Uw Rogon Ni Nge Thiliyeg Jesus E Par Rom?

JESUS KRISTUS e ir e sensey nib fel’ ni i par u Palestine ni sagonapan 2,000 e duw kakrom. Buchuw e thin ni kan weliy u murung’agen e par rok nap’an ni kab bitir. Machane, ba tamilang ni nap’an ni ke gaman 30 e duw rok me tabab ni nge “weliy murung’agen e thin nriyul’.” (John 18:37; Luke 3:21-23) Fa aningeg e gachalpen Jesus nra tiyan’rad ko par rok u lan dalip nge baley e duw e ra yoloyed murung’agen.

Nap’an ni ka be un Jesus ko machib, me motochiyelnag ngak pi gachalpen, ban’en ni rayog ni nge chuweg e magawon ko girdi’. Mang e re nem? Gaar Jesus: “Nggu pi’ reb e motochiyel nib biech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed.” (John 13:34) Arrogon, t’ufeg e ir e re ne’n nrayog ni nge pithig boor e magawon ko girdi’. Ba’ biyay ni kan fith Jesus ko mang e motochiyel ni bin th’abi ga’, me fulweg ni gaar: “‘Thingari t’uf rom Jehovah ni Got rom u polo’ i gum’ircha’em, ngu polo’ i lanin’um, ngu polo’ i lem rom. Ereray e bin th’abi ga’ nge bin th’abi ga’ fan e motochiyel.’ Ma bin migid ngay e motochiyel e bod e biney ni gaar, gin’en ni ga bay riy e thingari t’uf rom e en ni ir e migid ngom ni gowa gur.’”​—Matthew 22:37-40, New World Translation.

Ke dag Jesus ngodad ko thin nge ngongol rok rogon ni ngan dag e t’ufeg ngak Got nge girdi’. Ngada yaliyed boch ban’en ni i rin’ ma ngad guyed ko mang e gad ra fil riy.

Machib Ni Tay

Reb e welthin ni tay Jesus nib lingagil, me gaar ngak pi gachalpen: “Dariy be’ nrayog ni nge mang sib rok l’agruw i masta; ya ra fanenikay bagayow me t’uf bagayow rok; ya ra yul’yul’ ngak bagayow me dariyfannag bagayow. Dabiyog ni ngam manged tapigpig rok Got ma ki gimed mang e tapigpig rok e salpiy.” (Matthew 6:24) Chiney, ka ba fel’ ni ngad fol gad ko fonow ni pi’ Jesus ngak e girdi’ ni gaar, ngan tay Got nib m’on ko yafas rorad, ya boor e girdi’ ni ma michan’rad ni salpiy e rayog ni nge pithig urngin e magawon? Riyul’ ni ba t’uf rodad e salpiy ko par rodad e ngiyal ney. (Eklesiastes 7:12) Machane, ra mu pag ni chugum e ra mang e masta rom, ma “chugowen e salpiy” e aram e ngongol ni ra gagiyegnagem. (1 Timothy 6:9, 10) Ma baga ni girdi’ ni kara awgad ko re wup ney e ke kireb e tabinaw rorad, nge dowef rorad, ma boch e kar m’ad ni bochan.

Machane, faan mang ngad sapgad ku Got ni Ir e masta rodad ma bay fan e yafas rodad. Bochan ni Ir e En ni Tasunmiy, ere yafas e yib rok ma goo Ir e thingar da liyorgad ngak. (Psalm 36:9; Revelation 4:11) Boch e girdi’ e kara filed murung’agen felngin Got ma ke t’uf Got rorad ma kar folgad ko boch e motochiyel ni pi’ Got ngorad. (Eklesiastes 12:13; 1 John 5:3) Gad ra yodor, ma ra fel’ rogodad riy.​—Isaiah 48:17.

