Mu Falan’gad Gimed E Pi Ta Mokun Woldug!

“Woldug ni yira kunuy e boor, machane piin ta mukun woldug e ba lich. Ere, mu wenignag ngak e En ni ir e suwon e re woldug nem ngki pi’ boch girdien e maruwel ngar uned ko re maruwel rok nem.”​—MATTHEW 9:37, 38, New World Translation.

1. Mang e ra ayuwegdad ma rayog ni ngada ululgad i rin’ e tin nib m’agan’ Got ngay?

FAAN gad ra lemnag e rorran ni kan taufenagdad ni kad manged pi tapigpig rok Jehovah, ndemtrug ko ke buch ni dawori yoor e duw ni ke yan fa ke yoor, fa bod ni kafini buch fowap. Ngan pining e sorok ngak Jehovah ya ke mang tin nib ga’ fan ko yafas rodad ni kan ognag. Bochan ni gad ma tay ba ngiyal’ ni fan e ngada ayuweged yugu boch e girdi’ ni ngar motoyilgad ma sana yad ra adag fare thin ko Gil’ulungun, min pigpig ku Jehovah u fithik’ e falfalan’ e ir e n’en ni rib ga’ fan u wan’dad. (Efesus 5:15, 16) Ngiyal’ ney, ma gad be guy ni kaygi papey ni be yan e tayim nfaanra boor pa’ u puluwdad, ya “boor e maruwel ni ngan rin’ ni aram e maruwel rok Somol.” (1 Korinth 15:58) Yugu aram rogon ni ma yib e magawon ngodad, ma falfalan’ rodad ni ngada rin’ed e tin nib m’agan’ Got ngay e ir e ma k’aringdad ni ngada ululgad ngay.​—Nehemiah 8:10.

2. Mang e n’en nra gelnag e falfalan’ rodad ko fare maruwel ni ngan kunuy e woldug ni be yip fan ban’en?

² Ya gadad ni gadad e Kristiano, e gad be un nga reb e mokun woldug ni be yip’ fan ban’en. I taarebnag Jesus Kristus fare maruwel ko mokun woldug ko ngan ulunguy e girdi’ min pi’ e yafas ni manemus ngorad. (John 4:35-38) Bochan ni gad be un ko re maruwel ney ni ngan kunuy e woldug, ma rayog ni nge pi’ e athamgil nga lanin’dad ni ngada guyed e falfalan’ ni ke yog ngak fapi Kristiano kakrom ni yad ma mokun woldug. Ngada sulod nga dalip ban’en nra ayuwegdad ni ngeb e falfalan’ ngodad ko mokun woldug ni yima ta’ ko ngiyal’ ney. Aram e (1) thin ko athap rodad, nge (2) angin ni kad fal’eged i yaliy, nge (3) ngongol rodad ni ba gapas ni gadad e ta mokun woldug.

Kan L’og ni Rogon e Ta Mokun Woldug

3. Mang tapgin ni keb e falfalan’ ngak pi gachalpen Jesus kakrom?

³ Rogon ni kari thil e yafas ko piin tamukun woldug kakrom ko duw ni 33 C.E.—​ni baga’ ni fapi apostal rok Jesus ni yad 11 u gubin ko ngiyal’ ni ka ranod nga daken e burey ni Galile ni ngara mada’naged Kristus ni kan faseg ko yam’! (Matthew 28:16) Sana “ke pag lal miriay e pi walag” ni ur moyed ko ngiyal’ nem. (1 Korinth 15:6) Gubin ngiyal’ ni yad ma lemnag fare maruwel ni ke pi’ Jesus ngorad. I yog ngorad ni gaar: “Ere mmarod . . . ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Yugu aram rogon ni keb e togopuluw ngorad nib gel, ma ke falan’rad ko maruwel ni kar ted ya kar guyed e pi ulung ko pi gachalpen Kristus ni kan yarmiy u boor yang. Ma de n’uw nap’an, ma fare ‘thin nib fel’ e kan machibnag ngak urngin e girdi’ u fayleng.’​—Kolose 1:23; Acts 1:8; 16:5.

