“Dab Mu Rusgad! Ya Kug Gel ko Fayleng”

FARE rran ko yam’ ni tay Jesus e​—rorran ni 14 ko pul rok piyu Jew ni Nisan—​i tabab ko ma aw i yal’ ko Aningeg fen e maruwel, ko March 31, 33 C.E. Re manungel’ nem, me muulung Jesus nge pi apostal rok nga lan ba singgil ko thal ni lang u ba naun u Jerusalem ni ngar madenomnaged fare madenom ko Palukaf. Nap’an ni be fal’eg rogon “ni nge chuw ko re fayleng ney nge yan ngak e en Chitamangiy,” me dag Jesus ni i par nib t’uf e pi apostal rok ke mada’ko tomur. (John 13:1) Uw rogon? Rogon ni i fil boch ban’en ngorad nib ga’ fan, ma aram e fal’eg rogorad ko tin ka bay nga m’on.

Nap’an ni be n’uw e nep’ i yan, me gaar Jesus ngak pi gachalpen: “Dab mu rusgad! Ya kug gel ko fayleng.” (John 16:33) Mang e n’en ni be yip’ fan e re thin nem ni aram feni dariy e marus riy? Bang riy, e re n’ey e: ‘Fare kireb nu fayleng e dawori k’aringeg nga gu pilngan’ug ara ke k’aringeg nga gu fulweg taban e kireb ko kireb. Dawor gu pag e fayleng nge pingegeg nga gu un nga ngongolen. Re n’ey e ku rayog ni nge riyul’ u puluwmed.’ N’en i fil Jesus ngak e pi apostal rok ni yad ba yul’yul’ ko pi awa ni tomuren e yafas rok u fayleng e ku arrogon ni ra ayuwegrad ngar gelgad ko fayleng.

Mini’ e en ra siyeg ni ke yoor e kireb u fayleng e chiney? Uw rogon ni nga uda rin’ed ko ngongol ni de puluw nge ngongol ni maangach? Pi n’eney e der k’aring e fanenikan ngodad ara k’aring ni ngad fulweged taban e kireb ko kireb? Uw rogon ni be af ngodad e ngongol ni be kireb i yan ni ke liyegdad? Min puthuy ko biney i gadad ni daanda flontgad nge denen nib mom ni gad ma rin’ ma aram e gadad be cham nga l’agruw mit e mahl: ni aram e re fayleng ni kireb ney u wuru’ i dowdad nge ngak e lumel ni kireb u fithik’dad. Gur rayog ni ngad lemniged ni rayog rodad ni ngada gelgad ni dariy e ayuw rok Got riy? Uw rogon ni nge yog e ayuw rok ngodad? Mang e pi felngin ni thingari yog ngodad me yog ni da togopuluwgad ko pi n’en ni baadag e dowef rodad? Fulweg ko pi n’ey e, ngad lemnaged e pi n’en ni fil Jesus ngak pi gachalpen ni yad ba t’uf rok ko fare rran ni tomur ko yafas rok u fayleng.

Mu Sobutan’ Ma Ga Gel Ngak e Tolangan’

Mu lemnag, ni bod rogon, fare magawon ko tolangan’, ara ufanthin. Rogon murung’agen, fare Bible e gaar: “Tolangan’ e bay u m’on ko ma dol, ma lem ni ufanthin e bay u m’on ko dodogog.” (Proverbs 16:18, New World Translation) Fare Thin nu Bible e ki fonownagdad ni gaar: “Faanra be lemnag be’ ni ba’ rogon ma be’ ni dariy rogon, ma aram ir e be bannag laniyan’.” (Galatia 6:3, NW) Arrogon, tolangan’ e ma kirebnagey ma ma bannagey. Gadad ba gonop ni faan gad ra fanenikan “ni ngad tolangniged gadad ma gad ufanthin.”​—Proverbs 8:13, NW.