Fare welthin u daken e burey, e ke fil Jesus ngak pi gachalpen rogon ni ngan dag e t’ufeg ko girdi’. Me gaar: “Ere mu rin’ed ngak e girdi’ e tin ni gimed ba adag ni ngar rin’ed ngomed; ereray fan fare motochiyel rok Moses nge tin i fil e pi profet ngak e girdi’.” (Matthew 7:12) Fare bugithin ni pi “pumoon” ni i yog Jesus e ba muun ngay e toogor ku be’. Ko re welthin nem, ke gaar: “Kam rung’aged ni kan nog ni ke lunguy, Nge t’uf rom e pi tafager rom, ma ga fanenikay e pi toogor rom. Machane chiney e nggog ngomed ni nge lungug, Nge t’uf romed e pi toogor romed, mpied e meybil rok e piin ni yad be ngongliy e kireb ngomed.” (Matthew 5:43, 44) Gathi riyul’ ni ra m’ay e magawon rodad ko ngiyal’ ney nfaanra bay e t’ufeg ni aram rogon u fithik’dad? Mohandas Gandi ni ir e ba ga’ u India ma reb e Hindu e aram rogon e n’en ni be lemnag, me gaar: “Faan mang [gad] ra fol ni gad gubin ko machib ni i pi’ Jesus u daken e burey ma rayog ni ngada pithiged e magawon rodad u ga’ngin yang u fayleng. Ran fol ko boch e thin ni i weliy Jesus u murung’agen e t’ufeg ma rayog ni nge chuw e gafgow ko girdi’.

Pin’en Ni Rin’

Gathi kemus ni ke machibnag Jesus rogon ni ngan dag e t’ufeg, machane, riyul’ ni ma fol ko pi thin ni ke yog. Susun, ma mon’eg Jesus yugu boch e girdi’ uwan’ ko tirok. Reb e rran, ma kaygi yoor e maruwel ku Jesus nge pi gachalpen ni yad be ayuweg e girdi’ ma dabiyog ni ngara abichgad. Ke nang Jesus ni ba t’uf rok pi gachalpen ni ngara tofangad boch, me fekrad nga bang ni goo yad. Machane, nap’an ni kar bad nga ram ma kara guyed boor e girdi’ ni be sonnagrad u rom. Mang e ga ra rin’ ni faanra ri ga baadag ni ngam toffan machane kam guy boor e girdi’ ni rib t’uf rorad e ayuw rom? I runguyrad Jesus “me tabab i machibnag boor ban’en ngorad.” (Mark 6:34) Ma ayuweg Jesus e girdi’ u gubin ngiyal’ ya ir be’ nib ta runguyey.

Ka boor ban’en ni i rin’ Jesus ni fan ko girdi’ ko bin ni i machibnagrad. Ke ayuwegrad ko n’en ni bat’uf nga dowrad. Aram rogon, fayanem ni ke duru’iy Jesus e girdi’ ni ka boor ko 5,000 ni kara rung’aged e welthin rok ke mada’ ko balayal. Ma dawori n’uw nap’an nga tomren, miki duru’iy boor e girdi’ ma yaney, e ka boor ko ​— 4,000​—ma yad e girdi’ ni kara motoyilgad ku Jesus u lan dalip e rran me m’ay e ggan rorad. Som’on, e ke mus ni lal yal’ e flowa nge l’agruw e nig, ma bin migid e maangang ni fal’eg Jesus, e immoy medlip yal’ e flowa nge in e nig. (Matthew 14:14-22; 15:32-38) Aram e maangang? Arrogon, ya ir e en ni ma fal’eg e maangang.

Maku, i golnag boor e girdi’ nib m’ar. I golnag e girdi’ ni malmit, be’ ni ke mugutgut ay, girdi’ nib daraw, nge biling. Musko girdi’ ni kar m’ad, me fasegrad ko yam’! (Luke 7:22; John 11:30-45) Ba’ biyay ni ke wenig be’ ni ba daraw ngak: “Faanra m’agan’um ngay ni ngam chuweg e daraw rog ma ga chuweg, ya rayog rom.” Mang i rin’ Jesus? “Me taganan’ Jesus ngak, me k’iyag pa’ nge math ngak me fulweg ngak ni gaar: “Mm’agan’ug ngay, ere nge chuw e daraw rom!” (Mark 1:40, 41) U daken fapi maangang me dag Jesus ngorad nib t’uf e girdi’ rok nib gafgow.

