Mang Fan Ni Nge Mich Jesus Uwan’uy?

“MUSKO girdi’ ni gathi yad e kristiano ma ke mich uwan’rad ni Ir reb e sensey nrib fel’. Ir e en ni immoy u fayleng ni rib gilbuguwan.” (The World Book Encyclopedia) “Ir” mini? Cha’ nem e Jesus Kristus, ma ir i tababnag e ulung ko Kristiano.

Aram rogon e thin ko encyclopedia, machane, bokum million e girdi’ nu orient nge yu yang, e gathi ri yad manang Jesus, yad be lemnag ni fithingan Jesus e taareb rogon nga fithingan e girdi’ ni bay u lan e babyor ni yima fanay ko high school. Ku arrogon u lan e Galicia ko Christendom, boch e girdi’ ni theologian nge pi tayugang ko teliw rorad e be maruwaran’rad ko riyul’ e re chep ney u murung’agen Jesus ni aram fa aningeg ken e babyor u Bible (the Gospels) ni kan nog e gospel ngay.

Kemus ni kan yoloy fapi thin u murung’agen Jesus ma de riyul’ fa? Ri danga’! I Will Durant ni ir e en tayoloy e chep, e ke fal’eg i lemnag e n’en ni bay u lan fare gospel, me yoloy: “Ni boch e girdi’ ni kar pared u reb e mfen ma dar uned ko skul nib tolang e kar ted ni yat u murung’agen be’ nib gel gelngin ma rib fel’ ngongolen, ma chagiy e girdi’ nga taabang, e aram e maangang ni ka ba gel ko n’en ni kan ta’ nga babyor ni kan nog e gospel ngay. Ke yan l’agruw e chibog ni yima gathibthibnag e pi gospel nem, machane, fare chep u murung’agen e yafas rok, nge ngongol rok, nge machib ni i tay e be par nib tamilang. Ma aram e chep ni kaygi lingagil u murung’agen be’ nu Western.”

Machane, ka boor e girdi’ ni dariy fan Jesus uwan’rad ni bochan e girdi’ ni kan nog e kristiano ngorad e yad ma rin’ e tin nib kireb. ‘Kara paged reb e donmach nga Nagasaki,’ boch e girdi’ nu Sapan e kar rogned ni aram rogon. ‘Ya ka boor e piin nib kristiano ni ma par u Nagasaki ko yugu boch e mach nu Sapan.’ Machane, rayog ni ngam mog ni ba kireb reb e togta faanra ke ubchiya e m’ar ku be’ ni bochan nde fol ko mang e ke yog fare togta ngak? Ke n’uw nap’an ni ma dariyfannag e girdi’ e thin ni yog Jesus ko uw rogon ni ngan pithig e magawon ko girdi’. Machane, ke pi’ Jesus e kanawo’ ko uw rogon ni ngan pithig e magawon ko girdi’ u gubin e rran ku arrogon ko girdi’ nib gafgow u ga’ngin yang u fayleng. Aram fan ni gamad be piningmed ni ngam bieged e bin migid e article ngam nanged ko ir be’ nib miti mang girdi’.