4. Uwrarogon e girdi’ ko ngiyal’ ni nol’og e pi gachalpen Kristus nga ranod ngorad?

⁴ Dawori n’uw nap’an nga tomren ni ke tabab Jesus i wereg e machib u Galile, me pining fa 12 i apostal rok me l’ograd ni fan e ngara machibgad ni nge lungurad: “Gagiyeg rok Got e ke chuchugur.” (Matthew 10:1-7) Me “yan Jesus ko pi binaw i yan, [u Galile] pi binaw ni pire’ e girdi’ riy nge binaw nib lich e girdi’ riy, ni i machibnag e Thin Nib Fel’ ni murung’agen e gagiyeg rok Got, me golnag e girdi’ u urngin mit e liliy.” Me taganan’ Jesus ngorad “ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matthew 9:35, 36) Bochan ni kari runguyrad, me ere ke yog ngak pi gachalpen ni gaar: “Arrogon, boor e woldug ni ngan kunuy, machane buchuw e piin ta maruwel. Ere mu wenignag ngak e en ni ir e suwon e re woldug nem [Jehovah Got] ngki pi’ boch girdien e maruwel ni ngar uned ko re maruwel rok nem.” (Matthew 9:37, 38, NW) Rogon ni i lemnag Jesus feni t’uf e piin ta mokun woldug e taab rogon u Judea nap’an ni kemus ni ri nel e pul ni ke magay ko maruwel rok i wereg e machib u fayleng. (Luke 10:2) Ma gali tayim nem, me l’og pi gachalpen ngar kunuyed e woldug.​—Matthew 10:5; Luke 10:3.

Machib Rodad ni Fan ko Athap

5. Mit i mang thin e gad ra wereg?

⁵ Me gadad e pi tapigpig ku Jehovah ko ngiyal’ n’ey, e gad ba falfalan’ ngay ni ngad pininged boch e girdi’ ni ngar uned ko maruwel ko fare mukun kun woldug. Taa ban’en nra yibnag e falfalan’ ngodad nib gel e aram e ngada wereged fare thin ngak e piin ke wer lanin’rad ma ke kireban’rad. Taab rogon ko pi gachalpen Jesus ko fa bin som’mon e chibog, ma ri gad ba taw’ath ni ngada wereged e thin nib fel’​—ni aram e machib ko athap nib riyul’—​ngak e piin ni ke “magafan’rad ndar nanged e n’en ni ngar rin’ed, ya yad bod e saf nde moy e en ni ma gafaliyrad”!

6. Mang maruwel ni ke un fapi apostal ngay ko fa bin som’mon e chibog?

⁶ U lukngun fa bin som’mon e chibog, me Paul ni apostal e be machibnag fare thin nib fel’ nib elmerin. Ma keb angin ko maruwel ni ke ta’, ya nap’an ni yol ngak e piin kristiano u Korinth ni sogonapan 55 C.E., me yog ni gaar: “Pi walageg ni girdien Kristus, gub adag ni nggu puguran ngomed fare Thin nib Fel’ ni yib rok Got ni ir e gu machibnag ngomed, ni ir e mu folgad riy, me ir e ke par e michan’ romed u daken nib mudugil.” (1 Korinth 15:1) Fapi apostal nge yugu boch e Kristiano kakrom e yad e tamukun woldug nib gel a maruwel rorad. Yugu aram rogon ni de yog e Bible ko in e apostal ni kar magaygad nib fas u nap’an ni keb a magothgoth nga Jerusalem ma tomuren e kan gothey ko duw ni 70 C.E., ma gad manang ni John ni apostal e ka be machib ni sogonapan 25 e duw nga tomren.​—Revelation 1:9.

7, 8. Mang thin ko athap ni be wereg e pi tapigpig ku Jehovah e chiney ni ke papay boch ko kafram?