Immoy e magawon rok e pi apostal rok Jesus ko tolangnagey nge ufanthin fa? Ba nap’an taab yay, ni ura luaged ko mini’ u fithik’rad e baga’. (Mark 9:33-37) Ma kub yay, e James nge John e ra deeriyew ni nge mudugil tagil’row u lan fare Gil’ilungun. (Mark 10:35-45) Rib adag Jesus ni nge ayuweg pi gachalpen ni ngar paged e pi n’eney nib mom ni ra un rin’. Ere nap’an ni yibe abich ni fan ko Fare Paluk’af, me sak’iy, me bachiy bangi tawol nga lukngun, me tabab i luknag e rifrif u ay pi gachalpen. Ere ta’ ni dabi maruwar u wan’rad e n’en nib adag ni ngar filed. I yog Jesus ni gaar, “I gag e Somol romed nge Tamachib romed, ma kafini gu mu’ i luknag e rifrif u aymed,” “ere nge bigimed mi i luknag e rifrif u ay bigimed.” (John 13:14) Tolangan’ e thingar ni thiliyeg ko n’en ni ba math’ keru’ ngay ni aram e​—sobutan’.

Yugu aram rogon, ma tolangan’, e de mom ni ngan gel ngay. Meni taaboch ko re manungel nem u tomuren ni ke pag Jesus Judas Iskariot ke yan, ni aram e be chugur ni nge yognag ngan li’, me bi sum e maluagthin nib gel u fithik’ fa 11 i apostal. Mang e lem rorad? I mini’ rorad e ba dake ba th’abi ga’! Ma de puwan’ Jesus ngorad, ya ki guman’nag Jesus ir bayay nge fal’eg i weliy feni ga’ fan ni ngaun i pigpig ngak boch e girdi’. I gaar: “Pi pilung nu roy u fayleng e baga’ lungurad u puluwon e girdi’ rorad, ma piin ni yad ma gagiyegnag e girdi’ e yima yog ni yad e tafager rok e girdi’. Machane gimed e gathi ara’ rogon ni ngam pired; ya en ni ir e th’abi tolang u fithik’med e thingari par ni bod rogon e en nth’abi bitir u fithik’med, ma cha’ ni ir e ngi yog e thin romed e thingari par ni bod rogon e en ntapigpig.” Me puguran ngorad e n’en ni rin’, me puthuy ngay ni gaar: “I gag e tapigpig ni gu bay u fithik’med.”​—Luke 22:24-27.

I nang fapi apostal e n’en ka nog fa? Ba mich ni arrogon. Boch e duw nga tomuren me yoloy apostal Peter ni gaar: “Ere thingari gimed gubin ni nge taareb rogon e lem romed mu um runguyed gimed, me bigimed me t’uf rok bigimed nrogon e piin ni walag ni girdien Kristus, mu um pired nib fel’ e thin romed ngomed ma ba sobut’ lanin’med ngomed.” (1 Peter 3:8) Uw feni rib ga’ fan ni ku arrogodad ni ngad sobutan’gad ngad gelgad ngak e tolangan’! Gadad ba gonop ni dabda yog gad ko gay rogon ni ngan gilbuguwan, meb gelngiy nib gel, ara liw ni tolang. Ya be yog e Babyor nib Thothup ni gaar, “I Got e ma togopuluw ngak e piin nib tolangan’rad,” ma “ma ayuweg e piin nib sobutan’rad.” (James 4:6) Ku arrogon, ni yog reb e fonow nib gonop kakrom ni gaar: “Angin e sobutan’ nge madgun Jehovah e fel’ rogon nge flaab nge yafas.”​—Proverbs 22:4, NW.

Ngan Gel Ngak e Fanenikan​—Uwrogon?

