Ngan Ulul Ko  Fare Maruwel Ni Ngan Kunuy E Woldug!

“Piin ni ma yung e awoch ni be yor e ra t’ar woomngin ni be tolulnag e falfalan’.”​—PSALM 126:5, New World Translation.

1. Mang fan ni ngan “wenignag ngak e en ni ir e suwon e woldug ni ngki pi’ boch girdien e maruwel” e chiney?

TOMREN fa bin dalip yay ni ke yan Jesus Kristus nga Galilee ni nge wereg e machib, i yog ngak pi gachalpen ni gaar: “Fapi woldug ni ngan kunuy e boor, machane piin tamokun woldug e ba lich.” (Matthew 9:37, NW) Aram rogon e n’en ni ke buch u Judea. (Luke 10:2) Bochan riyul’ ni aram e n’en ni ke buch kakrom nib chuchugur ko 2,000 e duw ni ke yan, ma uwrarogon e chiney? Fa binem e duw, ma ke pag 6,000,000 e Pi Mich rok Jehovah e kara uned ko fare maruwel ni ngan kunuy e woldug ni be yip fan ban’en u fayleng ni bay 6,000,000,000 e girdi’ riy, ni boor i yad e bod ni “kan fathiy e biyach u dowrad ma kan n’agrad ni bod e pi saf ni demoy rorad e en ni ma gafaliyrad.” Ere fonow ni ke pi’ Jesus ni ngan “wenignag ngak e en ni ir e suwon e woldug ni ngki pi’ boch girdien e maruwel ko re mokum woldug rok nem” e ku ba puluw e chiney ni taabrogon ko kakrom ni ke yoor e chibog ni ke yan.​—Matthew 9:36, 38, NW.

2. Mang e n’en ni ma k’aring e girdi’ ni ngar sapgad ngodad?

² Jehovah Got, ni ir e En suwon e re woldug nem ni ngan kunuy, e ke fulweg taban e meybil ni be ning e piin tamokun woldug. Ma rib gel e falfalan’ ni ngan un ko re maruwel ney ni ngan kunuy e woldug ni Got e be pow’iyey! Yugu aram rogon ni gad ba lich ya ra ngan taarebnag ko pi nam, ma be guydad e girdi’ nu fayleng ya bochan gad ba pasig ko maruwel ni ngan wereg e machib ma ngan pingeg e girdi’ ngar manged pi gachalpen. U boor e nam e ri yima yog e thin u media u murung’agdad. Reb e program ko television ma tomren lingan e bel ko mab min nog fare thin ni gaar, Pi Mich rok Jehovah e kar bad. Arrogon, maruwel rodad ni gadad e piin Kristiano ni gad be kunuy e woldug ni be yip’ fan ban’en ma go’ kan nang ko fa bin 21 e chibog.

3. (a) Uw rogon ni gad ra nang ni kan nang fare maruwel ni ngan wereg e thin ko Gil’ilungun ko fa bin som’mon e chibog? (b) Mang fan ni ngad dogned ni fapi engel e yad be ayuweg e maruwel rodad ni ngan wereg e machib?

³ Maku ke naab e girdi’ nu fayleng ko maruwel ni kan ta’ ko fa bin som’mon e chibog min togopuluw ngak e pi tamachib ko fare thin nib fel’. Arfan ni i yoloy Paul ni apostal ni gaar: “Gu ma finey ni Got e ke ta’mad e [pi apostal] nga th’abi tomur, ni bod e girdi’ ni kan turguy e gechig rorad ni ngar m’ad u p’eowchen e girdi’ ni yoor, ya bochann kug manged tayngeg ko girdi’ nu fayleng, nge fapi engel.” (1 Korinth 4:9) Taab rogon ngay, ma fadad gum’an’ ni gadad e pi tamachib ko Gil’ilungun nyugu aram rogon ni ma yib e togopuluw ngodad ma ke gin e girdi’ nu fayleng ngay ma aram e n’en ni baga’ fan u wan’ fapi engel. Revelation 14:6 e be gaar: “Mu gguy [John ni apostal] reb e engel ni be changeg nib tolang u fithik’ e nifeng ni ba’ rok e thin ndabi math biid, ni Thin Nib Fel’ ni nge weliy ngak e girdi’ nu fayleng, ni urngin e pi nam, nge ganong nge thin nge gubin mit e girdi’.” Arrogon, engel e be ayuwegdad ko machib ni gad ma ta’​—ni aram e maruwel rodad ni ngan kunuy e woldug!​—Hebrews 1:13, 14.