⁷ Me ere ke yib fapi chibog ni fapi tayugang ko Christendom e be gagiyeg, ni fapi apostate ni ka nog “faanem nib kireb” ngorad. (2 Thessalonika 2:3) Machane nap’an ni ke chuchugur ni nge m’ay fa bin 19 e chibog, ma piin kara athamgilgad ni ngar puluwnaged e yafas rorad ko tin ni ke rin’ fapi Kristiano ni som’mon ni yad be fol ko fare thin ko athap, ma yad be machibnag fare Gil’ilungun. Riyul’, ka nap’an e bin som’mon e babyor ni kan ngongliy ko (July 1879), ma kenggin e ba muun ngay fare bugithin ni “Yibe Machibnag ni Bay Kristus,” nge “Yibe Machibnag ni bay Gil’ilungun Kristus,” ara “Yibe Wereg Gil’ilungun Jehovah.”

⁸ Kan sunmeg fare Gil’ilungun Got u tharmiy u pa’ Jesus Kristus ko duw ni 1914, ma chiney e gad be machibnag fare thin ko athap ni ke papey boch ko kafram. Mang fan? Ya bochan angin ni ra yib ko gagiyeg ko Gil’ilungun ma ba muun ngay e tomur ko re m’ag ney nib kireb ni kari chuchugur ni ngeb. (Daniel 2:44) Ka bay reb e thin ni kab fel’ ko re n’ey? Ma nge ka bay e falfalan’ riy ni kab gel ko falfalan’ rodad ya gad be un ko maruwel ni ngan wereg e machib ko Gil’ilungun u m’on ni nge taw fare “gafgow ni baga’?”.​—Matthew 24:21; Mark 13:10.

Kan Fal’eg iGay Ma Keb Angin

9. Mang thin ni ke yog Jesus ngak pi gachalpen, ma mang e i rin’ e girdi’ nbochan fare thin ko Gil’ilungun?

⁹ Yugu reb e ban’en ni ku ra pi’ e falfalan’ ngodad ni gadad e tamokun woldug e nap’an ni kad pirieged e girdi’ ni ra mang pi gachalpen mar uned ngodad ko maruwel ni ngan kunuy e woldug. Ngan sul ko duw ni 31-32 C.E., me yog Jesus ngak pi gachalpen ni gaar: “Faan gimed ra yib nga reb e binaw ni pire’ e girdi’ riy fa reb e binaw nib lich e girdi’ riy, mi gimed yan nga lan ngam guyed be’ ni baadag ni ngam pired rok.” (Matthew 10:11) Gathi urngin e girdi’ e baadag e machib, nrogon e n’en ni ur rin’ed ko thin ko Gil’ilungun. Yugu aram rogon, ma pi gachalpen Jesus e kar machibnaged fare thin nib fel’ u fithik’ e pasig ni yug ndemtrug e binaw ni bay e girdi’ riy.

10. Uw rogon ni ke ulul Paul ngay ni nge gay e piin ni bay rogorad?

¹⁰ Tomren ni ke yim’ Jesus min faseg ko yam’, ma fare maruwel ni ngan gaweg e girdi’ ni bay rogorad e be ulul i yan u fithik’ e pasig. I machibnag Paul ngak piyu Jew u lan tafen e muulung rorad nge ngak e girdi’ ni immoy u Athens ko gin ni yima pi’ ban’en ni chuway riy. Nap’an ni i machib u Areopagus u lan e re mach nem ni Greek, ma “boch e girdi’ e kara uned ngak ma ke michan’rad, ma bagayad e Dionysius, reb e tapuf oloboch u court nu Areopagus, nge reb e ppin ni Damaris fithingan, nge yugu boch e girdi’.” Urngin e binaw ni ke yan Paul ngay, ma ke dag rogon ni nge machibnag e “girdi’ ni yoor nge u lan e tabinaw.”​—Acts 17:17, 34; 20:20.

