lolugen e tabinaw chon e tabinaw rok ni nga i par e tha’ u thilrad Got nib fel’?

¹⁷ Reb e walag ni pumoon ni ir lolugen reb e tabinaw e rayog ni boor ban’en nib milfan ngak ni nge rin’. Bod nrayog nib t’uf ni nge maruwel nib gel u tabon e maruwel rok, ya nge yag ni pining e sorok ngak Jehovah. (Efe. 6:5, 6; Titus 2:9, 10) Ku rayog ni bay boch ban’en nib milfan ngak u lan e ulung. Bod nsana rayog ni ir reb e piilal ni ma pi’ e athamgil nga laniyan’ e pi walag ma be ayuwegrad. Ku thingari pasig ko fare maruwel ni machib. Ma nap’an ni be rin’ e pi n’ey, ma kub ga’ fan ni ngaur filed leengin nge pi fakrow e Bible u taabang ni gubin ngiyal’. Rra ga’ fan u wan’ chon e tabinaw rok urngin ban’en ni be rin’ ni nge ayuwegrad ni ngar pared nib fel’ fithik’ i dowrad, ma yad ba felfelan’, maku yad be par nib fel’ e tha’ u thilrad Jehovah.​—Efe. 5:28, 29; 6:4.

“GIMED RA PAR NI GIMED BA T’UF ROG”

18. Mang e ba pagan’ John ngay?

¹⁸ Ba n’uw nap’an ni par John nib fos, ma boor ban’en nib manigil ni i buch rok. Machane ku boor e magawon ni mada’nag nrayog ni nge warnag e michan’ rok. Yugu aram rogon, ma gubin ngiyal’ ni i athamgil u rogon nrayog rok ni nge fol ko pi n’en ni tay Jesus chilen, nreb riy e aram e nge t’ufeg pi walagen. Bochan e re n’ey, mab pagan’ John ngay nib t’uf rok Jehovah nge Jesus ma yow ra pi’ gelngin ni nge athamgiliy urngin e pi skeng ni be mada’nag. (John 14:15-17; 15:10; 1 John 4:16) Dabiyog rok Satan nge pi n’en bay ko re fayleng rok ney ni nge taleg John dabki t’ufeg pi walagen u daken e thin nge ngongol rok.

19. Mang e be pi’ e 1 John 4:7 e athamgil nga lanin’dad ni ngad rin’ed, ma mang fan?

¹⁹ Gad bod John ni gad be par u ba fayleng ni be gagiyegnag Satan ni ir be’ ndariy e t’ufeg rok. (1 John 3:1, 10) Yugu aram rogon ni baadag ni nge talegdad ndab kud t’ufeged pi walagdad, machane dabiyog ni nge rin’ e re n’ey ni faanra dab da paged ni nge rin’. Kad dugliyed u wan’dad ni nge t’uf pi walagdad rodad, ma gad dag e t’ufeg ngorad u daken e thin ni gad ma yog ngorad, ma gad micheg e re n’ey u daken e ngongol rodad. Gad ra dag e re t’ufeg ney, ma aram e gad ra felfelan’ ngay ni kad manged bang ko tabinaw rok Jehovah, me yib fan e yafos rodad.​—Mu beeg e 1 John 4:7.