“Yibe Fanenikayrad”

4, 5. (a) Mang e thin ni ke yog Jesus ngak pi gachalpen? (b) Mang fan ni pi tapipig ku Got ko ngiyal’ ney e “yira fanenikayrad”?

⁴ Nap’an ni pi apostal rok Jesus e kan l’ograd ngar manged ta mukun woldug, ma kar folgad ko thin ni ke yog ngorad ni “thingara ayuwgad ni bod rogon e porchoyog mi yad munguy ni bod e bulogol.” Me ulul Jesus ngay ni gaar: “Ma bay ni pufthinnagmed u p’eowchen e piin ni baga’ lungurad nge pi pilung ni bochag, ni bochan e nga mogned e Thin Nib Fel’ ni yib rok Got ngorad nge ngak e piin ni gathi yad piyu Israel. . . . Ma gubin e girdi’ ni bay ra fanenikayed gimed ni bochag. Machane en nra athamgil nge par nge mada’ ko tomur e ra fas.”​—Matthew 10:16-22.

⁵ Ngiyal’ ney e yibe “fanenikaydad” ya bochan “fare fayleng ni polo’ e ke suweyrad faanem nib kireb,” ni Satan ni fare Moonyan, ni ir e bin som’mon e toogor rok Got nge girdi’ Rok. (1 John 5:19) Ke naab e pi toogor rodad ni kad mon’og gad ko tirok Got machane dubrad ni ngar pininged e sorok ngak Jehovah nbochan. Piin ni tatogopuluw e ma guydad ni gad ba falfalan’, ma gad ma siminmin u nap’an ni gad ma un ko maruwel ni ngan kunuy e woldug u fithik’ e falfalan’. Kar gingad ya ke taareban’dad! Riyul’, ni sana dabi felan’rad ni nga rogned u lanin’rad ni riyul’ ni aram rogon u nap’an ni gad ra yan nga yugu reb e nam ma yad ra guy ni Pi Mich rok Jehovah u rom e ma rin’ fare maruwel ni taareb rogon ko tin ni yad ma rin’ ko nam rorad. Riyul’, gad manang ni rogon nib puluw ko tayim ni kan dugliy me Jehovah, ni ir e ta ayuw rodad me ir tabolngin ma gadad par ni gad ba taareb ma ra nang e girdi’ Got ni musko pi toogor rodad.​—Ezekiel 38:10-12, 23.

6. Mang e thin ni kan micheg ngodad ya bochan gad be un ko fare maruwel ni ngan kunuy e woldug, machane mang boch e deer nra m’ug?

⁶ Ani ba mil suwon ngak e woldug ni yibe kunuy e ke pagfan “urngin ban’en . . . u tharmiy ngu fayleng” ngak Jesus ni Fak. (Matthew 28:18) Ere ma fanay Jehovah Jesus ni nge ayuweg fare maruwel ni ngan kunuy e woldug u daken fapi engel u tharmiy nge fare “tapigpig nib yul’yul’ mab gonop” u roy u fayleng. (Matthew 24:45-47; Revelation 14:6, 7) machane uw rogon ni ngada ayuweged gadad ko togopuluw ni ma yib ngodad maku rayog ni nge par ni gad ba falfalan’ ko ngiyal’ ni gad be ulul iyan ko maruwel rodad ni ngan kunuy e woldug?