11. Mang boch e kanawo’ ni kan fanay ni fan ni ngan wereg e machib u boch e duw ni ke yan?

¹¹ Nap’an ni ke chuchugur ni nge m’ay e pi duw ko fa bin 19 e chibog, ma piin Kristiano ni kan dugliyrad e ur gayed e piin ni bay rogorad u fithik’ e pasig. U lan reb e article ni bay kenggin ni “Anointed to Preach,” ni aram fare Zion’s Watch Tower ko pul ni July/​August 1881 e ke weliy ni gaar: “Fare maruwel ni ngan machibnag fare thin nib fel’ . . . e ra ulul iyan ‘ngak e piin nib sobut’ lanin’rad’​—piin ni yad baadag ma bay rogorad ni ngar motoyilgad, ni fan e ngani maruweliy fare dowef rok Kristus u fithik’rad, ni piin ni yad ra un ngak.” Piin ta mokun woldug rok Got e baga’ ni yad ma mada’nag e girdi’ ni kefin ra bad u galesiya rorad ma ngar pied e pi tract ngorad ni bay e thin rok Got riy ni kan yoloy ni fan ni nge pug e tafinay rok e girdi’ ni bay rogorad. Tomren ni kan fal’eg i lemnag fene fel’ angin ni keb ko re kanawo’ n’ey nge rogon ni ngan wereg e machib, ma fare Watch Tower ni May 15, 1903, e ke tay chilen ngak e piin ta mokun woldug ni ngar wereged fapi tract “u mit e tabinaw i yan, ko madnom ni kakadbul.”

12. Uw rogon ni ke mon’og e salap rodad ko fare maruwel ni ngan wereg e machib? Mu weliy.

¹² U lan e pi duw ni kefini yan, e kad ga’naged e maruwel rodad ni ngan wereg e machib ngak e girdi’ ni yad bay ko gin ni gathi tabinaw rorad. Ke yib angin ngorad nib gel ko pi binaw ni bay magawon ko salpiy riy nge ngan un ko gosgos e ir tapgin ni girdi’ e de moy u tabinaw rorad ko ngiyal’ ni gad ma yan nga tabinaw rorad ngad guyed yad. U England e nap’an ni yan reb e Mich nge yugu be’ ni ma un ngak e kar nangew ni gubin ngiyal’ ma bay boch e girdi’ ni ma un ko karro u tomren taareb e rran ni ngar pared u l’ay, ma dar rusgow ni ngar unew ko boch e karro mu ur weregew boch e babyor ni The Watchtower nge Awake! ngak e girdi’ u lan e karro. U lan taareb e pul, ma kar weregew 229 ken. Ka rognew ni ra gaar: “Dagur rusgow ni nggu machibgow u dap e l’ay, ngu gin ni yima pi’ ban’en ni chuway riy, ara yugu boch e magawon ni nggu mada’nagew ya gamow manang ni gubin ngiyal’ ma ba’ Jehovah u ba’ romow.” Kar piriegew e magazine route, ma kar tababnagew e fol Bible ngak e girdi’, ma yow l’agruw e kara unew ko pioneer ni ayuw.

13. Mang e n’en ni susun ni ngan rin’ ko maruwel rodad ni ngan wereg e machib nge puluw u boch e binaw?

¹³ Bochan ni be ulul iyan fare maruwel ni ngan gay e piin ni bay rogorad, ma aram thingar ni thabthabelnag e maruwel ni yima ta’ u yugu boch e binaw. Yugu aram rogon ni boor e pi Mich ni ma un ko machib u mit e tabinaw iyan ko madenom ni kakadbul, ma bay boch e binaw ni kara pirieged ni ngan yan nib papay ni ngan guy e girdi’ e gathi rib fel’ ya bochan e ka ba mol e girdi’. Kan thiliyeg e schedule, ma boor e Pi Mich e chiney ni ma gay e girdi’ ko ngiyal’ ni ke chuchugur ko balayal’, sana tomren e muulung ni ma tay e piin Kristiano. Ma re fal’eg i gay n’ey e riyul’ ni keb angin. Fa binem e duw ma ke yoor e pi tamachib u ga’ngin e fayleng ko 2.3 pasent. Kan pining e sorok ngak fare Masta riy ma ma falfalan’nag gum’ercha’dad.

