Bay e Birorad e Kanawo’ ko Gonop

“PIILAL e bay e gonop rorad, ma bitir e ku bay kanawoen e birorad e llowan’,” aray rogon taban e thin rok yu Nigeria. Edwin, ni ir reb e piilal ni Kristiano nu Nigeria, e ke pirieg e re n’eney nib riyul’.

Reb e rran, me pirieg Edwin bochi kahol ni wasey u tan e tebel rok u tabinaw.

Me gaar’ “Mini’ e fen ere n’eney?” I fith Edwin ngak dalip i bitir rok.

Me non Emmanuel ni meruk e duw rok ni gaar, “I gag e fanag.” Me gurgur nge yog ni chi kahol ney nib mak t’ay, ni lal e inch n’umngin nge radan nib wasey ni kan kuruf bochi yang u daken e fan ko mokun salpiy ni ayuw ko maruwel ko Pi Mich rok Jehovah u gaangin yang e fayleng. I gaar, “Ya dagur yan nga Kingdom Hall gubin e rran,” me weliy ni gaar, “Me ere kugu lemnag ni nga gu fal’eg ba kahol nge ngiyal’ ni dagu chuwiy ban’en ko salpiy rog ni fan nga bochi ban’en nib achig ni nga gu way, mu gu tay e salpiy riy nga lan ere kahol nem.”

Chitamangin Emmanuel e immoy reb e kahol ni tay u tabinaw ni uni kunuy e salpiy ngay ni bochan ni ngani un ko convention ko yu duw. Ma faanra t’uf e salpiy ko tabinaw nib gur, ma aram ma ra feked fare salpiy. Fan ni nge mudugil ni nge dabni fanay ere salpiy nem ni ayuw ko mokun nga yugu reb e ban’en, ma aram me fek Emmanuel bochi kahol ni wasey ni ke kakrom ngak be’ ni ba tayosech ni ngan ning ma faani yan i nang faanem fan ni ngan fal’eg fachi kahol ma aram me bi fal’eg bochi reb e kahol nge fanay Emmanuel ni tataban e wasey. Michael, ni lal e duw rok ni walagen Emmanuel, e ki ning reb e kahol.

Mi ri gin Edwin ko n’en ni kar rin’ed, me fith ko mang fan ni kar rogned kan fal’eg e pi kahol nem. Me fulweg Michael ni gaar: “Gu baadag ni nga gu un i pi’ ban’en!”

De nang e gallabthir rorad, ni Emmanuel, Michael, nge Uchei, ni walagrow ni ppin, ni mereb e duw rok e yad ma chaariy reb ko salpiy ni puluwon e ggan rorad ko misiw nga ur ted nga lan e pi kahol nem. U uw e yib e binem e lem riy ngorad? Yugu nap’an ni kar ilal gad boch kar nanged i kol e salpiy nga pa’rad, me fil gallabthir rorad ngorad ni nga urun’ed boch e salpiy nga lan e kahol ko mokun u Kingdom Hall. Ere rib gagiyel, ni pi bitir nem e ka rin’ed e n’en kar filed ni rib fel’ rogon.

Nap’an ni sug fapi kahol, mini thab i bing. Ma fapi salpiy e yan i gaman $3.13 ko salpiy ni meriken​—re n’eney e de lichlich ya re nam nem e salpiy ni baga’ ni yima thognag u lan reb e duw e kemus ni in miriay e dola e re baga’ e binem e salpiy. Binem e salpiy ni kan ognag e ke ayuweg e maruwel ko machib ko Pi Mich rok Jehovah ni yibe rin’ u lan 235 yang e nam u gaangin e fayleng.