7. Mang ngongol ni thingarda daged u gubin ngiyal’ u nap’an ni keb e togopuluw ara kan gafgownagdad?

⁷ Faani yib a togopuluw ngodad ara bay be’ ni ra gafgownagdad, ma ngada ninged e ayuw ku Got ma aram e rayog rodad ni nge par ni ngongol rodad e ba taareb rogon ko ngongol rok Paul. I yog ni gaar: “Nap’an ni ka nog e thin nib kireb ngomad, ma ku gogned e thin nib fel’; ma nap’an ni keb e togopuluw ngomad, ma kug k’adan’mad; ma nap’an ni kan kirebnag thimad nga fithik’ e girdi’, ma kug meybilgad.” (1 Korinth 4:12, 13, NW) Re lem ney, e ngan uneg ngay ni ngan wereg e machib u fihik’ e salap, ma yu ngiyal’ e ra thil e lem ko piin tatogopuluw.

8. Mang e rayog ni ngam fil ko thin ni i micheg Jesus ni bay ko Matthew 10:28?

⁸ Mus ko ngiyal’ ni gad be yan u thatharen e riya’ ma dabi war fadad pasig ni gadad e pi ta mokun woldug. Gad ma wereg e thin ko Gil’ilungun ni ri ma guydad e girdi’ ma dada rusgad. Ma rayog ni nge pi’ athamgil nga lanin’dad e thin ni ke micheg Jesus ni gaar: “Dab mu tamdag gad ngak e piin ni yad ra li’ e dowef ngem’ machane dabiyog ngar lied fare yaal ngem’; machane mu tamdagad ngak e piin ni rayog ni ngar lied fare yaal nge dowef u Gehenna.” (Matthew 10:28, NW) Gad ma nang ni Chitamangidad u tharmiy e ir e Ma Pi’ e yafas. Ma ma taw’athnag e piin ni ra par nib yul’yul’ ngak ma yad be ulul ko fare maruwel ni ngan kunuy e woldug.

Thin ni Ra Ayuweg e Yafas

9. Mang i rin’ boch e girdi’ nbochan e thin ni ke yog Ezekiel, ma uwrogon ni be buch e n’en ni aram rogon ko ngiyal’ ney?

⁹ Nap’an ni i machibnag Ezekiel e thin rok Jehovah ko “nam ni tatogopuluw”​—ni fapi gil’ilungun yu Israel nge Judah—​boch e girdi’ e kar falfalan’gad ni ngar motoyilgad ko thin ni yog. (Ezekiel 2:3) I yog Jehovah ni gaar, “Am sap! Rogon ni yad be lemnagem e taareb rogom nga reb e tang ni fan ko adag e dowef, ma bod rogon ni fel’ laman ko tang mab cheg ko musik.” (Ezekiel 33:32, NW) Yugu aram rogon ni yad baadag e thin rok Ezekiel, de yog rorad ni ngar folgad riy. Mang e be buch e ngiyal’ n’ey? Nap’an ni piin ni kan dugliyrad nge yugu boch e girdi’ nib chag ngorad e yad be machibnag e thin rok Jehovah ni dar rusgad, ma bay boch e girdi’ ni baadag ni ngara motoyilgad u murung’agen e pi taw’ath nra yibnag Gil’ilungun, machane dar folgad riy, ngar manged pi gachalpen, mar uned ko fare maruwel ni ngan kunuy e woldug.

10, 11. Bin som’mon ni baley ko fa bin 20 e chibog, ma mang e kan rin’ ni fan ni ngan wereg e thin ni be ayuweg e yafas, ma mang boch i angin?

¹⁰ N’en nib thil riy, bay boch e girdi’ ni ba fel’ e maruwel ni ngan kunuy e woldug u wan’rad mi yad un i wereg e thin rok Got. Ni bod ni, nap’an ni kan tababnag e pi convention ko piin Kristiano ko duw ni 1922 nge mada ko 1928, ma thin ko pufthin ni fan ko m’ag rok Satan nib kireb e kan wereg nib tamilang. Kan weliy u radio station e pi thin nem ni kan weliy ko pi assembly nem. Tomur riy, ma ke wereg e girdi’ rok Got fapi babyor ni be weliy murung’agen e pi thin nem ni bokum million ken ni kan ngongliy.