Mu Par ni Gab Gapas ko fare Maruwel ko Mokun Woldug

14. U rogon pangidad ni ngada wereged e machib rodad, ma mang fan?

¹⁴ Yugu reb i tapgin ni gad be falfalan’ e bochan e ngongol nib gapas ni gad ma dag u nap’an ni gad be kunuy e woldug. I yog Jesus ni gaar, “Ma faan gimed ra yan nga lan reb e naun me lungumed ngorad, Nge yib e gapas ngomed. Ma faanra baadag e girdi’ u lan fare naun ni kam marod ngorad, mi gimed pag e gapas ni kam mogned nge par.” (Matthew 10:12, 13) Rogon ni ngan nog ko uw rogon ko thin ni Hebrew nge fare thin u Bible ni Greek nib puluw ngay e taab rogon ni be yip’ fan ni ‘Yibe athapeg ni nge fel’ e yan rom.’ Re lem n’ey e ra pow’iydad ko tin gad ra rin’ u nap’an ni gad ra machibnag fare thin nib fel’ ngak e girdi’. Gad be athapeg ni yad ra adag e thin ko Gil’ilungun. Piin baadag, ma bay e athap rorad ni nge fel’ thilrad Got nfaan yad ra kalngan’rad ko denen rorad, mi yad thiliyeg pangirad, mi yad fol ko tin nib m’agan’ Got ngay. Ma angin, fare gapas rok Got e ra pow’iyey ko yafas ndariy n’umngin nap’an.​—John 3:19; 13:38, 48; 2 Korinth 5:18-20.

15. Uw rogon ni nge par ni ba gapas lanin’dad u nap’an ni kada mada’naged e girdi’ ni dabun e machib ko ngiyal’ ni gad be wereg e machib?

¹⁵ Uw rogon ni nge par ni bay e gapas u lanin’dad nfaanra kad mada’naged be’ ni be dag ni de fel’ e machib u wan’? I tay Jesus chilen ni gaar: “Faanra dabun e girdi’ ko [fare naun] ni kam marod ngay, mu pag fare gapas ni kam mogned ngorad e ra sul ngomed.” (Matthew 10:13, NW) Thin ni ke yoloy Luke u murung’agen rogon ni ke l’og Jesus fa 70 e gachalpen e ba muun ngay e thin rok ni gaar: “Faanra bay be’ riy ni nib t’uf e gapas rok, mi gimed pag e gapas ni ka mogned nge par rok. Machane faanra dariy, mu pag ni nge sul ngomed fare gapas ni kam mogned ngorad.” (Luke 10:6) Faan gad ra machibnag e thin nib fel’ ngak e girdi’, ma ngada rin’ed e re n’ey u fithik’ e falfalan’ nge gapas. En ni ma dariy fannagdad, nge en ni ma gun’gun’nagdad, ara ma yog e thin ni ra amithnag gum’ercha’dad e ra yog ni pag fare thin rodad ko gapas ‘nge sul ngodad.’ Machane pi n’ey e dabi warnag e gapas rodad, ya aram reb e woomngin e kan ni thothup rok Jehovah.​—Galatia 5:22, 23.

Ban’en nibFel’ ni Be Nameg e Piin Tamokun Woldug

16, 17. (a) Mang e gad ra nameg u nap’an ni gad ra sul ngak be’? (b) Uw rogon ma rayog ni ngada ayuweged e piin ni bay e deer rorad ko thin nu Bible?