Mu lemnag reb e lem nib ga’ ni bay u fayleng ni​—fanenikan. Demtrug ko bochan e marus, fekyath, laniyan’, togopuluw, ngongol ni de puluw, be’ ma nam rok, be’ ma ganong rok, ara ramaen dow e girdi’, aram e fanenikan ni ba dake go’ bay u gubin yang nib liyegdad. (2 Timothy 3:1-4) Fanenikan e ki immoy nib th’um nga wuru u nap’an Jesus. Piin ni yad ma kunuy e tax e yib fanenikayrad ma yima tulufrad u lan e binaw rok piyu Jew. Piin ni Jew e dara ma puruygad ngak piyu Samaria. (John 4:9) Ma piin ni gathi yad e Jew e ku arrogon ni ma sap piyu Jew ngorad ni yad ba sobut’. Machane, munmun, ma fare kanawoen e liyor ni tababnag Jesus e bayi un e girdi’ ko urngin e nam ngay. (Acts 10:34, 35; Galatia 3:28) Ere fithik’ e t’ufeg rok me pi’ ban’en nib biech ngak pi gachalpen.

Jesus e tamilangnag ni gaar: “Nggu pi’ ngomed reb e motochiyel nib biech, ni nge bigimed me t’uf bigimed rok;. ni bod rogon ni u gu t’ufegmed; maku arrogomed ni nga ki t’uf bigimed rok bigimed.” Thingar ra filed rogon ni ngar daged ere t’ufeg ney, me ulul ngay ni gaar: “Aray e n’en ni urngin e girdi’ ma yad ra nang riy ni gimed pi gachalpeg, ni faanra bay e t’ufeg romed ngomed.” (John 13:34, 35, NW) Fare motochiyel e ba biech ko re n’en ni baaram ni th’um nga wuru’ e t’ufeg ko “en gimew ni bod gur.” (Leviticus 19:18, NW) Ko bin ngan e kanawo’? I tamilangnag Jesus e re n’em, ni gaar: “Biney e motochiyel rog, ni aram e nge t’uf bigimed rok bigimed ni bod rogon ni ug t’ufegmed. Dariy be’ ni bay e t’ufeg rok ni kab gel ko biney, ni aram thingari pi’ be’ e yafas rok ni fan ngak e pi fager rok.” (John 15:12, 13) Thingari i m’ag u wan’rad ni ngar pied e yafas rorad ni fan ngorad nge ngak boch e girdi’.

Girdi’ ni de flont e uw rogon ni ngar chuweged e fanenikan ni be m’ug nib kireb ko yafas rorad? Ngan ta’ e t’ufeg ni kan pagfay nga luwan. Bokum milyon e girdi’ nib yul’yul’ u gubin e nam, nge yalen, nge girdi’ ni urmed u boch e teliw kafram, nge am e ri yad be rin’ ni aram rogon. Kar bad nga taabang kar taarebgad, kar manged ba binaw ni dariy e fanenikan riy​—fapi walag nu fayleng ni Pi Mich rok Jehovah. Yad be tay ngan’rad fapi thin rok apostal John faani kan thagthagnag ni gaar: “En ni be fanenikay walagen ni girdien Kristus e be’ ni ma thang e fan ko girdi’; ma gimed manang ni be’ nib tathang e fan ko girdi’ e dawori yog e yafos ndariy n’umngin nap’an ngak.” (1 John 3:15) Tin riyul’ e Kristiano e gathi kemus ni yad be siyeg ni ngar feked talin e cham ngar uned ko mahl ya ku yad be maruwel nib gel ni yad be athamgiliy ni ngaur daged e t’ufeg ngorad.

Machane, susun e thingari uw rogon e lem rodad ngak e piin ni gathi gadad taab mich ma yad be dag ni yad be fanenikaydad? Nap’an nnitining Jesus nga lang nga baley i gek’iy, me meybil ni fan ngak e piin ngar lied ngem’, ni gaar: “Chitamag, mu n’ag fan rorad, ya dar nanged e n’en ni yad be rin’.” (Luke 23:34, NW) Nap’an ni malangnag fa piin ni kar suggad ko fanenikan Stefen ni gachalpen nge yim’, ma tin ni tomur e thin ni yog e gaar: “Jehovah, dab mu togopuluwnag ere denen ney ngorad.” (Acts 7:60, NW) Jesus nge Stefen e yow baadag e thin th’abi fel’ ni ku fan ngak e piin ni kar fanenikayed yow. Dariy e fanenikan u gum’ircharow. “Ere ngaud maruweliyed e tin nib fel’ ngak urngin e girdi’,” fare Bible e aram e n’en ni be yog ngodad.​—Galatia 6:10.