¹¹ Bang ko tomur ko duw ni 1930, kan tababnag yugu reb e kanawo’ rogon ni ngan wereg e machib​—ni girdi’ ni ma yan u taabang ni yad be fek boch e thin. Som’mon, girdi’ rok Jehovah e kar feked e pi placard ni be weliy murung’agen e pi welthin ni fan ko yoor. Ma munmun, e ur feked boch e placard ni bay e thin riy ni “Teliw e ba wup nge ba racket” nge “Ngan Pigpig ngak Got nge Kristus ni fare Pilung.” Nap’an ni yad be yan u kanawo’, ma girdi’ ni be yanyan e kar sapgad ngorad. ‘Kari ayuweg e re n’em ni ngan nang e Pi Mich rok Jehovah me pi’ e athamgil nga lanin’rad,’ aram e n’en ni ke yog reb e walag ni ke un ko re maruwel n’ey ni gubin ngiyal’ ko yu pa’ i kanawo’ nu London u England.

12. N’en nib peth ko thin ko pufthin rok Got, ku mang e n’en ni gad ma wereg u nap’an ni gad ma un ko machib, ma mini’ e chiney ni yad be wereg fare thin nib fel’ ni ke taareban’rad?

¹² Nap’an ni gad be wereg e thin ko pufthin rok Got, maku gad be wereg e tin nib fel’ ni ir bang ko fare thin ko Gil’ilungun. Bochan ni gad be wereg e machib u ga’ngin e fayleng ma ra ayuwegdad e re n’ey ni ngada gayed e piin ni bay rogorad. (Matthew 10:11) Boor ko baley ko tin ni ka ba’ ko piin ni kan dugliyrad e kar folgad ko thin ni kan wereg u murung’agen e maruwel ni ngan kunuy e woldug u nap’an e pi duw ni 1920 nge 1930. Ngemu’, ma nap’an e convention ko duw ni 1935, me yib fare thin u murung’agen e tayim boch nga m’on ni fan ko “ulung ni baga’” ko “yugu boch e saf” u paradis u fayleng. (Revelation 7:9; John 10:16) Kar motoyilgad ko thin ko pufthin rok Got ma yad be un ngak e piin ni kan dugliyrad ko maruwel ni ngan wereg e thin nib fel’ ni be ayuweg e yafas.

13, 14. (a) Mang thin nra fal’eg lanin’uy ni bay ko Psalm 126:5, 6? (b) Faan gad ra ulul i yung ban’en ma ngad puogad boch e ran ngay, ma mang e ra buch?

¹³ Thin ni bay ko Psalm 126:5, 6 e ri be fal’eg laniyan’ e piin tamokun woldug ni girdien Got, ma baga’ ni piin ni ke yib e togopuluw ngorad ni be gaar: “Piin ni kar yunged e awoch ni yad be yor e yad ra t’ar woomngin ni yad be tolul u fithik’ e falfalan’. Ani ni gubin ngiyal’ e ma yan ni be yor, ma be fek e dug rok ni bay e awoch riy, e mmtrug ni ra yib ni be tolul u fithik’ e falfalan’, ni be fek e ggan rok ni kan m’ag thuman.” Fare thin ko psalmist u murung’agen e ngan yung ban’en nge ngan t’ar woomngin e be yip’ fan e ayuw nge flaab nra pi’ Jehovah ngak e piin ni ka ba’ ni kan kalbusnagrad u Babylon kakrom min pagrad. Kari felan’rad u nap’an ni kan pagrad, machane sana kara yorgad u nap’an ni kara yunged e awoch nga but’ nde fel’ ndan maruweliy u lan 70 e duw ni kan kalbusnagrad. Machane, piin ni kar ululgad i yung ban’en nge fare maruwel ni ngan toy ban’en e ke felan’rad nga angin ni keb ma yad ba falfalan’ ko maruwel ni kar ted.

¹⁴ Sana gadra yor u nap’an ni ra yib e skeng ngodad ara pi walagdad e kar gafgowgad ya bochan ni kara rin’ed e tin nib mat’aw. (1 Peter 3:14) Nap’an e maruwel rodad ni ngan kunuy e woldug, e sana kad gafgowgad ko som’mon ya gowa de yib angin ngodad nrayog ni ngada daged nbochan e maruwel ni kad ted i wereg e machib. Machane faanra ngada ululgad i wereg e awoch ma gad puog e ran ngay, ma ra ayuweg Got ni nge tugul, nge baga’ ni ra pag rogon ko tin ni kad fineyed. (1 Korinth 3:6) Ma kan dag nib tamilang angin ni keb ngodad ko maruwel ni ngan wereg e Bible nge boch e babyor ni kan ngongliy nib puluw ko Thin rok Got.