¹⁶ Bochan ni gadad e piin tamokun woldug ma gad be falfalan’ ni gadad bang ko fare maruwel ni ngan kunuy e girdi’ ni nge yog ngorad e yafas ni dariy n’umngin nap’an. Ma ri gad ba falfalan’ nfaanra fa cha’ ni kad machibnaged e ke fol, ma ka baadag ni nge fil boch ban’en, ma ra dag ni “ir be’ ni baadag e gapas”! Sana bay boor e deer rok u murung’agen e thin nu Bible ma kad guyed ni mo’maw’ ni ngad pied e fulweg ni urngin u nap’an ni kam guy fa cha’ ko yay ni som’mon. Bochan ni de fel’ ni ngan par nib n’uw nap’an u reb e tabinaw ko yay ni som’mon ni kan yan, ma mang e gad ra rin’? Ngada nameged ni ngad folgad ko n’en ni kan ta’ chilen kafram ni sagonapan 60 e duw ni ke yan.

¹⁷ “Susun urngin e Pi Mich rok Jehovah e bay rogorad ni ngara filed e Bible ngak be’ nrogon.” Ereram e thin ni ke m’ug ko fa bin dalip ken ko fapi babyor ni kan ngongliy kafram ni Model Study fithingan ni i tabab ko duw ni 1937 nge mada’ ko 1941. I yog ni gaar: “Urngin e piin tamachib ko [Gil’ilungun] e thingara maruwelgad nib elmerin ni ngara ayuweged e piin ni yad ba fel’ u wan’ Got ma be dag ni yad baadag fare machib ko Gil’ilungun. Ngan sul ngak be’ [return visits] e susun ni ngan rin’ ngak e pi cha’ nem, ngan pi’ e fulweg ko pi deer nib thilthil . . . , ngemu’ ma ngan tababnag e fol Bible ni ngan rin’ nrogon . . . ni ka chingiyal’ nem nfaanra rayog.” Arrogon, gad ra nameg ko ngiyal’ ni ngan sul ngak be’ ma ngan fil e Bible ngak ma ngan rin’ e re n’ey ni gubin ngiyal’.a Ngongol nib gol nge runguy ngak e piin ni baadag e machib e ra k’aringdad ni ngad fal’eged rogodad ma ngada filed e Bible ngak nib fel’rogon.

18. Uw rogon ni ngada ayuweged e piin ni kefin ni un ko fol Bible ni ngar manged pi gachalpen Jesus Kristus?

¹⁸ U daken e ayuw ko fare babyor ni Knowledge That Leads to Everlasting Life nge fapi brochure ni bod fa ken ni What Does God Require of Us?, e rayog ni ngada filed e Bible ngak be’ riy ni ba’ angin ma aram e rayog ni ngada ayuweged e girdi’ nib biech ni baadag e machib ni ngar manged pi gachalpen. Bochan ni gad ma athamgil ni ngad folwokgad rok Jesus Kristus ni ir fare Sensey ni rib Fel’, ma baga’ ni fapi cha’ ni gad ma fil e Bible ngorad e ku ura filed rodad ni gad ba gapas, ma gad ba falfalan’, nge fadad yul’yul’, nge feni gad ma tay fan e motochiyel rok Jehovah. Nap’an ni gad ra pi’ e fulweg ko deer ni ke fith e piin ni kefin ra uned ko fol Bible ni fan ni ngada ayuweged yad, maku gad ra fil ngorad rogon ni rayog rodad ni nge yog rorad ni ngara pied e fulweg ngak e piin ni ra fithrad. (2 Timothy 2:1, 2; 1 Peter 2:21) Gadad ni gadad e piin ta mukun woldug ni be yip’ fan ban’en, e ba mudugil ni ke falan’dad ni bay average ni 4,766,631 e girdi’ ni ma un ko fol Bible u ga’ngin yang e fayleng ko re duw ney ni kefini yan. Ma ri gad ba falfalan’ nfaanra gad bang ko piin tamukun woldug ni yad be un ko maruwel ni ngan fil e Bible ngak e girdi’.

Ngan Par nib Falfalan’ ko Maruwel ni Ngan Kunuy e Woldug

19. Mang fan ni immoy boor i fan nib manigil ni nge felan’uy ko fare mukun woldug u nap’an ni be un Jesus ko machib nge boch nga tomren?