‘Ba Taayuw ni Manemus’

Nap’an ni ku yad be muulung fa 11 i apostal rok nib yul’yul’, me yog Jesus ngorad ni dabki n’uw nap’an me chuw rorad. (John 14:28; 16:28) Machane me micheg ngorad ni gaar: “Bay gu wenignag ngak e en Chitamangiy ngaki pi’ ngomed reb e taayuw ni nge par romed ni manemus.” (John 14:16, NW) Fare taayuw nni micheg e aram fare Kan ni Thothup rok Got. Ra fil ngorad e tin toar ban’en ko thin nu Bible me fulweg nga lanin’rad e pi n’en ni ke fil Jesus ngorad u nap’an e maruwel rok u fayleng.​—John 14:26.

Uw rogon ni ra ayuwegdad e kan ni thothup e chiney? Aram e, fare Bible ni thin rok Got ni thagthagnag. Fapi pumoon ni urogned e yiiy mu ur yoliyed e Bible e i “ayuwegrad e kan ni thothup.” (2 Peter 1:20, 21; 2 Timothy 3:16) Faanra uda filed e Bible ma gad rin’ e tin kad filed ma ra pi’ ngodad e llowan’, nge gonop, ma gad nang fan, nge tamilangan’, ma gad guy ni ke tamilang, me pi’ gelngin ni ngaud lemgad. Ere gathi aram e ke fel’ rogon i fal’eg rogodad ni ngada mada’niged e mochuch ko re fayleng nib kireb ney?

Fare kan ni thothup e ku reb e taayuw u reb e kanawo’. Kan ni thothup rok Got e ba’ gelngin nib gel ma baga’ fan, ma ma fal’eg rogon e piin ni yad bay u tan gelngin ni ngar daged felngin Got. “Fapi wom’engin e kan ni thothup e t’ufeg, falfalan’, gapas laniyan’, guman’, gol, fel’ ngak e girdi’, yul’yul’, sobut’an, nge t’ar laniyan’,” aray rogon ni yog fare Bible. Gathi aray e pi felngin ni rib t’uf rodad ni bochan ni nge yog ni ngad gelgad ko tin baadag e dowef rodad ni fan ko ngongol ni darngal, nge maluagthin, nge awan’, nge damumuw nib gel, nge ku boch ban’en ni bod e tiney?​—Galatia 5:19-23.

Gad ra pagan’dad nga gelngin Got, maku rayog ni yib “gelngidad nge pag rogon nga gelngidad ni bay rodad” nge yog ni yug demtrug e magawon ara gafgow nib gel ma rayog ni darod u fithik’. (2 Korinth 4:7, NW) Ngiyal’ ni gomanga dabi chuweg e kan ni thothup e magawon rodad ara lumel, ma rib mudugil ni rayog ni ayuwegdad nge yog ni da kadedan’dad u fithik’. (1 Korinth 10:13) I yoloy apostal Paul ni gaar, “Ya urngin ban’en ma ba’ gelngig riy ni gelngin faanem nib fel’ ni ir e pi’ ngog.” (Filippi 4:13) Ma pi’ Got ere gelngin nem u daken e kan ni thothup rok. Ere uw feni ngari fel’ u wan’dad fare kan ni thothup! Kan micheg ngak e piin ni ‘ba t’uf Jesus rorad ma yad be fol ko pi motochiyel rok.’​—John 14:15.

“Mu Pired u Fithik’ e T’ufeg Rog”

Bin tomur e nep’ rok ni immoy rorad nib girdi’, miki yog Jesus ngak e pi apostal rok ni gaar: “Eni bay e pi motochiyel rog rok ma be fol riy, e aram e cha’ ni gub t’uf rok. Ma aram e ra chel ma cha’ ni gub t’uf rok e ra t’uf ko Chitamag.” (John 14:21, NW) “Mu pired u fithik’ e t’ufeg rog,” i ning chilen ngorad. (John 15:9) Uw rogon ni gad ra par u fithik’ e t’ufeg ko en Chitamangiy nge en Fak ma ra ayuwegdad ko cham rodad ngak e lem nib sug ko denen ni ni bay u fithik’dad nge fare fayleng ni kireb?