15. Ngam weliy ban’en ni be dag ni baga’ fan e pi babyor ko piin Kristiano ko fare maruwel ni ngan kunuy e woldug.

¹⁵ Mu lemnag e n’en ni buch ku reb e pumoon ni Jim fithingan. Nap’an ni ke yim’ e chitiningin, ma ke pirieg fare babyor ni Life​—How Did It Get Here? By Evolution or by Creation?a u fithik’ e chugum rok. Ke beeg e re n’ey ni rib adag. Nap’an ni kar nonow reb e Mich u kanawo’, ma ke adag Jim ni ngar machibgow biyay, ma aram e kan tababnag e fol Bible. Ma rib papey ni ke mon’nog Jim ko tirok Got, me ognag ir ku Jehovah, min taufenag. Me weliy ngak yugu boch e girdi’ u lan e tabinaw rok e tin ni kan fil ngak. Ma angin nib riy, walagen ni ppin nge pumoon e kara mangew l’agruw e Mich rok Jehovah, ma munmun ma ke yog ngak Jim reb e taw’ath ya ke un ko maruwel u Bethel u London ni polo’ e tayim rok.

Kan Togopuluw Machane Ba’ e Falfalan’

16. (a) Mang fan ni ma yib angin fare maruwel ni ngan kunuy e woldug? (b) Mang thin ni ke yog Jesus nra buch nbochan fare thin nib fel’, machane mang ngongol e gad ra dag ngak e girdi’?

¹⁶ Mang fan ni kari yib angin fare maruwel ni ngan kunuy e woldug? Ya bochann piin Kristiano ni kan dugliyrad nge piin nib chag ngorad e kar folgad ko thin rok Jesus ni be gaar: “Ma n’en ni gu be yog ngomed u fithik’ e lumor e thingar mogned ni rran, ma n’en ni kam rung’ag nde rung’ag e girdi’ e thingar mu weliyed u daken e naun.” (Matthew 10:27) Machane, rayog ni ngari mo’maw’ e par rodad, ya i ginangey Jesus ni gaar: “Ma girdi’ e bay ra pied pi walagrad ni pumoon ni ngan li’rad ngar m’ad.” Miki yog Jesus ni gaar: “Dab mfineyed ni ku gub ni nggu fek e gapas i yib nga fayleng; danga’, gathi gub ni nggu fek e gapas i yib, machane ba sayden e kug fek i yib.” (Matthew 10:21, 34) De lemnag Jesus ni nge wagageynag e pi tabinaw. Machane yu ngiyal’ ma aram e n’en nra buch nbochan fare thin nib fel’. Riyul’ ni aram e n’en ni ma buch ko pi tapigpig rok Got ko ngiyal’ ney. Nap’an ni gad ra yan ni ngada guyed boch e tabinaw, gathi gad ma lemnag ni ngada ruwraba’naged e tabinaw. Gad baadag ni gubin e girdi’ e ngar folgad ko fare thin nib fel’. Arfan, ni gad ma guy rogon ni ngad nonad ngak urngin e girdi’ ko reb e tabinaw u fithik’ e gol, ngu fithik’ e sumnguy ni aram e n’en nra ayuwegrad ngar adaged e machib rodad e piin ni “ke mel’egrad ni nge yog e yafas ndariy n’umngin nap’an ngorad.”​—Acts 13:48.

17. Uw rogon ma piin ni ma tolangnag e liw rok Got ni tagagiyeg e ngan kiegrad, ma mang taa ban’en ni be dag ni aray rogon?