¹⁹ Bay boch i fan nib fel’ ni nge felan’uy ko maruwel ni ngan kunuy e woldug u nap’an ni be un Jesus ko machib nge boch nga tomren. Ma ngiyal’ nem e boor e girdi’ ni kara adaged fare thin nib fel’. Kari gel e falfalan’ u nap’an e Pentekost ko duw ni 33 C.E., ya bochan ni sagonapan 3,000 e girdi’ e kar folgad be pow’iyrad Peter, me yog ngorad fare kan ni thothup rok Jehovah, mi yad mang bang ko nam nu Israel nib spiritual. Riyul’, yad be yoor i yan, ma ma kari gel e falfalan’ ya “gubin e rran ma be pethuy Jehovah ngorad e piin ni yibe ayuwegrad.”​—Acts 2:37-41, 46, 47, NW; Galatia 6:16; 1 Peter 2:9.

20. Mang e ma yibnag e falfalan’ nib gel ko maruwel ni ngan kunuy e woldug?

²⁰ Ngiyal’ nem, ma ke m’ug nib riyul’ e thin ni ke yiiynag Isaiah ni gaar: “Kam yoornag [Jehovah] e piin ni ma par ko fare nam; ma bochan e re n’ey e kam pi’ ngorad e falfalan’ nib ga’. Yad be falfalan’ u p’eowchem ni bod e falfalan’ ni yima ta’ u nap’an e mukun woldug, ni bod e falfalan’ ni ma ta’ e piin ni yad be foth e chugum ni kar feked ko mal.” (Isaiah 9:3, NW) Yugu aram rogon ni gad be guy e chiney ni fare ‘nam ni kan yoornag e girdi’ ni ma par riy’ ni kan dugliyrad e ke chuchugur ni nge gaman, ma ke gel e falfalan’ rodad ya gad be guy ni be yoor i yan e piin tamokun woldug u gubin e duw.​—Psalm 4:7; Zekariah 8:23; John 10:16.

21. Mang e gad ra weliy ko bin migid e article?

²¹ Ri bay boor i fan ni gad ra par ni gad ba falfalan’ ko fare maruwel ni ngan kunuy e woldug. Fare machib ko athap, nge fare maruwel rodad ni ngan gay e piin ni bay rogorad, nge ngongol rodad ni ba gapas​—ni urngin e ra yibnag e falfalan’ ngodad ni gadad e piin tamokun woldug. Machane, ke k’aring e re n’ey boor e girdi’ ni ngar daged e ngongol nib togopuluw. Aram e n’en ni ke buch rok John ni apostal. Kan kalbusnag u bochi donguch ni Patmos fithingan “ni bochan ni ke weliy murung’agen Got miki weliy murung’agen Jesus.” (Revelation 1:9, NW) Ere uw rogon ma gad par ni gad ba falfalan’ ko ngiyal’ ni ngeb e togopuluw ngodad? Mang e ra ayuwegdad ma rayog ni ngad kadedan’dad ko piin ni gad be machibnag ni ba gelan’rad? Bin migid e article rodad e ra pi’ e fulweg ko gali deer n’ey ni kan fek u Bible.

[Footnotes]

Uwrogon ni Ngam Pi’ e Fulweg?

• Mang e tamokun woldug ni be yip’ fan ban’en?

• Mit i mang e machib ni gad be wereg?

• Mang fan ni fare maruwel ni ngan gay fapi gachalpen e ke yib angin?

• Uw rogon ni nra par ni gad ba gapas ko maruwel ni ngan mokun woldug?

• Mang fan ni gad ra par ni gad ba falfalan’ ko maruwel ni ngan kunuy e woldug?

[Pictures on page 10, 11]

Machib ni kan ta’ u nap’an e bin 1 nge bin 20 e chibog

[Pictures on page 11]

Bod rogon Paul, ma piin ta mukun woldug e kara guyed rogon ni ngar machibnaged e girdi’ u gubin yang

[Picture on page 11]

Ngan wereg e thin nib fel’ nib fel’ lanin’uy