Gur, rayog ni ngad ayuweged gadad ko denen ni baga’ nib mom i rin’ ni faanra dariy ban’en nib gel ni nge pi’ gelngidad ngada rin’ed? Mang e n’en ni ka ba’ ni ra gelnagdad nge migid ni ngad adaged ni nge yib e tha’ nib fel’ u thildad Jehovah Got nge en Fak? Ernesto,a e ba pagal ni i cham nib elmirin ni be togopuluw ko ngongol nib kireb ni i par riy ni ke mecham ko yafas rok ni aram rogon ni ki i par nib fel’ yangaren, e weliy ni gaar: “Gu baadag ni nga gu falfalan’nag Got, ma kagu fil u Bible ni de fel’ u wan’ rogon ni ugu par. Ma aram mu gu dugliy u wan’ug ni nga gu mang be’ ni kugu thil, nga gu par ko pi fonow rok Got. Gubin e rran, ma thingar gu cham ni nga gu togopuluw ko lem ni ra kirebnigey, ma ba alit ni ka be yib i suguy lanin’ug. Machane kargu dugliy u wan’ug ni nga gu gel ko re cham ney, ma ri da kuugu tal ko meybil ni gu be ning e ayuw rok Got. Tomuren l’agruw e duw ma ke m’ay e gin ga’ riy, ma yugu aram rogon ma ri kugu be gelnageg.”

Ma fare cham ko fayleng u wuru’ i dowdad e, ngam lemnag fare m’an ko meybil ni pi’ Jesus u m’on ni nge chuw ko fare singgil ko thal ni lang e naun u Jerusalem. I meybil ko Chitamangin ni fan ngak pi gachalpen, me ning ni gaar: “Gu be wenignag ngom, ni gathi ngam chuwegrad u fayleng, machane ngam ayuwegrad ni bochan faanem nib kireb. Gathi yad bang ko fayleng, ni bod gag ni gathi gu bang ko fayleng.” (John 17:15, 16, NW) Uw feni rib be gelnag e pagan’! Jehovah e be ayuweg e piin ni yad ba t’uf rok ma be pi’ gelngirad yad be par ni yad ba dar ko fayleng.

“Ngam Maruweliy e Michan’”

Ra un fol ko pi motochiyel rok Jesus ma ba mudugil ni ra ayuwegdad ngad gelgad ko cham ngad togopuluwgad ko fare fayleng ni kireb nge lem nib mom ni nge denen. Baga’ fan ni ngan gel ko pi n’eney, machane, dawori yog ni nge chuweg e fayleng ara denen ni ke af ngodad. Machane dabi mulan’dad.

I tamilangnag e Bible ni gaar, “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay,” “machane en nra rin’ e tin nib m’agan’ Got ngay e ra par nib fas ndariy n’umngin nap’an.” (1 John 2:17) Jesus e pi’ e yafas rok ni nge ayuweg e girdi’ ko denen nge yam’ ni “urngin e piin ni ra maruweliy e michan’ rorad ngak.” (John 3:16) Bod ni gad ra ilal ko tamilangan’ rodad ko tin nib m’agan’ Got ngay nge tin ke lemnag, ma aram e, ngad lemniged u gum’irchadad fare fonow rok Jesus ni gaar: “Mu maruweliyed e michan’ romed ngak Got, mi ki gimed maruweliy e michan’ romed ngog.”​—John 14:1, NW.

[Footnote]

[Picture on page 6, 7]

“Mu pired u fithik’ e t’ufeg rog,” ta’ Jesus chilen ngak e pi apostal rok

[Picture on page 7]

Ngan chuw ko denen nge angin e dabki n’uw nap’an me riyul’