Mom’maw’ ni nge mich uwan’um fapi maangang ni ke fal’eg Jesus? Boch e girdi’ e mom’maw’ ni nge mich uwan’rad. Dabmu pagtalin ni i fal’eg Jesus fapi maangang u fithik e yoor. Musko girdi’ ni ma togopuluw ngak, ma kar athamgilgad ni ngar pirieged e kireb rok ni gubin ngiyal’, machane dariy e toway rorad ni ngar rogned ni der ma fal’eg Jesus e maangang. (John 9:1-34) Maku, bay fan fapi maangang ni i fal’eg. Ya kan ayuweg e girdi’ riy ni ngar nanged ni ir e en ni yib rok Got.​—John 6:14.

Nap’an ni be fal’eg Jesus boch e maangang, ma de finey ni nge sap e girdi’ ngak. Machane, ke yog e sorok ngak Got, ya Ir e pi’ gelngin. U Capernaum fayanem, ma immoy u lan e tabinaw ni bay boor e girdi’ riy. Immoy be’ mugutgut ni baadag ni ngan golnag machane dabiyog ni nge yan nga lan e naun. Ere kar chabliyed e chigiy mi yad nguchuruy fare wormel nga but’. Faani guy Jesus gelngin michan’ rorad ngak me golnag fare mugutgut. Ngemu’, ma girdi’ ni ur moyed u rom e kar rogned e sorok ngak Got me lungurad: “Dawor da guyed ban’en ni aray rogon biid.” (Mark 2:1-4, 11, 12) Bochan fapi maangang ni ke fal’eg Jesus ma kan nog e sorok ngak Jehovah, ni Got rok, ma be ayuweg e girdi’ nib gafgow.

Machane, ngan golnag e girdi’ nib mar e gathi aram e n’en ni ri baga fan ko maruwel rok Jesus. Fa cha’ ni yoloy murung’agen Jesus e ke weliy: “Tiney e kan yoloy ni bochan e nge yog ni mich u wan’med ni Jesus e ir fare Messiah, ni faanem ni Fak Got, ni aram e u daken e re michan’ ney e ir rayog e yafos riy ngomed u fithingan.” (John 20:31) Arrogon, ke yib Jesus nga fayleng ma aram rogon, girdi’ ni ke pagan’rad ngak e rayog e yafas ngorad.

Maligach Ni Pi’

‘Ke yib Jesus nga fayleng?’ sana ga ra fith. ‘Ke yib u uw?’ Ma Jesus i yog ni gaar: “Ku gub u tharmiy nga but’ ni nggu rin’ e tini ni be finey e en ni ke l’ugeg ku gub, machane gathi nggu rin’ e tin ni gu be finey.” (John 6:38) I par Jesus nib fas u’mon ni yib nga fayleng nib girdi’ ni ir Fak Got ni kari maagirag rok. Ere mang e m’agan’’ fa en e ke l’og Jesus ngay ni nge yib nga fayleng? “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib,” Ke yog John ni reb e tayol ko gospel “ urngin e piin ni michan’rad ngak e aram e dab kur m’ad, ya ke yog e yafas ndariy n’umngin nap’an ngorad.” (John 3:16) Uw rogon nra riyul’ e re ney?

Be weliy e Bible ko mang fan ni mom’maw’ ko girdi’ ni nge palog ko yam’. Fa wu’ ni som’on e mabgol e kan pi’ ngorow e yafas ni bay athap riy ni nge yog ngorow e yafas ni manemus. Machane, kara turguyew ni nga ra togopuluwgad ko fa en ni sunmiyrad. (Genesis 3:1-19) Wenegan ni ke yib riy, e ke mang fa bin som’mon e denen ko girdi’, ma aram e musko pi bitir ku Adam nge Efa ma ke yib e yam’ ngorad. (Roma 5:12) Ere faanra nge yog e bin riyul’e yafas ko girdi’ ma thingar ni chuweg denen nge yam’.