¹⁷ Fare thin ko Gil’ilungun e ma kieg e piin ni be tolangnag e liw rok Got ni tagagiyeg. Ni bod ni, ngam mu lemnag rogon ni pi walagdad e kar daged ni yad ba thil ya bochan e kara ‘pied ngak Caesar e tirok ban’en ma kar pied ngak Got e tirok Got ban’en u nap’an e pi rran ni immoy fare n’en ni ka nog National Socialism u Germany. (Luke 20:25) De taareb rogon ko pi tayugang ko pi yurba e teliw nge piin ni yima yog fapi Kristiano ngorad ni yad ma un ko pi galesya ko Christendom, pi tapigpig ku Jehovah e kar pared nib mudugil, ma dar th’abed e pi kenggin e motochiyel u Bible. (Isaiah 2:4; Matthew 4:10; John 17:16) Reb e Professor ni Christine King fithingan, ma ir e ke yoloy fare babyor ni The Nazi State and the New Religions, e ke yog ni gaar: “Ke mus ni Pi Mich ni fare am ni [Nazi] e de gel ngorad, ya yugu aram rogon ni kara lied bokum biyu’ e girdi’ kar m’ad, ma ka be ulul iyan fare maruwel rorad ma pul ni May ko duw ni 1945 ma ka be par ni yad be rin’ e maruwel rorad, ma fare National Socialism e danga’.”

18. Mang ngongol ni ma dag e girdi’ rok Jehovah nyugu aram rogon ni bay e togopuluw?

¹⁸ Rib thil e ngongol ni ke dag e girdi’ rok Jehovah u nap’an ni ke yib e togopuluw ngorad. Yugu aram rogon ni girdien e am e sana ba fel’ uwan’rad e michan’ rodad, ma kara gingad ni dariy e lem rodad nib kireb nge fanenikan. Ni bod ni, Pi Mich ni kara magaygad ko fare Holocaust e yad ma yog e thin ni ke felan’rad nfaan yad ra lemnag e tin ni ke buch rorad kafram. Yad manang ni Jehovah e ke pi’ “gelngirad ni th’abi gel.” (2 Korinth 4:7) Piin ni kan dugliyrad ni bay u fithik’dad e kan micheg ngorad ni “kan yoloy fithingrad nga babyor u tharmiy.” (Luke 10:20) Farad gum’an’ e ma yibnag e athap ndabi aw nib m’ay fan, ma piin ta mokun woldug nib yul’yul’ ni bay e athap rorad u fayleng e ku bay e michan’ rorad ni aram rogon.​—Roma 5:4, 5.

Ngan K’adan’ ko fare Maruwel ko Mokun Woldug

19. Mang boch e kanawo’ ni yima fanay ko machib ni ma yib angin?

¹⁹ Uw n’umngin nap’an ni ra pag Jehovah ni ngada uned ko maruwel ni ngan kunuy e woldug ni be yip’ fan ban’en e dawori nnang. Chiney, ma thingarda lemanaged ni piin tamokun woldug e bay kanawoen rogon ni yad ma rin’ e maruwel rorad. Taab rogon ngay, ma rayog ni nge mudugil lanin’dad ni fadad yul’yul’ ni ngada fanayed boch e kanawo’ ni kan guy nib fel’ rogon ni ngan wereg e machib e ra yib angin. I yog Paul ngak e pi walag ni Kristiano ni gaar: “Ere gu be wenig ngomed ni ngam folwokgad rog.” (1 Korinth 4:16) Nap’an ni ke yan Paul ni nge guy e piin ni piilal nu Efesus u Miletus, me puguran ngorad ni de tal ni nge wereg e machib u “fithik’ e girdi’ ni yoor ngu lan e tabinaw rorad iyan.” (Acts 20:20, 21) Fa cha’ ni Timothy ni chag ngak Paul ni apostal e ke fil kanawoen arfan ni bay rogon ni nge fil e re n’ey ngak piyu Korinth. (1 Korinth 4:17) I flaabnag Got e pi kanawo’ ni i fanay Paul u rogon ni ma fil ban’en ngak e girdi’, ni bod ni ra flaabnag fadad gum’an’ ni ngada wereged fare thin nib fel’ ngak e girdi’ ni yoor nge machib u mit e tabinaw i yan, nge nap’an ni ngan sul ngak be’, ngu nap’an nyira fil e Bible ngak e girdi’, ni yug demtrug e binaw ni bay e girdi’ ni ma par riy.​—Acts 17:17.

