Fare Rran ni Nga i Par u Wan’uy

IR FARE rran ni piliyeg ni ga’ngin rogon kanawoen e girdi’ ni fan ko tinib fel’ ni manemus. Dakuriy reb e rran u lan e chep ni ka e yib angin ko gabul nge langleth u puluwon e girdi’. Aram fare rran ni mu’nag Jesus urngin e n’en ni yib nga fayleng ni nge rin’. Ni richibiy nga baley i gek’iy ni yima gafgownag e girdi’ riy, me pogofan ko yay ni tomur me tolul nga lang ni gaar: “Ke lebug!” (John 19:30) Mang fan ni yib Jesus?

I gaar e Bible, “ni bod e en ni Fak e Girdi’ nde yib,” “ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matthew 20:28) I pi’ Jesus e yaal, ara pogofan rok, ni bochan ni nge yog ni ayuweg e girdi’ ko denen nge yam’ ni ke af ngorad. Arrogon, “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad ya ke yog e yafas ndariy n’umngin nap’an ngorad.” (John 3:16) Ere uw feni ga’ fan e binem e maligach ni ke pi’ Jesus!

Fare rran ni yim’ Jesus e aram fare rran ni ngan tay u wan’uy maku bay reb i fan. Rorran i n’enem ma en Fak Got e fil ngak e pi apostal rok boch ban’en nib ga’ fan ni ra ayuwegrad ngar pared ni yad ba yul’yul’. Yu bug ni tomur e thin ni i yog e susuna uw feni ri taw nga gum’irchaen pi gachalpen! Mang e pi n’en i fil? Uw rogon ni ra yib angin ngodad e pi n’en ni i fil Jesus ngorad? Pi deer ney e yira weliy ko bin migid e article.