Musko scientist, ma dabiyog rorad ni ngar thiliyeged boch ban’en u fithik i dowey ni nge dabki yim’ be’. Machane, fa en ni Ta Sunmiy e bay rogon ni nge ayuweg e girdi’ ni ngar flontgad ni nge yog e yafas ni manemus ngorad. Ma aram e n’en ni king e biyul ngay u lan e Bible. Fa wu’ som’mon e mabgol nge pi fakrow e ka ra pied yad nchuay ko sib rok e denen nge yam’. Kara thiliyegew e yafas nib flont ni ma fol rok Got ko yafas nib dar ku Got ma goo yow e ngara duguliyew ko mang e tin nib mat’aw nge tin nib kireb. Ra ngan chuwiy biyay e yafas nib flont, ma thingarni pi’ e puluwon nib puluw ni aram e yafas nib flont ni taab rogon ko yafas ni ke mul u pa’ e gallabthir ni som’on. Urngin e girdi’ ma dawora flontgad, ere dariy rogorad ni ngara pied e re puluwon nem.​—Psalm 49:7.

Ere ke yib Jehovah ni nge pi’ e ayuw. Ke thiliyeg Got e yafas rok Jesus ni ir e kari maagirag rok min ta’ nga yin fare ppin ni dawori nang e pumoon, ma ir e ke gargelnag Jesus. Boch e duw kafram, e sana dabi mich uwan’um ni bay e ppin ni dawori nang e pumoon e ke gargelnag e bitir. Machane, chiney, boch e scientist e ma fek e genes ko reb e gamanman min ta’ nga yugu reb. Ere mini’ e rayog ni nge yog ni dabiyog ni nge rin’ e En Tasunmiy ban’en nge diyen reb e ppin ni dawori nang e pumoon.

Bochan kan pi’ me yib nga fayleng be’ nib flont, ke mab e kanawo’ ni rayog ni ngan biyuliy e girdi’ e chiney. Machane, fare tir ni kefin ni gargeleg e susun ni nge ilal nge mang ba togta ma rayog ni nge golnag e girdi’ nib m’ar. Arrogon, ke par Jesus ni dariy e denen rok, be’ nib flont. Gathi kemus ni ke guy Jesus e gafgow ni ma un e girdi’ ngay. Machane ke un nga boch e magawon yi ir e immoy nib girdi’ ko ngiyal nem. Aram fan ni ke mang Jesus ba togta nib gol. Hebrews 4:15) Ma fal’eg Jesus e maangang nap’an ni immoy u fayleng, ma binem e be micheg ni riyul’ ni bay mat’awon nge gelngin ni nge golnag e girdi’ nib m’ar.​—Matthew 4:23.

Tomren dalip nge baley e duw ni ke par u fayleng, ma girdi’ ni ta togopuluw e kara lied Jesus kem’. Ke dag ni ir be’ nib flont ma ra yog ni nge fol ko fa en ni tasunmiy ni yugu demtrug ni ke yib e skeng ngak. (1 Peter 2:22) Yafas rok nib flont e ke pi’ ni maligach ni nge biyuliy e girdi’ ni dab kuura pared ni yad be sib ko denen nge yam’. Me gaar Jesus: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 15:13) Ke yan dalip e rran nga tomren ni ke yim, min faseg Jesus ko yam’ me mang reb e kan, ma tomren ni yan in e wik, me sul Jesus nga tharmiy ni nge pi’ ir ni maligach ngak Jehovah. (1 Korinth 15:3, 4; Hebrews 9:11-14) Bochan e n’en ni rin’, ma girdi’ ni kar leked luwan ay Jesus e ke fel’ rogorad riy.

Ga baadag ni ngan golnag e m’ar rom ni tafinay, lem, nge m’ar ko dowef fa? Faan mang ga baadag, ma ba t’uf ni nge mich Jesus uwan’um. Mang fan ni dab mman mu guy fare togta? Rayog ni ngam yodor ni faan ga ra fil murung’agen Jesus Kristus nge tin ni ba m’agan’ ngay ni ngan ayuweg e piin ba yul’yul’. Baadag e pi mich rok Jehovah ni ngara ayuweged gur.

[Sasing ko page 5]

Bay e mat’awon nge gelngin ni nge golnag be’ nib m’ar.