20. Uw rogon ni dag Jesus ni ke taw nga nap’an e maruwel ni ngan kunuy e woldug ni boor, ma uw rogon ni ke m’ug nib riyul’ e re n’ey ko boch e duw ni ke yan?

²⁰ Tomren ni ke machibnag Jesus fare pin nu Samaria nib chuchugur nga Sychar ko duw ni 30 C.E., me weliy Jesus murung’agen e mokun woldug nib spiritual. I yog ngak Pi gachalpen ni gaar: “Ma nggog ngomed ni ngam fal’eged i yaliy e yungi woldug: ya woldug ni ba’ riy e ke el ni ke taw nga nap’an ni ngan t’ar! Re moon ni ir e nge t’ar e woldug e yima pi’ pulwon ni nge kunukunuy e woldug ni ke el ni fan ko yafas ndariy n’umngin nap’an; ni aram e re moon ni yung e woldug nge re moon ni t’ar e woldug e bay ra falfalan’gow u taabang.” (John 4:34-36) Sana ke guy Jesus angin fare n’en ni ke rin’ ni i non ngak fare pin ni ke mada’nag, ya boor e girdi’ ni ke mich Jesus u wan’rad nbochan e n’en ni ke weliy. (John 4:39) Boch e duw ni kefin i yan, ma boor e nam ni kar chuweged e motochiyel nib togopuluw ko Pi Mich rok Jehovah ara kan weliy ni tin yad ma rin’ e de togopuluw ko motochiyel rorad, ma arfan ni kan bing e kanawo’ ni ngan kunuy e woldug u boch e binaw nib biech. Bochan e re n’ey ma arfan ni ka be ulul iyan e mukun woldug nib spiritual ma be gel. Riyul’ ni, ga’ngin yang u fangleng, e kan taw’athnagdad nib gel ya bochan e gad be par ni gad ma un ko maruwel ni ngan kunuy e woldug nib spiritual u fithik’ e falfalan’.

21. Mang fan ni bay i fan ngodad ni gad ra ulul ko maruwel rodad ni gadad e piin tamokun woldug nib falfalan’?

²¹ Nap’an ni ke el woomngin e woldug ma ke taw nga nap’an ni ngan t’ar, ma girdien e maruwel e susun ni ngar tababgad ko maruwel rorad nib papay. Thingara maruwelgad ni dabra adbeyed e tayim. Chiney, mab t’uf ni ngada maruwelgad nib gel ma dabda adbeyed e tayim ya gad be par ko “fare ngiyal’ ko tomur.” (Daniel 12:4, NW) Arrogon, gad ma mada’nag boch e skeng, machane ka bay e woldug ni nge kunkunuy e pi tapigpig rok Jehovah ni kab boor ko kakrom. Ere ereray e rran ko falfalan’. (Isaiah 9:3) Ere bochan e gadad girdien e maruwel nib falfalan’, gadra ulul ko maruwel rodad ni ngan kunuy e woldug!

[Footnote]

Uwrogon ni Ngam Pi’ e Fulweg?

• Uw rogon ni ke fulweg e En ni ir e suwon e woldug taban e meybil ni yibe ning ngak ni ngki pi’ boch girdien e maruwel?

• Yugu aram rogon ni “yibe fanenikaydad,” ma mang ngongol ni ngada daged u gubin ngiyal’?

• Mangfan ni gad ba falfalan’ nyugu aram rogon ni ma yib e togopuluw ngodad?

• Mang fan ni ngada ululgad ko maruwel ko mokun woldug ni ngad gurgurgad?

[Pictures on page 14, 15]

Ma ayuweg e pi engel e piin ni be un ko maruwel nib spiritual ni ngan kunuy e woldug

[Picture on page 16]

Ngan yan u taabang ni yibe wereg e thin ni ra ayuweg e girdi’ ni yoor nge tiyan’ ko fare thin ko GiI’ilungun

[Picture on page 16]

Gad ma yung ban’en ma gad puog e ran ngay, machane Got e be ayuweg ni nge ga’